ការប្តេជ្ញានេះបានធ្វើឡើងកាលពីថ្ងៃទី ២៧ ខែឧសភា ឆ្នាំ ២០២៦ ក្នុងឱកាស លោក Derek Yip ឯកអគ្គរដ្ឋទូតប្រទេសអូស្ត្រាលីប្រចាំកម្ពុជា បានជួបសម្ដែងការគួរសម និង ពិភាក្សាការងារជាមួយលោកបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា នៅទីស្តីការក្រសួង។

នៅក្នុងជំនួបនោះ លោកឯកអគ្គរដ្ឋទូត បានគូសបញ្ជាក់ពីចំណាប់អារម្មណ៍ស្វែងយល់លម្អិតអំពីបេសកកម្មអាទិភាពថ្មីៗ របស់ក្រសួងសម្រាប់ឆ្នាំបន្តបន្ទាប់ ដើម្បីបន្តពង្រឹង និង ពង្រីកកិច្ចសហការលើវិស័យអប់រំបន្ថែមទៀត ដោយរំលេចពីទិសដៅថ្មីៗ នៃកិច្ចសហប្រតិបត្តិការ ដើម្បីលើកកម្ពស់គន្លងអប់រំថ្មី ជំរុញការភ្ជាប់ទំនាក់ទំនងរវាងសាកលវិទ្យាល័យប្រទេសទាំងពីរ និង ជំរុញការចូលរួមរបស់និស្សិតកម្ពុជាក្នុងកម្មវិធីអាហារូបករណ៍អូស្ត្រាលីឆ្លើយតបនឹងតម្រូវការជំនាញខ្ពស់ សំដៅជួយកម្ពុជាឆ្ពោះទៅសម្រេចចក្ខុវិស័យក្លាយជាប្រទេសចំណូលមធ្យមកម្រិតខ្ពស់ក្នុងឆ្នាំ ២០៣០។

ជាមួយគ្នានេះ លោកឯកអគ្គរដ្ឋទូត បានបង្ហាញមោទនភាពចំពោះកំណើនកិច្ចសហប្រតិបត្តិការថ្មីៗ រវាងសាកលវិទ្យាល័យអូស្ត្រាលី និង កម្ពុជា ដែលបានបង្កើតនូវកម្មវិធីសិក្សារួមគ្នាជាច្រើន ដូចជា បរិញ្ញាបត្រទ្វេ (Dual Degree) និង កម្មវិធីសិក្សា ២ ឆ្នាំ នៅកម្ពុជា និង ២ ឆ្នាំ នៅអូស្ត្រាលី (Sandwich Program/Degree) និងកិច្ចសហការផ្លាស់ប្ដូរកម្មវិធីសិក្សាជាច្រើនទៀត។

ជាការឆ្លើយតប លោកឧបនាយករដ្ឋមន្ត្រី ហង់ជួន ណារ៉ុន បានថ្លែងអំណរគុណយ៉ាងជ្រាលជ្រៅដល់រដ្ឋាភិបាលអូស្ត្រាលី តាមរយៈស្ថានទូតអូស្ត្រាលីប្រចាំកម្ពុជា ដែលបានរួមចំណែកយ៉ាងសំខាន់ដល់ការអភិវឌ្ឍវិស័យអប់រំនៅកម្ពុជា ជាពិសេសការផ្ដល់នូវអាហារូបករណ៍ ការសហការផ្លាស់ប្ដូរបទពិសោធ Dual Degree និង Sandwich Program ដែលពិតជាផ្ដល់ឱកាសសម្បូរបែបដល់សិស្សនិស្សិតកម្ពុជាក្នុងការបន្តពង្រឹងសមត្ថភាព និង ជំនាញ។

ទន្ទឹមនឹងនេះ លោកឧបនាយករដ្ឋមន្ត្រី ក៏បានរំលេចគំនិតផ្ដួចផ្ដើមបង្កើតកិច្ចសហប្រតិបត្តិការបន្ថែមលើការបណ្ដុះបណ្ដាលគ្រូ នាយកសាលា និង ការគ្រប់គ្រងសាលារៀន និង កម្មវិធីផ្លាស់ប្ដូរនានារវាងសាលារៀនកម្ពុជា និង អូស្ត្រាលី និង ការរៀបចំពិព័រណ៍អប់រំរបស់អូស្ត្រាលីបន្ថែមទៀតនៅកម្ពុជា។

លោកឧបនាយករដ្ឋមន្ត្រី បានបញ្ជាក់ថា កិច្ចសហប្រតិបត្តិការរវាង ក្រសួងអប់រំ យុវជន និង កីឡា និង រាជរដ្ឋាភិបាលអូស្ត្រាលី គឺជាដៃគូយុទ្ធសាស្ត្រដ៏យូរអង្វែង និង មានវិសាលភាពធំធេង ក្នុងការគាំទ្រដល់កំណែទម្រង់ប្រព័ន្ធអប់រំនៅកម្ពុជា ចាប់តាំងពីកម្រិតមូលដ្ឋាន រហូតដល់ការអភិវឌ្ឍធនធានមនុស្សកម្រិតខ្ពស់ និង ការអប់រំបណ្ដុះបណ្ដាលបច្ចេកទេសវិជ្ជាជីវៈ ដោយផ្ដោតទិសដៅលើជំនាញដែលឆ្លើយតបនឹងតម្រូវការអភិវឌ្ឍន៍ជាតិ ដូចជា គោលនយោបាយអប់រំ , STEM (វិទ្យាសាស្ត្រ បច្ចេកវិទ្យា វិស្វកម្ម និង គណិតវិទ្យា) , សេដ្ឋកិច្ច និង កសិកម្ម៕
អត្ថបទ ៖ សំអឿន

The post អូស្ត្រាលី ប្តេជ្ញាជួយ កម្ពុជា ឲ្យសម្រេចបានចក្ខុវិស័យក្លាយជាប្រទេសមានចំណូលមធ្យមកម្រិតខ្ពស់ នៅឆ្នាំ ២០៣០ appeared first on Kampuchea Thmey Daily.

