នៅរសៀលថ្ងៃទី ២៩ ខែមិថុនា ឆ្នាំ ២០២៦ នេះ លោក ថោ ជេដ្ឋា រដ្ឋមន្ត្រីក្រសួងធនធានទឹក និង ឧតុនិយម រួមដំណើរដោយ លោក អ៊ុន ចាន់ដា អភិបាល នៃគណៈអភិបាលខេត្តកំពង់ចាម ព្រមទាំងមន្ត្រីជំនាញពាក់ព័ន្ធ បានអញ្ជើញចុះពិនិត្យស្ថានភាពជាក់ស្តែង នៃទីតាំងច្រាំងទន្លេមេគង្គដែលបានរងការបាក់ស្រុតកាលពីពេលកន្លងទៅ ស្ថិតនៅក្បែរកំពង់រង់ចាំ ក្នុងក្រុងកំពង់ចាម ខេត្តកំពង់ចាម ដើម្បីត្រៀមរៀបចំសាងសង់សំណង់ទប់ច្រាំងថ្មី។

ស្របពេល នៃការពិនិត្យសិក្សាស្តារ និង សាងសង់ច្រាំងទន្លេនេះ លោក អ៊ុន ចាន់ដា បានបញ្ជាក់ថា ក្រសួងធនធានទឹក និង អាជ្ញាធរខេត្ត នឹងសហការគ្នាឲ្យបានល្អ ដើម្បីពន្លឿនការងារសាងសង់សំណង់ទប់ច្រាំងថ្មីនេះ ឲ្យបានឆាប់រហ័ស និង មានគុណភាពរឹងមាំយូរអង្វែង។ ជាមួយគ្នានេះ​ លោក​ អ៊ុន​ ចាន់ដា​ ក៍បានបញ្ជាឲ្យអាជ្ញាធរក្រុង​ សហការ​គ្នាជាមួយសមត្ថកិច្ច ធ្វើការប្រើប្រាស់កម្លាំងសមត្ថកិច្ច ដើម្បីប្រចាំការហាមឃាត់ការធ្វើចរាចរណ៍ និង ធ្វើដំណើចេញចូលតំបន់បាក់ស្រុតច្រាំងទន្លេជាបណ្តោះអាសន្ន ដើម្បីការពារសុវត្ថិភាពដល់ប្រជាពលរដ្ឋទូទៅ។

គូសបញ្ជាក់​ថា​ កាលពីយប់ថ្ងៃទី ៣០ ខែមករា ឆ្នាំ ២០២៦ មានហេតុការណ៍បាក់ស្រុតច្រាំងទន្លេនៅចំណុចភូមិទី ១៥ សង្កាត់កំពង់ចាម ក្រុងកំពង់ចាម ខេត្តកំពង់ចាម តែមិនបង្កគ្រោះថ្នាក់ដល់អ្នកធ្វើដំណើរនោះទេ។ មូលហេតុការបាក់ស្រុតច្រាំងទន្លេនៅទីតាំងខាងលើនេះ បណ្តាលមកពីទីតាំងនោះស្ថិតនៅខាងមុខអន្លង់ទឹកកួច ដែលមានជម្រៅចាប់ពី ១.២ ម៉ែត្រ ទៅ ៦ ម៉ែត្រ៕
អត្ថបទ​ និង រូបភាព ៖​ ឡេក​ ចាន់ពេជ្រ

The post រដ្ឋមន្ត្រីក្រសួងធនធានទឹក និង អភិបាលខេត្ត ចុះពិនិត្យច្រាំងទន្លេនៅក្រុងកំពង់ចាម​ ដើម្បីត្រៀមស្តារឡើងវិញ appeared first on Kampuchea Thmey Daily.

