ថ្លែងនៅក្នុងពិធីសម្ពោធដាក់ឲ្យប្រើប្រាស់ជាផ្លូវការ អគារខណ្ឌរដ្ឋបាលជលផលខេត្តកែប នៅក្រុងកែប ខេត្តកែប កាលពីថ្ងៃទី៩កក្កដា លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានមានប្រសាសន៍ថា គម្រោងជលផលតំបន់ឆ្នេរ និងសមុទ្រប្រកបដោយចីរភាព (SCMF ) ជាគម្រោងគាំទ្រការស្តារ និងគ្រប់គ្រងធនធានជលផលតំបន់ឆ្នេរ និងសមុទ្រប្រកបដោយចីរភាព ដើម្បីលើកកម្ពស់ជីវភាពសហគមន៍នេសាទ និងការពារប្រព័ន្ធអេកូឡូស៊ីសមុទ្រនៅខេត្តកែប។

ជាក់ស្តែងជាង៣ឆ្នាំចុងក្រោយនេះ កិច្ចខិតខំប្រឹងប្រែងរួមគ្នា ទាំងរាជរដ្ឋាភិបាល អាជ្ញាធរ មន្ត្រីជំនាញ អង្គការដៃគូ បានធ្វើឲ្យប្រព័ន្ធអេកូឡូស៊ីសមុទ្រខេត្តកែបមានសុខភាពល្អ សម្បូរដោយជីវៈចម្រុះ ពិសេសវត្តមាននៃពពួកសត្វកម្រធំៗ ដូចជាជ្រូកទឹក ផ្សោតផ្កាឈូក អណ្តើកសមុទ្រ និងសេះសមុទ្រជាដើម។

លោក ឌិត ទីណា បន្ថែមថា ការរៀបចំឲ្យមានតំបន់ការពារជលផល ការទម្លាក់ប្រអប់សិប្បនិម្មិត គឺដើម្បីការពារប្រយោជន៍យូរអង្វែង មិនមែនដើម្បីហាមឃាត់ ឬធ្វើឲ្យរំខាន់ដល់ការនេសាទរបស់ពលរដ្ឋឡើយ។ លោករដ្ឋមន្ត្រី ក៏បានស្នើដល់ប្រជានេសាទឲ្យចូលរួមគោរពច្បាប់ អភិរក្សព្រែកកោងកាង ធនធាន និងជីវៈចម្រុះទាំងនៅតាមតំបន់ឆ្នេរទឹករាក់ និងនៅបាតសមុទ្រ ពង្រឹងការកែច្នៃជលផល និងទាញយកប្រយោជន៍ ពីវិស័យទេសចរណ៍នៅតំបន់ឆ្នេរ និងតំបន់ប្រជុំកោះឲ្យបានច្រើន ដើម្បីលើកម្ពស់ជីវភាព ក៏ដូចជាជួយទ្រទ្រង់ដល់សេដ្ឋកិច្ចខេត្ត ខណៈដែលការអនុវត្តវិធានការច្បាប់ ចាប់ផ្តើមធ្វើចំពោះប្រជានេសាទដែលប្រព្រឹត្តបទល្មើស។ 

សូមបញ្ជាក់ថា គម្រោង SCMF បាននិងកំពុងអនុវត្តនៅខេត្តកែប កំពត កោះកុង និងព្រះសីហនុ ដោយមានការគាំទ្រពីធនាគារអភិវឌ្ឍន៍អាស៊ី (ADB)។ គោលបំណងសំខាន់ៗរួមមាន ស្តារធនធានត្រីនៅតំបន់ជិតឆ្នេរ ការពារស្មៅសមុទ្រ និងផ្កាថ្ម កែលម្អទីតាំងចុះចតនេសាទ លើកកម្ពស់ជីវភាព​សហគមន៍នេសាទ បង្កើនភាពធន់នឹងការប្រែប្រួលអាកាសធាតុ ជំរុញការគ្រប់គ្រងធនធានសមុទ្រប្រកបដោយចីរភាព៕

អត្ថបទ៖ សឹង រ៉ាត់

The post រដ្ឋមន្ត្រីកសិកម្ម ជំរុញប្រជានេសាទខេត្តកែបឲ្យរួមគ្នាគោរព​ច្បាប់ និងកែច្នៃធនធានជលផលដើម្បីលើកកម្ពស់​សេដ្ឋកិច្ច appeared first on Kampuchea Thmey Daily.

អនុស្សរណៈនេះ ភាគីទាំងពីរនឹងរួមគ្នាជំរុញចំណុចកិច្ច​សហ​ប្រ​តិបត្តិការមួយចំនួនជាពិសេសលើការជំរុញ​កសិពាណិជ្ជកម្ម និងវិស័យអប់រំ​ និងស្រាវ​ជ្រាវកសិកម្ម។​

​លោក ឃឹម​ ហ្វីណង់ ​អ្នកនាំពាក្យក្រសួងកសិកម្ម ​ប្រាប់កម្ពុជាថ្មីថា ​កម្ពុជា និងរុស្ស៊ី មានសក្ដា​នុពល​ខ្ពស់ក្នុងការជំរុញកិច្ចសហប្រតិបត្តិការកសិពាណិជ្ជកម្មឱ្យឈានទៅកម្រិតថ្មីមួយទៀត។

​ការចុះអនុស្សរណៈយោគយល់នេះ គឺជាមូលដ្ឋានគ្រឹះនៃភាពជាដៃគូយុទ្ធសាស្ត្រ​ដែលបំពេញ​ឱ្យគ្នា​ទៅវិញទៅ​មក ​តាមរយៈការបើកច្រកទីផ្សារសម្រាប់កសិផលកម្ពុជាទៅកាន់រុស្ស៊ី និងការនាំចូលនូវ​ធាតុចូលកសិកម្មដែលមានគុណភាពខ្ពស់ពីសហព័ន្ធរុស្ស៊ីមកកាន់កម្ពុជា។

បើតាមមន្ត្រីអ្នកនាំពាក្យក្រសួងកសិកម្ម អនុស្សរណៈនេះ នឹងដើរតួនាទីជាកាតាលីករដ៏​សំខាន់ក្នុងការពង្រឹង​សមត្ថភាពធនធាន​មនុស្ស ​និងជំរុញការស្រាវជ្រាវកសិកម្ម តាមរយៈការផ្ទេរបច្ចេកវិទ្យាទំនើប និងការផ្លាស់ប្តូរចំណេះ​ដឹង ​ដើម្បីលើកកម្ពស់ផលិតភាព និងទំនើបកម្មវិស័យកសិកម្មកម្ពុជាឱ្យកាន់តែមានប្រសិទ្ធភាព និងឆ្លើយតបនឹងតម្រូវការទីផ្សារប្រកបដោយចីរភាព៕

The post ​កម្ពុជា-រុស្ស៊ី ​ចុះ MOU លើ​វិស័យ​កសិកម្ម ជាការបើកច្រកទីផ្សារកសិផលកម្ពុជានាំចេញទៅរុស្ស៊ី appeared first on Kampuchea Thmey Daily.