កម្មវិធីនេះ ត្រូវបានប្រកាសដាក់ឱ្យដំណើរការជាផ្លូវការ នៅព្រឹកថ្ងៃទី២១ ខែឧសភា ឆ្នាំ២០២៦នេះ ដោយរដ្ឋមន្ត្រីក្រសួងធនធានទឹក និងឧតុនិយម លោក ថោ ជេដ្ឋា និងលោក ដេរិក យីប ឯកអគ្គរដ្ឋទូតអូស្ត្រាលីប្រចាំនៅកម្ពុជា។ ភាពជាដៃគូនេះ កើតឡើងក្នុងពេលដែលការប្រែប្រួលអាកាសធាតុកំពុងជះឥទ្ធិពលកាន់តែខ្លាំងឡើងៗដល់ប្រព័ន្ធទឹកកសិកម្ម ជីវភាពរស់នៅរបស់សហគមន៍នៅក្នុងប្រទេសកម្ពុជា ដែលទាមទារនូវការពង្រឹងអភិបាលកិច្ចទឹក ដែលមានសារៈសំខាន់ខ្លាំងក្នុងការបង្កើនភាពធន់ទៅនឹងទឹកជំនន់ គ្រោះរាំងស្ងួត និងការប្រែប្រួលអាកាសធាតុ។

តាមរយៈកម្មវិធីភាពជាដៃគូដើម្បីភាពធន់នឹងអាកាសធាតុនេះ រដ្ឋាភិបាលអូស្ត្រាលី នឹងជួយដល់ប្រទេសកម្ពុជា ក្នុងការពង្រឹងប្រព័ន្ធអភិបាលកិច្ចទឹក ការកែលម្អភាពធន់នឹងអាកាសធាតុ និងការលើកកម្ពស់វិធីសាស្ត្រគ្រប់គ្រងនូវធនធានទឹក ប្រកបដោយបរិយាបន្ន ដោយមានការចូលរួមពីសហគមន៍នៅក្នុងអាងទន្លេមេគង្គលើ អាងទន្លេមេគង្គក្រោម និងអាងទន្លេសាប។

អូស្ត្រាលី និងកម្ពុជា បានបញ្ជាក់ជាថ្មីនូវភាពជាដៃគូដ៏យូរអង្វែង និងប្តេជ្ញាចិត្តរួមគ្នា ក្នុងការគាំទ្រដល់ការអភិវឌ្ឍប្រកបដោយចីរភាព និងភាពធន់នឹងអាកាសធាតុរបស់កម្ពុជា តាមរយៈវិធីសាស្ត្រដឹកនាំដោយសហគមន៍មូលដ្ឋាន កិច្ចសហប្រតិបត្តិការ និងសកម្មភាពអាកាសធាតុប្រកបដោយបរិយាបន្ន។

លោក ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានលើកឡើងអំពីការវាយតម្លៃរបស់រាជរដ្ឋាភិបាលកម្ពុជា ចំពោះភាពជាដៃគូជាមួយរដ្ឋាភិបាលអូស្ត្រាលី ក្នុងការគាំទ្រដល់កិច្ចខិតខំប្រឹងប្រែងរបស់កម្ពុជា ដើម្បីពង្រឹងភាពធន់នឹង ការប្រែប្រួលអាកាសធាតុ និងការគ្រប់គ្រងធនធានទឹកប្រកបដោយចីរភាព។ សម្រាប់កម្មវិធីភាពជាដៃគូអូស្ត្រាលី-កម្ពុជា ដើម្បីភាពធន់នឹងអាកាសធាតុ លោករដ្ឋមន្ត្រីថា នឹងជួយពង្រឹងការសម្របសម្រួលការរៀបចំផែនការនិងអភិបាលកិច្ចទឹក ដែលធន់នឹងអាកាសធាតុ ដើម្បីគាំទ្រដល់ការអភិវឌ្ឍរយៈពេលវែងរបស់កម្ពុជា ក៏ដូចជាសុខុមាលភាពប្រជាជន។

លោក ដេរិក យីប បានបញ្ជាក់ថា អូស្ត្រាលី គឺជាដៃគូដ៏ជិតស្និទ្ធរយៈពេលវែងរបស់កម្ពុជា ក្នុងការគាំទ្រដល់ការអភិវឌ្ឍប្រកបដោយនិរន្តរភាព កំណើនសេដ្ឋកិច្ច និងការពង្រឹងភាពធន់។ លោក ថា កម្មវិធី ACP4Climate ជាជំពូកថ្មីមួយ ទៀតនៅក្នុងភាពជាដៃគូនេះ ក្នុងការជួយពង្រឹងអភិបាលកិច្ចទឹក តាមរយៈជួយគាំទ្រដល់សហគមន៍ដែលងាយរងគ្រោះ និងកសាងភាពធន់ទៅនឹងអាកាសធាតុ។