ការដុតកម្ទេចចោលនេះ បានប្រព្រឹត្តទៅនៅថ្ងៃទី២៥ ខែមិថុនា ឆ្នាំ២០២៦ ដោយមានការសម្របសម្រួលពីលោកព្រះរាជអាជ្ញារង នៃអយ្យការអមសាលាដំបូងខេត្តកំពង់ចាម និងលោក ស៊ឹម ថាវីរៈ ប្រធានមន្ទីរកសិកម្ម រុក្ខាប្រមាញ់ និងនេសាទខេត្ត ព្រមទាំងមន្ត្រីតំណាងអគ្គនាយកដ្ឋាន ការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) ខេត្តផងដែរ។

លោក នង ម៉េងហ៊ាង ប្រធានការិយាល័យផលិតកម្ម និងបសុព្យាបាល នៃមន្ទីរកសិកម្មរុក្ខាប្រម៉ាញ់ និងនេសាទ ខេត្តកំពង់ចាម បានឱ្យដឹងថា ផលិតផលសាច់ និងប្រហិតទាំងនេះ ត្រូវបានរកឃើញថាមានការដឹកជញ្ជូនខុសលក្ខណៈបច្ចេកទេសបសុព្យាបាល (ខ្វះប្រព័ន្ធត្រជាក់រក្សាគុណភាពសាច់) ដែលបណ្តាលឱ្យសាច់ប្រែពណ៌ មានក្លិន និងខូចគុណភាពទាំងស្រុង។ ប្រសិនបើទំនិញទាំងនេះត្រូវបានចរាចរណ៍លក់នៅលើទីផ្សារ វានឹងបង្កហានិភ័យខ្ពស់ ប៉ះពាល់ធ្ងន់ធ្ងរដល់សុខភាពអ្នកប្រើប្រាស់៕

អត្ថបទ​៖​ ឡេក​ ចាន់ពេជ្រ

The post មន្ត្រី​ជំនាញ​ខេត្តកំពង់ចាម ដុតកម្ទេចសាច់បង្កក និងប្រហិតខូចគុណភាពជាង ២៥០គីឡូក្រាម appeared first on Kampuchea Thmey Daily.

នៅថ្ងៃទី១៧ ខែមិថុនា  ឆ្នាំ២០២៦ មន្ទីរពាណិជ្ជកម្មខេត្តកំពង់ចាម សហការជាមួយ សាខាក.ប.ប.ខេត្តកំពង់ចាម និងអាជ្ញាធរមូលដ្ឋាន បានធ្វើការចុះត្រួតពិនិត្យទីតាំងស្តុកទុក លក់ចែកចាយ សាច់បង្កក ដែលស្ថិតនៅក្នុងក្រុងកំពង់ចាម ស្រុកកំពង់សៀម និងស្រុកព្រៃឈរ ខេត្តកំពង់ចាម បានចំនួន១៧ទីតាំង។​

ជាលទ្ធផលបានរកឃើញ ចៃយ៉ខៀវ ចំនួន៥គីឡូក្រាម, ប្រហិតត្រីចំនួន៣គីឡូក្រាម , ហតដកម្ទេសចំនួន៤គីឡូក្រាម , សាច់ក្រកកញ្ចប់ចំនួន៥គីឡូក្រាម , ហតដកស្បែកជ្រូកចំនួន២គីឡូក្រាម, ប្រហិតមឹកបំពង់ចំនួ​៣គីឡូក្រាម, តៅហ៊ូជ្រុងចំនួ​ន៣គីឡូក្រាម, និងប្រហិតសាច់ក្តាមចំនួន៤គីឡូ​ ដែលបានហួសកាលបរិច្ឆេទ​ និងប្រហិតបង្កកហួសកាល បរិច្ឆេទចំនួន២៩គីឡូក្រាម។

ជាមួយគ្នា​នេះដែរ​ ក្រុមការងារ​ មិនបានរកឃើញសាច់បង្កកដែលមានប្រភពមកពីប្រទេសថៃនោះទេ​ ហេីយក្រុមការងារបានផ្សព្វផ្សាយច្បាប់ស្តីពីសុវត្ថិភាពម្ហូបអាហារ និងបទប្បញ្ញតិពាក់ព័ន្ធជូនដល់អាជីវករ ដើម្បីឱ្យបានយល់ដឹងបន្ថែម៕

អត្ថបទ​និងរូបភាព​៖​ឡេក​ ចាន់ពេជ្រ

The post មន្ត្រី​សមត្ថកិច្ច​ ក.ប.ប.ខេត្តកំពង់ចាម ចុះត្រួតពិនិត្យទីតាំងស្តុកលក់ចែកចាយសាច់បង្កក និងប្រហិត​ appeared first on Kampuchea Thmey Daily.

