កីឡាលើកទម្ងន់ Archives - Kampuchea Thmey Daily

អ្នកជំនាញផ្នែកកីឡាលើកទម្ងន់សិង្ហបុរី មកចែករំលែកបទពិសោធជួយជំរុញខាងកម្ពុជាឲ្យកាន់តែរីកចម្រើន

Sina Noun — Mon, 08 Dec 2025 07:29:41 +0000

អ្នកជំនាញផ្នែកកីឡាលើកទម្ងន់អន្តរជាតិ និងជាប្រធានសហព័ន្ធកីឡាលើកទម្ងន់របស់សិង្ហបុរី បានមកកម្ពុជាដើម្បីចែករំលែកបទពិសោធល្អៗ និងទ្រឹស្ដីបច្ចេកទេសផ្សេងៗដល់កម្ពុជាដើម្បីពង្រឹងសមត្ថភាព និងអភិវឌ្ឍន៍កីឡាមួយនេះឲ្យកាន់តែរីកចម្រើន។

លោក យ៉ុង ជូលាវ ពេលផ្តល់បទពិសោធន៍

លោក តែម ម៉ឺន ប្រធានសហព័ន្ធកីឡាលើកទម្ងន់កម្ពុជាបានឲ្យដឹងថា ក្នុងដំណើរទស្សនកិច្ចលើកទី២ របស់លោក យ៉ុង ជូលាវ ពិតជាមានការហត់នឿយជាងមុន ដោយសារតែលោកធ្វើដំណើរទៅតាមបណ្ដាខេត្តឆ្ងាយៗរហូតដល់ខេត្តតាមព្រំដែនកម្ពុជា ខេត្តបាត់ដំបង និងបានទៅទស្សនកិច្ចនៅខេត្តសៀមរាបដែលជាតំបន់ទេសចរណ៍របស់កម្ពុជា។

យោងតាមស្មារតី នៃការផ្ដល់បទពិសោធខាងលើនេះ សម្រាប់សហព័ន្ធកីឡាលើកទម្ងន់កម្ពុជា រួមជាមួយក្រុមការងារទាំងអស់បានជំរុញឱ្យក្លាយជាការប្តេជ្ញាចិត្តមួយដ៏ធំធេងដើម្បីនាំយកនូវទ្រឹស្ដីទាំងឡាយដែលលោកបានផ្ដល់ឱ្យនេះក្លាយទៅជាការពិតជាក់ស្ដែងជាបន្តបន្ទាប់ក្នុងពេលខាងមុខនេះ។ ជាពិសេសចាប់ពីឆ្នាំ២០២៦ នេះទៅមានព្រឹត្តិការណ៍ប្រកួតជាច្រើន និងខិតខំប្រឹងប្រែងធ្វើយ៉ាងម៉េចដើម្បីឱ្យកីឡាករ កីឡាការិនីកម្ពុជាធ្វើការប្រកួតទទួលបានមេដាយ។

លោក យ៉ុង ជូលាវ ពេលផ្តល់បទពិសោធន៍

ក្នុងនាមប្រធានសហព័ន្ធលើកទម្ងន់កម្ពុជា សំណូមពរមួយចំនួនដល់លោក យ៉ុង ជូលាវ ជួយផ្ដល់ឯកសារដែលមានសារៈសំខាន់ដល់ការងារគ្រប់គ្រង និងរចនាសម្ព័ន្ធដឹកនាំរដ្ឋបាល ហិរញ្ញវត្ថុ និងឯកសារពាក់ព័ន្ធការបណ្ដុះបណ្ដាលមន្ត្រីបច្ចេកទេសគ្រប់កម្រិត បណ្ដុះបណ្ដាលគ្រូបង្វឹក និងកីឡាករ កីឡាការិនី។ ជាពិសេសឯកសារសំខាន់ៗក្នុងព្រឹត្តិការណ៍ប្រកួតកីឡាលើកទម្ងន់អន្តរជាតិផ្ដល់ឲ្យគណៈកម្មការបច្ចេកទេសរបស់សហព័ន្ធរៀបចំផែនការ ការងារបានល្អ ដើម្បីមានភាពរឹងមាំ និងអភិវឌ្ឍន៍ឲ្យមានភាពរីកចម្រើន។ បន្ថែមពីនេះសំណូមពរដល់លោកប្រធានសហព័ន្ធកីឡាលើកទម្ងន់សឹង្ហបុរី សូមជួយឧបត្ថម្ភជាសម្ភារៈដើម្បីហាត់ហ្វឹកហ្វឺន និងសម្ភារៈពាក់ព័ន្ធនឹងការប្រកួតដោយសហព័ន្ធលើកទម្ងន់កម្ពុជានៅមានកម្រិតទាប និងមានការខ្វះខាតច្រើន។