ជាការកត់សម្គាល់ នៅក្នុងពិធីដាក់ឱ្យដំណើរការកម្មវិធីនៅថ្ងៃនេះ តំណាងមកពីក្រសួងស្ថាប័នពាក់ព័ន្ធ ដៃគូអភិវឌ្ឍន៍ អង្គការមិនមែនរដ្ឋាភិបាល និងអ្នកពាក់ព័ន្ធពីវិស័យឯកជន រួមទាំងសហគមន៍មូលដ្ឋាន ក៏បានជួបជុំគ្នាដើម្បីពិភាក្សាអំពីអាទិភាពសម្រាប់អភិបាលកិច្ចទឹកដែលធន់នឹងអាកាសធាតុ និងឱកាសសម្រាប់កិច្ចសហប្រតិបត្តិការ៕

The post កម្មវិធីភាពជាដៃគូអូស្ត្រាលី-កម្ពុជា ត្រូវបានដាក់ឱ្យដំណើរជាផ្លូវការដើម្បីគាំទ្រកម្ពុជាក្នុងការពង្រឹងភាពធន់នឹងអាកាសធាតុ appeared first on Kampuchea Thmey Daily.

ស្ថានទូតអូស្រ្តាលីប្រចាំកម្ពុជា បានឱ្យដឹងតាមរយៈបណ្តាញសង្គមថា អ្នកស្រាវជ្រាវកម្ពុជាបានចូលរួមធ្វើការជាមួយអ្នកស្រាវជ្រាវពីប្រទេសវៀតណាម និងឡាវ សិក្សាអំពីប្រព័ន្ធផលិតកម្មបសុសត្វឆ្លាតវៃដែលឆ្លើយតបការប្រែប្រួលអាកាសធាតុ ហើយទទួលបានបទពិសោធន៍ជាក់ស្តែងទាក់ទងនឹងបច្ចេកវិទ្យាថ្មីៗ និងវិធីសាស្ត្រពហុវិស័យ។

ការបណ្ដុះបណ្ដាលនេះគឺជាផ្នែកមួយនៃមូលនិធិ Africa–Asia Biosciences Challenge Fund (AABCF) ដែលភ្ជាប់អ្នកវិទ្យាសាស្ត្រពីអាហ្វ្រិក បណ្តាប្រទេសតំបន់ទន្លេមេគង្គ និងអូស្ត្រាលី ដើម្បីអភិវឌ្ឍដំណោះស្រាយដែលអាចអនុវត្តបាន និងសមស្របនឹងបរិបទក្នុងតំបន់ តាមរយៈកិច្ចសហការ និងការចែករំលែកចំណេះដឹង។

គាំទ្រដោយ មជ្ឈមណ្ឌលអូស្ត្រាលីសម្រាប់ការស្រាវជ្រាវកសិកម្មអន្តរជាតិ (ACIAR) សហការជាមួយសាកលវិទ្យាល័យ Queensland និងសាកលវិទ្យាល័យ Melbourne កម្មវិធីនេះបានជួយបង្កើតភាពជាដៃគូរយៈពេលវែង រវាងអ្នកស្រាវជា្រវពីបណ្តាលប្រទេសតំបន់ទន្លេមេគង្គ អាហ្វ្រិកនិងអូស្ត្រាលី ដើម្បីជំរុញកសិកម្មប្រកបដោយចីរភាពនិងការស្រាវជ្រាវ។

សូមជម្រាបថា ការចិញ្ចឹមបសុសត្វ និងបសុបក្សី នៅកម្ពុជា ជាសកម្មភាពកសិកម្មដ៏សំខាន់មួយដែលធ្វើឡើងដោយគ្រួសារកសិកម្ម ព្រមទាំងដើរតួនាទីយ៉ាងសំខាន់ក្នុងការទ្រទ្រង់ជីវភាពរស់នៅប្រចាំថ្ងៃ និងផ្តល់ប្រាក់ចំណូលដល់គ្រួសារនៅទីជនបទ។

ក្នុងចំណោមគ្រួសារកសិកម្មសរុបនៅប្រទេសកម្ពុជាមានគ្រួសារចូលរួម សកម្មភាពចិញ្ចឹមបសុសត្វ បសុបក្សី និងសត្វល្អិត ចំនួន ១ ៤២៤ ០០០គ្រួសារ។ ការអង្កេតកសិកម្មកម្ពុជា បានបែងចែកបសុសត្វជាពីរគឺ ប្រភេទបសុសត្វធំ មានដូចជា គោ ក្របី សេះ និងប្រភេទបសុសត្វតូចមាន ដូចជា ជ្រូក និងពពែ។ នេះបើយោងតាម របាយការណ៍ អង្កេតកសិកម្មកម្ពុជា ឆ្នាំ ២០២២ ផ្នែកទី៣៖ ការចិញ្ចឹមបសុសត្វ និងបសុបក្សី ។ របាយការណ៍នេះ ចូលរួមសហការផលិតដោយ វិទ្យាស្ថានជាតិស្ថិតិ, ក្រសួងផែនការ, ក្រសួងកសិកម្មរុក្ខាប្រមាញ់ និងនេសាទ គាំទ្របច្ចេកទេសដោយ អង្គការស្បៀង និងកសិកម្មនៃសហប្រជាជាតិ៕

The post អ្នកស្រាវជ្រាវកម្ពុជា ពង្រឹងសមត្ថភាពស្រាវជ្រាវការចិញ្ចឹមសត្វ នៅកេនយ៉ា ក្រោមការគាំទ្ររបស់អូស្ត្រាលី appeared first on Kampuchea Thmey Daily.

