កែវ សុខផេង Archives - Kampuchea Thmey Daily

កែវ សុខផេង ប្រាប់ថា នៅមិនសុខចង់ចូលទីលានអាជីពវិញ

chean virakbot — Tue, 11 Jun 2024 01:47:06 +0000

អតីតកីឡាករបាល់ទាត់ដ៏ឆ្នើម កែវ សុខផេង ចង់វិលចូលទីលានបាល់ទាត់អាជីពវិញ បន្ទាប់ពីរូបគេបានប្រកាសចូលនិវត្តន៍កាលពីខែមេសា ឆ្នាំ២០២៣ ដោយសាររបួសរ៉ាំរៃបង្ខំចិត្តឲ្យរូបគេព្យួរស្បែកជើងទាំងវ័យក្មេង។

ជួបជាមួយសារព័ត៌មាន«កម្ពុជាថ្មី»យប់ថ្ងៃអាទិត្យ ទី៩ ខែមិថុនា ឆ្នាំ២០២៤ ក្នុងព្រឹត្តិការណ៍ប្រកួតបាល់ទាត់សប្បុរសធម៌ដើម្បីមន្ទីរពេទ្យគន្ធបុប្ផា កែវ សុខផេង បានប្រាប់ថា បន្ទាប់ពីចូលនិវត្តន៍ពេលឃើញកីឡាករដទៃលេងនៅលើទីលានទាំង ក្លិប និងជម្រើសជាតិ រូបគេបានពិតជាចង់ចូលលេងមែនទែន។ រូបគេមានអារម្មណ៍មិនសុខស្រួលសោះគឺចិត្តចង់ចូលលេងតែម្តង។

កីឡាករបាននិយាយថា ៖«ពីមុនខ្ញុំលេងទាំងក្លិប និងជម្រើសជាតិ។ ឥឡូវនេះពេលឃើញគេលេង ខ្ញុំមានអារម្មណ៍ដូចជារមាស់ដៃ រមាស់ជើង ចង់ចូលលេងដែរ តែដោយសារបញ្ហាសុខភាព។ ណាមួយខ្ញុំឈឺច្រើនផង អីចឹងអត់អាចលេងអាជីពបានទេ»។

នៅពេលសួរថា តើអាចនឹងវិលចូលទីលានបាល់ទាត់អាជីពវិញទេ ដោយសារវ័យក្មេង? កែវ សុខផេង បានឆ្លើយថា ៖«ខ្ញុំអត់ទាន់ច្បាស់ទេ ហើយក៏មិនទាន់ហ៊ាននិយាយចូលនិវត្តន៍១០០%ដែរ។ បើខ្ញុំប្រាប់ថា ខ្ញុំនឹងលេងវិញ តែសុខភាពខ្ញុំនៅតែមិនល្អគឺនៅតែមិនអាចលេងបាន។ ប៉ុន្តែបើពេលណាមួយសុខភាពខ្ញុំល្អប្រសើរ ហើយចូលលេងវិញ នោះគឺខុសនឹងសំដីខ្លួនឯងថា ចូលនិវត្តន៍១០០%»។

សម្រាប់ការបង្ហាញខ្លួននៅលើទីលានជាថ្មីក្នុងការប្រកួតបាល់ទាត់មិត្តភាពសប្បុរសធម៌ដើម្បីមន្ទីរពេទ្យគន្ធបុប្ផា កែវ សុខផេង លេងឲ្យក្រុមបាល់ទាត់ សសយក ដែលសុទ្ធតែថ្នាក់ដឹកនាំ និងមន្ត្រីជាន់ខ្ពស់ រួមជាមួយនឹងមិត្តរួមអាជីពចាស់ដូចជា ចាន់ វឌ្ឍនាកា និង ប្រាក់ មុន្នីឧត្តម។

កែវ សុខផេង បានលើកឡើងថា កម្មវិធីសប្បុរសធម៌នេះរៀបចំបានល្អ។ រូបគេពិតជារំភើបរីករាយដែលថ្នាក់ដឹកនាំផ្តួចផ្តើមឲ្យមានកម្មវិធីនេះមានមនុស្សច្រើនចូលរួម។ រូបគេមានមោទនភាពដែលបានជាចំណែកតូចមួយចូលរួមសកម្មភាពដើម្បីកុមារកម្ពុជា។

