ច្បាប់អាជ្ញាសឹក Archives - Kampuchea Thmey Daily

កូរ៉េខាងត្បូង៖ ក្រសួងការពារជាតិមិនអនុវត្តតាមច្បាប់អាជ្ញាសឹកលើកទី២ បើលោក Yoon បានអំណាចវិញ

Rann Reuy — Fri, 04 Apr 2025 02:13:46 +0000

ក្រសួងការពារជាតិកាលពីថ្ងៃទី៣ ខែមេសា បានអះអាងសារជាថ្មីនូវជំហរមិនអនុវត្តតាមក្នុងព្រឹត្តិការណ៍សម្មតិកម្មដែលបច្ចុប្បន្នលោក Yoon Suk Yeol ប្រធានាធិបតីដែលត្រូវបានព្យួរអំណាចនោះ ត្រូវបានប្រគល់អំណាចវិញ និងបញ្ជាឱ្យមានការដាក់ច្បាប់អាជ្ញាសឹកជាថ្មី។

កងសន្តិសុខការពារបង្ការមានអំពើហិង្សានៅថ្ងៃប្រកាសសាលក្រមប្រធានាធិបតី Yoon Suk Yeol។ Reuters

ការធានារបស់ក្រសួងការពារជាតិនេះធ្វើឡើងមួយថ្ងៃមុនពេលតុលាការធម្មនុញ្ញប្រកាសសាលក្រមបិទផ្លូវតវ៉ារបស់ខ្លួនលើសំណុំរឿងប្រកាន់ទម្លាក់អំណាច លោក Yoon ដែលត្រូវបានចោទប្រកាន់ពីបទបះបោរ និងការរំលោភបំពានអំណាចទាក់ទងនឹងការបញ្ជារបស់លោកបន្ទាប់ពីការប្រកាសច្បាប់អាជ្ញាសឹកកាលពីថ្ងៃទី៣ខែធ្នូ ឆ្នាំ២០២៤។

សារព័ត៌មានកូរ៉េខាងត្បូង Korea Herald បានដកស្រង់សម្តីអ្នកនាំពាក្យក្រសួងការពារជាតិ លោក Jeon Ha-kyou ដូចបាននិយាយថា៖«ជំហររបស់យើងនៅតែឈរដដែល ដែលត្រូវបានលើកឡើងដោយអនុរដ្ឋមន្ត្រីការពារជាតិ (រដ្ឋមន្ត្រីការពារជាតិស្តីទី Kim Seon-ho) បន្ទាប់ពីស្ថានភាពបែបនេះ (ច្បាប់អាជ្ញាសឹកពីថ្ងៃទី៣ដល់ថ្ងៃទី៤ខែធ្នូ»)។

ជំហរនេះសំដៅលើសេចក្តីថ្លែងការណ៍កាលពីថ្ងៃទី៦ខែធ្នូ របស់រដ្ឋមន្ត្រីការពារជាតិស្តីទី Kim Seon-ho ដែលថាក្រសួងការពារជាតិ និងយោធានឹងមិនអនុវត្តតាមបទបញ្ជាដែលអាចមានសម្រាប់ច្បាប់អាជ្ញាសឹកជាលើកទីពីរពីប្រធានាធិបតីនោះទេ។

ទាហានជាង ១៥០០នាក់ត្រូវបានចល័តនៅពេលយប់សម្រាប់ច្បាប់អាជ្ញាសឹកនៅថ្ងៃទី៣ខែធ្នូដែលបញ្ជាដោយមេបញ្ជាការយោធាជាន់ខ្ពស់ជាច្រើនដែលបានធ្វើសកម្មភាពក្រោមអំណាចរបស់រដ្ឋមន្ត្រីការពារជាតិ Kim Yong-hyun នៅពេលនោះ។

លោកim Yong-hyun មេបញ្ជាការយោធា និងជាមេប៉ូលីសកំពូលដែលទទួលខុសត្រូវក្នុងការធ្វើសកម្មភាពស្របតាមការបង្គាប់របស់ ប្រធានាធិបតី Yoon កាលពីថ្ងៃទី ៣ដល់ថ្ងៃទី៤ខែធ្នូ បច្ចុប្បន្នកំពុងស្ថិតនៅក្រោមការកាត់ក្តីព្រហ្មទណ្ឌសម្រាប់ការចោទប្រកាន់ពីបទបះបោរផងដែរ។

