លោកស្រី យូ សុភា សង្កត់​ធ្ងន់​ថា មគ្គុទ្ទេសក៍​ទេសចរណ៍ ពុំ​អាច​ខ្វះ​បាន​នូវ​វគ្គ​តម្រង់​ទិស គ្រប់គ្រង ត្រួតពិនិត្យ និង​ការ​ចូលរួម​ជំរុញ​ឱ្យ​មគ្គុទ្ទេសក៍​ទេសចរណ៍​ទាំងអស់​យកចិត្តទុកដាក់ គោរព​ឱ្យ​បាន​ខ្ជាប់ខ្ជួន​ក្រម​ប្រតិបត្តិ​វិជ្ជាជីវៈ និង​ក្រមសីលធម៌​វិជ្ជាជីវៈ​មគ្គុទ្ទេសក៍​ទេសចរណ៍ ធានា​បាន​​ការ​លើក​កម្ពស់​កិត្យានុភាព​ជាតិ​លើ​ឆាក​អន្តរជាតិ ប្រកប​ដោយ​និរន្តរភាព និង​រួមចំណែក​ដល់​កិច្ច​អភិវឌ្ឍន៍​វិស័យ​ទេសចរណ៍។ ការ​គោរព​នេះ នឹង​ធានា​បាន​នូវ​ការ​លើក​កម្ពស់​កិត្យានុភាព​ជាតិ​លើ​ឆាក​អន្តរជាតិ ប្រកប​ដោយ​និរន្តរភាព និង​រួមចំណែក​ដល់​កិច្ច​អភិវឌ្ឍន៍​វិស័យ​ទេសចរណ៍។

លោកស្រី វណ្ណ សេរី​រ័ត្ន អនុរដ្ឋលេខាធិការ​ក្រសួងទេសចរណ៍ មាន​ប្រសាសន៍​ថា ការ​អភិវឌ្ឍ​មូលធន​មនុស្ស​ក្នុង​វិស័យ​ទេសចរណ៍ ចាំបាច់​ត្រូវ​មាន​ការ​ចូលរួម​ពី​គ្រប់​តួអង្គ​ពាក់ព័ន្ធ ទាំង​ផ្នែក​រដ្ឋ និង​ឯកជន ដើម្បី​ឆ្លើយតប​បាន​ទាំង​បរិមាណ និង​គុណភាព តាម​តម្រូវការ​ជាក់ស្ដែង នៃ​ការវិវត្តន៍​វិស័យ​ទេសចរណ៍។ វគ្គ​បណ្ដុះបណ្ដាល​នេះ ជា​យន្តការ​បណ្ដុះបណ្ដាល​ក្រោម​កិច្ច​សហ​ប្រតិបត្តិការ​ជិតស្និទ្ធ​ជាមួយ​ស្ថាប័ន​ពាក់ព័ន្ធ ដើម្បី​ជំរុញ​ការ​បណ្ដុះបណ្ដាល​នៅ​នឹង​កន្លែង ជូន​ដល់​សិក្ខាកាម​មាន​ជំនាញ​ស្រាប់។

លោកស្រី Zhong Jie ទីប្រឹក្សា​សេដ្ឋកិច្ច និង​ពាណិជ្ជកម្ម និង​ជា​អគ្គ​ទីប្រឹក្សា​អម​ស្ថានទូត​ចិន​ប្រចាំ​កម្ពុជា បាន​ឱ្យ​ដឹង​ថា វគ្គ​បណ្ដុះបណ្ដាល​នេះ​មាន​រយៈពេល ១០ ថ្ងៃ ដោយ​មាន​គ្រូ​អ្នក​ជំនាញ​ចិន​ដែល​មាន​ជំនាញ​វិជ្ជាជីវៈ​កម្រិត​ខ្ពស់ ចំនួន ៣ រូប មកពី​សាកលវិទ្យាល័យ និង​សមាគម​ទេសចរណ៍​ផ្សេងៗ គ្នា នៅ​ក្នុង​ខេត្ត​យូ​ណាន។ សម្រាប់​ប្រធានបទ​សំខាន់ នៃ​វគ្គ​បណ្ដុះបណ្ដាល​នេះ ផ្ដោត​លើ​ផែនការ​យុទ្ធសាស្ត្រ​អភិវឌ្ឍន៍​ទេសចរណ៍​ប្រកប​ដោយ​ចីរភាព ការ​អភិវឌ្ឍ​អេកូ​ទេសចរណ៍ សីលធម៌ និង​វិជ្ជាជីវៈ​សេវាកម្ម​ទេសចរណ៍ និង​ការ​ប្រាស្រ័យ​ទាក់ទង​គ្នា​ឆ្លង​វប្បធម៌។

សូម​ជម្រាប​ថា វគ្គ​បណ្ដុះបណ្ដាល​នេះ រៀបចំ​ឡើង​ដោយ​វិទ្យាស្ថាន​វិជ្ជាជីវៈ​ពាណិជ្ជកម្ម​អន្តរជាតិ​ខេត្ត​យូ​ណាន សហការ​ជាមួយ​ស្ថានទូត​ចិន​ប្រចាំ​កម្ពុជា និង​ក្រសួងទេសចរណ៍ ដោយ​មាន​មគ្គុទ្ទេសក៍​ទេសចរណ៍​ភាសា​ចិន​ចូលរួម​ជា​សិក្ខាកាម​ចំនួន ៥០ នាក់៕

អត្ថបទ ៖ គឿនវេត

The post អាជ្ញាធរខេត្តសៀមរាប ជំរុញដល់មគ្គុទ្ទេសក៍ទេសចរណ៍ ត្រូវគោរពឱ្យបានខ្ជាប់ខ្ជួន ក្រមសីលធម៌វិជ្ជាជីវៈ appeared first on Kampuchea Thmey Daily.

