ក្រុមជម្រើសជាតិ Archives - Kampuchea Thmey Daily

លោក Honda នឹងមកកម្ពុជា ជួបអ្នកសារព័ត៌មាន ដើម្បីផ្ញើពាក្យពេចន៍ទៅកាន់អ្នកគាំទ្រ

Sokhom Khon — Sat, 22 Oct 2022 08:00:38 +0000

អ្នកចាត់ការទូទៅក្រុមជម្រើសជាតិកម្ពុជា លោក Keisuke Honda បានប្រកាសថា នឹងជួបអ្នកសារព័ត៌មាន ដោយនឹងមានជាការដេញដោលសួរសំណួរ ដើម្បីផ្ញើពាក្យពេចន៍ទៅកាន់អ្នកគាំទ្រ។

តាមការប្រកាសរបស់អ្នកចាត់ការជនជាតិជប៉ុនរូបនេះបានបញ្ជាក់ថា «ខ្ញុំនឹងមកកម្ពុជា ដើម្បីមានពាក្យបាននិយាយទៅកាន់អ្នកគាំទ្រ និងក្លិបបាល់ទាត់នានា នៅថ្ងៃទី២៦ ខែតុលា។ ជួបគ្នាឆាប់ៗ។»

ក្រោយការប្រកាសនេះរួច ‘កម្ពុជាថ្មី’ បានស៊ើបសួរ និងបានដឹងថា លោកមានគម្រោងជួបជាមួយអ្នកសារព័ត៌មាន ក៏ដូចជាក្លិបនានានៅលីគបាល់ទាត់កម្ពុជា នៅការិយាល័យរបស់ក្រុមហ៊ុនលីគ (CPL) ខណៈពេលវេលាពុំទាន់ត្រូវបានបញ្ជាក់ឱ្យដឹងនៅឡើយ។

ការជួបជាមួយអ្នកសារព័ត៌មានផ្ទាល់បែបនេះ ត្រូវបានគេរំពឹងថា លោកទំនងជាមានពាក្យនិយាយក្នុងចិត្តជាច្រើន ដ្បិតលទ្ធផលរបស់ក្រុមជម្រើសជាតិកម្ពុជា ទាំងឈុតធំ និងឈុតយុវជន ជាពិសេសឈុតដែលត្រូវលេងស៊ីហ្គេម ឆ្នាំ២០២៣ហាក់ធ្វើពុំសូវបានល្អ និងទទួលការរិះគន់ពីអ្នកគាំទ្រ។

នេះអាចជាការចង់បញ្ជាក់ពីផែនការ ក៏ដូចជាគោលដៅថ្មីសម្រាប់បាល់ទាត់កម្ពុជា ដែលនៅចុងឆ្នាំនេះ មានការប្រកួតជើងឯកប្រចាំតំបន់អាស៊ីអាគ្នេយ៍ (AFF Mitsubishi Electric Cup 2022) ឬគេនិយមស្គាល់ថា ‘AFF Suzuki Cup’ នៅខែពាក់កណ្ដាលខែធ្នូខាងមុខ និងរឹតតែពិសេសគឺឆ្នាំក្រោយ មានការប្រកួតកីឡាអាស៊ីអាគ្នេយ៍ លើកទី៣២ដែលកម្ពុជាធ្វើជាម្ចាស់ផ្ទះ ហើយបានដាក់គោលដៅយូរឆ្នាំមកហើយថាចង់ឈ្នះមេដាយមាស៕

អត្ថបទ៖ មន្នីរ័ត្ន

The post លោក Honda នឹងមកកម្ពុជា ជួបអ្នកសារព័ត៌មាន ដើម្បីផ្ញើពាក្យពេចន៍ទៅកាន់អ្នកគាំទ្រ appeared first on Kampuchea Thmey Daily.

គ្រូអូស្ត្រាលី សរសើរពី U-17 កម្ពុជា ដែលមានការប្រមូលផ្ដុំយូរជាងក្រុមរបស់ខ្លួន

Sorn Phanith — Tue, 04 Oct 2022 09:08:04 +0000

លោក Brad Maloney គ្រូបង្វឹកនៃក្រុមជម្រើសជាតិអូស្ត្រាលីអាយុក្រោម ១៧ ឆ្នាំ បានបញ្ជាក់ថា លោកបានដឹងពីកម្ពុជា មានការប្រមូលផ្ដុំយូរជាក្រុមរបស់ខ្លួន មុនការប្រកួតក្នុងវគ្គជម្រុះពានយុវជនអាស៊ីអាយុក្រោម ១៧ ឆ្នាំ (AFC U-17 Asian Cup) ដែលចាប់ផ្ដើមស្អែកនេះ។

ថ្លែងក្នុងកិច្ចសម្ភាសន៍ លោក Maloney បាននិយាយថា៖ «យើងត្រូវតែគោរពគូប្រកួតរបស់យើងទាំងអស់ វានឹងក្លាយជាពូលដ៏លំបាក។ យើងមិនដឹងច្រើនពីគូប្រកួតនោះទេ ដោយសារការផ្អាកក្នុងរយៈពេលប៉ុន្មានឆ្នាំចុងក្រោយនេះ ប៉ុន្តែយើងរំពឹងថានឹងមានការប្រកួតប្រជែងពីក្រុមទាំង ៣។»

