ការវាយប្រហារ Archives - Kampuchea Thmey Daily

អ៊ីស្រាអែលវាយប្រហារនៅលីបង់ សម្លាប់មនុស្សជាង១០នាក់ និងរបួសរាប់សិបនាក់

Minea Neu — Mon, 06 Apr 2026 05:50:00 +0000

ក្រសួងសុខាភិបាលលីបង់លើកឡើងក្នុងសេចក្តីថ្លែងការណ៍មួយថា ការវាយប្រហារតាមអាកាសរបស់អ៊ីស្រាអែលលើភូមិ Kfarhata ភាគខាងត្បូងប្រទេសលីបង់ បានសម្លាប់មនុស្ស៧នាក់ កាលពីថ្ងៃអាទិត្យ រួមទាំងកុមារអាយុ៤ឆ្នាំម្នាក់ ខណៈរបួសរាប់សិបនាក់។

យោងតាមភ្នាក់ងារសាព័ត៌មានរ៉យទ័រ ផ្សាយថ្ងៃទី៥ ខែមេសា ឆ្នាំ២០២៦ ក្រសួងសុខាភិបាលលីបង់ បានបន្ថែមថា៖ « ការវាយប្រហារមួយផ្សេងទៀតរបស់អ៊ីស្រាអែលនៅថ្ងៃដដែលលើសង្កាត់ Jnah ក្នុងទីក្រុង Beirut ក៏បានសម្លាប់មនុស្ស៤នាក់ និងរបួស ៣៩នាក់ផងដែរ»។

អ៊ីស្រាអែលវាយអ៊ីរ៉ង់។ រូបភាព៖ Reuters

ខណៈគ្រិស្តបរិស័ទលីបង់ជាងមួយភាគបីនៃចំនួនប្រជាជន បានប្រារព្ធពិធីបុណ្យ Easter Sunday តែត្រូវចួបប្រទះនឹងថ្ងៃដ៏អាក្រក់បំផុតមួយរបស់ខ្លួនចាប់តាំងពីការប្រយុទ្ធជាមួយអ៊ីស្រាអែលផ្ទុះឡើងនៅដើមខែមុន។

មិនតែប៉ុណ្ណោះ ពេញមួយថ្ងៃនៃទីក្រុង Beirut បន្លឺឡើងដោយសំឡេងវាយប្រហារនិងមានយន្តហោះហោះនៅកម្ពស់ទាបៗពីលើផ្ទះរបស់ពួកគេទៀតផង។ ប្រព័ន្ធផ្សព្វផ្សាយរដ្ឋរាយការណ៍ថា តំបន់ជាយក្រុងភាគខាងត្បូងនៃរដ្ឋធានីត្រូវបានវាយប្រហារតាមអាកាសចំនួន៨លើក។

កាលពីថ្ងៃអាទិត្យ កងទ័ពលីបង់លើកឡើងថា ទាហានម្នាក់សម្លាប់នៅក្នុងការវាយប្រហាររបស់អ៊ីស្រាអែលនៅភាគខាងត្បូងប្រទេសលីបង់។

គួរបញ្ជាក់ថា ប្រទេសលីបង់ត្រូវបានអូសទាញចូលទៅក្នុងជម្លោះមជ្ឈិមបូព៌ា ពេលដែលក្រុមហេសបូឡាគាំទ្រដោយអ៊ីរ៉ង់ចាប់ផ្តើមបាញ់រ៉ុក្កែតទៅលើអ៊ីស្រាអែលនៅថ្ងៃទី០២ ខែមីនា ដើម្បីជួយទីក្រុងតេហេរ៉ង់។

អ៊ីស្រាអែលបានបើកការវាយប្រហារលើប្រទេសលីបង់និងឈ្លានពានភាគខាងត្បូងនៃប្រទេស ក្លាយជាការរីករាលដាលដ៏ហិង្សាបំផុតនៃសង្គ្រាមរវាងសហរដ្ឋអាមេរិកនិងអ៊ីស្រាអែលលើអ៊ីរ៉ង់។

ក្រសួងសុខាភិបាលលីបង់និយាយថា មនុស្ស ១ ៤៦១នាក់ត្រូវបានសម្លាប់នៅក្នុងការវាយប្រហាររបស់អ៊ីស្រាអែលនៅលីបង់គិតត្រឹមថ្ងៃអាទិត្យ វាបានបង្កើនចំនួនអ្នកស្លាប់ ចាប់តាំងពីការចាប់ផ្តើមសង្គ្រាម ហើយមនុស្សជាងមួយលាននាក់បានផ្លាស់ទីលំនៅ៕

ប្រែសម្រួល៖ ណឺ មិនា

The post អ៊ីស្រាអែលវាយប្រហារនៅលីបង់ សម្លាប់មនុស្សជាង១០នាក់ និងរបួសរាប់សិបនាក់ appeared first on Kampuchea Thmey Daily.

