កីឡាបាល់ទាត់លើតុ Archives - Kampuchea Thmey Daily

សហព័ន្ធកីឡាបាល់ទាត់លើតុកម្ពុជា កំពុងទទួលបានការចាប់អារម្មណ៍ខ្លាំងពីអន្តរជាតិ

Sina Noun — Mon, 08 Jun 2026 08:27:02 +0000

ប្រធានសហព័ន្ធកីឡាបាល់ទាត់លើតុ លោក វ៉ាត់ ចំរើន ថាក្នុងពេលឥលូវនេះសហព័ន្ធអន្តរជាតិកំពុងចាប់អារម្មណ៍ខ្លាំងមកលើកម្ពុជាដោយសារភាពសកម្ម នៃការចូលរួមព្រឹត្តិការណ៍ផ្សេងៗ និងសម្មភាពជាបន្តបន្ទាប់នាពេលកន្លងមកនេះ។

ទិដ្ឋភាពប្រកួត

លោក វ៉ាត់ ចំរើន បានឲ្យដឹងថា សហព័ន្ធអន្តរជាតិកំពុងមានការចាប់អារម្មណ៍មកលើវិស័យបាល់ទាត់លើតុរបស់កម្ពុជាតាមរយៈភាពសកម្មនាពេលកន្លងមកដូចជាការចូលរួមការប្រកួតកីឡាឆ្នេរខ្សាច់អាស៊ី នៅឯប្រទេសចិនថ្មីៗនេះជាដើម។

ថ្នាក់ដឹកនាំរូបនេះបានលើកទឹកចិត្តដល់អគ្គលេខាធិការ គ្រូបង្វឹក កីឡាករ កីឡាការិនីឲ្យបន្តខំប្រឹងប្រែងដុះខាត់សមត្ថភាព និងស្វែងរកនូវបច្ចេកទេសថ្មីៗបង្កើតសមត្ថភាព។ ក្នុងឱកាសដែលអន្តរជាតិកំពុងចាប់អារម្មណ៍កម្ពុជាត្រូវតែរៀបចំគម្រោងផែនការចម្បងៗដើម្បីពង្រីកសកម្មភាពតាមរយៈការបង្កើតឲ្យមានវគ្គបណ្ដុះបណ្ដាល និងស្វែងរកការជួយឧបត្ថម្ភគាំទ្រដូចជាស្នើរសុំគ្រូកម្រិតអន្តរជាតិមកបង្ហាត់បង្រៀន ឬមកចែករំលែកបទពិសោធល្អៗថែមទៀត។

លោក វ៉ាត់ ចំរើន

ប្រធានសហព័ន្ធរូបនេះបញ្ជាក់ទៀតថា កីឡាបាល់ទាត់លើតុកម្ពុជាមានឱកាសច្រើនក្នុងការប្រកួតលើឆាកអន្តរជាតិ ព្រោះសមត្ថភាពបច្ចេកទេសមើលឃើញថាមិនខុសគ្នាប៉ុន្មាននោះឡើយពីប្រទេសក្នុងតំបន់អាស៊ីនេះ។ កីឡាមួយនេះទើបបង្កើតនៅកម្ពុជាមែន ប៉ុន្តែភាពរីកចម្រើន និងសកម្មភាពការចូលរួមផ្សេងៗមានបន្តបន្ទាប់មិនចាញ់បណ្ដាប្រទេសក្នុងអាស៊ីនេះឡើយ។ ឱកាសក្នុងការប្រជែងមេដាយកម្រិតអន្តរជាតិនៅមានច្រើនទៀតនៅពេលខាងមុខសម្រាប់ក្រុមកម្ពុជា ដូច្នេះការពង្រឹងសមត្ថភាពជារឿងសំខាន់បំផុត។

ទិដ្ឋភាពប្រកួត

បញ្ជាក់ដែរថា កីឡាបាល់ទាត់លើតុគឺទើបតែបង្កើតឲ្យមានជាសហព័ន្ធ និងរចនាសម្ព័ន្ធនៅកម្ពុជាបានប៉ុន្មានឆ្នាំនេះនោះទេ។ យ៉ាងណាបើទោះជាប្រភេទកីឡាថ្មីទើបចូលរួមមកកម្ពុជាបែបនេះតែសកម្មភាពក្នុងស្រុក និងសមិទ្ធផលមេដាយគឺសហព័ន្ធកីឡាបាល់ទាត់លើតុនេះឈ្នះជាបន្តបន្ទាប់មកដែរ៕

អត្ថបទដោយ៖ នួន ស៊ីណា

The post សហព័ន្ធកីឡាបាល់ទាត់លើតុកម្ពុជា កំពុងទទួលបានការចាប់អារម្មណ៍ខ្លាំងពីអន្តរជាតិ appeared first on Kampuchea Thmey Daily.

