កីឡាប្រណាំងកង់ Archives - Kampuchea Thmey Daily

មកស្គាល់ប្រភេទកង់ភ្នំ-កង់គួក និងស្ថានភាពផ្លូវប្រកួតកន្លងទៅពិសេសនៅព្រឹត្តិការណ៍ ស៊ីហ្គេម

Sina Noun — Wed, 04 Jun 2025 02:49:12 +0000

កីឡាប្រណាំងកង់នាពេលបច្ចុប្បន្ននេះទទួលការគាំទ្រគួរសមពីមហាជនមិនថានៅរាជធានីភ្នំពេញ ឬតាមបណ្ដាខេត្តនោះទេ។ បើទោះជាមិនមែនហ្វឹកហាត់អាជីពក៏ដោយតែមានប្រជាពលរដ្ឋជាច្រើនបានជិះហាត់ប្រាណ និងជិះកម្សាន្តលេងជាហូរហែ។

លោក នូ ចំរើន (កណ្ដាល)

ថ្ងៃនេះកម្ពុជាថ្មី និងបង្ហាញកង់ពីរប្រភេទដែលតែងតែដាក់ឲ្យប្រកួតក្នុងកម្មវិធីប្រណាំងផ្សេងៗពិសេសនោះនៅព្រឹត្តិការណ៍ស៊ីហ្គេមកន្លងទៅមិនថាស៊ីហ្គេម លើកទី៣១ នៅវៀតណាម ស៊ីហ្គេម លើកទី៣២ នៅកម្ពុជា និងនៅប្រទេសថៃឆាប់ៗខាងមុខនោះទេ។

នេះបើតាមការឲ្យដឹងពីលោក នូ ចំរើន អគ្គលេខាធិការសហព័ន្ធទោចក្រយាន និងជាអ្នកជិះកង់អាជីពមួយរូបដែរបានលើកឡើងថា នៅស៊ីហ្គេមជាទូទៅគេច្រើនប្រណាំងប្រភេទកង់គួក និងកង់ភ្នំ។

ប្រភេទកង់ភ្នំ ឬហៅថា Mountain Bike

ប្រភេទកង់ភ្នំ ឬហៅថា Mountain Bike គឺជាកង់ដែលមានចំពាស់មុខ និងមានបូមខ្យល់ខាងមុខ និងមានបូមកណ្ដាល ជួយសម្រួលដល់កីឡាករងាយស្រួលក្នុងការហក់លោត។ ចំណែកតួកង់ភ្នំ មានសភាពក្រាស និងមានសំបកក្រាសចាប់ពីទំហំ 2.0 ឡើងទៅ និងមានខ្នងកង់រង្វង់ចាប់ពី 26 ឡើងទៅដល់រង្វង់ 29 ។ កង់ភ្នំ គឺគេប្រណាំងក្នុងស្ថានភាពផ្លូវលំបាកមានឧបសគ្គដូចជាផ្លូវមានទួល ផ្លូវមានក្រួស ផ្លូវមានថ្ម ផ្លូវឡើងភ្នំជាដើម។

ប្រភេទកង់គួក ឬហៅថា Road Bikes

ប្រភេទកង់គួក ឬហៅថា Road Bikes គឺជាកង់ដែលមានរូបរាងខុសពីកង់ភ្នំ និងមានស្ថានរាងតូចធ្វើឡើងឲ្យមានសំពាធខ្យល់បាំងតិចតួចហើយមានទម្ងន់ស្រាល។ ចំណែកផ្នែកសំបកកង់វិញរាងតូចរលោង និងមានរង្វង់ 700 cc។ កង់គួក គឺគេប្រណាំងនៅលើផ្លូវជាតិ ផ្លូវបេតុង ផ្លូវកៅស៊ូ។ កង់នេះមានល្បឿនលឿនជាងជាងប្រភេទកង់ភ្នំ៕

ប្រភេទកង់គួក ឬហៅថា Road Bikes

អត្ថបទដោយ៖ នួន ស៊ីណា

The post មកស្គាល់ប្រភេទកង់ភ្នំ-កង់គួក និងស្ថានភាពផ្លូវប្រកួតកន្លងទៅពិសេសនៅព្រឹត្តិការណ៍ ស៊ីហ្គេម appeared first on Kampuchea Thmey Daily.

សហព័ន្ធគ្រោងចំណាយជាង៤ម៉ឺនដុល្លារសម្រាប់ប្រណាំងកង់ថ្នាក់ជាតិចុងសប្តាហ៍នេះ

chean virakbot — Tue, 02 Jan 2024 09:21:39 +0000

សហព័ន្ធខ្មែរទោចក្រយានគ្រោងនឹងចំណាយប្រាក់ប្រមាណជាង៤ម៉ឺនដុល្លារអាមេរិកដើម្បីរៀបចំការប្រកួតប្រណាំងកង់ជ្រើសរើសជើងឯកថ្នាក់ជាតិ ឆ្នាំ២០២៣ ដែលត្រូវបានលើកមកខែមករា ឆ្នាំ២០២៤។

