កីឡាបាល់ទាត់ Archives - Kampuchea Thmey Daily

សហព័ន្ធបាល់ទាត់ ចែកជា៤ចំណែកពីចំណូលលក់សំបុត្រការប្រកួតអន្តរជាតិ

chean virakbot — Tue, 04 Mar 2025 01:47:33 +0000

សហព័ន្ធកីឡាបាល់ទាត់កម្ពុជា (FFC) បានសម្រេចបែងចែងផលលាភអំពីការលក់សំបុត្រចូលទស្សនាការប្រកួតអន្តរជាតិរបស់ក្រុមជម្រើសជាតិកម្ពុជាជា៤ចំណែក បន្ទាប់ពីសល់ពីការទូទាត់លើការចំណាយសម្រាប់ការរៀបចំប្រកួត និងបង់ពន្ធរួចរាល់។

លោក សៅ សុខា ប្រធានសហព័ន្ធកីឡាបាល់ទាត់កម្ពុជា បានទម្លាយឲ្យដឹងក្នុងមហាសន្និបាតបូកសរុបការងារប្រចាំឆ្នាំកាលពីថ្ងៃទី១ ខែមីនា ឆ្នាំ២០២៥ថា ៖«ចំណូលបានពីការលក់សំបុត្រ បន្ទាប់ពីដកពីការចំណាយលើប្រតិបត្តិការ សល់ប៉ុន្មានយកទៅចែកជា៤ចំណែក។ ខ្ញុំសូមបញ្ជាក់កកន្លងនេះបន្តិច ការប្រកួតជាលក្ខណៈអន្តរជាតិ ទាំងការប្រកួតពានរង្វាន់ផ្លូវការ និងការប្រកួតមិត្តភាព សហព័ន្ធកីឡាបាល់ទាត់កម្ពុជាផ្នែកបច្ចេកទេស ក៏ដូចជាគណៈកម្មការប្រតិបត្តិ បានសម្រេចផលលាភអំពីចំណូលទទួលបានពីការលក់សំបុត្រ។ គោលដៅរបស់យើងគឺចង់ចែកផលលាភដល់កីឡាករ ដល់ក្លិប ពីព្រោះអ្នកទាំងអស់គ្នាជាអ្នករួមគ្នាចំណាយកម្លាំងពលកម្ម ដូច្នេះយើងត្រូវតែទទួលបានផលទាំងអស់គ្នាទើបហៅថា សមធម៌»។

តាមការបញ្ជាក់ពីលោក សៅ សុខា ក្រោយចំណាយលើការរៀបចំប្រកួត និងបង់ពន្ធរួចរាល់ សល់ប្រាក់ប៉ុន្មានគឺបែងចែកជា៤ផ្នែក៖

ចំនួន ២៥% សម្រាប់សហព័ន្ធកីឡាបាល់ទាត់កកម្ពុជា។
ចំនួន ២៥% បានទៅក្លិបដែលមានកីឡាករលេងឲ្យជម្រើសជាតិ ដោយផ្អែកលើចំនួនកីឡាករដែលបានជាប់ជម្រើសជាតិ។ ក្លិបដែលមានកីឡាករជាប់ជម្រើសជាតិច្រើន ទទួលបានច្រើន ហើយកីឡាករជាប់ជម្រើសជាតិតិចគឺគិតភាគទៅតាមចំនួនកីឡាករដែរ។
ចំនួន ២៥% បានទៅក្រុមជម្រើសជាតិគឺកីឡាករ និងក្រុមការងារគ្រូបង្វឹក។
ចំនួន ២៥% សម្រាប់មូលនិធិសុខភាលភាពកីឡាករ។ មូលនិធិនេះគឺទុកសម្រាប់ព្យាបាលកីឡាករដែលមានបញ្ហាសុខភាព របួស។

អត្ថបទ៖ វីរបុត្រ

The post សហព័ន្ធបាល់ទាត់ ចែកជា៤ចំណែកពីចំណូលលក់សំបុត្រការប្រកួតអន្តរជាតិ appeared first on Kampuchea Thmey Daily.