លោក Yoon ដែលត្រូវបានគេសង្ស័យថា បានដឹកនាំការបះបោរដែលត្រូវបានចោទប្រកាន់នោះក៏ប្រឈមមុខនឹងការកាត់ទោសបទឧក្រិដ្ឋសម្រាប់ការបះបោរបន្ថែមលើការកាត់ទោសចោទប្រកាន់ខាងលើ។

The post កូរ៉េខាងត្បូង៖ ក្រសួងការពារជាតិមិនអនុវត្តតាមច្បាប់អាជ្ញាសឹកលើកទី២ បើលោក Yoon បានអំណាចវិញ appeared first on Kampuchea Thmey Daily.

តុលាការធម្មនុញ្ញកូរ៉េខាងត្បូងឈានដល់សវនាការបូកសរុបនៅសប្តាហ៍ក្រោយ

Rann Reuy — Tue, 11 Feb 2025 09:00:11 +0000

តុលាការធម្មនុញ្ញប្រទេសកូរ៉េខាងត្បូងដែលកំពុងដំណើរការសវនាការលើបណ្តឹងចោទប្រកាន់និងទម្លាក់ប្រធានាធិបតី Yoon Suk Yeol ពីអំណាច គ្រោងនឹងបូកសរុបដំណើរការនីតិវិធីលើអង្គហេតុនៅសប្តាហ៍ក្រោយ ខណៈសាលក្រមត្រូវបានគេរំពឹងទុកនៅក្នុងខែចុងខែនេះឬដើមខែមីនា។

យោងតាមការចុះផ្សាយរបស់សារព័ត៌មានកូរ៉េខាងត្បូង The CHOISUN Daily អ្នកជំនាញផ្នែកច្បាប់បាននិយាយថា តុលាការធម្មនុញ្ញរបស់កូរ៉េខាងត្បូងអាចនឹងបញ្ចប់ការកាត់ក្តីចោទប្រកាន់ប្រធានាធិបតី Yoon Suk-yeol នៅដើមសប្តាហ៍ក្រោយ ជាមួយនឹងសាលក្រមដែលរំពឹងទុកនៅចុងខែកុម្ភៈ ឬដើមខែមីនា។

ខណៈពេលដែលនយោបាយកូរ៉េខាងត្បូងកំពុងតែល្អក់កករខ្លាំង តុលាការធម្មនុញ្ញដែលបច្ចុប្បន្នមានសមាជិក៨រូបក្នុងចំណោម៩រូប ហាក់បីដូចជាកំពុងពន្លឿនដំណើរការនេះ គោលបំណងសម្រាប់សេចក្តីសម្រេចក្នុងខែមីនា បន្ទាប់ពីសវនាការលើកទីប្រាំបីដែលបានគ្រោងទុកនៅថ្ងៃទី១៣ខែកុម្ភៈ។

ប្រសិនបើពេលវេលាកំណត់ សាលក្រមនឹងកើតឡើងប្រហែល ៧០ទៅ៨០ថ្ងៃបន្ទាប់ពីសំណុំរឿងនេះត្រូវបានដាក់កាលថ្ងៃទី១៤ខែធ្នូឆ្នាំ២០២ ក្រោយសភាបោះឆ្នោតទម្លាក់ដោយសំឡេងគាំទ្រលើស២ភាគ៣នៃសមាជិកសភាសរុប៣០០សំឡេង។

តុលាការធម្មនុញ្ញកូរ៉េខាងត្បូង ធ្លាប់បានកាត់ក្តីលើពាក្យបណ្តឹងរបស់សភាប្រឆាំងអតីតប្រធានាធិបតី Park Geun-hye ដោយប្រើប្រាស់៩១ថ្ងៃ និង ប្រឆាំងអតីតប្រធានាធិបតី Roh Moo-hyun ដោយប្រើប្រាស់ពេលវេលាន៦៣ថ្ងៃ៕

ដោយ រ៉ាន់ រើយ

តុលាការធម្មនុញ្ញកូរ៉េ ដំណើរការកាត់ក្តីសំណុំរឿងទម្លាក់អំណាចលោក Yoon Suk Yeol ។ REUTERS

លោក Yoon Suk Yeol ពិភាក្សាជាមួយមេធាវីរបស់គាត់។ REUTERS

The post តុលាការធម្មនុញ្ញកូរ៉េខាងត្បូងឈានដល់សវនាការបូកសរុបនៅសប្តាហ៍ក្រោយ appeared first on Kampuchea Thmey Daily.

