លោករវសេនីត្រី ម៉ក់ មី នាយប៉ុស្តិ៍រដ្ឋបាលនគរបាលក្រាំងធ្នង់ ចំណុះអធិការដ្ឋាននគរបាលខណ្ឌសែនសុខ បានបញ្ជាក់ថា ៖ ក្រោមការអនុវត្តតាមគោលការណ៍ដឹកនាំរបស់ លោកឧត្តមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ និង លោកវរសេនីយ៍ឯក ហួរ ម៉េងវ៉ាង អធិការនគរបាលខណ្ឌសែនសុខ កម្លាំងនគរបាលប៉ុស្តិ៍ តែងបង្កើនការយកចិត្តទុកដាក់ ក្នុងការផ្តល់សេវាសាធារណៈឲ្យបានល្អ ពិសេសការធ្វើអត្តសញ្ញាណបណ្ណសញ្ជាតិខ្មែរ ដែលជាការងារស្នូលមួយ ត្រូវពង្រឹង និងផ្ទៀងផ្ទាត់ឲ្យបានត្រឹមត្រូវ ក្នុងការបំពេញជូនពលរដ្ឋ ដើម្បីយកទៅប្រើប្រាស់តាមសេវាតម្រូវការនានារបស់ពួកគាត់ ជៀសវាងការខុសឆ្គង ដែលជាផ្នែកនាំឲ្យពលរដ្ឋខាតពេលក្នុងការធ្វើសារជាថ្មី និងចំណាយពេលយូរក្នុងការរងចាំ អត្តសញ្ញាណបណ្ណថ្មី។

លោករវសេនីត្រី ម៉ក់ មី នាយប៉ុស្តិ៍រដ្ឋបាលនគរបាលក្រាំងធ្នង់

លោកបន្ថែមថា ៖ បច្ចុប្បន្ននេះ ការធ្វើអត្តសញ្ញាណបណ្ណជូនពលរដ្ឋ បានបញ្ចូលទីតាំងរួមទៅក្នុងច្រកចេញចូលតែមួយរបស់សាលាសង្កាត់ ដែលអាចឲ្យមន្ត្រីនគរបាល និងរាជការស៊ីវិល នៅគៀកគិតគ្នា និងអាចផ្តល់ការបម្រើពលរដ្ឋឲ្យកាន់តែស្និទ្ធិស្នាល និងរហ័ស ជៀសការរុញសេវាដាក់គ្នាទៅមកផងដែរ។

ប្រជាពលរដ្ឋ រីករាយចំពោះការផ្តល់សេវាលឿនរហ័ស និងបានស្នើសុំឲ្យមន្ត្រីសមត្ថកិច្ច បន្តការបម្រើនេះ ឲ្យកាន់តែមានប្រសិទ្ធិភាព ស្របតាមគោលនយោបាយដឹកនាំរបស់ប្រមុខថ្នាក់ដឹកនាំ ដែលជាកម្លាំងចលករសំខាន់ ធ្វើឲ្យអ្នកទទួលសេវា មានភាពកក់ក្តៅក្នុងចិត្ត និងអារម្មណ៍ល្អ។ ពួកគាត់បន្តលើកឡើងនិងកោតសសើរដល់អាជ្ញាធរ ពេលដែលថតអត្តសញ្ញាណប័ណរួច ពួកគាត់ឲ្យពលរដ្ឋជាម្ចាស់សាមី ជួយផ្ទៀងផ្ទាត់ អក្ខរាវិរុទ្ធ ឈ្មោះ ថ្ងៃខែឆ្នាំកំណើតជាដើម ជៀសវាង ខុសដោយប្រការណាមួយ ពេលចេញអត្តសញ្ញាណប័ណ្ណមក ខាតបង់ពេលវេលារងចាំរបស់ពលរដ្ឋ។

គួរបញ្ជាក់ថា ការផ្តល់សេវា លើការធ្វើអត្តសញ្ញាណប័ណ្ណ , សៀវស្នាក់នៅ និងសៀវភៅគ្រួសារនេះ គឺនគរបាលនៅតាមបណ្តាមូលដ្ឋានប៉ុស្តិ៍រដ្ឋបាលទាំងអស់ ក្នុងរាជធានីភ្នំពេញ តែងយកចិត្តទុកដាក់ជានិច្ច ក្នុងការចុះធ្វើជាប្រចាំ ពិសេសក្រោយពេលធ្វើរួចរាល់ ឯកសារទាំងនោះ តែងតែត្រូវបានយកទៅជូនដោយផ្ទាល់ដល់តាមខ្នងផ្ទះរបស់ពលរដ្ឋផងដែរ៕អត្ថបទ ៖ សុភា

The post នគរបាលតាមមូលដ្ឋាន បន្តពង្រឹងការផ្ទៀងផ្ទាត់លើការធ្វើអត្តសញ្ញាណបណ្ណថ្មី និងបន្តសុពលភាព ដើម្បីកុំឱ្យខាតពេល ពលរដ្ឋ appeared first on Kampuchea Thmey Daily.