នារី២នាក់ ប្រជែងនឹងបុរស៦នាក់ វគ្គ៨នាក់ចុងក្រោយកម្មវិធី Frenzy Freestyle

chean virakbot — Tue, 28 Jan 2025 06:56:05 +0000

ការប្រកួតបាល់ទាត់ Frenzy Freestyle លើកដំបូងនៅក្នុងប្រទេសកម្ពុជាបានរកឃើញបេក្ខភាព៨នាក់ចុងក្រោយហើយ បន្ទាប់ពីប្រកួតវគ្គ១៦នាក់ចុងក្រោយកាលពីថ្ងៃអាទិត្យ ទី២៧ ខែមករា ឆ្នាំ២០២៥។

ការប្រកួតចាប់ដៃគូដើម្បីបង្ហាញពីសមត្ថភាព ទេពកោសល្យ និងសមត្ថភាពរៀងៗខ្លួននៅលើឆាកដ៏ស្រស់ស្អាតនៅស្ឌូឌីយោបបាយ័នបឹងស្នោរដែលមានការផ្សាយផ្ទាល់លើផេកក្លិបបាល់ទាត់ព្រះខ័នរាជស្វាយរៀង ពិតជាគួរឲ្យចាប់អារម្មណ៍ខ្លាំងមែន។ កីឡាករ កីឡាការិនីដែលបង្ហាញសមត្ថភាពបានល្អ និងត្រូវតាមលក្ខខណ្ឌដែលបានកំណត់គឺត្រូវបានចៅក្រមទាំង៤រូបផ្តល់ពិន្ទុខ្ពស់ដើម្បីឈ្នះដៃគូប្រជែងឡើងទៅវគ្គបន្ត។

ឆ្លងកាត់ការប្រកួតដ៏ស្វិតស្វាញ និងជក់ចិត្ត ទីបំផុតបេក្ខភាព៨រូបត្រូវបានចៅក្រមនៃគណៈកម្មការរៀបចំការប្រកួតផ្តល់ពិន្ទុឲ្យឡើងទៅវគ្គ៨នាក់ចុងក្រោយ។ កញ្ញា ឌី គឹមយាន និង យ៉ែម នារតី ជាបេក្ខនារី២នាក់គត់ដែលបានចូលរួមក្នុងកម្មវិធីនេះធ្វើបានយ៉ាងល្អដោយរហូតត្រូវបានចៅក្រមផ្តល់ពិន្ទុឲ្យឡើងទៅវគ្គ៨នាក់ចុងក្រោយជាមួយបេក្ខជន ខុន ខេមរៈបុត្ត, ចាន់ណាក់ វរៈបុត្រ, ស៊ុំ សាន, ផ្លម ធិញហួយ, លន់ ឆៃយ៉ា និង នួន វណ្ណា។

ការប្រកួតវគ្គ៨នាក់ចុងក្រោយកាន់តែពិសេសថែមទៀតនៅពេលដៃគូប្រកួតសុទ្ធតែកើតចេញពីការចាប់ឆ្នោត។ អ្វីដែលកាន់តែពិសេសបេក្ខភាពទាំងអស់ត្រូវបានចាប់ឆ្នោតជ្រើសរើសវិញ្ញាសាដែលខ្លួនត្រូវប្រកួតថែមទៀត។

ចាំមើលថាតើ បេក្ខភាពណាខ្លះអាចឈានដល់វគ្គ៤នាក់ចុងក្រោយដែលជាវគ្គទទួលបានប្រាក់រង្វាន់។ ជ័យលាភីលេខ១ទទួលបានពាន មេដាយមាស និងប្រាក់រង្វាន់២លានរៀល។ ជ័យលាភីលេដខ២ ទទួលបានមេដាយប្រាក់ និងប្រាក់រង្វាន់១លានរៀល។ ជ័យលាភីលេខ៣ទទួលបានមេដាយសំរិទ្ធ និងប្រាក់រង្វាន់១លានរៀល ខណៈចំណាត់ថ្នាក់លេខ៤ក៏ទទួលបានប្រាក់រង្វាន់១លានរៀល៕

ខាងក្រោមជាដៃគូប្រកួតវគ្គ៨នាក់ចុងក្រោយ នៅថ្ងៃទី២ ខែកុម្ភៈ ឆ្នាំ២០២៥។

អត្ថបទ៖ វីរបុត្រ

The post នារី២នាក់ ប្រជែងនឹងបុរស៦នាក់ វគ្គ៨នាក់ចុងក្រោយកម្មវិធី Frenzy Freestyle appeared first on Kampuchea Thmey Daily.