លោក នូ ចំរើន អគ្គលេខាធិការសហព័ន្ធខ្មែរទោចក្រយានបានឲ្យដឹងក្នុងសន្និសីទសារព័ត៌មាននៅរសៀលថ្ងៃទី២ ខែមករា ឆ្នាំ២០២៤ នៅទីស្នាក់ការគណៈកម្មាធិការជាតិអូឡាំពិកកម្ពុជាថា កីឡាប្រណាំងកង់កម្ពុជាបានបង្កើតកំណត់ត្រាជាប្រវត្តិសាស្ត្រលើកដំបូងនៅក្នុងព្រឹត្តិការណ៍កីឡាស៊ីហ្គេម លើកទី៣២ ដែលកម្ពុជាធ្វើជាម្ចាស់ផ្ទះ។

លោកអគ្គលេខាធិការបានលើកឡើងថា ៖«យើងបានបង្កើតប្រវត្តិសាស្ត្រជាលើកដំបូងក្នុងកីឡាស៊ីហ្គេម ដោយយើងបានឈ្នះមេដាយ២គ្រឿង។ កន្លងមកយើងមិនធ្លាប់បានឈ្នះមេដាយទេនៅស៊ីហ្គេម តែឆ្នាំ២០២៣ ស៊ីហ្គេមនៅកម្ពុជាយើងឈ្នះបានមេដាយ២គ្រឿង»។ ការប្រកួតស៊ីហ្គេមនៅកម្ពុជា កីឡាករ ឃីម ម៉េងឡុង បានឈ្នះមេដាយ២គ្រឿងគឺមេដាយប្រាក់ លើវិញ្ញាសាបុរស Men’s elimination និងមេដាយសំរិទ្ធ លើវិញ្ញាសា Men’s cross country។

សមិទ្ធផលដែលទទួលបានពីកីឡាស៊ីហ្គេមជាចំណែកមួយដ៏សំខាន់ដែលផ្តល់កម្លាំងកាយចិត្តសម្រាប់សហព័ន្ធ ដៃគូសហការ និងអត្តពលិកសម្រាប់ការប្រកួតជ្រើសរើសជើងឯកថ្នាក់ជាតិឆ្នាំ២០២៣។ តាមការឲ្យដឹងពីលោក នូ ចំរើន ថា ការប្រកួតជ្រើសរើសជើងឯកថ្នាក់ជាតិឆ្នាំនេះមានវិញ្ញាសាច្រើនជាងឆ្នាំមុនៗ ក្នុងនោះកីឡាករ កីឡាការិនីមានលទ្ធភាពចូលរួមប្រកួតដល់ទៅ២វិញ្ញាសាដែលរួមចំណែកជួយធ្វើឲ្យពួកគាត់បង្កើនសមត្ថភាពកាន់តែខ្លាំង។

លោក នូ ចំរើន បានឲ្យដឹងថា ៖«សម្រាប់ការប្រកួតជើងឯកថ្នាក់ជាតិឆ្នាំនេះ យើងគ្រោងចំណាយទឹកប្រាក់ចំនួន៤២៧៥០ដុល្លារដែលមានរយៈពេល២ថ្ងៃនៅថ្ងៃទី៦-៧ ខែមករា ឆ្នាំ០២៤។ យើងមិនមែនផ្តល់រង្វាន់លើកទឹកចិត្តតែជយលាភីលេខ១ដល់លេខ៣ទេគឺដល់លេខ៥ដើម្បីឲ្យកីឡាករ កីឡាការិនីកាន់តែសប្បាយចិត្ត»។

ការប្រកួតដែលមានរយៈពេល២ថ្ងៃធ្វើនៅខេត្តកំពង់ឆ្នាំងដែលខុសប្លែកពីឆ្នាំមុនៗរៀបចំការប្រកួតតែ១ថ្ងៃនៅខេត្តសៀមរាប។

លោក នូ ចំរើន បានបន្តថា ការប្រកួតជើងឯកថ្នាក់ជាតិឆ្នាំនេះមានអត្តពលិកចំនួន២៩៨នាក់បានចុះឈ្មោះចូលរួមប្រកួតដែលមានកើនឡើងច្រើនជាងឆ្នាំ២០២២។ អ្វីដែលគួរឲ្យសំគាល់ទៀតនោះមាន៧វិញ្ញាសាដែលកីឡាករ កីឡាការិនីម្នាក់មានលទ្ធភាពចុះឈ្មោះចូលរួមប្រកួតដល់ទៅ២វិញ្ញាសា។

កត្តាអំណោយផលដល់ការប្រកួតថ្នាក់ជាតិដល់ទៅ២ថ្ងៃគឺដោយសារទទួលបានប្រាក់ឧបត្ថម្ភពីដៃគូសហការ និងការរៀបចំនៅខេត្តកំពង់ឆ្នាំងដែលងាយស្រួលក្នុងការធ្វើដំណើរ។ លោកអគ្គលេខាធិការជឿថា ការបង្កើតឲ្យអត្តពលិកចូលរួមច្រើនវិញ្ញាសាកាន់តែធ្វើឲ្យពួកគាត់មានឱកាសបង្កើនសមត្ថភាពក្នុងការត្រៀមខ្លួនសម្រាប់កីឡាស៊ីហ្គេម លើកទី៣៣ ឆ្នាំ២០២៥ នៅប្រទេសថៃ៕