កែវ សុខផេង ត្រូវបានចាត់ទុកជាកីឡាករបាល់ទាត់កម្ពុជាម្នាក់ទទួលបានជោគជ័យទាំងក្នុងជម្រើសជាតិ និងក្លិប ចាប់តាំងពីរូបគេបានលេងបាល់ទាត់អាជីពនៅឆ្នាំ២០១២។ ពីឆ្នាំ២០១២ ដល់ ២០១៥ រូបគេបង្ហាញខ្លួនបាន៣៧ដងនៅលើទីលាន និងរកបាន២១គ្រាប់ឲ្យបឹងកេត។ ពីឆ្នាំ២០១៥-២០១៧ រូបគេលេងឲ្យភ្នំពេញក្រោនដោយបង្ហាញខ្លួនលើទីលាន៥១ដង រកបាន២៧គ្រាប់។

នៅឆ្នាំ២០១៨ កែវ សុខផេង បានលេងនៅក្លិបលីគកំពូលម៉ាឡេស៊ី PKNP ហើយលេងបានតែ៤ដងប៉ុណ្ណោះ ប៉ុន្តែរកបាន១គ្រាប់ដែលបានក្លាយជាកីឡាករកម្ពុជាទី១រកបានគ្រាប់បាល់ក្នុងលីគកំពូលម៉ាឡេស៊ី។ ឆ្នាំ២០១៨ រូបគេបានចូលរួមជាមួយវិសាខាដោយបង្ហាញខ្លួនលើទីលាន៩៤ដង រកបាន៥១គ្រាប់។

កែវ សុខផេង ត្រូវបានកោះហៅចូលតំណាងជាតិលើឆាកអន្តរជាតិតាំងពីឆ្នាំ២០១៥ទាំងក្រុមធំ និងក្រុមយុវជន។ ការបង្ហាញខ្លួនឲ្យក្រុមយុវជនអាយុក្រោម២៣ និងក្រុមធំ៦២លើក រកបាន១៥គ្រាប់ក្នុងព្រឹត្តិការណ៍សំខាន់ជាច្រើនដូចជា ជម្រុះជើងឯកពិភពលោក ជម្រុះជើងឯកអាស៊ី ជើងឯកអាស៊ាន កីឡាស៊ីហ្គេម និងមិត្តភាពអន្តរជាតិជាដើម។

ចាប់តាំងពីចុងឆ្នាំ២០២២ កែវ សុខផេង បានរបួសញឹកញាប់ និងមិនសូវបានចូលលេងទេ។ នៅថ្ងៃទី៥ ខែមេសា ឆ្នាំ២០២៣ រូបគេបានប្រកាសជាផ្លូវការពីការចូលនិវត្តន៍ក្នុងវ័យ៣១ឆ្នាំ៕

អត្ថបទ៖ វីរបុត្រ

The post កែវ សុខផេង ប្រាប់ថា នៅមិនសុខចង់ចូលទីលានអាជីពវិញ appeared first on Kampuchea Thmey Daily.

កែវ សុខផេង នឹងបានកុងត្រា២ឆ្នាំ ប្រាក់ខែ៤ពាន់ដុល្លារ បើចូលភ្នំពេញក្រោន

chean virakbot — Wed, 28 Feb 2024 02:09:52 +0000

លោក កែវ សុខង៉ន អ្នកចាត់ការក្លិបបាល់ទាត់ភ្នំពេញក្រោនហ៊ានផ្តល់កុងត្រា និងប្រាក់ខែខ្ពស់ឲ្យអតីត កែវ សុខផេង ប្រសិនបើវិលត្រឡប់មកកាន់អាជីពបាល់ទាត់ជាមួយភ្នំពេញក្រោន។

លោក កែវ សុខង៉ន ដែលជាបងប្រុសបង្កើតរបស់ កែវ សុខផេង បាននិយាយថា ៖«បើឥឡូវមកក្រោន ខ្ញុំនឹងផ្ដល់កុងត្រាឲ្យគាត់២ឆ្នាំ ប្រាក់បៀវត្ត4k (៤ពាន់ដុល្លារ) គោរពនិងផ្ដល់អ្វីដែលគាត់លះបង់កន្លងមក។ គាត់ជួយជម្រើសជាតិកម្ពុជាយើងច្រើនណាស់»។

កីឡាករបាល់ទាត់ជម្រើសជាតិកម្ពុជា កែវ សុខផេង បានចូលនិវត្តន៍ពីអាជីពបាល់ទាត់ចាប់ពីថ្ងៃទី៥ ខែមេសា ឆ្នាំ២០២៣នេះ ដោយសាររបួសរ៉ាំរៃ។

