ក្អកស្ងួត Archives - Kampuchea Thmey Daily

អាការក្អកមានស្លេស្ម និងក្អកស្ងួត ខុសគ្នាម៉េចខ្លះ?

Sonya — Mon, 13 Dec 2021 01:33:21 +0000

១- តើក្អកជាអ្វី?

ក្អកគឺជាវិធីមួយដែលរាងកាយបញ្ចេញដើម្បីកម្ចាត់ចោលសារធាតុដែលនាំឲ្យរមាស់ ឬដែលធ្វើឲ្យរលាក។ នៅពេលដែលមានអ្វីមួយធ្វើឲ្យរមាស់នៅក្នុងបំពង់ក ឬនៅក្នុងផ្លូវដង្ហើម ប្រព័ន្ធប្រសាទនឹងបញ្ជូនព័ត៌មានដល់ខួរក្បាលឲ្យធ្វើការកន្ត្រាក់សាច់ដុំនៅត្រង់ពោះ និងទ្រូងរបស់យើងដើម្បីបញ្ចេញសារធាតុនោះចេញមកក្រៅ។ ការក្អក គឺជារេផ្លេចមួយដ៏សំខាន់ដើម្បីការពាររាងកាយយើងពី សារធាតុបង្កឲ្យរមាស់ដូចជា៖
-ស្លេស្ម
-ផ្សែង
-សារធាតុបង្កអាល្លែកហ្ស៊ីដូចជា ធូលី លំអងផ្កា និងផ្សិត

ការក្អក គឺជារោគសញ្ញានៃជំងឺជាច្រើន ពេលខ្លះលក្ខណៈនៃការក្អករបស់យើងអាចធ្វើឲ្យយើងយល់ខ្លះពីមូលហេតុដែលបង្កទៀតផង។ ពេលខ្លះ នៅពេលដែលមានអ្វីមួយស្លាក់នៅផ្លូវដង្ហើម វាក៏អាចបង្កឲ្យយើងក្អកបានដែរ។ ខាងក្រោមនេះ គឺជាប្រភេទនៃការក្អកមួយចំនួនដែលងាយស្រួលក្នុងការចំណាំ។

២-ក្អកមានស្លេស្ម

ក្អកមានស្លេស្ម គឺជាការក្អកដែលយើងអាចខាកយកស្លេស្មចេញមកក្រៅបាន។ ការក្អករបៀបនេះ ច្រើនកើតឡើងនៅអំឡុងយើងមានជំងឺផ្ដាសាយ ហើយស្លេស្មដែលចេញមកនោះអាចតិចឬច្រើន ដោយអមជាមួយនឹងរោគសញ្ញាមួយចំនួនដូចជា៖
-ហៀរសំបោរ
-តឹងច្រមុះ ដោយសារស្លេស្ម
-អស់កម្លាំង

ការក្អកបែបនេះ គឺដោយសារតែរាងកាយត្រូវការបញ្ចេញស្លេស្មដែលកកច្រើនក្នុងប្រព័ន្ធផ្លូវដង្ហើមចេញមកក្រៅ។ ដូចនេះ ហើយនៅពេលដែលមានក្អកស្លេស្ម គឺយើងនឹងមានអារម្មណ៍ថាដូចជាមានអ្វីមួយនៅខាងក្រោយបំពង់ក ឬទ្រូង ហើយពេលក្អកម្ដងៗស្លេស្មនឹងចេញមកតាមមាត់របស់យើង។

ជាធម្មតាការក្អកស្លេស្ម ប្រសិនបើជាការក្អកស្រួចស្រាល់ គឺមានរយៈពេលយូរបំផុតត្រឹម ៣ សប្ដាហ៍ប៉ុណ្ណោះ ប៉ុន្តែបើសិនជាក្អករ៉ាំរ៉ៃវិញ គឺអាចមានរយៈពេលយូរជាង៨ សប្ដាហ៍ចំពោះមនុស្សធំ និង៤ សប្ដាហ៍ចំពោះកូនក្មេង។

ជំងឺ មួយចំនួនដែលអាចបង្កជាក្អកស្លេស្មរួមមាន៖
-ជំងឺផ្ដាសាយ
-ជំងឺរលាកសួត
–ជំងឺស្ទះសួតរ៉ាំរ៉ៃ (COPD) រួមទាំងបញ្ហា ខ្យល់ចូលស្រោមសួត និងរលាកទងសួត។
-រលាកទងសួតស្រួចស្រាល់
-ជំងឺហឺត

