គេចពន្ធ Archives - Kampuchea Thmey Daily

រថយន្ត ៤ គ្រឿង ដែលត្រៀមដឹកបារីគេចពន្ធក្បែរច្រកអន្តរជាតិភ្នំដី ត្រូវថៃចាប់បាន

អ៊ិន ពិសី — Thu, 04 Sep 2025 06:58:45 +0000

រថយន្តចំនួន ៤ គ្រឿង អ្នកបើកបរទាំងអស់គឺជាជនជាតិខ្មែរ ត្រូវបានកម្លាំងយោធាថៃឃាត់ខ្លួន ខណៈរថយន្តទាំងនេះឈប់សំចតនៅខាងក្រោយផ្សារខូវឌីន ក្បែរច្រកអន្តរជាតិភ្នំដី ក្នុងស្រុកសំពៅលូន ដែលគេដឹកសុទ្ធតែបារីគេចពន្ធ ត្រៀមនាំចេញទៅប្រទេសថៃ។

ជាញឹកញាប់គេសង្កេតឃើញថា យោធាថៃតែងតែចាប់បាននូវបារីគេចពន្ធ ដែលភាគច្រើននាំចេញពីស្រុកសំពៅលូន ឆ្លងតាមច្រករបៀង ចូលទៅក្នុងប្រទេសថៃ។ ជាក់ស្ដែងកាលពីយប់ថ្ងៃទី ៣ ខែកញ្ញា ឆ្នាំ ២០២៥ ម្សិលមិញ កម្លាំងយោធាថៃវីរព្រំដែនលេខ ១៣ បានធ្វើការល្បាតតាមខ្សែបន្ទាត់ព្រំដែន ក៏ឃើញរថយន្តចំនួន ៤ គ្រឿង ឈប់សំចតនៅខាងក្រោយផ្សារខូវឌីន (នៅក្នុងទឹកដីថៃ) ក្បែរច្រកអន្តរជាតិភ្នំដី ប្រឈមនឹងស្រុកសំពៅលូន ខេត្តបាត់ដំបង។

ក្រោយពីមានការសង្ស័យ កម្លាំងយោធាថៃបានចូលទៅត្រួតពិនិត្យ ក៏ប្រទះឃើញអ្នកបើកបរចំនួន ៤ នាក់ សុទ្ធសឹងជាជនជាតិខ្មែរ ដោយឡែកក្នុងរថយន្តគឺមានបារីគេចពន្ធជាច្រើនប៊ិចដែលគេគ្របដោយក្រណាត់បិទជិត។ នៅក្នុងការត្រួតពិនិត្យនោះ គឺមានរថយន្ត ១ គ្រឿង មានស៊កសៀតក្រដាសប្រាក់ជាង ៧ លានបាត ក្នុងកង់សឺកួរ ដែលម្ចាស់ឡានបាននិយាយថា គឺជាលុយបញ្ញើរបស់ពលករ ដោយសារមិនហ៊ានដាក់តាមធនាគារព្រោះខ្លាចពិបាកដកយក។

បើទោះបីជាយ៉ាងនេះក្តី ក៏កម្លាំងយោធាថៃ បាននាំខ្លួនអ្នកបើកបរទាំង ៤ នាក់ ជាមួយរថយន្ត និងបារីគេចពន្ធទាំងអស់ដែលជាវត្ថុតាង នាំយកទៅកាន់ស្នាក់ការគយ និងរដ្ឋាករប្រចាំស្រុកអារញ្ញ ដើម្បីសាកសួរបន្ត និងអនុវត្តតាមនីតិវិធី៕

អត្ថបទ ៖ សោ និយមរ័ត្ន

The post រថយន្ត ៤ គ្រឿង ដែលត្រៀមដឹកបារីគេចពន្ធក្បែរច្រកអន្តរជាតិភ្នំដី ត្រូវថៃចាប់បាន appeared first on Kampuchea Thmey Daily.