«បណ្តាប្រទេសនៅទូទាំងអាស៊ីអាគ្នេយ៍ និងអាស៊ីបូព៌ា កំពុងវិនិយោគយ៉ាងច្រើននៅក្នុងការប្រកួត ជាពិសេសនៅកម្រិតយុវជន និងការអភិវឌ្ឍន៍។ ខ្ញុំដឹងថាក្រុមកម្ពុជា មានក្រុមកីឡាករស្នូលដែលរួមគ្នាជាយូរណាស់មកហើយ ឥឡូវនេះកំពុងរៀបចំការប្រកួតនេះ ហើយចិនបានមកប្រទេសអូស្ត្រាលីជិតមួយខែហើយ ដូច្នេះពួកគេយកចិត្តទុកដាក់យ៉ាងខ្លាំង ហើយយើងដឹងថាយើងមាន កិច្ចការដ៏លំបាកនៅខាងមុខ នាកីឡដ្ឋាន Shepparton។» លោក Maloney បាននិយាយបន្ថែម។

AFC U-17 Asian Cup 2023 Qualifiers នេះគឺជាលើកទី ១ ហើយដែលអូស្ត្រាលីធ្វើជាម្ចាស់ផ្ទះនៃវគ្គជម្រុះ ចាប់តាំងពីឆ្នាំ ២០០៩ ហើយបង្ហាញពីឱកាសពិសេសសម្រាប់យុវជន ដើម្បីលេងចំពោះមុខក្រុមគ្រួសារ និងមិត្តភក្តិ របស់ពួកគេ។

Maloney បានបន្តទៀតថា៖ «ខ្ញុំគ្រាន់តែចង់ឱ្យពួកគេរីករាយនឹងបទពិសោធន៍ និងប្រើប្រាស់វាជាឱកាសដើម្បីបង្ហាញជំនាញរបស់ពួកគេនៅលើឆាកអន្តរជាតិ។ ខ្ញុំពិតជាសង្ឃឹមថា ពួកគេអាចយកវាក្នុងការបោះជំហានរបស់ពួកគេ ដែលខ្ញុំប្រាកដថាពួកគេនឹងធ្វើដូចដែលយើងសម្លឹងរកការប្រកួតជម្រុះសម្រាប់ AFC U-17 Asian Cup 2023»។

សូមបញ្ជាក់ថាពីថ្ងៃទី ០៥ ដល់ថ្ងៃទី ០៩ នៅខែតុលា ឆ្នាំ ២០២២ U-17 កម្ពុជា នឹងចូលរួមប្រកួតវគ្គជម្រុះពានយុវជនអាស៊ីអាយុក្រោម ១៧ ឆ្នាំ (AFC U-17 Asian Cup) នៅប្រទេសអូស្ត្រាលី។ កម្ពុជា ស្ថិតនៅពូល G ជាមួយម្ចាស់ផ្ទះទឹកដីកណ្ដាល អូស្ត្រាលី, ចិន និងកោះម៉ារីណាខាងជើង៕

អត្ថបទ៖ មន្នីរ័ត្ន

The post គ្រូអូស្ត្រាលី សរសើរពី U-17 កម្ពុជា ដែលមានការប្រមូលផ្ដុំយូរជាងក្រុមរបស់ខ្លួន appeared first on Kampuchea Thmey Daily.

ប្រធានក្រុមជម្រើសជាតិ សឿយ វិសាល ទុកការប្រកួតជាមួយទីម័រ ដើម្បីរកចំណុចខ្លាំង និងខ្សោយ

Kang Tola — Wed, 01 Jun 2022 10:43:48 +0000

ក្រុមបាល់ទាត់ជម្រើសជាតិកម្ពុជា នឹងត្រូវប្រកួតមិត្តភាពអន្តរជាតិជាមួយ ក្រុមជម្រើសជាតិទីម័រខាងកើត នាល្ងាចថ្ងៃទី០២ ខែមិថុនា ឆ្នាំ២០២២ ស្អែកនេះ ខណៈសមាជិកក្រុមព្រះខ័នរាជស្វាយរៀង និងជាប្រធានក្រុមជម្រើសជាតិ កីឡាករ សឿយ វិសាល បានត្រៀមខ្លួនរួចជាស្រេចសម្រាប់ការប្រកួតនេះ។

ថ្លែងក្នុងសន្និសីទសារព័តមានមុនការប្រកួតមកដល់ សឿយ វិសាល បាននិយាយដូច្នេះថា «សម្រាប់ចំណាប់អារម្មណ៍របស់ខ្ញុំ នៅការប្រកួតថ្ងៃស្អែក វាជាការប្រកួតមួយដែលល្អសម្រាប់ក្រុមរបស់ពួកយើងដើម្បីស្វែងរកចំណុចខ្វះខាត និងចំនុចល្អដើម្បីយើងត្រៀមលេងអាស៊ានខាប់ (AFC Asian Cup) នៅឥណ្ឌា។ ការប្តេជ្ញាចិត្តពួកយើងនឹងប្រឹងប្រែងឱ្យអស់ពីសមត្ថភាពដើម្បីស្វែងរកជ័យជម្នះជូនប្រទេសរបស់យើង និងអ្នកគាំទ្ររបស់ពួកយើង។»