លោក Yoon ទំនងគ្មានវាសនាវិលកាន់អំណាចវិញទេ ខណៈសំណុំរឿងចាក់ស្រេះកាន់តែខ្លាំង

Rann Reuy — Tue, 28 Jan 2025 10:16:44 +0000

សំណុំរឿងក្តីតាមនីតិវិធីតុលាការប្រឆាំងប្រធានាធបតីកូរ៉េខាងត្បូង លោក Yoon Suk Yeol កាន់តែស្មុគស្មាញ ប៉ុន្តែក្នុងចំណោមដំណើររឿងរ៉ាងទាំងឡាយ រឿងមួយដែលអាចពិតប្រាកដ គឺថា លោក Yoon នឹងគ្មានវាសនាវិលទៅកាន់អំណាចវិញនោះទេ។

ប្រធានាធិបតី Yoon Suk Yeol ពេលអង្គុយស្តាប់សវនាការតុលាការធម្មនុញ្ញ។ Reuters

ប្រធានាធិបតី Yoon Suk Yeol ដែលបានច្រានចោលការស្នើរបស់សមាជិកបក្សអំណាចប្រជាជន (People Power Party) ដែលដឹកនាំដោយលោក Han Dong-hoon ដែលស្នើឲ្យលោកចុះចេញពីអំណាចក្រោយលោកប្រកាសច្បាប់អាជា្ញសឹកបរាជ័យ។

លោក Han Dong-hoon ដែលបានលាលែងពីប្រធានបក្សនេះ២ថ្ងៃក្រោយបានជួយរដ្ឋសភាដឹកនាំដោយគណបក្សប្រជាធិបតេយ្យដែលជាបក្សប្រឆាំងនិងគ្រប់គ្រងស្ទើរតែ២ភាគ៣នៃសមាជិករដ្ឋសភាសរុប ក្នុងការទម្លាក់លោក Yoon ចេញពីអំណាចនៅថ្ងៃទី១៤ខែធ្នូឆ្នាំ២០២៤។

មុនពេល និង ក្រោយការទម្លាក់ចេញពីអំណាចដោយរដ្ឋសភា លោក Yoon នៅតែរក្សាជំហរប្រយុទ្ធដល់ទីបញ្ចប់។ ការប្រយុទ្ធរបស់លោក គឺ សម្អាងតែលើដំណើរការនៃនីតិវិធីរបស់តុលាការធម្មនុញ្ញមួយប៉ុណ្ណោះ ដែលលោកសង្ឃឹមទទួលបានអំណាចត្រឡប់មកវិញ ក្នុងករណីតុលាការធម្មនុញ្ញច្រានចោលការចោទប្រកាន់របស់រដ្ឋសភាក្នុងការទម្លាក់លោក។

រឿងរ៉ាងបន្ទាប់ពីការទម្លាក់ពីអំណាច គឺច្រើនឡើងៗរហូតមានការនាំខ្លួនទៅឃុំឃាំង និងការចោទប្រកាន់ពីបទ«បះបោរ» ជាដើម។

កាលក្នុងសប្តាហ៍មុន តុលាការបានច្រានចោលសំណើសុំពន្យារពេលឃុំខ្លួនប្រធានាធិបតីកូរ៉េខាងត្បូង Yoon Suk-yeol។ ព្រះរាជអាជ្ញាបានចោទប្រកាន់ Yoon កាលពីថ្ងៃអាទិត្យ ពីបទប៉ះបោរ។ ទោះបីជាព្រះរាជអាជ្ញាមិនបានស៊ើបអង្កេតក៏ដោយ ក៏គ្មានអ្វីធំដុំនឹងផ្លាស់ប្តូរដែរ។ រឿងពិតនោះគឺថា Yoon នឹងមិនត្រូវបានគេដោះលែងទេ ហើយគាត់នឹងមិនត្រូវបានបញ្ចូលក្នុងតួនាទីរបស់គាត់ឡើងវិញទេ។