ប្រតិបត្តិការនេះបានធ្វើឡើងនៅទីតាំងចំនួន៥ រួមមាន ខុនដូរអេច សែនសុខ ស្ថិតនៅភូមិទំនប់ សង្កាត់ភ្នំពេញថ្មី, ខុនដូរ ក្រោនថៅវើរ ស្ថិតនៅភូមិទំនប់ សង្កាត់ភ្នំពេញថ្មី, បុរីអ័រគីដេ ស្ថិតនៅភូមិអ័រគីដេ សង្កាត់អូរបែកក្អម, ឃ្លាំងមួយកន្លែងស្ថិតនៅភូមិវិមានទ្រង់ សង្កាត់ក្រាំងធ្នង់ និងផ្ទះអាជីវកម្មលេខ៨៧, ៨៩ និង៩១ ក្នុងបុរីព្រីមៀលែន សែនសុខ ស្ថិតនៅភូមិបាយ៉ាប សង្កាត់ភ្នំពេញថ្មី។

ជាលទ្ធផល កម្លាំងសមត្ថកិច្ចបានជួបនិងត្រួតពិនិត្យជនបរទេសដែលកំពុងស្នាក់នៅក្នុងបន្ទប់ ខ្នងផ្ទះ និងឃ្លាំងសរុបចំនួន៣១ ស្មើនឹងជនបរទេសចំនួន៥៥នាក់ ក្នុងនោះមានស្ត្រីចំនួន១៨នាក់ និងមានសញ្ជាតិចំនួន១៤ផ្សេងគ្នា។

តាមការត្រួតពិនិត្យ សមត្ថកិច្ចបានបញ្ជាក់ថា ជនបរទេសទាំងអស់មានលិខិតឆ្លងដែន និងទិដ្ឋាការស្នាក់នៅត្រឹមត្រូវស្របតាមច្បាប់ ហើយពុំមានការពាក់ព័ន្ធ ឬសង្ស័យនឹងសកម្មភាពឆបោកតាមប្រព័ន្ធអនឡាញ (Online Scams) នោះឡើយ។

ទោះជាយ៉ាងណា ក្នុងអំឡុងប្រតិបត្តិការនេះ កម្លាំងសមត្ថកិច្ចបានរកឃើញករណីពាក់ព័ន្ធគ្រឿងញៀនមួយករណី នៅខុនដូរអេច សែនសុខ ជាន់ទី២៥ បន្ទប់លេខ A2 ដោយបានប្រទះឃើញជនជាតិចិនចំនួន២នាក់ រួមជាមួយវត្ថុតាងជាគ្រឿងញៀនចំនួន៥កញ្ចប់ និងដបទឹកកែច្នៃសម្រាប់ប្រើប្រាស់គ្រឿងញៀនចំនួន៤ដប។

ក្រោយការបង្ក្រាប សមត្ថកិច្ចបានឃាត់ខ្លួនជនជាតិចិនទាំង២នាក់ រួមទាំងវត្ថុតាងពាក់ព័ន្ធ ប្រគល់ជូនការិយាល័យប្រឆាំងគ្រឿងញៀង នៃស្នងការដ្ឋាននគរបាលរាជធានីភ្នំពេញ ដើម្បីបន្តនីតិវិធីស្រាវជ្រាវ និងចាត់ការតាមផ្លូវច្បាប់ ៕ អត្ថបទ៖ សំណាង

The post អាជ្ញាធរខណ្ឌសែនសុខ បន្តចុះរដ្ឋបាលពិនិត្យ៥ទីតាំងរកឃើញ ជនបរទេស២នាក់ ពាក់ព័ន្ធគ្រឿងញៀននៅខុនដូរអេចសែនសុខ appeared first on Kampuchea Thmey Daily.