ស្របពេលដែលប្រជាពលរដ្ឋកម្ពុជាកំពុងពេញនិយមការពិសារកាហ្វេជាប្រចាំ និងកំណើននៃការនាំចូលគ្រាប់កាហ្វេពីក្រៅប្រទេសខ្ពស់ វិនិយោគិនក្នុងស្រុកម្នាក់បានសម្រេចចិត្តបោះទុនជាង១លានដុល្លារចាប់តាំងកាលពីដើមឆ្នាំ២០២៦​ ដើម្បីកសាងស្លាកយីហោកាហ្វេផ្ទាល់ខ្លួនឈ្មោះថា គីរីកាហ្វេ (Kiri Coffee) ដោយបានធ្វើការប្រមូលទិញគ្រាប់កាហ្វេពីបងប្អូនប្រជាកសិករ ជាជនជាតិដើមភាគតិច នៅក្នុងខេត្តមណ្ឌលគិរីបានជិត ១០០០តោន ដើម្បីប្រកួតប្រជែង និងកាត់បន្ថយការនាំចូល ។

លោក ជិន ជ័យាបុត្រ ប្រធានក្រុមហ៊ុន គីរីកាហ្វេ បានថ្លែងប្រាប់ឱ្យដឹងថា ការបណ្តាក់ទុនទៅលើការផលិតគ្រាប់កាហ្វេនេះគឺជាការសម្រេចមួយក្នុងការកសាងនូវយីហោក្នុងស្រុកដើម្បីផ្តល់ទំនុកចិត្តដល់ម្ចាស់អាជីវកម្ម និងប្រជាពលរដ្ឋដែលនិយមពិសារកាហ្វេដែលជាភេសជ្ជះកំពុងពេញនិយមទាំងក្រុង និងទីជនបទ។ លោក​ថា ជាមួយការដាក់ឈ្មោះ គីរីកាហ្វេគឺជាឈ្មោះតំណាងប្រភពគ្រាប់កាហ្វេកម្ពុជាពីខេត្តមណ្ឌលគីរីដែលពលរដ្ឋធ្លាប់បានទៅទស្សនានូវចំការកាហ្វេនៅទីនោះ។

លោក ជិន ជ័យាបុត្រ បានបញ្ជាក់ថា «​សម្រាប់គោលការណ៍ជាចម្បងរបស់យើងក្នុងការកសាងយីហោ គីរីកាហ្វេនេះ គឺផ្អែកជាចម្បងលើក្រមសីលធម៌ចម្បង​ ភាពស្មោះត្រង់ជាមួយជាតិ និងអតិថិជន។ រាល់គ្រាប់កាហ្វេដែលយើងខ្ញុំយកមកលីញលក់ គឺជារបស់ខេត្តមណ្ឌលគិរីពិតៗ។ ​យើងខ្ញុំប្រកាន់ជំហរម៉ឺងម៉ាត់ មិនយកគ្រាប់កាហ្វេបរទេស មកបន្លំធ្វើជាកាហ្វេខ្មែរឡើយ។ នេះជាការប្តេជ្ញាចិត្តរបស់យើងខ្ញុំ ក្នុងការលើកស្ទួយផលិតផលខ្មែរពិតប្រាកដ»។

លោកថា ដោយលោក​ជាសមាជិករបស់សមាគមបណ្តាញកសិករតេជោ ដោយមានការចង្អុលបង្ហាញ និងយកចិត្តទុកដាក់ពីបណ្ឌិត កៅ ថាច ប្រធានសមាគមបណ្តាញកសិករតេជោ គីរីកាហ្វេ នឹងបន្តឈរជើងជាមួយបងប្អូនកសិករ ដោយប្តេជ្ញាចិត្តបន្តទិញកាហ្វេពីបងប្អូនជនជាតិដើមភាគតិច ឱ្យអស់ពីលទ្ធភាព ក្នុងតម្លៃទីផ្សារ ដើម្បីឱ្យកាហ្វេមណ្ឌលគិរី អាចបន្តដំណើរទៅមុខប្រកបដោយមោទនភាព និងជួយលើកកម្ពស់ជីវភាពបងប្អូនកសិករឱ្យកាន់តែធូរធារ និងរឹងមាំ។

​លោក ជិន ជ័យាបុត្រ បានគូសបញ្ជាក់ទៀតថា ក្រៅតែពីការធានាឈរជើងទិញកាហ្វេពីកសិករហើយនោះ ក្រុមហ៊ុនក៏បានគាំទ្រផ្នែកឥណទានកសិកម្ម សម្រាប់ពង្រីកការដាំដុះកាហ្វេ រួមមានការផ្គត់ផ្គង់ ជី, កូនពូជ, ថ្នាំកសិកម្ម និងសម្ភារៈបច្ចេកទេសផ្សេងៗ ដើម្បីជួយបងប្អូនមានលទ្ធភាពពង្រីកផ្ទៃដីដាំដុះ និងបង្កើនទិន្នផលផងដែរ។

បើយោងតាមរបាយការណ៍ពីក្រសួងកសិកម្ម បច្ចុប្បន្នប្រទេសកម្ពុជាមានតម្រូវការគ្រាប់កាហ្វេប្រមាណជា ២០ ០០០ តោនក្នុងមួយឆ្នាំ តែការផលិតជាក់ស្តែងបានប្រមាណតែ ២ ០០០តោនប៉ុណ្ណោះក្នុងមួយឆ្នាំ។ ទិន្នន័យនេះបង្ហាញថា កម្ពុជាត្រូវការគ្រាប់កាហ្វេជិត ១៨ ០០០តោនក្នុងមួយឆ្នាំបន្ថែមទៀត ដែលជាឱកាសល្អសម្រាប់កសិករមានបំណងចង់ដាំដំណាំកាហ្វេ៕

The post វិនិយោគិនក្នុងស្រុកម្នាក់បោះទុនជាង១លានដុល្លារ កសាងយីហោកាហ្វេ ដើម្បីប្រកួតប្រជែងជាមួយកាហ្វេនាំចូល appeared first on Kampuchea Thmey Daily.

មន្ត្រីជាន់ខ្ពស់រូបនេះ សង្កត់ធ្ងន់ថា៖«ប្រជានេសាទទាំងអស់ចូលរួមអនុវត្តការនេសាទ ប្រកប ដោយការទទួលខុសត្រូវ និងកាត់បន្ថយផលប៉ះពាល់ដល់ប្រព័ន្ធអេកូឡូស៊ីសមុទ្រ ដោយមិនប្រើប្រាស់ឧបករណ៍នេសាទខុសច្បាប់ ឬឧបករណ៍ដែលបង្ករការបំផ្លិចបំផ្លាញដល់ធនធានជលផល និងជម្រកធម្មជាតិរបស់វារីសត្វឡើយ។​ ជាពិសេស ករណីនេសាទបានក្តាមសេះដែលមានពង (ក្តាមពងខាងក្រៅស្នូក) សូមមេត្តាជួយ​លែងពួកវាចូលទៅក្នុងសមុទ្រវិញ ឬប្រគល់ជូនធនាគារក្តាម ឬសហគមន៍។»។

