ការកោតសរសើរបែបនេះរបស់ប្រធានក្រុមប្រឹក្សារាជធានីភ្នំពេញបានធ្វើឡើងកាលពីព្រឹកថ្ងៃទី ១៣ ខែឧសភា ឆ្នាំ ២០២៦ នេះ ក្នុងកិច្ចប្រជុំសាមញ្ញលើកទី ២៤ របស់ក្រុមប្រឹក្សារាជធានីភ្នំពេញ អាណត្តិទី ៤ ក្រោមវត្តមាន លោក ម៉ប់ សារិន និង លោក ឯក ឃុនដឿន អភិបាលរងតំណាង លោក ឃួង ស្រេង អភិបាលរាជធានីភ្នំពេញ នៅសាលារាជធានីភ្នំពេញ។

លោក ម៉ប់ សារិន លើកឡើងថា ក្នុងខែមេសា កន្លងមកនេះ អាជ្ញាធរ និង កងកម្លាំងមានសមត្ថកិច្ចរបស់រាជធានីភ្នំពេញ បានអនុវត្តការងារបានយ៉ាងល្អប្រសើរ ទាំងការរក្សាសន្តិសុខសណ្តាប់ធ្នាប់ ការដឹកជញ្ជូនប្រជាពលរដ្ឋ កម្មករ កម្មការិនីរោងចក្រ ទៅលេងស្រុកកំណើត ការបង្ក្រាបបទល្មើស Online Scam ពិសេសការរៀបចំនគរសង្ក្រាន្តឆ្នាំថ្មី ប្រពៃណីជាតិ ឆ្នាំមមី អដ្ឋស័ក ព.ស ២៥៦៩ គ.ស ២០២៦ នៅរាជធានីភ្នំពេញ បានល្អប្រសើរ។

បន្ថែមពីនេះទៀត ក្នុងឱកាសនោះដែរ សមាជិកក្រុមប្រឹក្សារាជធានីភ្នំពេញ ក៏បានលើកឡើងពីការកោតសរសើរចំពោះការអនុវត្តការងាររបស់អាជ្ញាធររាជធានី និង ស្នើឱ្យអាជ្ញាធររាជធានីភ្នំពេញ កែសម្រួលភ្លើងចរាចរណ៍ និង ដាក់ចំណាំងផ្លាតនៅក្បាលក្លូពុះចែកទ្រូងផ្លូវ ដើម្បីកាត់បន្ថយគ្រោះថ្នាក់ចរាចរណ៍។

លោក ឯក ឃុនដឿន លើកឡើងដែរថា ការកោតសរសើររបស់ក្រុមប្រឹក្សារាជធានីភ្នំពេញខាងលើ គឺជាការផ្ដល់កម្លាំងចិត្តដ៏ខ្លាំងក្លាសម្រាប់រដ្ឋបាលរាជធានីភ្នំពេញ ដើម្បីបន្តអនុវត្តការងាររបស់ខ្លួនកាន់តែល្អថែមទៀត។

ដោយឡែកចំពោះការស្នើឱ្យដាក់ចំណាំងផ្លាតនៅក្បាលក្លូពុះចែកទ្រូងផ្លូវ អាជ្ញាធររាជធានីភ្នំពេញ នឹងចាត់ឱ្យមន្ទីរសាធារណការ និង ដឹកជញ្ជូនរាជធានីភ្នំពេញ ចុះពិនិត្យ និង ដាក់ចំណាំងផ្លាតទាំងនេះ ជាមួយនឹងការកែសម្រួលភ្លើងចរាចរណ៍នៅតាមបណ្តាផ្លូវធំៗ មួយចំនួន ផងដែរ៕
អត្ថបទ ៖ ស្រីរ័ត្ន

The post គណៈបញ្ជាការឯកភាពរាជធានី រក្សាសន្តិសុខ រៀបចំនគរសង្ក្រាន្តឆ្នាំថ្មី និង បង្ក្រាបបទល្មើស Online Scam បានល្អប្រសើរ appeared first on Kampuchea Thmey Daily.

ការកោតសរសើររបស់លោក ម៉ប់ សារិន បែបនេះ បានធ្វើឡើងនាព្រឹកថ្ងៃទី១២ មិនា ឆ្នាំ២០២៥នេះក្នុងកិច្ចប្រជុំសាមញ្ញលើកទី១០របស់ក្រុមប្រឹក្សារាជធានីភ្នំពេញ ឆ្នាំទី១ អាណត្តិទី៤ ដោយវត្តមានលោក ឆាយ វីរៈ អភិបាលរងតំណាងលោក ឃួង ស្រេង អភិបាលរាជធានីភ្នំពេញ នៅសាលារាជធានីភ្នំពេញ។

លោក ម៉ប់ សារិន បានលើកឡើងថា ក្នុងខែកុម្ភៈកន្លងមកនេះ បទល្មើសព្រហ្មទណ្ឌ បើទោះបីមានការកើនឡើង ប៉ុន្តែអ្វីដែលជាការកោតសរសើរនោះ រាល់បទល្មើសព្រហ្មទណ្ឌ ដែលបានកើតឡើង គឺកងកម្លាំងបង្ក្រាបបានស្ទើតែ១០០%។ ក្នុងន័យនេះ លោក ម៉ប់ សារិន បានថ្លែងនូវការកោតសរសើរចំពោះអាជ្ញាធរខណ្ឌទាំង១៤ និងមន្ទីរទាំងអស់ចំណុះឱ្យរដ្ឋបាលរាជធានីភ្នំពេញ ដែលបានរួមគ្នាយកអស់កម្លាំងកាយចិត្ត សម្រេចបានលទ្ធផលការងារយ៉ាងល្អប្រសើរ។