កែវ សុខផេង ត្រូវបានចាត់ទុកជាកីឡាករបាល់ទាត់កម្ពុជាម្នាក់ទទួលបានជោគជ័យទាំងក្នុងជម្រើសជាតិ និងក្លិប ចាប់តាំងពីរូបគេបានលេងបាល់ទាត់អាជីពនៅឆ្នាំ២០១២។ ក្លិបអាជីពលើកដំបូងគឺ បឹងកេត ពីឆ្នាំ២០១២ ដល់ ២០១៥ រូបគេបង្ហាញខ្លួនបាន៣៧ដងនៅលើទីលាន និងរកបាន២១គ្រាប់។ ក្លិបនេះ រូបគេបានជួយឲ្យឈ្នះជើងឯកលីគកំពូលកម្ពុជាឆ្នាំ២០១២។

បន្ទាប់មក សុខផេង បានផ្លាស់ទៅក្លឹបភ្នំពេញក្រោន ពីឆ្នាំ២០១៥ ដល់២០១៧។ ក្នុងរយៈពេល៣ឆ្នាំនេះ រូបគេបង្ហាញខ្លួនលើទីលាន៥១ដង រកបាន២៧គ្រាប់ និងជួយឲ្យភ្នំពេញក្រោន ឈ្នះជើងឯកលីគកំពូលកម្ពុជា ក្នុងឆ្នាំ២០១៥។

ឆ្នាំ២០១៨ ប្អូនប្រុសបង្កើតរបស់ កែវ សុខង៉ន បានផ្ទេរទៅកាន់ក្លិបលីគកំពូលម៉ាឡេស៊ី PKNP ហើយលេងបានតែ៤ដងប៉ុណ្ណោះ ប៉ុន្តែរកបាន១គ្រាប់ដែលបានក្លាយជាកីឡាករកម្ពុជាទី១រកបានគ្រាប់បាល់ក្នុងលីគកំពូលម៉ាឡេស៊ី។

យ៉ាងណា ឆ្នាំ២០១៨ដដែល កែវ សុខផេង បានវិលត្រឡប់មកកម្ពុជាវិញដោយបានចូលរួមជាមួយក្លិបវិសាខា។ ក្លិបចុងក្រោយនេះ រូបគេបានបង្ហាញខ្លួនលើទីលានប្រមាណ៩៤ដង រកបាន៥១គ្រាប់ និងជួយឲ្យវិសាខាឈ្នះពានរង្វាន់សម្តេចតេជោ ហ៊ុន សែន ៣លើកជាប់គ្នាគឺឆ្នាំ២០២០ ២០២១ និង២០២២។

និយាយពីជម្រើសជាតិកម្ពុជាវិញ កែវ សុខផេង ត្រូវបានកោះហៅចូលតំណាងជាតិលើឆាកអន្តរជាតិតាំងពីឆ្នាំ២០១៥ទាំងក្រុមធំ និងយុវជន។ ការបង្ហាញខ្លួនឲ្យក្រុមយុវជនអាយុក្រោម២៣ និងឈុតធំបាន៦២លើក រកបាន១៥គ្រាប់ក្នុងព្រឹត្តិការណ៍សំខាន់ជាច្រើនដូចជា ជម្រុះជើងឯកពិភពលោក ជម្រុះជើងឯកអាស៊ី ជើងឯកអាស៊ាន កីឡាស៊ីហ្គេម និងមិត្តភាពអន្តរជាតិជាដើម។

សមិទ្ធផលសម្រាប់ក្រុមជម្រើសជាតិគួរឲ្យកត់សំគាល់គឺនៅពេល រូបគេស៊ុតបាន៤គ្រាប់ក្នុងព្រឹត្តិការណ៍កីឡាស៊ីហ្គេម លើកទី៣០ ឆ្នាំ២០១៩ នៅប្រទេសហ្វីលីពីន គឺស៊ុតចូលហ្វីលីពីន១គ្រាប់, ចូលទីម័រខាងកើត១គ្រាប់, ចូលម៉ាឡេស៊ី១គ្រាប់ និងមីយ៉ាន់ម៉ា១គ្រាប់ ហើយជាការជួយឲ្យក្រុម U23 កម្ពុជាឡើងទៅកាន់វគ្គពាក់កណ្តាលផ្តាច់ព្រ័ត្រលើកដំបូងក្នុងប្រវត្តិសាស្ត្រកីឡាស៊ីហ្គេម៕

អត្ថបទ៖ វីរបុត្រ

The post កែវ សុខផេង នឹងបានកុងត្រា២ឆ្នាំ ប្រាក់ខែ៤ពាន់ដុល្លារ បើចូលភ្នំពេញក្រោន appeared first on Kampuchea Thmey Daily.