ឯកឧត្តម ឌី វិជ្ជា សម្តែងការសោកស្តាយយ៉ាងខ្លាំងចំពោះមរណភាពកីឡាករ នុប តុលា

chean virakbot — Wed, 20 Nov 2024 07:30:20 +0000

ឯកឧត្តម ឌី វិជ្ជា ប្រធានក្លិបបាល់ទាត់ព្រះខ័នរាជស្វាយរៀង បានសម្តែងការសោកស្តាយ អាឡោះអាល័យ ជាអនេក និងចូលរួមមរណៈទុក្ខដល់ក្រុមគ្រួសារនៃសពកីឡាករ នុប តុលា ដែលបានទទួលមរណភាព នៅថ្ងៃអង្គារ៍ ទី១៩ ខែវិច្ឆិកា ឆ្នាំ២០២៤។

ឯកឧត្តមបានរៀបរាប់ថា ៖«ខ្ញុំ និងក្រុមគ្រួសារ មានសេចក្តីក្តុកក្តួល រន្ធត់តក់ស្លុត និងសោកស្តាយជាអនេក ចំពោះមរណភាពរបស់ លោក នុប តុលា អតីតកីឡាករក្លិបព្រះខ័នរាជស្វាយរៀង និងជាអតីតកីឡាករបាល់ទាត់ជម្រើសជាតិកម្ពុជា ដែលបានទទួលមរណភាពកាលពីថ្ងៃអង្គារ ០៤រោច ខែកត្តិក ឆ្នាំរោង ឆស័ក ព.ស ២៥៦៨ ត្រូវនឹងថ្ងៃទី១៩ ខែវិច្ឆិកា ឆ្នាំ២០២៤ ក្នុងជន្មាយុ ២៨ឆ្នាំ»។

«ក្នុងវេលាប្រកបដោយសមានទុក្ខដ៏ក្រៀមក្រំនេះ ខ្ញុំសូមចូលរួមសម្តែងនូវមរណទុក្ខដោយក្តីស្រណោះ អាឡោះអាល័យ ជាមួយគ្រួសារ ព្រមទាំងញាតិមិត្តទាំងអស់នៃសព ចំពោះការបាត់បង់ដ៏ធំធេងនូវ ប្អូនប្រុសបង្កើត ស្វាមី ឪពុក ជាទីគោរពស្រលាញ់ដ៏ជ្រាលជ្រៅ»។

«ខ្ញុំសូមឧទ្ទិសបួងសួងដល់ដួង វិញ្ញាណក្ខន្ធ លោក នុប តុលា បានទៅកាន់ឋានបរមសុខ ក្នុងសុគតិភព កុំបីឃ្លៀងឃ្លាតឡើយ។ សូមចូលរួមមរណទុក្ខ ពីខ្ញុំ ឌី វិជ្ជា និងក្រុមគ្រួសារ!

សូមបញ្ជាក់ថា នុប តុលា បានបាត់ខ្លួនកាលពីល្ងាចថ្ងៃទី១៨ ខែវិច្ឆិកា ឆ្នាំ២០២៤ និងត្រូវបានរកឃើញសពនៅព្រឹកថ្ងៃទី២០ ខែវិច្ឆិកា ឆ្នាំ២០២៤ នៅកោះអន្លង់ចិន។

នុប តុលា ជាអតីតយុវជនរបស់ក្លិបបាល់ទាត់ព្រះខ័នរាជស្វាយរៀង និងបានមកលេងក្រុមធំព្រះខ័នរាជស្វាយរៀងពីឆ្នាំ២០១៣ ដល់២០២០ មុនពេលផ្លាស់ទៅក្លិបណាហ្គាវើលដ៍ រដូវកាល២០២១-២០២២ និងក្លិបគិរីវង់សុខសែនជ័យ ក្នុងឆ្នាំ២០២៣ ហើយចុងក្រោយនៅក្រុមបាល់ទាត់សមាគមក្រសួងមហាផ្ទៃ។

កីឡាកររូបនេះបានជាប់យុវជនជម្រើសជាតិកម្ពុជា រហូតដល់ក្រុមធំចាប់តាំងពីឆ្នាំ២០១១ ដល់ឆ្នាំ២០១៧។ លោកជាកីឡាករម្នាក់ដែលអាចលេងបានទាំងខ្សែការពារ និងខ្សែប្រយុទ្ធ៕

អត្ថបទ៖ វីរបុត្រ

The post ឯកឧត្តម ឌី វិជ្ជា សម្តែងការសោកស្តាយយ៉ាងខ្លាំងចំពោះមរណភាពកីឡាករ នុប តុលា appeared first on Kampuchea Thmey Daily.