ជាក់ស្តែងនៅចំណុចកំណាត់ផ្លូវលេខ ២០១១ ភូមិដំណាក់ សង្កាត់គោកឃ្លាង ខណ្ឌសែនសុខ រាជធានីភ្នំពេញ រដ្ឋបាលខណ្ឌសែនសុខ បានដាក់គ្រឿងចក្រធ្វើការជួសជុលផ្លូវរងការខូចខាត ដើម្បីសម្រួលដល់ការធ្វើចរាចរណ៍របស់ប្រជាពលរដ្ឋដែលធ្វើដំណើរឆ្លងកាត់ផ្លូវនេះ។

កញ្ញា ភាព ប្រជាពលរដ្ឋរស់នៅក្នុងមូលដ្ឋាន និងជាអ្នកធ្វើដំណើរ បានសម្តែងនូវក្តីសប្បាយរីករាយ និង ថ្លែងអំណរគុណយ៉ាងជ្រាលជ្រៅចំពោះថ្នាក់ដឹកនាំខណ្ឌសែនសុខ ក៏ដូចជាអាជ្ញាធរសង្កាត់គោកឃ្លាង ដែលតែងតែគិតគូរ និង ដោះស្រាយរាល់ទុក្ខលំបាករបស់ប្រជាពលរដ្ឋបានលឿនរហ័សបែបនេះ។

ប្រជាពលរដ្ឋដដែល បានបន្តថា សកម្មភាពនេះគឺជាការយកចិត្តទុកដាក់ខ្ពស់ ឆ្លើយតបចំពោះក្តីកង្វល់ និង តម្រូវការចាំបាច់របស់ប្រជាពលរដ្ឋក្នុងមូលដ្ឋានទាន់ពេលវេលា។

លោក ញ៉ាត សាម៉េត ចៅសង្កាត់គោកឃ្លាង បញ្ជាក់ថា ការកែលម្អហេដ្ឋារចនាសម្ព័ន្ធនេះ គឺជាកិច្ចការអាទិភាពមួយ ដើម្បីធានាឲ្យបាននូវការធ្វើដំណើរប្រកបដោយភាពងាយស្រួល និង សុវត្ថិភាព ស្របតាមគោលនយោបាយអភិវឌ្ឍន៍ភូមិ-សង្កាត់ ជូនពលរដ្ឋក្នុងមូលដ្ឋាន៕
អត្ថបទ ៖ រដ្ឋា

The post រដ្ឋបាលខណ្ឌសែនសុខ ដាក់គ្រឿងចក្រជួសជុលកំណាត់ផ្លូវខូចឡើងវិញ ក្រោយមានការសំណូមពរពីពលរដ្ឋ appeared first on Kampuchea Thmey Daily.

លោកស្រី ដោ សម្ផស្ស នាយករងរដ្ឋបាល និងជាអ្នកនាំពាក្យរដ្ឋបាលរាជធានីភ្នំពេញ បានឱ្យដឹងនាព្រឹកថ្ងៃទី ២៣ មិថុនា នេះថា ក្រោមការដឹកនាំ និង បញ្ជាផ្ទាល់របស់ លោក ឃួង ស្រេង អភិបាល នៃគណៈអភិបាលរាជធានីភ្នំពេញ និងជាប្រធានគណៈបញ្ជាការឯកភាពរដ្ឋបាលរាជធានីភ្នំពេញ នៅថ្ងៃទី ២២ ខែមិថុនា ឆ្នាំ ២០២៦ ម្សិលមិញនេះ បានដឹកនាំគណៈបញ្ជាការឯកភាពរដ្ឋបាលខណ្ឌទាំង ១៤ ចុះត្រួតពិនិត្យ និង ផ្សព្វផ្សាយអនុក្រឹត្យលេខ ០៣ នៅតាមទីតាំងអគារខុនដូរ អាផាតមិន បុរី ផ្ទះសំណាក់ និង សណ្ឋាគារមួយចំនួន ក្នុងគោលដៅប្រតិបត្តិការបោសសម្អាតទីតាំងសង្ស័យប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (ONLINE SCAMS) ក្នុងភូមិសាស្ដ្ររាជធានីភ្នំពេញ បានចំនួន ៦៤ ទីតាំង រកឃើញជនបរទេសស្នាក់នៅសរុបចំនួន ៣០៦ នាក់ (ស្រី ៩០ នាក់) មានលិខិតឆ្លងដែនត្រឹមត្រូវ។

