កីឡា

ចាន់ រតនា ប្រាប់ថា អ្នកចាត់ការខ្លួនបើកភ្លើងខៀវឲ្យប្រកួតគុនខ្មែរហើយ

បានផុស

៣ years មុន

នៅ

ថ្ងៃសុក្រ ២២ ធ្នូ ២០២៣

ដោយ

អ្នកលេងគុនចម្រុះកម្ពុជា ចាន់ រតនា នឹងវិលត្រឡប់ចូលសង្វៀនគុនខ្មែរវិញឆាប់ៗ បន្ទាប់ពីរូបគេបានប្រកួតល្បុក្កតោក្នុងកម្មវិធី«អ្នកលេងគុន»កាលពីថ្ងៃទី១៥ ខែធ្នូ ឆ្នាំ២០២៣ នៅពហុកីឡដ្ឋានជាតិអូឡាំពិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករដែលមានបទពិសោធគុនចម្រុះច្រើនរូបនេះបានឲ្យដឹងថា អ្នកចាត់ការរបស់ខ្លួនបានបើកទ្វារឲ្យប្រកួតគុនខ្មែរវិញហើយ ប៉ុន្តែមិនទាន់ច្បាស់ពីពេលវេលាចេញប្រកួតនៅឡើយទេ។ ក្នុងរយៈពេលពីរបីឆ្នាំចុងក្រោយនេះ រូបគេនៅតែបន្តហ្វឹកហាត់ជាប្រចាំ និងរក្សារាងកាយឲ្យមានសាច់ដុំមាំមួនដដែល បើទោះបីជារូបគេមិនបានប្រកួតនៅសង្វៀនគុនចម្រុះ ONE Championship។

រតនា បាននិយាយថា ៖«ពេលអត់បានប្រកួតពីរឆ្នាំចុងក្រោយនេះ ខ្ញុំអត់បណ្តោយខ្លួនឲ្យឃ្លាតឆ្ងាយពីកន្លែងហ្វឹកហាត់ទេ ព្រោះយើងជាកីឡាករទោះប្រកួតក្តី អត់ប្រកួតក្តីក៏ត្រូវតែហ្វឹកហាត់ជាប្រចាំ។ ជាពិសេសយើងជាកីឡាករអាជីពមិនត្រូវបណ្តោយខ្លួន អត់ហ្វឹកហាត់ ដើរលេងធ្វើឲ្យប៉ះពាល់ដល់រាងកាយ ឡើងគីឡូ អីចឹងវាប៉ះពាល់ដល់ការប្រឹងប្រែងរបស់យើងច្រើនឆ្នាំអត់ន័យ»។

នៅពេលសួរថា ហេតុបានជាចង់ប្រកួតគុនខ្មែរវិញ? កីឡាករដែលមានជំនាញល្បុក្កតោ គុនខ្មែរ និងគុនចម្រុះរូបនេះបានឆ្លើយថា ខ្លួននៅមានកាយសម្បទាមាំមួន និងកម្លាំងអាចប្រកួតបាន ស្របពេលវិស័យកីឡាគុនខ្មែរកំពុងរីកចម្រើនផងនោះបានធ្វើឲ្យរូបគេចង់ប្រកួតវិញ។ ជាពិសេសកីឡាករគុនខ្មែរមិនមានច្រើន ប៉ុន្តែសង្វៀនប្រកួតសំបូរដែលអាចធ្វើឲ្យទទួលបានឱកាសប្រកួតច្រើនដែរ។

ចាន់ រតនា នៅមានកុងត្រាជាមួយស្ថាប័នប្រដាល់គុនចម្រុះ ONE Championship ប៉ុន្តែការប្រកួតពីរលើកចុងក្រោយកាលពីឆ្នាំ២០២០ និង២០២២មិនបានល្អ ធ្វើឲ្យរូបគេមិនទទួលបានឱកាសប្រកួតបន្តទៀត។ ទោះបីជាមិនបានចេញប្រកួត កីឡាកររូបនេះកំពុងបង្ហាត់ក្បាច់គុនល្បុក្កតោដល់ស្ថាប័នឯកជន ជាពិសេសមានជនបរទេសជាច្រើនបានហ្វឹកហាត់ជាមួយ។

សូមបញ្ជាក់ថា ចាន់ រតនា បានប្រកួតឈ្នះកីឡាករហ្វីលីពីន John Rinon ដោយពិន្ទុ បន្ទាប់ពីតស៊ូគ្នា៣ទឹកយ៉ាងស្វិតស្វាញក្នុងកម្មវិធី«អ្នកលេងគុន»កាលពីយប់ថ្ងៃទី១៥ ខែធ្នូ ឆ្នាំ២០២៣៕

អត្ថបទ៖ វីរបុត្រ