សមត្ថកិច្ចអះអាងថា អង្ករដំណើបជាង៨០តោន នាំចូលពីប្រទេសឡាវ មិនមែនជារបស់ថៃទេ

Kang Tola — Tue, 02 Sep 2025 13:59:41 +0000

ព្រះវិហារ ៖ ប៉ុន្មានថ្ងៃនេះ នៅលើបណ្តាញទំនាក់ទំនងសង្គម ផ្ទុះការវែកញែកយ៉ាងច្រើន ករណីឃាត់រថយន្តដឹកអង្ករដំណើប នាំចូលពីប្រទេសឡាវតាមច្រកកំពង់ស្រឡៅ ខេត្តព្រះវិហារ ដោយចោទប្រកាន់ថា អង្ករដំណើបទាំងនោះជារបស់ថៃ និងចោទថា មន្ត្រីកម្ពុជាខ្វះមនសិការជាតិនិយមផងដែរនោះ។

សូមជម្រាបផងដែរថា នៅរសៀលថ្ងៃទី២ ខែកញ្ញា ឆ្នាំ២០២៥នេះ បណ្ឌិត គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គនាយកនៃអគ្គនាយកដ្ឋានគយ និងរដ្ឋាករកម្ពុជា បានបញ្ជាក់ឱ្យដឹងថា អង្ករដំណើបជាង៨០តោននោះ គឺជាអង្កររបស់ប្រទេសឡាវ នាំចូលមកម្ពុជា មិនមែនជារបស់ប្រទេសថៃឡើយ។ លោករដ្ឋមន្ត្រីប្រតិភូបញ្ជាក់ថា «អង្ករដំណើបទាំងអស់នោះ គឺនាំចូលពីឡាវ ហើយមានបង់ពន្ធ ដូចមានលិខិតបញ្ជាក់ជូន។

ជាមួយគ្នានេះ លោកអគ្គនាយកបានសំណូមដល់បងប្អូន អ្នកប្រើប្រាស់បណ្តាញសង្គម សូមពិចារណា និងស្វែងរកការពិតឱ្យបានច្បាស់លាស់ មុននឹងបញ្ចេញមតិនានា ដែលប៉ះពាល់ដល់កិត្តយស និងសេចក្តីថ្លៃថ្នូររបស់អ្នកដទៃ។

មន្ត្រីគយ នៅច្រកកំពង់ស្រឡៅ បានឱ្យដឹងនៅរសៀលថ្ងៃទី០២ ខែកញ្ញា ឆ្នាំ២០២៥នេះថា អង្ករដំណើបដែលនាំចូលពីប្រទេសឡាវនេះ គឺអ្នកនាំចូលដឹកជញ្ជូនតាមទូកហើយបង់ពន្ធ បន្ទាប់ពីបង់ពន្ធរួចម្ចាស់ទំនិញបានយកអង្ករដំណើបទាំងនោះ មករក្សាទុកនៅក្នុងឃ្លាំង ពេលមានតម្រូវការបញ្ជាទិញពីរាជធានីភ្នំពេញ ឬខេត្តផ្សេងៗ ទើបដឹកចេញតាមរថយន្តទៅកាន់ទីតាំងដែលមានតម្រូវការទាំងនោះ។

មន្ត្រីដដែលបន្តថា ទំនិញបែបប្រពៃណីពីប្រទេសឡាវ មានដឹកតាមទូក ដែលមានដូចជាបន្លែ ស្រូវ អង្ករ និងទំនិញផ្សេងៗទៀត ហើយបានបង់ពន្ធជូនរដ្ឋត្រឹមត្រូវផងដែរ។ចំណែកលោកឃិត សុធារ៉ា អភិបាលស្រុកឆែប ក៏បានឲ្យដឹងដែរថា អាជ្ញាធរមូលដ្ឋាន តែងតែដើរតួនាទីសហការជាមួយសមត្ថកិច្ចជំនាញគ្រប់ផ្នែកដើម្បីធ្វើយ៉ាងណាឲ្យមានសេដ្ឋកិច្ចរបស់ពលរដ្ឋមានចរន្តទៅវិញទៅមក ហើយប្រទេសឡាវ ដាំដុះអង្ករដំណើបច្រើន និងមានគុណភាពល្អ។រដូវបុណ្យភ្ជុំបិណ្ឌជិតខិតចូលមកដល់ក្នុងពេលដ៏ខ្លីខាងមុខ ហើយការប្រមូលផលអង្ករដំណើប របស់កសិករយើងក៏មិនទាន់ដល់ ព្រោះជាទូទៅស្រូវដំណើបត្រូវប្រមូលផលចុងខែតុលា ឬដើមខែវិច្ឆិកា។

បច្ចប្បន្នកម្លាំងសមត្ថកិច្ចចម្រុះកំពុងប្រចាំការ ដើម្បីស្រាវជ្រាវបន្ថែមទៀតលើករណីដឹកជញ្ជូនទំនិញផ្សេងៗតាមច្រកកំពង់ស្រឡៅ ក្នុងស្រុកឆែប ខេត្តព្រះវិហារ៕

ដោយ ៖ ជុន កុសល

The post សមត្ថកិច្ចអះអាងថា អង្ករដំណើបជាង៨០តោន នាំចូលពីប្រទេសឡាវ មិនមែនជារបស់ថៃទេ appeared first on Kampuchea Thmey Daily.