វិញ្ញាសា៧មានដូចខាងក្រោម៖

វិញ្ញាសា កង់គួកបុរសថ្នាល អាយុ១៨ឆ្នាំចុះក្រោម
វិញ្ញាសា កង់គួកបុរសពេញវ័យ អាយុចាប់ពី១៨ឆ្នាំឡើង
វិញ្ញាសា កង់គួកបុរស អាយុចាប់ពី៤០ឆ្នាំឡើង
វិញ្ញាសា កង់ភ្នំបុរសថ្នាល អាយុ១៨ឆ្នាំចុះក្រោម
វិញ្ញាសា កង់ភ្នំបុរសពេញវ័យ អាយុ១៨ឆ្នាំឡើង
វិញ្ញាសា កង់ភ្នំនារី អាយុ១៥ឆ្នាំឡើង
វិញ្ញាសា កង់ភ្នំបុរស អាយុ៤០ឆ្នាំឡើង

អត្ថបទ៖ វីរបុត្រ

The post សហព័ន្ធគ្រោងចំណាយជាង៤ម៉ឺនដុល្លារសម្រាប់ប្រណាំងកង់ថ្នាក់ជាតិចុងសប្តាហ៍នេះ appeared first on Kampuchea Thmey Daily.

៣០ វិច្ឆិកា ខាងមុខ ខេត្តកោះកុង មានការប្រណាំងកង់កម្សាន្តឆ្ពោះទៅកាន់តំបន់ទេសចរណ៍ទឹកធ្លាក់ឆាយតាហ៊ីង

អ៊ិន ពិសី — Tue, 10 Oct 2023 07:03:54 +0000

សហភាពសហព័ន្ធយុវជនកម្ពុជាខេត្តកោះកុង និងអាជ្ញាធរខេត្ត គ្រោងបង្កើតជាព្រឹត្តិការណ៍ប្រណាំងកង់-ជិះកង់កម្សាន្តមួយ ដើម្បីលើកស្ទួយវិស័យកីឡា ទេសចរណ៍ និងរឹតចំណងមិត្តភាពរវាងគ្នា នឹងឆ្ពោះទៅកាន់តំបន់ទេសចរណ៍ទឹកធ្លាក់ឆាយតាហ៊ីង។

លោកស្រី មិថុនា ភូថង អភិបាលខេត្តកោះកុង ថ្លែងប្រាប់កម្ពុជាថ្មីនៅរសៀលថ្ងៃទី ១០ ខែតុលា ឆ្នាំ ២០២៣ នេះថា នាថ្ងៃទី ៣០ ខែវិច្ឆិកា ខាងមុខ អាជ្ញាធរខេត្ត និងសហភាពសហព័ន្ធយុវជនកម្ពុជាខេត្តកោះកុង នឹងមានកម្មវិធីប្រណាំងកង់មួយជាលក្ខណៈបែបទេសចរណ៍កម្សាន្ត អបអរសាទរខួបលើកទី ៤៥ នៃថ្ងៃកំណើតសហភាពសហព័ន្ធយុវជនកម្ពុជា។ ហើយអ្វីដែលសំខាន់ទៀតនោះ គឺការផ្សព្វផ្សាយពីសក្ដានុពល នៃវិស័យទេសចរណ៍ធម្មជាតិដែលកំពុងមានក្នុងស្រុកថ្មបាំងទៅកាន់ពិភពលោកបានស្គាល់។

លោកស្រីអភិបាលខេត្តកោះកុង ក៏បានបន្ថែមថា កម្មវិធីប្រណាំងកង់នេះដែរ ធ្វើដំណើរឆ្ពោះទៅកាន់តំបន់អេកូទេសចរណ៍ទឹកធ្លាក់ឆាយតាហ៊ីង ស្ថិតក្នុងស្រុកថ្មបាំង ដូច្នេះសូមអំពាវនាវស្ថាប័ន សមត្ថកិច្ច មន្ទីរ អង្គភាពជុំវិញខេត្ត ម្ចាស់សណ្ឋាគារ ផ្ទះសំណាក់ រោងចក្រ សហគ្រាស បណ្តាក្រុមហ៊ុន ធនាគារឯកជន គ្រឹះស្ថានមីក្រូហិរញ្ញវត្ថុ ភោជនីយដ្ឋាន អាហារដ្ឋាន និងសាធារណជន ជ្រាបជាដំណឹងចូលរួម។

ការប្រណាំងកង់បែបកម្សាន្ត និងអាជីព នៅថ្ងៃទី ៣០ ខែវិច្ឆិកា ខាងមុខ ផ្តើមឡើងចាប់ពីវេលាម៉ោង ៨ និង ០០ នាទីព្រឹក ចំណុចទីតាំងខាងក្រោម ៖

ទី១.សម្រាប់អ្នកប្រណាំងកង់អាជីព ត្រូវជិះក្នុងរយៈចម្ងាយ ៤៥ គីឡូម៉ែត្រ (ដោយចាប់ផ្ដើមពីផ្លូវបំបែក ស្រុកថ្មបាំង ទៅដល់ចំណុចបញ្ចប់តំបន់អេកូទេសចរណ៍ទឹកធ្លាក់ឆាយតាហ៊ីង)។ ចំណែកឯទី ២.សម្រាប់អ្នកជិះកង់កម្សាន្ត ត្រូវជិះក្នុងរយៈចម្ងាយ ២០ គីឡូម៉ែត្រ (ដោយចាប់ផ្ដើមពីមុខសាលាស្រុក ថ្មបាំង ទៅដល់ចំណុចបញ្ចប់តំបន់អេកូទេសចរណ៍ទឹកធ្លាក់ឆាយតាហ៊ីង)។