៣-ក្អកស្ងួត

ការក្អកស្ងួតគឺជាការក្អកដែលមិនមានឡើងស្លេស្មចេញមកទេ។ ក្អកស្ងួតជាទូទៅ ពិបាកគ្រប់គ្រងណាស់ហើយច្រើនកើតឡើងរយៈពេលយូរទៀតផង។ ការក្អកស្ងួត គឺកើតឡើងដោយសារតែការរលាក ឬរមាស់នៅក្នុងបំពង់ផ្លូវដង្ហើម ប៉ុន្តែមិនបង្កឲ្យមានស្លេស្មច្រើន ដើម្បីក្អកបញ្ចេញទេ។ ក្អកស្ងួតភាគច្រើនកើតឡើងដោយសារតែការបង្ករោគនៅលើផ្លូវដង្ហើមផ្នែកខាងលើ។ ជាធម្មតាក្រោយពេលជាសះស្បើយពីជំងឺផ្ដាសាយទាំងមនុស្សពេញវ័យនិងកុមារ គឺសុទ្ធតែមានក្អកស្ងួតប្រហែលជាពីរទៅបីសប្ដាហ៍ ទៀត។

ជំងឺនិងបញ្ហាសុខភាពមួយដែលអាចបង្កឲ្យមានក្អកស្ងួតរួមមាន៖
-រលាកបំពង់ក
-ឈឺក
-រលាកក្រពេញអាមីដាល់
-រលាក sinus
-ជំងឺហឺត
-បញ្ហាអាល្លែកហ្ស៊ី
–ជំងឺចាល់អាស៊ីដក្រពះ (GERD)
-ការប្រើប្រាស់ថ្នាំពេទ្យ ជាពិសេសក្រុមថ្នាំជំងឺលើសឈាម ពពួក ACE inhibitor។
-ប៉ះពាល់ខ្យល់អាកាសមិនល្អ ដូចជាមានការបំពុលខ្យល់ ធូលី និងផ្សែងជាដើម។

នៅមានអាការៈក្អកផ្សេងទៀតដែលមិនបានរៀបរាប់ខាងលើ ដូចនេះប្រសិនបើគ្នាយើងមានអាការៈក្អកហើយពិបាកដកដង្ហើមសូមពិគ្រោះជាមួយគ្រូពេទ្យភ្លាម៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ ក្អកស្ងួត និងមានឈឺទ្រូងទៀតនោះ ជាបញ្ហាសុខភាពត្រូវយកចិត្តទុកដាក់

ចុចអាន៖ ប្រើ វិធីទាំង៧នេះ! ទោះនៅផ្ទះគ្មានថ្នាំ ក៏អាចជួយសម្រួលអាការក្អកបានដែរ

The post អាការក្អកមានស្លេស្ម និងក្អកស្ងួត ខុសគ្នាម៉េចខ្លះ? appeared first on Kampuchea Thmey Daily.

ក្អកស្ងួត និងមានឈឺទ្រូងទៀតនោះ ជាបញ្ហាសុខភាពត្រូវយកចិត្តទុកដាក់

Sonya — Thu, 27 May 2021 00:03:00 +0000

ក្អកស្ងួតគឺជាអាការៈក្អកដែលមិនមានស្លេស្ម ហើយបើមានក្អកស្ងួត និងមានអាការៈឈឺទ្រូងមកជាមួយផងអាចបង្កដោយមូលហេតុច្រើន។ ក្នុងករណីមួយចំនួន អាការៈនេះនឹងបាត់ទៅវិញដោយខ្លួនឯង ប៉ុន្តែពេលខ្លះបង្កជាបញ្ហាមួយចំនួនដែលតម្រូវឲ្យទទួលការព្យាបាលត្រឹមត្រូវ។ អត្ថបទនេះលើកឡើងពីបញ្ហាមួយចំនួនដែលបង្កឲ្យមានអាការៈក្អកស្ងួត និងឈឺទ្រូង។

១. ការឆ្លងមេរោគនៅប្រព័ន្ធផ្លូវដង្ហើមផ្នែកខាងលើ

ប្រព័ន្ធផ្លូវដង្ហើមផ្នែកខាងលើមានច្រមុះ និងតំបន់ប្រហោងឆ្អឹងច្រមុះ(Sinus)។ ការឆ្លងមេរោគនៅប្រព័ន្ធផ្លូវដង្ហើមផ្នែកខាងលើតែងជាមូលហេតុបង្កអាការៈក្អក។ រោគសញ្ញាផ្សេងៗនៃការឆ្លងមេរោគនៅប្រព័ន្ធផ្លូវដង្ហើមមានអាការៈហៀរសម្បោរ ឈឺក គ្រុនក្ដៅ និងឈឺខ្លួន។ ការឆ្លងមេរោគនេះអាចបង្កដោយវីរុស និងបាក់តេរី។ ភាគច្រើនការឆ្លងមេរោគបង្កដោយវីរុសដូចជាជំងឺផ្ដាសាយអាចនឹងបាត់ទៅដោយខ្លួនឯង ប៉ុន្តែការឆ្លងមេរោគបង្កដោយបាក់តេរីអាចនឹងត្រូវប្រើថ្នាំផ្សះ (Antibiotics)។

២. ការស្រូបនូវសារធាតុបង្កការរលាក

សារធាតុបង្កការរលាកមានដូចជាផ្សែង និងចំហាយផ្សេងៗ។ សារធាតុទាំងនេះបង្កការរលាកនៅបំពង់ក និងផ្លូវដង្ហើមដែលអាចបង្កឲ្យក្អកស្ងួត។ ក្នុងករណីធ្ងន់ធ្ងរ និងក្អកមិនបាត់អាចបង្កឲ្យឈឺទ្រូងដែរ។