«ការលេងជាមួយទីម័រ កាលយើងជាមួយពីមុន ទម្រង់របស់ពួកគេក៏មានចំនុចល្អរបស់គេច្រើន ហើយកម្រិតរបស់គេជាមួយយើងក៏មិនលើសខ្វះគ្នាប៉ុន្មានដែរ តែបើឥលូវខ្ញុំគិតថាពួកគេហ៊ានលេង ពេលដែលយើងបានចាញ់គេ។ ហើយសម្រាប់ការប្រកួតថ្ងៃស្អែកយើងរង់ចាំមើលបន្ថែមទៀត។» ប្រធានក្រុមព្រះខ័នរាជស្វាយរៀងដដែលរូបនេះបានបន្ត។

សូមបញ្ជាក់ថា ការប្រកួតរវាង កម្ពុជា ជាមួយ ទីម័រខាងកើត នាវេលាម៉ោង ៧យប់ ថ្ងៃទី០២ ខែមិថុនា ឆ្នាំ២០២២ នៅពហុកីឡដ្ឋានជាតិមរតកតេជោ និងមានការផ្សាយផ្ទាល់តាមរយៈស្ថានីយទូរទស្សន៍បាយ័ន និង BTV News ផងដែរ៕

អត្ថបទ ៖ មន្នីរ័ត្ន

The post ប្រធានក្រុមជម្រើសជាតិ សឿយ វិសាល ទុកការប្រកួតជាមួយទីម័រ ដើម្បីរកចំណុចខ្លាំង និងខ្សោយ appeared first on Kampuchea Thmey Daily.

កីឡាករកូនកាត់ខ្មែរអាមេរិក១រូប កំពុងត្រូវបានអ្នកស្នេហាវិស័យបាល់ទាត់ ចង់ឃើញចូលក្រុមជម្រើសជាតិកម្ពុជា

Kang Tola — Thu, 26 May 2022 14:46:34 +0000

កីឡាករ Nick Taylor ដែលថ្មីៗនេះត្រូវបាននិយាយព្រោងព្រាតថាជាកីឡាករ ១រូបលេងនៅលីគទី៣ សហរដ្ឋអាមេរិក ដែលមានឈាមជ័រកូនកាត់ខ្មែរ ខណៈរូបគេត្រូវបានមើលឃើញសមត្ថភាព និងចង់ឱ្យចូលរួមជាមួយក្រុមជម្រើសជាតិកម្ពុជា។

ខ្សែប្រយុទ្ធ Nick Taylor កើតនៅរដ្ឋតិចសាស សហរដ្ឋអាមេរិក មានម្តាយជាជនជាតិខ្មែរ និងឪពុកជនជាតិអាមេរិក។ គេមានវ័យ២៣ឆ្នាំ និងកំពុងប្រកបអាជីពក្នុងក្រុម Orlando City B នៃលីគលំដាប់ទី៣ MSL Next Pro របស់សហរដ្ឋអាមេរិក។

Nick Taylor មានកម្ពស់ ១.៧៨ម៉ែត្រ គឺជាថ្នាលយុវជនរបស់ក្រុម Dallas Texans, New Mexico Lobos, SMU Mustangs និង UCF Knights មុនផ្លាស់មកកាន់ Orlando City B នៅដើមឆ្នាំ ២០២២៕

បន្ទាប់ពីដឹងដំណឹង ជាពិសេសបានឃើញវីដេអូសមត្ថភាពរបស់គេ មានអ្នកគាំទ្រមួយចំនួនធំ បានសំណូមពរសហព័ន្ធកីឡាបាល់ទាត់កម្ពុជា ឱ្យធ្វើការកោះហៅមកចូលរួមក្រុមជម្រើសជាតិ ខណៈបច្ចុប្បន្នក៏កំពុងត្រៀមបេសកកម្មប្រកួតជម្រុះពានរង្វាន់ជើងឯកទ្វីបអាស៊ី (AFC Asian Cup) ពីថ្ងៃទី០៨-១៦ ខែមិថុនា នៅប្រទេសឥណ្ឌា ថែមទៀតផង។

លើសពីនេះទៅទៀត រូបគេក៏ត្រូវបានឃើញអ្នកចាត់ការក្រុមជម្រើសជាតិ លោក ឈូក ពិសិដ្ឋ ដែលជាអ្នករៀបចំកិច្ចការនានារបស់ក្រុមជម្រើសជាតិកម្ពុជា គ្រប់ឈុត ចុចតាមដាន (Follow) នៅលើបណ្ដាញទំនាក់ទំនងសង្គម Instagram ថែមទៀត ដែលអាចបានសេចក្ដីថាលោក ក៏ដូចជាក្រុមការងារបានចាប់អារម្មណ៍លើរូបគេផងដែរ ហើយអាចនឹងមានទំនាក់ទំនងអ្វីមួយនៅពីក្រោយក៏ថាបាន។