ដោយឡែកចំនួនអ្នកចូលរួមមិនត្រូវបានកំណត់នោះទេ ដោយមហាជនដែលចាប់អារម្មណ៍ចូលរួមកម្មវិធីនេះបានសូមទំនាក់ទំនងតាមរយៈលេខទូរស័ព្ទ ០១៥ ៣៤០ ៧៣៥ / ០១៦ ២៨៨ ៧២៧ / ០៩៧៩ ៨២៤ ៥៤៥ (លេខតេឡេក្រាម) ឬ តាមរយៈគេហទំព័រហ្វេសប៊ុកផ្លូវការរបស់ សហភាពសហព័ន្ធយុវជនកម្ពុជា ខេត្តកោះកុង ចាប់ពីថ្ងៃជូនដំណឹងនេះ រហូតដល់ថ្ងៃទី ២០ ខែវិច្ឆិកា ឆ្នាំ ២០២៣។

អាជ្ញាធរខេត្តកោះកុង ពលរដ្ឋ និងអាជ្ញាធរ ប្រជាពលរដ្ឋខេត្តត្រាត ប្រទេសថៃ ៦០០ នាក់ កាលពីថ្ងៃទី ២៩ ខែកក្កដា ឆ្នាំ ២០២២ ធ្លាប់បានជិះកង់កម្សាន្តដើម្បីសុខភាព និងរឹតចំណងមិត្តភាពឡើងវិញ ក្រោយខកខាន ២ ឆ្នាំ ដោយសារវិបត្តិជំងឺកូវីដ-១៩ កន្លងទៅ ដែលផ្តើមចេញពីច្រកទ្វារព្រំដែនអន្តរជាតិចាំយាម ទៅកាន់ឃុំពាមក្រសោប ស្រុកមណ្ឌលសីមា ក្នុងន័យពង្រឹងសម្ព័ន្ធមេត្រីភាព សាមគ្គីភាព លើកស្ទួយវិស័យកីឡា និងវិស័យទេសចរណ៍តាមព្រំដែនរវាងប្រទេសទាំងពីរ។

លក្ខខណ្ឌចូលរួមព្រឹត្តិការណ៍ប្រណាំងកង់នេះដែរ តម្រូវឲ្យចូលរួមបង់ប្រាក់ចំនួន ៤ ម៉ឺនរៀល (១០ ដុល្លារ) ដោយអ្នកចូលរួមនឹងទទួលបាននូវអាវយឺតចំនួន ១ អាហារថ្ងៃត្រង់ ១ ពេល ភេសជ្ជៈ ទឹកសុទ្ធ និងប័ណ្ណស្លាកសម្គាល់ ចំនួន ១។ ក្នុងការចូលរួមព្រឹត្តិការណ៍ជិះកង់នេះដែរ អ្នកចូលរួមត្រូវត្រៀមកង់ និងមធ្យោបាយសម្រាប់ដឹកជញ្ជូនដោយខ្លួនឯង ចំណែកថវិកាទទួលបានពីការចុះឈ្មោះចូលរួមដែលនៅសល់ពីការចំណាយរៀបចំព្រឹត្តិការណ៍ នឹងត្រូវប្រគល់ជូនសហភាពសហព័ន្ធយុវជនកម្ពុជាខេត្តកោះកុង ដើម្បីសកម្មភាពសប្បុរសធម៌ក្នុងខេត្តកោះកុង៕

អត្ថបទ ៖ សិរីវឌ្ឍនៈ

The post ៣០ វិច្ឆិកា ខាងមុខ ខេត្តកោះកុង មានការប្រណាំងកង់កម្សាន្តឆ្ពោះទៅកាន់តំបន់ទេសចរណ៍ទឹកធ្លាក់ឆាយតាហ៊ីង appeared first on Kampuchea Thmey Daily.

ជម្រើសជាតិកង់កម្ពុជា ចេញទៅប្រកួតនៅថៃ ដើម្បីបង្កើនសិទ្ធផលមុនស៊ីហ្គេម ២០២៣ ចូលមកដល់

អ៊ិន ពិសី — Fri, 24 Feb 2023 08:52:09 +0000

ក្រុមកីឡាករ កីឡាការិនីជម្រើសជាតិទោចក្រយាន ទាំងប្រភេទកង់ភ្នំ និងកង់គួកកម្ពុជា នឹងត្រូវចេញទៅចូលរួមប្រកួតប្រជែងបង្កើនសិទ្ធផលឲ្យបានកាន់តែល្អប្រសើរបន្ថែមទៀត មុនពេលព្រឹត្តិការណ៍កីឡាស៊ីហ្គេម លើកទី ៣២ នាខែឧសភា ឆ្នាំ ២០២៣ ជាប្រវត្តិដំបូងរបស់កម្ពុជា ចូលមកដល់។