មន្ត្រីការិយាល័យស្រាវជ្រាវនិងបង្ក្រាបអំពើរត់ពន្ធតំបន់៥ សហការជាមួយមន្ត្រីពាក់ព័ន្ធ ធ្វើការដុតកម្ទេចបំណែកសាច់មាន់បង្កកចំនួន២៤១២គីឡូក្រាម

Kang Tola — Wed, 05 Jun 2024 15:24:18 +0000

នាថ្ងៃទី៥ ខែមិថុនា ឆ្នាំ២០២៤ មន្ត្រីការិយាល័យស្រាវជ្រាវនិងបង្ក្រាបអំពើរត់ពន្ធតំបន់៥ នៃនាយកដ្ឋានបង្ការនិងបង្ក្រាបបទល្មើស សហការជាមួយមន្ត្រីការិយាល័យផលិតកម្ម និងបសុព្យាបាលខេត្តបន្ទាយមានជ័យ មន្ត្រីនគរបាល និងមន្ត្រីរាជអាវុធហត្ថលើផ្ទៃប្រទេស បានធ្វើការដុតកម្ទេចបំណែកសាច់មាន់បង្កកចំនួន ២ ៤១២ គីឡូក្រាម។

ករណីដុតកម្ទេចបំណែកសាច់មាន់បង្កកនេះ គឺជាទំនិញហាមឃាត់ ក្នុងការនាំចូល។ ហើយត្រូវបានបង្ក្រាប និងដកហូតពីឈ្មួញ ខណៈពេលដឹកជញ្ជូនតាមរថយន្ត នៅចំណុចក្រុងសិរីសោភ័ណ ខេត្តបន្ទាយមានជ័យ៕

The post មន្ត្រីការិយាល័យស្រាវជ្រាវនិងបង្ក្រាបអំពើរត់ពន្ធតំបន់៥ សហការជាមួយមន្ត្រីពាក់ព័ន្ធ ធ្វើការដុតកម្ទេចបំណែកសាច់មាន់បង្កកចំនួន២៤១២គីឡូក្រាម appeared first on Kampuchea Thmey Daily.

កម្មករអូសរទេះ ផ្ទុះការតវ៉ា កើតជាហិង្សា ក្រោយមន្ត្រីគយ មិនអនុញ្ញាតឱ្យដឹកទំនិញគេចពន្ធចេញពីប្រទេសថៃ

Kang Tola — Tue, 28 May 2024 14:41:04 +0000

ប៉ោយប៉ែត ៖ កម្មករអូសរទេះប្រុសស្រី បន្តលើកគ្នាតវ៉ាថ្មីម្ដងទៀតនារសៀលថ្ងៃទី២៨ ខែឧសភា ឆ្នាំ២០២៤ រហូតបង្កជាហិង្សានៅមាត់ច្រកទ្វារអន្តរជាតិប៉ោយប៉ែត ក្រោយពីមន្ត្រីគយ រឹតបន្តឹងមិនអនុញ្ញាតឲ្យនាំទំនិញដែលត្រូវបង់ពន្ធចូលរដ្ឋ ចូលមកកម្ពុជាតាមរទេះដោយមិនបានបង់ចូលរដ្ឋត្រឹមត្រូវនោះឡើយ។

ជុំវិញការតវ៉ារបស់កម្មករនោះដែរ សង្កេតឃើញថា មានការផ្ទុះសារាយគ្នារវាងមន្ត្រីគយ កងកម្លាំងសមត្ថកិច្ច និងកម្មករអូសរទេះប្រមាណ២០ ទៅ៣០នាក់ រហូតរងរបួសកម្មករម្នាក់ ដោយសារសមត្ថកិច្ចតាមចាប់មេខ្លោងដែលនាំឲ្យកើតមានករណីនេះកើតឡើង។