លោក យ៉ុង ជូលាវ ពេលផ្តល់បទពិសោធន៍

បញ្ជាក់ដែរថា លោក យ៉ុង ជូលាវ អ្នកជំនាញកីឡាលើកទម្ងន់អន្តរជាតិ និងជាប្រធានសហព័ន្ធកីឡាលើកទម្ងន់សឹង្ហបុរី រួមទាំងក្រុមការងារបានមកចែករំលែកបទពិសោធដល់សហព័ន្ធកីឡាលើកទម្ងន់កម្ពុជា រយៈពេលប្រហែលជិតមួយសប្ដាហ៍។ រយៈពេលជិតមួយសប្ដាហ៍នេះមិនត្រឹមតែជួបពិភាក្សា ចែករំលែកបទពិសោធន៍ហើយនោះលោកក៏បានចុះទៅតាមបណ្ដាខេត្តមួយចំនួនរបស់កម្ពុជាផងដែរ៕

ក្រុមកីឡាលើកទម្ងន់កម្ពុជា (រូបភាព NOCC)

អត្ថបទដោយ៖ នូន ស៊ីណា

The post អ្នកជំនាញផ្នែកកីឡាលើកទម្ងន់សិង្ហបុរី មកចែករំលែកបទពិសោធជួយជំរុញខាងកម្ពុជាឲ្យកាន់តែរីកចម្រើន appeared first on Kampuchea Thmey Daily.

នារី១០នាក់ក្នុងចំណោមសិក្ខាកាម២៥នាក់បានរៀនវគ្គគ្រូបង្វឹកលើកទម្ងន់

chean virakbot — Mon, 28 Oct 2024 06:45:54 +0000

សហព័ន្ធកីឡាលើកទម្ងន់កម្ពុជាបានផ្តោតយកចិត្តទុកដាក់សំខាន់លើស្ត្រីភេទដែលជាអត្តពលិកមានសក្តានុពលក្នុងការស្វែងរកមេដាយលើឆាកអន្តរជាតិជូនជាតិ ហេតុដូច្នេះ ការជ្រើសរើសអត្តពលិកជម្រើសជាតិក្នុងការហ្វឹកហាត់ និងជ្រើសរើសគ្រូបង្វឹកក៏ផ្តល់អាទិភាពច្រើនដល់ស្ត្រីភេទ។

ជាក់ស្តែងវគ្គបណ្តុះបណ្តាលគ្រូបង្វឹកកីឡាលើកទម្ងន់កម្រិត២ដែលឧបត្ថម្ភដោយគម្រោងសាមគ្គីអូឡាំពិក មាននារី១០នាក់ក្នុងចំណោមសិក្ខាកាមចំនួន២៥នាក់ដែលបានចូលរៀនរយៈពេល៨ថ្ងៃ បញ្ចប់កាលពីថ្ងៃអាទិត្យ ទី២៧ ខែតុលា ឆ្នាំ២០២៤ នៅទីស្នាក់ការគណៈកម្មាធិការជាតិអូឡាំពិកកម្ពុជា។