កីឡាករ វឿន ណាវ៉ន ដាក់គោលដៅខំប្រឹងឲ្យបានចេញទៅប្រកួតនៅលើឆាកអន្តរជាតិ

Sina Noun — Wed, 03 Jun 2026 05:03:32 +0000

ម្ចាស់មេដាយមាសជើងឯកថ្នាក់ជាតិ ឆ្នាំ២០២៦ និងជាកីឡាករជម្រើសជាតិកីឡាបាល់ទាត់លើតុ វឿន ណាវ៉ន បានដាក់គោលដៅបន្តទៀតគឺនឹងខំប្រឹងហ្វឹកហាត់ពង្រឹងសមត្ថភាពដើម្បីក្កោបឱកាសបានចេញទៅប្រកួតលើឆាកអន្តរជាតិ និងដណ្ដើមមេដាយជូនកម្ពុជា។

វឿន ណាវ៉ន និងគ្រូៗ

កីឡាករវ័យ ២៥ឆ្នាំ វឿន ណាវ៉ន បានឲ្យដឹងថា ទើបតែឆ្នាំនេះទេដែលរូបគេជោគជ័យដោយឈ្នះបានមេដាយមាសប្រចាំការប្រកួតជើងឯកថ្នាក់ជាតិ ឆ្នាំ២០២៦ ។ បើទោះជាជោគជ័យ និងឈ្នះមេដាយបាន ២គ្រឿងបែបនេះមែន ប៉ុន្តែរូបគេមើលឃើញថាសមត្ថភាពនៅខ្វះខាតច្រើនទៀត។

កីឡាករ វឿន ណាវ៉ន

អ្នកកីឡាដើមកំណើតពីខេត្តត្បូងឃ្មុំរូបនេះបន្ថែមទៀតថា គោលដៅតទៅមុខទៀតនេះគឺត្រូវពង្រឹងសមត្ថភាពបន្ថែម កែប្រែចំណុចខ្វះខាត និងព្យាយាមស្ដាប់តាមដំបូលន្មានគ្រូដើម្បីមានភាពរីកចម្រើនឈានទទួលបានឱកាសចេញទៅប្រកួតនៅលើឆាកអន្តរជាតិ។ រូបគេមានក្ដីស្រមៃចង់ឈ្នះមេដាយអន្តរជាតិបន្តទៀតជូនប្រទេសកម្ពុជា។

សកម្មភាពហាត់លេងនៅសួនក្ដាន់ពីរ

បញ្ជាក់ដែរថា តាមរយៈការតស៊ូខំប្រឹងប្រែង និងស្រឡាញ់កីឡាពិតប្រាកដរបស់ វឿន ណាវ៉ន បានធ្វើឲ្យរូបគេប្រែពីអ្នករើសបាល់តាមសួនច្បារក្លាយជាកីឡាករបាល់ទាត់លើតុមួយរូប និងជាប់ជម្រើសជាតិទៀតផង។ ថ្មីៗនេះរូបគេបានឈ្នះមេដាយ ២គ្រឿងក្នុងការប្រកួតជើងឯកថ្នាក់ជាតិលើប្រភេទកីឡាបាល់ទាត់លើតុ។ វឿន ណាវ៉ន ដុះចេញពីការអាណិតស្រឡាញ់ និងផ្ដល់ឱកាសរបស់ក្រុមបាល់ទាត់ WE ARE DN នៅសួនច្បារក្ដាន់ពីរ៕

សកម្មភាពហាត់លេងនៅសួនក្ដាន់ពីរ

អត្ថបទដោយ៖ នួន ស៊ីណា

The post កីឡាករ វឿន ណាវ៉ន ដាក់គោលដៅខំប្រឹងឲ្យបានចេញទៅប្រកួតនៅលើឆាកអន្តរជាតិ appeared first on Kampuchea Thmey Daily.