ពាក់ព័ន្ធករណីនេះ កម្មករអូររទេះបានលើកឡើងថា ពួកគាត់លើកគ្នាតវ៉ានេះគឺសុំម៉ារស់ ដោយពួកគាត់អះអាងថា ពួកខ្លួនស៊ីឈ្នួលដឹកទំនិញចេញមកពីប្រទេសថៃ ក្បែរព្រំដែនកម្ពុជាបន្តិចបន្តួច សូមឲ្យមន្ត្រីពាក់ព័ន្ធយោគយល់ ហើយទំនិញនោះទៀតសោធមានដូចជា ខោអាវជជុះ ស្បែកជើង គ្រឿងជ័រ ល្បែងក្មេងលេង និងចំណីអាហារជាដើម។

ពួកគាត់បានអះអាងទៀតថា ពួកខ្លួនមិនបានដឹកជញ្ជូនទំនិញគេចពន្ធ និងម៉ៅពីទូកុងតឺន័ររបស់ថៃដឹកជញ្ជូនចេញមកកម្ពុជាដូចសត្វកណ្ដៀរដូចការចោទប្រកាន់របស់មន្ត្រីគយ នោះឡើយ គ្រាន់តែដឹកបន្តិចបន្តួចសុំតែម៉ារស់តែប៉ុណ្ណោះ។

តាមមន្ត្រីជាន់គយ ប្រចាំច្រកទ្វារអន្តរជាតិប៉ោយប៉ែតបានឲ្យដឹងដែរថា កម្មករស៊ីឈ្នួលដឹកទំនិញឲ្យឈ្មួញនេះ គឺពួកគាត់ម៉ៅពីទូកុងតឺន័រដឹកជញ្ជូនតាមរទេះដូចសត្វកណ្ដៀរអញ្ចឹងក្នុងមួយថ្ងៃៗ មួយនាក់ចេញចូលមិនចេះតិចជើង ហើយទំនិញទាំងនោះសុទ្ធសឹងតែត្រូវបង់ពន្ធទាំងអស់ បើសិនជាទំនិញផ្ទាល់ខ្លួនយកទៅប្រើប្រាស់មិនជាអ្វីនោះទេ ប៉ុន្តែពួកគាត់ស៊ីឈ្នួលដឹកឱ្យក្រុមឈ្មួញជាហេតុធ្វើឲ្យបាត់បង់ចំណូលចូលរដ្ឋ។

មន្ត្រីគយបានបញ្ជាក់ទៀតថា កន្លងមកនេះថ្នាក់ដឹកនាំក៏បានដាក់ចេញនូវបទបញ្ជាមិនអនុញ្ញាតឲ្យមានការនាំចេញទំនិញតាមច្រកទ្វារអន្តរជាតិនេះបន្តទៀតដែរ ពីព្រោះវានាំឱ្យប៉ះពាល់ដល់ការធ្វើដំណើររបស់ភ្ញៀវជាតិនិងអន្តរជាតិ។ ដោយសារយើងមានច្រកអន្តរជាតិស្ទឹងបត់សម្រាប់នាំទំនិញចេញចូលដោយមានការត្រួតពិនិត្យត្រឹមត្រូវពីមន្ត្រីជំនាញហើយដែរ។

គួររំលឹកផងដែរថា កាលពីថ្ងៃទី២៥ ខែឧសភា ឆ្នាំ២០២៤ កម្មករអូសរទេះបានលើកគ្នាតវ៉ា ដោយយករទេះដឹកទំនិញបិទផ្លូវ រហូតមានការសម្របសម្រួលបញ្ចប់ម្ដងរួចទៅហើយ ក៏ស្រាប់តែរសៀលថ្ងៃខែខាងលើ មានការតវ៉ាសាកជាថ្មី រហូតដល់វេលាម៉ោងជិត ០៧យប់ ទៅហើយមិនទាន់ត្រឡប់ទៅផ្ទះវិញនៅឡើយ ដោយមើលឃើញពីការតវ៉ានេះមានសភាពតានតឹង ដោយក្រុមកម្មករទាំងនោះបន្តប្រមូលគ្នាមកពពាក់ពពូនគ្នាកាន់តែច្រើនឡើងៗ ទើបមានការដាក់កម្លាំងសមត្ថកិច្ចចម្រុះបន្ថែម ដើម្បីត្រៀមការពារសន្តិសុខ សណ្តាប់ធ្នាប់៕

ដោយ ៖ អពៅ

The post កម្មករអូសរទេះ ផ្ទុះការតវ៉ា កើតជាហិង្សា ក្រោយមន្ត្រីគយ មិនអនុញ្ញាតឱ្យដឹកទំនិញគេចពន្ធចេញពីប្រទេសថៃ appeared first on Kampuchea Thmey Daily.

