កីឡា

វឿន ណាវ៉ន ម្ចាស់មេដាយមាសជើងឯកថ្នាក់ជាតិបាល់ទាត់លើតុផ្ដើមចេញពីអ្នករើសបាល់ឲ្យគេតាមសួនច្បារ

បានផុស

១ ខែ មុន

នៅ

ថ្ងៃអង្គារ ២ មិថុនា ២០២៦

ដោយ

ម្ចាស់មេដាយមាស និងមេដាយប្រាក់ជើងឯកថ្នាក់ជាតិកីឡាបាល់ទាត់លើតុ ឆ្នាំ២០២៦ កីឡាករ វឿន ណារ៉ន មាននិស្ស័យជាមួយបាល់តាំងពីតូចៗ និងចាប់ផ្ដើមពីអ្នករើសបាល់ឲ្យគេលេងនៅតាមសួនច្បារក្ដាន់ពីររហូតមានឱកាសជាប់ជម្រើសជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករ វឿន ណាវ៉ន

កីឡាករ វឿន ណាវ៉ន បានឲ្យដឹងថា អំឡុងឆ្នាំ២០១៣ រូបគេគ្រាន់តែជាក្មេងម្នាក់អង្គុយមើលចាស់ៗលេងបាល់ លេងសីដក់ និងចាំជួយរើសបាល់ឲ្យគេនៅម្ដុំសួនច្បារក្ដាន់ពីរតែប៉ុណ្ណោះ។ ដោយចិត្តស្រឡាញ់តាំងពីតូច និងឧស្សារហ៍រើសបាល់ជាច្រើនឆ្នាំទើបរូបគេបានការទុកចិត្តពីចាស់ៗរហូតមានឱកាសហាត់រៀន និងបានចូលលេងបាល់ជាមួយ។

ម្ចាស់មេដាយមាសឆ្នាំ២០២៦ រូបនេះបន្ថែមទៀតថា ដោយសារតែការខំប្រឹងប្រែង និងឧស្សាហ៍ព្យាយាមទើបមានការជួយជ្រោមជ្រែងពីគ្រូចាស់ៗរហូតឲ្យបានចូលហ្វឹកហាត់កីឡាបាល់ទាត់លើតុ និងបានជាប់ជាកីឡាករជម្រើសជាតិដូចពេលនេះ។

កីឡាករ វឿន ណាវ៉ន

កីឡាករវ័យ ២៥ឆ្នាំរូបនេះមិនភ្លេចឡើយគុណបំណាច់របស់លោក ស្រូយ សុវណ្ណារ៉ា ដែលជាគ្រូនៃក្លឹបបាល់ទាត់ We Are DN និងលោកស្រី ងួន ច័ន្ទបរមី គ្រូបង្វឹកជម្រើសជាតិបាល់ទាត់លើតុដែលអ្នកទាំងពីរបានផ្ដល់ឱកាស និងបង្ហាត់បង្រៀនកន្លងមករហូតក្លាយជាកីឡាករអាជីពមួយរូប។ យ៉ាងណាខ្លួននឹងបន្តខំប្រឹងប្រែងហ្វឹកហាត់បន្ថែមទៀតដើម្បីបំពេញនូវចំណុចខ្វះខាតឲ្យក្លាយជាកីឡាករដែលមានសមត្ថភាពល្អអាចប្រជែងមេដាយជូនប្រទេសកម្ពុជាលើឆាកអន្តរជាតិនៅថ្ងៃខាងមុខនេះ។

ទិដ្ឋភាព ណាវ៉ន ហ្វឹកហាត់នៅក្ដាន់ពីរ

បញ្ជាក់ដែរថា វឿន ណាវ៉ន ជាកីឡាករជម្រើសជាតិកីឡាបាល់ទាត់លើតុ ឆ្នាំ២០២៦ នេះ។ រូបគេទើបតែមានឱកាសជាប់ជម្រើសជាតិនៅឆ្នាំនេះនោះទេ។ ក្នុងការប្រកួតជ្រើសរើសជើងឯកថ្នាក់ជាតិ ឆ្នាំ២០២៦ រូបគេលេងតំណាងក្លឹបក្រសួងមហាផ្ទៃ និងដណ្ដើមបានមេដាយ ២គ្រឿង មាស១ វិញ្ញាសាគូបុរស និងមេដាយប្រាក់១ លើវិញ្ញសាចម្រុះ (បុរស-នារី) ដែលទើបបញ្ចប់កាលពីថ្ងៃទី៣១ ខែឧសភា ២០២៦ នេះនៅមជ្ឈមណ្ឌលជាតិហ្វឹកហ្វឺនកីឡា រាជធានីភ្នំពេញ៕