កីឡាករ នុប តុលា បាត់បង់ជីវិតជាដំណឹងដ៏ក្រៀមក្រំបំផុតសម្រាប់បាល់ទាត់កម្ពុជា

chean virakbot — Wed, 20 Nov 2024 03:27:48 +0000

កីឡាករបាល់ទាត់កម្ពុជា នុប តុលា បានបាត់បង់ជីវិតក្នុងវ័យ២៩ឆ្នាំ។ បើតាមដំណឹងពីលោក ស៊ុំ វណ្ណា គ្រូបង្វឹករបស់សមាគមបាល់ទាត់ក្រសួងមហាផ្ទៃ នៅព្រឹកថ្ងៃទី២០ ខែវិច្ឆិកា ឆ្នាំ២០២៤។

នេះជាការបាត់បង់ធនធានកីឡាករ និងជាដំណឹងដ៏សោកសៅ ក្រៀមក្រំបំផុតសម្រាប់វិស័យកីឡាបាល់ទាត់កម្ពុជា និងក្នុងតំបន់។

នុប តុលា ជាអតីតយុវជនរបស់ក្លិបព្រះខ័នរាជស្វាយរៀង ដែលបានក្លាយជាកីឡាករបាល់ទាត់ដ៏ឆ្នើមម្នាក់បានលេងឲ្យក្លិបជាច្រើននៅមានដូច ព្រះខ័នរាជស្វាយរៀង ណាហ្គាវើលដ៍ គីរីវង់សុខសែនជ័យ និងសមាគមបាល់ទាត់ក្រសួងមហាផ្ទៃ។

នុប តុលា បានជាប់ជម្រើសជាតិកម្ពុជាតាំងយុវជន រហូតដល់ក្រុមធំពីឆ្នាំ២០១១ ដល់២០១៧ ដែលបានលេងទាំងពានរង្វាន់កម្រិតអាស៊ាន អាស៊ី និងពិភពលោក។

តាមដំណឹង នុប តុលា ទំនងជាមានវិបត្តិធ្ងន់ធ្ងរដែលបានបង្ហោះសារចុងក្រោយលាក្រុមគ្រួសារ កាលពីថ្ងៃទី១៨ ខែវិច្ឆិកា ឆ្នាំ២០២៤។ ក្រុមគ្រួសារបានស្វែងរកឃើញម៉ូតូ និងសម្ភារប្រើប្រាស់ទុកចោលនៅជិតស្ពានព្រែកសំរោង (ស្ពានតាខ្មៅ)។ នៅព្រឹកថ្ងៃទី២០ ខែវិច្ឆិកា ឆ្នាំ២០២៤ សពត្រូវបានរកឃើញនៅកោះអន្លង់ចិន៕

អត្ថបទ៖ វីរបុត្រ

The post កីឡាករ នុប តុលា បាត់បង់ជីវិតជាដំណឹងដ៏ក្រៀមក្រំបំផុតសម្រាប់បាល់ទាត់កម្ពុជា appeared first on Kampuchea Thmey Daily.

ការប្រកួតបាល់ទាត់សប្បុរសធម៌ល្ងាចនេះទទួលបានប្រាក់៦១០លានរៀលហើយ

chean virakbot — Tue, 29 Oct 2024 02:02:35 +0000

ការប្រកួតបាល់ទាត់មិត្តភាពសប្បុរសធម៌ដើម្បីមូលនីធិគុនខ្មែរ នៅរសៀលថ្ងៃទី២៩ ខែតុលា ឆ្នាំ២០២៤ នៅស្តាតចាស់ ទទួលបានប្រាក់ឧបត្ថម្ភចំនួន៦១០លានរៀលហើយ ដោយមិនទាន់គិតថវិការបស់សប្បុរសធម៌មួយចំនួនទៀត។

តាមការប្រកាសជាផ្លូវការរបស់សហព័ន្ធកីឡាប្រដាល់គុនខ្មែរ សប្បុរសជនដែលបានចូលរួមបរិច្ចាគថវិកាដើម្បីគុនខ្មែរមានដូចខាងក្រោម៖

សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្តេចកិត្តិព្រឹទ្ធបណ្ឌិត ចំនួន ១០០លានរៀល
សម្តេចពិជ័យសេនា ទៀ បាញ់ ឧត្តមប្រឹក្សាផ្ទាល់ព្រះមហាក្សត្រ ចំនួន ២០លានរៀល
ឯកឧត្តម ឃួង ស្រេង អភិបាលរាជធានីភ្នំពេញ ចំនួន ៥០លានរៀល
អ្នកឧកញ៉ា លាង ម៉េង សហស្ថាបនិក និងជាប្រធានក្រុមអគ្គនាយក ក្រុមហ៊ុន ខ្មែរ ប៊ែវើរីជីស ចំនួន ២០០លានរៀល
លោកជំទាវ ហ៊ុន ម៉ាណា អគ្គនាយិកាវិទ្យុ និងទូរទស្សន៍បាយ័ន ចំនួន ២០០លានរៀល
លោកជំទាវ ជួប មាន អគ្គនាយិកា ក្រុមហ៊ុន ថោនគ្រុប ចំនួន៤០លានរៀល