លោកស្រី ដោ សម្ផស្ស បានបញ្ជាក់ថា ក្នុងចំណោម ៦៤ ទីតាំងនេះ ក្រុមការងារ បានរកឃើញបទល្មើសឆបោកតាមប្រព័ន្ធបច្ចេកវិទ្យា ២ ករណី រួមមាន ៖ ១.នៅខុនដូរភ្នំពេញកាឡាក់ស៊ីហ្គាដេន អគារ B បន្ទប់លេខ ១៦០៤ ភូមិបន្លាស្អិត សង្កាត់ឃ្មួញ ខណ្ឌសែនសុខ ឃាត់ខ្លួនជនសង្ស័យជនជាតិចិនចំនួន ២ នាក់ (ប្រុស) ព្រមទាំងដកហូតសម្ភាររួមមាន ៖ ទូរស័ព្ទ ១ គ្រឿង និង Tablet ៤ គ្រឿង។ តាមការធ្វើកោសល្យវិច័យរបស់ការិយាល័យប្រឆាំងបទល្មើសបច្ចេកវិទ្យា នៃស្នងការដ្ឋាននគរបាលរាជធានីភ្នំពេញ បានត្រួតពិនិត្យឃើញថាជាប់ពាក់ព័ន្ធនឹងបទល្មើសឆបោកតាមប្រព័ន្ធបច្ចេកវិទ្យា (ONLINE SCAMS) ក្រោមរូបភាពឆបោកក្លែងកិច្ចសន្យា ឬ ឆបោកប្រាក់កម្ចី។ ២.នៅអគារខុនដូរដដែល ក្នុងបន្ទប់លេខ ២៤០២ គ្មានមនុស្សសា្នក់នៅ និង ដកហូតសម្ភារ រួមមាន ៖ ទូរស័ព្ទ ១៣ គ្រឿង និង កុំព្យូទ័រយួរដៃ ១ គ្រឿង។ តាមការធ្វើកោសល្យវិច័យរបស់ការិយាល័យប្រឆាំងបទល្មើសបច្ចេកវិទ្យា នៃស្នងការដ្ឋាននគរបាលរាជធានីភ្នំពេញ បានត្រួតពិនិត្យឃើញថាជាប់ពាក់ព័ន្ធនឹងបទល្មើសរក្សាទុកឧបករណ៍បម្រើឱ្យបទល្មើសឆបោកតាមប្រព័ន្ធបច្ចេកវិទ្យា (ONLINE SCAMS)។

លោកស្រី ដោ សម្ផស្ស បានបន្តថា ពាក់ព័ន្ធនឹងការងារចុះពិនិត្យនេះដែរ ក្រុមការងារខណ្ឌចំការមន បានចុះត្រួតពិនិត្យទីតាំង LH Residence ស្ថិតនៅអគារលេខ ១៣ ផ្លូវលេខ ៩ ភូមិ ៥ សង្កាត់ទន្លេបាសាក់ ក្នុងអគារ A បន្ទប់លេខ ៦០៥ ជាន់ទី ៦ និង អគារ B បន្ទប់លេខ ៨០១ ជាន់ទី ៨ បានរកឃើញបទល្មើសចំនួន ១ ករណី ដោយបានដកហូតសម្ភារៈកុំព្យូទ័រ All in one ចំនួន ៥ គ្រឿង។ តាមការធ្វើកោសល្យវិច័យរបស់ការិយាល័យប្រឆាំងបទល្មើសបច្ចេកវិទ្យា នៃស្នងការដ្ឋាននគរបាលរាជធានីភ្នំពេញ បានត្រួតពិនិត្យឃើញថាជាប់ពាក់ព័ន្ធនឹងបទល្មើសរក្សាទុកទិន្នន័យវេបសាយសម្រាប់ចែកចាយរូបភាព និង វីដេអូអាសអាភាសតាមប្រព័ន្ធបច្ចេកវិទ្យា។ បច្ចុប្បន្ន ជនសង្ស័យ និង សម្ភារទាំងអស់ ត្រូវបានបញ្ជូនទៅស្នងការដ្ឋាននគរបាលរាជធានីភ្នំពេញ ដើម្បីបន្ដនីតិវិធី។