ឯកអគ្គរដ្ឋទូតបានលើកឡើងបែបនេះ ក្នុងពិធីអបអរសាទរការជួបជុំអតីតនិស្សិតរៀននៅអូស្ត្រាលីនិងកម្មវិធីពានរង្វាន់អតីតនិស្សិតឆ្នើមប្រចាំឆ្នាំ២០២៦ កាលពីរសៀលថ្ងៃទី២ ខែមេសា ឆ្នាំ២០២៦ក្រោមអធិបតីភាពលោកបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា។

ឯកអគ្គរដ្ឋទូតបានបន្តថា អូស្ត្រាលី ពិតជាមានមោទនភាពចំពោះការរួមចំណែករបស់អតីតនិស្សិតអូស្ត្រាលី ក្នុងការលើកកម្ពស់ការអភិវឌ្ឍសេដ្ឋកិច្ចសង្គមកម្ពុជាលើគ្រប់វិស័យទាំងសាធារណៈ ឯកជន និងអង្គការមិនមែនរដ្ឋាភិបាល។

លោកឯកអគ្គរដ្ឋទូតបានបន្តទៀតថា ទន្ទឹមនឹងការជួបជុំគ្នាប្រចាំឆ្នាំរបស់អតីតនិស្សិតកម្ពុជាពីគ្រប់មជ្ឈដ្ឋានដែលបានសិក្សានៅអូស្ត្រាលី នេះក៏ជាឱកាសបង្ហាញពីការទទួលស្គាល់ស្នាដៃ និងផ្ដល់កិត្តិយសដល់អតីតនិស្សិតដែលបានរួមចំណែកយ៉ាងសំខាន់ដល់ការអភិវឌ្ឍន៍សង្គម សេដ្ឋកិច្ចនៅកម្ពុជា និងការពង្រឹងទំនាក់ទំនងរវាងកម្ពុជា និងអូស្ត្រាលី តាមរយៈការផ្តល់ជូននូវពានរង្វាន់ ចំនួន ៣ ប្រភេទរួមមាន៖១. ពានរង្វាន់ភាពជាអ្នកដឹកនាំវ័យក្មេងសម្រាប់អតីតនិស្សិតវ័យក្មេងដែលមានសក្ដានុពល និងភាពជាអ្នកដឹកនាំ។ ២.ពានរង្វាន់ ភាពជាអ្នកដឹកនាំសហគមន៍សម្រាប់អ្នកដែលបានធ្វើការងារស្ម័គ្រចិត្ត ឬជួយដល់សហគមន៍យ៉ាងសកម្ម និងទី៣ ពានរង្វាន់អតីតនិស្សិតឆ្នើមប្រចាំឆ្នាំសម្រាប់អ្នកដែលមានស្នាដៃលេចធ្លោបំផុតក្នុងអាជីព ឬសង្គម។

ជាមួយគ្នានេះ បណ្ឌិតសភាចារ្យ ហង់ជួន ណារ៉ុន បានចូលរួមអបអរសាទរដល់អតីតនិស្សិតអាហារូបករណ៍អូស្ត្រាលីដែលទទួលបានពានរង្វាន់ឆ្នើមប្រចាំឆ្នាំ ទាំង ៣រូប ដោយបានរំលេចពីសារៈសំខាន់នៃចំណេះដឹងនិងជំនាញដែលពួកគេបានរៀននៅប្រទេសអូស្ត្រាលី ហើយបានយកមកប្រើប្រាស់បម្រើដល់ប្រយោជន៍សង្គម និងការអភិវឌ្ឍជាតិ ដែលនេះហើយគឺជាតម្លៃពិតប្រាកដនៃចំណេះដឹង។ ក្នុងន័យនេះ លោកបណ្ឌិតសភាចារ្យ ឧបនាយករដ្ឋមន្ត្រី សូមលើកទឹកចិត្តដល់អតីតនិស្សិតទាំងអស់ បន្តខិតខំប្រឹងប្រែងយកចិត្តទុកដាក់បំពេញតួនាទីភារកិច្ចឱ្យអស់ពីលទ្ធភាព ដោយប្រើប្រាស់ចំណេះនិងជំនាញដែលបានរៀន ដើម្បីចូលរួមចំណែកអភិវឌ្ឍប្រទេសជាតិ និងសូមបន្តអភិវឌ្ឍសមត្ថភាពខ្លួនឯងជាប្រចាំ។

លោកឧបនាយករដ្ឋមន្ត្រីបានបន្តថាតាមរយៈកម្មវិធីអាហារូបករណ៍អូស្ត្រាលីនៅកម្ពុជាក្នុងរយៈពេល ៣០ឆ្នាំមកនេះ គឺជាសក្ខីភាពដ៏រឹងមាំមួយ នៃទំនាក់ទំនងប្រកបដោយផ្លែផ្ការវាងប្រទេសទាំងពីរ និងបានគូសបញ្ជាក់ជាថ្មីនូវការប្ដេជ្ញាចិត្តបន្តពង្រឹងនិងពង្រីកកិច្ចសហប្រតិបត្តិការលើវិស័យអប់រំនៅកម្ពុជាឱ្យកាន់តែប្រសើរឡើង។