តាមរយៈពិធីលែងកូនក្ដាមសេះ ក្នុងគោលដៅដើម្បីឱ្យការលែងកូនក្តាមសេះចំនួន ៨៥០,០០០ ក្បាលនាពេលនេះ ទទួលបានផលផ្លែផ្កាពិតប្រាកដទៅថ្ងៃអនាគត មន្ត្រីជាន់ខ្ពស់ក្រសួងកសិកម្ម រុក្ខាប្រមាញ់ និងនេសាទ ណែនាំឱ្យ ខណ្ឌរដ្ឋបាលជលផលខេត្តកំពត អាជ្ញាធរមូលដ្ឋាន និងគណៈកម្មការសហគមន៍នេសាទទាំង ៥ ត្រូវសហការគ្នាឱ្យបានជិតស្និទ្ធនិងមានប្រសិទ្ធភាព ក្នុងការយាមល្បាត និងទប់ស្កាត់រាល់ការនេសាទខុសច្បាប់ ជាពិសេសនៅក្នុងតំបន់ដែនជម្រកដែលយើងបានលែងកូនក្តាមនាថ្ងៃនេះ ​ដើម្បីធានាថាពួកវាមានលទ្ធភាពលូតលាស់ដល់វ័យបន្តពូជ និងបង្កើនធនធានក្តាមក្នុងធម្មជាតិឱ្យមាននិរន្តរភាព។

មន្ត្រីជាន់ខ្ពស់រូបនេះ ណែនាំឱ្យមជ្ឈមណ្ឌលស្រាវជ្រាវនិងអភិវឌ្ឍន៍វារីវប្បកម្មសមុទ្រ (MARDeC) និងនាយកដ្ឋានអភិវឌ្ឍន៍វារីវប្បកម្ម បន្តការស្រាវជ្រាវ និងផលិតកូនពូជក្តាមសេះឱ្យកាន់តែមានបរិមាណច្រើន គុណភាពខ្ពស់ និងប្រសិទ្ធភាពកាន់តែប្រសើរ ដើម្បីបំពេញតម្រូវការសម្រាប់ការលែងស្តារធនធានធម្មជាតិ និងគាំទ្រដល់ការអភិវឌ្ឍវារីវប្បកម្មសមុទ្រនៅកម្ពុជាឱ្យកាន់ តែរីកចម្រើន និងមាននិរន្តរភាព។

ក្រសួងកសិកម្ម រុក្ខាប្រមាញ់ និងនេសាទ អរគុណយ៉ាងជ្រាលជ្រៅចំពោះអង្គការ FAO និងគម្រោង CamAdapt ដែលបានផ្តល់ការគាំទ្រយ៉ាងសកម្មកន្លងមក និងដាក់ក្ដីសង្ឃឹមយ៉ាងមុតមាំថា នឹងបន្តទទួលបានការគាំទ្រទាំងផ្នែកបច្ចេកទេស និងហិរញ្ញប្បទានបន្ថែមទៀត ដើម្បីជួយពង្រឹងសមត្ថភាពសហគមន៍នេសាទតំបន់ឆ្នេរក្នុងការបន្ស៊ាំទៅនឹងការប្រែប្រួលអាកាសធាតុ លើកកម្ពស់ជីវភាពរស់នៅ និងបង្កើនប្រាក់ចំណូលគ្រួសារប្រកបដោយនិរន្តរភាព។

លោក ឃុន សាវឿន សង្កត់ធ្ងន់ថា៖ «ការការពារ និងអភិរក្សធនធានជលផលសមុទ្រ មិនមែនជាកាតព្វកិច្ចរបស់បុគ្គលណាម្នាក់ ឬស្ថាប័នណាមួយនោះទេ ប៉ុន្តែវាជាការទទួលខុសត្រូវរួមពីយើងទាំងអស់គ្នា។ កូនក្តាមសេះដែលយើង​លែងនៅថ្ងៃនេះ គឺជាការវិនិយោគសម្រាប់អនាគត ដែលនឹងរួមចំណែកបង្កើនធនធានជលផលសមុទ្រ បង្កើតប្រភពចំណូល និងពង្រឹងសន្តិសុខស្បៀងសម្រាប់សហគមន៍ និងកូនចៅរបស់យើងជំនាន់ក្រោយ។»៕

The post ក្រសួងកសិកម្មអំពាវនាវអ្នកនេសាទកុំប្រើឧបករណ៍ខុសច្បាប់ និងត្រូវលែងក្ដាមចូលសមុទ្រវិញ បើចាប់បានក្ដាមមានពងកូន appeared first on Kampuchea Thmey Daily.

លោក ទឹម បូរក្ស អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អញ្ជើញដឹកនាំក្រុមការងារ ចុះពិនិត្យសហគមន៍នេសាទព្រែកខ្សាច់។ ស្របតាមការពិនិត្យជាក់ស្តែងស្ថានភាពសក្តានុពល វឌ្ឍនភាពសកម្មភាពគ្រប់គ្រង បញ្ហាប្រឈម និងសំណូមពររបស់សហគមន៍នេសាទព្រែកខ្សាច់ក្នុងសហគមន៍ដោយផ្ទាល់ ក៏មានការលែងកូនក្តាមថ្មពូជសរុបប្រមាណ៣០០ក្បាលផងដែរ។

លោក ទឹម បូរក្ស អនុរដ្ឋលេខាធិការក្រសួងកសិកម្ម ថ្លែងនៅថ្ងៃទី១០ ខែមិថុនា ឆ្នាំ២០២៦ថា ការលែងកូនក្តាមថ្មនៅពេលនេះ ក្នុងគោលបំណងដើម្បីស្តារឡើងវិញនូវធនធានជលផលអោយកាន់តែសំបូរបែរ និងការពារអភិរក្សបានគង់វង្សទៅអនាគតក្នុងឃុំព្រែកខ្សាច់ ស្រុកគិរីសាគរ។

លោក ម៉ឹង ឡាត់ ប្រធានសហគមន៍នេសាទ បានលើកឡើងថា សហគមន៍នេសាទបានរៀបចំផែនការគ្រប់គ្រង ជាលទ្ធផល បានសាងសង់ស្នាក់ការសហគមន៍ ទិញអូប័រ១គ្រឿង បោះបង្គោលកន្លែងស្មៅសមុទ្រ និងដាក់ប្រអប់សិប្បនិម្មិត ធនាគារក្តាមសេះជូនប្រជាពលរដ្ឋចំនួន៦០គ្រួសារ ១គ្រួសារទទួលបាន៦០ម៉ឺនរៀល ឧបករណ៍ភ្ញាស់ក្តាមសេះ គាំទ្រដោយរដ្ឋបាលជលផល ហើយអង្គការ FFI បានជួយផែទូក និងសាងសង់ស្ពានដើរប្រវែង១០០ម៉ែត្រ។