ប៉ាគីស្ថានវាយប្រហារលើមន្ទីពេទ្យនៅអាហ្វហ្គានីស្ថានសម្លាប់មនុស្ស៤០០នាក់ របួស២៥០នាក់

Minea Neu — Tue, 17 Mar 2026 10:29:47 +0000

អ្នកនាំពាក្យរដ្ឋាភិបាលតាលីបង់នៅអាហ្វហ្គានីស្ថាន បានឱ្យដឹងកាលពីថ្ងៃអង្គារថា យោធាប៉ាគីស្ថានបើកការវាយប្រហារតាមអាកាសលើមន្ទីរពេទ្យព្យាបាលអ្នកញៀនថ្នាំមួយកន្លែងនៅទីក្រុង Kabul មានមនុស្សយ៉ាងហោចណាស់ ៤០០ស្លាប់ និងរងរបួស ២៥០ នាក់។ នេះបើយោងតាមភ្នាក់ងាររ៉យទ័រ ផ្សាយថ្ងៃទី១៧ ខែមីនា ឆ្នាំ២០២៦ ។

ការវាយប្រហារតាមអាកាសរបស់ប៉ាគីស្ថាន លើអាហ្វហ្គានីស្ថាន។ រូបភាព៖ Reuters

ប៉ាគីស្ថានបានបដិសេធការអះអាងខាងលើថា៖ «វាមិនពិត ជារឿងបំភាន់! ប៉ាគីស្ថានបានកំណត់គោលដៅយ៉ាងច្បាស់ទៅលើទីតាំងយោធា និងហេដ្ឋារចនាសម្ព័ន្ធគាំទ្រភេរវកម្មប៉ុណ្ណោះ នៅយប់ថ្ងៃចន្ទ»។

ចំណែករដ្ឋមន្ត្រីក្រសួងព័ត៌មានប៉ាគីស្ថាន លោក Attaullah Tarar បង្ហោះលើបណ្តាញ X ថា៖ « ការផ្ទុះបន្ទាប់បន្សំដែលអាចមើលឃើញបន្ទាប់ពីការវាយប្រហារ បង្ហាញយ៉ាងច្បាស់ពីវត្តមាននៃឃ្លាំងគ្រាប់រំសេវធំៗ»។

គួរបញ្ជាក់ថាការវាយប្រហារតាមអាកាសនេះកើតឡើងប៉ុន្មានម៉ោង បន្ទាប់ពីប្រទេសចិននិយាយថាចិនត្រៀមខ្លួនរួចជាស្រេច ដើម្បីបន្តកិច្ចខិតខំប្រឹងប្រែងបន្ធូរបន្ថយភាពតានតឹងរវាងប្រទេសរដ្ឋអ៊ីស្លាមអាស៊ីខាងត្បូង ជំរុញឱ្យប្រទេសទាំងពីរជៀសវាងការពង្រីកសង្គ្រាម និងវិលត្រឡប់មកតុចរចាវិញ។

ជម្លោះនេះបានចាប់ផ្តើមកាលពីខែមុន វាគឺជាជម្លោះដ៏អាក្រក់បំផុតមិនធ្លាប់មានរវាងប្រទេសជិតខាងដែលមានព្រំដែនប្រវែង ២ ៦០០គីឡូម៉ែត្រពីគ្នា។

យ៉ាងណាជម្លោះរវាងប្រទេសទាំងពីរបានថមថយទៅវិញ ពេលមានប្រទេសជាមិត្ត រួមទាំងប្រទេសចិនសម្របសម្រួល និងបញ្ចប់ការប្រយុទ្ធមុនពេលផ្ទុះឡើងម្តងទៀត។

ការកើនឡើងនៃភាពតានតឹងនេះកើតឡើង ចំពេលមានអស្ថិរភាពកាន់តែខ្លាំងក្នុងតំបន់ជិតខាង ជាកន្លែងដែលមានការវាយប្រហាររបស់សហរដ្ឋអាមេរិក-អ៊ីស្រាអែលលើអ៊ីរ៉ង់។

វាជាការសងសឹករបស់ទីក្រុងតេហេរ៉ង់ទៅមូលដ្ឋានទ័ពរបស់អាមេរិកវិញ ដែលធ្វើឱ្យមជ្ឈិមបូព៌ាធ្លាក់ចូលទៅក្នុងវិបត្តិ៕

ប្រែសម្រួល៖ ណឺ មិនា

The post ប៉ាគីស្ថានវាយប្រហារលើមន្ទីពេទ្យនៅអាហ្វហ្គានីស្ថានសម្លាប់មនុស្ស៤០០នាក់ របួស២៥០នាក់ appeared first on Kampuchea Thmey Daily.