ការកាត់ក្តីឧក្រិដ្ឋកម្មសម្រាប់ការបះបោរគឺជាដំណើរការដាច់ដោយឡែកពីការកាត់ក្តីចោទប្រកាន់របស់តុលាការធម្មនុញ្ញ បន្ទាប់ពីតុលាការធម្មនុញ្ញដែលគេរំពឹងថានឹងបញ្ចប់ការសាកសួរ សេចក្តីសន្និដ្ឋាន និងប្រកាសសាលក្រមនៅក្នុងខែមីនាខាងមុខ។

ប្រសិនបើ ប្រធានាធិបតី Yoon ត្រូវបានដកចេញពីតំណែងដោយតុលាការធម្មនុញ្ញ ហើយតំណែងប្រធានាធិបតីត្រូវបានទំនេរ ការបោះឆ្នោតប្រធានាធិបតីនឹងត្រូវរៀបចំឡើងក្នុងរង្វង់៦០ថ្ងៃ បន្ទាប់ពីការប្រកាសសាលក្រមរបស់តុលាការធម្មនុញ្ញ។

ចៅក្រមតុលាការធម្មនុញ្ញកូរ៉េខាងត្បូង ពេលដំណើរការសវនាការសំណុំរឿងលោក Yoon។ Reuters

ក្នុងរយៈពេល៦០ថ្ងៃនេះជាពេលវេលាគ្រប់គ្រាន់សម្រាប់គណបក្សនយោបាយនីមួយៗ ដែលបច្ចុប្បន្នមានគណបក្សធំ២ គឺគណបក្សប្រជាធិបតេយ្យកូរ៉េ (KDP) មានសមាជិកសភាសរុប១៩២រូបនៃសម្ព័ន្ធគណបក្សប្រជាធិបតេយ្យ និង គណបក្សអំណាចប្រជាជន (PPP) ដើម្បីដាក់បេក្ខជន រៀបចំដំណើរការបោះឆ្នោត ចុះឈ្មោះបេក្ខជន និងធ្វើយុទ្ធនាការបោះឆ្នោត។

កាលឆ្នាំ ២០១៧ ការចោទប្រកាន់ប្រឆាំងទម្លាក់ប្រធានាធិបតី លោកស្រី Park Geun-hye នៅថ្ងៃទី៩ខែធ្នូឆ្នាំ២០១៦ និងត្រូវបានតម្កល់ដោយតុលាការធម្មនុញ្ញកាលពីថ្ងៃទី១០ខែមីនា ហើយលោកស្រីត្រូវបានដកចេញពីតំណែង។

ក្នុងអំឡុងពេលកិច្ចប្រជុំគណៈរដ្ឋមន្ត្រីវិសាមញ្ញកាលពីថ្ងៃទី១៥ខែមីនា នាយករដ្ឋមន្ត្រី និងជាប្រធានាធិបតីស្តីទី លោក Hwang Kyo-ahn បានកំណត់កាលបរិច្ឆេទសម្រាប់ការបោះឆ្នោតប្រធានាធិបតីទី១៩របស់ប្រទេសជាថ្ងៃទី៩ខែឧសភា ហើយបានប្រកាសជាសាធារណៈ។ គណបក្សនយោបាយនីមួយៗបានតែងតាំងបេក្ខជនរៀងៗខ្លួនតាមរយៈបឋម។ ដំណើរការនេះចំណាយពេលតិចជាងមួយខែ។

បេក្ខជនត្រូវបានចុះឈ្មោះនៅថ្ងៃទី ១៥និង១៦ខែមេសា។ ការបោះឆ្នោតដំបូងត្រូវបានធ្វើឡើងនៅថ្ងៃទី៤និង៥ឧសភា។ ការបោះឆ្នោតប្រធានាធិបតីត្រូវបានធ្វើឡើងនៅថ្ងៃទី៩ខែឧសភា។ លទ្ធផលបោះឆ្នោតនាពេលនោះ បង្ហាញថា លោក Moon Jae-in ទទួលបាន ៤១,០៨% នៃសម្លេងឆ្នោត លោក Hong Joon-pyo ទាញបាន ២៤,០៣% លោក Ahn Cheol-soo ទទួលបាន ២១,៤១% លោក Yoo Seong-min ទទួលបាន ៦,៧៦% ហើយ លោក Sim Sang-jung ទទួលបាន ៦,១៧%។