ដោយឡែកលោក ចាប វន ជំទប់ទី១ឃុំព្រែកខ្សាច់ បានរាយការណ៍ពីស្ថានភាពសក្តានុពលនៃកន្លែងសហគមន៍នេសាទព្រែកខ្សាច់ថា ធនធានជលផលមាននៅក្នុងកន្លែងសហគមន៍នេសាទ រួមមាន ព្រៃកោងកាង ៤៧៨ ហិកតា ស្មៅសមុទ្រ ១០២ ហិកតា វាលភក់ជាង៤០០ហិកតា សារាយសមុទ្រ ឆ្នេរខ្សាច់ ម្យ៉ាងទៀតសម្រាប់ជីវចម្រុះមានដូចជា គ្រែងឈាម គ្រំចំពុះទា អាវភក់ សត្វភេ សត្វស្លាប ហើយធនធានជលផលទាំងអស់នេះបានគាំទ្រដល់ជីវភាពនៃមុខរបររស់នៅរបស់ប្រជានេសាទប្រមាណ៧០-៨០ភាគរយ។

លោកអនុរដ្ឋលេខាធិការ ក៏បានកោតសរសើរដល់អាជ្ញាធរឃុំ សហគមន៍នេសាទ អគ្គនាយកដ្ឋានជលផល ខណ្ឌរដ្ឋបាលជលផលកោះកុង ដែលបានខិតខំបំពេញភារកិច្ចដោយទទួលបានលទ្ធផលល្អប្រសើរ បានជួយអភិវឌ្ឍសហគមន៍នេសាទ ទប់ស្កាត់ និងបង្ក្រាបបទល្មើសជលផលក្នុងសហគមន៍នេសាទ រហូតទទួលបានលទ្ធផលធនធានជលផលនៅមានជាសក្តានុពលដែលផ្គត់ផ្គង់ដល់មុខរបរប្រជានេសាទសហគមន៍ ប្រភេទសត្វកម្រផ្សេងៗនៅមានវត្តមានដូចជាសត្វភេ អណ្តើកសមុទ្រ និងសត្វផ្សោត២ប្រភេទ ស្ថិតនៅក្នុងដែនសហគមន៍នេសាទព្រែកខ្សាច់ គឺផ្សោតផ្កាឈូក និងផ្សោតក្បាលត្រឡោកផងដែរ៕

អត្ថបទ៖ សិរីវឌ្ឍន:

The post ក្រសួងកសិកម្ម និងខណ្ឌរដ្ឋបាលជលផលកោះកុង លែងកូនក្តាមថ្ម ៣០០ក្បាល ចូលក្នុងដងព្រែកសហគមន៍នេសាទព្រែកខ្សាច់ appeared first on Kampuchea Thmey Daily.

លើក​ឡើង​​ក្នង​វេទិកា​តុ​មូល​នៅ​ព្រឹក​ថ្ងៃ​ទី​២៩ ខែ​ឧសភា ឆ្នាំ​២០២៦​ នៅ​រាជបណ្ឌិត្យសភា​កម្ពុជា​ លោក ប៉ែន សុវិជាតិ បាន​ថ្លែង​ថា៖ «យើង​ត្រូវ​ប្រកួត​ប្រជែង​ជាមួយ​វៀតណាម​ដែល​ឯកឧត្តម​ ឃឹម ហ្វីណង់ ថា​ថ្លៃ​ជាង​គេ ៥០ ឬ៤០​ដុល្លារ​នោះ។ ហើយ​ខ្ញុំ​សូម​ជម្រាប​ថា​ថ្លៃ​ជាំង​គេ​​នោះ​គឺ​មក​ពី​អ្វី​?​​ ថ្លៃ​ ធានារ៉ាប់រង​ បង​ចន្ទី​និយាយ​ច្បាស់​ណាស់​ថា​ថ្លៃ​ធានារ៉ាប់រង​វា​ថ្លៃ ឱ្យ​តែ​ឮ​ថា​ដឹក​ចេញ​ពី​ខ្មែរ​លេង​ពួយ​ឯង​លើស​ហ្នឹង​តែ​ម្ដង​»។

លោក​ក៏​បាន​បន្ថែម​ផង​ដែរ​ថា​ បញ្ហា​នេះ​ក៏​កាន់​តែ​ប៉ះពាល់​ដល់​តម្លៃ​អង្ករ​កម្ពុជា​លើ​ទីផ្សារ​អន្តរជាតិ​ថែម​ទៀត​ក្រោយ​មាន​សង្គ្រាម​អាមេរិក អ៊ីស្រាអែល និង​អ៊ីរ៉ង់​កើត​ឡើង​ដែល​ប៉ះពាល់​ដល់​ច្រក​សមុទ្រ​ហូម័ស​មក​។

​​​​​​យោង​តាម​​គេហទំព័រ​ការ​ធានារ៉ាប់រង​លើ​ការ​ដឹក​ជញ្ជូន​តាម​ផ្លូវ​សមុទ្រ​ Cargo insure ​pro តម្លៃ​ធានារ៉ាប់រង​ដែល​ដឹក​ចេញ​ពី​កម្ពុជា​ត្រូវ​បាន​គិត​តម្លៃ​ពី​ ០,១% ទៅ​ ០,៥% នៃ​តម្លៃ​ទំនិញ​ ខណៈ​ការ​ដឹក​ចេញពី​ប្រទេស​ថៃ​មាន​តម្លៃ​ ០,០៥​% ដល់​០,៥% និង​វៀតណាម​គិត​ចន្លោះ​ពី ០,០៥% ទៅ​០,៧%។

អ្នក​នាំ​ពាក្យ​ក្រសួង​កសិកម្ម​លោក ឃឹម ហ្វីណង់ បាន​ឱ្យ​ដឹង​ក្នុង​កិច្ចពិភាក្សា​នោះ​ដែរ​ថា​បញ្ហា​តម្លៃ​អង្ករ​ពេល​នេះ​គឺ​ទាក់ទង​នឹង​តម្លៃ​ ហើយ​នឹង​ថ្លៃ​ដើម​នៃ​ការ​ផលិត​។ លោក​បន្ថែម​ថា​ការ​ដំឡើង​ថ្លៃ​អង្ករ​ប្រមូល​ទិញ​លើ​ទីផ្សារ​នឹង​កាន់​តែ​ធ្វើ​ឱ្យ​កម្ពុជា​បាត់​បង់​ការ​ប្រកួត​ប្រជែង​ជាមួយ​ប្រទេស​ជិតខាង​តែ​ម្ដង។

លោក​ថា៖ «ទីផ្សារ​អង្ករ​ស យើង​ថ្លៃ​ជាង​គេ​ប្រហែល​៥០ដុល្លារ​ក្នុង​មួយ​តោន​ទៅ​ហើយ។ អ៊ីចឹង​សួរ​ថា​បើ​ថ្លៃ​ជាង​ហ្នឹង​ទៀត! អ្នក​ណា​គេ​មក​ទិញ​យើង​? យើង​ថា​អង្ករ​យើង​ល្អ​ជាង​ បាទ! ដំណាំ​ស្រូវ​គឺ​ជា​ដំណាំ​ដែល​ការ​ប្រកួត​ប្រជែង​សឹង​តែ​ Perfect Compitition ណា។ ខុស​គ្នា​តែ​១០ ឬ​២០​ដុល្លារ​យើង​ក៏​ពិបាក​ដែរ​ »។