នៅលើការបង្ហោះលើបណ្តាញសង្គមហ្វេសប៊ុក លោក យឿន យឿត បានចោទជាសំណួរចំនួន ៤។ ទី១ ករណីដែលថៃបានចាញ់ក្តីប្រាសាទព្រះវិហារឆ្នាំ១៩៦២ តែនៅតែបន្តអះអាងថាតុលាការកាត់ក្តីឱ្យតែប្រាសាទ ប៉ុន្តែដីបរិវេណប្រាសាទមិនបានកាត់ក្តីថាឱ្យកម្ពុជាទេ។ តើការអះអាងបែបហ្នឹងគេហៅថាមានក្រមសីលធម៌ទេ? ទី២ ជុំវិញករណី ថៃ ប្រើផែនទីឯកតោភាគី គូសយកប្រាសាទតាមាន់ធំ តាមាន់តូច តាក្របី និង មុំបី នៅខេត្តព្រះវិហារ ទាំងដែលផែនទីដែលមានការទទួលស្គាល់ជាអន្តរជាតិបង្ហាញថាជាទឹកដីខ្មែរ។ លោកថា ៖ “លួចគេ យករបស់គេហ្នឹងត្រឹមត្រូវតាមសីលប្រាំ ឬមានសីលធម៌ទេ?”។

ចំណុចទី៣ លោកចោទសួរថា ថៃ បង្ហោះដ្រូន និងស៊ើបការណ៍ពីកងទ័ពខ្មែរ ហើយទាហានថៃក៏បានលបចូលទឹកដីខ្មែរ សម្លាប់ទាហានខ្មែរម្នាក់បាត់បង់ជីវិតលើទឹកដីកម្ពុជាទៀត តើទង្វើបែបហ្នឹង គេហៅថាមានសីលធម៌ទ? ទី៤ នៅពេលមានបញ្ហាកើតឡើង ភាគីថៃ មិនបានទទួលស្គាល់កំហុង បែរជាចោទប្រកាន់ និងទម្លាក់កំហុសមកលើកម្ពុជាជាច្រើនករណី បង្ខូចកេរ្តិ៍ឈ្មោះកម្ពុជា ហើយចាត់ទុកថាខ្លួនឯងជាជនរងគ្រោះទៅវិញ។ លោក យឿន យឿត ថា តើនេះមានសីលធម៌ទេ?

សូមរម្លឹកថា ជម្លោះព្រំដែនកម្ពុជា  និងថៃ កើតកើតឡើងម្តងទៀត បន្ទាប់ពីមានការឈ្លានពានយ៉ាងគឃ្លើនពីទាហានថៃ កាលពីថ្ងៃទី២៨ ខែឧសភា ឆ្នាំ២០២៥ នៅខេត្តព្រះវិហារ ថែមទាំងបាញ់សម្លាប់ទាហានខ្មែរម្នាក់ស្លាប់ទៀតផង។ ក្រោយពីមានរឿងនេះ ថៃ មិនបានទទួលស្គាល់កំហុសខ្លួនទេ ហើយព្យាយាមចោទប្រកាន់មកប្រទេសកម្ពុជាទៀត។ បើគិតពីពេលកើតហេតុ ដល់បច្ចុប្បន្ន មានរយៈពេលមួយខែជាងហើយរវាងជម្លោះព្រំដែន កម្ពុជា និងថៃ នេះ ប៉ុន្តែនៅមិនទាន់អាចដោះស្រាយបញ្ហាបានឡើយ ហើយថៃ បានប្រកាសដាច់ខាត ថាខ្លួនមិនចូលខ្លួនទៅតុលាការយុត្តិធម៌អន្តរជាតិ ICJ ឡើយ៕

The post លោក យឿន យឿត៖ តើការគេចវេសមិនព្រមដោះស្រាយតាមច្បាប់ អាចចាត់ទុកថាក្បត់សីលធម៌ទេ? appeared first on Kampuchea Thmey Daily.

ការព្រមាននេះ បន្ទាប់ពីក្រសួងបានកត់សម្គាល់ឃើញថា អ្នកផលិតមាតិកាផ្សព្វផ្សាយតាមបណ្តាញទំនាក់ទំនង សង្គម និងអ្នកប្រើប្រាស់បណ្តាញសង្គមមួយចំនួន បានផលិតខ្លឹមសារដោយបំពានលើក្រមសីលធម៌ និង ផ្សព្វផ្សាយនៅលើបណ្តាញទំនាក់ទំនងសង្គមដោយប្រើប្រាស់វិធីសាស្ត្រមិនស្មោះត្រង់ និងបំពានលើសិទ្ធិ សេចក្តីថ្លៃថ្នូររបស់អ្នកដទៃ ឬប្រើប្រាស់ពាក្យពេចន៍អសុរោះ ដើម្បីទាក់ទាញការចាប់អារម្មណ៍ និងលក់ផលិតផលរបស់ខ្លួនដាច់ដោយមិនមានការគិតគូរដល់សីលធម៌សង្គម។ នេះបើយោងតាមសេចក្តីណែនាំរបស់ក្រសួងព័ត៌មាន ជូនដល់អ្នកផលិតមាតិកាផ្សព្វផ្សាយតាមបណ្តាញទំនាក់ទំនងសង្គម ចុះថ្ងៃទី ២៨ ខែកុម្ភៈ ឆ្នាំ ២០២៥ ។

សេចក្តីណែនាំសង្កត់ធ្ងន់ថា៖«ក្រសួងនឹងមានវិធានការផ្លូវច្បាប់ចំពោះអ្នកដែលផលិតមាតិកាមិនសមរម្យ ប្រាស់ចាក ក្រមសីលធម៌ និងប្រពៃណី ទំនៀមទម្លាប់ វប្បធម៌ជាតិ និងប៉ះពាល់ដល់សីលធម៌សង្គម»។