លោកបណ្ឌិតសភាចារ្យ ឧបនាយករដ្ឋមន្ត្រីបានថ្លែងអំណរគុណយ៉ាងជ្រាលជ្រៅដល់រដ្ឋាភិបាលអូស្ត្រាលី ចំពោះកិច្ចសហប្រតិបត្តិការយ៉ាងល្អលើគ្រប់វិស័យ ការបន្តគាំទ្រដល់វិស័យអប់រំ និងការផ្តល់អាហារូបករណ៍ដ៏មានតម្លៃដល់យុវជនកម្ពុជាជាង ៣ទសវត្សមកនេះ ដែលបានរួមចំណែកយ៉ាងសំខាន់ដល់ការអភិវឌ្ឍធនធានមនុស្សកម្ពុជាឱ្យក្លាយជាកម្លាំងចលករដ៏មានសក្ដានុពល ដើម្បីចូលរួមអភិវឌ្ឍសង្គមសេដ្ឋកិច្ចកម្ពុជាប្រកបដោយចីរភាព៕

អត្ថបទ៖សំអឿន

The post ៣០ឆ្នាំនេះ មានអតីតនិស្សិតកម្ពុជា ១ម៉ឺននាក់ បានសិក្សានៅអូស្ត្រាលី ដែលជាស្ពានភ្ជាប់ទំនាក់ទំនងប្រទេសទាំងពីរ appeared first on Kampuchea Thmey Daily.

ជំនួបនៅឯ​ទីក្រុងកង់បេរ៉ា ឧបនាយករដ្ឋមន្ត្រី ប្រាក់ សុខុន បានសម្តែងការពេញចិត្តចំពោះវឌ្ឍនភាពនៃកិច្ចសហប្រតិបត្តិការលើវិស័យការពារជាតិ និងសន្តិសុខរវាងកម្ពុជា និងអូស្ត្រាលី ដោយលោកបានអរគុណចំពោះប្រទេសអូស្ត្រាលី ដែលបន្តគាំទ្រដល់ការកសាងសមត្ថភាព និងការបណ្តុះបណ្តាលដល់កងកម្លាំងយោធាកម្ពុជា។

បើតាមខ្លឹមសារលើបណ្ដាញសង្គមផ្លូវការរបស់ក្រសួងការបរទេសកម្ពុជា ក្នុងជំនួបនោះ ប្រមុខការទូត ប្រាក់ សុខុន ក៏បានបញ្ជាក់ពីការទន្ទឹងរង់ចាំរបស់កម្ពុជា សម្រាប់ការពង្រឹងកិច្ចសហប្រតិបត្តិការបន្ថែមទៀតជាមួយអូស្ត្រាលីលើវិស័យដែលសក្តានុពលនានា រួមទាំងលើវិស័យយោធា តាមរយៈការផ្លាស់ប្តូរព័ត៌មាន និងការធ្វើសមយុទ្ធរួមរបស់កងទ័ពជើងទឹកនៃប្រទេសទាំងពីរ។

ក្រៅពីទំនាក់ទំនងទ្វេភាគី ក្នុងជំនួបនោះ ឧបនាយករដ្ឋមន្ត្រីទាំងពីរ ក៏បានផ្លាស់ប្តូរទស្សនៈគ្នាលើបញ្ហាតំបន់ និងអន្តរជាតិនានា ក្នុងពេលដែលសភាពការណ៍ពិភពលោកមានការប្រែប្រួលយ៉ាងឆាប់រហ័ស។ ចំណែកឯការវិវត្តថ្មីៗ ជុំវិញស្ថានភាពព្រំដែនកម្ពុជា-ថៃ ក៏ត្រូវបានលើកយកមកពិភាក្សាគ្នាយ៉ាងស៊ីជម្រៅផងដែរ។ ប៉ុន្តែខ្លឹមសារលម្អិតយ៉ាងណានោះ មិនទាន់ត្រូវបានទម្លាយឱ្យដឹងនោះឡើយ។

គួរឱ្យដឹងថា ក្នុងដំណើរទស្សនកិច្ចផ្លូវការនៅអូស្រ្តាលី នៅថ្ងៃទី១៦ ខែមីនា ឆ្នាំ២០២៦ រដ្ឋមន្ត្រីការបរទេសកម្ពុជា លោក ប្រាក់ សុខុន ក៏បានចូលជួបប្រធាន​រដ្ឋសភា​អូស្ត្រាលី លោក Milton Dick និងជំនួបទ្វេភាគីជាមួយនឹងសមភាគីរបស់លោក គឺលោកស្រី ផេននី វង រដ្ឋមន្ត្រីការបរទេសអូស្ត្រាលីផងដែរ។

ជំនួបទាំងនោះ គឺបានផ្ដោតលើការពង្រឹងពង្រីកបន្ថែមទៀតនូវទំនាក់ទំនង និងកិច្ចសហប្រតិបត្តិការទ្វេភាគីលើគ្រប់វិស័យ ក៏ដូចជាការចូលរួមចំណែកដល់សន្តិភាព សន្តិសុខ ស្ថិរភាព វិបុលភាពសម្រាប់ក្នុងតំបន់ និងសកលលោក៕

The post លោក ប្រាក់ សុខុន ជួបរដ្ឋមន្ត្រីការពារជាតិអូស្ត្រាលី ដោយជជែកពីការពង្រឹងកិច្ចសហប្រតិបត្តិការលើវិស័យយោធា appeared first on Kampuchea Thmey Daily.