លោក​បន្ថែម​ថា រាល់​ថ្ងៃ​នេះ​បើ​មាន​ជម្រើស​រដ្ឋាភិបាល​មិន​ចង់​បង្កើន​ផលិត​កម្ម​ស្រូវ​ទេ ដោយ​រដ្ឋាភិបាល​កំពុង​ស្វែង​រក​ការ​ធ្វើ​ពិពិធ​កម្ម​ចេញ​ពី​ដំណាំ​ស្រូវ ខណៈ​កន្លែង​​ខ្លះ​នឹង​រៀបចំ​ឱ្យ​មាន​ការ​ធ្វើ​ស្រែ​ឱ្យ​បាន​២​ដង ឬ​បង្កើត​ឱ្យ​មាន​កសិកម្ម​វិល​ជុំ​សម្រាប់​ប្រជាកសិករ។

លោក​ជំរុញ​បន្ថែម​ទៀត​ឱ្យ​ប្រជា​កសិករ​ចូល​រួម​ជាមួយ​រដ្ឋាភិបាល​បង្កើត​ជា​សហគមន៍​កសិកម្ម​ដើម្បី​ជួយ​ដោះស្រាយ​បញ្ហា​ដែល​កំពុង​ប្រឈម។

បើ​តាម​លោក ឃឹម ហ្វីណង់ បច្ចុប្បន្ន​កម្ពុជា​អាច​ផលិត​ស្រូវ​បាន​ប្រមាណ​១៥​លាន​តោន​ក្នុង​មួយ​ឆ្នាំ​ ខណៈ​តម្រូវ​ការ​ក្នុង​ស្រុក​មាន​ប្រមាណ​តែ​៦ទៅ​៧លានតោន​ប៉ុណ្ណោះ ដែល​នៅ​សល់​ក្រៅ​ពី​នោះ​ត្រូវ​នាំ​ចេញ​ទៅ​លក់​នៅ​បរទេស។ របាយការណ៍​ក្រសួង​កសិកម្ម​ឆ្នាំ​២០២៥​ឱ្យ​ដឹង​ថា​កម្ពុជា​បាន​នាំ​ចេញ​អង្ករ​ទៅ​កាន់​ទីផ្សារ​ពិភព​លោក​បាន​ប្រមាណ​ ៩៤​ម៉ឺន​តោន ដោយ​គិត​ជា​ទឹក​ប្រាក់​ប្រមាណ​ ៦០០លានដុល្លាអាមេរិក៕

អត្ថបទ​ដោយ​ ហ៊ុន សិរីវឌ្ឍន៍ ​​​​​​​​​​​​​​​

The post អ្នកនាំពាក្យ​ក្រសួងពាណិជ្ជកម្ម​ថា​ការ​ធានា​រ៉ាប់រង​លើ​ការ​ដឹក​ជញ្ជូន​ខ្ពស់​ធ្វើ​ឱ្យប៉ះពាល់​ដល់​តម្លៃ​អង្ករ​កម្ពុជា​ appeared first on Kampuchea Thmey Daily.

លើក​ឡើង​នៅ​ក្នុង​កិច្ច​ពិភាក្សា​តុមូល​នៅ​រាជបណ្ឌិត្យសភា​ ព្រឹក​ថ្ងៃ​ទី​២៩ ខែ​ឧសភា ឆ្នាំ​២០២៦នេះ លោក​ ឃឹម ហ្វីណង់ បាន​ឱ្យ​ដឹង​ថា​វិបត្តិ​ថាមពល និង​ការ​កើន​ឡើង​ថ្លៃ​ជី អាច​នឹង​ធ្វើ​ឱ្យ​ថ្លៃ​ដើម​នៃ​ការ​ផលិត​ដំណាំ​ស្រូវ​ និង​កសិកម្ម​កម្ពុជា​កើន​ឡើង​ប្រមាណ​១៥% ខណៈ​ប្រសិន​ជា​កសិករ​ឈប់​ប្រើប្រាស់​ជី​ក្នុង​ការ​ផលិត​នោះ​នឹង​នាំ​ឱ្យ​មាន​ការ​ធ្លាក់​ចុះ​ទិន្នផល​ដល់​ទៅ​៣៥%។ ទោះ​ជា​យ៉ាងណា​លោក​បញ្ជាក់​ថា​បញ្ហា​នេះ​មិន​ប៉ះពាល់​ដល់​សន្តិសុខ​ស្បៀង​អាហារ​នៅ​កម្ពុជា​ទេ​ ខណៈ​ការ​ផលិត​ដំណាំ​ស្រូវ​របស់​កម្ពុជា​មាន​លើស​តម្រូវ​ការ​ដល់​ទៅ​ជាង​២ដង​។

លោក​ថា៖ «បើ​មាន​ហូប​មិន​មែន​ជា​បញ្ហា​ប្រឈម​យើង​ទេ​! តែ​បញ្ហា​នោះ​គឺ​ភាព​មាន​បាន​របស់​កសិករ​»។

បើ​តាម​លោក ហ្វីណង់ បច្ចុប្បន្ន​កម្ពុជា​មាន​ប្រមាណ ១,៨៥លានគ្រួសារ ​ដែល​ក្នុង​ឆ្នាំ​កន្លង​ទៅ​អាច​ផលិត​ស្រូវ​បាន​ដល់​ទៅ​ជាង​១៥លាន​តោន ខណៈ​តម្រូវ​ការ​ក្នុង​ស្រុក​មាន​ប្រមាណ​៦ ទៅ​៧លាន​តោន​ប៉ុណ្ណោះ​ ដែល​មិន​មាន​ប្រទេស​ច្រើន​ទេ​នៅ​លើ​ពិភព​លោក​ដែល​មាន​លទ្ធភាព​ក្នុង​ការ​ផលិត​ស្បៀង​លើស​ពី​តម្រូវ​ការ​ក្នុង​ស្រុក​នោះ។ ​

ទាក់ទង​នឹង​បញ្ហា​ប្រេង​ ឧស្ម័ន និង​ជីកសិកម្ម​នេះ​ ក្នុង​ជំនួប​មួយ​រវាង​រដ្ឋមន្ត្រី​ការបរទេស​កម្ពុជា​លោក​ឧបនាយករដ្ឋមន្ត្រី​ ប្រាក់ សុខុន និង​រដ្ឋមន្ត្រី​ការបរទេស​ចិន​លោក វ៉ាង យី នៅ​ទីក្រុង​ញ៉ូវយ៉ក​កាល​ពី​ថ្ងៃ​ទី​២៧ ខែ​ឧសភា ប្រទេស​ចិន​បាន​ធានា​ដល់​ការ​ផ្គត់ផ្គង់​ប្រេង​ ឧស្ម័ន និង​ជីកសិកម្ម​ក្នុង​អំឡុង​ពេល​ដែល​កម្ពុជា​កំពុង​ជួប​ការ​លំបាក​ផ្នែក​សន្តិសុខ​ថាមពល និង​កង្វះ​ជី​។ តាម​របាយការណ៍​ក្រសួង​ពាណិជ្ជកម្ម​ក្នុង​ឆ្នាំ​២០២៥ កម្ពូជា​បាន​នាំ​ចូល​ជី​កសិកម្ម​ពី​បរទេស​ក្នុង​ទំហំ​ប្រមាណ​ ៤២០លាន​ដុល្លារ​អាមេរិក​៕

អត្ថបទដោយ ហ៊ុន សិរីវឌ្ឍន៍

The post អ្នកនាំពាក្យ​ក្រសួងកសិកម្ម​ថា​កម្ពុជា​នៅ​តែ​រក្សា​បាន​នូវ​សន្តិសុខ​ស្បៀង​ទោះ​បី​ជា​ប្រឈម​នឹង​ធ្លាក់​ចុះ​ទិន្នផល appeared first on Kampuchea Thmey Daily.