ក្រុមកីឡាករ កីឡាការិនីកង់កម្ពុជា នឹងត្រូវចូលរួមប្រកួតក្នុងព្រឹត្តិការណ៍ចំនួន ២ គឺការប្រកួត UCI សម្រាប់កម្រិត C1 នៅថ្ងៃទី ០១ ដល់ទី ០២ ខែមីនា ឆ្នាំ ២០២៣ និងការប្រកួត MTB Thailand National championship ពីថ្ងៃទី ០៤ ដល់ទី ០៥ ខែមីនា ឆ្នាំ ២០២៣ នៅខេត្ត Phichit ប្រទេសថៃ ដែលគ្រោងនឹងចេញដំណើរ នាថ្ងៃទី ២៥ ខែកុម្ភៈ ឆ្នាំ ២០២៣ ស្អែកនេះ។ នេះបើតាមការបញ្ជាក់ដោយ លោក នូ ចំរើន អគ្គលេខាធិការ សហព័ន្ធខ្មែរកីឡាទោចក្រយាន។

«ការចូលរួមប្រកួតនេះ គឺដើម្បីសន្សំពិន្ទុត្រៀមឆ្ពោះទៅចូលរួមក្នុងការប្រកួតកីឡាអាស៊ី និងអូឡាំពិកហ្គេម នាពេលខាងមុខ។ ដូច្នេះ ការចូលរួមប្រកួតរបស់ក្រុមកង់កម្ពុជា មានផលប្រយោជន៍ ២ គឺទី១- ដើម្បីសន្សំពិន្ទុ ក្នុងការប្រកួតអន្តរជាតិផង និងទី២-គឺដើម្បីបានប្រកួតដកស្រង់យកបទពិសោធន៍ បង្កើនគុណភាពបច្ចេកទេស ត្រៀមឆ្ពោះមកចូលរួមការប្រកួតកីឡាថ្នាក់តំបន់ ស៊ីហ្គេម លើកទី ៣២ នាខែឧសភា ឆ្នាំ ២០២៣ ដែលកម្ពុជាទទួលរៀបចំធ្វើម្ចាស់ផ្ទះ ជាលើកដំបូង ក្រោយរង់ចាំអស់រយៈពេល ៦៤ ឆ្នាំ។ ការចេញទៅបំពេញបេសកកម្មរបស់ប្រតិភូ កីឡាករ កីឡាការិនីជម្រើសជាតិកម្ពុជា គឺទទួលបានការយកចិត្តទុកដាក់ខ្ពស់ និងឧបត្ថម្ភគាំទ្រពីលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងជាប្រធានសហព័ន្ធខ្មែរកីឡាទោចក្រយាន»។ លោក នូ ចំរើន បានបញ្ជាក់បន្ថែម។

ប្រតិភូ កីឡាករ កីឡាការិនីជម្រើសជាតិទោចក្រយានកម្ពុជា ដែលត្រៀមចេញដំណើរនេះ មានចំនួន ១១ នាក់ ដែលដឹកនាំដោយលោក ផេង ប៉ូលីន ប្រតិភូដឹកនាំ លោក អ៊ុច សុខវិបុល កីឡាករ ៥ នាក់ រួមមាន ឃឹម ម៉េងឡុង, ឆាន ឆៃហ្វុង, ក្រួច វ៉ា, ម៉ៅ សុពិសិដ្ឋ, មុត ប្រុសសុភ័ក្ត្រា និងកីឡាការិនី ខេន ម៉ាឡៃ, យត់ កន្និកា, វ៉ុន ស្រីនីត និងកីឡាការិនី អេង សុជាតា ជាប្រធានក្រុមនារី៕

អត្ថបទ ៖ មន្នីរ័ត្ន

The post ជម្រើសជាតិកង់កម្ពុជា ចេញទៅប្រកួតនៅថៃ ដើម្បីបង្កើនសិទ្ធផលមុនស៊ីហ្គេម ២០២៣ ចូលមកដល់ appeared first on Kampuchea Thmey Daily.

សហព័ន្ធខ្មែរកីឡាទោចក្រយាន ត្រៀមបង្កើន ប្រាក់រង្វាន់ក្រោយទទួលកញ្ចប់ថវិការជាង៤ម៉ឺនដុល្លារពី Herbalife

Sok Srey Leak — Tue, 20 Dec 2022 07:48:26 +0000

សហព័ន្ធខ្មែរកីឡាទោចក្រយានកម្ពុជា បានប្រកាសស្តីពីការរៀបចំការប្រកួត ជ្រើសរើសជើងឯកថ្នាក់ជាតិ ប្រចាំឆ្នាំ ២០២២ ទាំងវិញ្ញាសាកង់គួក និងកង់ភ្នំ ដែលគ្រោងចាប់ផ្តើមនាដើមសប្តាហ៍ក្រោយ ដើម្បីជាការវាស់ស្ទង់គុណភាព បច្ចេកទេសកម្រិតខ្ពស់បំផុតកម្រិតជាតិ និងចុងក្រោយគេ បង្អស់ មុនពេលឈានដល់ការទទួលធ្វើម្ចាស់ផ្ទះ ស៊ីហ្គេម លើកទី៣២ ឆ្នាំ២០២៣។