លោកប្រធានក្រុមប្រឹក្សារាជធានីភ្នំពេញ បានបន្តថា រដ្ឋបាលរាជធានីភ្នំពេញបានចាត់វិធានការឆ្លើយតបបានល្អប្រសើរជុំវិញការដាក់របាំងពុះចែកទ្រូងផ្លូវ ៦០ម៉ែត្រ និងការបង្កើតផ្លូវថ្មើរជើង (Walk Street)។ ការងារទាំងពីរនេះពិតជាទទួលបាននូវការសាទរពីប្រជាពលរដ្ឋយ៉ាងខ្លាំងក្លា។ លោក ក៏បានស្នើឱ្យអាជ្ញាធរខណ្ឌទាំង១៤ និងសង្កាត់ទាំង១០៥ ជួយធ្វើការផ្សព្វផ្សាយប្រជាពលរដ្ឋឱ្យមកលេងនៅផ្លូវថ្មើរជើងនេះឱ្យកាន់តែបានច្រើនថែមទៀត បើទោះបីពីមួយសប្តាហ៍ទៅមួយសប្តាហ៍ ផ្លូវថ្មើរជើងនេះ ទទួលបានកំណើនប្រជាពលរដ្ឋ ក៏ដូចជាភ្ញៀវទេសចរណ៍ជាតិ-អន្តរជាតិ កើនឡើងយ៉ាងណាក៏ដោយ។

លោក ឆាយ វីរៈ អភិបាលរងរាជធានីភ្នំពេញ បានថ្លែងអំណរអរគុណចំពោះការកោតសរសើរពីក្រុមប្រឹក្សារាជធានីភ្នំពេញចំពោះកិច្ចការងារ ដែលរដ្ឋបាលរាជធានីភ្នំពេញបានអនុវត្តកន្លងមក។ លោក បន្តថា ការកោតសរសើរនេះ គឺជាការលើកទឹកចិត្តដ៏ធំធេង ដើម្បីឱ្យរដ្ឋបាលរាជធានីភ្នំពេញបន្តអនុវត្តការងារកាន់តែល្អប្រសើរបន្ថែមទៀត។

បើតាមរបាយការណ៍របស់លោក ហុក ហួលីម នាយរដ្ឋបាលរាជធានីភ្នំពេញ គឺក្នុងខែកុម្ភៈ ឆ្នាំ២០២៥កន្លងមកនេះ នៅរាជធានីភ្នំពេញ មានបទល្មើសព្រហ្មទណ្ឌ បានកើតមាន៤៨លើក/៣៨លើក កើនឡើង១០លើក។ ក្នុងនោះ កម្លាំងបានបង្ក្រាបបទល្មើសព្រហ្មទណ្ឌ ៤៦ករណី ឃាត់ខ្លួន៧០នាក់។ បង្ក្រាបបទល្មើសគ្រឿងញៀន បាន ១៥៥ករណី ឃាត់ខ្លួន ២៧៤នាក់។

ដោយឡែក បង្ក្រាបក្មេងទំនើង បាន២៦ករណី ឃាត់ខ្លួន៩៧នាក់ និងបង្ក្រាបល្បែងស៊ីសងខុសច្បាប់បានចំនួន៩ករណី ឃាត់ខ្លួន៨៣នាក់។ ចំណែកគ្រោះថ្នាក់អគ្គិភ័យវិញ បានកើតមានឡើងចំនួន២១លើក/៨លើក ពោលគឺបានកើនឡើង ១៣លើក ដោយមូលហេតុ ឆ្លងចរន្តអគ្គិសនី១៦លើក, កត្តាមនុស្សដុតឲ្យឆេះ ៣លើក, ប្រហែសភ្លើងទៀន-ធូប ១លើក និងរថយន្តជាប់ហ្វាំង ១លើក៕

អត្ថបទ៖ ស្រីរ័ត្ន

The post លោក ម៉ប់ សារិន៖ ទោះជាបទល្មើសមានការកើនឡើង តែកម្លាំងបង្រ្កាបបានស្ទើ១០០% នៅភ្នំពេញ appeared first on Kampuchea Thmey Daily.

ការស្នើនេះបានធ្វើឡើងនាព្រឹកថ្ងៃទី១២ ខែធ្នូ ឆ្នាំ២០២៤នេះ ក្នុងកិច្ចប្រជុំសាមញ្ញលើកទី៧ របស់ក្រុមប្រឹក្សារាជធានីភ្នំពេញ ឆ្នាំទី១ អាណត្តិទី៤ នៅសាលារាជធានីភ្នំពេញ ក្រោមអធិបតីភាពលោក ម៉ប់ សារិន ប្រធានក្រុមប្រឹក្សារាជធានីភ្នំពេញ និងលោក ឆាយ វីរៈ អភិបាលរង តំណាងលោក ឃួង ស្រេង អភិបាលរាជធានីភ្នំពេញ។

លោក ម៉ប់ សារិន ក្នុងឱកាសនោះបានមានប្រសាសន៍កោតសរសើរចំពោះរដ្ឋបាលរាជធានីភ្នំពេញ និងកងកម្លាំងមានសមត្ថកិច្ច ដែលបានយកអស់កម្លាំងកាយចិត្តក្នុងកិច្ចការពារសន្តិសុខ សណ្តាប់ធ្នាប់ក្នុងរយៈពេល ៣ថ្ងៃ នៃព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក ឆ្នាំ២០២៤ បានយ៉ាងល្អប្រសើរ បង្កលក្ខណៈឱ្យបងប្អូនប្រជាពលរដ្ឋខ្មែរ និងជនបរទេស ចូលរួមដើរលេងកំសាន្ត ប្រកបដោយទឹកមុខសប្បាយរីករាយ ប្រមាណជាង ៦លាននាក់។

បន្ថែមពីនេះ សមាជិកក្រុមប្រឹក្សារាជធានីភ្នំពេញក៏បានសម្តែងពីការកោតសរសើរកងកម្លាំងមានសមត្ថកិច្ចផងដែរ ដែលបានខិតខំបំពេញភារកិច្ចរហូតធ្វើអោយបទល្មើសក្នុងខែវិច្ឆិកានេះបានថយចុះ។ ប៉ុន្តែបែរជាគ្រោះថ្នាក់ចរាចរណ៍បានកើនឡើងរហូត១០ករណី ដូច្នេះស្នើសូមឱ្យរដ្ឋបាលរាជធានីភ្នំពេញបន្តការផ្សព្វផ្សាយច្បាប់ចរារណ៍អោយបានច្រើនពិសេសនៅតាមសាលារៀន ដើម្បីអោយសិស្សានុសិស្សបានយល់ និងចូលរួមអនុវត្តច្បាប់ចរាចរណ៍ផ្លូវគោក និងសូមជួយពន្លឿនការតទឹកស្អាតជូនប្រជាពលរដ្ឋប្រើប្រាស់នៅក្នុងសង្កាត់ចំនួន៣ក្នុងខណ្ឌកំបូល។