ប៉ុន្តែយ៉ាងណាមិញ គេនៅរង់ចាំមើលផងដែរ ដ្បិតពេលវេលានៃការប្រកួតរបស់ក្រុមជម្រើសជាតិនាពេលខាងមុខ គឺនៅសេសសល់ប្រហែលជិត ២សប្ដាហ៍៕

អត្ថបទ ៖ មន្នីរ័ត្ន

The post កីឡាករកូនកាត់ខ្មែរអាមេរិក១រូប កំពុងត្រូវបានអ្នកស្នេហាវិស័យបាល់ទាត់ ចង់ឃើញចូលក្រុមជម្រើសជាតិកម្ពុជា appeared first on Kampuchea Thmey Daily.

លឹម ពិសុទ្ធ ត្រូវសម្រាក៦សប្ដាហ៍ ខកខានជួយទាំងជម្រើសជាតិ និងក្លិបប្រកួតនៅឆាកអន្តរជាតិ

Sokhom Khon — Thu, 26 May 2022 06:36:32 +0000

នៅព្រឹកថ្ងៃទី២៦ ខែឧសភា កីឡាករ លឹម ពិសុទ្ធ ត្រូវបានក្លិបភ្នំពេញក្រោនប្រកាសជាផ្លូវការថា នឹងត្រូវសម្រាករយៈពេល ៥ទៅ៦សប្ដាហ៍ ដែលបានសេចក្ដីថា នឹងខកខានជួយក្រុមជម្រើសជាតិ រួមទាំងក្លិបរបស់ខ្លួនប្រកួតក្នុងពានរង្វាន់អន្តរជាតិនានា ក្នុងខែមិថុនា ខាងមុខនេះ។

កីឡាករ លឹម ពិសុទ្ធ មានបញ្ហារបួសសសៃពួរកជើងខាងឆ្វេង បន្ទាប់ពីមានការប៉ះទង្គិចគ្នាក្នុងការប្រកួតជាមួយក្រុមណាហ្គាវើលដ៍ នាពេលកន្លងទៅថ្មីៗនេះ ដែលតម្រូវឱ្យសម្រាកព្យាបាលរយៈពេលពី ៥ ទៅ ៦ សប្តាហ៍។

ដូច្នេះរូបគេនឹងអវត្តមានពីបញ្ជីក្រុមជម្រើសជាតិឈុតធំ ដើម្បីប្រកួតមិត្តភាពជាមួយ ទីម័រខាងកើត នៅពហុកីឡដ្ឋានជាតិមរតកតេជោ នាថ្ងៃទី០២ មិថុនា និងត្រៀមប្រកួតជម្រុះពានរង្វាន់ជើងឯកទ្វីបអាស៊ី (AFC Asian Cup) ពីថ្ងៃទី០៨-១៦ ខែមិថុនា នៅប្រទេសឥណ្ឌា។ លើសពីនេះទៅទៀតគេក៏អាចនឹងខកខានជួយក្លិបភ្នំពេញក្រោន ប្រកួតក្នុងពានរង្វាន់ក្លិបបាល់ទាត់លំដាប់ទី២ ប្រចាំទ្វីបអាស៊ី (AFC Cup 2022) នាមជាក្លិបតំណាងកម្ពុជា (ក្រោយឈ្នះលីគកំពូលកម្ពុជា ឆ្នាំ២០២១) នាខែក្រោយដូចគ្នាផងដែរ ដែលគេគ្រោងប្រកួតពីថ្ងៃទី២៤-៣០ ខែមិថុនា នៅទឹកដីកណ្ដាល នាប្រទេសវៀតណាម។

គួររំឮកថាប្រសិនបើ លឹម ពិសុទ្ធ រងរបួសរហូតដល់ឈានមិនអាចចូលរួមប្រកួត នោះវានឹងក្លាយជាលើកទី២ ហើយសម្រាប់រូបគេដែលដកខ្លួនពីជម្រើសជាតិដោយសារបញ្ហារបួស ខណៈកាលពីដើមឆ្នាំគេបានជួបបញ្ហារបួសម្ដងហើយ គឺបែកទ្រនាប់ជង្គង់ ក្នុងអំឡុងពេលប្រមូលផ្ដុំជម្រើសជាតិអាយុក្រោម ២៣ឆ្នាំកម្ពុជា ប្រកួតក្នុងពានរង្វាន់ AFF U-23 Championship ដែលកម្ពុជា ធ្វើជាម្ចាស់ផ្ទះ ខណៈក្រោយមកគេទើបតែជាសៈស្បើយ និងបានជួយក្រុមប្រកួតក្នុងស៊ីហ្គេម លើកទី៣១ នៅប្រទេសវៀតណាម៕

អត្ថបទ៖ មន្នីរ័ត្ន

The post លឹម ពិសុទ្ធ ត្រូវសម្រាក៦សប្ដាហ៍ ខកខានជួយទាំងជម្រើសជាតិ និងក្លិបប្រកួតនៅឆាកអន្តរជាតិ appeared first on Kampuchea Thmey Daily.