បើតាមលោក នូ ចំរើន អគ្គលេខាធិការ សហព័ន្ធខ្មែរកីឡាទោចក្រយាន បានឲ្យដឹងថា មន្ត្រីបច្ចេកទេសកំពុងខិតខំរៀបចំយ៉ាងយកចិត្តទុកដាក់ខ្ពស់ សម្រាប់ការប្រកួតកម្រិតខ្ពស់បំផុតថ្នាក់ជាតិឆ្នាំ២០២២នេះ ក្រោមការចង្អុលបង្ហាញពីឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងជាប្រធានសហព័ន្ធខ្មែរកីឡាទោចក្រយាន ដើម្បីគោលដៅ ចម្បងឆ្ពោះទៅទទួលរៀបចំធ្វើម្ចាស់ផ្ទះ ស៊ីហ្គេម លើកទី៣២ ឆ្នាំ២០២៣។

អគ្គលេខាធិការូបនេះសង្កត់ធ្ងន់ថា «ការប្រកួតជើងឯកថ្នាក់ជាតិ ២០២២នេះ គឺជាការប្រកួតកម្រិតខ្ពស់បំផុត ថ្នាក់ជាតិចុងក្រោយគេ មុនឈានដល់ស៊ីហ្គេម ២០២៣ ដើម្បីវាស់ស្ទង់សមត្ថភាពកីឡាករ កីឡាការិនីជម្រើសជាតិ និងជាការផ្តល់ឱកាសសម្រាប់ការដកពិសោធបន្ថែមរបស់មន្ត្រីបច្ចេកទេសផងដែរ»។

ជាមួយគ្នាលោក អឿ ឌីណា តំណាងក្រុមហ៊ុន Herbalife ដែលជាដៃគូសហការរបស់សហព័ន្ធបានសម្ដែង នូវសេចក្ដីរីករាយ ដែលបានរួមចំណែកគាំទ្រ និងអភិវឌ្ឍន៍វិស័យកីឡាទោចក្រយានកម្ពុជា ពិសេសដើម្បីរួមចំណែក ជាមួយសហព័ន្ធក្នុងដំណើរឆ្ពោះទៅស៊ីហ្គេម ឆ្នាំ២០២៣ នៅកម្ពុជាតែម្ដង។ក្រៅពីការប្រកួតខាងលើ ក៍មានរៀបចំការរត់កម្សាន្តFUNRUN ដើម្បីអបអរកម្ពុជាធ្វើជាម្ចាស់ផ្ទះកីឡាស៊ីហ្គេមឆ្នាំ២០២៣។

បញ្ជាក់ដែរថាក្រុមហ៊ុន Herbalife បានឧត្ថម្ភថវិកា ៤២,៧៥០ដុល្លារដល់សហព័ន្ធខ្មែរកីឡាទោចក្រយានកម្ពុជា ដែលជាចំនួនមួយច្រើនជាងឆ្នាំកន្លងមក សម្រាប់ចំណាយលើការរៀបចំការប្រកួតជើងឯក ឆ្នាំ២០២២នេះដើម្បីឲ្យស្របទៅតាមលក្ខណៈស្តង់ដាការប្រកួត ខណៈប្រាក់រង្វាន់ជ័យលាភីនឹងត្រូវបង្កើនច្រើនជាងការប្រកួតឆ្នាំមុនៗដូចគ្នាផងដែរ។

ការប្រកួតកីឡាទោចក្រយានជើងឯកថ្នាក់ជាតិ គ្រោងនឹងធ្វើឡើងពីថ្ងៃទី២៦ ដល់ថ្ងៃទី២៨ ខែធ្នូ ឆ្នាំ២០២២ នៅខេត្តសៀមរាប សម្រាប់វិញ្ញាសាប្រកួតវិញ គឺបែងចែកជាកង់គួក និងកង់ភ្នំ ក្នុងនោះវិញ្ញាសាកង់គួក រួមមាន៖ ១. កង់គួកបុរសថា្នល, ២. កង់គួកបុរសឈុតធំ និង៣. កង់គួកបុរស ខណៈប្រភេទកង់ភ្នំ រួមមាន ១. កង់ភ្នំបុរសថ្នាល, ២. កង់ភ្នំបុរសឈុតធំ, ៣. កង់ភ្នំនារី និង៤. កង់ភ្នំបុរស៕

The post សហព័ន្ធខ្មែរកីឡាទោចក្រយាន ត្រៀមបង្កើន ប្រាក់រង្វាន់ក្រោយទទួលកញ្ចប់ថវិការជាង៤ម៉ឺនដុល្លារពី Herbalife appeared first on Kampuchea Thmey Daily.

កីឡា៣ប្រភេទ បញ្ចប់ដោយជោគជ័យនៅបុណ្យសមុទ្រ ខណៈប្រដាល់គុនខ្មែរនៅបន្តការប្រកួត

Sovath Sok — Sat, 10 Dec 2022 22:59:16 +0000

កីឡាចំនួន ៣ប្រភេទ ដែលរួមមាន កីឡារត់កម្សាន្ត (៣គីឡូម៉ែត្រ និង ៥គីឡូម៉ែត្រ) កីឡាទូកក្ដោង និងកីឡាប្រណាំងទោចក្រយាន បានបញ្ចប់ទៅយ៉ាងជោគជ័យ គិតត្រឹមថ្ងៃទី២ នៃពិធីបុណ្យសមុទ្រ ដែលកំពុងប្រព្រឹត្តទៅនៅខេត្តព្រះសីហនុ។