ចំពោះការសំណូមពរនេះខាងលើនេះ លោក ឆាយ វីរៈ ក៏ដូចជាតំណាងរដ្ឋាករទឹកស្វយ័តក្រុងភ្នំពេញ បានលើកឡើងថានៅសង្កាត់ស្នោ កាលពីឆ្នាំ២០២២ ឫ២០២៣ គឺពិតជាមានការខ្វះទឹកស្អាតប្រើប្រាស់ ប៉ុន្តែឆ្នាំនេះអាចនៅខ្វះតិចតួចទេ។យើងអាចដោះស្រាយបានល្អលើការផ្គត់ផ្គង់ទឹកស្អាតនេះ ដោយនៅថ្ងៃទី១៦ ខែធ្នូឆ្នាំ២០២៤នេះ យើងនឹងសម្ពោធអនុស្ថានីយផលិតទឹកស្អាតបឹងធំ ដែលមានសមត្ថភាពផលិតទឹកស្អាតបានប្រមាណ៦០០០មែត្រគូបក្នុង១ថ្ងៃ ជាមួយនឹងការតភ្ជាប់បំពង់មេធំបានសម្រេចមុនផែនការ ដែលគ្រោងអនុវត្តនៅឆ្នាំ២០២៥។

លោក ឆាយ វីរៈ អភិបាលរងរាជធានីភ្នំពេញ បានបន្តថា ការកោតសរសើរចំពោះរដ្ឋបាលរាជធានីភ្នំពេញ និងកងកម្លាំងមានសមត្ថកិច្ច ជាការជំរុញលើកទឹកចិត្តឱ្យរដ្ឋបាលរាជធានីភ្នំពេញបន្តបំពេញការងារជូនរាជរដ្ឋាភិបាលនិងប្រជាពលរដ្ឋកាន់តែល្អថែមទៀត៕

អត្ថបទ៖ ស្រីរ័ត្ន

The post ក្រុមប្រឹក្សារាជធានីជំរុញឲ្យពន្លឿនការតទឹកស្អាតជូនពលរដ្ឋប្រើប្រាស់ក្នុងសង្កាត់ចំនួន៣នៅខណ្ឌកំបូល appeared first on Kampuchea Thmey Daily.

ការស្នើសុំរបស់សមាជិកក្រុមប្រឹក្សារាជធានីបែបនេះ បានធ្វើឡើងក្នុងកិច្ចប្រជុំសាមញ្ញលើកទី៤របស់ក្រុមប្រឹក្សារាជធានីភ្នំពេញ នាព្រឹកថ្ងៃទី១២ កញ្ញា ក្រោមអធិបតីភាពលោក ជួប ខុន សមាជិកក្រុមប្រឹក្សារាជធានី តំណាងលោក ម៉ប់ សារិន ប្រធានក្រុមប្រឹក្សារាជធានីភ្នំពេញ និងលោក កើត ឆែ អភិបាលរងរាជធានី តំណាងលោក ឃួង ស្រេង អភិបាលរាជធានីភ្នំពេញ នៅសាលារាជធានីភ្នំពេញ។

ឆ្លើយតបទៅនឹងការស្នើរបស់សមាជិកក្រុមប្រឹក្សារាជធានីភ្នំពេញ លោក កើត ឆែ អភិបាលរងរាជធានីភ្នំពេញបានមានប្រសាសន៍លើកឡើងថា ការបង្ការទប់ស្កាត់គ្រោះថ្នាក់ចរាចរនេះ រាជរដ្ឋាភិបាលបានយកចិត្តទុកដាក់ណាស់ សំដៅធ្វើយ៉ាងណាកាត់បន្ថយអោយបាននៅគ្រោះថ្នាក់ចរាចរណ៍ ដោយបានពង្រឹងការអនុវត្តច្បាប់ចរាចរ ការផ្សព្វផ្សាយអោយប្រជាពលរដ្ឋបានយល់ និងចូលរួមគោរពច្បាប់ចរាចរណ៍។ គ្រោះថ្នាក់ចរាចរណ៍បានឆក់យកជីវិតមនុស្ស ៥ទៅ៦នាក់ក្នុងមួយថ្ងៃនៅទូទាំងប្រទេស។ ចំពោះមនុស្ស ៥ទៅ៦នាក់នេះ បើយើងគិតពីថ្លៃចិញ្ចឹម ថ្លៃសិក្សារៀនសូត្រ និងការអប់រំផ្សេងៗ តើយើងត្រូវខាតបង់ថវិកា និងពេលវេលានៃការចិញ្ចឹមអស់ប៉ុណ្ណា ហើយមកស្លាប់ដោយគ្រោះថ្នាក់ចរាចរណ៍បែបនេះ។ ដូច្នេះហើយ ទើបរាជរដ្ឋាភិបាលកម្ពុជា យកចិត្តទុកដាក់យ៉ាងខ្លាំងដោយបានរិះរកអស់គ្រប់មធ្យោបាយ ដើម្បីកាត់បន្ថយអោយបាននៅគ្រោះថ្នាក់ចរាចរណ៍នេះ។ ដើម្បីកាត់បន្ថយបាននូវគ្រោះថ្នាក់ចរាចរណ៍ លុះត្រាតែមានការចូលរួមទាំងអស់គ្នា។