លោកស្រី ដោ សម្ផស្ស ក៏បានរំលឹកផងដែរថា ក្នុងកិច្ចប្រជុំគណៈបញ្ជាការឯកភាពរដ្ឋបាលរាជធានីភ្នំពេញ កាលពីព្រឹកថ្ងៃទី ២២ ខែមិថុនា ម្សិលមិញនេះ លោក ឃួង ស្រេង ក៏បានលើកទឹកចិត្តឱ្យមានការចូលរួមពីគ្រប់ភាគីពាក់ព័ន្ធ ទាំងអាជ្ញាធរ កងកម្លាំងមានសមត្ថកិច្ច ម្ចាស់ទីតាំង និង ប្រជាពលរដ្ឋទូទៅ សហការធ្វើយ៉ាងណាឱ្យការបង្រ្កាបបទល្មើសឆបោកតាមប្រព័ន្ធបច្ចេកវិទ្យា (Online Scams) កាន់តែមានប្រសិទ្ធិភាព៕
អត្ថបទ ៖ ស្រីរ័ត្ន

The post ថ្ងៃទី ២២ មិថុនា ចុះត្រួតពិនិត្យ ៦៤ ទីតាំង នៅភ្នំពេញ រកឃើញ ONLINE SCAMS ២ ករណី ឃាត់ខ្លួនជនសង្ស័យ ២ នាក់ appeared first on Kampuchea Thmey Daily.

ក្នុងរង្វង់ប្រតិបត្តិការ កម្លាំងសមត្ថកិច្ច បានចុះត្រួតពិនិត្យជនបរទេសស្នាក់នៅចំនួន ២២ បន្ទប់ ស្មើនឹង ២៤ នាក់ ក្នុងនោះ មានស្ត្រី ៧ នាក់។ ការត្រួតពិនិត្យឃើញថា ជនបរទេសភាគច្រើនមានលិខិតឆ្លងដែន និង ទិដ្ឋាការត្រឹមត្រូវ ស្របតាមច្បាប់ និង មិនមានការសង្ស័យពាក់ព័ន្ធនឹងសកម្មភាពឆបោកតាមប្រព័ន្ធអនឡាញនោះទេ។

ដោយឡែកនៅអគារ B នៃខុនដូខាងលើដដែល នៅបន្ទប់លេខ ១៦០៤ បានជួបជនជាតិចិនចំនួន ២ នាក់ ភេទប្រុស និង ដកហូតសម្ភារមួយចំនួនរួមមាន ៖ iPad ចំនួន ៤ គ្រឿង និង ទូរសព្ទដៃ ១ គ្រឿង។ បន្ថែមពីនេះ នៅបន្ទប់លេខ ២៤០២ កម្លាំងសមត្ថកិច្ច បានរកឃើញទូរសព្ទដៃចំនួន ១៣ គ្រឿង និង កុំព្យូទ័រយួរដៃ ១ គ្រឿង ដែលត្រូវបានសង្ស័យថា ជាវត្ថុតាងពាក់ព័ន្ធនឹងសកម្មភាពឆបោកតាមប្រព័ន្ធបច្ចេកវិទ្យា (Online Scams)។

ចំណែក លទ្ធផលត្រួតពិនិត្យ បន្ទប់លេខ ១៩០៤ សមត្ថកិច្ចបានរកឃើញវត្ថុតាងជាច្រើនរួមមាន ៖ កាំភ្លើងខ្លីចំនួន ២ ដើម , គ្រាប់អាវុធខ្លីទំហំ ៩ មីលីម៉ែត្រ ចំនួន ៥១ គ្រាប់ , ម្សៅសក្រាមសង្ស័យជាសារធាតុញៀនចំនួន ២ កញ្ចប់ , ជញ្ជីងថ្លឹង ១ គ្រឿង , ឧបករណ៍ប្រើប្រាស់គ្រឿងញៀន ១ ឈុត , ខ្នោះដៃដែក ១ គូ , កុំព្យូទ័រ Laptop Apple ១ គ្រឿង , ទូរសព្ទដៃ ២ គ្រឿង , លិខិតឆ្លងដែន ៣ ក្បាល , អត្តសញ្ញាណបណ្ណសញ្ជាតិចិន ៧ សន្លឹក , បណ្ណការងារជនបរទេស ៣ សន្លឹក , កាតធនាគារ ១០ សន្លឹក និង ត្រាសម្គាល់ក្រុមហ៊ុន ១។

ក្រោយការត្រួតពិនិត្យ និង ប្រមូលវត្ថុតាងរួច សមត្ថកិច្ចបានឃាត់ខ្លួនជនជាតិចិនចំនួន ២ នាក់ ព្រមទាំងដកហូតសម្ភារពាក់ព័ន្ធទាំងអស់ប្រគល់ជូនស្នងការដ្ឋាននគរបាលរាជធានីភ្នំពេញ ដើម្បីបន្តការស៊ើបអង្កេត និង អនុវត្តនីតិវិធីតាមផ្លូវច្បាប់។