អ្នកគ្រូ ទ្រី សុថាវី គ្រូបង្វឹកកីឡាលើកទម្ងន់ជម្រើសជាតិកម្ពុជាបានឲ្យដឹងថា សហព័ន្ធកីឡាលើកទម្ងន់កម្ពុជាបានស្វះស្វែងរកស្ត្រីភេទឲ្យចូលរួមច្រើនមិនឲ្យចាញ់បុរសទេទាំងផ្នែកអត្តពលិក និងគ្រូបង្វឹក។ កីឡាភាគច្រើនទាំងក្រុមការងារគ្រូបង្វឹក និងអត្តពលិកគឺមិនសូវមានស្ត្រីភេទចូលរួមច្រើនទេ ប៉ុន្តែស្ត្រីភេទមានភាគរយខ្ពស់ក្នុងការឈ្នះមេដាយលើឆាកអន្តរជាតិ បើប្រៀបធៀបនឹងបុរស។

អ្នកគ្រូដែលបង្ហាត់ទាំងកីឡាករ និងកីឡាការិនីលើកទម្ងន់ជម្រើសជាតិកម្ពុជាបាននិយថា ៖«កីឡាការិនីមានអាទិភាពជាងបុរសក្នុងការរកបានមេដាយ ពីព្រោះមិនថានៅប្រទេសយើង ឬប្រទេសគេគឺមិនសូវមានកីឡាការិនីច្រើន ដូច្នេះហើយសហព័ន្ធលើកទម្ងន់បានព្យាយាមផ្តល់អាទិភាពខ្ពស់ដល់នារី។ ដូចថ្ងៃនេះជាដើម វគ្គបណ្តុះបណ្តាលគ្រូបង្វឹកយើងមានសិក្ខាកាមជានារីដល់ទី១០នាក់បានចូលរៀន»។

«កាលស៊ីហ្គេម ២០២៣ យើងមានកីឡាការិនីម្នាក់ទទួលបានមេដាយសំរិទ្ធ។ កីឡាការិនីជាម្ចាស់មេដាយសំរិទ្ធ និងកីឡាការិនីម្នាក់ទៀតយើងបានបញ្ជូនពួកគាត់ទៅហ្វឹកហាត់នៅចិនហើយ ដើម្បីត្រៀមកីឡាស៊ីហ្គេម នៅថៃឆ្នាំ២០២៥។ យើងកំពុងសម្រួចលើកីឡាការិនីដើម្បីបប្រជែងយកមេដាយលើឆាកអន្តរជាតិ។ មិនមែនមានន័យថា យើងអត់ផ្តោតលើបុរសទេ តាមពិតបុរសមានភាគច្រើនស្រាប់ហើយ គ្រាន់តែយើងបង្កើននារីឲ្យបានច្រើន»។ អ្នកគ្រូ សុថាវី បានបញ្ជាក់។

អ្នកគ្រូដែលជាគ្រូបង្វឹកជម្រើសជាតិ និងក៏ជាសិក្ខាកាមម្នាក់ដែលបានចូលរួមវគ្គបណ្តុះគ្រូបង្វឹកកម្រិត២នេះសង្ឃឹមថា វគ្គបណ្តុះបណ្តាលដ៏មានសារសំខាន់នេះនឹងក្លាយជាផ្នែកមួយដ៏សំខាន់ក្នុងការអភិវឌ្ឍកីឡាករ កីឡាការិនីលើកទម្ងន់នៅក្នុងប្រទេសកម្ពុជា ពីព្រោះកីឡាលើកទម្ងន់នេះមិនសូវមានសក្តានុពលទេ ស្របពេលធនធានកីឡាករ កីឡាការិនី ក៏ដូចជាគ្រូបង្វឹកមិនសូវសំបូរ។

វគ្គបណ្តុះបណ្តាលគ្រូបង្វឹកកីឡាលើកទម្ងន់កម្រិត២ដែលមានគ្រូជំនាញ Aveennash Pandoo មកពីអាហ្វ្រិកខាងត្បូងមានសិក្ខាកាមមកពី៩ខេត្ត-រាជធានីគឺភ្នំពេញ សៀមរាប កណ្តាល បាត់ដំបង កំពង់ស្ពឺ ពោធិ៍សាត់ កំពង់ចាម តាកែវ និងបន្ទាយមានន័យ ដែលសិក្សារហូតដល់៨ថ្ងៃ។