ការប្រកួតបាល់ទាត់មិត្តភាពសប្បុរសធម៌ដើម្បីគុនខ្មែរមានការប្រកួត២គូគឺ ក្រុមអ្នកអត្ថាធិប្បាយគុនខ្មែរ ប្រកួតជាមួយ ក្រុមបាល់ទាត់តារាកម្ពុជា (B) និងក្រុមកីឡាករគុនខ្មែរ ប្រកួតជាមួយ ក្រុមបាល់ទាត់តារាកម្ពុជា (A) ចាប់ពីវេលាម៉ោង៣រសៀលទៅ នៅថ្ងៃទី២៩ ខែតុលា នេះនៅស្តាតចាស់៕

អត្ថបទ៖ វីរបុត្រ

The post ការប្រកួតបាល់ទាត់សប្បុរសធម៌ល្ងាចនេះទទួលបានប្រាក់៦១០លានរៀលហើយ appeared first on Kampuchea Thmey Daily.

ឆ្លងកាត់២ប្រកួត ព្រះខ័នរាជស្វាយរៀង រឹងមាំ ខណៈ វិសាខា បង្ហាញទម្រង់មិនសូវល្អ

chean virakbot — Mon, 19 Aug 2024 03:08:35 +0000

ព្រះខ័នរាជស្វាយរៀងនៅតែជាក្រុមរកបានគ្រាប់បាល់ច្រើនជាងគេក្នុងការប្រកួតខេមបូឌានព្រីមៀរលីគរដូវកាលថ្មីដែលបានដំណើរការ២សប្តាហ៍ ខណៈក្រុមវិសាខានៅមិនទាន់រកបានពិន្ទុឡើយ។

ការប្រកួតសប្តាហ៍ទី១នៃខេមបូឌានព្រីមៀរលីគរដូវកាល២០២៤-២៥ ព្រះខ័នរាជស្វាយរៀង ទទួលបានជ័យជម្នះដោយលទ្ធផល ៧-០ ក្នុងដីរបស់ខ្លួនលើក្រុម ក្រសួងការពារជាតិ និងការប្រកួតសប្តាហ៍ទី២ កាលពីថ្ងៃសុក្រ ទី១៦ ខែសីហា បានយកឈ្នះម្ចាស់ផ្ទះ អាយអេសអាយ ដង្កោសែនជ័យ ដោយលទ្ធផល ១-៤។ ឆ្លងកាត់២ប្រកួត ព្រះខ័នរាជស្វាយរៀង រកបាន១១គ្រាប់ និងធ្លាយគ្រាប់បាល់តែ១គ្រាប់ប៉ុណ្ណោះ ដូច្នេះពួកគេមាន៦ពិន្ទុកំពុងឈរលើកំពូលតារាង។

ក្រុមដែលមាន៦ពិន្ទុពេញដែរគឺ ភ្នំពេញក្រោន បន្ទាប់ពីឈ្នះ វិសាខា ៤-២ និងឈ្នះ ក្រសួងការពារជាតិ ១-២ ហើយ ណាហ្គាវើលដ៍ ឈ្នះ គិរីវង់សុខសែនជ័យ ២-០ និងឈ្នះ វិសាខា ០-១។ ជាមួយគ្នានេះ បឹងកេត អង្គរថាយហ្គឺរ និង អាយអេសអាយដង្កោសែនជ័យ មាន៣ពិន្ទុដូចគ្នា ហើយ ឡាយហ្វខេត្តព្រះសីហនុ និង ក្រសួងមហាផ្ទៃ មាន១ពិន្ទុដូចគ្នា។

៣ក្រុមដែលមិនទាន់មានពិន្ទុគឺ វិសាខា គិរីវង់សុខសែនជ័យ និង ក្រសួងការពារជាតិ។ វិសាខា ជាក្រុមមានធនធានហិរញ្ញវត្ថុខ្ពស់ និងបានចំណាយថវិកាច្រើនលើការរៀបចំក្រុមទាំងកីឡាករ និងគ្រូបង្វឹក ប៉ុន្តែឆ្លងកាត់២ប្រកួតមានលទ្ធផលមិនល្អសោះ។ អ្នកគាំទ្ររំពឹងថា វិសាខា នឹងក្លាយជាក្រុមខ្លាំងមួយដែលអាចប្រជែងជាមួយក្រុមខ្លាំងដូចជា ព្រះខ័នរាជស្វាយរៀង ភ្នំពេញក្រោន និងណាហ្គាវើលដ៍ សម្រាប់តំណែងជើងឯក។