៣. ជំងឺហឺត

ជំងឺហឺតគឺជាជំងឺរ៉ាំរ៉ៃមួយដែលប៉ះពាល់ដល់ផ្លូវដង្ហើមនៅក្នុងសួត។ រោគសញ្ញាទូទៅគឺការដកដង្ហើមឮងឺតៗ (wheezing) និងរោគសញ្ញាផ្សេងទៀតរួមមានក្អករ៉ាំរ៉ៃ ឈឺ និងណែនទ្រូង ពិបាកដកដង្ហើម និងពិបាកក្នុងការគេង។ គ្នាយើងដែលមានជំងឺហឺតគឺចៀសវាងការស្រូបផ្សែង និងធូលីព្រោះទាំងនេះអាចធ្វើឲ្យជំងឺហឺតធ្វើទុក្ខបាន។

៤. ជំងឺច្រាលទឹកអាស៊ីដក្រពះ (GERD)

រោគសញ្ញានៃការច្រាលទឹកអាស៊ីដក្រពះគឺមានអាស៊ីដច្រើនក្នុងក្រពះ និងក្រហាយទ្រូង។ អាការៈក្រហាយភាគច្រើនមាននៅទ្រូង និងពោះផ្នែកខាងលើ។ នៅពេលអាស៊ីដក្រពះច្រើនរហូតហូរទៅក្នុងបំពង់អាហារអាចបង្កឲ្យរលាកបំពង់កដែលធ្វើឲ្យក្អកស្ងួតបាន។ ដើម្បីកាត់បន្ថយអាការៈច្រាលអាស៊ីដក្រពះ យើងគួរ៖

ចៀសវាងញ៉ាំអាហារហឹរ ឬមានជាតិខ្លាញ់ច្រើន
កុំញ៉ាំច្រើនហួសកំណត់
ចៀសវាងការញ៉ាំអាហារជិតដល់ម៉ោងចូលគេង គួញ៉ាំឲ្យបានមុនចូលគេង២-៣ម៉ោង
ផ្ដាច់បារី។

៥. ជំងឺខ្យល់ក្នុងទ្រូង (Pneumothorax)

ជំងឺខ្យល់ក្នុងទ្រូងសំដៅលើស្ថានភាពដែលខ្យល់ចេញពីសួតទៅក្នុងចន្លោះសួត និងជញ្ជាំងទ្រូង។ នៅពេលមានខ្យល់ក្នុងចន្លោះនោះអាចបន្ថែមសម្ពាធទៅសួត យូរទៅនឹងធ្វើឲ្យសួតឡើងប៉ោងពេលដកដង្ហើមចូល។ រោគសញ្ញានៃជំងឺនេះរួមមានក្អកស្ងួត ពិបាកដកដង្ហើម ឈឺទ្រូងពេលដកដង្ហើម និងឈឺមួយចំហៀងទ្រូង។

៦. ជំងឺមហារីកសួត

ជំងឺមហារីកសួតអាចបង្កអាការៈឈឺទ្រូង និងក្អក រួមទាំងរោគសញ្ញាផ្សេងទៀតដូចជាពិបាកដកដង្ហើម ដកដង្ហើមឮងឺតៗ អស់កម្លាំង បាត់បង់ចំណង់អាហារ ស្រកទម្ងន់ និងក្អកមានឈាម៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ កុំព្រងើយកន្តើយ! រោគសញ្ញាទាំងនេះអាចជាជំងឺគាំងបេះដូង

ចុចអាន៖ ចំណាំមើលផង! បើមានសញ្ញាប៉ុន្មាននេះ សួតមានបញ្ហាហើយ

The post ក្អកស្ងួត និងមានឈឺទ្រូងទៀតនោះ ជាបញ្ហាសុខភាពត្រូវយកចិត្តទុកដាក់ appeared first on Kampuchea Thmey Daily.

ក្អកស្ងួត Archives - Kampuchea Thmey Daily

អាការក្អកមានស្លេស្ម និងក្អកស្ងួត ខុសគ្នាម៉េចខ្លះ?

១- តើក្អកជាអ្វី?

២-ក្អក​មាន​ស្លេស្ម

៣-ក្អក​ស្ងួត

ក្អកស្ងួត និងមានឈឺទ្រូងទៀតនោះ ជាបញ្ហាសុខភាព​ត្រូវ​យកចិត្តទុកដាក់

១. ការ​ឆ្លង​មេរោគ​នៅ​ប្រព័ន្ធ​ផ្លូវ​ដង្ហើម​ផ្នែក​ខាង​លើ

២. ការ​ស្រូប​នូវ​សារធាតុ​បង្ក​ការ​រលាក

៣. ជំងឺ​ហឺត

៤. ជំងឺ​ច្រាលទឹក​អាស៊ីដក្រពះ (GERD)

៥. ជំងឺ​ខ្យល់​ក្នុង​ទ្រូង​ (Pneumothorax)

៦. ជំងឺ​មហារីក​សួត