ជាចុងក្រោយ គណៈបញ្ជាការឯកភាពរដ្ឋបាលខណ្ឌសែនសុខ ក៏បានសម្រេចបិទឃ្លុំជាបណ្ដោះអាសន្នបន្ទប់លេខ ១៦០៤ និង បន្ទប់លេខ ១៩០៤ នៃអគារ B ដើម្បីទុកជាកន្លែងរក្សាវត្ថុតាង និង បន្តការស្រាវជ្រាវរបស់សមត្ថកិច្ច៕
អត្ថបទ ៖ សំណាង

The post បង្ក្រាប Online Scams ខណ្ឌសែនសុខ រកឃើញអាវុធ និង សារធាតុសង្ស័យគ្រឿងញៀន នៅខុនដូភ្នំពេញកាឡាក់ស៊ីហ្គាដេន appeared first on Kampuchea Thmey Daily.

កញ្ញា ពេជ្រ រ័ត្ន ជាពលរដ្ឋបានលើកឡើងថា គាត់បានឃើញអាជ្ញាធរបានដាក់គ្រឿងចក្រ ចាក់បេតុងនៅចំណុចផ្លូវ ១០០៣នេះ រយៈពេលជាង ៨ថ្ងៃហើយ ហើយនៅពេលនោះអាជ្ញាធរក៏បានសុំការអធ្យាស្រ័យពី ពួកគាត់ជាប្រជាពលរដ្ឋ និងបានសន្យាថា សម្រាប់ការជួសជុល និងចាក់បេតុងផ្លូវខាងលើនេះ និងពន្លឿនអោយបានឆាប់រហ័សបំផុត  ។ ពលរដ្ឋបន្តថា ដោយគិតមកទល់ពេលនេះ ផ្លូវបេតុងថ្មីមួយខ្សែខាងលើ សម្រេចប្រហែល ៩០ភាគរយទៅហើយ។

លោក សេង ជាប្រជាពលរដ្ឋនៅតំបន់នោះ បានលើកការកោតសរសើរទៅដល់ ថ្នាក់ដឹកនាំ ក៏ដូចជាអាជ្ញាធរគ្រប់ជាន់ថ្នាក់ ដែលបានគិតគូរពីទុក្ខលំបាក ដល់ពលរដ្ឋតែងតែជួបកន្លងមក ហើយបានធ្វើតាមការសន្យា អោយរួចរាល់តាមវេលាកំណត់ មិនអោយពួកគាត់ជាប្រជាពលរដ្ឋខាតពេលវេលាយូរ ក្នុងការប្រកបអាជីវកម្ម និងឆ្លងកាត់នោះឡើយ ។

លោក ជុំ សារ៉ាយ ចៅសង្កាត់ភ្នំពេញថ្មី បានបញ្ជាក់មកកាន់ក្រុមការងារកម្ពុជាថ្មីថា ដំណើរការ ការដ្ឋានកំពុងស្ថាបនាផ្លូវបេតុងនេះ ជាគម្រោងអភិវឌ្ឍន៍របស់ រដ្ឋបាលរាជធានីភ្នំពេញ ដើម្បីឆ្លើយតបទៅនឹងតម្រូវការចាំបាច់ ក៏ដូចជាការបង្កលក្ខណៈងាយស្រួលក្នុងការធ្វើដំណើររបស់បងប្អូនប្រជាពលរដ្ឋ នៅផ្លូវបេតុងថ្មីមួយខ្សែ ប្រវែងជាង៤០០ម៉ែត្រ ទទឹងប្រហែល១០ម៉ែត្រ មានកម្រាស់ ២តឹក ។

ជាចុងក្រោយ លោក ចៅសង្កាត់ភ្នំពេញថ្មីបានបន្ថែមថា សូមប្រជាពលរដ្ឋរស់នៅអមសងខាងផ្លូវទាំងអស់ មេត្តានាំគ្នាចូលរួមថែរក្សា បរិស្ថាន នឹងសណ្តាប់ធ្នាប់សាធារណៈទាំងអស់គ្នា ដើម្បីលើកកម្ពស់សោភ័ណភាព កែប្រែមុខមាត់ សហគមន៍ ឱ្យមានភាពស្អាតបាត មានរបៀបរៀបរយ និងអនាម័យខ្ពស់ ក៏ដូចជាប្រើប្រាស់បានយូរអង្វែងផងដែរ ៕ អត្ថបទ ៖ រដ្ឋា

The post រដ្ឋបាលខណ្ឌសែនសុខ បន្តស្ថាបនាផ្លូវបេតុងមួយខ្សែ ដើម្បីសម្រួលការធ្វើដំណើររបស់ប្រជាពលរដ្ឋប្រចាំថ្ងៃ appeared first on Kampuchea Thmey Daily.

