ចាន់ រតនា Archives - Kampuchea Thmey Daily

ខានវ៉ៃគុនខ្មែរច្រើនឆ្នាំ ចាន់ រតនា ត្រឡប់វិញឈ្នះខ្សែក្រវាត់មានប្រាក់ជាង២០លានរៀល

chean virakbot — Mon, 01 Apr 2024 01:15:16 +0000

កីឡាករគុនខ្មែរចម្រុះកម្ពុជា ចាន់ រតនា បានធ្វើឲ្យមានការភ្ញាក់ផ្អើលជាថ្មី បន្ទាប់ពីវិលត្រឡប់មកកាន់សង្វៀនជាថ្មីបានយកឈ្នះដៃគូ២នាក់ក្នុងមួយរាត្រីដើម្បីគ្រងខ្សែក្រវាត់គុនខ្មែរ IPCC ដែលមានប្រាក់រង្វាន់ និងរង្វាន់លើកទឹកចិត្តជាង២០លានរៀល។

នៅជុំទី១ ចាន់ រតនា បានយកឈ្នះកីឡាករចិន Ke Jingjun ដោយពិន្ទុតាមរយៈការតស៊ូគ្នារហូតដល់៤ទឹក។ សម្រាប់ការប្រកួត៣ទឹកដំបូង អ្នកទាំងពីរបានបញ្ចប់ដោយលទ្ធផលស្មើគ្នា ដូច្នេះការប្រកួតតម្រូវបន្ថែម១ទឹក។ នៅទឹកទី៤ ចាន់ រតនា ទាត់បានយ៉ាងល្អរហូតទទួលបានជ័យជម្នះដោយពិន្ទុជាឯកច្ឆន្ទៈដើម្បីឡើងទៅកាន់វគ្គផ្តាច់ព្រ័ត្រ។

នៅវគ្គផ្តាច់ព្រ័ត្រ ចាន់ រតនា បានយកឈ្នះកីឡាករម៉ុងហ្គោលី Bat Erdene ដោយពិន្ទុ។ នៅទឹកទី២ អ្នកលេងគុនខ្មែរទាត់ត្រូវពោះឲ្យអាជ្ញាកណ្តាលរាប់កីឡាករម៉ុងហ្គោលី៨ម្តង ហើយនៅទឹកទី៣ កីឡាករម៉ុងហ្គោលីដេញវាយសន្ធាប់យ៉ាងខ្លាំង ប៉ុន្តែមិនអាចធ្វើអ្វីឲ្យគ្រោះថ្នាក់ដល់កីឡាករកម្ពុជាឡើយ។

អ្វីដែលគួរឲ្យកត់សំគាល់ ចាន់ រតនា បានប្រើក្បាច់ពិសេសៗជាច្រើនដូចជានាគវាត់កន្ទុយ ទាត់កាប់ពីលើជាដើមដែលនៅតែល្អ និងមានប្រសិទ្ធភាពដូចកាលរូបគេធ្លាប់ប្រកួតគុនខ្មែរកាលពីជាង៦ឆ្នាំមុន។ នេះជាលើកទី១ហើយដែលរូបគេបានវិលត្រឡប់មកប្រកួតគុនខ្មែរវិញ បន្ទាប់ពីធ្លាប់ប្រកួតគុនខ្មែរចុងក្រោយតាំងពីឆ្នាំ២០១៧។

ពិតជាគួរឲ្យសរសើរ ចាន់ រតនា អាចតស៊ូ២ប្រកួតក្នុងមួយរាត្រី ហើយអ្វីដែលសំខាន់ការប្រកួតវគ្គផ្តាច់ព្រ័ត្រ ជួប Bat Erdene ជាជើងឯកម៉ុងហ្គោលី មានខ្សែក្រវាត់មួយថៃពិភពលោក WMO ខ្សែក្រវាត់ ISKA អន្តរជាតិ និងចុងក្រោយបំផុតខ្សែក្រវាត់កម្រិតពិភពលោក I-1 GP24: Supreme នៅទីក្រុងហុងកុងក្នុងពេលជាមួយ ឈឿង ល្វៃ។

សម្រាប់ការឈ្នះខ្សែក្រវាត់គុនខ្មែរម៉ារ៉ាតុង IPCC នេះ ចាន់ រតនា នៅជុំទី១ទទួលបានប្រាក់ឧបត្ថម្ភ៨លានរៀល នៅវគ្គផ្តាច់ព្រ័ត្រទទួលបានប្រាក់ឧបត្ថម្ភ៨លានរៀលបន្ថែមទៀត ព្រមទាំងមានប្រាក់រង្វាន់ និងប្រាក់តម្លៃខ្លួនបន្ថែមទៀត។ ដូច្នេះរូបគេអាចទទួលបានហោចណាស់២០លានរៀល៕

អត្ថបទ៖ វីរបុត្រ

The post ខានវ៉ៃគុនខ្មែរច្រើនឆ្នាំ ចាន់ រតនា ត្រឡប់វិញឈ្នះខ្សែក្រវាត់មានប្រាក់ជាង២០លានរៀល appeared first on Kampuchea Thmey Daily.