លោក Moon Jae-In ត្រូវបានចូលកាន់តំណែងជាប្រធានាធិបតីនៅថ្ងៃទី១០ខែឧសភា ដោយគ្មានរយៈពេលផ្លាស់ប្តូរណាមួយឡើយ។

ក្តីសង្ឃឹមរបស់លោក Yoon Suk Yeol សម្រាប់ការទទួលបានអំណាចវិញគឺនៅកណ្តាប់ដៃតុលាការធម្មនុញ្ញ។ លោក មានប្រៀបឈ្នះខ្លះដែរ ដោយសារតែចៅក្រមតុលាការធម្មនុញ្ញរហូតដល់ទៅ៥រូបក្នុងចំណោម៨រូបដែលស្ថិតនៅក្នុងតួនាទីបច្ចុប្បន្ន មាន៤រូបគឺធ្លាប់តែងតាំងដោយរូបលោក និង១រូបស្នើតែងតាំងដោយគណបក្សរបស់លោក។

ក្នុងករណី ដែលតុលាការធម្មនុញ្ញ៦រូបមិនបោះឆ្នោតគាំទ្រការបោះឆ្នោតទម្លាក់របស់សភាទេ នោះលោកនឹងទទួលបានអំណាចវិញ។ ប៉ុន្តែសមាជិកបក្សភាគច្រើនរបស់លោក ក៏ឆ្អែតចិត្តដែលលោក Yoon មិនលាលែងពីអំណាចនៅពេលថ្មីៗ ធ្វើឲ្យរឿងរ៉ាងកាន់តែស្មុគស្មាញ៕

អ្នកសែតចោមរោមសួរមេធាវីតំណាង លោក Yoon Suk Yeol ពេលចេញសវនាការតុលាការធម្មនុញ្ញកាលថ្ងៃទី២៣មករា។ REUTERS

The post លោក Yoon ទំនងគ្មានវាសនាវិលកាន់អំណាចវិញទេ ខណៈសំណុំរឿងចាក់ស្រេះកាន់តែខ្លាំង appeared first on Kampuchea Thmey Daily.

លោក Yoon យល់ព្រមសហការជាមួយតុលាការធម្មនុញ្ញ ក្រោយតុលាការក្រុងសេអ៊ូលឃុំខ្លួន

Rann Reuy — Tue, 21 Jan 2025 08:13:48 +0000

ប្រធានាធិបតី Yoon Suk Yeol បានក្លាយជាប្រធានាធិបតីដំបូងបំផុតក្នុងការចូលទៅស្តាប់ដំណើរការសវនាការរបស់ខ្លួនឯងនៅក្នុងតុលាការធម្មនុញ្ញនៅរសៀលថ្ងៃអង្គារនេះ បន្ទាប់ពីលោកធ្លាប់បានបដិសេធការចូលទៅកាន់សវនាការ ដោយសារតែការព្រួយបារម្ភពីបញ្ហាសន្តិសុខ។

លោក Yoon ពេលចូលរួមសវនាការតុលាការធម្មនុញ្ញលើកដំបូងក្នុងប្រវត្តិប្រធានាធិបតីកូរ៉េខាងត្បូង។

ការសម្រេចចិត្តនេះ បានកើតមានឡើងក្រោយតុលាការក្រុងសេអ៊ូល បានចេញដីកាចាប់ខ្លួនលោក ដើម្បីឃុំខ្លួនមានរយៈពេល២០ថ្ងៃ ដើម្បីបន្តនីតិវិធីសាកសួរនៅក្នុងការិយាល័យស៊ើបអង្កេតអំពើពុករលួយ (CIO) ដែលលោកធ្លាប់បានបដិសេធឆ្លើយសំណួរព្រោះលោកចាត់ទុកថា ដំណើរការនីតិវិធីសាកសួររបស់ CIO ចំពោះរូបលោក គឺខុសច្បាប់។

