ចំពោះមុខ​ក្រុមប្រឹក្សារាជធានី ពលរដ្ឋខណ្ឌច្បារអំពៅលើកកង្វល់​ពីការ​យកពន្ធ រួម​ទាំង​បញ្ហា​​ក្នុង​មូលដ្ឋាន

ប្រជាពលរដ្ឋរស់នៅក្នុងខណ្ឌច្បារអំពៅបានលើកឡើងជាសំណើនិងសំណូមពរជាច្រើនដែលសំណើនិងសំណូមពរទាំងនោះ​មាន​ការយកពន្ធដារលើអចលនទ្រព្យក៏​ជារឿងសំខាន់ ដែលបងប្អូនប្រជាពលរដ្ឋបានលើកឡើងដើម្បីឲ្យអាជ្ញាធររាជធានីភ្នំពេញនិងមន្ទីរពាក់ព័ន្ធជួយដោះស្រាយ។

ការលើកឡើងរបស់ប្រជាពលរដ្ឋធ្វើឡើងក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សារាជធានី អាណត្តិទី៣ ឆ្នាំ២០២៣ នៅខណ្ឌច្បារអំពៅនាព្រឹកថ្ងៃទី២៦ ខែតុលា ឆ្នាំ២០២៣នេះ ក្រោមវត្តមាន លោកជួប ខុន តំណាង​លោក ម៉ប់ សារិន ប្រធានក្រុមប្រឹក្សារាជធានីភ្នំពេញ និងលោកស៊ុយ សេរិទ្ធ អភិបាលរងរាជធានីតំណាងលោកឃួង ស្រេង អភិបាលរាជធានីភ្នំពេញនៅវត្តព្រែកប្រាខណ្ឌច្បារអំពៅ។

ពលរដ្ឋបានលើកឡើងថា ការប្រមូលពន្ធទៅលើដី ផ្ទះសំបែងរបស់ពួកគាត់ ត្រូវបានមន្ត្រីយកលើសកំណត់ បើទោះបីចំណែកដីខាងមុខផ្ទះត្រូវបានរដ្ឋកាត់យកជាចំណីផ្លូវសាធារណៈហើយក្តី ក៏ខាងខាងពន្ធដារនៅតែគិតតម្លៃដូចមុន ពោល​គឺដីដែលបានកាត់នោះនៅតែបង់លុយដដែល។

ប្រជាពលរដ្ឋលើកឡើងថា ពួកគាត់មិនបានដឹងថាផ្ទះរបស់គាត់ជាប់ពន្ធនោះទេ តែបែរជាមន្ត្រីពន្ធដារយកវិក័យប័ត្រមកបង្ហាញ​ជាមួយនឹងការផាកពិន័យជាង ១០ លានរៀល ខណៈដែលពួកគាត់មិនបានដឹងទាល់តែសោះ។

ក្រៅពីការលើកឡើងពាក់ព័ន្ធនឹងវិស័យពន្ធដារ ពលរដ្ឋ​ស្នើ​ឲ្យ​ការបង់ថ្លៃសំរាមសូមឱ្យដាក់ជាវិក័យប័ត្រតែ១។ ជាមួយគ្នានេះ ពលរដ្ឋ​ក៏​ស្នើ​សុំជួសជុលស្ពានព្រែកអ្នកតាវាំង ការដោះស្រាយបញ្ហាប្រឡាយបង្ហូរទឹក ការស្ថាបនាលូ ការសុំតបណ្ដាញទឹកស្អាត និងការសុំឲ្យក្រុមហ៊ុនស៊ីនទ្រីដាក់រទេះតូចៗដឹកសំរាមតាមផ្លូវតូចៗក៏ប្រជាពលរដ្ឋបាន​លើក​ស្នើ​ទៅកាន់អាជ្ញាធរក្នុងវេទិកានេះផងដែរ។

ពាក់ព័ន្ធសំណើនិងសំណូមពរប្រជាពលរដ្ឋពាក់ព័ន្ធពន្ធដារ ត្រូវបានមន្ត្រីពន្ធដារលើកឡើងថា ការបង់ពន្ធអចលនៈទ្រព្យ ចាប់ពីពេលនេះទៅរហូតដល់ចុងឆ្នាំ ២០២៤ គឺមិនត្រូវបានផាកពិន័យនោះទេ ពោលគឺបងប្អូនប្រជាពលរដ្ឋដែលជាប់ពន្ធអាចទៅបង់ពន្ធទៅតាមតម្លៃពន្ធតែប៉ុណ្ណោះ មិនមានការផាកពិន័យទេ។

លោក ចេង មុនីរ៉ា អភិបាលខណ្ឌច្បារអំពៅនៅក្នុងឱកាសនោះបាន បកស្រាយបំភ្លឺជុំវិញការលើកឡើង​របស់​បងប្អូន​ប្រជាពលរដ្ឋ ដោយអាជ្ញាធរនឹង​ពិនិត្យលទ្ធភាពដើម្បីធ្វើទៅតាមការស្នើសុំរបស់បងប្អូនប្រជាពលរដ្ឋ។

លោក ស៊ុយ សេរិទ្ធ បានលើកឡើងថា វេទិកានេះមានប្រជាពលរដ្ឋលើកឡើងជាសំណើរនិងសំណូមពរដោយផ្ទាល់មាត់ ចំនួន ១៣ នាក់ និងសំណើរជាលាយលក្ខណ៍អក្សរចំនួន ៧៨ ច្បាប់ ហើយរាល់សំណើរនិងសំណូមដោយផ្ទាល់មាត់ត្រូវបានស្រាយបំភ្លឺរួចរាល់និងបន្តតាមដានពីវឌ្ឍនៈភាពបន្តទៀត។

ចំពោះសំណើជាលាយលក្ខណ៍អក្សររទាំង ៧៨ ច្បាប់ ក្រុមការងារនឹងប្រជុំពិភាក្សាពិនិត្យលទ្ធភាព ដាក់ចូលក្នុងគម្រោងអភិវឌ្ឍន៍ ៣ ឆ្នាំរំកិល។

លោក ជួប ខុន បានមានប្រសាសន៍លើកឡើងថា វេទិកាផ្សព្វផ្សាយនិងពិគ្រោះយោបល់នេះធ្វើឡើងក្នុង ១ ឆ្នាំម្តង ក្នុងត្រីមាសទី៤ ពោលគឺនៅក្នុងខែ តុលា វិច្ឆិកា និងខែធ្នូ ដើម្បីដោះស្រាយរាល់កង្វល់ សំណូមពរនិងសំណើររបស់ប្រជាពលរដ្ឋ ដែលមានដូចជាបញ្ហាសន្តិសុខ សណ្តាប់ធ្នាប់ បញ្ហាបរិស្ថាន និងបញ្ហាអភិវឌ្ឍន៍មូលដ្ឋានជាដើម៕

អត្ថបទ៖ ស្រីរ័ត្ន