បារំាងអះអាងពីការស្លាប់និងរបួសទាហានរបស់ខ្លួនក្នុងការវាយប្រហារពីក្រុមគាំទ្រអ៊ីរ៉ង់នៅអ៊ីរ៉ាក់

Minea Neu — Sat, 14 Mar 2026 05:56:10 +0000

ចាប់តាំងពីការវាយប្រហាររបស់សហរដ្ឋអាមេរិក-អ៊ីស្រាអែលលើអ៊ីរ៉ង់បានធ្វើឲ្យរីករាលដាលនៃភាពអសន្តិសុខនៅស្ទើរទាំងតំបន់មជ្ឈិមបូព៌ា រធានាធិបតីបារាំង លោក អេម៉ានូអែល ម៉ាក្រុង (Emmanuel Macron) ក៏បានចេញមកអះអាងពីការបាត់បង់ជីវិតយោធារបស់ខ្លួនម្នាក់ និង៦នាក់ផ្សេងទៀតរងរបួស។

កងឆ្មាំបដិវត្តន៍អ៊ីរ៉ង់ បានបើកការវាយប្រហារជាច្រើនមកលើមូលមូលដ្ឋានទ័ពអាមេរិកនៅតាមប្រទេសក្នុងតំបន់ឈូងសមុទ្រ ហើយក្រុមសកម្មប្រយុទ្ធគាំទ្រដោយអឺរ៉ង់នៅក្នុងប្រទេសផ្សេងៗទៀត មានលីបង់ អ៊ីរ៉ាក់ ជាដើម ក៏បានធ្វើសកម្មភាពដើម្បីគាំទ្រអ៊ឺរ៉ង់ផងដែរ។

យោងតាម France24 ផ្សាយថ្ងៃទី១៣ខែមីនា ឆ្នាំ២០២៦ ប្រធានាធិបតីបារាំង លោក អេម៉ានូអែល ម៉ាក្រុង (Emmanuel Macron) បង្ហោះនៅលើបណ្តាញសង្គម X ថា៖ «សមាជិកកងកម្លាំងប្រដាប់អាវុធរបស់ប្រទេសបារាំងម្នាក់ស្លាប់ អំឡុងពេលមានការវាយប្រហារមួយនៅក្នុងតំបន់ Erbil នៃប្រទេសអ៊ីរ៉ាក់ និងមានទាហានជាច្រើននាក់ផ្សេងទៀតរងរបួសផងដែរ»។

លោក អេម៉ានូអែល ម៉ាក្រុង និងទាហានបារំាង។ រូបភាព៖ Reuters

លោកម៉ាក្រុងបដិសេធមិនបកស្រាយលម្អិតដោយការភ្ជាប់ក្រុមណាមួយនៅពីក្រោយការវាយប្រហារដែលបណ្តាលឲ្យសមាជិកយោធារបស់ខ្លួនបានស្លាប់និងរបួសនោះដែរ។

ទោះបីយ៉ាងណា មេបញ្ជាការយោធាបារាំង បានឱ្យដឹងថា ដ្រូនបានវាយប្រហារមូលដ្ឋានមួយកន្លែងដែលកងទ័ពកំពុងចូលរួមក្នុងការហ្វឹកហ្វឺនប្រឆាំងភេរវកម្មជាមួយសមភាគីអ៊ីរ៉ាក់។

យោធាបារាំងលើកឡើងកាលពីថ្ងៃព្រហស្បតិ៍កន្លងទៅថា៖ «សមាជិកកងកម្លាំង៦នាក់បានរងរបួសនៅក្នុងការវាយប្រហារនេះ។ វាមិនច្បាស់ទេថាតើទាហានដែលបានស្លាប់នោះស្ថិតក្នុងចំណោមអ្នកស្លាប់ទាំងនោះឬអត់»។

ចំណែក លោក ម៉ាក្រុងថា៖ « សង្គ្រាមនៅអ៊ីរ៉ង់មិនបង្ហាញពីភាពត្រឹមត្រូវនៃការវាយប្រហារបែបនេះបានទេ។ យើងមិនអាចទទួលយកបាន»។

គួរបញ្ជាក់ថា ទាហានមកពីប្រទេសជាច្រើន រួមទាំងអ៊ីតាលី និងបារាំង កំពុងបណ្តុះបណ្តាលក្នុងតំបន់ Kurdish ប្រទេសអ៊ីរ៉ាក់ ដែលជាផ្នែកមួយនៃសម្ព័ន្ធមិត្តប្រឆាំងក្រុមជីហា។

លោក ម៉ាក្រុង លើកឡើងនៅពីថ្ងៃសុក្រថា៖ « វត្តមានរបស់ទាហាននៅប្រទេសអ៊ីរ៉ាក់គឺជាផ្នែកមួយនៃក្របខ័ណ្ឌដ៏តឹងរ៉ឹងនៃការប្រយុទ្ធប្រឆាំងនឹងអំពើភេរវកម្ម»។

ប្រធានាធិបតីបារាំងរូបនេះបញ្ជាក់ជំហរថាប្រទេសរបស់លោកនឹងនៅជាមួយប្រទេសក្នុងមជ្ឈិមបូព៌ា និងការពារពួកគេយ៉ាងតឹងរ៉ឹង៕

ប្រែសម្រួល៖ ណឺ មិនា

The post បារំាងអះអាងពីការស្លាប់និងរបួសទាហានរបស់ខ្លួនក្នុងការវាយប្រហារពីក្រុមគាំទ្រអ៊ីរ៉ង់នៅអ៊ីរ៉ាក់ appeared first on Kampuchea Thmey Daily.

