មន្ត្រី​ជំនាញ​ខេត្តកំពង់ចាម ដុតកម្ទេចសាច់បង្កក និងប្រហិតខូចគុណភាពជាង ២៥០គីឡូក្រាម

ផលិតផលសាច់បង្កក និងប្រហិតខូចគុណភាព សរុបចំនួន ២៥០គីឡូក្រាម ដែលដឹកជញ្ជូនខុសលក្ខណៈបច្ចេកទេសបសុព្យាបាល ត្រូវបានអាជ្ញាធរជំនាញបង្ក្រាបបាន និងនាំយកទៅដុតកម្ទេចចោល ដើម្បីធានាសុខភាពសាធារណៈជូនប្រជាពលរដ្ឋ។

ការដុតកម្ទេចចោលនេះ បានប្រព្រឹត្តទៅនៅថ្ងៃទី២៥ ខែមិថុនា ឆ្នាំ២០២៦ ដោយមានការសម្របសម្រួលពីលោកព្រះរាជអាជ្ញារង នៃអយ្យការអមសាលាដំបូងខេត្តកំពង់ចាម និងលោក ស៊ឹម ថាវីរៈ ប្រធានមន្ទីរកសិកម្ម រុក្ខាប្រមាញ់ និងនេសាទខេត្ត ព្រមទាំងមន្ត្រីតំណាងអគ្គនាយកដ្ឋាន ការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) ខេត្តផងដែរ។

លោក នង ម៉េងហ៊ាង ប្រធានការិយាល័យផលិតកម្ម និងបសុព្យាបាល នៃមន្ទីរកសិកម្មរុក្ខាប្រម៉ាញ់ និងនេសាទ ខេត្តកំពង់ចាម បានឱ្យដឹងថា ផលិតផលសាច់ និងប្រហិតទាំងនេះ ត្រូវបានរកឃើញថាមានការដឹកជញ្ជូនខុសលក្ខណៈបច្ចេកទេសបសុព្យាបាល (ខ្វះប្រព័ន្ធត្រជាក់រក្សាគុណភាពសាច់) ដែលបណ្តាលឱ្យសាច់ប្រែពណ៌ មានក្លិន និងខូចគុណភាពទាំងស្រុង។ ប្រសិនបើទំនិញទាំងនេះត្រូវបានចរាចរណ៍លក់នៅលើទីផ្សារ វានឹងបង្កហានិភ័យខ្ពស់ ប៉ះពាល់ធ្ងន់ធ្ងរដល់សុខភាពអ្នកប្រើប្រាស់៕

អត្ថបទ​៖​ ឡេក​ ចាន់ពេជ្រ