ដើម្បីចូលរួមលើកកម្ពស់សីលធម៌សង្គម ក្រសួងព័ត៌មានសូមធ្វើការណែនាំដល់អ្នកផលិតមាតិកា ផ្សព្វផ្សាយតាមបណ្តាញសង្គម និងអ្នកប្រើប្រាស់បណ្តាញទំនាក់ទំនងសង្គម ត្រូវបញ្ឈប់ជាបន្ទាន់នូវការប្រើ វិធីសាស្រ្តលេងសើច (Prank) មកផលិតមាតិការបស់ខ្លួនដើម្បីលក់ផលិតផលឱ្យដាច់ ឬទាញការចាប់ អារម្មណ៍មកលើខ្លួន ដែលបង្កផលប៉ះពាល់ដល់កិត្តិយស សេចក្តីថ្លៃថ្នូរ សិទ្ធិរបស់អ្នកដទៃ និងប្រពៃណី ទំនៀមទម្លាប់ វប្បធម៌ជាតិ។

ក្រសួងព័ត៌មានគូសបញ្ជាក់ថា ទង្វើបែបនេះមិនមែនជាភាពស្មោះត្រង់ក្នុងការផលិតមាតិកាទេ ប៉ុន្តែជាការ បង្កើតមាតិកាដោយខ្វះក្រមសីលធម៌ ខ្វះការទទួលខុសត្រូវ ព្រមទាំងបានបង្កើតឱ្យមានការយល់ច្រឡំ និងប៉ះពាល់ធ្ងន់ធ្ងរដល់កិត្តិយស និងសេចក្តីថ្លៃថ្នូររបស់បុគ្គល និងសីលធម៌សង្គម។

ការផលិតមាតិកាបែបលេងសើច (Prank) ដែលធ្វើឱ្យប៉ះពាល់ដល់សេចក្តីថ្លៃថ្នូរ និងកិត្តិយសអ្នកដទៃ មិនត្រូវបានលើកទឹកចិត្តឡើយ។ ការប៉ះពាល់សេចក្តីថ្លៃថ្នូរ និងកិត្តិយសរបស់អ្នកដទៃជាការបំពានច្បាប់ និងអាចជាកម្មវត្ថុនៃបណ្តឹងរបស់អ្នកដែលទទួលរងផលប៉ះពាល់។ នេះបើតាមក្រសួងព័ត៌មាន។

ការព្រមាន និងចេញសេចក្តីណែនាំ បន្ទាប់ពីអ្នកផលិតមាតិកាដើម្បីលក់ផលិតផល កាលពីពេលថ្មីៗនេះ បានផលិតមាតិកា Prank ទៅលើក្មេងស្រីលក់សណ្តែកដី ដោយធ្វើឱ្យកំពប់សណ្តែកដី។ តាមរយៈវីដេអូ Prank ដែលបានចែកចាយនៅលើបណ្តាញសង្គមនោះ បង្ហាញទឹកមុខក្មេងស្រីដ៏ក្រៀមក្រំ ទឹកភ្នែករលីងរលោង និយាយអ្វីមិនចេញឡើយ។ លើសពីនេះ វីដេអូ Prank មួយនេះក៏ត្រូវបានរងការរិះគន់យ៉ាងចាស់ដៃពីសំណាក់អ្នកលេងបណ្តាញសង្គមហ្វេសប៊ុក ដោយបន្ថែមថា ការផលិតមាតិកានេះធ្វើឱ្យប៉ះពាល់សេចក្តីថ្លៃថ្នូរក្មេងស្រី និងប៉ះពាល់ដល់អ្នកក្រផងដែរ។

ក្នុងន័យនេះ ក្រសួងសូមអំពាវនាវ ដល់បងប្អូនសាធារណជនកុំចែករំលែកបន្តនូវខ្លឹមសារដែលមិនមានក្រមសីលធម៌ និងបំពានដល់សេចក្តីថ្លៃថ្នូរ និងកិត្តិយសរបស់អ្នកដទៃ និងចូលរួមទប់ស្កាត់ព័ត៌មានក្លែងក្លាយ និងមាតិកាបែបបំពុលសង្គមទាំងអស់គ្នា។

ជាមួយគ្នានេះ ក្រសួងព័ត៌មានសូមលើកទឹកចិត្ត និងកោតសរសើរចំពោះអ្នកផលិតមាតិកាតាមបណ្តាញទំនាក់ទំនងសង្គមភាគច្រើនដែលបានគោរពក្រមសីលធម៌ រក្សាបាននូវសេចក្តីថ្លៃថ្នូរ និងគោរពសិទ្ធិអ្នកដទៃ និងផ្តល់ព័ត៌មានពិត និងត្រឹមត្រូវជូនដល់សាធារណជន៕

The post ក្រោយ Prank លើក្មេងស្រីលក់សណ្តែកដី ក្រសួងព័ត៌មាន ព្រមានចាត់វិធានការផ្លូវច្បាប់អ្នកផលិតមាតិកា មិនសមរម្យ appeared first on Kampuchea Thmey Daily.