គិតមកដល់បច្ចុប្បន្ន អង្គការហេហ្វឺកម្ពុជា និងដៃគូ បានគាំទ្រ និងពង្រឹងសហគមន៍កសិកម្មចំនួន ៧៤ និងសហគមន៍នេសាទចំនួន ១១ បង្កើតក្រុមជួយខ្លួនឯងចំនួន ១,៦០០ ក្រុម ដែលមានសមាជិក ៣៤,១៦១ នាក់ និងបានគាំទ្រគ្រួសារកសិករចំនួន ៥៦,០៨៨ គ្រួសារ។ នេះបើយោងាតមការបង្ហាញកាលពីថ្ងៃទី២៧ ខែឧសភា ឆ្នាំ២០២៦របស់អង្គការហេហ្វឺកម្ពុជា បានរៀបចំសិក្ខាសាលាសហគមន៍កសិកម្មប្រចាំឆ្នាំ២០២៦ ក្រោមប្រធានបទ «ការពង្រឹងប្រព័ន្ធស្បៀងអាហារដែលដឹកនាំដោយកសិករ» ដោយមានការចូលរួមពីតំណាងរាជរដ្ឋាភិបាល ដៃគូអភិវឌ្ឍន៍ ស្ថានទូត គ្រឹះស្ថានហិរញ្ញវត្ថុ ក្រុមហ៊ុនវិស័យឯកជន សហគមន៍កសិកម្ម សហគមន៍នេសាទ សហគមន៍តំបន់ការពារធម្មជាតិ ថ្នាក់ដឹកនាំកសិករ និងអង្គការសង្គមស៊ីវិល។

សិក្ខាសាលានេះ បានដើរតួជាវេទិកាជាតិសម្រាប់ការពិភាក្សា ភាពជាដៃគូ និងសកម្មភាពរួមគ្នា ដើម្បីពង្រឹងប្រព័ន្ធស្បៀងអាហារដែលដឹកនាំដោយកសិករ។ ព្រឹត្តិការណ៍នេះបានផ្តោតលើការកែលម្អសមត្ថភាពស្ថាប័ន និងមុខរបររបស់សហគមន៍កសិកម្ម សហគមន៍នេសាទ សហគមន៍តំបន់ការពារធម្មជាតិ សហភាពសហគ្រិនអភិវឌ្ឍន៍សង្គម (SEUAC) ព្រមទាំងលើកកម្ពស់ការវិនិយោគ ហិរញ្ញវត្ថុបរិយាបន្ន ការទទួលបានទីផ្សារ ភាពធន់នឹងអាកាសធាតុ វិធីសាស្ត្រសុខភាពតែមួយ (One Health) និងការអភិវឌ្ឍវិស័យកសិកម្មប្រកបដោយចីរភាព។

បណ្ឌិត ញ៉ែម សារ៉េត នាយកប្រចាំប្រទេសនៃអង្គការ ហេហ្វឺកម្ពុជា បានសង្កត់ធ្ងន់ថា ប្រព័ន្ធស្បៀងអាហាររបស់កម្ពុជាកំពុងស្ថិតក្នុងដំណាក់កាលរបត់ដ៏សំខាន់មួយ ខណៈដែលកសិករខ្នាតតូចកំពុងប្រឈមមុខនឹងការប្រែប្រួលអាកាសធាតុ ការកើនឡើងនៃថ្លៃដើមផលិតកម្ម ការកម្រិតក្នុងការទទួលបានហិរញ្ញវត្ថុ ខ្សែច្រវាក់តម្លៃដាច់ដោយឡែក និងភាពមិនប្រាកដប្រជានៃទីផ្សារ។

ទន្ទឹមនឹងនេះ លោកបានគូសបញ្ជាក់ថា ឱកាសថ្មីៗកំពុងលេចឡើងតាមរយៈកសិកម្មបង្កើតឡើងវិញ (Regenerative Agriculture) ផលិតកម្មឆ្លាតវៃនឹងអាកាសធាតុ ការច្នៃប្រឌិតឌីជីថល ហិរញ្ញវត្ថុបរិយាបន្ន សហគ្រិនភាពយុវជន និងការអភិវឌ្ឍកសិកម្មដែលតម្រង់ទិសទីផ្សារផងដែរ។

បណ្ឌិត ញ៉ែម សារ៉េត បានមានប្រសាសន៍ថា៖ «រួមគ្នា យើងអាចពង្រឹងភាពជាដៃគូ បង្កើតដំណោះស្រាយជាក់ស្តែង និងកសាងចក្ខុវិស័យរួមមួយ ដែលកសិករជាអ្នកដឹកនាំការផ្លាស់ប្តូរ សហគ្រាសរីកចម្រើន ប្រព័ន្ធអេកូឡូស៊ីត្រូវបានស្តារឡើងវិញ ហើយគ្រួសារជំនាន់ក្រោយនឹងទទួលបានអត្ថប្រយោជន៍ពីប្រព័ន្ធស្បៀងដែលមានចីរភាព»។

លោកបានបន្ថែមថា៖ «កសិករមិនមែនជាអ្នកទទួលផលពីការអភិវឌ្ឍន៍នោះទេ ពួកគេគឺជាសហគ្រិន អ្នកច្នៃប្រឌិត អ្នកវិនិយោគ និងជាអ្នកដឹកនាំនៃការផ្លាស់ប្តូរប្រព័ន្ធស្បៀងអាហារនៅកម្ពុជា។ អនាគតនៃកសិកម្មប្រកបដោយចីរភាពគឺពឹងផ្អែកលើស្ថាប័នកសិករដែលកាន់តែរឹងមាំ ប្រព័ន្ធផលិតកម្មបង្កើតឡើងវិញ និងភាពជាដៃគូប្រកបដោយបរិយាបន្នដែលភ្ជាប់កសិករទៅនឹងទីផ្សារ ហិរញ្ញវត្ថុ និងការច្នៃប្រឌិត»។