លទ្ធផល សប្តាហ៍ទី២

វិសាខា ០-១ ណាហ្គាវើលដ៍
ក្រសួងការពារជាតិ ១-២ ភ្នំពេញក្រោន
ក្រសួងមហាផ្ទៃ ១-១ ឡាយហ្វខេត្តព្រះសីហនុ
គិរីវង់សុខសែនជ័យ ១-២ បឹងកេត
អាយអេយអាយ ដង្កោសែនជ័យ ១-៤ ព្រះខ័នរាជស្វាយរៀង

លទ្ធផល សប្តាហ៍ទី១

ព្រះខ័នរាជស្វាយរៀង ៧-០ ក្រសួងការពារជាតិ
ឡាយហ្វខេត្តព្រះសីហនុ ០-១ អាយអេសអាយ ដង្កោសែនជ័យ
ក្រសួងមហាផ្ទៃ ០-១ អង្គរថាយហ្គឺរ
ណាហ្គាវើលដ៍ ២-០ គិរីវង់សុខសែនជ័យ
ភ្នំពេញក្រោន ៤-២ វិសាខា

អត្ថបទ៖ វីរបុត្រ

The post ឆ្លងកាត់២ប្រកួត ព្រះខ័នរាជស្វាយរៀង រឹងមាំ ខណៈ វិសាខា បង្ហាញទម្រង់មិនសូវល្អ appeared first on Kampuchea Thmey Daily.

ភ្នំពេញក្រោន ការពារជើងឯក ខេមបូឌានស៊ូបភើខាប់ ទល់នឹងព្រះខ័នរាជស្វាយរៀង

chean virakbot — Mon, 29 Jul 2024 05:02:05 +0000

ម្ចាស់ការពារតំណែងជើងឯកឆ្នាំចាស់ ភ្នំពេញក្រោន ត្រូវប្រឈមនឹង ម្ចាស់ជើងឯកលីគកំពូលកម្ពុជា ព្រះខ័នរាជស្វាយរៀង សម្រាប់ពានរង្វាន់បើករដូវកាល គ្រុឌខេមបូឌានស៊ូបភើខាប់ នៅថ្ងៃអាទិត្យ ទី៤ ខែកក្កដា ឆ្នាំ២០២៤ នៅពហុកីឡដ្ឋានជាតិអូឡាំពិក។

ពានរង្វាន់ ខេមបូឌានស៊ូបភើខាប់ ត្រូវប៉ះគ្នារវាងក្រុមជើងឯកលីគកំពូលកម្ពុជា និងជើងឯកពានរង្វាន់សម្តេចតេជោ ហ៊ុន សែន ប៉ុន្តែកាលពីរដូវកាល២០២៣-២៤ ព្រះខ័នរាជស្វាយរៀង បានឈ្នះជើងឯកទាំងពីរ ខណៈភ្នំពេញក្រោនជាជើងឯករងទាំងពីរ ដូច្នេះតម្រូវឲ្យម្ចាស់ជើងឯកប៉ះជើងឯករង។

ភ្នំពេញក្រោន ជាម្ចាស់ពានរង្វាន់បើករដូវកាល២លើកជាប់គ្នាគឺឆ្នាំ២០២២ និង២០២៣ ខណៈព្រះខ័នរាជស្វាយរៀងមិនធ្លាប់ឈ្នះពានរង្វាន់បើករដូវកាលទេ គិតចាប់តាំងពីរៀបចំឲ្យមានប្រកួតលើកដំបូងនៅឆ្នាំ២០១៧ ក្នុងនោះ បឹងកេតធ្លាប់ឈ្នះនៅឆ្នាំ២០១៧ ប៉ុន្តែនៅឆ្នាំ២០១៨ ២០១៩ ២០២០ និង២០២១ មិនបានរៀបចំទេ។

ការជួបជួបគ្នានៅថ្ងៃទី៤ ខែកក្កដានេះគឺជាការពារតំណែងជើងឯកឆ្នាំចាស់របស់ភ្នំពេញក្រោនទល់នឹងក្រុមខ្លាំងកំពុងមានកីឡាករពេញជើងព្រះខ័នរាជស្វាយរៀង។