វឿន ណាវ៉ន ម្ចាស់មេដាយមាសជើងឯកថ្នាក់ជាតិបាល់ទាត់លើតុផ្ដើមចេញពីអ្នករើសបាល់ឲ្យគេតាមសួនច្បារ

Sina Noun — Tue, 02 Jun 2026 06:39:55 +0000

ម្ចាស់មេដាយមាស និងមេដាយប្រាក់ជើងឯកថ្នាក់ជាតិកីឡាបាល់ទាត់លើតុ ឆ្នាំ២០២៦ កីឡាករ វឿន ណារ៉ន មាននិស្ស័យជាមួយបាល់តាំងពីតូចៗ និងចាប់ផ្ដើមពីអ្នករើសបាល់ឲ្យគេលេងនៅតាមសួនច្បារក្ដាន់ពីររហូតមានឱកាសជាប់ជម្រើសជាតិ។

កីឡាករ វឿន ណាវ៉ន

កីឡាករ វឿន ណាវ៉ន បានឲ្យដឹងថា អំឡុងឆ្នាំ២០១៣ រូបគេគ្រាន់តែជាក្មេងម្នាក់អង្គុយមើលចាស់ៗលេងបាល់ លេងសីដក់ និងចាំជួយរើសបាល់ឲ្យគេនៅម្ដុំសួនច្បារក្ដាន់ពីរតែប៉ុណ្ណោះ។ ដោយចិត្តស្រឡាញ់តាំងពីតូច និងឧស្សារហ៍រើសបាល់ជាច្រើនឆ្នាំទើបរូបគេបានការទុកចិត្តពីចាស់ៗរហូតមានឱកាសហាត់រៀន និងបានចូលលេងបាល់ជាមួយ។

ម្ចាស់មេដាយមាសឆ្នាំ២០២៦ រូបនេះបន្ថែមទៀតថា ដោយសារតែការខំប្រឹងប្រែង និងឧស្សាហ៍ព្យាយាមទើបមានការជួយជ្រោមជ្រែងពីគ្រូចាស់ៗរហូតឲ្យបានចូលហ្វឹកហាត់កីឡាបាល់ទាត់លើតុ និងបានជាប់ជាកីឡាករជម្រើសជាតិដូចពេលនេះ។

កីឡាករ វឿន ណាវ៉ន

កីឡាករវ័យ ២៥ឆ្នាំរូបនេះមិនភ្លេចឡើយគុណបំណាច់របស់លោក ស្រូយ សុវណ្ណារ៉ា ដែលជាគ្រូនៃក្លឹបបាល់ទាត់ We Are DN និងលោកស្រី ងួន ច័ន្ទបរមី គ្រូបង្វឹកជម្រើសជាតិបាល់ទាត់លើតុដែលអ្នកទាំងពីរបានផ្ដល់ឱកាស និងបង្ហាត់បង្រៀនកន្លងមករហូតក្លាយជាកីឡាករអាជីពមួយរូប។ យ៉ាងណាខ្លួននឹងបន្តខំប្រឹងប្រែងហ្វឹកហាត់បន្ថែមទៀតដើម្បីបំពេញនូវចំណុចខ្វះខាតឲ្យក្លាយជាកីឡាករដែលមានសមត្ថភាពល្អអាចប្រជែងមេដាយជូនប្រទេសកម្ពុជាលើឆាកអន្តរជាតិនៅថ្ងៃខាងមុខនេះ។

ទិដ្ឋភាព ណាវ៉ន ហ្វឹកហាត់នៅក្ដាន់ពីរ

បញ្ជាក់ដែរថា វឿន ណាវ៉ន ជាកីឡាករជម្រើសជាតិកីឡាបាល់ទាត់លើតុ ឆ្នាំ២០២៦ នេះ។ រូបគេទើបតែមានឱកាសជាប់ជម្រើសជាតិនៅឆ្នាំនេះនោះទេ។ ក្នុងការប្រកួតជ្រើសរើសជើងឯកថ្នាក់ជាតិ ឆ្នាំ២០២៦ រូបគេលេងតំណាងក្លឹបក្រសួងមហាផ្ទៃ និងដណ្ដើមបានមេដាយ ២គ្រឿង មាស១ វិញ្ញាសាគូបុរស និងមេដាយប្រាក់១ លើវិញ្ញសាចម្រុះ (បុរស-នារី) ដែលទើបបញ្ចប់កាលពីថ្ងៃទី៣១ ខែឧសភា ២០២៦ នេះនៅមជ្ឈមណ្ឌលជាតិហ្វឹកហ្វឺនកីឡា រាជធានីភ្នំពេញ៕

វឿន ណាវ៉ន និងគ្រូ

អត្ថបទដោយ៖ នួន ស៊ីណា

The post វឿន ណាវ៉ន ម្ចាស់មេដាយមាសជើងឯកថ្នាក់ជាតិបាល់ទាត់លើតុផ្ដើមចេញពីអ្នករើសបាល់ឲ្យគេតាមសួនច្បារ appeared first on Kampuchea Thmey Daily.