កែវ សុខផេង មានប្រវត្តិយ៉ាងណា មុនពេលចូលនិវត្តន៍វ័យ៣១ឆ្នាំ?

chean virakbot — Wed, 05 Apr 2023 06:21:23 +0000

កីឡាករបាល់ទាត់ជម្រើសជាតិកម្ពុជា និងក្លឹបវិសាខា កែវ សុខផេង បានចូលនិវត្តន៍ពីអាជីពបាល់ទាត់ចាប់ពីថ្ងៃទី៥ ខែមេសា ឆ្នាំ២០២៣នេះ ដោយសាររបួសរ៉ាំរៃ។

កែវ សុខផេង ត្រូវបានចាត់ទុកជាកីឡាករបាល់ទាត់កម្ពុជាម្នាក់ទទួលបានជោគជ័យទាំងក្នុងជម្រើសជាតិ និងក្លឹប ចាប់តាំងពីរូបគេបានលេងបាល់ទាត់អាជីពនៅឆ្នាំ២០១២។ ក្លឹបអាជីពលើកដំបូងគឺ បឹងកេត ពីឆ្នាំ២០១២ ដល់ ២០១៥ រូបគេបង្ហាញខ្លួនបាន៣៧ដងនៅលើទីលាន និងរកបាន២១គ្រាប់។ ក្លឹបនេះ រូបគេបានជួយឲ្យឈ្នះជើងឯកលីគកំពូលកម្ពុជាឆ្នាំ២០១២។

ឆ្នាំ២០១៨ ប្អូនប្រុសបង្កើតរបស់ កែវ សុខង៉ន បានផ្ទេរទៅកាន់ក្លឹបលីគកំពូលម៉ាឡេស៊ី PKNP ហើយលេងបានតែ៤ដងប៉ុណ្ណោះ ប៉ុន្តែរកបាន១គ្រាប់ដែលបានក្លាយជាកីឡាករកម្ពុជាទី១រកបានគ្រាប់បាល់ក្នុងលីគកំពូលម៉ាឡេស៊ី។

យ៉ាងណា ឆ្នាំ២០១៨ដដែល កែវ សុខផេង បានវិលត្រឡប់មកកម្ពុជាវិញដោយបានចូលរួមជាមួយក្លឹបវិសាខា។ ក្លឹបចុងក្រោយនេះ រូបគេបានបង្ហាញលើទីលានប្រមាណ៩៤ដង រកបាន៥១គ្រាប់ និងជួយឲ្យវិសាខាឈ្នះពានរង្វាន់សម្តេចតេជោ ហ៊ុន សែន ៣លើកជាប់គ្នាគឺឆ្នាំ២០២០ ២០២១ និង២០២២។

និយាយពីជម្រើសជាតិកម្ពុជាវិញ កែវ សុខផេង ត្រូវបានកោះហៅចូលតំណាងជាតិលើឆាកអន្តរជាតិតាំងពីឆ្នាំ២០១៥ទាំងឈុតធំ និងឈុតយុវជន។ ការបង្ហាញខ្លួនឲ្យក្រុមយុវជនអាយុក្រោម២៣ និងឈុតធំបាន៦២លើក រកបាន១៥គ្រាប់ក្នុងព្រឹត្តិការណ៍សំខាន់ជាច្រើនដូចជា ជម្រុះជើងឯកពិភពលោក ជម្រុះជើងឯកអាស៊ី ជើងឯកអាស៊ាន កីឡាស៊ីហ្គេម និងមិត្តភាពអន្តរជាតិជាដើម។

យ៉ាងណា ចាប់តាំងពីចុងឆ្នាំ២០២២មក សុខផេង ឧស្សាហ៍របួសញឹកញាប់ និងមិនសូវបានចូលលេងទេ។ គេមើលឃើញគ្រូបង្វឹកដាក់ឲ្យចូលលេងចុងវគ្គទី២។