លោក កើត ឆែ បានបន្តទៀតថា ក្រុមប្រឹក្សារាជធានីភ្នំពេញ បានសម្តែងនូវការកោតសរសើរផងដែរចំពោះវិស័យសុខាភិបាលនៅរាជធានីភ្នំពេញ ដែលបានគិតគូរ និងយកចិត្តទុកដាក់ចំពោះសុខមាលភាពប្រជាពលរដ្ឋ។ ប៉ុន្តែទោះបីជាយ៉ាងណាក្តី លោកនៅតែជំរុញអោយមន្ទីរសុខាភិបាលរាជធានីភ្នំពេញ បន្តយកចិត្តទុកដាក់បន្ថែមទៀតដើម្បីបំរើសេវាជូនប្រជាពលរដ្ឋអោយកាន់តែល្អ លើវិស័យសុខាភិបាលនេះ។

លោកអភិបាលរង បានបញ្ជាក់ផងដែរថា វេទិការផ្សព្វផ្សាយ និងពិគ្រោះយោបល់របស់ក្រុមប្រឹក្សារាជធានីភ្នំពេញ ត្រូវធ្វើឡើងក្នុង១ឆ្នាំម្តង ដើម្បីដោះស្រាយរាល់កង្វល់ សំណូមពរ និងសំណើររបស់ប្រជាពលរដ្ឋ។ សំរាប់ឆ្នាំ២០២៤នេះ វេទិការនេះ នឹងត្រូវធ្វើឡើងនៅខែក្រោយនេះហើយ។​ ដូច្នេះទេ ស្នើអោយប្រធានមន្ទីរទាំងអស់ចូលរួមគ្រប់វេទិកា ដើម្បីឆ្លើយតបទៅនឹងការចង់បានរបស់ប្រជាពលរដ្ឋ ជៀសវាងអោយអនុប្រធានទៅជំនួសដែលគាត់មិនមានសិទ្ធិអាកាត់ ឬសម្រេចបាននោះ។

លោក ជួប ខុន បានមានប្រសាសន៍លើកឡើងថា កិច្ចប្រជុំសាមញ្ញលើកទី៤របស់ក្រុមប្រឹក្សារាជធានីភ្នំពេញ បានពិនិត្យ និងអនុម័តលើរបៀបវារៈចំនួន៧ ក្នុងនោះរួមមាន៖ ១- ពិនិត្យ និងអនុម័តលើច្បាប់ឈប់សម្រាករបស់ លោក ម៉ក់ ថាយ សមាជិកក្រុមប្រឹក្សារាជធានីភ្នំពេញដែលអវត្តមានក្នុងកិច្ចប្រជុំសាមញ្ញរបស់ក្រុមប្រឹក្សាចំនួនបីលើកជាប់គ្នា។
២- ពិនិត្យ និងអនុម័តលើសេចក្តីព្រាងកំណត់ហេតុកិច្ចប្រជុំសាមញ្ញលើកទី៣ របស់ក្រុមប្រឹក្សារាជធានី
កាលពីថ្ងៃទី១៥ ខែសីហា ឆ្នាំ២០២៤។
៣- ពិនិត្យ និងអនុម័តលើសេចក្តីព្រាងរបាយការណ៍ប្រចាំខែសីហា ឆ្នាំ២០២៤ ស្តីពីការអនុវត្តការងាររបស់រដ្ឋបាលរាជធានីភ្នំពេញ។
៤- ពិនិត្យ និងអនុម័តលើសេចក្តីព្រាងប្រតិទិនការងារសម្រាប់ដំណើរការកសាងផែនការអភិវឌ្ឍន៍ រយៈពេលប្រាំឆ្នាំ(២០២៥-២០២៩) និងសេចក្តីព្រាងគោលការណ៍ណែនាំផ្នែកគោលនយោបាយ សម្រាប់ការកសាងផែនការអភិវឌ្ឍន៍រយៈពេលប្រាំឆ្នាំ និងការកសាងកម្មវិធីវិនិយោគបីឆ្នាំរំកិល រាជធានីភ្នំពេញ។
៥- ពិនិត្យ និងអនុម័តលើសេចក្តីព្រាងការបែងចែកប្រាក់រង្វាន់លើទឹកចិត្ត របស់រដ្ឋបាលរាជធានីភ្នំពេញ។
៦- ពិនិត្យពិភាក្សា និងផ្តល់យោបល់លើចម្លើយតបចំពោះសំណើ និងសំណូមពររបស់ប្រជាពលរដ្ឋក្នុង វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សារាជធានីភ្នំពេញ អាណត្តិទី៣ នៅតាមខណ្ឌ ទាំង១៤ ក្នុងឆ្នាំ២០២៣ ដើម្បីឆ្លើយតបជូនប្រជាពលរដ្ឋនៅក្នុងវេទិការបស់ក្រុមប្រឹក្សារាជធានីភ្នំពេញ អាណត្តិទី៤ ក្នុងឆ្នាំ២០២៤ នៅតាមខណ្ឌទាំង១៤។
៧- ពិនិត្យ និងអនុម័តលើសេចក្តីព្រាងឯកសារស្តីពីការរៀបចំវេទិកាផ្សព្វផ្សាយ និងពិគ្រោះយោបល់ របស់ក្រុមប្រឹក្សារាជធានីភ្នំពេញ អាណត្តិទី៤ នៅតាមខណ្ឌទាំង១៤ ក្នុងឆ្នាំ២០២៤៕

អត្ថបទ៖ ស្រីរ័ត្ន

The post សមាជិកក្រុមប្រឹក្សារាជធានី ស្នើឲ្យសមត្ថកិច្ចបន្តរឹតបណ្តឹងច្បាប់ចរាចរណ៍ផ្លូវគោក appeared first on Kampuchea Thmey Daily.