លោក វ៉ាត់ ចំរើន បាល់ទាត់លើតុជាកីឡាកំពុងមានការចាប់អារម្មណ៍នៅអន្តរជាតិ ដូច្នេះកម្ពុជាសូមបន្តអភិវឌ្ឍន៍សមត្ថភាព

Sina Noun — Mon, 01 Jun 2026 02:06:43 +0000

លោក វ៉ាត់ ចំរើន ប្រធានសហព័ន្ធកីឡាបាល់ទាត់លើតុកម្ពុជា ថាវិស័យកីឡាមួយនេះកំពុងមានការចាប់អារម្មណ៍ និងផុលផុសខ្លាំងលើឆាកអន្តរជាតិ និងរួមទាំងមានកម្មវិធីប្រកួតច្រើនថែមទៀត ដូច្នេះក្រុមកម្ពុជាត្រូវបន្តខំប្រឹងអភិវឌ្ឍន៍សមត្ថភាពឲ្យបានកាន់តែល្អ។

លោក វ៉ាត់ ចំរើន

ប្រធានសហព័ន្ធកីឡាបាល់ទាត់លើតុ លោក វ៉ាត់ ចំរើន បានលើកឡើងថា នៅលើឆាកអន្តរជាតិកំពុងមានការចាប់អារម្មណ៍ច្រើនលើប្រភេទកីឡាបាល់ទាត់លើតុនេះ។ ការចូលចិត្តហ្វឹកហាត់ និងប្រកួតជាលក្ខណៈផ្លូវការគឺមានច្រើនកម្មវិធីនាពេលកន្លងមកនេះ។

ទិដ្ឋភាពប្រកួតជើងឯកថ្នាក់ជាតិ

ចំពោះកម្ពុជាកំពុងធ្វើដំណើរឆ្ពោះទៅរកការអភិវឌ្ឍន៍ឲ្យគួរកត់សម្គាល់តាមរយៈសមត្ថភាពកីឡាករ កីឡាការិនីដែលបានប្រកួតដណ្ដើមមេដាយកាលពីពេលថ្មីៗនេះនៅឯប្រទេសចិន។ តាមអ្វីដែលលោកមើលឃើញគឺក្រុមកម្ពុជាមានសក្កានុពលលើប្រភេទកីឡាមួយនេះ និងអាចប្រជែងមេដាយ មុខមាត់ ជាមួយបណ្ដាប្រទេសនៅអាស៊ីនេះបានផងដែរ។ ដូច្នេះគ្រូបង្វឹក កីឡាករ កីឡាការិនី ត្រូវបន្តខំប្រឹងប្រែងហ្វឹកហាត់ឲ្យបានទៀតទាត់ល្អប្រកបដោយបច្ចេកទេសត្រឹមត្រូវ និងត្រូវស្វែងរកនូវចំណុចល្អៗពីការប្រកួតអន្តរជាតិផ្សេងៗដើម្បីបន្តអភិវឌ្ឍន៍សមត្ថភាពខ្លួនឯងឲ្យបានកាន់តែខ្លាំង។

ពិធីបំពាក់មេដាយ

បញ្ជាក់ដែរថា សហព័ន្ធកីឡាបាល់ទាត់លើតុគឺជាសហព័ន្ធថ្មីទើបតែបង្កើតបានរយៈពេលប៉ុន្មានឆ្នាំមកនេះទេនៅកម្ពុជា។ កីឡាមួយនេះទើបមាននៅឯអន្តរជាតិមែន ប៉ុន្តែមានអ្នកគាំទ្រ និងលេងច្រើនដោយសារតែមានភាពងាយស្រួលក្នុងការលេង និងមិនប្រើប្រាស់សម្ភារច្រើន ឬទីលានធំដូចកីឡាដទៃឡើយ។ កាលពីថ្ងៃទី៣១ ខែឧសភា ឆ្នាំ២០២៦ ម្សិលមិញនេះសហព័ន្ធកីឡាបាល់ទាត់កម្ពុជាបានប្រារព្ធពិធីប្រកួតជើងឯកថ្នាក់ជាតិរបស់ខ្លួននៅឯសាលមជ្ឈមណ្ឌលជាតិហ្វឹកហ្វឺនកីឡាផងដែរដោយមានការចូលរួមពីលោក វ៉ាត់ ចំរើន ប្រធានសហព័ន្ធ និងថ្នាក់ដឹកនាំជាច្រើនរូបទៀតផងដែរ៕