ថា ច័ន្ទឬទ្ធី ដាក់ការខិតខំប្រឹងប្រែងចង់ជាប់ជម្រើសជាតិទៅស៊ីហ្គេមជាលើកដំបូង

vann sokunthea — Sun, 17 Apr 2022 09:11:00 +0000

អ្នកចាំទីរបស់ក្លិបបាល់ទាត់គីរីវង់សុខសែនជ័យ (ខ្ចីជើងពីក្លិបបឹងកេត) កីឡាករ ថា ច័ន្ទឬទ្ធី បានសម្ដែងនូវក្ដីរំពឹង លាយឡំជាមួយក្ដីមន្ទិលក្នុងដំណើរស្វែងរកឱកាសទៅលេងស៊ីហ្គេមជាលើកដំបូងក្នុងអាជីពរបស់ខ្លួន។

កីឡាករវ័យ ២០ឆ្នាំរូបនេះ ក៏ធ្លាប់ជាសមាជិកនៃក្រុមជម្រើសជាតិកម្ពុជា អាយុក្រោម១៩ឆ្នាំ ដែលបានរួមចំណែកជួយឲ្យបានឡើងទៅប្រកួតជុំចុងក្រោយនៃពានរង្វាន់យុវជនអាស៊ី អាយុក្រោម ១៩ឆ្នាំ (AFC U-19 Championship 2020) កាលពីឆ្នាំ២០២០ ផងដែរ ក្រោយប្រកួតជម្រុះជោគជ័យពេលកម្ពុជាធ្វើម្ចាស់ផ្ទះ។ ប៉ុន្តែក្រោយមក ពាននេះ ត្រូវបានលុបចោលដោយសារវិបត្តិកូវីដ១៩ និងបន្ទាប់មករូបគេក៏បានអាក់ខានជាប់ជម្រើសជាតិយុវជនចាប់តាំងពីពេលនោះមក។

យ៉ាងណាមិញបច្ចុប្បន្ន រូបគេ បាននឹងកំពុងតាំងចិត្ត ដើម្បីខិតខំធ្វើយ៉ាងណាអាចជាប់ជម្រើសជាតិទៅស៊ីហ្គេមលើកដំបូង ដ្បិតរូបខ្លួនក៏បានស្វែងយល់ពីចំណុចដែលគ្រូជម្រើសជាតិត្រូវការផងដែរ។ ប៉ុន្តែទន្ទឹមនឹងនេះ ក៏មានឧបសគ្គខ្លះសម្រាប់រូបគេ។

អ្នកចាំទីរូបនេះបានប្រាប់«កម្ពុជាថ្មី» យ៉ាងដូច្នេះថា៖ «នៅជម្រើសជាតិ គេផ្ដោតទៅលើការលេងរបៀបរៀបចំ (Build-up) ហើយទាមទារឱ្យពូកែជើង ប៉ុន្តែវាក៏មានផលប៉ះពាល់ខ្លះដល់ខ្ញុំ ដោយសារនៅក្លិបរបស់ខ្ញុំ គេមិនប្រើប្រាស់ទម្រង់លេងបែបនេះឡើយ»។

តែទោះជាយ៉ាងណា ថា ច័ន្ទឬទ្ធី នៅតែដាក់ចិត្តហ្វឹកហាត់ដោយខ្លួនឯង បើទោះបីជាលេងនៅក្លិបមិនត្រូវទម្រង់របស់ក្រុមជម្រើសជាតិ។ អ្នកចាំទី ថា ឬទ្ធី បានសង្កត់ធ្ងន់បែបនេះថា ៖ «ពេលហ្វឹកហាត់ ខ្ញុំហាត់លេងជើងដោយខ្លួនឯង តែដល់ការប្រកួតខ្ញុំត្រូវធ្វើតាមគ្រូចង់បាន ទោះជាយ៉ាងណា ខ្ញុំនឹងខិតខំហ្វឹកហាត់រាល់ថ្ងៃ ហើយសង្ឃឹមថា ជម្រើសជាតិ នឹងផ្ដល់ឱកាសក្នុងនាមខ្ញុំត្រូវអាយុលេងស៊ីហ្គេម ឆ្នាំ២០២៣»។

សូមបញ្ជាក់ថា ថា ច័ន្ទឬទ្ធី បានចាប់ផ្ដើមដំបូងជាយុវជនថ្នាលរបស់ក្រុមសាលាបាល់ទាត់ជាតិបាទី បន្ទាប់មកបានផ្លាស់មកចូលរួមជាមួយក្លិបបាល់ទាត់បឹងកេត នៅរដូវកាល២០២០ ខណៈនៅឆ្នាំ២០២២ បានផ្លាស់មកចូលរួមជាមួយ ក្លិបគីរីវង់សុខសែនជ័យ ក្នុងលក្ខខណ្ឌខ្ចីជើង៕

អត្ថបទ៖ មន្នីរ័ត្ន

The post ថា ច័ន្ទឬទ្ធី ដាក់ការខិតខំប្រឹងប្រែងចង់ជាប់ជម្រើសជាតិទៅស៊ីហ្គេមជាលើកដំបូង appeared first on Kampuchea Thmey Daily.