ក្នុងវេទិកាសាធារណៈបងប្អូនប្រជាពលរដ្ឋបានលើកឡើងពាក់ព័ន្ធទៅលើវិស័យសាធារណការ ក្រៅពីនេះ​មាន​បញ្ហាបរិស្ថាន រដ្ឋាករទឹក (សុំតបណ្តាញទឹកស្អាត) វិស័យអប់រំ, សាសនានិងវិស័យរៀបចំដែនដី នគរូបនីយកម្ម សំណង់ និងសុរិយោដី ដើម្បីឱ្យអាជ្ញាធរជួយដោះស្រាយផងដែរ។

លោក ហួត ហៃ បាន​បញ្ជាក់ថា ក្នុងវេទិកាប្រជាពលរដ្ឋបានលើកឡើងជាសំណួរនិង​សំណូមពរផ្ទាល់មាត់មានចំនួន​១៩ បញ្ហា និងសំណើរសំណូមពរ ជាលាយល័ក្ខអក្សរដាក់ចូលក្នុងប្រអប់សំបុត្រចំនួន ៥៥ ច្បាប់ ដែលក្នុងនោះក៏មានការស្នើសុំស្ថាបនាទីវត្តអារាមផងដែរ។

ពាក់ព័ន្ធ​ការ​កសាងព្រះវិហារ​​ ឬហេដ្ឋារចនាសម្ព័ន្ធនៅតាមវត្តអារាម លោក​ ហួត ហៃ បញ្ជាក់​ថា រដ្ឋមិនមានកញ្ចប់ថវិកា​សម្រាប់​កសាង​ព្រះវិហារ​ក៏ដូចជាហេដ្ឋារចនាសម្ព័ន្ធនានាក្នុងវត្តអារាម​នោះទេ។ ថវិកា​សម្រាប់​សាងសង់​ព្រះវិហារ​ក៏ដូចជាហេដ្ឋារចនាសម្ព័ន្ធនានាគឺបានមកពីការចូលរួមរបស់ពុទ្ធបរិស័ទឬសប្បុរសជននានា ដែលបានមកពីការធ្វើបុណ្យផ្កាក៏ដូចជាបុណ្យកឋិនទានជាដើម។

ដោយឡែក​ពាក់ព័ន្ធទៅនឹងតម្រូវការរបស់​ប្រជាពលរដ្ឋ ជាពិសេស​ស្នើ​សុំដោះ​ស្រាយការលិចលង់ដោយជំនន់ទឹកភ្លៀង ការស្ថាបនាផ្លូវ លូប្រឡាយ មន្ត្រីជំនាញពាក់ព័ន្ធនិងអាជ្ញាធរនឹង​ធ្វើការដោះស្រាយភ្លាមៗនៅនឹងទីកន្លែងតែម្តង។

លោកថា រាល់សំណើរសំណូមពររបស់បងប្អូនប្រជាពលរដ្ឋទាំងផ្ទាល់មាត់និងជាលាយល័ក្ខអក្សរ រដ្ឋបាលរាជធានីភ្នំពេញនឹង​យកទៅប្រជុំពិភាក្សាដោះស្រាយជូនបងប្អូនប្រជាពលរដ្ឋភ្លាមៗ។

វេទិកាផ្សព្វផ្សាយនិងពិគ្រោះយោបល់របស់ក្រុមប្រឹក្សារាជធានីភ្នំពេញធ្វើឡើង ១ ឆ្នាំម្តង ក្នុងត្រីមាសទី ៤ អំឡុងខែ តុលា វិច្ឆិកា និងខែធ្នូ ដើម្បីដោះស្រាយរាល់កង្វល់ សំណូមពរនិងសំណើររបស់ប្រជាពលរដ្ឋ ពាក់ព័ន្ធបញ្ហាសន្តិសុខ សណ្តាប់ធ្នាប់ បញ្ហាបរិស្ថាន បញ្ហាអភិវឌ្ឍន៍មូលដ្ឋាន និងការផ្តល់សេវាសាធារណៈជាដើម។

តាមរយៈវេទិកានេះ ក៏ចង់បង្ហាញពីសកម្មភាពការងាររបស់អាជ្ញាធររាជធានីភ្នំពេញ ដែលបានបំពេញការងារបំរើប្រជាពលរដ្ឋកន្លងមកនោះតើបានគ្រប់ជ្រុងជ្រោយទេ ឬនៅមានចំណុចខ្វះខាតអ្វីខ្លះ ដើម្បីឱ្យប្រជាពលរដ្ឋលើកឡើងពីចំណុចខ្វះខាតទាំងនោះ យកមកបំពេញបន្ថែម ធ្វើយ៉ាងណាឱ្យរាជធានីភ្នំពេញ មានសន្តិសុខ សណ្តាប់ធ្នាប់ បរិស្ថានល្អ មានការអភិវឌ្ឍន៍ ជាមួយនិងការផ្តល់សេវាសាធារណៈបានកាន់ល្អប្រសើរឆ្លើយតបទាន់ពេលវេលាជូនប្រជាពលរដ្ឋក្នុងរាជធានីភ្នំពេញទាំងមូល៕

អត្ថបទ៖ ស្រីរ័ត្ន

The post អភិបាល​រង​រាជធានី​ភ្នំពេញ​៖ រដ្ឋមិនមានកញ្ចប់ថវិកាកសាងព្រះវិហារ ឬហេដ្ឋារចនាសម្ព័ន្ធនៅតាមវត្តអារាមទេ appeared first on Kampuchea Thmey Daily.

ការលើកឡើងជា សំណើ និងសំណូមពរខាងលើ បានធ្វើឡើងក្នុង វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សារាជធានី អាណត្តិទី៣ ឆ្នាំ២០២៣ នៅខណ្ឌមានជ័យ នាព្រឹកថ្ងៃទី២ ខែវិច្ឆិកា ឆ្នាំ២០២៣ នេះ ក្រោមវត្តមាន លោក ម៉ប់ សារិន ប្រធានក្រុមប្រឹក្សារាជធានីភ្នំពេញ និង លោក នួន ផារ័ត្ន អភិបាលរងរាជធានីភ្នំពេញ តំណាង លោក ឃួង ស្រេង អភិបាលរាជធានីភ្នំពេញ នៅភោជនីយដ្ឋាន Modern2 ផ្លូវជាតិលេខ២ សង្កាត់ចាក់អង្រែក្រោម។