ចាន់ រតនា ប្រាប់ថា អ្នកចាត់ការខ្លួនបើកភ្លើងខៀវឲ្យប្រកួតគុនខ្មែរហើយ

chean virakbot — Fri, 22 Dec 2023 00:52:58 +0000

អ្នកលេងគុនចម្រុះកម្ពុជា ចាន់ រតនា នឹងវិលត្រឡប់ចូលសង្វៀនគុនខ្មែរវិញឆាប់ៗ បន្ទាប់ពីរូបគេបានប្រកួតល្បុក្កតោក្នុងកម្មវិធី«អ្នកលេងគុន»កាលពីថ្ងៃទី១៥ ខែធ្នូ ឆ្នាំ២០២៣ នៅពហុកីឡដ្ឋានជាតិអូឡាំពិក។

កីឡាករដែលមានបទពិសោធគុនចម្រុះច្រើនរូបនេះបានឲ្យដឹងថា អ្នកចាត់ការរបស់ខ្លួនបានបើកទ្វារឲ្យប្រកួតគុនខ្មែរវិញហើយ ប៉ុន្តែមិនទាន់ច្បាស់ពីពេលវេលាចេញប្រកួតនៅឡើយទេ។ ក្នុងរយៈពេលពីរបីឆ្នាំចុងក្រោយនេះ រូបគេនៅតែបន្តហ្វឹកហាត់ជាប្រចាំ និងរក្សារាងកាយឲ្យមានសាច់ដុំមាំមួនដដែល បើទោះបីជារូបគេមិនបានប្រកួតនៅសង្វៀនគុនចម្រុះ ONE Championship។

រតនា បាននិយាយថា ៖«ពេលអត់បានប្រកួតពីរឆ្នាំចុងក្រោយនេះ ខ្ញុំអត់បណ្តោយខ្លួនឲ្យឃ្លាតឆ្ងាយពីកន្លែងហ្វឹកហាត់ទេ ព្រោះយើងជាកីឡាករទោះប្រកួតក្តី អត់ប្រកួតក្តីក៏ត្រូវតែហ្វឹកហាត់ជាប្រចាំ។ ជាពិសេសយើងជាកីឡាករអាជីពមិនត្រូវបណ្តោយខ្លួន អត់ហ្វឹកហាត់ ដើរលេងធ្វើឲ្យប៉ះពាល់ដល់រាងកាយ ឡើងគីឡូ អីចឹងវាប៉ះពាល់ដល់ការប្រឹងប្រែងរបស់យើងច្រើនឆ្នាំអត់ន័យ»។

នៅពេលសួរថា ហេតុបានជាចង់ប្រកួតគុនខ្មែរវិញ? កីឡាករដែលមានជំនាញល្បុក្កតោ គុនខ្មែរ និងគុនចម្រុះរូបនេះបានឆ្លើយថា ខ្លួននៅមានកាយសម្បទាមាំមួន និងកម្លាំងអាចប្រកួតបាន ស្របពេលវិស័យកីឡាគុនខ្មែរកំពុងរីកចម្រើនផងនោះបានធ្វើឲ្យរូបគេចង់ប្រកួតវិញ។ ជាពិសេសកីឡាករគុនខ្មែរមិនមានច្រើន ប៉ុន្តែសង្វៀនប្រកួតសំបូរដែលអាចធ្វើឲ្យទទួលបានឱកាសប្រកួតច្រើនដែរ។

ចាន់ រតនា នៅមានកុងត្រាជាមួយស្ថាប័នប្រដាល់គុនចម្រុះ ONE Championship ប៉ុន្តែការប្រកួតពីរលើកចុងក្រោយកាលពីឆ្នាំ២០២០ និង២០២២មិនបានល្អ ធ្វើឲ្យរូបគេមិនទទួលបានឱកាសប្រកួតបន្តទៀត។ ទោះបីជាមិនបានចេញប្រកួត កីឡាកររូបនេះកំពុងបង្ហាត់ក្បាច់គុនល្បុក្កតោដល់ស្ថាប័នឯកជន ជាពិសេសមានជនបរទេសជាច្រើនបានហ្វឹកហាត់ជាមួយ។

សូមបញ្ជាក់ថា ចាន់ រតនា បានប្រកួតឈ្នះកីឡាករហ្វីលីពីន John Rinon ដោយពិន្ទុ បន្ទាប់ពីតស៊ូគ្នា៣ទឹកយ៉ាងស្វិតស្វាញក្នុងកម្មវិធី«អ្នកលេងគុន»កាលពីយប់ថ្ងៃទី១៥ ខែធ្នូ ឆ្នាំ២០២៣៕

អត្ថបទ៖ វីរបុត្រ

The post ចាន់ រតនា ប្រាប់ថា អ្នកចាត់ការខ្លួនបើកភ្លើងខៀវឲ្យប្រកួតគុនខ្មែរហើយ appeared first on Kampuchea Thmey Daily.