លោកបណ្ឌិត ញ៉ែម សារ៉េត បានបញ្ជាក់ជាថ្មីថា ការប្តេជ្ញាចិត្តរយៈពេលវែងរបស់អង្គការហេហ្វឺកម្ពុជា តាមរយៈ កម្មវិធី ២០២៦-២០៣៥ (Cambodia Signature Program 2026–2035) ដែលមានគោលដៅចូលរួមជាមួយគ្រួសារកសិករខ្នាតតូចចំនួន ៥២០,០០០ គ្រួសារត្រឹមឆ្នាំ២០៣៥ ដើម្បីកសាងជីវភាពរស់ តាមរយៈការផ្លាស់ប្តូរប្រព័ន្ធស្បៀងអាហារបែបបង្កើតឡើងវិញ និងបរិយាបន្ន ដោយគ្របដណ្តប់លើខេត្តចំនួន ១៤ រួមទាំងខេត្តតំបន់ឆ្នេរចំនួន ៤ ផងដែរ។

អង្គការហេហ្វឺកម្ពុជា ក៏បានលើកកម្ពស់សហគមន៍កសិកម្មមាស (Golden Cooperatives) ចំនួន ១៨ ពង្រឹងស្ថាប័នកំពូល SEUAC គាំទ្រប្រព័ន្ធគណនេយ្យឌីជីថល ពង្រីកការទទួលបានទីផ្សារ និងកៀរគរធនធាន និងការវិនិយោគដើម្បីគាំទ្រដល់ការចិញ្ចឹមចិញ្ចឹមមាន់ស្រែខ្មែរ វារីវប្បកម្ម បន្លែ ផ្លែឈើ ហេដ្ឋារចនាសម្ព័ន្ធ និងការអភិវឌ្ឍអាជីវកម្មសហគមន៍។

ជាមួយគ្នានោះ លោក ឃឹម ហ្វីណង់ អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ បានសង្កត់ធ្ងន់ដែរថា ការផ្លាស់ប្តូរវិស័យកសិកម្មនាពេលអនាគតរបស់កម្ពុជានឹងពឹងផ្អែកលើភាពជាដៃគូកាន់តែរឹងមាំរវាងស្ថាប័នរដ្ឋ ស្ថាប័នកសិករ ដៃគូអភិវឌ្ឍន៍ គ្រឹះស្ថានហិរញ្ញវត្ថុ គ្រឹះស្ថានសិក្សា និងវិស័យឯកជន។

លោក ឃឹម ហ្វីណង់ បន្ថែមថា៖ «សហគមន៍កសិកម្មមិនមែនត្រឹមតែជាក្រុមអ្នកផលិតនោះទេ។ ពួកគេគឺជាស្ថាប័នសេដ្ឋកិច្ចដែលជួយកសិករឱ្យទទួលបានទីផ្សារ ហិរញ្ញវត្ថុ បច្ចេកវិទ្យា ព័ត៌មាន និងឱកាសអាជីវកម្ម។ សហគមន៍រឹងមាំបង្កើតបានកសិកររឹងមាំ ហើយកសិកររឹងមាំបង្កើតបានប្រព័ន្ធស្បៀងអាហារជាតិដ៏រឹងមាំ»។

មហាសន្និបាតនេះបានប្រមូលផ្តុំតំណាងមកពីបណ្តាក្រសួង សហគមន៍កសិកម្ម សហគមន៍នេសាទ ទីភ្នាក់ងារអភិវឌ្ឍន៍ គ្រឹះស្ថានហិរញ្ញវត្ថុ ក្រុមហ៊ុនឯកជន និងតំណាងកសិករ ដើម្បីពិភាក្សាអំពីដំណោះស្រាយជាក់ស្តែងសម្រាប់ការពង្រឹងប្រព័ន្ធស្បៀងរបស់កម្ពុជា ចំពេលមានការប្រឈមផ្នែកអាកាសធាតុ និងទីផ្សារដែលកំពុងកើនឡើង។

លោក​អនុរដ្ឋលេខាធិការ បានកត់សម្គាល់ថា វិស័យកសិកម្មរបស់កម្ពុជានៅតែបន្តប្រឈមមុខនឹងសម្ពាធកើនឡើងពីការប្រែប្រួលអាកាសធាតុ ការកើនឡើងថ្លៃដើមផលិតកម្ម ភាពមិនប្រាកដប្រជានៃទីផ្សារ និងការខូចខាតបរិស្ថាន។ ទោះជាយ៉ាងណាក៏ដោយ លោកថា បញ្ហាប្រឈមទាំងនេះក៏បង្កើតឱកាសសម្រាប់ការច្នៃប្រឌិត ការធ្វើទំនើបកម្ម និងការផ្លាស់ប្តូរជនបទប្រកបដោយបរិយាបន្នផងដែរ។

ថ្នាក់ដឹកនាំក្រសួងកសិកម្ម រុក្ខាប្រមាញ់ និងនេសាទ បានលើកឡើងពីអាទិភាពបន្តបន្ទាប់របស់រាជរដ្ឋាភិបាលកម្ពុជា ក្រោមយុទ្ធសាស្ត្របញ្ចកោណ-ដំណាក់កាលទី១ និងផែនទីបង្ហាញផ្លូវប្រព័ន្ធស្បៀងកម្ពុជាអាហារឆ្នាំ២០៣០ ដែលមានគោលបំណងពង្រឹងសន្តិសុខស្បៀង ភាពធន់នឹងអាកាសធាតុ កសិកម្មប្រកបដោយចីរភាព និងជីវភាពរស់នៅរបស់ប្រជាជននៅជនបទនៅទូទាំងប្រទេស។

យ៉ាងណាមិញ លោក ឃឹម ហ្វីណង់ ក៏បានកោតសរសើរចំពោះតួនាទីដែលកំពុងកើនឡើងរបស់ស្ត្រី និងយុវជនក្នុងការដឹកនាំកសិកម្ម សហគ្រិនភាព និងប្រព័ន្ធផលិតកម្មឆ្លាតវៃនឹងអាកាសធាតុ ដោយកត់សម្គាល់ថា ការចូលរួមប្រកបដោយបរិយាបន្នគឺចាំបាច់ណាស់សម្រាប់ការផ្លាស់ប្តូររយៈពេលវែងនៃប្រព័ន្ធស្បៀងរបស់កម្ពុជា។

លោក Pranjit Talukdar អ្នកសម្របសម្រួលតំបន់អាស៊ីសម្រាប់ការទទួលបានហិរញ្ញវត្ថុច្នៃប្រឌិតនៃអង្គការហេហ្វឺអន្តរជាតិប្រចាំតំបន់អាស៊ី ដែលបានណែនាំអំពីប្រព័ន្ធស្បៀងដឹកនាំដោយកសិករ និងក្របខណ្ឌបរិយាបន្នហិរញ្ញវត្ថុរបស់អង្គការហេហ្វឺ។ លោកបានសង្កត់ធ្ងន់ថា បរិយាបន្នហិរញ្ញវត្ថុគឺមានទំហំធំធេងជាងការផ្តល់ឥណទាន។ វាគ្របដណ្តប់លើការទទួលបានទីផ្សារ ការសន្សំ ការធានារ៉ាប់រង ឱកាសវិនិយោគ ទុនបង្វិលដែលមានតម្លៃសមរម្យ ទ្រព្យសកម្មផលិតភាព សេវាឌីជីថល ភាពជាដៃគូសហគ្រាស និងស្ថាប័នសហករណ៍ដ៏រឹងមាំ។