ថ្លែងនៅ​ក្នុង​ពិធី​រៀបចំសិក្ខាសាលា ស្តីពីការអភិវឌ្ឍន៍វិជ្ជាជីវៈ​គ្រូពេទ្យ​ នៅ​ថ្ងៃទី២១ ខែកុម្ភៈ ឆ្នាំ២០២៥​ លោក​វេជ្ជបណ្ឌិត ញ៉ែម ពីង ប្រធានក្រុមប្រឹក្សាគណៈគ្រូពេទ្យខេត្តកំពង់ធំ បាន​លើក​ឡើង​​ទៀត​ថា ចំពោះ​សកម្មភាព​របស់ក្រុមប្រឹក្សាគណៈគ្រូពេទ្យខេត្តកំពង់ធំ ដែល​បាន​អនុវត្តក្នុងពេលកន្លងមកនេះ គឺ​តាម​ការ​ណែនាំ និងចង្អុលបង្ហាញពី គណៈគ្រូពេទ្យជាតិកម្ពុជា​។ ក្នុងនោះការជំរុញនូវការចុះបញ្ជី និងផ្តល់អាជ្ញា ក៏ជាផ្នែកដែលមានសារសំខាន់ ដើម្បីពង្រឹងវិជ្ជាជីវៈ និងបង្កើនសកម្មភាព ប្រសិទ្ធភាព ជូនដល់ប្រជាពលរដ្ឋគ្រប់ទីកន្លែង។

លោកបញ្ជាក់ថា កាលពី​ឆ្នាំ២០២៣ អាជ្ញាប័ណ្ណ​ទទួល​បាន​ពី​ថ្នាក់​ជាតិ​មាន​ចំនួន ១០៥ អាជ្ញាប័ណ្ណ ស្រី១៦ នៅឆ្នាំ២០២៤ បានទទួលសរុប ១០០ អាជ្ញាប័ណ្ណ ស្រី១២ និង ឆ្នាំ២០២៥ បានទទួលសរុប ១៣ អាជ្ញាប័ណ្ណ ស្រី៣ ផងដែរ។

ជា​មួយ​គ្នា​នេះ លោក​វេជ្ជបណ្ឌិត ប៉ឹក គីមសាន អនុប្រធានមន្ទីរសុខាភិបាលខេត្តកំពង់ធំ លើកឡើងថា ដើម្បី​ឱ្យវិជ្ជាជីវៈក្រុមគ្រូពេទ្យកាន់មានប្រសិទ្ធភាព ក្នុង​ការ​បម្រើ​ពលរដ្ឋ​ផ្នែកសេវាសុខាភិបាល ក្នុង​នោះ​អ្នក​ពាក់ព័ន្ធគ្រប់ផ្នែកត្រូវ ពង្រឹង​កិច្ចសហប្រតិបត្តិការរវាងគណៈវិជ្ជាជីវៈសុខាភិបាលទាំងអស់ ជា​មួយ​ភាគី​ពាក់ព័ន្ធ​នានា និង គ្រប់កម្រិត នៅថ្នាក់ជាតិ រាជធានី ខេត្ត និងថ្នាក់មូលដ្ឋាន ទាំងមន្ទីរពេទ្យ និងមណ្ឌលសុខភាពរដ្ឋ និងឯកជន , ពង្រឹងតួនាទី និងភារកិច្ចដើម្បីធានាបាននូវក្រមសីលធម៌, វិន័យ និង វិធីសាស្ត្រ ក្នុង ការបំពេញការងារ , ចូលរួមពង្រឹងការអនុវត្តច្បាប់ និងបទបញ្ញតិនានា ទាំងផ្នែកសាធារណៈ និងឯកជន ដើម្បីធានាគុណភាព សុវត្ថិភាពសេវាសុខាភិបាល , ពង្រឹងសមត្ថភាពទាំងស្ថាប័ន វិជ្ជាជីវៈមុនពេលបម្រើការងារ និងពេលកំពុងបម្រើការងារ ភារកិច្ច ដោយប្រកាន់ខ្ជាប់នូវស្មារតី យុត្តិធម៌ក្រមសីលធម៌ និងមានសមធម៌ ផងដែរ៕

The post ការអភិវឌ្ឍន៍វិជ្ជាជីវៈ​គ្រូពេទ្យ​ នឹង​ជំរុញ​ឱ្យ​គ្រូពេទ្យ​បង្កើន​ក្រម​សីលធម៌​វិជ្ជាជីវៈ appeared first on Kampuchea Thmey Daily.

អ្នកនាំពាក្យក្រសួងព័ត៌មានរូបនេះ បានសង្កត់ធ្ងន់ថា ទាំងនេះសុទ្ធសឹងជាទង្វើដែលអ្នកសារព័ត៌មាន មិនត្រូវធ្វើដាច់ខាត ព្រោះជាទង្វើប្រាសចាកពីក្រមសីលធម៌វិជ្ជាជីវៈសារព័ត៌មាន ដែលតាមរយៈនេះ លោក បានជំរុញអ្នកសារព័ត៌មានអាជីពត្រូវគោរពក្រមសីលធម៌វិជ្ជាជីវៈដើម្បីទទួលបានជំនឿទុកចិត្ត និងសង្គមផ្តល់តម្លៃ។

លោក ទេព អស្នារិទ្ធ បានលើកឡើងថា គេបានសង្កេតឃើញទង្វើបំពានក្រមសីលធម៌វិជ្ជាជីវៈ បានកើតឡើងជារឿយៗក្នុងសង្គមកម្ពុជាទាំងក្នុងអតីតកាល និងបច្ចុប្បន្ន ដោយសារតែការធ្វេសប្រហែស ខ្វះការយកចិត្តទុកដាក់ ជាពិសេសគឺការអនុវត្តការងារដោយខ្វះការទទួលខុសត្រូវ មិនបានប្រកាន់ខ្ជាប់នូវវិន័យការងារ ភាពថ្លៃថ្នូរក្នុងអាជីព និងការមិនគោរពក្រមសីលធម៌ក្នុងចំណោមអ្នកសារព័ត៌មានមួយចំនួន។ អ្នកនាំពាក្យរូបនេះ បានគូសបញ្ជាក់ថា ទង្វើទាំងនេះបានធ្វើឱ្យតម្លៃរបស់អ្នកសារព័ត៌មានដែលបានបំពានក្រមសីលធម៌នោះធ្លាក់ចុះ ហើយមិនតែប៉ុណ្ណោះវាប៉ះពាល់ដល់តម្លៃអ្នកសារព័ត៌មានផ្សេងទៀតដែលជាអ្នកគោរពក្រមសីលធម៌វិជ្ជាជីវៈ និងជះឥទ្ធិពលអាក្រក់ដល់អាជីពសារព័ត៌មានទាំងមូលទៀតផង។