នារីបារាំងដ៏ស្រស់ស្អាត Ava Ruiz ហាត់ល្បុក្កតោដើម្បីស្គាល់វប្បធម៌ខ្មែរ

chean virakbot — Tue, 19 Dec 2023 23:48:18 +0000

នារីជនជាតិបារាំងដ៏ស្រស់ស្អាតឈ្មោះ Ava Ruiz បានហ្វឹកហាត់គុនល្បុក្កតោរយៈពេលជាង២ខែហើយជាមួយមិត្តរួមការងារនៅគ្លីនិកមួយជាកន្លែងដែលនាងធ្វើការនៅក្នុងប្រទេសកម្ពុជាដែលមានកីឡាករ ចាន់ រតនា ជាគ្រូបង្វឹក។

កញ្ញា Ava Ruiz បានឲ្យដឹងថា កញ្ញាបានឃើញការសម្តែងក្បាច់គុនល្បុក្កតោតាម Facebook ហើយក៏មានអារម្មណ៍ចង់ស្គាល់កាន់តែច្រើន។ អ្វីដែលជាសំណាងទៀតនោះ ប្រធានគ្លីនិករបស់នាងបានស្គាល់កីឡាករ ចាន់ រតនា ដែលបាននាំបុគ្គលិកហាត់ក្បាច់គុនល្បុក្កតោទាំងអស់គ្នា។

កាលពីយប់ថ្ងៃទី១៥ ខែធ្នូ ឆ្នាំ២០២៣ កញ្ញា Ava Ruiz បានទៅមើលការប្រកួតគុនល្បុក្កតោ«អ្នកលេងគុន»។ កញ្ញាបាននិយាយថា ៖«នេះជាលើកទី១ដែលខ្ញុំបានមើលការប្រកួតគុនល្បុក្កតោផ្ទាល់ភ្នែក។ កីឡាករចុងក្រោយជាគ្រូបង្វឹករបស់ខ្ញុំ។ ខ្ញុំពិតជាចាប់អារម្មណ៍ខ្លាំងណាស់។ ជាអ្នកហ្វឹកហាត់ដំបូងៗ ពេលបានឃើញផ្ទាល់អីចឹង ខ្ញុំពិតជារីករាយចំពោះការប្រកួតកម្រិតខ្ពស់។ ជាការប្រកួតដ៏ល្អ កីឡាករទាំងអស់ប្រកួតគួរឲ្យចាប់អារម្មណ៍»។

នារីបារាំងរូបនេះបានប្រាប់ថា លោកគ្រូ ចាន់ រតនា បានសួរថាតើចង់ប្រកួតល្បុក្កតោទេ កញ្ញាមិនចាប់អារម្មណ៍នឹងការប្រកួតទេ ប៉ុន្តែការហ្វឹកហាត់របស់នាងមានគោលដៅសំខាន់ដើម្បីសុខភាព ភាពសប្បាយរីករាយ និងដើម្បីស្វែងយល់ពីក្បាច់គុនបុរាណខ្មែរ។

កញ្ញា Ava Ruiz បាននិយាយថា ៖«ការហ្វឹកហាត់គឺដើម្បីសុខភាព ដើម្បីភាពសប្បាយរីករាយ និងដើម្បីស្វែងយល់ពីវប្បធម៌ខ្មែរ។ នេះជាគោលដៅសំខាន់ដែលខ្ញុំបានហ្វឹកហាត់ល្បុក្កតោ។ មិត្តរួមការងាររបស់ខ្ញុំប្រហែល១៥នាក់បានហ្វឹកហាត់ល្បុក្កតោជាមួយគ្នា»។

នារីបារាំងរូបនេះបន្តឲ្យដឹងថា ការហ្វឹកហាត់រយៈពេល២ខែកន្លងទៅ ពិបាកខ្លាំងដែរពីដំបូង ប៉ុន្តែក្រោយមកមានអារម្មណ៍មិនមានអ្វីពិបាកទេ។ ផ្ទុយទៅវិញកញ្ញាចូលចិត្ត និងបានក្លាយជាពេលវេលាដ៏ល្អជាមួយមិត្តរួមការងារ និងគ្រូបង្វឹក។