ប្រទេសកូរ៉េខាងត្បូងធ្លាប់មានការចោទប្រកាន់និងព្យួរអំណាចប្រធានាធិបតី២រូប គឺ អតីតប្រធានាធិបតី Roh Moo-hyun ក្នុងឆ្នាំ២០១៤ និងអតីតប្រធានាធិបតី Park Geun-hye នៅក្នុងឆ្នាំ២០១៦ ប៉ុន្តែប្រធានាធិបតីទាំងពីរមិនបានចូលស្តាប់ដំណើរការសវនាការដោយផ្ទាល់នោះទេ។ ករណីទាំងពីរខាងលើ តុលាការធម្មនុញ្ញកូរ៉េខាងត្បូងធ្លាប់សម្រេចច្រានចូលបណ្តឹងសភាប្រឆាំ អតីតប្រធានាធិបតី Roh Moo-hyun ប៉ុន្តែបានតម្កល់ការចោទប្រកាន់របស់ប្រឆាំងប្រធានាធិបតី Park Geun-hye។

ប្រធានាធិបតី Yoon ត្រូវបានសភាជាតិចោទប្រកាន់និងបោះឆ្នោតព្យួរអំណាច កាលពីថ្ងៃទី១៤ខែធ្នូឆ្នាំ២០២៤ ខណៈពេលដែលការស៊ើបអង្កេតកំពុងដំណើរការលើការចោទប្រកាន់ដែលគាត់បានដឹកនាំការបះបោរ និងរំលោភអំណាចតាមរយៈការប្រកាសច្បាប់អាជ្ញាសឹកដ៏ចម្រូងចម្រាសកាលថ្ងៃទី៣ខែធ្នូឆ្នាំមុន។

តុលាការធម្មនុញ្ញមានពេល១៨០ថ្ងៃ គិតចាប់ពីថ្ងៃដែលខ្លួនបានទទួលសំណុំរឿងនៅថ្ងៃទី១៤ខែធ្នូឆ្នាំមុន ដើម្បីតម្កល់ការចោទប្រកាន់ និងដកគាត់ចេញពីតំណែង ឬច្រានចោលការចោទប្រកាន់ ហើយដាក់លោក Yoon ឲ្យចូលកាន់អំណាចវិញ។

ប្រសិនបើ Yoon ត្រូវបានបណ្តេញចេញពីអំណាចមែននោះ ប្រទេសកូរ៉េខាងត្បូងនឹងត្រូវបានទាមទារឱ្យរៀបចំការបោះឆ្នោតជ្រើសរើសប្រធានាធិបតីក្នុងរយៈពេល៦០ថ្ងៃចាប់ពីថ្ងៃប្រកាសសាលក្រម។

ប៉ុន្មានថ្ងៃកន្លងមកនេះ ទោះស្ថិតក្រោមបរិយាសត្រជាក់ខ្លាំងក៏ដោយ មនុស្សរាប់ម៉ឺននាក់បានប្រមូលផ្តុំគ្នានៅខាងក្រៅតុលាការមជ្ឈឹមរបស់ទីក្រុងសេអ៊ូល ដើម្បីបង្ហាញពីការគាំទ្ររបស់ពួកគេចំពោះប្រធានាធិបតី Yoon ដោយលើកស្លាកសញ្ញាថា «ការចោទប្រកាន់មិនត្រឹមត្រូវ»។

ប៉ូលីសបានឡោមព័ទ្ធជុំវិញបរិវេណតុលាការ និងលើសពីនេះ ហើយបានចតរថយន្តក្រុងនៅតាមចិញ្ចើមផ្លូវ ដើម្បីទប់ស្កាត់អំពើហិង្សាណាមួយក្នុងចំណោមអ្នកតវ៉ា។ ការបង្ហាញខ្លួនរបស់ Yoon នៅតុលាការជាលើកដំបូងដែលលោកបង្ហាញខ្លួនជាសាធារណៈចាប់តាំងពីថ្ងៃដែលលោកដាក់ច្បាប់អាជ្ញាសឹក។

តាមការវិភាគរបស់អ្នកជំនាញច្បាប់របស់ប្រទេសកូរ៉េ តុលាការធម្មុនុញ្ញ នឹងមានពេលរហូតដល់ពាក់កណ្តាលខែមីនាដើម្បីប្រកាសសាលក្រមជាផ្លូវ៕

ដោយ រ៉ាន់ រើយ

The post លោក Yoon យល់ព្រមសហការជាមួយតុលាការធម្មនុញ្ញ ក្រោយតុលាការក្រុងសេអ៊ូលឃុំខ្លួន appeared first on Kampuchea Thmey Daily.