សម្រាប់ការប្រកួតនេះមានការផ្តល់ជូនជាពិសេសដល់អ្នកគាំទ្រគឺទិញសំបុត្រ២ថែម១ និងទិញសំបត្រ៥ថែម២។ សំបុត្រមាន២ប្រភេទគឺប្រភេទទី១តម្លៃ២ម៉ឺនរៀល និងប្រភេទទី២តម្លៃ១ម៉ឺនរៀល។

ព្រះខ័នរាជស្វាយរៀងពិតជារវល់ខ្លាំងមែនទែនក្នុងរដូវកាលនេះ។ ពួកគេទើបតែបញ្ចប់វគ្គជម្រុះពានរង្វាន់ ASEAN Club Championship កាលពីពេលថ្មីៗនេះ និងបានឡើងទៅកាន់វគ្គចែកពូល។ នៅក្នុងខែសីហានេះ ពួកគេត្រូវប្រកួតពានរង្វាន់បើករដូវកាល ប្រកួតលីគកំពូលកម្ពុជា និងពានរង្វាន់ ASEAN Club Championship វគ្គសន្សំពិន្ទុក្នុងពូល ក៏ចាប់ផ្តើមប្រកួតក្នុងខែសីហាដែរ៕

អត្ថបទ៖ វីរបុត្រ

The post ភ្នំពេញក្រោន ការពារជើងឯក ខេមបូឌានស៊ូបភើខាប់ ទល់នឹងព្រះខ័នរាជស្វាយរៀង appeared first on Kampuchea Thmey Daily.

លោកគ្រូ ភា សុភក្ត្រា ៖«ពីពេលនេះអាចបំភ្លេចឈ្មោះខ្ញុំពីជម្រើសជាតិ»

chean virakbot — Fri, 26 Jul 2024 01:31:50 +0000

លោក ភា សុភក្ត្រា គ្រូបង្វឹកក្រុមបាល់ទាត់ជម្រើសជាតិកម្ពុជាអាយុ១៩ឆ្នាំ (U19) បានប្រកាសចាកចេញពីក្រុមបាល់ទាត់ជម្រើសជាតិកម្ពុជាផ្លូវការនៅព្រឹកថ្ងៃសុក្រ ទី២៦ ខែកក្កដា ឆ្នាំ២០២៤។

លោកបានសរសេរថា ៖«ចាប់ពីពេលនេះ អ្នកទាំងអស់គ្នាអាចបំភ្លេចឈ្មោះខ្ញុំបានពីបាល់ទាត់ជម្រើសជាតិ តែសូមកុំឈប់គាំទ្របាល់ទាត់យើងឲ្យសោះ។ សូមអរគុណការគាំទ្រ និងមតិយោបល់របស់បងប្អូន។ ជាចុងក្រោយ សូមរក្សាភាពថ្លៃថ្នូរដល់អាជីពដែលមានវិជ្ជាជីវៈមួយនេះសម្រាប់អ្នកបន្ទាប់ “Respect”»។

ការប្រកាសចាកចេញពីបាល់ទាត់ជម្រើសជាតិកម្ពុជានេះ បន្ទាប់ពីចប់ព្រឹត្តិការណ៍បាល់ទាត់យុវជនអាស៊ាន AFF U19 Boys’ Championship ឆ្នាំ២០២៤ នៅប្រទេសឥណ្ឌូណេស៊ី។ លោកបានដឹកនាំក្រុមយុវជនកម្ពុជាបានលេខ២ក្នុងពូល A ដោយរកបាន៣ពិន្ទុ បន្ទាប់ពីចាញ់ទីម័រខាងកើត ២-៣, ចាញ់ឥណ្ឌូណេស៊ី ០-២ និងឈ្នះហ្វីលីពីន ១-០។

នេះជាលើកទី១ដែលលោក ភា សុភក្ត្រា បានដឹកនាំក្រុមជម្រើសជាតិកម្ពុជាក្នុងនាមជាគ្រូបង្គោល។ កន្លងមក លោកធ្លាប់តែជាជំនួយការគ្រូបង្វឹកទាំងក្រុមជម្រើសជាតិយុវជន និងក្រុមធំដែលលោកបានធ្វើជាច្រើនឆ្នាំមកហើយ។