ក្រៅពីអាជីបបាល់ទាត់ កែវ សុខផេង ជាកីឡាករបាល់ទាត់ម្នាក់ដែលលេចមុខក្នុងកម្មវិធីសំខាន់ជាច្រើនដូចជាពិធីសម្ពោធផលិតផល ហាង និងការថតផ្សាយពាណិជ្ជកម្មជាដើម។

នៅថ្ងៃទី៥ ខែមេសានេះ ក្លឹបវិសាខា បានប្រកាសជាផ្លូវការពីការចូលនិវត្តន៍របស់ កែវ សុខផេង ក្នុងវ័យ៣១ឆ្នាំ៕

អត្ថបទ៖ វីរបុត្រ

The post កែវ សុខផេង មានប្រវត្តិយ៉ាងណា មុនពេលចូលនិវត្តន៍វ័យ៣១ឆ្នាំ? appeared first on Kampuchea Thmey Daily.

គួរឲ្យស្តាយ កែវ សុខផេង សម្រេចចូលនិវត្តន៍ពីអាជីពបាល់ទាត់ហើយ

chean virakbot — Wed, 05 Apr 2023 00:57:08 +0000

កីឡាករបាល់ទាត់ជម្រើសជាតិកម្ពុជា និងក្លឹបវិសាខា កែវ សុខផេង បានចូលនិវត្តន៍ពីអាជីពបាល់ទាត់ចាប់ពីថ្ងៃទី៥ ខែមេសា ឆ្នាំ២០២៣នេះហើយ បន្ទាប់ពីប្រឡូកក្នុងអាជីពលើទីលានវាលស្មៅអស់រយៈពេលជាង១០ឆ្នាំ។

មូលហេតុចម្បងដែលជំរុញឲ្យ កែវ សុខផេង សម្រេចឈប់ពីអាជីពបាល់ទាត់ក្នុងវ័យ៣១ឆ្នាំនេះ ដោយសាររបួសកើតមានជាបន្តបន្ទាប់។ មួយរយៈពេលចុងក្រោយកីឡាករដែលមានដើមកំណើតនៅខេត្តក្រចេះមិនសូវបានបង្ហាញខ្លួនលើទីលានញឹកញាប់ទេ ហើយភាគច្រើនត្រូវបានដាក់ឲ្យចូលលេងនៅវគ្គទី២។

កែវ សុខផេង ត្រូវបានចាត់ទុកជាកីឡាករបាល់ទាត់អាជីពម្នាក់របស់កម្ពុជាដែលទទួលបានជោគជ័យ និងលេចធ្លោទាំងក្លឹប និងជម្រើសជាតិកម្ពុជា ហើយរូបគេបានរួមចំណែកឲ្យក្លឹបឈ្នះជើងឯកជាច្រើន ព្រមទាំងក្រុម U23 កម្ពុជាឡើងវគ្គពាក់កណ្តាលផ្តាច់ព្រ័ត្រលើកដំបូងក្នុងកីឡាស៊ីហ្គេម កាលពីឆ្នាំ២០១៩៕

អត្ថបទ៖ វីរបុត្រ

The post គួរឲ្យស្តាយ កែវ សុខផេង សម្រេចចូលនិវត្តន៍ពីអាជីពបាល់ទាត់ហើយ appeared first on Kampuchea Thmey Daily.

កែវ សុខផេង Archives - Kampuchea Thmey Daily

កែវ សុខផេង ប្រាប់ថា នៅមិនសុខចង់ចូលទីលានអាជីពវិញ

កែវ សុខផេង នឹងបានកុងត្រា២ឆ្នាំ ប្រាក់ខែ៤ពាន់ដុល្លារ បើចូលភ្នំពេញក្រោន

កែវ សុខផេង មាន​ប្រវត្តិ​យ៉ាង​ណា មុន​ពេល​​ចូល​និវត្តន៍​​វ័យ​៣១​ឆ្នាំ?

គួរ​​ឲ្យ​​ស្តាយ​ កែវ​ សុខផេង​ សម្រេច​​ចូល​​និវត្តន៍​​ពី​​អាជីព​​បាល់ទាត់​​ហើយ

កែវ សុខផេង មានប្រវត្តិយ៉ាងណា មុនពេលចូលនិវត្តន៍វ័យ៣១ឆ្នាំ?

គួរឲ្យស្តាយ កែវ សុខផេង សម្រេចចូលនិវត្តន៍ពីអាជីពបាល់ទាត់ហើយ