តម្រួតថៃ ខេត្តច័ន្ទបុរី ចាប់បារីដែលនាំចេញពីកម្ពុជា ៩ យីហោ ចំនួន ៦៥០០កញ្ចប់

អុន ស្រីមាន — Sun, 21 Jan 2024 04:14:40 +0000

កាលពីព្រលប់ថ្ងៃទី ២០ ខែមករា ឆ្នាំ២០២៤ កម្លាំងតម្រួតថៃដែលដាក់គោលដៅឈរជើងលើកំណត់ផ្លូវមួយកន្លែងក្នុងខេត្តច័ន្ទបុរី បានឃាត់រថយន្តមួយគ្រឿងដែលដឹកបារីខុសច្បាប់គេចពន្ធចេញពីប្រទេសកម្ពុជាចូលទៅក្នុងទឹកដីថៃ សរុបចំនួន ៦៥០០ កញ្ចប់ លើ ៩ យីហោ។

តាមការផ្សាយរបស់គេហទំព័រក្នុងស្រុកបានបញ្ជាក់ថា នៅពេលខាងលើគឺក្រុមតម្រួតថៃបានដាក់គោលដៅឈរជើងលើកំណត់ផ្លូវលេខ ៣១៧ ត្រង់ចំណុចគីឡូម៉ែត្រលេខ៣៨ ស្ថិតក្នុង ឃុំថាប់សៃស្រុកពោងណាំរ៉ន ខេត្តច័ន្ទបុរី ក្បែរព្រំដែនកម្ពុជា។ គេហទំព័របានបន្តថានៅពេលនោះដែរមានរថយន្តតួរីសមួយគ្រឿងមានបិទឃ្លប់ជិតពណ៌ខ្មៅ ដោយមានការសង្ស័យតម្រួតក៏បានឃាត់ដើម្បីត្រួតពិនិត្យក៏ប្រទះឃើញមានបារីជាច្រើនសុងដែលអ្នកបើកបរលាក់ទុកនៅក្នុងរថយន្តដែលគេបានដឹកយកមកពីព្រំដែនកម្ពុជាឆ្ពោះទៅក្នុងប្រទេសថៃក្នុងគោលបំណងគេចពន្ធ ។

បារីទាំងនោះរួមមាន ១.TEXAS ពណ៌មាស ចំនួន ១.០០០ កញ្ចប់ ២. TEXAS ព៌ណផ្ទៃមេឃ ចំនួន ១.០០០ កញ្ចប់ ៣. TEXAS ពណ៌ក្រហម ចំនួន ២.០០០ កញ្ចប់ ៤.TEXAS ពណ៌ខៀវ ចំនួន ៥០០កញ្ចប់ ៥.យីហោ 235 ពណ៌ខៀវ ចំនួន ២៥០ កញ្ចប់ ៦.យីហោ 235 ពណ៌ក្រហម ចំនួន ២៥០ កញ្ចប់ ៧. CANYON ពណ៌ក្រហម ចំនួន ៥០០ កញ្ចប់ ៨. MOND ចំនួន ៥០០ កញ្ចប់ និង ៩.CAPITAL ព៌ណផ្ទៃមេឃ ចំនួន ៥០០ កញ្ចប់។ បច្ចុប្បន្នទាំងអ្នកបើកបរទាំងរថយន្តនិងវត្ថុតាងត្រូវបានបញ្ជូនទៅឲ្យអង្គភាពគយនៅក្នុងស្រុកពោងណាំរ៉នដើម្បីអនុវត្តតាមនីតិវិធី៕

អត្ថបទ៖ សោ និយមរ័ត្ន

The post តម្រួតថៃ ខេត្តច័ន្ទបុរី ចាប់បារីដែលនាំចេញពីកម្ពុជា ៩ យីហោ ចំនួន ៦៥០០កញ្ចប់ appeared first on Kampuchea Thmey Daily.