លោក ភា សុភក្ត្រា ជាបុគ្គលម្នាក់ដែលសញ្ញាបត្រ A-License និងមានចំណេះជំនាញទូលំទូលាយផ្នែកបាល់ទាត់។ ជាពិសេសលោកត្រូវបានគេដឹងថា មានជំនាញខាងវិភាគ និងអត្ថាធិប្បាយបាល់ទាត់។ មុនពេលលោកចូលរួមការងារក្នុងក្រុមជម្រើសជាតិ លោកក៏ជាបុគ្គលម្នាក់ដែលរិះគន់ដើម្បីស្ថាបនាលើក្រុមបាល់ទាត់ជម្រើសជាតិកម្ពុជា។

ទោះបីជាយ៉ាងណា លោកមិនទៅណាឆ្ងាយពីវិស័យបាល់ទាត់នៅកម្ពុជាទេ។ លោកនៅតែបន្តដឹកនាំក្រុមបាល់ទាត់ក្រសួងការពារជាតិក្នុងពានរង្វាន់លីគកំពូលកម្ពុជា និងពានរង្វាន់សម្តេចតេជោ ហ៊ុន សែន បន្តទៀត៕

អត្ថបទ៖ វីរបុត្រ

The post លោកគ្រូ ភា សុភក្ត្រា ៖«ពីពេលនេះអាចបំភ្លេចឈ្មោះខ្ញុំពីជម្រើសជាតិ» appeared first on Kampuchea Thmey Daily.

កីឡាបាល់ទាត់ Archives - Kampuchea Thmey Daily

សហព័ន្ធ​​បាល់ទាត់ ចែក​ជា​៤​ចំណែកពី​ចំណូល​លក់​សំបុត្រ​ការ​ប្រកួត​អន្តរជាតិ

នារី​២​នាក់ ប្រជែង​នឹង​បុរស​៦​នាក់ វគ្គ​៨​នាក់​ចុងក្រោយ​កម្មវិធី Frenzy Freestyle

ឯកឧត្តម ឌី វិជ្ជា សម្តែង​ការ​​សោក​ស្តាយ​យ៉ាង​ខ្លាំង​ចំពោះ​មរណភាព​កីឡាករ នុប តុលា

កីឡាករ នុប តុលា បាត់​បង់ជីវិត​ជា​ដំណឹង​ដ៏​ក្រៀមក្រំបំផុត​សម្រាប់​បាល់ទាត់​កម្ពុជា

ការ​ប្រកួត​បាល់ទាត់​សប្បុរសធម៌ល្ងាចនេះទទួល​បាន​ប្រាក់៦១០​លាន​រៀលហើយ

ឆ្លង​កាត់២​ប្រកួត ព្រះ​ខ័ន​រាជ​ស្វាយរៀង រឹងមាំ ខណៈ វិសាខា បង្ហាញទម្រង់មិនសូវល្អ

ភ្នំពេញ​ក្រោន ការពារ​ជើងឯក ខេមបូឌានស៊ូបភើខាប់ ទល់​នឹងព្រះខ័ន​រាជ​ស្វាយរៀង

លោកគ្រូ ភា សុភក្ត្រា ៖«​ពី​ពេល​នេះ​អាច​បំភ្លេច​ឈ្មោះ​ខ្ញុំ​​ពី​ជម្រើស​ជាតិ»

សហព័ន្ធបាល់ទាត់ ចែកជា៤ចំណែកពីចំណូលលក់សំបុត្រការប្រកួតអន្តរជាតិ

នារី២នាក់ ប្រជែងនឹងបុរស៦នាក់ វគ្គ៨នាក់ចុងក្រោយកម្មវិធី Frenzy Freestyle

ឯកឧត្តម ឌី វិជ្ជា សម្តែងការសោកស្តាយយ៉ាងខ្លាំងចំពោះមរណភាពកីឡាករ នុប តុលា

កីឡាករ នុប តុលា បាត់បង់ជីវិតជាដំណឹងដ៏ក្រៀមក្រំបំផុតសម្រាប់បាល់ទាត់កម្ពុជា

ការប្រកួតបាល់ទាត់សប្បុរសធម៌ល្ងាចនេះទទួលបានប្រាក់៦១០លានរៀលហើយ

ឆ្លងកាត់២ប្រកួត ព្រះខ័នរាជស្វាយរៀង រឹងមាំ ខណៈ វិសាខា បង្ហាញទម្រង់មិនសូវល្អ

ភ្នំពេញក្រោន ការពារជើងឯក ខេមបូឌានស៊ូបភើខាប់ ទល់នឹងព្រះខ័នរាជស្វាយរៀង

លោកគ្រូ ភា សុភក្ត្រា ៖«ពីពេលនេះអាចបំភ្លេចឈ្មោះខ្ញុំពីជម្រើសជាតិ»