លោក នួន ផារ័ត្ន មានប្រសាសន៍ថា វេទិកាផ្សព្វផ្សាយ និងពិគ្រោះយោបល់ របស់ ក្រុមប្រឹក្សារាជធានី ព្រឹកនេះ មានពលរដ្ឋចូលរួមសរុប​ចំនួនជាង ៥០០ នាក់​ ក្នុងចំនួននេះ ប្រជាពលរដ្ឋបានលើកឡើងដោយផ្ទាល់មាត់​ចំនួន ១៩នាក់​ ស្មេី​ ២៥ បញ្ហា និងជាលាយល័ក្សអក្សរចំនួន ៩០ច្បាប់។ ចំពោះសំណើ និងសំណូមពរផ្ទាល់មាត់របស់ប្រជាពលរដ្ឋ ទាំង ១៩នាក់នេះ ត្រូវបានអភិបាលខណ្ឌមានជ័យ និងមន្ទីរពាក់ព័ន្ធ ស្រាយបំភ្លឺ និងដោះស្រាយជូនភ្លាមៗ។

វេទិកានេះ ប្រជាពលរដ្ឋបានសំណូមជួយដោះស្រាយបញ្ហាមួយចំនួនដូចជា សុំជំរុញធ្វើប្លង់កម្មសិទ្ធិដីធ្លី ១៧ ហិចតា ជូនពលរដ្ឋ ៦៨៩ គ្រួសារ នៅសង្កាត់ស្ទឹងមានជ័យទី១, សុំបើកផ្លូវដែលមានទំនាស់, សុំដាក់លូ នៅផ្លូវ ៦០ម៉ែត្រ និងផ្លូវជាតិលេខ២, សុំរៀបចំខ្សែភ្លើងឱ្យមានសោភណ្ឌភាព, សុំរឹតបន្តឹងចំពោះអ្នករើសអាតចាយពេលយប់, សុំដោះស្រាយការលិចលង់ភូមិដ្ឋាន, សុំធ្វើប្រព័ន្ធលូ ផ្លូវដែលខូចដោយសារទឹកភ្លៀង, សុំជំរុញឱ្យធ្វើប្លង់រឹងប្រជាពលរដ្ឋនៅតាមបណ្តាយប្រឡាយស្ទឹងមានជ័យ, សុំបើកក្លិបប្រដាល់របស់សមាគមដែលត្រូវបានគេបិទ, ការសុំសម្អាតបន្ទប់អនាម័យនៅតាមសាលារៀន ពិសេសសាលាបឋមសិក្សាជាដើម។

ជាមួយនឹងការបង្ហាញពីគម្រោងដែលប្រជាពលរដ្ឋបានស្នើសុំ ដូចជាការស្នើសុំរបស់ប្រជាពលរដ្ឋសុំធ្វើលូ ផ្លូវ ១៦BT ត្រូវបានលោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជ ធានីភ្នំពេញ បកស្រាយថា មិនត្រឹមតែស្ថាបនាកំណាត់ផ្លូវមួយខ្សែនេះទេ គឺស្ថាបនាផ្លូវ លូពាក់ព័ន្ធជាច្រើនខ្សែទៀតដែលជាប់ពាក់ព័ន្ធប្រឡាយបឹងទំពុន។ បន្ថែមពីនេះទៀត ស្ថានីយបឹងទំពុន និងប្រឡាយបឹងទំពុន នឹងត្រូវបន្ថែមម៉ាស៊ីន និងពង្រីកតួប្រឡាយពី ៣០ ម៉ែត្រ ទៅ ៦០ ម៉ែត្រ ដើម្បីរំដោះការលិចលង់ដោយជំនន់ទឹកភ្លៀង។

លោក នួន ផារ័ត្ន មានប្រសាសន៍បន្តថា ចំពោះសំណើសុំដែលមិនទាន់បានដោះស្រាយ នឹងបន្តយកទៅពិភាក្សា និងដោះស្រាយតាមក្រោយទៀត។ លោក លើកឡើងទៀតថា ប្រទេសកម្ពុជា នៅបន្តរក្សាបាន សុខសន្តិភាព ដែលបានធ្វើឱ្យកម្ពុជាអាចធ្វើជាម្ចាស់ផ្ទះ សម្រាប់កម្មវិធីធំៗ ជាក់ស្តែងដូចជា កិច្ចប្រជុំកំពូលអាស៊ាន ការប្រកួនកីឡាស៊ីហ្គេមជាដើម។ សមិទ្ធផលធំមួយទៀត ដែលកម្ពុជាសម្រេចបាន គឺកម្ពុជាឈរជើងយ៉ាងរឹងមាំ និងមិនក្ស័យធន រក្សាបានកំណើនសេដ្ឋកិច្ចថែមទៀត ខណៈពិភពលោកកំពុងឈមបញ្ហាសេដ្ឋកិច្ច បណ្តាលមកពីជំងឺកូវីដ-១៩ និងសង្ក្រាមនៅអ៊ុយក្រែនជាដើម។

លោក ម៉ប់ សារិន បានលើកឡើងថា វេទិកាផ្សព្វផ្សាយ និងពិគ្រោះយោបល់នេះ ធ្វើឡើងក្នុង ១ឆ្នាំម្តង ក្នុងត្រីមាសទី៤ អំឡុងខែតុលា វិច្ឆិកា និងខែធ្នូ ដើម្បីដោះស្រាយរាល់កង្វល់ សំណូមពរ និងសំណើរបស់ប្រជាពលរដ្ឋ ពាក់ព័ន្ធបញ្ហាសន្តិសុខ សណ្តាប់ធ្នាប់ បញ្ហាបរិស្ថាន បញ្ហាអភិវឌ្ឍមូលដ្ឋាន និងការផ្តល់សេវាសាធារណៈជាដើម។ វេទិកានេះ ចង់បង្ហាញពីសកម្មភាពការងាររបស់អាជ្ញាធររាជធានីភ្នំពេញ ថា បានបំពេញការងារបម្រើប្រជាពលរដ្ឋគ្រប់ជ្រុងជ្រោយទេ នៅមានចំណុចខ្វះខាតអ្វីខ្លះ ដើម្បីឱ្យប្រជាពលរដ្ឋលើកឡើងពីចំណុចខ្វះខាតទាំងនោះ យកមកបំពេញបន្ថែម ធ្វើយ៉ាងណាឱ្យរាជធានីភ្នំពេញ មានសន្តិសុខ សណ្តាប់ធ្នាប់ បរិស្ថានល្អ ការអភិវឌ្ឍ និងការផ្តល់សេវាសាធារណៈជូនពលរដ្ឋកាន់តែល្អប្រសើរថែមទៀត៕

អត្ថបទ៖ ស្រីរ័ត្ន

The post ពលរដ្ឋខណ្ឌមានជ័យ ស្នើសុំដោះស្រាយបញ្ហាជាង ២០ ករណី ក្នុងមូលដ្ឋាន appeared first on Kampuchea Thmey Daily.