លោក ប្រាក់ សុខុន បានសម្ដែងការអរគុណចំពោះលោក Milton Dick ក្នុងការអនុញ្ញាតឱ្យមាននូវជំនួបសម្តែងការគួរសមនេះឡើង អំឡុងពេលនៃសប្តាហ៍សម្រាកពីសម័យប្រជុំរដ្ឋសភា ដោយលោកឧបនាយករដ្ឋមន្ត្រី បញ្ជាក់ថា នេះបានបង្ហាញឱ្យឃើញពីការផ្តល់សារៈសំខាន់ខ្ពស់របស់អូស្ត្រាលីចំពោះទំនាក់ទំនងទ្វេភាគីជាមួយកម្ពុជា។

លោក ប្រាក់ សុខុន ក៏បានសង្កត់ធ្ងន់លើតម្លៃនៃការធ្វើការទូតសភា ដែលជាគំនិតផ្តួចផ្តើមរបស់សម្តេចតេជោ ហ៊ុន សែន ប្រធានព្រឹទ្ធសភាកម្ពុជា ដោយគូសបញ្ជាក់ទៅកាន់ប្រធានសភាអូស្រ្តាលី ថា នេះជាយន្តការក្នុងការពង្រឹងនូវទំនាក់ទំនងទ្វេភាគីដ៏យូរអង្វែងរវាងកម្ពុជា-អូស្ត្រាលីឱ្យកាន់តែរឹងមាំបន្ថែមទៀត។

បើតាមក្រសួងការបរទេសកម្ពុជា ក្នុងជំនួបនោះ ប្រមុខការទូតកម្ពុជា និងប្រធានសភាអូស្ត្រាលី ក៏បានផ្លាស់ប្តូរទស្សនៈគ្នាផងដែរលើវឌ្ឍនភាពថ្មីៗនៃស្ថានភាពព្រំដែនកម្ពុជា-ថៃ ព្រមទាំងបញ្ហាតំបន់ និងអន្តរជាតិនានាដែលជាកង្វល់រួម។

តបតាមការអញ្ជើញរបស់សមភាគីអូស្ត្រាលី លោក ប្រាក់ សុខុន រដ្ឋមន្ត្រីការបរទេសកម្ពុជា បានផ្ដើមបំពេញទស្សនកិច្ចផ្លូវការនៅអូស្រ្តាលី ពីថ្ងៃទី១៥ ដល់ថ្ងៃទី១៦ ខែមីនា ឆ្នាំ២០២៦។ តាមកម្មវិធីគ្រោងទុក ទស្សនកិច្ចនៅអូស្ត្រាលី លោក ប្រាក់ សុខុន នឹងមានជំនួបទ្វេភាគីជាមួយនឹងសមភាគីរបស់លោក គឺលោកស្រី ផេននី វង រដ្ឋមន្ត្រីការបរទេសអូស្ត្រាលី និងការចូលជួបថ្នាក់ដឹកនាំអូស្រ្តាលីមួយចំនួនទៀត ដើម្បីជជែកគ្នាពីការពង្រឹងពង្រីកបន្ថែមនូវទំនាក់ទំនង និងកិច្ចសហ ប្រតិបត្តិការទ្វេភាគីលើគ្រប់វិស័យ ក៏ដូចជាការចូលរួមចំណែកដល់សន្តិភាព សន្តិសុខ ស្ថិរភាព វិបុលភាពសម្រាប់ក្នុងតំបន់ និងសកលលោក។ បន្ថែមពីនេះ លោកក៏បានសំណេះសំណាលជួបជាមួយសហគមន៍ខ្មែរ ក៏ដូចជានិស្សិតដែលកំពុងរស់នៅ និងសិក្សាក្នុងប្រទេសអូស្ត្រាលីផងដែ៕

The post ប្រមុខការទូតកម្ពុជា ជួបប្រធានសភាអូស្ត្រាលី ដោយបញ្ជាក់ពីតម្លៃនៃការទូតសភា appeared first on Kampuchea Thmey Daily.

ក្រសួងការបរទេស នៃកម្ពុជា បញ្ជាក់ក្នុងសេចក្តីប្រកាសព័ត៌មាន នាថ្ងៃទី១០ ខែមីនា នេះ ថា ដំណើទស្សនកិច្ចផ្លូវការរបស់ឧបនាយករដ្ឋមន្ត្រី ប្រាក់ សុខុន  រដ្ឋមន្ត្រីការបរទេសកម្ពុជាទៅកាន់ប្រទេសនូវែលសេឡង់ និងអូស្ត្រាលីគឺតបតាមការអញ្ជើញរបស់រដ្ឋមន្ត្រីការបរទេសនូវែលសេឡង់លោក វីនស្តុន ភីធឺរ  និងរដ្ឋមន្ត្រីការបរទេសអូស្ត្រាលី លោកស្រី ផេននី វង។