រហូតដល់ពេលនេះ Ava Ruiz បានស្នាក់នៅ និងធ្វើការក្នុងប្រទេសកម្ពុជារយៈពេល២ឆ្នាំហើយ។ កញ្ញាបានប្រាប់ថា ៖«ខ្ញុំចូលចិត្តរស់នៅប្រទេសកម្ពុជា ជាពិសេសពីវប្បធម៌ ប៉ុន្តែអាកាសធាតុក្តៅជាងនៅបារាំង តែខ្ញុំអាចទ្រាំទ្របាន»។

នៅពេលសួរថា តើអ្វីដែលកញ្ញាពេញចិត្តបំផុតនៅកម្ពុជា? កញ្ញាបានឆ្លើយតបថា ៖«វ៉ូវ! នេះជារឿងពិបាកមួយ ខ្ញុំអាចនិយាយបានថា ប្រជាជនខ្មែរមានភាពកក់ក្តៅ។ រាល់ពេលខ្ញុំជួប ពួកគាត់តែងតែញញឹមដាក់ខ្ញុំជានិច្ច។ នេះជាអ្វីដែលខ្ញុំចូលចិត្តបំផុតនៅកម្ពុជា»៕

អត្ថបទ៖ វីរបុត្រ

The post នារីបារាំងដ៏ស្រស់ស្អាត Ava Ruiz ហាត់ល្បុក្កតោដើម្បីស្គាល់វប្បធម៌ខ្មែរ appeared first on Kampuchea Thmey Daily.

កីឡាករហ្វីលីពីន John Mcleary ប្រាប់មូលហេតុដែលយំ ក្រោយចាញ់ ចាន់ រតនា

chean virakbot — Mon, 18 Dec 2023 01:51:16 +0000

កីឡាករហ្វីលីពីន John Mcleary Ornido បានអង្គុយយំក្នុងបន្ទប់ ក្រោយពេលរូបគេចាញ់កីឡាករកម្ពុជា ចាន់ រតនា ក្នុងការប្រកួតល្បុក្កតោអាជីព កាលពីថ្ងៃទី១៥ ខែធ្នូ ឆ្នាំ២០២៣ នៅពហុកីឡដ្ឋានជាតិអូឡាំពិក។

ការប្រកួត៣ទឹកពេញពិតជាគួរឲ្យចាប់អារម្មណ៍ខ្លាំងនៅពេលកីឡាករម្ចាស់ស្រុក ចាន់ រតនា មានប្រៀបខាងជំនាញវ៉ៃឈរ ស្របពេល John Mcleary មានជំនាញខាងក្បាច់ឃ្លេ និងបោកផ្តួល។ ទោះបីជាយ៉ាងណា លក្ខន្តិកៈនៃការប្រកួតឲ្យឃ្លេក្រោមបានត្រឹមតែ២០វិនាទីប៉ុណ្ណោះ ដូច្នេះបើធ្វើអ្វីមិនបានទេត្រូវអាជ្ញាកណ្តាលបំបែកឲ្យក្រោកឡើងប្រកួតឈរវិញ។ តាមរយៈការប្រកួតនេះ ចៅក្រមបានសម្រេចឲ្យ ចាន់ រតនា ឈ្នះដោយពិន្ទុមិនឯកច្ឆន្ទ។

នៅលើសង្វៀនចំពោះមុខអ្នកគាំទ្រ John Mcleary Ornido មិនបានបង្ហាញសញ្ញាអ្វីដែលបញ្ជាក់ពីការមិនពេញចិត្តនឹងលទ្ធផលឡើយ ប៉ុន្តែនៅពេលចូលទៅដល់បន្ទប់ផ្លាស់សម្លៀកបំពាក់ រូបគេបានអង្គុយយំម្នាក់ឯង។ កីឡាករបានប្រាប់សារព័ត៌មាន«កម្ពុជាថ្មី»ថា រូបគេយំមិនមែនដោយសារមិនពេញចិត្តនឹងលទ្ធផលដែលចៅក្រមកាត់សេចក្តីទេ ប៉ុន្តែយំដោយសារមិនអាចយកជ័យជម្នះជូនក្រុមគ្រួសារ និងមិត្តភក្តិបាន។

កីឡាករបាននិយាយថា ៖«ពិតណាស់ ការប្រកួតនេះ ខ្ញុំបានឃ្លាតឆ្ងាយពីក្រុមគ្រួសារ អត់បានរៀនសូត្រ។ តាមពិតទៅ ខ្ញុំត្រូវរៀន តែខ្ញុំទុកចោលការសិក្សា។ ខ្ញុំមានគ្រួសារដែលកំពុងរង់ចាំនៅផ្ទះ»។