ពិធីបំពាក់មេដាយ

អត្ថបទដោយ៖ នួន ស៊ីណា

The post លោក វ៉ាត់ ចំរើន បាល់ទាត់លើតុជាកីឡាកំពុងមានការចាប់អារម្មណ៍នៅអន្តរជាតិ ដូច្នេះកម្ពុជាសូមបន្តអភិវឌ្ឍន៍សមត្ថភាព appeared first on Kampuchea Thmey Daily.

ក្រុមកីឡាបាល់បោះ បាល់ទាត់លើតុ រីករាយចំពោះការចូលរួមកាន់តែច្រើនពីវិស័យឯកជនមកលើកីឡានៅកម្ពុជា

Sina Noun — Sun, 17 May 2026 02:35:55 +0000

ក្រុមកីឡាករបាល់បោះ និងគ្រូបង្វឹក កីឡាការិនីបាល់ទាត់លើតុ បង្ហាញភាពរីករាយចំពោះការចូលរួមកាន់តែច្រើនពីសំណាក់វិស័យឯកជនក្នុងការអភិវឌ្ឍន៍វិស័យកីឡានៅកម្ពុជាឲ្យកាន់តែរីកចម្រើនថែមទៀត ខណៈក្រុមហ៊ុន CHN Sports និង AEON ចាប់ដៃគូគ្នាជួយពង្រីកផ្សព្វផ្សាយកីឡាដល់មនុស្សគ្រប់ស្រទាប់បន្ថែមទៀត។

គ្រូបង្វឹកបាល់ទាត់លើតុ លោកស្រី ងួន ច័ន្ទបូរមី និងគ្រូបង្វឹកបាល់បោះ បានបង្ហាញការភាពរីករាយជាខ្លាំងនៅពេលវិស័យឯកជន បណ្ដាក្រុមហ៊ុនផ្សេងៗងាកមកចាប់អារម្មណ៍ និងចាប់ផ្ដើមចូលរួមលើកស្ទួយវិស័យកីឡានៅកម្ពុជាមានកាន់តែច្រើនបែបនេះ។ ការចូលរួមឧបត្ថម្ភ ការលើកទឹកចិត្ត និងការចូលរួមជួយផ្សព្វផ្សាយកន្លងមកនេះបានធ្វើឲ្យខ្លួនជាអ្នកកីឡារឹតតែមានទឹកចិត្តលើការហ្វឹកហាត់ និងប្រកួតដណ្ដើមយកជ័យជម្នះបន្ថែមទៀតជូនជាតិមាតុភូមិ។

បញ្ជាក់ដែរថា ក្រុមកីឡាបាល់បោះ កីឡាបាល់ទាត់លើតុកម្ពុជា បានចូលរួមអបអរផងដែរចំពោះពិធីចុះអនុស្សារណៈនេះកាលពីថ្ងៃទី១៦ ខែឧសភា ឆ្នាំ២០២៦៕

អត្ថបទដោយ៖ នួន ស៊ីណា

The post ក្រុមកីឡាបាល់បោះ បាល់ទាត់លើតុ រីករាយចំពោះការចូលរួមកាន់តែច្រើនពីវិស័យឯកជនមកលើកីឡានៅកម្ពុជា appeared first on Kampuchea Thmey Daily.

កីឡាឆ្នេរខ្សាច់អាស៊ី លើកទី៦៖ កម្ពុជាប្រកួតអស់ ២ប្រភេទកីឡាហើយ និងកំពុងដំណើរការប្រកួតកីឡាទី៣ បាល់ទាត់លើតុ

Sina Noun — Sat, 25 Apr 2026 08:02:16 +0000

ការប្រកួតកីឡាឆ្នេរខ្សាច់អាស៊ី លើកទី៦ នៅឯប្រទេសចិន បានចាប់ផ្ដើមតាំងពីថ្ងៃទី២២ មេសា ២០២៦ មកម្ល៉េះ ខណៈអត្តពលិកកម្ពុជាប្រកួត ២ប្រភេទកីឡារួចហើយ និងកំពុងដំណើរការប្រកួតបាល់ទាត់លើតុ ប៉ុន្តែមិនទាន់ដឹងលទ្ធផលយ៉ាងណានោះទេ។