នាថ្ងៃទី ១៥ ខែមិថុនា ឆ្នាំ ២០២៦ នេះ ក្រុមការងារបច្ចេកទេស នៃក្រសួងសាធារណការ និង ដឹកជញ្ជូន ដឹកនាំដោយ លោក លឹម ស៊ីដេនីន រដ្ឋលេខាធិការក្រសួងសាធារណការ និង ដឹកជញ្ជូន និងជានាយកគម្រោង និង មានការចូលរួមពីមន្ត្រីជំនាញបច្ចេកទេស និងក្រុមហ៊ុនទទួលសាងសង់ បានអញ្ជើញចុះត្រួតពិនិត្យលក្ខណៈបច្ចេកទេសលម្អិត និង ប្រារព្ធពិធីប្រគល់-ទទួលគម្រោងសាងសង់ និង ពង្រីកផ្លូវជាតិលេខ ៧ (ស្គន់-កំពង់ចាម) បន្ទាប់ពីគម្រោងនេះសម្រេចការអនុវត្តបានពេញលេញ ១០០% តាមផែនការកំណត់។

លោក លឹម ស៊ីដេនីន បានឲ្យដឹងថា ការចុះពិនិត្យលើកនេះ ផ្តោតសំខាន់លើការត្រួតពិនិត្យគុណភាពសំណង់ លក្ខណៈបច្ចេកទេស សុវត្ថិភាពចរាចរណ៍ ការបំពាក់ផ្លាកសញ្ញា ប្រព័ន្ធបង្ហូរទឹក និង ហេដ្ឋារចនាសម្ព័ន្ធរងផ្សេងៗ ដើម្បីធានាថា គម្រោងមានគុណភាពរឹងមាំ សុវត្ថិភាព និង អាចប្រើប្រាស់បានយូរអង្វែង ស្របតាមបទដ្ឋានបច្ចេកទេសជាតិ និង អន្តរជាតិ។ ផ្លូវជាតិលេខ ៧ គឺជាខ្សែផ្លូវសេដ្ឋកិច្ចដ៏សំខាន់មួយ ដែលដើរតួនាទីជាសរសៃឈាមសេដ្ឋកិច្ចក្នុងការតភ្ជាប់តំបន់កណ្តាលទៅភាគឦសាន នៃប្រទេស ជួយសម្រួលដល់ការធ្វើដំណើរ ការដឹកជញ្ជូនទំនិញ កសិផល និង ផលិតផលឧស្សាហកម្ម ព្រមទាំងរួមចំណែកលើកកម្ពស់សកម្មភាពសេដ្ឋកិច្ច សង្គម និង ការវិនិយោគនៅតាមបណ្តោយខ្សែផ្លូវ។

លោករដ្ឋលេខាធិការ បន្តថា គម្រោងពង្រីក និង លើកកម្រិតផ្លូវជាតិលេខ ៧ នេះ មានប្រវែងសរុប ៤៥,៥០ គីឡូម៉ែត្រ ចាប់ពីទីប្រជុំជនស្គន់ ស្រុកជើងព្រៃ រហូតដល់ក្រុងកំពង់ចាម ខេត្តកំពង់ចាម ដែលជាផ្នែកមួយ នៃបណ្តាញផ្លូវអាស៊ាន AH11។ គម្រោងនេះ បានបើកការដ្ឋានសាងសង់កាលពីថ្ងៃទី ៩ ខែមករា ឆ្នាំ ២០២៣ ដោយធ្វើការពង្រីកពីផ្លូវ ២ គន្លង ទៅជា ៤ គន្លង ស្របតាមស្តង់ដារបច្ចេកទេស ដើម្បីឆ្លើយតបទៅនឹងកំណើនតម្រូវការចរាចរណ៍ និង ការដឹកជញ្ជូនកាន់តែច្រើន។