ទាហានអាមេរិក៤នាក់ ក្នុងចំណោម ៦នាក់ស្លាប់ដំណាលគ្នា ដោយដ្រូនរបស់អ៊ីរ៉ង់នៅគុយវ៉ែត

Minea Neu — Wed, 04 Mar 2026 08:11:16 +0000

មន្ទីរបញ្ចកោណបានកំណត់អត្តសញ្ញាណទាហានអាមេរិកចំនួន៤នាក់ ក្នុងចំណោមទាហានទាំង៦នាក់កាលពីថ្ងៃអង្គារ ថាត្រូវបានសម្លាប់ក្នុងពេលដំណាលគ្នា ដោយការវាយប្រហារដោយដ្រូនរបស់អ៊ីរ៉ង់នៅប្រទេសគុយវ៉ែត។ នេះបើយោងតាម ABC News ចុះផ្សាយនៅថ្ងៃទី០៤ ខែមីនា ឆ្នាំ២០២៦ ។

ទាហានទាំង៤ ដែលបានស្លាប់នៅគុយវ៉ែត។ រូបភាព៖ Reuters

ក្នុងនោះមាន លោកអនុសេនីយ៍ឯក លោក Cody A. Khork អាយុ ៣៥ឆ្នាំ ពលបាលឯក លោក Noah L. Tietjens អាយុ៤២ឆ្នាំ លោកស្រី Nicole M. Amor អាយុ ៣៩ឆ្នាំ និង លោក Declan J. Coady អាយុ ២០ឆ្នាំ បានស្លាប់កាលពីថ្ងៃសៅរ៍ នៅប្រទេសគុយវ៉ែតដោយសារការវាយប្រហារដោយយន្តហោះគ្មានមនុស្សបើក(ដ្រូន) របស់អ៊ីរ៉ង់។

គួរបញ្ជាក់ថា ទាហានទាំងអស់ត្រូវបានចាត់តាំងឱ្យទៅកាន់កងបញ្ជាការទ្រទ្រង់ទី១០៣ ដែលជាអង្គភាពកងទ័ពបម្រុងមានមូលដ្ឋាននៅ Des Moines រដ្ឋ Iowa។

ទាហានទាំង៦នាក់បានស្លាប់នៅក្នុងការវាយប្រហារដូចគ្នា នៅកំពង់ផែ Shuaiba ក្នុងប្រទេសគុយវ៉ែត ជាកំពង់ផែពាណិជ្ជកម្មមួយ ដើរតួជាមជ្ឈមណ្ឌលភស្តុភារកម្ម ដែលយោធាសហរដ្ឋអាមេរិកដឹកជញ្ជូនយានយន្តយុទ្ធសាស្ត្រ និងសម្ភារៈផ្គត់ផ្គង់ចូលទៅក្នុងតំបន់។

ចំណែកអត្តសញ្ញាណពីរនាក់ផ្សេងទៀតត្រូវបានលាក់ទុកមួយថ្ងៃពេញ បន្ទាប់ពីសាច់ញាតិជិតស្និទ្ធបានជូនដំណឹង។ សមាជិកយោធាចំនួន ១៨នាក់បន្ថែមទៀត បានរងរបួសក្នុងការវាយប្រហារនេះ។

អ្នកទាំង ៦ នាក់តំណាងឱ្យជនជាតិអាមេរិកដំបូងគេ ដែលស្លាប់នៅក្នុងសមរភូមិក្នុងសង្គ្រាមរួមគ្នារវាងសហរដ្ឋអាមេរិក និងអ៊ីស្រាអែលប្រឆាំងនឹងអ៊ីរ៉ង់។

យុទ្ធនាការរួមគ្នារវាងសហរដ្ឋអាមេរិក និងអ៊ីស្រាអែលបានចូលដល់ថ្ងៃទី៤ នៅថ្ងៃអង្គារ ដោយកងកម្លាំងអាមេរិកបានវាយប្រហារគោលដៅជាង ១ ៧០០ ក្នុងប្រទេសអ៊ីរ៉ង់ ខណៈការប្រយុទ្ធគ្នាបានរីករាលដាលពាសពេញប្រទេសយ៉ាងហោចណាស់១២។

លោក ដូណាល់ ត្រាំ និងមន្ត្រីជាន់ខ្ពស់នៃមន្ទីរបញ្ចកោណបានព្រមានថា ចំនួនអ្នកស្លាប់នឹងអាចកើនឡើង៕

ប្រែសម្រួល៖ ណឺ មិនា

The post ទាហានអាមេរិក៤នាក់ ក្នុងចំណោម ៦នាក់ស្លាប់ដំណាលគ្នា ដោយដ្រូនរបស់អ៊ីរ៉ង់នៅគុយវ៉ែត appeared first on Kampuchea Thmey Daily.