តាមគម្រោង លោក ប្រាក់ សុខុន នឹងចំណាយពេល២ថ្ងៃ គឺចាប់ពីថ្ងៃទី១៣ ដល់ ១៤ ខែមីនា ដើម្បីបំពេញទស្សនកិច្ចផ្លូវការនៅលើទឹកដីនូវែលសេឡង់ដោយ នឹងមានជំនួបទ្វេភាគីជាមួយរដ្ឋមន្ត្រីការបរទេស និងថ្នាក់ដឹកនាំនូវែលសេឡង់។ លោក ប្រាក់ សុខុន នឹងចំណាលពេល២ថ្ងៃដូចគ្នា គឺនៅថ្ងៃទី១៥ និងថ្ងៃទី ១៦ ខែមីនា ដើម្បីជួបជាមួយរដ្ឋមន្ត្រីការបរទេស និងថ្នាក់ដឹកនាំរបស់អូស្ត្រាលី។

ក្រសួងការបរទេសអះអាងក្នុងសេចក្ដីប្រកាសព័ត៌មានថា ជំនួបរវាងប្រមុខការបរទេសកម្ពុជា ជាមួយសមភាគី និងថ្នាក់ដឹកនាំរបស់នូវែលសេឡង់ និងអូស្ត្រាលី ផ្តល់ឱកាសដ៏ល្អ ដើម្បីពង្រឹង និងពង្រីកបន្ថែមនូវទំនាក់ទំនង និងកិច្ចសហប្រតិបត្តិការទ្វេភាគីលើគ្រប់វិស័យ ក៏ដូចជាចូលរួមចំណែកដល់សន្តិភាព សន្តិសុខ ស្ថិរភាព វិបុលភាពក្នុងតំបន់ និងសកលលោក។

ក្រសួងការបរទេសនៃកម្ពុជា គូសបញ្ជាក់ថា៖«ដំណើរទស្សនកិច្ចនាពេលខាងមុខនេះ គឺជាសក្ខីភាពនៃចំណងមិត្តភាពយូរអង្វែង និងកិច្ចសហ ប្រតិបត្តិការប្រកបដោយផ្លែផ្ការវាងកម្ពុជា ជាមួយនូវែលសេឡង់ និងអូស្ត្រាលី។ »។

កម្ពុជា អូស្ត្រាលី បានបង្កើតទំនាក់ទំនងការទូតជាផ្លូវការជាមួយគ្នានៅក្នុងឆ្នាំ១៩៥២ ប៉ុន្តែទំនាក់ទំនងនេះត្រូវបានកាត់ផ្ដាច់នៅពេលដែលកម្ពុជាធ្លាក់ចូលសង្គ្រាមស៊ីវិល។ ទំនាក់ទំនងការទូតទ្វេភាគីនេះ ត្រូវបានតភ្ជាប់ឡើងវិញនៅក្នុងឆ្នាំ១៩៩១។ ជារួមទំនាក់ទំនងការទូតទ្វេភាគីរវាងកម្ពុជា-អូស្ត្រាលី មកដល់ឆ្នាំ២០២៦ នេះ គឺឈានដល់វ័យ៧៤ឆ្នាំហើយ។  ដោយឡែកចំពោះទំនាក់ទំនងការទូតរវាងកម្ពុជា និងនូវែលសេឡង់ វិញ គឺប្រទេសទាំងពីរ បានភ្ជាប់ទំនាក់ទំនងការទូតជាមួយគ្នាជាផ្លូវការនៅក្នុងឆ្នាំ១៩៥៩ ដែលចូលមកដល់ឆ្នាំ ២០២៦នេះ ទំនាក់ទំនងការទូតទ្វេភាគី បានឈានដល់វ័យ៦៧ឆ្នាំហើយ។

គួរកត់សម្គាល់ថា ដំណើរទស្សនកិច្ចរបស់ប្រមុខការទូតកម្ពុជា ទៅកាន់ប្រទេសនូវែលសេឡង់ និងប្រទេសអូស្ត្រាលី គឺនឹងធ្វើឡើងក្រោយពីដំណើរទស្សនកិច្ចនៅប្រទេសសិង្ហបុរី ដែលរដ្ឋមន្ត្រីការបរទេសកម្ពុជា កំពុងបំពេញទស្សនកិច្ចរយៈពេល២ថ្ងៃ គឺក្នុងថ្ងៃទី១០ និងថ្ងៃទី១១ ខែមីនា ឆ្នាំ២០២៦ នេះ៕  

ដោយ៖ ង៉ិល ណារ៉ាត់

The post ប្រមុខការទូតកម្ពុជា នឹងធ្វើទស្សនកិច្ចនៅនូវែលសេឡង់ និងអូស្ត្រាលី ដើម្បីពង្រឹងទំនាក់ទំនង និងរួមចំណែកដល់សន្តិភាពតំបន់ និងសកល appeared first on Kampuchea Thmey Daily.