សូមជម្រាបថា កំណាត់ផ្លូវជាតិលេខ ៧ (ស្គន់-កំពង់ចាម) គ្រោងនឹងប្រារព្ធពិធីសម្ពោធដាក់ឲ្យប្រើប្រាស់ជាផ្លូវការនៅថ្ងៃទី ៧ ខែកក្កដា ឆ្នាំ ២០២៦ ក្រោមអធិបតីភាពដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលជាសមិទ្ធផលថ្មីមួយបន្ថែមទៀតក្នុងការអភិវឌ្ឍហេដ្ឋារចនាសម្ព័ន្ធដឹកជញ្ជូនរបស់កម្ពុជា៕
អត្ថបទ និង រូបភាព ៖​ ឡេក​ ចាន់ពេជ្រ

The post គម្រោងពង្រីកផ្លូវជាតិលេខ ៧ ចំណាយជាង ១០០ ​លានដុល្លារ បញ្ចប់ការសាងសង់ទាំងស្រុង appeared first on Kampuchea Thmey Daily.

ថ្លែងក្នុងឱកាសនោះដែរ លោកអភិបាលខេត្ត មានប្រសាសន៍ថា ការចុះបញ្ជី ម៉ាក សមូហភាព (ការពារកម្មសិទ្ធិបញ្ញា) និងការទទួលបានវិញ្ញាបនបត្រ CamGap (សំគាល់ ទីតាំងចម្ការ) គឺជាវិញ្ញាបនបត្របញ្ជាក់ថា ទុរេនរបស់សហគមន៍ត្រូវបានដាំដុះស្របតាម ស្តង់ដារបច្ចេកទេសកសិកម្ម មានសុវត្ថិភាព និងមិនប៉ះពាល់ដល់សុខភាពអ្នកបរិភោគ ពោលគឺទប់ស្កាត់ការក្លែងបន្លំ ទាំងធានាគុណភាពស្តង់ដារ ។

ជាមួយគ្នានោះ លោក អ៊ុន ចាន់ដា អភិបាលខេត្តកំពង់ចាម ក៏បានស្នើដល់បងប្អូន សហគមន៍កសិកម្ម ធ្វើយ៉ាងណាត្រូវគ្រប់គ្រងសហគមន៍ទុរេនបែកអន្លងស្ទឹងត្រង់នេះ ឱ្យ បានរឹងមាំ និងគៀងគរពង្រីកសមាជិកថ្មីបន្ថែមទៀត ពិសេសត្រូវពង្រឹងវិសាលភាព និង គ្រប់គ្រងការទប់ស្កាត់លំហូរចូលពីខាងក្រៅ ពោលគឺត្រូវរៀបចំរចនាសម្ព័ន្ធផ្ទៃក្នុង និង យុទ្ធសាស្រ្តការពារឱ្យបានច្បាស់លាស់ផងដែរ ៕

អត្ថបទ​និងរូបភាព​៖​ឡេក​ ចាន់ពេជ្រ

The post ការចុះបញ្ជីម៉ាកសមូហភាព និងCamGapមានQR Code ដើម្បីការពារកសិផលផ្លែទុរេន សហគមន៍បែកអន្លូង appeared first on Kampuchea Thmey Daily.

ប្រធានសហភាពសហព័ន្ធយុវជនកម្ពុជាខេត្តកំពង់ចាម ត្រូវបានប្រកាសទទួលស្គាល់ដោយ លោក ផេន សុផល ជំនួស លោក ហាន កុសល ដែលត្រូវទៅទទួលភារកិច្ចនៅខេត្តកំពង់ធំ។