អាមេរិក បើកការវាយប្រហារលើកទី២០ លើទូកសង្ស័យដឹកគ្រឿងញៀនសម្លាប់មនុស្ស៤នាក់

Bun sopheap — Fri, 14 Nov 2025 02:59:33 +0000

យោងតាមការចេញផ្សាយរបស់សារព័ត៌មាន CNN នៅថ្ងៃទី១៤ខែវិច្ឆិកា យោធាសហរដ្ឋអាមេរិកបានធ្វើការវាយប្រហារលើកទី២០ របស់ខ្លួនលើទូកសង្ស័យដឹកគ្រឿងញៀននៅក្នុងតំបន់ការ៉ាបៀនសម្លាប់មនុស្សបួននាក់ទៀត។

(រូបភាព៖ X)

ការវាយប្រហារនេះបានកើតឡើងកាលពីថ្ងៃចន្ទ ហើយគ្មានអ្នកនៅលើទូករស់រានមានជីវិតឡើយ។ ការវាយប្រហារនេះបានកើតឡើងបន្ទាប់ពីការវាយប្រហារចំនួនពីរលើកមុនកាលពីថ្ងៃអាទិត្យ ដែលបានសម្លាប់មនុស្សប្រាំមួយនាក់ផ្សេងទៀតនៅមហាសមុទ្រប៉ាស៊ីហ្វិក ដែលធ្វើឱ្យចំនួនមនុស្សសរុបស្លាប់នៅក្នុងយុទ្ធនាការនេះកើនដល់ ៨០ នាក់។

ប្រតិបត្តិការនេះប្រើប្រាស់យន្តហោះចម្បាំង យន្តហោះគ្មានមនុស្សបើក និងនាវាចម្បាំងដើម្បីកំណត់គោលដៅទូកដែលគេជឿថាកំពុងដឹកជញ្ជូនគ្រឿងញៀន ទោះបីជាអាមេរិកបានទទួលស្គាល់ថាពួកគេពេលខ្លះមិនដឹងអត្តសញ្ញាណរបស់អ្នកដែលនៅលើទូកមុនពេលវាយប្រហារក៏ដោយ។ លើសពីនេះក្រសួងយុត្តិធម៌អាមេរិកបានប្រាប់សភាថា រដ្ឋបាលមិនត្រូវការការយល់ព្រមបន្ថែមសម្រាប់យុទ្ធនាការនេះទេ ទោះបីជាមានការព្រួយបារម្ភពីអ្នកជំនាញផ្នែកច្បាប់ដែលព្រមានថាការវាយប្រហារទាំងនេះអាចរំលោភលើច្បាប់សហរដ្ឋអាមេរិក ឬអន្តរជាតិក៏ដោយ។

គួរបញ្ជាក់ថាយុទ្ធនាការនេះក៏បានបង្កឱ្យមានភាពតានតឹងជាមួយសម្ព័ន្ធមិត្តអាមេរិកផងដែរ។ ចក្រភពអង់គ្លេសបានបញ្ឈប់ការចែករំលែកព័ត៌មានស៊ើបការណ៍សម្ងាត់លើទូកដែលសង្ស័យថាមានគ្រឿងញៀន ដើម្បីជៀសវាងការជាប់ពាក់ព័ន្ធនឹងការវាយប្រហារ ដែលខ្លួនចាត់ទុកថាខុសច្បាប់។ ប្រធានាធិបតីកូឡុំប៊ីក៏បានបញ្ឈប់កិច្ចសហប្រតិបត្តិការស៊ើបការណ៍សម្ងាត់ដូចគ្នារហូតដល់ការវាយប្រហារបញ្ចប់ផងដែរ៕

(រូបភាព៖ X)

អត្ថបទ៖ ប៊ុន សុភាព

The post អាមេរិក បើកការវាយប្រហារលើកទី២០ លើទូកសង្ស័យដឹកគ្រឿងញៀនសម្លាប់មនុស្ស៤នាក់ appeared first on Kampuchea Thmey Daily.

អាមេរិក វាយប្រហារលើទូកសង្ស័យដឹកគ្រឿង ញៀនសម្លាប់មនុស្ស ៦នាក់នៅមហាសមុទ្រប៉ាស៊ីហ្វិក

Bun sopheap — Tue, 11 Nov 2025 02:48:51 +0000

យោងតាមការចេញផ្សាយរបស់សារព័ត៌មាន CNA នៅថ្ងៃទី១១ខែ វិច្ឆិការ សហរដ្ឋអាមេរិកបានសម្លាប់មនុស្ស៦នាក់បន្ថែមទៀតនៅក្នុងការវាយប្រហារតាមអាកាសលើទូកពីរគ្រឿងដែលខ្លួនអះអាងថាកំពុងរត់ពន្ធគ្រឿងញៀននៅភាគខាងកើតមហាសមុទ្រប៉ាស៊ីហ្វិក។

(រូបភាព៖ Reuters)

រដ្ឋមន្ត្រីក្រសួងការពារជាតិអាមេរិកលោក Pete Hegseth បាននិយាយថា ការវាយប្រហារទាំងនេះបានកើតឡើងកាលពីថ្ងៃអាទិត្យ ហើយបានបំផ្លាញទូកទាំងពីរគ្រឿង ដោយសម្លាប់មនុស្សគ្រប់គ្នានៅលើទូក ហើយគ្មានកងទ័ពអាមេរិកណាម្នាក់រងរបួសទេ។