អគ្គលេខាធិការសហព័ន្ធកីឡាទោចក្រយាន លោក នូ ចំរើន បានបញ្ជាក់នៅក្រោយការបញ្ចប់ការប្រណាំងទោចក្រយាន នាព្រឹកថ្ងៃទី១០ ខែធ្នូនេះថា «ការរៀបចំប្រណាំងកង់ អបអរពិធីបុណ្យសមុទ្រនេះ គឺជាផ្នែកមួយនៃការផ្សព្វផ្សាយដំណើរឆ្ពោះទៅស៊ីហ្គេម ឆ្នាំ២០២៣ ហើយក៏ជាការត្រៀមរៀបចំក្នុងកម្មវិធីផ្សេងៗទៀត នៅខេត្តព្រះសីហនុ សម្រាប់ឆ្នាំ២០២៣ ខាងមុខ ក្នុងនោះយើងក៏នឹងមានព្រឹត្តិការណ៍ Cambodia Bay Cycling Tour ដែលគ្រោងរៀបចំជាលើកទី២ នាចុងឆ្នាំ២០២៣ ក្រោយពួកយើងធ្លាប់រៀបចំលើកដំបូង កាលពីដើមឆ្នាំ២០២២»។

ការប្រណាំងកង់ មាន ៣វិញ្ញាសា គឺជិះចម្ងាយ ៤០គីឡូម៉ែត្រ, ២០គីឡូម៉ែត្រ និង ១៥គីឡូម៉ែត្រ ដែលមានអ្នកចូលរួមប្រមាណ ១០០នាក់ ទាំងអ្នកជិះកម្រិតជំនាញ និងមហាជនទូទៅ ។

ក្រៅពីកីឡាទាំង ៣ប្រភេទដែលបានបញ្ចប់ទៅ ពិធីបុណ្យសមុទ្រ លើកទី៩ នាថ្ងៃទី ២នេះ នឹងមានការប្រកួតកីឡាប្រដាល់គុនខ្មែរ ជ្រើសរើសជើងឯកអាស៊ីអាគ្នេយ៍ ឆ្នាំ២០២២ បន្ដទៀតនាពេលល្ងាច ដោយមានគូខ្លាំងៗជាច្រើន ប៉ះគ្នាលើសង្វៀននៅតំបន់ចុងឆ្នេរអូរត្រេះ និងឆ្នេរអូរឈើទាល។ បងប្អូន អាចចូលរួមទស្សនាបានដោយសេរី៕

អត្ថបទ៖ សុជាតា

The post កីឡា៣ប្រភេទ បញ្ចប់ដោយជោគជ័យនៅបុណ្យសមុទ្រ ខណៈប្រដាល់គុនខ្មែរនៅបន្តការប្រកួត appeared first on Kampuchea Thmey Daily.

ការប្រកួតកីឡាប្រណាំងកង់មួយ ត្រូវបានបោះបង់ ខណៈបានបង្កគ្រោះថ្នាក់ដ៏រន្ធត់ដល់អ្នកគាំទ្រ

Kang Tola — Mon, 01 Aug 2022 10:44:00 +0000

មានឧប្បត្តិហេតុដ៏រន្ធត់មួយក្នុងអំឡុងពេលការប្រណាំងកង់ ក្នុងសាល វិញ្ញាសាចម្ងាយ១៥គីឡូម៉ែត្រផ្នែកបុរស ក្នុងវគ្គជម្រុះនៅឯព្រឹត្តិការណ៍កីឡា ‘Commonwealth Games’ ដោយអ្នកគាំទ្រម្នាក់បានចាកចេញពីកន្លែងទស្សនាជាមួយឈាម បន្ទាប់ពីកីឡាករ Matt Walls បានដួល និងខ្ទាតប៉ះរបាំង។

ការធ្លាក់នេះបានកើតឡើងអំឡុងពេលការប្រកួតជម្រុះ ចម្ងាយ១៥គីឡូម៉ែត្រផ្នែកបុរស ហើយអ្នកគាំទ្រម្នាក់ត្រូវប្រឡាក់ដោយឈាម និងត្រូវយកទៅសង្គ្រោះបន្ទាន់។

ការប្រកួតដែលនៅសល់ត្រូវបានបោះបង់ចោល ដោយកីឡាករ Matt Bostock ក៏ត្រូវបានគេយកទៅសង្គ្រោះ និងពាក់អុកស៊ីហ្សែន នៅពេលគេរៀបចំចេញដំណើរឡើងរថយន្តសង្គ្រោះ ខណៈកុមារីម្នាក់ក៏ត្រូវបានក្រុមគ្រូពេទ្យជួយផងដែរ បន្ទាប់ពីរយៈដៃ។

បញ្ជាក់ថា ព្រឹត្តិការណ៍កីឡា ‘Commonwealth Games’ គឺជាព្រឹត្តិការណ៍ដែលហៅយ៉ាងសាមញ្ញថា គឺជាប្រទេសនិយាយភាសាអង់គ្លេស ឬដែលភាគច្រើនជាអតីតទឹកដីនៃចក្រភពអង់គ្លេស។ នៅឆ្នាំ២០២២ ព្រឹត្តិការណ៍នេះមានប្រទេសចំនួន ៧២ចូលរួមប្រកួត ដោយមានកីឡាចំនួន ២០ប្រភេទ និងអត្តពលិកប្រមាណ ៥ពាន់នាក់បានចូលរួម ធ្វើឡើងនៅចក្រភពអង់គ្លេស៕

ប្រភព ៖ Mirro.co.uk

អត្ថបទ ៖ មន្នីរ័ត្ន

The post ការប្រកួតកីឡាប្រណាំងកង់មួយ ត្រូវបានបោះបង់ ខណៈបានបង្កគ្រោះថ្នាក់ដ៏រន្ធត់ដល់អ្នកគាំទ្រ appeared first on Kampuchea Thmey Daily.