ឆ្លៀតឱកាសនោះដែរ​ លោក​ អ៊ុន​ ចាន់ដា​ អភិបាលខេត្តកំពង់ចាម បានថ្លែងអំណរគុណ និង វាយតម្លៃខ្ពស់ចំពោះ លោក ហាន កុសល អតីតប្រធានសហភាពសហព័ន្ធយុវជនកម្ពុជាខេត្តកំពង់ចាម ដែលបានលះបង់កម្លាំងកាយចិត្តអស់រយៈពេល ១១ ឆ្នាំ កន្លងមកនេះ ដើម្បីកសាងមូលដ្ឋាន ស.ស.យ.ក ឲ្យរឹងមាំ និង រីកចម្រើន ដូចសព្វថ្ងៃ ដោយលោកបានដឹកនាំយុវជន ធ្វើការងារសង្គមនានា ក្នុងមូលដ្ឋាន ថែមទាំងបណ្ដុះបណ្ដាលយុវជនឲ្យមានចំណេះដឹងខ្ពស់ ជំនាញច្បាស់លាស់ និង ស្មារតីទទួលខុសត្រូវខ្ពស់ បង្កើតជាធនធានមនុស្សដ៏រឹងមាំ មានថាមពល សក្តានុពល ក្រោមការចង្អុលបង្ហាញប្រកបដោយភាពប៉ិនប្រសប់ និង ចក្ខុវិស័យវែងឆ្ងាយរបស់ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា។

លោក អ៊ុន ចាន់ដា ក៏បានសម្ដែងការស្វាគមន៍ចំពោះ លោក ផេន សុផល ដែលត្រូវបានគណៈកម្មាធិការកណ្ដាលសហភាពសហព័ន្ធយុវជនកម្ពុជា តែងតាំងមុខតំណែងជា ប្រធានសហភាពសហព័ន្ធយុវជនកម្ពុជាខេត្តកំពង់ចាម ដើម្បីបន្តដឹកនាំយុវជនខេត្តឲ្យស្របទៅតាមចក្ខុវិស័យ បេសកកម្មរបស់សហភាពសហព័ន្ធយុវជនកម្ពុជា និង ឈរលើមូលដ្ឋានទស្សនទាន (ស.ស.យ.ក ២.០) ដើម្បីកំណត់ទិសដៅអាទិភាព និង យុទ្ធសាស្ត្រថ្មីៗ សម្រាប់ការអភិវឌ្ឍស្ថាប័ន និង ការចូលរួមជាមួយយុវជនក្នុងបុព្វហេតុជាតិមាតុភូមិ សំដៅលើការបន្តថែរក្សាសមិទ្ធផល និង ស្មារតីរបស់យុវជនជំនាន់មុន ដើម្បីបង្កើតសមិទ្ធផលថ្មីៗ សម្រាប់យុវជន និង សង្គមជាតិ នាពេលបច្ចុប្បន្ន និង ទៅអនាគត។

ឯកឧត្តម ហ៊ុន ម៉ានី មានប្រសាសន៍ផងដែរថា សមិទ្ធផលនានារបស់គណៈកម្មាធិការ ស.ស.យ.ក ខេត្តកំពង់ចាម នៅពេលកន្លងមក ពិតជាបានចូលរួមចំណែកយ៉ាងសំខាន់ជាមួយ គណៈកម្មាធិការកណ្ដាល និង រចនាសម្ព័ន្ធទូទាំងប្រទេស ក្នុងការពង្រីកកិត្យានុភាព ស.ស.យ.ក និង ការជំរុញសកម្មភាពយុវជនក្នុងបុព្វហេតុសង្គមជាតិ។

ឯកឧត្តម ហ៊ុន ម៉ានី បានរំពឹងទុកថា អង្គភាពសហភាពសហព័ន្ធយុវជនកម្ពុជាខេត្តកំពង់ចាម នឹងបន្តសកម្មភាពកាន់តែច្រើនឡើងបន្ថែមទៀត ក្នុងការងារសប្បុរសធម៌ ការងារសង្គម និង ការងារផ្សេងៗ ទៀត ដែលផ្ដល់ផលវិជ្ជមាន និង ឱកាសដល់យុវជន ដើម្បីពង្រឹងពង្រីកនូវសក្តានុពលរបស់ខ្លួន ចូលរួមចំណែកលើកមុខមាត់នូវការអភិវឌ្ឍរបស់ខេត្តកំពង់ចាម៕
អត្ថបទ​ និង រូបភាព​ ៖ ​ឡេក​ ចាន់ពេជ្រ

The post ឯកឧត្តម ហ៊ុន ម៉ានី អញ្ជើញប្រកាសទទួលស្គាល់ ប្រធានគណៈកម្មាធិការ ស.ស.យ.ក ខេត្តកំពង់ចាម​ appeared first on Kampuchea Thmey Daily.