U23ហុងកុង បានមកនៅក្នុងពូលK ជា មួយកម្ពុជា និងជប៉ុន នៃវគ្គជម្រុះ AFC U23 Asian Cup 2022

Kang Tola — Wed, 11 Aug 2021 13:12:28 +0000

ពេលនេះ ក្រុមU23ហុងកុង ដែលជំនួសឲ្យក្រុមកូរ៉េខាងជើង បានមកនៅក្នុងពូលK ជាមួយកម្ពុជានិងជប៉ុនហើយ ក្រោយការចាប់ឆ្នោតរួចកាលពីរសៀលថ្ងៃមិញនេះ។

ពិធីចាប់ឆ្នោតស្វែងរកក្រុមបង្គ្រប់ពូល K នៃ វគ្គ ជម្រុះពានរង្វាន់ AFC U-23 Asian Cup 2022 បាន បញ្ចប់ហើយ នៅរសៀលថ្ងៃទី ១១ ខែ សីហានេះ ដោយ លទ្ធផល ក្រុម U23 ហុងកុង ត្រូវបានចាប់ឆ្នោតចូលពូល ជាមួយក្រុមជម្រើសជាតិអាយុក្រោម ២៣ឆ្នាំ កម្ពុជា និង ជប៉ុន។

ការចាប់ឆ្នោតនេះ ធ្វើឡើងក្រោយក្រុម U23 កូរ៉េខាងជើងបានដកខ្លួន កាលពីពេលថ្មីៗ ដែលនាំឲ្យបេក្ខភាពពូល K សល់ត្រឹម ២ក្រុម គឺកម្ពុជា និងជប៉ុន។ ដោយហេតុនេះ ដើម្បីអាចបន្ដការប្រកួតពូលនេះបាន សហព័ន្ធកីឡាបាល់ ទាត់ទ្វីបអាស៊ី (AFC) ក៏បានសម្រេចធ្វើការចាប់ឆ្នោតពូល G, H, I និងពូល J ចំនួន ៨ ក្រុម ដើម្បីស្វែងរក១ក្រុម មកបង្គ្រប់ពូល K ឲ្យបាន ៣ក្រុមឡើងវិញ។

ចំពោះ ៨ក្រុម ដែលត្រូវបានជ្រើសរើសចូលមកចាប់ ឆ្នោតឡើងវិញ រួមមានពូល G មានចិន និងព្រុយណេ, ពូល H មានទីម័រខាងកើត និងហ្វីលីពីន, ពូល I មានមីយ៉ាន់ម៉ា និងហុងកុង និងពូល J មានម៉ាឡេស៊ី និងឡាវ។ ជាលទ្ធផលហុងកុង ដែលស្ថិតក្នុងពូល I បានចាប់ឆ្នោតចូលមកពូល K ជាមួយកម្ពុជា និងជប៉ុន ធ្វើឲ្យពូល I សល់ ៣ក្រុម ដូចគ្នា គឺមានវៀតណាម មីយ៉ាន់ម៉ា និងឆាយនីសតៃប៉ិ។

សម្រាប់កម្មវិធីប្រកួតជម្រុះពានរង្វាន់ជើងឯកអាយុក្រោម ២៣ឆ្នាំប្រចាំទ្វីបអាស៊ីនេះ គ្រោងចាប់ផ្ដើមពីថ្ងៃទី២៣ ដល់ថ្ងៃទី៣១ ខែ តុលា ឆ្នាំ២០២១ ខាងមុខ ដើម្បីចម្រាញ់រកក្រុមខ្លាំង ឡើងទៅជុំចុងក្រោយ នៅប្រទេសអ៊ូបេគីស្ថាន ដែលគ្រោងធ្វើការប្រកួតពីថ្ងៃទី ០១ដល់១៩ ខែមិថុនា ឆ្នាំ ២០២២ ក្នុងនោះ ពូល K ដែលមានបេក្ខភាពក្រុមគោ ព្រៃកម្ពុជា នឹងប្រកួតនៅទឹកដីកណ្ដាល នៃប្រទេសជប៉ុន៕

ដោយ ៖ វិសិទ្ធ

The post U23ហុងកុង បានមកនៅក្នុងពូលK ជា មួយកម្ពុជា និងជប៉ុន នៃវគ្គជម្រុះ AFC U23 Asian Cup 2022 appeared first on Kampuchea Thmey Daily.