រសៀលនេះ កីឡាប្រណាំងកង់គួកកម្ពុជា ដែលទៅហាត់នៅប្រទេសបារាំង មកដល់កម្ពុជាវិញ

Sorn Phanith — Tue, 07 Sep 2021 04:58:49 +0000

កីឡាករប្រណាំងកង់គួកកម្ពុជា ចំនួន៣រូប រួមជាមួយនិងគ្រូបង្វឹកមួយរូប ដែលចេញទៅបោះជំរំហ្វឹកហាត់ នៅប្រទេសបារាំងរយៈពេល៣ខែកន្លងនោះបានបញ្ចប់ការហ្វឹកហាត់ហើយៗពួកគេនឹងមកដល់កម្ពុជាវិញ នារសៀលថ្ងៃទី៧ខែកញ្ញានេះ ។

កីឡាករទាំង៣រូបនោះ មានកីឡាករ គឹម ចាន់ធូ, សាន ណាម៉ា, សាន ណាម៉ាវ រួមជាមួយគ្រូបង្វឹក ខ្លូត ករណី។ ក្នុងអំឡុងហ្វឹកហាត់នៅប្រទេសបារាំងនោះ ពួកគេបានចូលរួមប្រកួតក្នុងព្រឹត្តិការណ៍ Tour of Szeklerland នៅប្រទេសរ៉ូម៉ានីពីថ្ងៃទី៤ដល់ថ្ងៃទី៧ ខែសីហា ដែលជាការប្រកួតក្នុងកម្រិត២,១។ ការប្រកួតដែលមានចម្ងាយផ្លូវ៥២៣,៧០គីឡូម៉ែត្រនោះ មានប្រទេសចំនួន១១ចូលរួម ដែលភាគច្រើនជាប្រទេសនៅក្នុងតំបន់អឺរ៉ុបតែម្ដង ដែលនេះជាការប្រណាំងកម្រិតអាជីព។ ក្រៅពីនេះ កីឡាករកម្ពុជាទាំង៣រូប បានចូលរួមក្នុងព្រឹត្តិការណ៍CCC Tour Grody Piastowskie UCI Europe Tourកម្រិត២,២ នៅក្នុងប្រទេសប៉ូឡូញទៀតផង។

បើតាមការបង្ហើបឲ្យដឹងពីលោក នូ ចំរើន អគ្គលេខាធិការសហព័ន្ធកីឡាទោចក្រយានកម្ពុជាថា ចំពោះការហ្វឹកហាត់រយៈពេល ៣ខែកន្លងមកនៅបារាំង បានធ្វើឲ្យកីឡាករម្នាក់ៗមានការអភិវឌ្ឍ និងរីកចម្រើនទាំងសមត្ថភាព និងបច្ចេកទេស។ ប៉ុន្ដែតាមផែនការក្រោយត្រឡប់មកដល់មាតុភូមិ សហព័ន្ធក៏នឹងសិក្សាក្នុងការបញ្ជូនពួកគេទៅហ្វឹកហាត់នៅបារាំងម្ដងទៀត នាអំឡុងដំណាច់ឆ្នាំ២០២១ ដើម្បីសម្រួចសមត្ថភាពបន្ថែម សម្រាប់ត្រៀមការប្រកួតស៊ីហ្គេម លើកទី៣១ នៅវៀតណាម ដែលត្រូវបានពន្យារពេលទៅប្រកួតនាឆ្នាំ២០២២។

យ៉ាងណាលោកបញ្ជាក់ថា ផែនការទៅហាត់នៅបារាំងលើកទី២ នៅមិនទាន់អាចសន្និដ្ឋានបានទេ ព្រោះក្រោយត្រឡប់មកដល់មាតុភូមិ ទាំងគ្រូបង្វឹកនិងកីឡាករ ត្រូវធ្វើចត្ដាឡីស័ក តាមគោលការណ៍របស់ក្រសួងសុខាភិបាល។ បន្ទាប់មក សហព័ន្ធនឹងបញ្ជូនពួកគេទៅបោះជំរំហ្វឹកហាត់នៅខេត្តសៀមរាបជាមួយក្រុមជម្រើសជាតិកង់ភ្នំ។តែយ៉ាងណាសហព័ន្ធនឹងព្យាយាមសម្របសម្រួលឲ្យបានទៅហាត់នៅបារាំងម្ដងទៀត ព្រោះការហ្វឹកហាត់ក្រៅប្រទេសនេះ បានជំរុញឲ្យកីឡាករមានការរីកចម្រើនច្រើនសម្រាប់ត្រៀមការប្រកួតអន្ដរជាតិ៕

អត្ថបទ៖ វិសិទ្ធ

The post រសៀលនេះ កីឡាប្រណាំងកង់គួកកម្ពុជា ដែលទៅហាត់នៅប្រទេសបារាំង មកដល់កម្ពុជាវិញ appeared first on Kampuchea Thmey Daily.