នេះជាលើកទី២ហើយដែលមានវគ្គបណ្តុះបណ្តាលលើជំនាញគ្រូបង្វឹកលើកទម្ងន់ បន្ទាប់ពីលើកទី១កាលពីឆ្នាំ២០២២ មានសិក្ខាកាម២៥នាក់ ក្នុងនោះមានស្រី៥នាក់ប៉ុណ្ណោះ ខណៈឆ្នាំ២០២៤មាននារីរហូតដល់១០នាក់៕

អត្ថបទ៖ វីរបុត្រ

The post នារី១០នាក់ក្នុងចំណោមសិក្ខាកាម២៥នាក់បានរៀនវគ្គគ្រូបង្វឹកលើកទម្ងន់ appeared first on Kampuchea Thmey Daily.

លើកទម្ងន់មីយ៉ាន់ម៉ាចាត់ទុកថៃ វៀតណាម និងហ្វីលីពីន ជាឧបសគ្គធំស៊ីហ្គេមនៅកម្ពុជា

chean virakbot — Tue, 18 Apr 2023 04:16:50 +0000

សហព័ន្ធកីឡាលើកទម្ងន់មីយ៉ាន់ម៉ាបានចាត់ទុកថៃ វៀតណាម និងហ្វីលីពីន ជាឧបសគ្គធំបំផុតក្នុងកីឡាស៊ីហ្គេម លើកទី៣២ ឆ្នាំ២០២៣ នៅប្រទេសកម្ពុជា។

កីឡាលើកទម្ងន់មីយ៉ាន់ម៉ា គ្រោងបញ្ជូនអត្តពលិក៦រូបចូលរួមប្រកួតស៊ីហ្គេមនៅកម្ពុជាគឺកីឡាករ២រូប លើទម្ងន់៧៣គ.ក និងទម្ងន់៨៩គ.ក ហើយកីឡាការិនី៤រូបលើទម្ងន់៤៥គ.ក, ៤៩គ.ក, ៥៩គ.ក និង៧១គ.ក។

លោក U Thi Han អគ្គលេខាធិការសហព័ន្ធកីឡាលើកទម្ងន់មីយ៉ាន់ម៉ាបាននិយាយថា ៖«លើកទម្ងន់ជាកីឡាមួយដែលប្រកួតរកកំណត់ត្រា និងខុសពីកីឡាផ្សេងៗ។ ទោះជាយ៉ាងណា ស៊ីហ្គេម នៅកម្ពុជា យើងត្រូវតែព្យាយាមប្រកួតឲ្យបានគ្រប់វិញ្ញាសា។ អត្តពលិកលើកទម្ងន់របស់ប្រទេសថៃ វៀតណាម និងហ្វីលីពីន ជាឧបសគ្គធំ ពីព្រោះពួកគេធ្លាប់ឈ្នះមេដាយមាសក្នុងព្រឹត្តិការណ៍កីឡាអូឡាំពិក ដូច្នេះយើងត្រូវតែព្យាយាមឲ្យខ្លាំងបំផុត ធ្វើយ៉ាងណាឲ្យទទួលបានមេដាយ»។

ក្រុមអត្តពលិកលើកទម្ងន់មីយ៉ាន់ម៉ាបានចាប់ហ្វឹកហាត់តាំងពីខែកក្កដា ឆ្នាំ២០២២ នៅទីលាន Nay Pyi Taw Gold Camp ចាប់ពីថ្ងៃចន្ទដល់ថ្ងៃសៅរ៍។