គួរបញ្ជាក់ថាការវាយប្រហារទាំងនេះគឺជាផ្នែកមួយនៃយុទ្ធនាការមួយដែលបានចាប់ផ្តើមនៅក្នុងខែកញ្ញាក្រោមការដឹកនាំរបស់ប្រធានាធិបតី ដូណាល់ ត្រាំ ប្រយុទ្ធប្រឆាំងនឹង «ក្រុមជួញដូរគ្រឿងញៀនភេរវករ» នៅអាមេរិកឡាទីន ប៉ុន្តែអ្នករិះគន់និយាយថា រដ្ឋាភិបាលអាមេរិកមិនបានបង្ហាញភស្តុតាងច្បាស់លាស់ថា ទូកទាំងនោះកំពុងដឹកគ្រឿងញៀន ឬមានទំនាក់ទំនងជាមួយភេរវករនោះទេ។ រហូតមកដល់ពេលនេះ យ៉ាងហោចណាស់មនុស្ស ៧៦ នាក់ត្រូវបានសម្លាប់ និងនាវាចំនួន ២០ គ្រឿងត្រូវបានបំផ្លាញ។

ក្រុមសិទ្ធិមនុស្ស និងអង្គការសហប្រជាជាតិបានថ្កោលទោសការវាយប្រហារទាំងនេះ ដោយហៅពួកគេថាជាការសម្លាប់ខុសច្បាប់ ឬ ក្រៅប្រព័ន្ធតុលាការ។ លើសពីនេះក្រុមគ្រួសាររបស់អ្នកដែលត្រូវបានសម្លាប់ក៏បាននិយាយដែរថា ជនរងគ្រោះមួយចំនួនគ្រាន់តែជាអ្នកនេសាទប៉ុណ្ណោះ។ អ្នករស់រានមានជីវិតពីរនាក់ដែលមកពីប្រទេសអេក្វាឌ័រ និងកូឡុំប៊ី ត្រូវបានបញ្ជូនទៅផ្ទះវិញរួចហើយ ហើយមិនត្រូវបានចោទប្រកាន់ពីបទឧក្រិដ្ឋណាមួយឡើយ។

ក្នុងពេលជាមួយគ្នានេះ យោធាអាមេរិកបានបញ្ជូននាវាកងទ័ពជើងទឹកបន្ថែមទៀតទៅកាន់តំបន់ការ៉ាប៊ីន ហើយមានគម្រោងបន្ថែមក្រុមនាវាផ្ទុកយន្តហោះដ៏ធំមួយក្នុងពេលឆាប់ៗនេះ។ សហរដ្ឋអាមេរិកនិយាយថា នេះគឺដើម្បីប្រយុទ្ធប្រឆាំងនឹងការរត់ពន្ធគ្រឿងញៀន ប៉ុន្តែប្រទេសវេណេស៊ុយអេឡាជឿថា ការបង្កើតកម្លាំងនេះពិតជាមានបំណងដាក់សម្ពាធ ឬដកមេដឹកនាំរបស់ខ្លួន គឺលោក Nicolas Maduro ចេញទៅវិញទេ៕

(រូបភាព៖ X)

អត្ថបទ៖ ប៊ុន សុភាព

The post អាមេរិក វាយប្រហារលើទូកសង្ស័យដឹកគ្រឿង ញៀនសម្លាប់មនុស្ស ៦នាក់នៅមហាសមុទ្រប៉ាស៊ីហ្វិក appeared first on Kampuchea Thmey Daily.

តាំងពីប្រកាសរៀបចំការបោះឆ្នោតរបបយោធាមីយ៉ាន់ម៉ាបង្កើនការវាយប្រហារសម្លាប់ជនស៊ីវិលជាង១០០នាក់

Bun sopheap — Fri, 26 Sep 2025 03:22:33 +0000

ចាប់តាំងប្រកាសត្រៀមរៀបចំការបោះឆ្នោតនៅចុងឆ្នាំនេះ របបយោធាមីយ៉ាន់ម៉ាដែលដឹកនាំដោយលោក ឧត្តមសេនីយ មីន អ៊ុងឡាំង បានបង្កើនការវាយប្រហារទាំងលើដីនិងតាមអាកាសរបស់ខ្លួនទ្វេដងដើម្បីដណ្ដើមយកទឹកដីដែលគ្រប់គ្រងដោយក្រុមប្រដាប់អាវុធមកវិញ ខណៈការវាយប្រហារទាំងនោះបានសម្លាប់ជនស៊ីវិលជាង១០០នាក់។

ការវាយប្រហារតាមអាកាសរបស់យោធាមីយ៉ាន់ម៉ា

យោងតាមការចេញផ្សាយរបស់សារព័ត៌មាន The Irrawaddy កាលពីថ្ងៃទី២៥ខែកញ្ញា របបយោធាមីយ៉ាន់ម៉ាបានធ្វើការវាយប្រហារតាមអាកាសចំនួន ២៧ លើកទូទាំង ២០ ទីក្រុងក្នុងរយៈពេលមួយខែ។ ការវាយប្រហារទាំងនេះ រួមមានវាយលុកលើដីសម្លាប់ជនស៊ីវិលជាង១០០នាក់ និងរបួសជាង១២០នាក់ ក្នុងនោះមានកុមារ ស្ត្រី និងព្រះសង្ឃ។