លោក ស ថេត ណែនាំកម្លាំងជំនាញត្រូវស្រាវជ្រាវ ស៊ើបអង្កេត និងបង្ក្រាបបទល្មើសគេចពន្ធគ្រប់ប្រភេទ

Thoeun Vansong — Tue, 26 Sep 2023 15:29:45 +0000

នាយឧត្តមសេនីយ៍ ស ថេត ណែនាំដល់នាយកដ្ឋាននគរបាលប្រឆាំងបទល្មើសសេដ្ឋកិច្ច ត្រូវលើកកម្ពស់សមត្ថភាពក្នុងការប្រយុទ្ធប្រឆាំងបទល្មើសសេដ្ឋកិច្ច ជាពិសេសជំនាញស្រាវជ្រាវ ស៊ើបអង្កេត និងបង្ក្រាបបទល្មើសគេចពន្ធគ្រប់ប្រភេទ ដែលនាំឱ្យបាត់បង់ចំណូលចូលជាតិ។

ក្នុងឱកាសដឹកនាំកិច្ចប្រជុំពង្រឹងប្រតិបត្តិការការងាររបស់នាយកដ្ឋាននគរបាលប្រឆាំងបទល្មើសសេដ្ឋកិច្ច នៅថ្ងៃទី២៦ ខែកញ្ញា ឆ្នាំ២០២៣ លោកនាយឧត្តមសេនីយ៍ ស ថេត អគ្គស្នងការនគរបាលជាតិ បានណែនាំដល់ថ្នាក់ដឹកនាំ និងមន្រ្តីនៃនាយកដ្ឋាននគរបាលប្រឆាំងបទល្មើសសេដ្ឋកិច្ច ត្រូវលើកកម្ពស់សមត្ថភាពគុណភាពលើការប្រយុទ្ធប្រឆាំងបទល្មើសសេដ្ឋកិច្ច ដើម្បីបង្ហាញឱ្យឃើញពីការទទួលខុសត្រូវចំពោះរាជរដ្ឋាភិបាល ក៏ដូចជាសុខុមាលភាពរបស់ប្រជាពលរដ្ឋនៅទូទាំងប្រទេស។

ដើម្បីអនុវត្តការងារជំនាញឱ្យមានប្រសិទ្ធភាព លោកនាយឧត្តមសេនីយ៍ ស ថេត បានចង្អុលដល់នាយកដ្ឋាននគរបាលប្រឆាំងបទល្មើសសេដ្ឋកិច្ច ត្រូវកសាងផែនការជាក់ស្តែង ស្របតាមស្ថានភាពថ្មី និងការរីកចម្រើនរបស់សង្គមជាតិ ព្រមទាំងធ្វើការបែងចែក ប្រគល់ភារកិច្ច និងការទទួលខុសត្រូវឱ្យបានច្បាស់លាស់ ដើម្បីចាត់អនុវត្តផែនការឱ្យទទួលបានប្រសិទ្ធភាពខ្ពស់។

លោកនាយឧត្តមសេនីយ៍ ក៏បានជំរុញឱ្យពង្រឹងការងារគ្រប់គ្រង ដឹកនាំមន្រ្តី ដោយត្រូវរៀបចំឱ្យមានរបបប្រជុំទៀងទាត់ ពិនិត្យវាយតម្លៃលទ្ធផលការងារ និងដាក់ចេញវិធានការឱ្យបានសមស្រប។ ទន្ទឹមនេះ ត្រូវពង្រឹងរបៀបរបបបំពេញការងាររបស់មន្រ្តីអនុវត្តច្បាប់ ទាំងវិន័យ ក្រមសីលធម៌ និងវិជ្ជាជីវៈ។ ចំពោះមន្រ្តីមានស្នាដៃល្អក្នុងការបំពេញការងារ លោកនាយឧត្តមសេនីយ៍ ស ថេត បានជំរុញឱ្យមានការលើកសរសើរជូនរង្វាន់ ខណៈមន្រ្តីប្រព្រឹត្តខុសឆ្គង ត្រូវអនុវត្តវិន័យឱ្យបានម៉ឺងម៉ាត់ បើក្នុងករណីធ្ងន់ធ្ងរ ត្រូវអនុវត្តវិធានការច្បាប់ដោយគ្មានការយោគយល់ និងលើកលែងឡើយ។

នៅចំពោះមុខប្រធាន-អនុប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ច និងនាយការិយាល័យពាក់ព័ន្ធ លោកអគ្គស្នងការ បានណែនាំឱ្យកម្លាំងជំនាញត្រូវលើកកម្ពស់សមត្ថភាពជំនាញក្នុងការស្រាវជ្រាវ ស៊ើបអង្កេត និងបង្រ្កាបបទល្មើសសេដ្ឋកិច្ចឱ្យដល់ឬសគល់។ ត្រង់ចំណុចនេះ លោក សង្កត់ធ្ងន់ថា ត្រូវលើកកម្ពស់ភាពម្ចាស់ការក្នុងការស្រាវជ្រាវ ស៊ើបអង្កេត និងបង្រ្កាប ជាពិសេសបទល្មើសរត់ពន្ធ គេចពន្ធ ដែលនាំឱ្យបាត់បង់ចំណូលថវិកាជាតិ បទល្មើសឱសថខូចគុណភាព ឬមិនមានច្បាប់អនុញ្ញាត ក៏ដូចជាចំណីអាហារខូចគុណភាព ដែលធ្វើឱ្យប៉ះពាល់យ៉ាងធ្ងន់ធ្ងរដល់សុខុមាលភាពប្រជាពលរដ្ឋ។