ការលើកសំណើ និងសំណូមពរខាងលើ ធ្វើឡើង នៅក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សារាជធានី អាណត្តិទី៣ ឆ្នាំ២០២៣ នៅខណ្ឌជ្រោយចង្វា នាព្រឹកថ្ងៃទី០១ ខែវិច្ឆិកា ឆ្នាំ២០២៣ នេះ ក្រោមវត្តមាន លោក ជួប ខុន សមាជិកក្រុមប្រឹក្សារាជធានីភ្នំពេញ តំណាង លោក ម៉ប់ សារិន ប្រធានក្រុមប្រឹក្សារាជធានីភ្នំពេញ និង លោក ឃ្លាំង ហួត អភិបាលរងរាជធានីភ្នំពេញ តំណាង លោក ឃួង ស្រេង អភិបាលរាជធានីភ្នំពេញ នៅក្នុងផ្សារ OCIC ខណ្ឌជ្រោយចង្វា។

វេទិកានេះ ប្រជាពលរដ្ឋបានសំណូមឱ្យជួយដោះស្រាយ រឿងមន្ទីរដែនដី នគររូបនីយកម្ម សំណង់ និងសូរិយោដីរាជធានីភ្នំពេញ ចេញប្លង់រឹងហើយ ពួកគាត់យកទៅបង់ព័ន្ធ ខាងពន្ធដាថា មិនត្រឹមត្រូវ។ ពលរដ្ឋសូមជួយដោះស្រាយបញ្ហាលិចលង់ភូមិដ្ឋាន, សូមជួយអន្តរាគមន៍ធ្វើប្លង់រឹងស្របច្បាប់, ពលរដ្ឋអ៊ិស្លាមសូមចតទូកឱ្យបានសមរម្យ, អ្នកគ្រូនៅវិទ្យាល័យព្រែកលាប សូមដោះស្រាយបញ្ហានៅក្នុងសាលា រឿងសាលាជំនាន់ថ្មី និងជំនាន់ធម្មតា មិនមានតម្លាភាពជាមួយគ្នា, សូមជួយអន្តរាគមន៍រឿងបាត់គោដែលចោរយកទៅកាប់សាច់, សូមស្ថាបនាផ្លូវ, សូមដកបង្គោលភ្លើងនៅកណ្តាលទ្រូងផ្លូវ និងការសូមការបង្គ្រាបល្បែងស៊ីសងនៅក្នុងភូមិជាដើម។

រាល់សំណើ និងសំណូមពរផ្ទាល់មាត់របស់បងប្អូនប្រជាពលរដ្ឋនៅក្នុងវេទិកានេះ ត្រូវបាន លោក ឃ្លាំង ហួត និងប្រធានមន្ទីរអប់រំ យុវជន និងកីឡារាជធានីភ្នំពេញ ធ្វើការស្រាយបំភ្លឺ និងដោះស្រាយភ្លាមៗជូនបងប្អូនប្រជាពលរដ្ឋ។

លោក ឃ្លាំង ហួត បានមានប្រសាសន៍ថា វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សារាជធានីព្រឹកនេះ មានពលរដ្ឋចូលរួមសរុប​ ចំនួន ៥៣៩ នាក់​ ស្រី​ ១៣៦ នាក់ ផ្ទាល់មាត់​ ចំនួន ១៤នាក់​ ស្មេី​ ១៦ បញ្ហា និងជាលាយល័ក្សអក្សរចំនួន ២៦ច្បាប់។ ចំពោះសំណើ និងសំណូមពរផ្ទាល់មាត់របស់ប្រជាពលរដ្ឋ បានស្រាយបំភ្លឺ និងដោះស្រាយភ្លាមៗ ដោយឱ្យអាជ្ញាធរខណ្ឌ និងមន្ទីរជំនាញពាក់ព័ន្ធចុះធ្វើការដោះស្រាយ។

ចំពោះសំណើសុំកសាងហេដ្ឋាចរនាសម្ព័ន្ធខ្លះដែលត្រូវប្រើប្រាស់ថវិកាច្រើន លោកសូមប្រជាពលរដ្ឋរង់ចាំសិន នៅពេលមានថវិកាគ្រប់គ្រាន់ ក្នុងនាមរដ្ឋបាលរាជធានីភ្នំពេញនឹងកសាងជូនភ្លាម។ ដោយឡែកចំពោះការស្នើសុំបង្គ្រាបល្បែងស៊ីសងនៅក្នុងភូមិ ករណីនេះលោកសូមឱ្យកម្លាំងប៉ូលីសខណ្ឌ និងកងរាជអាវុធហត្ថត្រូវចុះបង្ក្រាបភ្លាមៗ ដើម្បីភាពសុខសាន្តជូនប្រជាពលរដ្ឋ៕

អត្ថបទ៖ ស្រីរ័ត្ន

The post ពលរដ្ឋខណ្ឌជ្រោយចង្វា ស្នើសុំដោះស្រាយបញ្ហាជាង ១០ ករណី ក្នុងមូលដ្ឋាន appeared first on Kampuchea Thmey Daily.