ជាមួយគ្នាការវាយប្រហារតាមអាកាសជាច្រើនបានបណ្តាលឱ្យមានអ្នកស្លាប់ និងរបួសយ៉ាងច្រើន ដូចជាការទម្លាក់គ្រាប់បែកលើសាលារៀននៅ Kyauktaw ក្នុងរដ្ឋ Rakhine ដែលបានសម្លាប់សិស្សានុសិស្សចំនួន ២០ នាក់ និងការវាយប្រហារតាមអាកាសនៅទីក្រុង Shwegu ក្នុងរដ្ឋ Kachinបណ្តាលឱ្យមនុស្ស ១៧នាក់ស្លាប់។ លើសពីនេះអគារសាសនា សាលារៀន និងមន្ទីរពេទ្យក៏ត្រូវបានរបបនេះកំណត់គោលដៅផងដែរ ដែលជំរុញឱ្យមានការចោទប្រកាន់ពីបទឧក្រិដ្ឋកម្មសង្គ្រាម។

ផ្ទះជនស៊ីវិលរងការវាយប្រហារ

អ្នកវិភាគនិយាយថា របបយោធាកំពុងប្រើអំណាចផ្លូវអាកាសដើម្បីធ្វើភេរវកម្មដលើជនស៊ីវិល បង្អាក់ការគ្រប់គ្រងរបស់ក្រុមប្រឆាំង និងរឹតបន្តឹងការគ្រប់គ្រងទឹកដីនៅមុនការបោះឆ្នោត។ ទោះបីជាមានការថ្កោលទោសយ៉ាងទូលំទូលាយក៏ដោយ ក៏ប្រទេសចិន រុស្ស៊ី ឥណ្ឌា និងរដ្ឋជិតខាងមួយចំនួននៅតែបន្តគាំទ្រផែនការបោះឆ្នោតរបស់របបនេះ។

អ្នកស្រុក និងក្រុមប្រដាប់អាវុធជនជាតិភាគតិចទទូចថា ការវាយប្រហារបានធ្វើប្រជាជនរងគ្រោះកាន់តែធ្ងន់ធ្ងរ ប៉ុន្តែបានពង្រឹងការប្តេជ្ញាចិត្តដើម្បីទប់ទល់នឹងរបបផ្តាច់ការនិងបដិសេធការបោះឆ្នោត៕

កងទ័ពរបបយោធាមីយ៉ាន់ម៉ា

អត្ថបទ៖ ប៊ុន សុភាព

The post តាំងពីប្រកាសរៀបចំការបោះឆ្នោតរបបយោធាមីយ៉ាន់ម៉ាបង្កើនការវាយប្រហារសម្លាប់ជនស៊ីវិលជាង១០០នាក់ appeared first on Kampuchea Thmey Daily.

មនុស្ស៧០នាក់ស្លាប់ ក្នុងការវាយប្រហារដ៏សាហាវលើវិហារឥស្លាមនៅស៊ូដង់

Bun sopheap — Sat, 20 Sep 2025 08:20:18 +0000

យោងតាមការចេញផ្សាយរបស់ ទីភ្នាក់ងារព័ត៌មាន AP កងទ័ព និងក្រុមជំនួយរបស់ប្រទេសស៊ូដង់បានរាយការណ៍ថា ការវាយប្រហារដោយយន្តហោះគ្មានមនុស្សបើកកាលពីថ្ងៃសុក្រលើវិហារឥស្លាមមួយនៅទីក្រុង El Fasher បានសម្លាប់មនុស្សយ៉ាងហោចណាស់ ៧០នាក់ក្នុងអំឡុងពេលអធិស្ឋាន។

វិហារដែលរងការវាយប្រហារ

ការប្រហារដ៏សាហាវនេះត្រូវបានចោទទៅលើកងកម្លាំងគាំទ្ររហ័ស (RSF) ជាអ្នកប្រព្រឹត្ត ដែលបានបំផ្លាញអគារទាំងស្រុង។ មកដល់ពេលនេះនៅតែមានការភ័យខ្លាចថាចំនួនអ្នកស្លាប់អាចកើនឡើងបន្ថែមទៀត ព្រោះអ្នកខ្លះស្ថិតនៅក្រោមគំនរបាក់បែកនោះឡើយ។

បើតាមរូបភាពផ្កាយរណបបានបង្ហាញពីតំបន់ធំៗ ដែលត្រូវបានបំផ្លាញ រួមទាំងជំរុំជនភៀសខ្លួន Abu Shouk ផងដែរ។ ជំរំនេះត្រូវបានគេសន្និដ្ឋានថាជាជម្រកសម្រាប់ជនភៀសខ្លួនចំនួន ៤៥ ម៉ឺននាក់ ប៉ុន្តែឥឡូវនេះវាត្រូវបានកាន់កាប់ដោយ RSF ។ របាយការណ៍ពីសកម្មជនក្នុងតំបន់បាននិយាយថា ជនស៊ីវិលកំពុងត្រូវបានចាប់ពង្រត់ សម្លាប់ និងថែមទាំងទទួលរងនូវអំពើហិង្សាផ្លូវភេទក្នុងអំឡុងពេលនៃការវាយប្រហារទាំងនេះទៀតផង។