លោក Yoon បន្តមិនសហការជាមួយCIO ដែលទំនងស្នើដីកាចាប់ខ្លួន ដើម្បីឃុំខ្លួនផ្លូវការរហូត២០ថ្ងៃ

Rann Reuy — Fri, 17 Jan 2025 04:22:02 +0000

ជាថ្មីទៀត លោក Yoon Suk Yeol ប្រធានាធិបតីកូរ៉េខាងត្បូងដែលរដ្ឋសភាបានបោះឆ្នោតព្យួរអំណាចកាលពាក់កណ្តាលខែធ្នូឆ្នាំ២០២៤ បានបដិសេធមិនទៅឆ្លើយសំណួររបស់ការិយាល័យស៊ើបអង្កេតពុករលួយ (CIO) ជុំវិញ ការចោទប្រកាន់ដាក់ច្បាប់អាជ្ញាសឹកដែលបរាជ័យ។

លោក Yoon ដើរចូលទៅការិយាល័យស៊ើបអង្កេតពុករលួយកាលថ្ងៃពុធ។ Reuter

ប្រធានាធិបតីដែលឡោមព័ទ្ធដោយរឿងក្តីចាក់ស្រេះនេះ ធ្លាប់បានបង្ហាញជំហរថា ការសួរចម្លើយដោយការិយាល័យស៊ើបអង្កេតពុករលួយសម្រាប់មន្ត្រីជាន់ខ្ពស់ (CIO) គឺខុសច្បាប់។

ការឃុំខ្លួនលោក Yoon បានឈានចូលដល់ថ្ងៃទី៣នៅថ្ងៃសុក្រនេះ ហើយក៏ជិតផុតកំណត់ដែរសម្រាប់ការនាំខ្លួនទៅសាកសួរ បន្ទាប់ពីសមត្ថកិច្ចចម្រុះប្រមាណ៣០០០នាក់បានទៅនាំខ្លួនដ៏ចម្រូងចម្រាស់កាលថ្ងៃពុធ។

លោក Seok Dong-hyeon មេធាវីនិងជាមិត្តចាស់របស់លោក Yoon ត្រូវបានទីភ្នាក់ងារព័ត៌មាន Yonhap ដកស្រង់សម្តីដោយនិយាយថា៖«លោកប្រធានាធិបតីបានបញ្ជាក់ជំហរមូលដ្ឋានរបស់គាត់អស់ហើយ អំឡុងពេលការសាកសួររបស់ CIO នៅថ្ងៃដំបូង និងមិនឃើញនូវហេតុផលផ្សេង ឬក៏សេចក្តីត្រូវការដើម្បីឆ្លើយតបទៅនឹងប្រភេទសំណួរនិងចម្លើយនៃការចោទសួរនោះទេ»។

កាលពីថ្ងៃពុធ ក្រោយការបញ្ជាក់ជំហររបស់ខ្លួន និងអះអាងថា ការសាកសួររបស់ការិយាល័យស៊ើបអង្កេតពុករលួយ គឺខុសច្បាប់ លោក Yoon បានប្រើប្រាស់សិទ្ធិរក្សាភាពស្ងប់ស្ងាត់មិនឆ្លើយតបសំណួររបស់អ្នកចោទសួរអស់រយៈពេល១០ម៉ោង។

នៅថ្ងៃព្រហស្បតិ៍ លោគ Yoon បានដាក់ពាក្យបណ្តឹងស្នើទៅតុលាការមជ្ឈិមទីក្រុងសេអ៊ូល ដើម្បីពិនិត្យឡើងវិញនូវភាពស្របច្បាប់នៃការឃុំខ្លួនរបស់គាត់ ប៉ុន្តែតុលាការបានច្រានចោលនៅយប់ថ្ងៃព្រហស្បតិ៍ ដោយរក្សាគាត់នៅក្នុងកន្លែងឃុំឃាំង។