«អ្នកគាំទ្រពិតជាអស្ចារ្យ ចៅក្រមដាក់ពិន្ទុមិនអីទេ។ ខ្ញុំបានប្រឹងអស់ពីលទ្ធភាពហើយ តែមិនអាចសម្រេចបំណងបាន។ អីចឹងហើយបានជាខ្ញុំយំ។ ចាញ់គឺចាញ់ គ្មានអ្វីត្រូវតវ៉ាទេ ចាញ់គឺចាញ់ហើយ។ កីឡាតែងតែមានឈ្នះចាញ់»។ កីឡាករហ្វីលីពីន John Mcleary Ornido បានបញ្ជាក់។

កីឡាករ John Mcleary បានរៀបរាប់ថា រូបគេធ្វើបានល្អបំផុតជាមួយកីឡាករ ចាន់ រតនា ដែលមានបទពិសោធច្រើន។ នេះក៏ជាផ្នែកមួយនៃប្រវត្តិរបស់ខ្លួនដែលបានប្រកួតជាមួយកីឡាករមានបទពិសោធច្រើន និងពិតជាសប្បាយចិត្តដែលប្រកួតជាមួយកីឡាករនៅប្រទេសផ្សេង ជាពិសេសសម្រាប់ក្បាច់គុនរបស់ប្រទេសនោះថែម។

នៅពេលសួរថា តើលោកយល់យ៉ាងណាអំពីការប្រកួតល្បុក្កតោដែលជាក្បាច់គុនបុរាណខ្មែរ? កីឡាករបានឆ្លើយថា ៖«វាជាផ្នែកមួយនៃប្រវត្តិប្រវត្តិសាស្ត្រ។ ប្រវត្តិសាស្ឆត្ររបស់ប្រទេសកម្ពុជា។ យើងអាចនិយាយថា យើងប្រកួតក្បាច់គុនសតវត្ស៍ទី៩។ នោះពិតជាល្អណាស់។ វាពិតជាអស្ចារ្យណាស់ដែលបានប្រកួតជាមួយកីឡាករនៅប្រទេសផ្សេងចំពោះកីឡារបស់ពួកគេ»។

ប្រសិនបើមានឱកាសជួបលើកក្រោយទៀត កីឡាករ John Mcleary សង្ឃឹមថា រូបគេអាចផ្តួល ចាន់ រតនាបាន។ «ប្រសិនបើយើងជួបគ្នាទៀត ខ្ញុំជឿថា ខ្ញុំនឹងផ្តួលគាត់បាន។ ខ្ញុំនឹងឃ្លេគាត់ឲ្យចុះចាញ់»៕

អត្ថបទ៖ វីរបុត្រ

The post កីឡាករហ្វីលីពីន John Mcleary ប្រាប់មូលហេតុដែលយំ ក្រោយចាញ់ ចាន់ រតនា appeared first on Kampuchea Thmey Daily.

អ្នកលេងគុនហ្វីលីពីន John Rinon ត្រៀមរួចរាល់ប៉ះអ្នកជំនាញគុនចម្រុះ ចាន់ រតនា

Pha Rothana — Thu, 14 Dec 2023 08:12:32 +0000

កីឡាករ John Rinon Ornido សញ្ជាតិហ្វីលីពីនវ័យ២០ឆ្នាំ បានស្គាល់ច្បាស់ពីសមត្ថភាពរបស់កីឡាករគុនចម្រុះ ចាន់ រតនា មុនពេលជួបគ្នា ក្នុងកម្មវិធី«អ្នកលេងគុន» នាថ្ងៃទី១៥ ខែឆ្នូ ឆ្នាំ២០២៣ នៅពហុកីឡដ្ឋានជាតិអូឡាំពិក។

John Rinon ជាកីឡាករក្បាច់គុនចម្រុះ ប៉ុន្តែរូបគេបានហ្វឹកហាត់គុនល្បុក្កតោបាន៦ខែហើយមុនពេលចូលរួមក្នុងកម្មវិធីអ្នកលេងគុន។ រូបគេជាកីឡាករវ័យក្មេងមែន ប៉ុន្តែសមត្ថភាពខ្ពស់ ដោយធ្លាប់ប្រកួតគុនចម្រុះ៤ដង ក្នុងនោះឈ្នះ៣ និងចាញ់១។ សម្រាប់ការហ្វឹកហាត់ល្បុក្កតោរយៈពេល៦ខែ កីឡាករហ្វីលីពីនរូបនេះមានពេលវេលាហ្វឹកហាត់គ្រប់គ្រាន់ និងបានស្គាល់ច្រើនពីគុនល្បុក្កតោរបស់ខ្មែរ។