អ្នកនាំពាក្យក្រសួងព័ត៌មាន បានបន្តថា គ្រប់ការប្រកបវិជ្ជាជីវៈការងារទាំងអស់ រួមទាំងអាជីពសារព័ត៌មានផងសុទ្ធតែមានក្រមសីលធម៌ដែលអ្នកប្រកបអាជីពនោះត្រូវប្តេជ្ញាចិត្តគោរព និងអនុវត្តតាម ដើម្បីធានាភាពត្រឹមត្រូវស្របច្បាប់ និងសុច្ចរឹតភាពក្នុងសង្គម ព្រមទាំងលើកកម្ពស់តម្លៃវិជ្ជាជីវៈ។ លោក ទេព អស្នារិទ្ធ បានថ្លែងសង្កត់ធ្ងន់ថា ក្នុងន័យនេះ អ្នកសារព័ត៌មាន មានសិទ្ធិសេរីភាពពេញលេញ ក្នុងការចុះយក និងផ្សព្វផ្សាយព័ត៌មាន ប៉ុន្តែការអនុវត្តសិទ្ធិសេរីភាពនោះត្រូវផ្សារភ្ជាប់ជាមួយនឹងទំនួលខុសត្រូវ កាតព្វកិច្ចជាអ្នកសារព័ត៌មាន និងការប្រតិបត្តិតាមក្រមសីលធម៌វិជ្ជាជីវៈឱ្យបានត្រឹមត្រូវ។

លោក ថា សូមចងចាំថា អ្នកសារព័ត៌មានមានកាតព្វកិច្ចធានាថាការផ្សព្វផ្សាយរបស់ខ្លួន មិនបំពានសិទ្ធិបុគ្គល មិនបង្កព្យសនកម្ម មិនបង្ខូចកេរ្តិ៍ឈ្មោះនិងសេចក្តីថ្លៃថ្នូររបស់អ្នកដទៃ។ ជាងនេះទៀត អ្នកសារព័ត៌មានមានទំនួលខុសត្រូវក្នុងការធានាថាការផ្សព្វផ្សាយរបស់ខ្លួន មិនបង្កមហន្តរាយដល់សណ្តាប់ធ្នាប់សាធារណៈ មិនបង្កហានិភ័យប៉ះពាល់ដល់ស្ថិរភាពក្នុងសង្គម និងសន្តិសុខជាតិ។ អ្នកសារព័ត៌មានត្រូវគោរព ស្រលាញ់ ផ្តល់តម្លៃដល់អាជីពរបស់ខ្លួន និងចូលរួមការពារតម្លៃអ្នកដែលប្រកបអាជីពដូចគ្នា ព្រមទាំងលើកតម្កើងវិជ្ជាជីវៈសារព័ត៌មានកម្ពុជាឱ្យកាន់តែរីកចម្រើន។

ដោយឈរលើស្មារតីនៃលទ្ធផលសិក្ខាសាលាស្តីពីការតម្រង់ទិសលើក្រមសីលធម៌វិជ្ជាជីវៈសារព័ត៌មានកាលពីថ្ងៃទី១៩ ខែមេសា ឆ្នាំ២០២៤ រៀបចំដោយក្រសួងព័ត៌មាន លោក ទេព អស្នារិទ្ធ បានអំពាវនាវដោយគូសបញ្ជាក់បន្ថែមថាការគោរពក្រមសីលធម៌ក្នុងការប្រកបវិជ្ជាជីវៈសារព័ត៌មានមានសារៈសំខាន់ណាស់ ដែលចាំបាច់ទាមទារឱ្យអ្នកប្រកបអាជីពសារព័ត៌មានគ្រប់រូប ត្រូវប្រកាន់ខ្ជាប់ដាច់ខាតក្នុងការអនុវត្តការងាររបស់ខ្លួនប្រចាំថ្ងៃប្រកបដោយការទទួលខុសត្រូវ ដើម្បីជាមូលដ្ឋានរឹងមាំក្នុងការលើកកម្ពស់តម្លៃវិជ្ជាជីវៈសារព័ត៌មាន និងកសាងបន្ថែមនូវទំនុកចិត្តរបស់ប្រជាពលរដ្ឋ៕

The post អ្នកនាំពាក្យ៖ ការផ្សាយព័ត៌មានដោយបង្ហាញរូបភាពសោកនាដកម្មមិនបិទបាំង គឺប៉ះពាល់ដល់សិទ្ធិឯកជនភាព appeared first on Kampuchea Thmey Daily.

ការអំពាវនាវរបស់ក្រុមនិពន្ធនាយកសារព័ត៌មានពេលនេះ ក្រោយសង្កេតឃើញថា មានអ្នកសារព័ត៌មានមួយចំនួននៅតែមិនទាន់អនុវត្តនូវក្រមសីលធម៌វិជ្ជាជីវៈសារព័ត៌មានឱ្យបានត្រឹមត្រូវនៅឡើយ ដែលនាំឱ្យប៉ះពាល់ដល់វិស័យសារព័ត៌មាននៅកម្ពុជា។ ដោយឃើញបែបនេះហើយ ទើបក្រុមនិពន្ធនាយកសារព័ត៌មាននៅកម្ពុជា តាមរយៈក្លិបអ្នកកាសែតកម្ពុជា បានបើកវេទិកាជួបពិភាក្សាគ្នា នៅថ្ងៃទី២១ ខែធ្នូ ឆ្នាំ២០២៣នេះ ដោយបានផ្ដោតការពិភាក្សាលើក្រមសីលធម៌ និងវិជ្ជាជីវៈរបស់អ្នកសារព័ត៌មាន។