ថ្លែងក្នុង​ឱកាស​​ប្រកាស​ដាក់ឲ្យប្រើប្រាស់​​ផែនទីព្រំប្រទល់រដ្ឋបាលឃុំ សង្កាត់ ក្នុង​ខេត្ត​កំពង់ចាម ក៏មានវត្តមានចូលរួមពី​លោក ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ លោក សាយ សំអាល់​ បានបញ្ជាក់ថា ផ្តើមចេញពីការកសាង​ផែនទីព្រំប្រទល់រដ្ឋបាលនិងផែនទីនៃការប្រើប្រាស់ដីនេះ រដ្ឋបាលខេត្តនិងឃុំ សង្កាត់ អាចដាក់ចេញនូវផែនការអភិវឌ្ឍន៍សេដ្ឋកិច្ចត្រូវនិងជាក់លាក់ កំណត់តំបន់អភិរក្ស តំបន់កសិកម្ម តំបន់ឧស្សាកម្ម តំបន់សេដ្ឋកិច្ចពិសេស តំបន់ពាណិជ្ជកម្ម ពិសេសកំណត់នូវសក្តានុពលរបស់ខេត្ត ដើម្បីរៀបចំរបៀងសេដ្ឋកិច្ចតភ្ជាប់ពីភូមិភាគឦសានទៅតំបន់ឆ្នេរ។

លោកសាយ សំអាល់ បាន​ថ្លែង​ដូច្នេះ​ថា «ផ្តើមចេញពីការកសាងផែនទីព្រំប្រទល់រដ្ឋបាលនាថ្ងៃនេះ យើងរួមគ្នាងាកមកកសាងជីវិតនិងសេដ្ឋកិច្ចយើងឱ្យរឹងមាំ»។

លោកឧបនាយករដ្ឋមន្រ្តី​បានលើកពី​ផែនការ​ទៅថ្ងៃ​មុខទៀត ក្រសួងរៀបចំដែនដី នគរូបនីយកម្ម និងសំណង់ នឹងរៀបចំឈ្មោះតំបន់ភូមិសាស្រ្តជាអក្សរខ្មែរ អក្សរឡាតាំង និងបាលីសំស្រ្កឹត ដើម្បីចុះបញ្ជីជាមួយGoogle map រៀបចំលេខកូដតំបន់ លេខកូដភូមិសាស្ត្រ និងអាសយដ្ឋានឱ្យបានច្បាស់លាស់។

បើតាមលោក សាយ សំអាល់​ ក្រសួងរៀបចំដែនដី នគរូបនីយកម្ម និងសំណង់ រួមជាមួយក្រសួងមហាផ្ទៃនិងបណ្តា​រដ្ឋបាលខេត្ត នឹង​បន្ត​អនុវត្ត​លើទិសដៅរួមមួយផ្អែកលើគោលនយោបាយអាទិភាពគន្លឹះនៃយុទ្ធសាស្ត្របញ្ចកោណរបស់រាជរដ្ឋាភិបាល គឺមនុស្ស ផ្លូវ ទឹក ភ្លើង និងបច្ចេកវិទ្យា ដោយនឹង​ធ្វើការកសាងភូមិឋានក្សេមក្សាន្ត ទ្រនំសុភមង្គល និងបុរីជនបទ ដោយរៀបចំក្រុង និងប្រជុំជន ឱ្យមានលំហសាធារណៈ រៀបចំសំណង់មិនរៀបរយ ភូមិ ឃុំ សង្កាត់ មានសុវត្ថិភាព ធ្វើឱ្យជនបទជាជនបទទំនើប៕

The post កំពង់ចាមជាខេត្តទី១ បញ្ចប់​ការ​កំណត់​ផែនទីព្រំប្រទល់រដ្ឋបាលឃុំ សង្កាត់ ត្រឹមត្រូវ ច្បាស់លាស់ និង​ជាក់លាក់ appeared first on Kampuchea Thmey Daily.