ទិដ្ឋភាពពិធីបើកការប្រកួត

ព្រឹត្តិការណ៍កីឡាឆ្នេរខ្សាច់ប្រចាំទ្វីបអាស៊ី ដែលកំពុងធ្វើនៅឯប្រទេសចិនលើកនេះក្រុមអត្តពលិកកម្ពុជាប្រកួតអស់ពីរប្រភេទកីឡាហើយគឺកីឡាទ្រីយ៉ាត្លុង និងកីឡាជឺជីតស៊ូ។ ក្នុងចំណោមទាំងពីរប្រភេទកីឡានេះគឺកម្ពុជាដណ្ដើមបានមេដាយប្រាក់ ១គ្រឿងពីកីឡាទ្រីយ៉ាងត្លុង។

ចំពោះកីឡាបាល់ទាត់លើតុគឺដំណើរការប្រកួតចាប់តាំងពីម្សិលមិញមកម៉្លេះ។ ដូច្នេះក្រុមបាល់ទាត់លើតុកម្ពុជាក៏កំពុងដំណើរការប្រកួតជាមួយបណ្ដាប្រទេសចូលរួមដូចគ្នាទៅតាមវិញ្ញាសាផ្សេងៗ និងមិនទាន់ដឹងលទ្ធផលយ៉ាងខ្លះនៅឡើយទេ។ ប្រភេទកីឡាបាល់ទាត់លើតុនេះគឺធ្វើការប្រកួតចាប់ពីថ្ងៃទី២៤ ដល់ ២៨ មេសា ទើបបិទបញ្ចប់។

ទិដ្ឋភាពពិធីបើកការប្រកួត

បញ្ជាក់ដែរថា នៅព្រឹត្តិការណ៍កីឡាឆ្នេរខ្សាច់អាស៊ី លើកទី៦ ឆ្នាំ២០២៦ នេះគឺធ្វើឡើងនៅឯប្រទេសចិន ចាប់ពីថ្ងៃទី២២ ដល់ ៣០ ខែមេសា។ ចំពោះប្រទេសកម្ពុជាបញ្ជូនកីឡា ៤ប្រភេទទៅចូលរួមប្រកួតប្រជែងមេដាយ។ ២ប្រភេទកីឡារួមមាន ទ្រីយ៉ាងត្លុង ជឺជីតស៊ូ បានបញ្ចប់ការប្រកួតរួចហើយ។ ដោយឡែកកីឡាបាល់ទាត់លើតុកំពុងដំណើរការប្រកួត ស្របពេលកីឡាចំបាប់ចុងក្រោយគេទើបតែចេញដំណើរពីកម្ពុជាព្រឹកមិញនេះទេ។ ចំបាប់នឹងត្រូវប្រកួតនៅថ្ងៃទី២៧ ដល់ ២៩ មេសា។ បច្ចុប្បន្ននេះម្ចាស់ផ្ទះចិនកំពុងឈរចំណាត់ថ្នាក់លេខ១ ដោយឈ្នះមេដាយសរុប ១៩គ្រឿង មាស៩ ប្រាក៨ សំរឹទ្ធ២ គិតត្រឹមរសៀលថ្ងៃទី២៥ មេសា ២០២៦ នេះ៕

អត្ថបទដោយ៖ នូន ស៊ីណា

The post កីឡាឆ្នេរខ្សាច់អាស៊ី លើកទី៦៖ កម្ពុជាប្រកួតអស់ ២ប្រភេទកីឡាហើយ និងកំពុងដំណើរការប្រកួតកីឡាទី៣ បាល់ទាត់លើតុ appeared first on Kampuchea Thmey Daily.

ការប្រកួតកីឡាឆ្នេរខ្សាច់អាស៊ី លើកទី៦ កម្ពុជាចូលរួមតែ ៤ប្រភេទកីឡាទេក្រោមហេតុផលជួយសន្សំសំចៃថវិកា

Sina Noun — Tue, 21 Apr 2026 05:27:45 +0000

នៅព្រឹកថ្ងៃទី២១ ខែមេសា ឆ្នាំ២០២៦ នេះថ្នាក់ដឹកនាំ ប្រតិភូ និងក្រុមកីឡាករ កីឡាការិនីមួយចំនួនទៀតបានចេញដំណើរទៅប្រទេសចិនហើយដើម្បីចូលរួមការប្រកួតកីឡាឆ្នេរខ្សាច់អាស៊ី លើកទី៦ ឆ្នាំ២០២៦ ខណៈកម្ពុជាបញ្ចូនតែ ៤ប្រភេទតែប៉ុណ្ណោះដើម្បីជួយសន្សំសំចៃថវិការដ្ឋ។