ក្រោយពីបានពិភាក្សាយ៉ាងផុលផុសរួចហើយ អង្គវេទិកានិពន្ធនាយកសារព័ត៌មានកម្ពុជា បានសម្រេចចេញសេចក្ដីថ្លែងរួមមួយ ដែលក្នុងគោលបំណងដើម្បីពង្រឹងក្រមសីលធម៌ និងវិជ្ជាជីវៈវិស័យសារព័ត៌មាននៅកម្ពុជា។​ តាមរយៈសេចក្ដីថ្លែងការណ៍នេះ ក្រុមនិពន្ធនាយកកម្ពុជា បានចាត់ទុកការពង្រឹងក្រមសីលធម៌វិជ្ជាជីវៈសារព័ត៌មាន គឺជាមូលដ្ឋានគ្រឹះកាន់តែមានសារសំខាន់សម្រាប់ការប្រតិបត្តិវិជ្ជាជីវៈសារព័ត៌មាននៅក្នុងការងារប្រចាំថ្ងៃ ក៏ដូចជាការលើកស្ទួយតម្លៃរបស់អ្នកសារព័ត៌មាន និងជំនឿរបស់មហាជនមកលើសារព័ត៌មាន ជាពិសេសក្នុងបរិបទនៃការរីកដុះដាលខ្លាំងនៃសារព័ត៌មានឌីជីថល ។

ដើម្បីពង្រឹងការអនុវត្តក្រមសីលធម៌វិជ្ជាជីវៈសារព័ត៌មានប្រកបដោយប្រសិទ្ធភាព ក្រុមនិពន្ធនាយកសារព័ត៌មានកម្ពុជា បានអំពាវនាវជាថ្មីម្តងទៀតដល់អ្នកសារព័ត៌មានទាំងអស់ ជាពិសេសអ្នកដែលទើបចូលបំពេញការងារក្នុងវិស័យសារព័ត៌មាន គប្បីយកចិត្តទុកដាក់ក្នុងការសិក្សាស្រាវជ្រាវ ឬក៏ចូលរួមក្នុងវគ្គបណ្តុះបណ្តាលវិជ្ជាជីវៈសារព័ត៌មាន និងក្រមសីលធម៌ បើសិនជាពួកគេមានបំណងចង់ក្លាយជាអ្នកសារព័ត៌មានអាជីព ហើយទទួលបានការគាំទ្រពីសាធារណជន។

បើតាមក្រុមនិពន្ធនាយក ការបណ្តុះបណ្តាល អប់រំ ផ្សព្វផ្សាយអំពីក្រមសីលធម៌វិជ្ជាជីវៈសារព័ត៌មាន នៅតែជាបញ្ហាស្នូលសម្រាប់អ្នកសារព័ត៌មាន ព្រោះស្ថាប័ន និងអ្នកសារព័ត៌មាន ហាក់មានកំណើនជាបន្តបន្ទាប់ ប៉ុន្តែមិនទាន់ទទួលបានការបណ្តុះបណ្តាលច្បាស់លាស់នៅឡើយ ដែលជាហេតុធ្វើឱ្យកំហុសឆ្គងលើវិជ្ជាជីវៈ និងក្រមសីលធម៌ងាយនឹងកើតឡើង៕

The post ក្រុមនិពន្ធនាយក បន្តជំរុញឱ្យអ្នកប្រឡូកក្នុងវិស័យព័ត៌មានចូលរួមវគ្គបណ្ដុះបណ្ដាលក្រមសីលធម៌ appeared first on Kampuchea Thmey Daily.

«ក្រមសីលធម៌ និងវិជ្ជាជីវៈ» នៅតែជាប្រធានបទក្ដៅសម្រាប់កិច្ចពិភាក្សារបស់វេទិកានិពន្ធនាយកសារព័ត៌មានកម្ពុជា លើកទី២០ ឆ្នាំនេះ ហើយការលើកយកប្រធានបទនេះមកពិភាក្សាពេលនេះ ដោយហេតុអង្គវេទិកា យល់ឃើញថា ក្រមសីលធម៌ គឺជាមូលដ្ឋានគ្រឹះដ៏សំខាន់សម្រាប់ការប្រតិបត្តិវិជ្ជាជីវៈសារព័ត៌មានក្នុងការងារប្រចាំថ្ងៃ។ ក្រោយពីបានពិភាក្សាយ៉ាងផុលផុស អង្គវេទិកានិពន្ធនាយកសារព័ត៌មានកម្ពុជា ក៏បានអនុម័តសេចក្តីថ្លែងការណ៍រួម ដែលមាន៩ចំណុច ដូចខាងក្រោម៖

១. មកដល់ពេលនេះការពង្រឹងក្រមសីលធម៌វិជ្ជាជីវៈសារព័ត៌មានកាន់តែមានសារសំខាន់ក្នុងការលើកស្ទួយតម្លៃរបស់អ្នកសារព័ត៌មាន និងជំនឿរបស់មហាជនមកលើសារព័ត៌មាន ជាពិសេសក្នុងបរិបទនៃការរីកដុះដាលខ្លាំងនៃសារព័ត៌មាន ឌីជីថល។ ២. ដើម្បីពង្រឹងការអនុវត្តក្រមសីលធម៌វិជ្ជាជីវៈសារព័ត៌មានប្រកបដោយប្រសិទ្ធភាព ក្លិបអ្នកកាសែតកម្ពុជា និងសមាគមអ្នកសារព័ត៌មាននានា ត្រូវសហការជាមួយក្រសួងពាក់ព័ន្ធ ដើម្បីបង្កើតក្រុមប្រឹក្សាក្រមសីលធម៌វិជ្ជាជីវៈសារព័ត៌មានមួយ ដែលមានមុខងារច្បាស់លាស់ក្នុងការតម្រង់ទិស ដាក់ពិន័យ ក៏ដូចជាកែលម្អវិជ្ជាជីវៈសារព័ត៌មាន។