រដ្ឋសភាជាតិកម្ពុជា កាលពីថ្ងៃទី១៦ ខែមករា ឆ្នាំ២០២៦ បានអនុម័តទាំងស្រុងទៅលើសេចក្តីព្រាងច្បាប់ស្តីពីការអនុម័តយល់ព្រមលើអនុសញ្ញាអង្គការសហប្រជាជាតិស្តីពីនីតិសមុទ្រ ឬជាភាសាអង់គ្លេសហៅកាត់ថា UNCLOS តាមការស្នើឡើងដោយរាជរដ្ឋាភិបាល ហើយសេចក្ដីច្បាប់នេះ ក៏ទទួលបានការឯកភាពដោយឥតកែប្រែពីព្រឹទ្ធសភាផងដែរ កាលពីថ្ងៃទី២១ ខែមករា ឆ្នាំ២០២៦។

ស្ថានទូតអូស្ត្រាលីប្រចាំរាជធានីភ្នំពេញ បានលើកឡើងពីវឌ្ឍនភាពរបស់កម្ពុជាក្នុងការផ្តល់សច្ចាប័នលើអនុសញ្ញាមួយនេះ ដែលអូស្រ្តាលីចាត់ទុកថា គឺជាក្របខណ្ឌច្បាប់ដ៏ពេញលេញសម្រាប់សកម្មភាពនៅក្នុងមហាសមុទ្រ និងសមុទ្រ។ អូស្ត្រាលី ថា នេះជាការវិវត្តជាវិជ្ជមានសម្រាប់តំបន់ ដែលគួរឱ្យស្វាគមន៍។

«ក្នុងនាមជារដ្ឋដែលមានដែនសមុទ្រ អូស្ត្រាលី និងកម្ពុជា គាំទ្រដែនសមុទ្រដែលមានសន្តិភាព និងស្ថិរភាព»។ នេះជាសេចក្ដីថ្លែងការណ៍របស់អូស្ត្រាលី ដែលបានសរសេរនៅលើទំព័រហ្វេសប៊ុករបស់ស្ថានទូតអូស្ត្រាលីប្រចាំកម្ពុជា កាលពីថ្ងៃទី១១ ខែកុម្ភៈ ឆ្នាំ២០២៦។

កន្លងទៅ រដ្ឋាភិបាលជប៉ុន តាមរយៈស្ថានទូតជប៉ុនប្រចាំកម្ពុជា ក៏បានបង្ហាញការគាំទ្រដូចគ្នានេះផងដែរចំពោះកិច្ចខិតខំប្រឹងប្រែងរបស់កម្ពុជា ក្នុងការផ្តល់សច្ចាប័នលើអនុសញ្ញា UNCLOS។ លោក អ៊ូអិណុ អាត់ស៊ូស៊ី ឯកអគ្គរាជទូតជប៉ុនប្រចាំកម្ពុជា បានបញ្ជាក់ថា រដ្ឋាភិបាលជប៉ុននឹងបន្តចូលរួមចំណែកយ៉ាងសកម្មក្នុងការថែរក្សា និងអភិវឌ្ឍសណ្តាប់ធ្នាប់សមុទ្រដោយសេរី និងបើកចំហ ផ្អែកលើច្បាប់អន្តរជាតិដូចដែលបានឆ្លុះបញ្ចាំងនៅក្នុងអនុសញ្ញា UNCLOS ហើយនឹងសហការយ៉ាងជិតស្និទ្ធជាមួយកម្ពុជា។

អនុសញ្ញាអង្គការសហប្រជាជាតិស្តីពីនីតិសមុទ្រ ជាឧបករណ៍គតិយុត្តអន្តរជាតិដ៏សំខាន់ និងមានលក្ខណៈសកលដែលកំណត់ព្រំដែនសមុទ្រ សេរីភាពផ្នែកនាវាចរណ៍តាមផ្លូវសមុទ្រ ក៏ដូចជាសិទ្ធិ និងកាតព្វកិច្ចរបស់រដ្ឋភាគីក្នុងការប្រើប្រាស់លម្អសមុទ្រ សេចក្តីណែនាំសម្រាប់ការធ្វើធុរកិច្ច កិច្ចការពារបរិស្ថាន ការគ្រប់គ្រងធនធានធម្មជាតិសមុទ្រ និងបទប្បញ្ញត្តិពាក់ព័ន្ធនឹងអាជ្ញាធរបាតសមុទ្រអន្តរជាតិ ព្រមទាំងយន្តការដោះស្រាយវិវាទនីតិសមុទ្រ។

ការផ្ដល់សច្ចាប័នលើអនុសញ្ញានេះ នឹងផ្តល់អត្ថប្រយោជន៍សំខាន់ៗជាច្រើនដល់កម្ពុជា ដោយទទួលបានក្របខណ្ឌច្បាប់សមុទ្រមួយពេញលេញសម្រាប់កិច្ចការសមុទ្រ ក្នុងនាមកម្ពុជាជាប្រទេសជាប់សមុទ្រ ពិសេសនោះគឺកម្ពុជានឹងអាចពង្រឹងអធិបតេយ្យជាតិខ្លួនលើដែនទឹកសមុទ្រ ក៏ដូចជាការទទួលបានកិច្ចការពារតាមច្បាប់សមុទ្រអន្តរជាតិ និងការដោះស្រាយបញ្ហាសមុទ្រជាមួយបណ្តាប្រទេសនានា៕

ដោយ៖ ធឿន វ៉ាន់សុង

The post អូស្ត្រាលីស្វាគមន៍កម្ពុជាចំពោះការផ្ដល់សច្ចាប័នលើ UNCLOS ដើម្បីធានាស្ថិរភាពដែនសមុទ្រ appeared first on Kampuchea Thmey Daily.