បន្ថែមពីនេះ នាយកដ្ឋាននគរបាលប្រឆាំងបទល្មើសសេដ្ឋកិច្ច ត្រូវបង្កើនកិច្ចសហការជាមួយភាគីពាក់ព័ន្ធទាំងក្នុង និងក្រៅប្រទេស ដើម្បីការងារប្រយុទ្ធប្រឆាំងបទល្មើសសេដ្ឋកិច្ចឱ្យបានសកម្មផុលផុសឡើងថែមទៀត៕

The post លោក ស ថេត ណែនាំកម្លាំងជំនាញត្រូវស្រាវជ្រាវ ស៊ើបអង្កេត និងបង្ក្រាបបទល្មើសគេចពន្ធគ្រប់ប្រភេទ appeared first on Kampuchea Thmey Daily.

ឆ្មក់ចូលពិនិត្យទីតាំងទទួលបញ្ញើ អឹម អេស ធី អ៊ិចប្រេស រកឃើញទំនិញអត់ច្បាប់ជាច្រើនឡាំង

Kang Tola — Wed, 20 Jul 2022 12:50:07 +0000

បាត់ដំបង ៖ ទំនិញខុសច្បាប់ប្រមាណ ១៩០ឡាំង ត្រូវបានកម្លាំងជំនាញធ្វើការដកហូត និងនាំខ្លួនម្ចាស់ទីតាំងទៅធ្វើការសាកសួរ បន្ទាប់ពីកម្លាំងសមត្ថកិច្ចបានរកឃើញនៅក្នុងក្រុមហ៊ុនបញ្ញើឥវ៉ាន់។

កិច្ចប្រតិបត្តិការនេះ បានធ្វើឡើង នាថ្ងៃទី ១៩ ខែកក្កដា ឆ្នាំ២០២២ វេលាម៉ោង៩នឹង៤០នាទី ព្រឹក ដែល ដឹកនាំដោយព្រះរាជអាជ្ញារងនៃសាលាដំបូងខេត្តបាត់ដំបង រួមជាមួយនឹងកម្លាំង នគរបាលនៃ ការិយាល័យប្រឆាំងបទល្មើសសេដ្ឋកិច្ចខេត្តបាត់ដំបង ប៉ុស្តិ៍រដ្ឋបាលបឹងរាំង និងអាជ្ញាធរមូលដ្ឋានផងដែរ។

នៅក្នុងកិច្ចប្រតិបត្តិការនេះដែរ គឺ បានចុះអនុវត្តតាមដីកាអនុញ្ញាតឲ្យធ្វើការឆែកឆេរ លេខ០២ដ.ក.អ ឆ.ឆ/២២ ពិនិត្យនិងរុករកវត្ថុតាង លើឃ្លាំងស្តុកអីវ៉ាន់បញ្ញើរបស់ក្រុមហ៊ុន អឹម អេស ធី អ៊ិចប្រេស ដែលមានទីតាំងក្នុងភូមិស្វាយធំ ឃុំបឹងរាំង ស្រុកកំរៀង ខេត្តបាត់ដំបង។

នៅក្នុងការពិនិត្យឆែកឆេរ កម្លាំងជំនាញបានរកឃើញនិងដកហូតទឹកដោះគោស្រស់និងទឹកដោះគោជូរចម្រុះ បានចំនួន១៩០ កែស រថយន្ត ១ គ្រឿងម៉ាក ហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ 3F-8861 ព្រមទាំងបានឃាត់ខ្លួនជនសង្ស័យ១នាក់ឈ្មោះ សំ អឿន ភេទប្រុសអាយុ ៣៨ឆ្នាំ ស្នាក់នៅក្នុង ភូមិ ឃុំ កើតហេតុខាងលើ(ជាម្ចាស់ទីតាំង)។

បច្ចុប្បន្នជនសង្ស័យនិងវត្ថុតាងត្រូវបាននគរបាលប្រឆាំងបទល្មើសសេដ្ឋកិច្ចយកទៅសាកសួរនៅស្នងការដ្ឋាននគរបាលខេត្តបាត់ដំបងនីតិវិធី៕

អត្ថបទ ៖ សោ និយមរ័ត្ន

The post ឆ្មក់ចូលពិនិត្យទីតាំងទទួលបញ្ញើ អឹម អេស ធី អ៊ិចប្រេស រកឃើញទំនិញអត់ច្បាប់ជាច្រើនឡាំង appeared first on Kampuchea Thmey Daily.