គួរបញ្ជាក់ថាការវាយប្រហារនេះគឺជាផ្នែកមួយនៃការវាយលុកជាបន្តបន្ទាប់របស់ RSF នៅទីក្រុង El Fasher ដែលមានការប្រយុទ្ធគ្នាយ៉ាងសាហាវជាមួយកងទ័ពរបស់ស៊ូដង់ចាប់តាំងពីខែមេសាមកម្លេះ។

រូបភាពផ្កាយរណបង្ហាញការខូចខាត

យោងតាមអង្គការសហប្រជាជាតិ ជនស៊ីវិលជាង ៣៣០០នាក់ត្រូវបានសម្លាប់នៅក្នុងប្រទេសស៊ូដង់ត្រឹមពាក់កណ្ដាលឆ្នាំ ២០២៥ ហើយចំនួនពិតប្រាកដគឺប្រហែលជាខ្ពស់ជាងនេះច្រើន។ នៅទីក្រុង El Faher ដែលស្ថិតក្រោមការឡោមព័ទ្ធ មនុស្សកំពុងតែអស់អាហារ ទឹកស្អាត និងថ្នាំពេទ្យ ហើយនៅសល់មន្ទីរពេទ្យតែមួយគត់នៅក្នុងទីក្រុងដែលអាចធ្វើការវះកាត់បាន និងមានអ្នកជំងឺលើសលប់។

ក្រុមសិទ្ធិមនុស្សព្រមានថា ជនស៊ីវិលនៅ El Fasher មិនមានសុវត្ថិភាពទេ។ ប្រសិនបើពួកគេស្នាក់នៅ ពួកគេប្រឈមមុខនឹងការទម្លាក់គ្រាប់បែក ការអត់ឃ្លាន និងអំពើហិង្សាពី RSF ។ ប្រសិនបើពួកគេព្យាយាមចាកចេញ ពួកគេប្រថុយនឹងការប្រហារជីវិត ចាប់ពង្រត់ ឬវាយប្រហារតាមផ្លូវធ្វើដំណើរ៕

ជនរងគ្រោះស្លាប់ក្នុងការវាយប្រហារ

អត្ថបទ៖ ប៊ុន សុភាព

The post មនុស្ស៧០នាក់ស្លាប់ ក្នុងការវាយប្រហារដ៏សាហាវលើវិហារឥស្លាមនៅស៊ូដង់ appeared first on Kampuchea Thmey Daily.

ការវាយប្រហារ Archives - Kampuchea Thmey Daily

អ៊ីស្រាអែល​វាយ​ប្រហារនៅ​លីបង់​​ សម្លាប់​មនុស្ស​ជាង​១០​នាក់ និង​របួសរាប់សិប​​នាក់

ប៉ាគី​ស្ថាន​​វាយ​ប្រហារ​​លើ​មន្ទី​ពេទ្យ​នៅ​អាហ្វហ្គានីស្ថានសម្លាប់​មនុស្ស​៤០០នាក់ របួស​២៥០នាក់​

ទាហាន​អា​មេរិក​៤នាក់ ​ក្នុងចំណោម ៦នាក់ស្លាប់​ដំណាល​​គ្នា ដោយ​​ដ្រូន​របស់​អ៊ីរ៉ង់នៅ​គុយ​វ៉ែត​

អាមេរិក បើកការវាយប្រហារលើកទី២០ លើទូកសង្ស័យដឹកគ្រឿងញៀនសម្លាប់មនុស្ស៤នាក់

អាមេរិក វាយប្រហារលើទូកសង្ស័យដឹកគ្រឿង ញៀនសម្លាប់មនុស្ស ៦នាក់នៅមហាសមុទ្រប៉ាស៊ីហ្វិក

តាំងពីប្រកាសរៀបចំការបោះឆ្នោតរបបយោធាមីយ៉ាន់ម៉ាបង្កើនការវាយប្រហារសម្លាប់ជនស៊ីវិលជាង១០០នាក់

មនុស្ស៧០នាក់ស្លាប់ ក្នុងការវាយប្រហារដ៏សាហាវលើវិហារឥស្លាមនៅស៊ូដង់

អ៊ីស្រាអែលវាយប្រហារនៅលីបង់ សម្លាប់មនុស្សជាង១០នាក់ និងរបួសរាប់សិបនាក់

ប៉ាគីស្ថានវាយប្រហារលើមន្ទីពេទ្យនៅអាហ្វហ្គានីស្ថានសម្លាប់មនុស្ស៤០០នាក់ របួស២៥០នាក់

ទាហានអាមេរិក៤នាក់ ក្នុងចំណោម ៦នាក់ស្លាប់ដំណាលគ្នា ដោយដ្រូនរបស់អ៊ីរ៉ង់នៅគុយវ៉ែត