លោក វ៉ាត់ ចំរើន អំពាវនាវឲ្យសហព័ន្ធកីឡាជាតិយកការសម្រេចនៃការពន្យារពេលស៊ីហ្គេមនៅវៀតណាមធ្វើជាផែនការហ្វឹកហាត់

Kang Tola — Sat, 10 Jul 2021 13:18:37 +0000

គណៈកម្មាធិការជាតិអូឡាំពិកកម្ពុជា (NOCC) បានអំពាវនាវឲ្យសហព័ន្ធកីឡាជាតិនានាយកការសម្រេចនៃការពន្យារពេលស៊ីហ្គេមលើកទី៣១នៅប្រទេសវៀតណាម ពីចុងឆ្នាំ២០២១ ទៅអំឡុងពាក់កណ្តាលឆ្នាំ២០២២ យកទៅធ្វើជាផែនការហ្វឹកហាត់ក្រុមជម្រើសជាតិរបស់ខ្លួនឲ្យបានសស្រាក់សស្រាំ ដោយសារការពន្យារពេលស៊ីហ្គេមនៅវៀតណាមនេះគឺជាឱកាសល្អ ដែលកម្ពុជាយើងនៅមានពេលវេលាបន្ថែមទៀត ក្នុងការត្រៀមខ្លួនចូលរួមប្រកួតដណ្តើមមេដាយ។ នេះជាការលើកឡើងរបស់លោក វ៉ាត់ ចំរើន អគ្គលេខាធិការតំណាងលោកបណ្ឌិត ថោង ខុន ប្រធានគណៈកម្មាធិការជាតិអូឡាំពិកកម្ពុជា នៅក្រោយបញ្ចប់កិច្ចប្រជុំអនឡាញជាមួយគណៈអចិន្ត្រៃយ៍ក្រុមប្រឹក្សាកីឡាអាស៊ីអាគ្នេយ៍ (SEA Gamse)។

លោកអគ្គលេខាធិការបញ្ជាក់ថា ថ្វីដ្បិត តែយើងមានពេលវេលាច្រើនសម្រាប់ការ ចូលរួមស៊ីហ្គេម នៅប្រទេសវៀតណាម ក៏ពិតមែន ប៉ុន្តែយើងក៏បានបាត់បង់ពេលវេលាច្រើនដែរ ក្នុងការហ្វឹកហាត់ដោយសារ ស្ថានភាពវិបត្តិជំងឺកូវីដ-១៩។ ជាមួយគ្នានោះ លោកអគ្គលេខាធិការលើកទឹកចិត្តឲ្យកីឡាករ កីឡាការិនីជម្រើសជាតិគ្រប់ប្រភេទកីឡាទាំងអស់ បន្តកិច្ចខិតខំប្រឹងប្រែងហ្វឹកហាត់ឲ្យបានខ្លាំងក្លា ដើម្បីសម្រួចគោលដៅប្រជែងមេដាយ នៅក្នុងព្រឹត្តិការណ៍ កីឡាស៊ីហ្គេម លើកទី៣១ នៅប្រទេសវៀតណាម ដែលជាហ្គេមយុទ្ធសាស្ត្រចុង ក្រោយរបស់កម្ពុជា ក្នុងការសម្រួចគោល ដៅ ឆ្ពោះទៅទទួលរៀបចំធ្វើម្ចាស់ផ្ទះស៊ីហ្គេម លើកទី៣២ និងការប្រកួតកីឡាជនពិការអាស៊ានប៉ារ៉ាហ្គេម លើកទី១២ ឆ្នាំ ២០២៣។ ដូច្នេះហើយការពន្យារពេលស៊ីហ្គេម នៅវៀតណាមទៅឆ្នាំ២០២២ គឺជាឱកាសត្រៀមខ្លួនអភិវឌ្ឍគុណផលកីឡារបស់ក្រុមជម្រើសជាតិកម្ពុជាឲ្យបានគត់ មត់ និងកាន់តែល្អប្រសើរបន្ថែមទៀត។

លោក វ៉ាត់ ចំរើន បានប្រាប់ឲ្យដឹងទៀតថា នៅក្នុងកិច្ចប្រជុំក្រុមប្រឹក្សាកីឡាអាស៊ី លោក ក៏បានស្នើសុំដល់សមាជិកនៃកីឡាអាស៊ីអាគ្នេយ៍ទាំងអស់ សូមឲ្យចូលរួមផ្សព្វផ្សាយ ចូលរួមគាំទ្របន្ថែមទៀត ដល់ស៊ីហ្គេមនៅកម្ពុជា ដែលកម្ពុជានឹងត្រូវបើកយុទ្ធនាការជាតិផ្សព្វផ្សាយពេលឆាប់ៗខាង មុខនេះ។ ប្រទេសទាំងអស់បានឯកភាព ហើយបានកោតសរសើរ និងបានវាយតម្លៃខ្ពស់ថា កម្ពុជាពិតជាមានជំហរច្បាស់ លាស់និងពិតប្រាកដ នៅក្នុងការត្រៀមធ្វើម្ចាស់ផ្ទះឆ្នាំ២០២៣ ហើយប្រទេសទាំង អស់រង់ចាំជួយជ្រោមជ្រែងការផ្សព្វផ្សាយក្នុងការបើកយុទ្ធនាការផ្សព្វផ្សាយនេះទាំងអស់គ្នានៅគ្រប់ប្រទេសទាំងអស់ ។ កម្ពុជាយើងមានមោទនភាពដោយយើងបានធ្វើកិច្ចការនេះមួយជំហានមុន និងមានវិធានការដ៏ច្បាស់លាស់។