រូបភាពលើផេកអគ្គនាយកដ្ឋានកីឡា

លោក វ៉ាត់ ចំរើន អគ្គលេខាធិការ នៃគណៈកម្មាធិការជាតិអូឡាំពិកកម្ពុជា និងជារដ្ឋលេខាធិការក្រសួងអប់រំ បានឲ្យដឹងថា ដោយបានការអនុញ្ញាតពីរាជរដ្ឋាភិបាល ក្រសួងអប់រំ យុវជន និងកីឡា បានឲ្យចូលរួមការប្រកួតកីឡាឆ្នេរខ្សាច់អាស៊ី លើកទី៦ ដើម្បីបំពេញកត្តកិច្ចជាសមាជិក នៃក្រុមប្រឹក្សាអូឡាំពិកអាស៊ី។ កម្ពុជាបានចូលរួមព្រឹត្តិការណ៍ឆ្នេរខ្សាច់នេះចំនួន ៥លើកមកហើយដោយលើកចុងក្រោយកាលពីឆ្នាំ២០១៦ នៅឯប្រទេសវៀតណាម។

ថ្នាក់ដឹកនាំកីឡាខាងលើនេះបន្ថែមទៀតថា ការទៅចូលរួមប្រកួតឆ្នាំនេះគឺមានចំនួនសមល្មមនោះទេមិនមានបែបទ្រុងទ្រាយធំដូចលើកមុនៗនោះឡើយ។ នេះជាការច្នៃប្រឌិត និងរួមគ្នាជាមួយរាជរដ្ឋភិបាលក្នុងការកាត់បន្ថយចំណាយណាដែលមិនចាំបាច់។ ដូច្នេះហើយការប្រកួតនៅចិននេះត្រូវបានកាត់បន្ថយច្រើន និងមានគ្រូបង្វឹក កីឡាករ កីឡាការិនីប្រហែលតែជាង ២០នាក់ប៉ុណ្ណោះ។

រូបភាពលើផេកអគ្គនាយកដ្ឋានកីឡា

បញ្ជាក់ដែរថា កាលពីព្រឹកថ្ងៃទី២១ ខែមេសា ឆ្នាំ២០២៦ នេះថ្នាក់ដឹកនាំ ប្រតិភូ គ្រូបង្វឹក កីឡាករ កីឡាការិនីខាងផ្នែកកីឡាបាល់ទាត់លើតុបានចេញដំណើរទៅប្រទេសចិនហើយដើម្បីចូលរួមព្រឹត្តិការណ៍កីឡាឆ្នេរខ្សាច់លើកទី៦ ។ ការចេញដំណើររបស់ប្រតិភូ គ្រូបង្វឹកនេះជាលើកទី២ ហើយស្របពេលលើកទី១ បានចេញដំណើរកាលពីថ្ងៃទី២០ ខែមេសា ម្សិលមិញនេះ។ កម្ពុជាបញ្ជូន ៤ប្រភេទកីឡារួមមាន ជឺជីតស៊ូ ទ្រីយ៉ាត្លុង បាល់ទាត់លើតុ និងចំបាប់ ដែលសរុបទាំងគ្រូបង្វឹក កីឡាករ កីឡាការិនីមានប្រមាណជាង ២០នាក់។ ការប្រកួតនេះនឹងចាប់ផ្ដើមពីថ្ងៃទី២២ ដល់ ៣០ ខែមេសា ឆ្នាំ២០២៦ នៅទីក្រុង Sanya ប្រទេសចិន៕

អត្ថបទដោយ៖ នួន ស៊ីណា

The post ការប្រកួតកីឡាឆ្នេរខ្សាច់អាស៊ី លើកទី៦ កម្ពុជាចូលរួមតែ ៤ប្រភេទកីឡាទេក្រោមហេតុផលជួយសន្សំសំចៃថវិកា appeared first on Kampuchea Thmey Daily.