ការលើកឡើងរបស់ប្រជាពលរដ្ឋធ្វើឡើងក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សារាជធានី អាណត្តិទី៣ ឆ្នាំ២០២៣ នៅខណ្ឌច្បារអំពៅនាព្រឹកថ្ងៃទី២៦ ខែតុលា ឆ្នាំ២០២៣នេះ ក្រោមវត្តមាន លោកជួប ខុន តំណាង​លោក ម៉ប់ សារិន ប្រធានក្រុមប្រឹក្សារាជធានីភ្នំពេញ និងលោកស៊ុយ សេរិទ្ធ អភិបាលរងរាជធានីតំណាងលោកឃួង ស្រេង អភិបាលរាជធានីភ្នំពេញនៅវត្តព្រែកប្រាខណ្ឌច្បារអំពៅ។

ពលរដ្ឋបានលើកឡើងថា ការប្រមូលពន្ធទៅលើដី ផ្ទះសំបែងរបស់ពួកគាត់ ត្រូវបានមន្ត្រីយកលើសកំណត់ បើទោះបីចំណែកដីខាងមុខផ្ទះត្រូវបានរដ្ឋកាត់យកជាចំណីផ្លូវសាធារណៈហើយក្តី ក៏ខាងខាងពន្ធដារនៅតែគិតតម្លៃដូចមុន ពោល​គឺដីដែលបានកាត់នោះនៅតែបង់លុយដដែល។

ប្រជាពលរដ្ឋលើកឡើងថា ពួកគាត់មិនបានដឹងថាផ្ទះរបស់គាត់ជាប់ពន្ធនោះទេ តែបែរជាមន្ត្រីពន្ធដារយកវិក័យប័ត្រមកបង្ហាញ​ជាមួយនឹងការផាកពិន័យជាង ១០ លានរៀល ខណៈដែលពួកគាត់មិនបានដឹងទាល់តែសោះ។

ក្រៅពីការលើកឡើងពាក់ព័ន្ធនឹងវិស័យពន្ធដារ ពលរដ្ឋ​ស្នើ​ឲ្យ​ការបង់ថ្លៃសំរាមសូមឱ្យដាក់ជាវិក័យប័ត្រតែ១។ ជាមួយគ្នានេះ ពលរដ្ឋ​ក៏​ស្នើ​សុំជួសជុលស្ពានព្រែកអ្នកតាវាំង ការដោះស្រាយបញ្ហាប្រឡាយបង្ហូរទឹក ការស្ថាបនាលូ ការសុំតបណ្ដាញទឹកស្អាត និងការសុំឲ្យក្រុមហ៊ុនស៊ីនទ្រីដាក់រទេះតូចៗដឹកសំរាមតាមផ្លូវតូចៗក៏ប្រជាពលរដ្ឋបាន​លើក​ស្នើ​ទៅកាន់អាជ្ញាធរក្នុងវេទិកានេះផងដែរ។

ពាក់ព័ន្ធសំណើនិងសំណូមពរប្រជាពលរដ្ឋពាក់ព័ន្ធពន្ធដារ ត្រូវបានមន្ត្រីពន្ធដារលើកឡើងថា ការបង់ពន្ធអចលនៈទ្រព្យ ចាប់ពីពេលនេះទៅរហូតដល់ចុងឆ្នាំ ២០២៤ គឺមិនត្រូវបានផាកពិន័យនោះទេ ពោលគឺបងប្អូនប្រជាពលរដ្ឋដែលជាប់ពន្ធអាចទៅបង់ពន្ធទៅតាមតម្លៃពន្ធតែប៉ុណ្ណោះ មិនមានការផាកពិន័យទេ។

លោក ចេង មុនីរ៉ា អភិបាលខណ្ឌច្បារអំពៅនៅក្នុងឱកាសនោះបាន បកស្រាយបំភ្លឺជុំវិញការលើកឡើង​របស់​បងប្អូន​ប្រជាពលរដ្ឋ ដោយអាជ្ញាធរនឹង​ពិនិត្យលទ្ធភាពដើម្បីធ្វើទៅតាមការស្នើសុំរបស់បងប្អូនប្រជាពលរដ្ឋ។

លោក ស៊ុយ សេរិទ្ធ បានលើកឡើងថា វេទិកានេះមានប្រជាពលរដ្ឋលើកឡើងជាសំណើរនិងសំណូមពរដោយផ្ទាល់មាត់ ចំនួន ១៣ នាក់ និងសំណើរជាលាយលក្ខណ៍អក្សរចំនួន ៧៨ ច្បាប់ ហើយរាល់សំណើរនិងសំណូមដោយផ្ទាល់មាត់ត្រូវបានស្រាយបំភ្លឺរួចរាល់និងបន្តតាមដានពីវឌ្ឍនៈភាពបន្តទៀត។

ចំពោះសំណើជាលាយលក្ខណ៍អក្សររទាំង ៧៨ ច្បាប់ ក្រុមការងារនឹងប្រជុំពិភាក្សាពិនិត្យលទ្ធភាព ដាក់ចូលក្នុងគម្រោងអភិវឌ្ឍន៍ ៣ ឆ្នាំរំកិល។

លោក ជួប ខុន បានមានប្រសាសន៍លើកឡើងថា វេទិកាផ្សព្វផ្សាយនិងពិគ្រោះយោបល់នេះធ្វើឡើងក្នុង ១ ឆ្នាំម្តង ក្នុងត្រីមាសទី៤ ពោលគឺនៅក្នុងខែ តុលា វិច្ឆិកា និងខែធ្នូ ដើម្បីដោះស្រាយរាល់កង្វល់ សំណូមពរនិងសំណើររបស់ប្រជាពលរដ្ឋ ដែលមានដូចជាបញ្ហាសន្តិសុខ សណ្តាប់ធ្នាប់ បញ្ហាបរិស្ថាន និងបញ្ហាអភិវឌ្ឍន៍មូលដ្ឋានជាដើម៕

អត្ថបទ៖ ស្រីរ័ត្ន

The post ចំពោះមុខ​ក្រុមប្រឹក្សារាជធានី ពលរដ្ឋខណ្ឌច្បារអំពៅលើកកង្វល់​ពីការ​យកពន្ធ រួម​ទាំង​បញ្ហា​​ក្នុង​មូលដ្ឋាន appeared first on Kampuchea Thmey Daily.