៣.ការបណ្តុះបណ្តាល អប់រំ ផ្សព្វផ្សាយអំពីក្រមសីលធម៌វិជ្ជាជីវៈសារព័ត៌មាន នៅតែជាបញ្ហាស្នូលសម្រាប់អ្នកសារព័ត៌មាន ព្រោះស្ថាប័ន និងអ្នកសារព័ត៌មាន ហាក់មានកំណើនជាបន្តបន្ទាប់ ប៉ុន្តែមិនទាន់ទទួលបានការបណ្តុះបណ្តាលច្បាស់លាស់ ដែលជាហេតុធ្វើឱ្យកំហុសឆ្គងលើវិជ្ជាជីវៈ និងក្រមសីលធម៌ងាយនឹងកើតឡើង។

៤. វេទិកានិពន្ធនាយកសារព័ត៌មានកម្ពុជា បានអំពាវនាវជាថ្មីម្តងទៀតដល់អ្នកសារព័ត៌មានទាំងអស់ ជាពិសេសអ្នកដែលទើបចូលបំពេញការងារក្នុងវិស័យសារព័ត៌មាន គប្បីយកចិត្តទុកដាក់ក្នុងការសិក្សាស្រាវជ្រាវ ឬ ក៏ចូលរួមក្នុងវគ្គបណ្តុះ បណ្តាលវិជ្ជាជីវៈ និងក្រមសីលធម៌សារព័ត៌មាន បើសិនជាពួកគេមានបំណងក្លាយជាអ្នកសារព័ត៌មានអាជីព ហើយទទួលបានការគាំទ្រពីសាធារណជន។ ៥. ដើម្បីឱ្យការអនុវត្តក្រមសីលធម៌វិជ្ជាជីវៈសារព័ត៌មានប្រកបដោយប្រសិទ្ធភាពនោះ គប្បីយកក្រមសីលធម៌នៃវិជ្ជាជីវៈសារព័ត៌មាន ដែលត្រូវបានចងក្រងដោយក្លិបអ្នកកាសែតកម្ពុជា មកធ្វើជាក្រមសីលធម៌វិជ្ជាជីវៈសារព័ត៌មាន ជាគោលមួយសម្រាប់ការអនុវត្តជាទូទៅនៅក្នុងសហគមន៍សារព័ត៌មាន។

៦. បន្ទាប់ពីវេទិកានិពន្ធនាយកសារព័ត៌មានកម្ពុជា លើកទី២០ បិទបញ្ចប់ ក្លិបអ្នកកាសែតកម្ពុជា គួរបន្តដើរតួនាទីស្នូលជាអ្នកសម្របសម្រួល និងពិគ្រោះយោបល់ជាមួយភាគីពាក់ព័ន្ធទាំងអស់ ដើម្បីពិនិត្យលទ្ធភាពរៀបចំបង្កើតក្រុមប្រឹក្សាក្រមសីលធម៌វិជ្ជាជីវៈសារព័ត៌មានមួយឱ្យបានឆាប់នាពេលខាងមុខ។

៧. វេទិកានេះ សូមអំពាវនាវដល់សមាគមអ្នកសារព័ត៌មាន និងអ្នកសារព័ត៌មានទាំងអស់ចូលរួមគាំទ្រដល់គម្រោងបង្កើតក្រុមប្រឹក្សាក្រមសីលធម៌សារព័ត៌មាន ដើម្បីឱ្យប្រព្រឹត្តទៅដោយរលូន និងប្រកបដោយប្រសិទ្ធភាព ព្រោះថាវាពិតជាមានសារសំខាន់ណាស់សម្រាប់ការលើកកម្ពស់គុណភាពវិជ្ជាជីវៈរបស់អ្នកសារព័ត៌មានទាំងអស់ឱ្យទទួលបាននូវការគោរព ផ្តល់តម្លៃពីសាធារណជន និងអាជ្ញាធរគ្រប់មជ្ឈដ្ឋាន។

៨. សូមថ្លែងអំណរគុណយ៉ាងជ្រាលជ្រៅចំពោះក្រសួងព័ត៌មានដែលតែងតែគាំទ្រនូវរាល់គំនិតផ្តួចផ្តើមផ្សេងៗរបស់វេទិកានិពន្ធនាយកសារព័ត៌មានកម្ពុជា ដែលជាប្រយោជន៍របស់អ្នកសារព័ត៌មាន លើការពង្រឹងក្រមសីលធម៌វិជ្ជាជីវៈ ជាពិសេសគំនិតផ្តួចផ្តើមស្តីពីការបង្កើតក្រុមប្រឹក្សាក្រមសីលធម៌វិជ្ជាជីវៈសារព័ត៌មាន។

៩. អង្គវេទិកា បានគោរពថ្លែងអំណរគុណជាអនេកប្បកាចំពោះសម្តេចតេជោ ហ៊ុន សែន និងសម្តេចធិបតី ហ៊ុន ម៉ាណែត ដែលតែងតែផ្តល់តម្លៃដល់វេទិកានិពន្ធនាយកសារព័ត៌មានកម្ពុជា ដោយបានយកឱកាសនេះចេញសារលិខិតផ្ញើជូន ចាងហ្វាង និពន្ធនាយក ក៏ដូចជាអ្នកប្រកបអាជីពវិជ្ជាជីវៈសារព័ត៌មានទាំងអស់នៅកម្ពុជា៕

The post វេទិកានិពន្ធនាយកសារព័ត៌មានកម្ពុជា ចេញសេចក្ដីថ្លែងរួម៩ចំណុច សំដៅពង្រឹងក្រមសីលធម៌វិជ្ជាជីវៈ appeared first on Kampuchea Thmey Daily.