អាជ្ញាធរជំនាញពាក់ព័ន្ធ បានអោយដឹងថា កម្លាំងជំនាញបានចុះត្រួតពិនិត្យឃ្លាំងបង្កកសាច់ចំនួន ០៤ទីតាំង ក្នុងនោះរួមមាន ទីតាំងទី១ សហគ្រាស ធីអិល អ៊ែរ អិចប្រេស ឯ.ក ស្ថិតនៅដីឡូត៍លេខ៤០៤ ភូមិសំរោងទាវ សង្កាត់ក្រាំងធ្នង់ ទំនិញមានប្រតិវេទត៍គយ នាំចូលមកស្របច្បាប់ មានប្រភពមកពីប្រទេសចិន , ទីតាំងទី២ ឃ្លាំងស្តុក និងចែកចាយគ្រឿងឧបភោគ-បរិភោគ លីហ្វ៊ូដ សឺវីស ស្ថិតនៅក្បាលដីលេខ១៨០០ ផ្លូវបេតុង ភូមិសំរោង សង្កាត់ឃ្មួញ ទំនិញប្រភេទសាច់បង្កក មានប្រតិវេទត៍គយ នាំចូលមកស្របច្បាប់ មានប្រភពមកពីប្រទេសចំនួន ១៥ រួមមាន៖ ចិន ហូឡង់ អ៊ីតាលី ម៉ាឡេស៊ី ប្រេស៊ីល ប៉ូឡូញ សហរដ្ឋអាមេរិច ឥណ្ឌា អូស្ត្រាលី ប៊ែលហ្ស៊ិក អាល្លឺម៉ង់ សាយប្រឹស វៀតណាម កូរ៉េខាងត្បូង និងដាណឺម៉ាក ពុំមានមុខទំនិញប្រភេទសាច់បង្កកនាំចូលពីប្រទសថៃឡើយ ,

ទីតាំងទី៣ ឃ្លាំងស្តុក និងវេចខ្ចប់សាច់ យីហោ “BETAGRO” ស្ថិតនៅភូមិចុងថ្នល់ខាងកើត ភូមិទឹកថ្លា សង្កាត់ទឹកថ្លា  ទំនិញប្រភេទសាច់ មានប្រភពមកពីតាមបណ្ដាខេត្តក្នុងស្រុក , ទីតាំងទី៤ ឃ្លាំងស្តុក និងចែកចាយសាច់ យីហោ អេច- អេចអិលជេអេហ្វ (ខេមបូឌា) ហ៊្វូដ ឯ.ក ស្ថិតនៅភូមិគោកឃ្លាង សង្កាត់គោកឃ្លាង ទំនិញប្រភេទសាច់ មានប្រភពមកពីតាមបណ្ដាទីតាំងមួយចំនួនក្នុងស្រុក

ក្រោយពីត្រួតពិនិត្យជាក់ស្ដែងឃើញថា ឃ្លាំងទាំង០៤ខាងលើ ពុំមានមុខទំនិញប្រភេទសាច់បង្កកនាំចូលពីប្រទសថៃឡើយ ។

គួររំលឹកផងដែរ ក្នុងរយៈពេលប៉ុន្មានថ្ងៃចុងក្រោយ អាជ្ញាធរទាំង ១៤ខណ្ឌ បន្តយ៉ាងមមាញឹក ក្នុងការចុះឆែកឆេរតាម ទីតាំងឃ្លាំងស្តុកសាច់បង្កកទាំងអស់ ដើម្បីបង្ការការពារសុខភាពជូនប្រជាពលរដ្ឋ ៕ អត្ថបទ ៖ រដ្ឋា

The post អាជ្ញាធរខណ្ឌសែនសុខ ចុះឆែកឃ្លាំងសាច់បង្កក ៤កន្លែង ក្រោយមានការសង្ស័យរឿងនាំចូលពីថៃ appeared first on Kampuchea Thmey Daily.