កីឡាករ John បានប្រាប់«កម្ពុជាថ្មី»ថា ៖«ខ្ញុំតែងតែមើលការប្រកួតរបស់កីឡាករ ចាន់ រតនា។ ខ្ញុំបានឃើញគ្រប់ចំណុចពីអ្វីដែលគាត់មាន។ ខ្ញុំមើលឃើញការបំលាស់ទីរបស់គាត់គ្រប់ជំហាន ការវ៉ៃចេញ ចូល ការពារ គ្រប់ការប្រកួតផ្លូវការរបស់គាត់។ ខ្ញុំត្រៀមខ្លួនបានយ៉ាងល្អសម្រាប់ការប្រកួតស្អែក។ ខ្ញុំបានរៀនសូត្រពីកីឡាករ រតនា ជាច្រើន»។

ស្ថិតក្នុងវ័យ២០ឆ្នាំ ទោះបីមិនសូវមានបទពិសោធច្រើនមែន ប៉ុន្តែ John Rinon គ្មានអ្វីបារម្ភច្រើនទេ ដោយសាររូបគេមានពេលគ្រប់គ្រាន់ក្នុងការត្រៀមខ្លួន។

ក្នុងការប្រកួតស្អែកជាឱកាសថ្មីមួយទៀតដែលកីឡាករហ្វីលីពីនស្វែងរកជ័យជម្នះលើជើងខ្លាំងកម្ពុជា និងដើម្បីបង្កើនបទពិសោធក្បាច់គុនល្បុក្កតោខ្មែរ៕

អត្ថបទ៖ ផា រតនា

The post អ្នកលេងគុនហ្វីលីពីន John Rinon ត្រៀមរួចរាល់ប៉ះអ្នកជំនាញគុនចម្រុះ ចាន់ រតនា appeared first on Kampuchea Thmey Daily.

ចាន់ រតនា កំពុងត្រៀមប្រកួតទាំងសេរី និងគុនចម្រុះនៅបារាំង

chean virakbot — Tue, 16 Aug 2022 01:30:00 +0000

កីឡាករគុនចម្រុះកម្ពុជា ចាន់ រតនា កំពុងត្រៀមខ្លួនប្រកួតប្រដាល់សេរី និងគុនចម្រុះ (MMA) នៅប្រទេសបារាំង បន្ទាប់ពីស្ងប់ស្ងាត់ក្នុងការឡើងសង្វៀន ONE Championship។

ចាន់ រតនា ដែលមានភរិយា និងកូនស្រីទាំងពីរកំពុងស្ថិតនៅប្រទេសបារាំង បានប្រាប់ថា រូបគេបានទៅដល់ប្រទេសបារាំងជាងមួយសប្តាហ៍ហើយ។ ក្រោយពេលទៅដល់ រូបគេបានទាក់ទងខាងក្លឹបប្រដាល់ និងរៀបចំឲ្យមានការប្រកួត ស្របពេលដែលប្រទេសបារាំងបើកដំណើរការឡើងវិញ។

«គេកំពុងរៀបចំ តែមិនទាន់ដឹងថ្ងៃច្បាស់ទេ។ ប្រកួតទាំងពីរ គឺប្រដាល់សេរីផង និងប្រដាល់គុនចម្រុះផង។ នៅបារាំងទើបបើកការប្រកួតឡើងវិញ ដោយសារកូវីដ-១៩ តែឥឡូវគេបើកហើយ។ ខ្ញុំបានទៅដល់ក្លឹបស៊ាងហៃ នៅបារាំង។ ក្លឹបហ្នឹងធ្លាប់មានបង្ហាត់នៅខ្មែរយើង»។ ចាន់ រតនា បានបញ្ជាក់។

ទោះបីជាយ៉ាងណា អ្នកលេងគុនខ្មែររូបនេះមិនទាន់ហ្វឹកហាត់ពេញលេញទេនៅប្រទេសបារាំងដោយសារជាខែវិស្សមកាល ដូច្នេះក្លឹបបង្ហាត់ប្រដាល់មិនទាន់បើកបង្ហាត់ពេញលេញទេគឺទាល់ដល់ខែក្រោយទើបបើកពេញម៉ោងវិញ។

ការធ្វើដំណើរទៅប្រទេសបារាំងរបស់ ចាន់ រតនា ក៏ដើម្បីជួបប្រពន្ធកូនដែលកំពុងស្ថិតនៅទីនោះដែរ បន្ទាប់ពីពួកគាត់ចាកចេញពីប្រទេសកម្ពុជាតាំងពីឆ្នាំដើមឆ្នាំ២០២២។ ការប្រកួតចុងក្រោយរបស់កីឡាករគុនខ្មែររូបនេះកាលពីខែមីនា ឆ្នាំ២០២២ដែលពេលនោះចាញ់កីឡាករឥណ្ឌូនេស៊ី Eko Roni Saputra ក្នុងទឹកទី១៕

អត្ថបទ៖ វីរបុត្រ

The post ចាន់ រតនា កំពុងត្រៀមប្រកួតទាំងសេរី និងគុនចម្រុះនៅបារាំង appeared first on Kampuchea Thmey Daily.