លោក Pranjit បានមានប្រសាសន៍ថា៖ «ហិរញ្ញវត្ថុដើរតាមអាជីវកម្ម។ អាជីវកម្មដើរតាមការរៀបចំចាត់តាំង។ ការរៀបចំចាត់តាំងដើរតាមជំនឿទុកចិត្ត។ ហើយជំនឿទុកចិត្តគឺកើតចេញពីសកម្មភាពរួមគ្នា»។ លោកបានកត់សម្គាល់ថា តួនាទីរបស់អង្គការហេហ្វឺ មិនមែនដើម្បីជំនួសតួអង្គក្នុងស្រុកដែលមានស្រាប់នោះទេ ប៉ុន្តែគឺដើម្បីសកម្មភាព ធានាការរៀបចំ ផ្គុំបញ្ចូលគ្នា និងកៀរគរការវិនិយោគដែលមានស្រាប់ក្នុងចំណោមកសិករ សហគមន៍កសិកម្ម អាជីវកម្មក្នុងស្រុក រាជរដ្ឋាភិបាល ធនាគារ និងដៃគូអភិវឌ្ឍន៍។

លោក ជួប ប៉ារីស៍ រដ្ឋលេខាធិការក្រសួងបរិស្ថាន ដែលបានថ្លែងសុន្ទរកថាបិទសិក្ខាសាលា បានកោតសរសើរចំពោះកិច្ចសហការយ៉ាងជិតស្និទ្ធរវាងស្ថាប័នរដ្ឋ សហគមន៍កសិកម្ម ដៃគូអភិវឌ្ឍន៍ គ្រឹះស្ថានហិរញ្ញវត្ថុ និងវិស័យឯកជន ក្នុងការជំរុញរបៀបវារៈអភិវឌ្ឍន៍កសិកម្ម និងជនបទរបស់កម្ពុជា។

លោកបានសង្កត់ធ្ងន់ថា សារៈសំខាន់នៃការបន្តពង្រឹងស្ថាប័នកសិករ ការលើកកម្ពស់ការច្នៃប្រឌិត និងការពង្រីកឱកាសទីផ្សារប្រកបដោយបរិយាបន្ន ដើម្បីធានាបាននូវប្រព័ន្ធស្បៀងដែលមានចីរភាព និងធន់សម្រាប់ជំនាន់ក្រោយ។

ក្នុងកម្មវិធីនេះ អ្នកចូលរួមបានចែករំលែកបទពិសោធន៍ជាក់ស្តែង និងវិធីសាស្រ្តច្នៃប្រឌិតទាក់ទងនឹងការអភិវឌ្ឍសហគមន៍ កសិកម្មបង្កើតឡើងវិញ ធុរកិច្ចកសិកម្មយុវជន ហិរញ្ញវត្ថុចម្រុះ ការច្នៃប្រឌិតឌីជីថល វារីវប្បកម្ម និងការស្តារប្រព័ន្ធអេកូឡូស៊ីឡើងវិញ។ ការពិភាក្សាបានសង្កត់ធ្ងន់បន្ថែមទៀតលើសារៈសំខាន់នៃភាពជាដៃគូពហុភាគីក្នុងការដោះស្រាយការប្រែប្រួលអាកាសធាតុ សន្តិសុខស្បៀង និងភាពធន់នឹងសេដ្ឋកិច្ចជនបទ។

សិក្ខាសាលាបានគូសបញ្ជាក់ពីសារៈសំខាន់នៃ «ទុនសង្គម» (Social Capital) ដែលជាទ្រព្យសកម្មដ៏សំខាន់សម្រាប់ការអភិវឌ្ឍន៍ដឹកនាំដោយកសិករ។ តាមរយៈជំនឿទុកចិត្ត ទំនាក់ទំនង ចំណេះដឹង ស្ថាប័ន និងចក្ខុវិស័យរួម គ្រួសារកសិករ និងសហគមន៍ដែលបានរៀបចំចាត់តាំងត្រឹមត្រូវ អាចកាត់បន្ថយហានិភ័យ កែលម្អការទទួលបានហិរញ្ញវត្ថុ និងបង្កើតប្រព័ន្ធអាជីវកម្មកាន់តែរឹងមាំ។

សិក្ខាសាលាបានបញ្ជាក់ជាថា គ្មានស្ថាប័នណាមួយអាចសម្រេចភាពជោគជ័យក្នុងប្រព័ន្ធស្បៀងអាហារតែម្នាក់ឯងបានឡើយ។ ការផ្លាស់ប្តូរប្រកបដោយចីរភាពតម្រូវឱ្យមានការដឹកនាំសម្របសម្រួលគ្នារវាងស្ថាប័នរដ្ឋ ស្ថាប័នកសិករ គ្រឹះស្ថានហិរញ្ញវត្ថុ ក្រុមហ៊ុនវិស័យឯកជន អង្គការសង្គមស៊ីវិល ដៃគូអភិវឌ្ឍន៍ និងសហគមន៍កសិកម្ម។

ខណៈពេលដែលអង្គការហេហ្វឺកម្ពុជា ឈានទៅមុខជាមួយនឹងចក្ខុវិស័យឆ្នាំ ២០២៦-២០៣៥ ខ្លួននៅតែបន្តប្តេជ្ញាចិត្តក្នុងការធ្វើការងារជាមួយដៃគូទាំងអស់ ដើម្បីពង្រឹងស្ថាប័នកសិករ ផ្តល់អំណាចដល់ស្ត្រី និងយុវជន លើកកម្ពស់ភាពធន់នឹងអាកាសធាតុ គាំទ្រទីផ្សារបរិយាបន្ន និងកសាងសហគមន៍ឱ្យកាន់តែរីកចម្រើននៅទូទាំងប្រទេសកម្ពុជា។

សិក្ខាសាលាបានបញ្ជាក់ជាថ្មីនូវការប្តេជ្ញាចិត្តរួមគ្នារបស់ស្ថាប័នរដ្ឋ ដៃគូអភិវឌ្ឍន៍ តួអង្គវិស័យឯកជន និងសហគមន៍កសិកម្ម ដើម្បីកសាងប្រព័ន្ធស្បៀងដែលធន់ បរិយាបន្ន និងប្រកបដោយចីរភាពនៅកម្ពុជា។ តាមរយៈភាពជាដៃគូកាន់តែរឹងមាំ និងការច្នៃប្រឌិតដែលដឹកនាំដោយកសិករ អង្គការហេហ្វឺកម្ពុជា និងដៃគូ មានគោលបំណងពន្លឿនការផ្លាស់ប្តូរសេដ្ឋកិច្ចជនបទ ព្រមទាំងជំរុញភាពធន់នឹងអាកាសធាតុ និងសន្តិសុខស្បៀងនៅទូទាំងប្រទេសផងដែរ៕

The post ពលរដ្ឋជាង៥ម៉ឺនគ្រួសារនៃ១៣ខេត្ត​ទទួលបានការបណ្តុះបណ្តាលលើជំនាញលើកកម្ពស់ទិន្នផលកសិកម្ម appeared first on Kampuchea Thmey Daily.