រាល់ការចូលរួមប្រកួតស៊ីហ្គេម កីឡាលើកទម្ងន់មីយ៉ាន់ម៉ាតែងតែទទួលបានមេដាយរហូត។ លើកលែងតែស៊ីហ្គេម ឆ្នាំ១៩៩៩ នៅប្រទេសព្រុយណេ និងស៊ីហ្គេម ឆ្នាំ២០១៥ នៅប្រទេសសិង្ហបុរី ដែលកីឡាលើកទម្ងន់មិនត្រូវបានដាក់បញ្ចូលឲ្យប្រកួត៕

ប្រែសម្រួល៖ វីរបុត្រ

The post លើកទម្ងន់មីយ៉ាន់ម៉ាចាត់ទុកថៃ វៀតណាម និងហ្វីលីពីន ជាឧបសគ្គធំស៊ីហ្គេមនៅកម្ពុជា appeared first on Kampuchea Thmey Daily.

សហព័ន្ធកីឡាលើកទម្ងន់កម្ពុជាទោះបីទើបកកើត៣ឆ្នាំ តែមានមហិច្ឆតាយកមេដាយ នៅSEA GAMES វៀតណាម និងកម្ពុជា

Sorn Phanith — Mon, 26 Jul 2021 07:50:57 +0000

កីឡាលើកទម្ងន់ជាប្រភេទកីឡាអូឡាំពិកតែមួយសម្រាប់កម្ពុជាជាកីឡា ដែលទើបបានបង្កើតឡើងប្រមាណជាបីឆ្នាំប៉ុណ្ណោះ។ សម្រាប់អាណត្តិទី១ របស់សហព័ន្ធកីឡាលើកទម្ងន់នេះ គឺមានមហិច្ឆតាដណ្ដើមមេដាយនៅស៊ីហ្គេមលើកទី៣១នៅប្រទេសវៀតណាម ដែលពន្យារពេលទៅធ្វើនៅឆ្នាំ២០២២ និងស៊ីហ្គេមលើកទី៣២នៅកម្ពុជាឆ្នាំ២០២៣។

នៅក្នុងបទសម្ភាសដល់សារព័ត៌មាន ស្តីពីការត្រៀមខ្លួនឆ្ពោះទៅដណ្តើមមេដាយនៅស៊ីហ្គេមវៀតណាមនិងមេដាយមាសលើព្រឹត្តិការណ៍ការប្រកួតកីឡាSEA GA MES 2023 លើកទី៣២ ដែលព្រះរាជាណាចក្រកម្ពុជាធ្វើជាម្ចាស់ផ្ទះ និងមានគោ លដៅចូលរួមព្រឹត្តិការណ៍ការប្រកួតកីឡាអូឡាពិកលើកក្រោយ (ឆ្នាំ២០២៤)របស់ខ្លួន បន្ទាប់ពីចំណាយ៣ឆ្នាំក្នុងការស្វែងរកអត្តពលិកឆ្នើមៗ លោក សំ សុខយី អគ្គលេខាធិការសហព័ន្ធកីឡាលើកទម្ងន់កម្ពុជាបានមានប្រសាសន៍ថា រយៈពេល៣ឆ្នាំ នេះសហព័ន្ធបានមានទំនាក់ទំនងជាមួយសហព័ន្ធកីឡាលើកទម្ងន់អន្តរជាតិ និងសហព័ន្ធកីឡាលើកទម្ងន់អាស៊ី ដើម្បីឲ្យសកម្មភាពរស់រវើក និងត្រៀមព្រឹត្តិការណ៍ការប្រកួតកីឡា SEA GAMES 2021 លើកទី៣១ ហើយក៏មានការលំបាកក្នុងការផលិតកីឡាករ-កីឡាការិនីត្រូវការវេលាសមរម្យឆ្ពោះទៅរកមេដាយជូនជាតិ។