សហព័ន្ធកីឡាបាល់ទាត់លើតុ ការប្រកួតឆ្នេរខ្សាច់ជើងឯកអាស៊ីនៅចិនលើកនេះកម្ពុជានឹងទទួលបានចំណាត់ថ្នាក់ល្អ

Sina Noun — Thu, 09 Apr 2026 08:17:51 +0000

អគ្គលេខាធិការសហព័ន្ធកីឡាបាល់ទាត់លើតុកម្ពុជា សម្រាប់ការប្រកួតលើឆ្នេរខ្សាច់ជើងឯកអាស៊ី លើកទី៦ នៅឯប្រទេសចិនខាងមុខនេះក្រុមជម្រើសជាតិកម្ពុជានឹងដណ្ដើមបានចំណាត់ល្អមួយតាមរយៈការត្រៀមខ្លួនបានល្អ និងមានពេលវែងកន្លងទៅនេះ។

លោក ម៉ក់ ចាន់ភិរុណ

លោក ម៉ក់ ចាន់ភិរុណ អគ្គលេខាធិការសហព័ន្ធបាល់ទាត់លើតុកម្ពុជា បានឲ្យដឹងថា ចំពោះការត្រៀមខ្លួនចូលរួមព្រឹត្តិការណ៍ប្រកួតកីឡាលើឆ្នេរខ្សាច់ជើងឯកអាស៊ី លើកទី៦ នេះក្រុមជម្រើសជាតិរបស់លោកបានត្រៀមខ្លួនតាំងពីអំឡុងខែកុម្ភៈម្ល៉េះ។ ការប្រមូលផ្ដុំបានយូរ និងការហ្វឹកហាត់ពង្រឹងសមត្ថភាពក៏បានល្អផងដែរ។

អគ្គលេខាធិការខាងលើបន្ថែមទៀតថា តាមអ្វីដែលលោកមើលឃើញអំពីការហ្វឹកហាត់ និងសមាភាពប្រទេសនឹងចូលរួមលើកនេះលោកជឿជាក់ថាក្រុមកម្ពុជានឹងធ្វើបានល្អ ឬឈានដល់វគ្គសំខាន់ៗនៅព្រឹត្តិការណ៍ឯប្រទេសចិនអំឡុងចុងខែមេសា ឆ្នាំ២០២៦ នេះ។

ក្រុមបាល់ទាត់លើតុកម្ពុជា

បញ្ជាក់ដែរថា ព្រឹត្តិការណ៍ប្រកួតកីឡាលើឆ្នេរខ្សាច់ជើងឯកអាស៊ី លើកទី៦ នេះនឹងធ្វើឡើងចាប់ពីថ្ងៃទី២២ ដល់ ៣០ ខែមេសា ឆ្នាំ២០២៦ នៅទីក្រុង Sanya ប្រទេសចិន។ ការប្រកួតនេះមាន ១៤ប្រភេទកីឡា និងប្រទេសចូលរួមប្រមាណ ៤៥ក្នុងតំបន់អាស៊ីនេះ។ ចំពោះក្រុមកីឡាបាល់ទាត់លើតុកម្ពុជានឹងបញ្ជូនកីឡាករ កីឡាការិនីចំនួន ៦រូប លេងលើ ៣វិញ្ញាសា៕

ក្រុមបាល់ទាត់លើតុកម្ពុជា

អត្ថបទដោយ៖ នួន ស៊ីណា

The post សហព័ន្ធកីឡាបាល់ទាត់លើតុ ការប្រកួតឆ្នេរខ្សាច់ជើងឯកអាស៊ីនៅចិនលើកនេះកម្ពុជានឹងទទួលបានចំណាត់ថ្នាក់ល្អ appeared first on Kampuchea Thmey Daily.

កីឡាបាល់ទាត់លើតុ Archives - Kampuchea Thmey Daily

សហព័ន្ធ​កីឡាបាល់ទាត់​លើ​តុ​កម្ពុជា​ កំពុង​ទទួល​បាន​ការ​ចាប់​អារម្មណ៍​ខ្លាំង​ពី​អន្តរជាតិ​

កីឡាករ​ វឿន​ ណាវ៉ន​ ដាក់​គោលដៅ​ខំប្រឹង​ឲ្យ​បាន​ចេញ​ទៅ​ប្រកួត​នៅ​លើ​ឆាក​អន្តរជាតិ​

សហព័ន្ធកីឡាបាល់ទាត់លើតុកម្ពុជា កំពុងទទួលបានការចាប់អារម្មណ៍ខ្លាំងពីអន្តរជាតិ

កីឡាករ វឿន ណាវ៉ន ដាក់គោលដៅខំប្រឹងឲ្យបានចេញទៅប្រកួតនៅលើឆាកអន្តរជាតិ