អ្នកស្រាវជ្រាវកម្ពុជា ពង្រឹងសមត្ថភាពស្រាវជ្រាវការចិញ្ចឹមសត្វ នៅកេនយ៉ា ក្រោមការគាំទ្ររបស់អូស្ត្រាលី

អ្នកស្រាវជ្រាវកម្ពុជាមួយរូបមកពីវិទ្យាស្ថានជាតិស្រាវជ្រាវសុខភាពសត្វ និងផលិតកម្មសត្វ កំពុងចូលរួមកម្មវិធីបណ្ដុះបណ្ដាលរយៈពេល ៣ ខែ នៅវិទ្យាស្ថានស្រាវជ្រាវបសុសត្វអន្តរជាតិ (ILRI) ប្រទេសកេនយ៉ា ក្នុងគោលបំណងពង្រឹងសមត្ថភាពស្រាវជ្រាវបសុសត្វ និងសិក្សាបច្ចេកវិទ្យាថ្មីៗសម្រាប់ការចិញ្ចឹមសត្វ និងវិស័យកសិកម្មកម្ពុជា។

ស្ថានទូតអូស្រ្តាលីប្រចាំកម្ពុជា បានឱ្យដឹងតាមរយៈបណ្តាញសង្គមថា អ្នកស្រាវជ្រាវកម្ពុជាបានចូលរួមធ្វើការជាមួយអ្នកស្រាវជ្រាវពីប្រទេសវៀតណាម និងឡាវ សិក្សាអំពីប្រព័ន្ធផលិតកម្មបសុសត្វឆ្លាតវៃដែលឆ្លើយតបការប្រែប្រួលអាកាសធាតុ ហើយទទួលបានបទពិសោធន៍ជាក់ស្តែងទាក់ទងនឹងបច្ចេកវិទ្យាថ្មីៗ និងវិធីសាស្ត្រពហុវិស័យ។

ការបណ្ដុះបណ្ដាលនេះគឺជាផ្នែកមួយនៃមូលនិធិ Africa–Asia Biosciences Challenge Fund (AABCF) ដែលភ្ជាប់អ្នកវិទ្យាសាស្ត្រពីអាហ្វ្រិក បណ្តាប្រទេសតំបន់ទន្លេមេគង្គ និងអូស្ត្រាលី ដើម្បីអភិវឌ្ឍដំណោះស្រាយដែលអាចអនុវត្តបាន និងសមស្របនឹងបរិបទក្នុងតំបន់ តាមរយៈកិច្ចសហការ និងការចែករំលែកចំណេះដឹង។

គាំទ្រដោយ មជ្ឈមណ្ឌលអូស្ត្រាលីសម្រាប់ការស្រាវជ្រាវកសិកម្មអន្តរជាតិ (ACIAR) សហការជាមួយសាកលវិទ្យាល័យ Queensland និងសាកលវិទ្យាល័យ Melbourne កម្មវិធីនេះបានជួយបង្កើតភាពជាដៃគូរយៈពេលវែង រវាងអ្នកស្រាវជា្រវពីបណ្តាលប្រទេសតំបន់ទន្លេមេគង្គ អាហ្វ្រិកនិងអូស្ត្រាលី ដើម្បីជំរុញកសិកម្មប្រកបដោយចីរភាពនិងការស្រាវជ្រាវ។

សូមជម្រាបថា ការចិញ្ចឹមបសុសត្វ និងបសុបក្សី នៅកម្ពុជា ជាសកម្មភាពកសិកម្មដ៏សំខាន់មួយដែលធ្វើឡើងដោយគ្រួសារកសិកម្ម ព្រមទាំងដើរតួនាទីយ៉ាងសំខាន់ក្នុងការទ្រទ្រង់ជីវភាពរស់នៅប្រចាំថ្ងៃ និងផ្តល់ប្រាក់ចំណូលដល់គ្រួសារនៅទីជនបទ។

ក្នុងចំណោមគ្រួសារកសិកម្មសរុបនៅប្រទេសកម្ពុជាមានគ្រួសារចូលរួម សកម្មភាពចិញ្ចឹមបសុសត្វ បសុបក្សី និងសត្វល្អិត ចំនួន ១ ៤២៤ ០០០គ្រួសារ។ ការអង្កេតកសិកម្មកម្ពុជា បានបែងចែកបសុសត្វជាពីរគឺ ប្រភេទបសុសត្វធំ មានដូចជា គោ ក្របី សេះ និងប្រភេទបសុសត្វតូចមាន ដូចជា ជ្រូក និងពពែ។ នេះបើយោងតាម របាយការណ៍ អង្កេតកសិកម្មកម្ពុជា ឆ្នាំ ២០២២ ផ្នែកទី៣៖ ការចិញ្ចឹមបសុសត្វ និងបសុបក្សី ។ របាយការណ៍នេះ ចូលរួមសហការផលិតដោយ វិទ្យាស្ថានជាតិស្ថិតិ, ក្រសួងផែនការ, ក្រសួងកសិកម្មរុក្ខាប្រមាញ់ និងនេសាទ គាំទ្របច្ចេកទេសដោយ អង្គការស្បៀង និងកសិកម្មនៃសហប្រជាជាតិ៕