ដោយឡែក ចំណុចដ៏សំខាន់មួយទៀត គឺការប្រកួតកីឡាអូឡាំពិក នៅទីក្រុងតូក្យូ ប្រទេសជប៉ុន ចាប់ពីថ្ងៃទី២៣ ខែកក្កដា ឆ្នាំ២០២១តទៅនោះ គឺថាបណ្តាប្រទេសនានាក្នុងអាស៊ីអាគ្នេយ៍នឹងយកវិធានការទប់ស្កាត់កូវីដ-១៩ ដែលត្រូវបានចែងនៅ ក្នុងអូឡាំពិកអន្តរជាតិ គឺអាស៊ីអាគ្នេយ៍ទាំង មូលនឹងខិតខំរួមគ្នាប្រមែប្រមូលយកវិធាន ការទាំងអស់នោះមកធ្វើជាវិធានការនៃការ ទប់ស្កាត់កូវីដ-១៩ យកមករៀបចំស៊ីហ្គេម នៅវៀតណាម ក៏ដូចជាស៊ីហ្គេមនៅកម្ពុជា ឆ្នាំ២០២៣ផងដែរ ប្រសិនបើជាស្ថានភាពនៅតែមាន។

ទាំងអស់នេះជាគំនិត និងជាយុទ្ធសាស្ត្រចម្បង ដែលប្រទេសទាំងអស់ថាត្រូវតែរួមគ្នាឈរឲ្យរឹងមាំនៅក្នុងការរៀប ចំព្រឹត្តិការណ៍កីឡាឲ្យបាន ទោះបីជាក្នុងដំណាក់កាលកូវីដ នៅសល់ឥទ្ធិពលខ្លះៗក៏ដោយ ប៉ុន្ដែយើងត្រូវតែនាំគ្នារៀបចំ ដើម្បី ឲ្យជីវិតនៃចលនាកីឡាចលនាអូឡាំពិក និងជួយដល់កីឡាករ កីឡាការិនី ដែលខិតខំហ្វឹកហាត់ត្រៀមប្រកួតនេះឲ្យសម្រេចបានដល់គោលដៅរបស់ខ្លួនប្រកបដោយក្តីមោទនផងដែរ។

សូមបញ្ជាក់ថា ការប្រកួតកីឡាស៊ីហ្គេម លើកទី៣១ នៅប្រទេសវៀតណាម ដែលគ្រោងនឹងរៀបចំចុងឆ្នាំ២០២១ ត្រូវបានពន្យារពេលទៅរៀបចំនាចុងខែមេសា ដល់ដើមខែឧសភា ឆ្នាំ២០២២ ដោយគណៈអចិន្ត្រៃយ៍ស៊ីហ្គេមបានឯកភាពគ្នា ក្រោមការសម្របសម្រួល និងសម្រេចចិត្តយ៉ាងផុលផុស ជាពិសេសគឺបានការឯកភាពគ្នាទាំងស្រុងក្នុងការជួយគ្នាទៅវិញទៅមកជួយបន្ធូរបន្ថយស្ថានភាពតានតឹងនៃវិបត្តិជំងឺកូវីដ-១៩នេះ៕

ដោយ ៖ វិសិទ្ធ

The post លោក វ៉ាត់ ចំរើន អំពាវនាវឲ្យសហព័ន្ធកីឡាជាតិយកការសម្រេចនៃការពន្យារពេលស៊ីហ្គេមនៅវៀតណាមធ្វើជាផែនការហ្វឹកហាត់ appeared first on Kampuchea Thmey Daily.

ក្រុមជម្រើសជាតិ Archives - Kampuchea Thmey Daily

លោក Honda នឹងមកកម្ពុជា ជួបអ្នកសារព័ត៌មាន ដើម្បីផ្ញើពាក្យពេចន៍ទៅកាន់អ្នកគាំទ្រ

គ្រូអូស្ត្រាលី សរសើរពី U-17 កម្ពុជា ដែលមានការប្រមូលផ្ដុំយូរជាងក្រុមរបស់ខ្លួន

ប្រធាន​ក្រុម​ជម្រើសជាតិ សឿយ វិសាល ទុក​ការ​ប្រកួត​ជា​មួយទីម័រ ដើម្បី​រក​ចំណុចខ្លាំង និងខ្សោយ

លឹម ពិសុទ្ធ ត្រូវសម្រាក៦សប្ដាហ៍ ខកខានជួយទាំងជម្រើសជាតិ និងក្លិបប្រកួតនៅឆាកអន្តរជាតិ

ថា ច័ន្ទឬទ្ធី ដាក់ការខិតខំប្រឹងប្រែងចង់ជាប់ជម្រើសជាតិទៅស៊ីហ្គេមជាលើកដំបូង

U23​ហុងកុង បានមក​នៅក្នុង​ពូ​ល​K ជា មួយ​កម្ពុជា និង​ជប៉ុន នៃ​វគ្គ​ជម្រុះ AFC U23 Asian Cup 2022

ប្រធានក្រុមជម្រើសជាតិ សឿយ វិសាល ទុកការប្រកួតជាមួយទីម័រ ដើម្បីរកចំណុចខ្លាំង និងខ្សោយ

U23ហុងកុង បានមកនៅក្នុងពូលK ជា មួយកម្ពុជា និងជប៉ុន នៃវគ្គជម្រុះ AFC U23 Asian Cup 2022