ចាន់ រតនា ទទួលស្គាល់មូលហេតុធ្វើឲ្យចាញ់ Eko Roni យ៉ាងឆាប់រហ័ស

Sorn Phanith — Wed, 16 Mar 2022 09:13:11 +0000

អ្នកលេងគុនចម្រុះកម្ពុជា ចាន់ រតនា បានចាញ់កីឡាករឥណ្ឌូណេស៊ី Eko Roni Saputra យ៉ាងឆាប់រហ័សក្នុងដើមទឹកទី ១ នៃព្រឹត្តិការណ៍ផ្សាយផ្ទាល់ ONE: LIGHT OUT កាលពីថ្ងៃសុក្រ ទី១១ នៅប្រទេសសិង្ហបុរី។

ជុំវិញបរាជ័យយ៉ាងឆាប់រហ័សហួសពីការរំពឹងទុកនេះ ត្រូវបាន ចាន់ រតនា បានប្រាប់ក្រោយពេលប្រកួតថា កត្តាចម្បងដែលធ្វើឲ្យរូបគេចាញ់យ៉ាងឆាប់រហ័សបែបនេះ គឺបណ្តាលមកពីរូបគេមើលស្រាលដៃគូ។ ចាន់ រតនា បានរៀបរាប់ថា ៖«មូលហេតុចម្បងមកពីខ្ញុំធ្វេសប្រហែស។ ខ្ញុំមើលស្រាលការចាប់របស់គេពេក។ ធ្វើឲ្យដៃរបស់គាត់ឃ្លេដល់បំពង-ករបស់ខ្ញុំពេញ។ តាមពិតទៅដៃរបស់គាត់ធំអីចឹង ឃ្លេមិនសូវដល់បំពង-ក ទេ បើបានការពារ តែខ្ញុំប្រហែសធ្វើឲ្យដៃរបស់គាត់ចូលដល់បំពង-កពេញ»។

សម្រាប់កម្លាំងស៊ុហ្វ និងកាយសម្បទារបស់ Eko Roni មិនសូវខ្លាំង និងរឹងមាំដូចដៃគូមុនគឺកីឡាករចិនឡើយ ហើយអាចទប់ទល់បានសម្រាប់កម្លាំងស៊ុហ្វ និងកាយសម្បទា។ «បើនិយាយកម្លាំង និងរាងកាយ គឺមិនដូចដៃគូខ្ញុំមុនគឺ Xie Wei ទេ។ បើខ្ញុំដោះឃ្លេរបស់គាត់បាន ខ្ញុំអាចទប់ទល់ ហើយក៏មានសង្ឃឹមឈ្នះច្រើនដែរ»។ ចាន់ រតនា បានបន្ថែម។

ការពិតនៅលើសង្វៀនបង្ហាញថា ចាន់ រតនា បានចាប់ផ្តើមការប្រកួតនៅទឹកទី ១ ដោយមិនមានការវាស់ស្ទង់ឡើយពោលគឺចូលទាត់ និងទាត់តែម្តង ខណៈកីឡាករឥណ្ឌូណេស៊ី Eko Roni ក៏បានទាត់ ព្រមទាំងប្រើកណ្តាប់ដៃដ៏មានប្រសិទ្ធភាពដែរ។ បន្ទាប់មកកីឡាករឥណ្ឌូណេស៊ីរូបនេះ ចូលអោប ហើយនៅពេល ចាន់ រតនា ក្រោកឈរ រូបគេបានអោបពីក្រោយ និងកាច់ផ្តួល។ ពេលនោះហើយរូបគេមានឱកាសចាប់ឃ្លេដៃទាំងពីរបង្ខំឲ្យអ្នកលេងគុនខ្មែរគោះដៃសុំចាញ់តែម្តងនូវនាទី១:៤០ក្នុងទឹកទី១។

នេះជាបរាជ័យលើកនេះ គឺជាពីរលើកជាប់គ្នាសម្រាប់ ចាន់ រតនា បន្ទាប់បានចាញ់កីឡាករចិន Xie Wei ក្នុងទឹកទី ៣ កាលពីចុងឆ្នាំ ២០២០ ។ ទោះជាយ៉ាងណា អ្នកលេងគុនខ្មែររូបនេះ នៅតែប្ដេជ្ញាបន្តហ្វឹកហាត់តាមរយៈគំនិតវិជ្ជមានជានិច្ច និងទុកជាមេរៀនក្នុងជីវិត៕

The post ចាន់ រតនា ទទួលស្គាល់មូលហេតុធ្វើឲ្យចាញ់ Eko Roni យ៉ាងឆាប់រហ័ស appeared first on Kampuchea Thmey Daily.