គណៈបញ្ជាការឯកភាពខណ្ឌសែនសុខ បានឲ្យដឹងថា ទីតាំងទាំងពីរនេះមានបន្ទប់សរុបចំនួន ២,០៣២ បន្ទប់ ដោយមានជនបរទេសស្នាក់នៅចំនួន ៣៤៦ បន្ទប់ ស្មើនឹង ៤៤៧ នាក់ ក្នុងនោះ ស្ត្រីចំនួន ១១៤ នាក់ ដែលមានដល់ទៅ ២២ សញ្ជាតិផ្សេងៗ គ្នា។ ក្នុងចំណោមជនបរទេសទាំងនោះ មានជនជាតិចិនច្រើនជាងគេ ដោយមានចំនួន ៣៤៤ នាក់ ស្រី ៧០ នាក់ , បន្ទាប់មកជនជាតិវៀតណាម ៣៩ នាក់ ស្រី ២០ នាក់ , ឥណ្ឌូនេស៊ី ១១ នាក់ ស្រី ៧ នាក់, មីយ៉ាន់ម៉ា ៩ នាក់ ស្រី ៤ នាក់, ឡាវ ៥ នាក់ ស្រី ៤ នាក់ និង គុយបា ៥ នាក់ ស្រី ២ នាក់។ ក្រៅពីនេះ ក៏មានជនជាតិអាមេរិក នីហ្សេរីយ៉ា កូរ៉េខាងត្បូង អាហ្វ្រិកខាងត្បូង ប្រេស៊ីល ហ្វីលីពីន ឥណ្ឌា ប៉េរូ តៃវ៉ាន់ កៀហ្ស៊ីស៊ីស្ថាន ថៃ បារាំង រុស្ស៊ី កូឡុំប៊ី ម៉ាឡេស៊ី និង អ៊ុយក្រែន ផងដែរ។​

លទ្ធផល នៃការត្រួតពិនិត្យបានបង្ហាញថា ជនបរទេសចំនួន ៤៣៨ នាក់ មានលិខិតឆ្លងដែន និង ទិដ្ឋាការត្រឹមត្រូវ ស្របតាមច្បាប់ ហើយពុំមានការសង្ស័យពាក់ព័ន្ធនឹងបទល្មើសឆបោកតាមប្រព័ន្ធបច្ចេកវិទ្យា ឬ បទល្មើសផ្សេងៗ ឡើយ។ ដោយឡែក ជនបរទេសចំនួន ៩ នាក់ ផ្សេងទៀត កំពុងស្នាក់នៅខុសច្បាប់ ដោយក្នុងនោះ រួមមាន ជនជាតិចិន ៧ នាក់ មាន ៦ នាក់ គ្មានលិខិតឆ្លងដែន និង ១ នាក់ ផុតសុពលភាពទិដ្ឋាការ។ បន្ថែមពីនេះ មានជនជាតិនីហ្សេរីយ៉ា ១ នាក់ និង ជនជាតិបង់ក្លាដែស ១ នាក់ ផុតសុពលភាពទិដ្ឋាការផងដែរ។

ជាមួយគ្នានេះ សមត្ថកិច្ចក៏បានឃាត់ខ្លួនជនជាតិចិនម្នាក់ ទោះបីជាមានលិខិតឆ្លងដែន និង ទិដ្ឋាការត្រឹមត្រូវក៏ដោយ ព្រោះបុគ្គលរូបនោះមិនបានសហការជាមួយសមត្ថកិច្ចក្នុងពេលត្រួតពិនិត្យរដ្ឋបាល និង មិនអាចបញ្ជាក់ពីមុខរបរ ឬ សកម្មភាពការងារបានច្បាស់លាស់។

ក្រោយបញ្ចប់ប្រតិបត្តិការ គណៈបញ្ជាការឯកភាពរដ្ឋបាលខណ្ឌសែនសុខ បានសម្រេចប្រគល់ជនបរទេសចំនួន ៩ នាក់ ដែលពាក់ព័ន្ធនឹងការស្នាក់នៅខុសច្បាប់ ជូនស្នងការដ្ឋាននគរបាលរាជធានីភ្នំពេញ ដើម្បីបន្តអនុវត្តនីតិវិធីច្បាប់៕
អត្ថបទ ៖ សំណាង

The post ប្រតិបត្តិការនៅខណ្ឌសែនសុខ ៖ ឃាត់ខ្លួនជនបរទេស ៩ នាក់ ក្រោយត្រួតពិនិត្យជាង ៤៤០ នាក់ appeared first on Kampuchea Thmey Daily.