វេទិកានិពន្ធនាយកសារព័ត៌មានកម្ពុជា ដែលរៀបចំឡើងដោយក្លិបអ្នកកាសែតកម្ពុជា ប្រព្រឹត្តទៅនៅព្រឹកថ្ងៃទី២១ ខែធ្នូ ឆ្នាំ២០២៣នេះ ក្រោមប្រធានបទ៖ «ក្រមសីលធម៌ និងវិជ្ជាជីវៈសារព័ត៌មាន»។ តាមរយៈប្រធានបទនេះ បានផ្តល់ឱកាសដល់នាយកគ្រប់គ្រង និពន្ធនាយក ឬអ្នកដឹកនាំស្ថាប័នសារព័ត៌មាន ទាំងកាសែត វិទ្យុ ទូរទស្សន៍ រួមទាំងសារព័ត៌មាន អនឡាញ បានជជែកពិភាក្សាជាថ្មីម្តងទៀតពាក់ព័ន្ធនឹងបញ្ហាក្រមសីលធម៌វិជ្ជាជីវៈសារព័ត៌មាន ខណៈជាការកត់សម្គាល់ អ្នកសារព័ត៌មានមួយចំនួននៅតែមិនទាន់អនុវត្តនូវក្រមសីលធម៌វិជ្ជាជីវៈសារព័ត៌មានឱ្យបានត្រឹមត្រូវនៅឡើយ ដែលនេះនាំឱ្យប៉ះពាល់ដល់វិស័យសារព័ត៌មាននៅកម្ពុជា។ ក្នុងនោះ ក្លិបអ្នកកាសែតកម្ពុជា ក៏បានផ្ដួចផ្ដើមគំនិតឱ្យមានការបង្កើតក្រុមប្រឹក្សាក្រមសីលធម៌សារព័ត៌មានកម្ពុជា។

អញ្ជើញជាអធិបតីក្នុងវេទិកានេះ លោក នេត្រ ភក្ត្រា រដ្ឋមន្ត្រីក្រសួងព័ត៌មាន បានថ្លែងឱ្យដឹងថា ក្នុងអាណត្តិទី៧ ក្រសួងព័ត៌មាន បានដាក់ចេញទិសដៅមួយចំនួន​ដើម្បីធ្វើយ៉ាងណាឱ្យវិស័យសារព័ត៌មានកម្ពុជាមានការអភិវឌ្ឍរីកចម្រើន ស្របតាមបរិបទសង្គមបច្ចុប្បន្នក្នុងសម័យឌីជីថល ដោយក្នុងនោះ សន្តិសុខព័ត៌មាន ជាទិសដៅដ៏សំខាន់ ដែលលោកបានដាក់ចេញ។ លោក នេត្រ ភក្ត្រា​ គូសបញ្ជាក់ថា សន្តិសុខព័ត៌មាន នឹងផ្ដោតទៅលើចំណុច ៣សំខាន់ៗ គឺ ការទទួលព័ត៌មានបានគ្រប់ជ្រុងជ្រោយ គុណភាពព័ត៌មាន និងសុវត្ថិភាពព័ត៌មាន ដើម្បីធានាផ្ដល់នូវសន្តិសុខព័ត៌មានដល់ប្រជាពលរដ្ឋក្នុងបរិបទឌីជីថលនេះ។​

ទន្ទឹមនេះ ការផ្ដួចផ្ដើមឱ្យមានក្រុមប្រឹក្សាក្រមសីលធម៌សារព័ត៌មាននៅកម្ពុជា ក៏ត្រូវបានលោករដ្ឋមន្ត្រី ចាត់ទុកជាកិច្ចការចាំបាច់មួយផងដែរ ហើយលោក គាំទ្រចំពោះគំនិតផ្ដួចផ្ដើមនេះ ដោយហេតុលោក មើលឃើញថា គំនិតផ្ដួចផ្ដើមនេះ បានគិតគូដល់ផលប្រយោជន៍រួមរបស់អ្នកសារព័ត៌មាន ក៏ដូចជាការពង្រឹងលើវិស័យព័ត៌មាន ហើយក៏ជាធាតុចូលបន្ថែមក្នុងការធ្វើឱ្យប្រព័ន្ធសារព័ត៌មាននៅកម្ពុជារស់បានស្រួលទៅមុខទៀត។

ម្យ៉ាងវិញទៀតនោះ ដើម្បីឱ្យក្រមសីលធម៌វិជ្ជាជីវៈក្លាយជាគោលការណ៍រួមសម្រាប់ឱ្យអ្នកសារព័ត៌មានគោរពប្រតិបត្តិនោះ ក្រសួងព័ត៌មាន នឹងផ្ដល់សិទ្ធិដល់សមាគមសារព័ត៌មាន ក៏ដូចជាអ្នកសារព័ត៌មាន ក្នុងការរៀបចំតាក់តែងក្រមសីលធម៌វិជ្ជាជីវៈនេះដោយខ្លួនឯង ព្រោះនេះមិនមែនជាការចាប់បង្ខំ តែជាការអនុវត្តគោលការណ៍ស្ម័គ្រចិត្ត។ នេះជាការបញ្ជាក់បន្ថែមរបស់លោក នេត្រ ភក្រ្តា រដ្ឋមន្រ្តីក្រសួងព័ត៌មាន៕

The post រដ្ឋមន្ត្រីព័ត៌មាន គាំទ្រឱ្យបង្កើតក្រុមប្រឹក្សាក្រមសីលធម៌ ដើម្បីពង្រឹងក្រមសីលធម៌វិជ្ជាជីវៈរបស់អ្នកសារព័ត៌មាន appeared first on Kampuchea Thmey Daily.