លោកអគ្គលេខាធិការបន្តថា ព្រោះការប្រកួតកីឡា SEA GAMES 2021លើកទី៣១ នៅវៀតណាមយើង សង្ឃឹមថានឹងទទួលមេដាយមួយគ្រឿង ទោះជាមេដាយអ្វីក៏ដោយ ក៏ត្រូវតែបានដែរ ដោយយើងជំរុញការខិតខំប្រឹងប្រែងតាមយុទ្ធសាស្ត្រដើម្បីអត្តពលិកឈានដល់កម្រិតកំណត់អាជីព។ហើយយុទ្ធសាស្ត្របន្ទាប់សហព័ន្ធទាក់ ទងជា មួយកូនខ្មែរដែលរស់នៅក្រៅប្រទេ សដូចជាអូស្ត្រាលី២នាក់ និងអាមេរិក ១ នាក់ជាអត្តពលិកជំនាញប្រភេទកីឡាលើកទម្ងន់។

លោកបន្ថែមទៀតថា ចំណែកព្រឹត្តិការណ៍ការប្រកួតកីឡាSEA GAMES 2023 លើកទី៣២ ដែលព្រះរាជាណាចក្រកម្ពុជាធ្វើជាម្ចាស់ផ្ទះ យើងសង្ឃឹមដណ្តើមមេដាយមាស១គ្រឿង។ លោកបញ្ជាក់ឲ្យដឹងដែរថា នៅក្នុងអាស៊ានបើយើងពិនិត្យទៅលើសមត្ថភាពដែលខ្ពស់សម្រាប់ប្រភេទកីឡាលើកទម្ងន់នេះ គឺមានប្រទេសឥណ្ឌូនេស៊ីថៃ វៀតណាម។ ចំពោះហ្វីលីពីន ក៏មិនជាខ្លាំងប៉ុន្មានដែរ។ ដូច្នេះបើយើងធ្វើការប្រៀប ធៀបទៅលើសមត្ថភាពបច្ចេកទេសនិងកម្លាំងរបស់កីឡាលើកទម្ងន់កម្ពុជាយើងជាមួយប្រទេសក្នុងអាស៊ាននេះ ហើយបើសិនជាកីឡាករកីឡាការិនីយើងមានការហ្វឹកហាត់ត្រឹមត្រូវ គឺយើងអាចចូលរួមប្រកួតប្រជែងជាមួយបាន។

នាពេលខាងមុខ សហព័ន្ធត្រៀមបញ្ជូនកីឡាករ-កីឡាការិនីលើកទម្ងន់ទៅហ្វឹក ហាត់នៅក្រៅប្រទេសតាមផែនការគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ២០២៣ ហៅកាត់ គ.ជ.ប.អ (CAMSOC)។ នេះបើតាមការអះអាងរបស់លោក សំ សុខយី អគ្គលេ ខាធិការសហព័ន្ធកីឡាលើកទម្ងន់កម្ពុជា៕

អត្ថបទ៖ វិសិទ្ធ

The post សហព័ន្ធកីឡាលើកទម្ងន់កម្ពុជាទោះបីទើបកកើត៣ឆ្នាំ តែមានមហិច្ឆតាយកមេដាយ នៅSEA GAMES វៀតណាម និងកម្ពុជា appeared first on Kampuchea Thmey Daily.

កីឡាលើកទម្ងន់ Archives - Kampuchea Thmey Daily

នារី១០​នាក់ក្នុង​ចំណោមសិក្ខាកាម​២៥​នាក់​បាន​រៀន​វគ្គ​គ្រូ​បង្វឹកលើក​ទម្ងន់

លើក​ទម្ងន់មីយ៉ាន់ម៉ា​ចាត់​ទុក​ថៃ វៀតណាម និង​ហ្វីលីពីន ជាឧបសគ្គ​ធំ​​ស៊ីហ្គេមនៅកម្ពុជា

នារី១០នាក់ក្នុងចំណោមសិក្ខាកាម២៥នាក់បានរៀនវគ្គគ្រូបង្វឹកលើកទម្ងន់

លើកទម្ងន់មីយ៉ាន់ម៉ាចាត់ទុកថៃ វៀតណាម និងហ្វីលីពីន ជាឧបសគ្គធំស៊ីហ្គេមនៅកម្ពុជា