សាច់ជ្រូកនិង សាច់មាន់ កាប់រួចជាស្រេចច្រកក្នុងធុងស្នោ១០តោន ត្រូវបានសមត្ថកិច្ចបង្ក្រាប

Kang Tola — Wed, 14 Jul 2021 11:05:47 +0000

បន្ទាយមានជ័យ ៖ សាច់ជ្រូកកាប់រួចជាស្រេចមានជើង គ្រឿងក្នុង សាច់ ក្បាល និងសាច់មាន់ ដែលឈ្មួញ លួចនាំចូលពីប្រទេសថៃ មកកម្ពុជា តាមច្រកទ្វារអន្តរជាតិប៉ោយប៉ែត ត្រូវបានកម្លាំងសមត្ថកិច្ចចម្រុះធ្វើការបង្ក្រាបបាននៅព្រឹកថ្ងៃទី១៤ ខែកក្កដា ឆ្នាំ២០២១ នៅចំណុចស្តង់ត្រី១កន្លែង ក្រោយអគារផ្កាយ៣ ក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។

លោក ហ៊ុយ ទូច ប្រធានការិយាល័យផលិតកម្ម និង បសុព្យាបាល នៃមន្ទីរកសិកម្មខេត្តបន្ទាយមានជ័យ បានប្រាប់អ្នកយកព័ត៌មានឲ្យដឹងថា សាច់ជ្រូកគេកាប់ហើយចំរុះនិងសាច់មាន់ច្រកដាក់ក្នុងធុងស្នោដឹកពីប្រទេសថៃ ដោយខុសច្បាប់ត្រូវបានមន្ត្រីចម្រុះ ធ្វើការបង្ក្រាបបានរួមមានដូចជា សាច់ជ្រូក, សាច់មាន់ ឆ្អឹងមាន់ជាដើម សរុបប្រមាណជា ១០តោន។

លោក ហ៊ុយ ទូចបានបញ្ជាក់ឲ្យដឹងទៀតថា ការនាំចូលសាច់ជ្រូក សាច់មាន់ ពុំមានច្បាប់អនុញ្ញាតិ ពីក្រសួងកសិកម្ម រុក្ខាប្រមាញ់ និងអគ្គនាយកដ្ឋាននោះទេ ហើយមួយវិញទៀត ទាក់ទងទៅនឹងការដឹកជញ្ជូន គឺ មិនត្រឹមត្រូវតាមបទដ្ឋានគតិយុត្ត នៃច្បាប់សុខភាពសត្វ និងផលិតកម្មសត្វ ការដឹកខុសលក្ខណៈបច្ចេកទេសនៃការវិចខ្ចប់ ដែលធ្វើឲ្យផលិតផលទាំងនេះ ខូចគុណភាព ប៉ះពាល់សុខភាពប្រជាពលរដ្ឋ យកទៅទទួលទានខ្លាំងណាស់។

លោកបញ្ជាក់ថា ការបង្ក្រាបនោះមានការចូលរួមពីលោកព្រះរាជអាជ្ញា អមសាលាដំបូងខេត្តបន្ទាយមានជ័យ សាច់ជ្រូកចំរុះ និងសាច់មាន់ចំរុះត្រូវប្រមូលយកទៅដុតកម្ទេចចោល ដោយមិនមានលើកលែងនោះទេ។ ប៉ុន្តែមុនដុតកម្ទេចចោល ត្រូវយកសំណាកមកវិភាគ រកសារធាតុគីមីដែលបំផ្លាញសុខភាពជាមុនសិន ហើយកសាងសំណុំរឿងបញ្ជូនទៅកាន់តុលាការចាត់ការនីតិវិធីច្បាប់ផងដែរ៕

ដោយ ៖ វ៉ាន់ ណាង

The post សាច់ជ្រូកនិង សាច់មាន់ កាប់រួចជាស្រេចច្រកក្នុងធុងស្នោ១០តោន ត្រូវបានសមត្ថកិច្ចបង្ក្រាប appeared first on Kampuchea Thmey Daily.