គួររំលឹកថា ក្រោមការយកចិត្តទុកដាក់ខ្ពស់ពីលោក អ៊ុន ចាន់ដា អភិបាលខេត្តកំពង់ចាម នៅអំឡុងឆ្នាំ២០១៩ ខណៈដែលលោកទើបតែអញ្ជើញមកកាន់តួនាទីជាអភិបាលខេត្តថ្មីថ្មោង លោកធ្លាប់បានដឹកនាំក្រុមការងារ អញ្ជើញចុះពិនិត្យទីតាំងនេះដោយផ្ទាល់ និងបានចាត់ឲ្យមន្ទីរវប្បធម៌ និងវិចិត្រសិល្បៈ មន្ទីរទេសចរណ៍ សហការជាមួយអាជ្ញាធរមូលដ្ឋាន ធ្វើការអភិរក្សតំបន់ប្រវត្តិសាស្ត្រនេះឡើងវិញ ប៉ុន្តែមិនទាន់មានគម្រោងពង្រីកឲ្យក្លាយទៅជាតំបន់ រមនីយដ្ឋានទេសចរណ៍បែបសហគមន៍នៅឡើយ។

ទីទួលបាសាន (ប្រាសាទទួលព្រះធាតុ) គឺជាទីតាំងប្រវត្តិសាស្ត្រសំខាន់មួយស្ថិតនៅឃុំបារាយណ៍ ស្រុកស្រីសន្ធរ ខេត្តកំពង់ចាម។ តាមឯកសារប្រវត្តិសាស្ត្រ និងប្រភពស្រាវជ្រាវមួយចំនួនបានបញ្ជាក់ថា ទួលបាសានធ្លាប់ជារាជធានីរបស់ខ្មែរក្នុងសម័យក្រោយអង្គរ (ចុងសតវត្សទី១៤ ដើមសតវត្សទី១៥) មុនពេលរាជធានីផ្លាស់ទៅចតុម្មុខ (រាជធានីភ្នំពេញសព្វថ្ងៃ)។

នៅតំបន់នេះ មានសំណល់ប្រាសាទបុរាណមួយដែលប្រជាពលរដ្ឋហៅថា ប្រាសាទទួលព្រះធាតុ ឬ ទួលបាសាន។ បច្ចុប្បន្ន នៅទីនោះមានវត្ត និងសំណង់ពុទ្ធសាសនាស្ថិតនៅលើទីទួលបុរាណ ដែលជាសញ្ញាបង្ហាញថាទីតាំងនេះធ្លាប់ជាមជ្ឈមណ្ឌលសាសនា និងនយោបាយដ៏សំខាន់មួយ។

ចំណុចគួរឱ្យចាប់អារម្មណ៍ ជាទីតាំងរាជធានីបុរាណក្រោយការចាកចេញពីអង្គរ បច្ចុប្បន្នមានសំណល់ប្រាសាទ និងទួលបុរាណជាច្រើន។ ទីទួលបាសាន ជាអតីតរាជធានីនៃអាណាចក្រខ្មែរ​ ដែលបានកសាងឡេីងដោយព្រះបាទពញាយ៉ាត​ នៅអំឡុង​សតវត្ស​ទី១៥​ បន្ទាប់ពីព្រះអង្គបានបណ្តេញទ័ពសៀមឈ្លានពានចេញពីរាជធានីអង្គរ​ បន្ទាប់មកព្រះបាទពញាយ៉ាត​ បានលេីករាជធានីពីអង្គរវត្ត​ មកតាំងទីនៅទូលបាសាន​ ដេីម្បីងាយស្រួលក្នុងការគ្រប់គ្រប់ដែនដីនៃអាណាចក្រខ្មែរនាសម័យនោះ៕

អត្ថបទ​​៖​ ឡេក​ ចាន់ពេជ្រ

The post អភិបាលខេត្តកំពង់ចាម ណែនាំអាជ្ញាធរមូលដ្ឋាន និងមន្ទីរជំនាញរៀបចំចងក្រង និងអភិរក្សទីទួលបាសាន ទៅជាតំបន់រមនីយដ្ឋានទេសចរ សហគមន៍ appeared first on Kampuchea Thmey Daily.