កីឡាករ Xie Wei ថានឹងបញ្ចប់ ចាន់ រតនា នៅទឹកទី២នាយប់នេះ

Bo Doula — Fri, 18 Dec 2020 07:00:14 +0000

តារាគុនចម្រុះចិន Xie Wei បានដាក់គោលដៅផ្ដួល ចាន់ រតនា នៅត្រឹមទឹកទី២ យប់នេះ នៅប្រទេសសិង្ហបុរី។

Xie Wei នឹងជួប រតនា នៅព្រឹត្តិការណ៍ប្រកួត ONE: COLLISION COURSE ឯកីឡដ្ឋាន Singapore Indoor Stadium នារាត្រីថ្ងៃសុក្រ ទី១៨ ខែធ្នូនេះ ដែលផ្សាយផ្ទាល់ពីផេកហ្វេសប៊ុក និង YiuTube ផ្លូវការរបស់ ONE Championship ចាប់ពីម៉ោង ៧:៣០ យប់តទៅ។

Xie Wei បានឲ្យដឹងថា ៖«ខ្ញុំមានកិត្តិយសខ្លាំងណាស់ក្នុងការប្រកួតនៅសង្វៀនលំដាប់ពិភពលោក និងប្រកួតតំណាងឲ្យប្រទេសរបស់ខ្ញុំ។ ខ្ញុំបានឆ្លងកាត់បទពិសោធន៍ដ៏លំបាកមួយក្នុងលោកពីសង្វៀន ONE HERO SERIES នៅចិន និងមានឱកាសធំបំផុតនៅសង្វៀនលំដាប់ពិភពលោក ONE Championship» ។

តារាគុនចម្រុះចិន បានសង្កត់ធ្ងន់ទៀតថា ៖ «ពេលនេះ ខ្ញុំគិតថា ខ្ញុំល្អជាងលើកមុន។ ខ្ញុំបានរៀបចំនិងត្រៀមខ្លួនប្រកួត ៣ ទឹកឲ្យល្អបំផុតជាមួយគូប្រកួតរបស់ខ្ញុំនាពេលនេះ។ ខ្ញុំហ៊ានទាយថា ខ្ញុំនឹងបញ្ចប់ ចាន់ រតនា ត្រឹមទឹកទី២។ បច្ចុប្បន្ននេះ ក្ដីស្រមៃរបស់ខ្ញុំគឺកើនចំណាត់ថ្នាក់នៅទម្ងន់ flyweight ។ ហើយបន្ទាប់ទៀត ខ្ញុំនឹងចាប់ផ្ដើមក្ដីសុបិនធំទៅថ្ងៃមុខ»។

ជាមួយគ្នានោះ តារាគុនចម្រុះទូតសុច្ឆន្ទៈរបស់ក្រុមហ៊ុន សែលកាត ចាន់ រតនា យល់ឃើញថា ការប្រកួតរបស់ខ្លួននាយប់នេះនេះនឹងមិនបាន៣ទឹកពេញទេ ហើយក៏ជាគោលបំណងដែលខ្លួនចង់បានដែរ។

ចាន់ រតនា បញ្ជាក់ ៖««ការប្រកួតនេះនឹងមានម្នាក់សន្លប់។ បើមិនគេទេ គឺយើង។ ខ្ញុំស្គាល់ច្បាស់ហើយ Xie Wei ជាកីឡាករអន្ទះសាម្នាក់។ គ្រាន់តែសំឡេងកណ្តឹងរោទិ៍ឡើងភ្លាម គាត់ច្បាស់ជារុលសម្រុកចូលវ៉ៃហើយ»៕

The post កីឡាករ Xie Wei ថានឹងបញ្ចប់ ចាន់ រតនា នៅទឹកទី២នាយប់នេះ appeared first on Kampuchea Thmey Daily.

ចាន់ រតនា Archives - Kampuchea Thmey Daily

ខានវ៉ៃគុនខ្មែរច្រើនឆ្នាំ ចាន់ រតនា ត្រឡប់វិញឈ្នះខ្សែក្រវាត់មានប្រាក់ជាង២០លាន​រៀល

ចាន់ រតនា ប្រាប់ថា អ្នក​ចាត់​ការ​ខ្លួនបើកភ្លើងខៀវឲ្យប្រកួតគុនខ្មែរហើយ

នារីបារាំងដ៏​ស្រស់​ស្អាត Ava Ruiz ហាត់ល្បុក្កតោដើម្បីស្គាល់វប្បធម៌ខ្មែរ