CIO ត្រូវបានរំពឹងថា នឹងដាក់ពាក្យបណ្តឹងថ្មីមួយស្នើសុំដីកាចាប់ខ្លួនលោក Yoon ជាផ្លូវការ មុនផុតកំណត់នីតិវិធីឃុំខ្លួន៤៨ម៉ោង ដែលនឹងផុតកំណត់នៅយប់ថ្ងៃសុក្រនេះ។ ក្នុងករណីដែលតុលាការចេញដីកាចាប់ខ្លួន នោះនីតិវិធីឃុំខ្លួននឹងបន្តរហូតដល់២០ថ្ងៃបន្ថែមទៀត។

តាមអ្នកជំនាញផ្លូវច្បាប់នៅប្រទេសកូរ៉េខាងត្បូង ក្នុងករណីលោក Yoon ត្រូវបានចេញដីកាចាប់ខ្លួនជាផ្លូវការ នោះការស៊ើបអង្កេតលើនីតិវិធីព្រហ្មទណ្ឌនឹងត្រូវធ្វើឡើយ ហើយ បើរកឃើញពិរុទ្ធភាព ប្រធានាធិបតី Yoon Suk Yeol អាចមានទោសធ្ងន់រហូតដល់ប្រហារជីវិតឬក៏ត្រូវជាប់ពន្ធនាគារពេញ១ជីវិត៕

ដោយ រ៉ាន់ រើយ

The post លោក Yoon បន្តមិនសហការជាមួយCIO ដែលទំនងស្នើដីកាចាប់ខ្លួន ដើម្បីឃុំខ្លួនផ្លូវការរហូត២០ថ្ងៃ appeared first on Kampuchea Thmey Daily.

សភាបក្សប្រឆាំងកូរ៉េខាងត្បូងបោះឆ្នោតទម្លាក់ប្រធានាធិបតីស្តីទីដែលកាន់អំណាច១៣ថ្ងៃ

Rann Reuy — Fri, 27 Dec 2024 10:11:58 +0000

ប្រធានាធិបតីស្តីទីកូរ៉េខាងត្បូងលោក Han Duck-soo ដែលឡើងកាន់អំណាចត្រឹមរយៈពេល១៣ថ្ងៃត្រូវសភាជាតិដែលគ្រប់គ្រងដោយគណបក្សប្រជាធិបតេយ្យដែលជាគណបក្សប្រឆាំងបោះឆ្នោតទម្លាក់នៅរសៀលនៅថ្ងៃសុក្រ ទី២៧ ខែធ្នូ បន្ទាប់ពីការបដិសេធការចេញក្រឹត្យតែងតាំងចៅក្រម និង បង្កើតក្រុមស៊ើបអង្កេតពិសេស។

ក្រុមសមាជិកសភានៃគណបក្សប្រឆាំងទាំងអស់ចំនួន១៩២ បានបោះឆ្នោតគាំទ្រការព្យួរដំណែងប្រធានាធិបតីស្តីទី ខណៈសមាជិកសភានៃគណបក្សកាន់អំណាចទាំង ១០៨ បានធ្វើពហិការមិនបោះឆ្នោត។

បន្ទាប់ពីការដកតំណែងប្រធានាធិបតីស្តីទីនាពេលនេះ បានធ្វើឱ្យវិបត្តិនយោបាយរបស់ប្រទេសដែលមានសេដ្ឋកិច្ចធំទី៤នៅអាស៊ីមួយនេះ ធ្លាក់ចូលកាន់តែជ្រៅទៅនិងប្រឈមបញ្ហាផ្លូវច្បាប់កាន់តែស្មុគស្មាញ។

លោក Han Duck-soo កាន់តួនាទីជានាយករដ្ឋមន្រ្តី និងជាប្រធានាធិបតីស្តីទីកូរ៉េខាងត្បូង ក្រោយសភាជាតិបោះឆ្នោតចោទប្រកាន់ដកតំណែង ប្រធានាធិបតីលោក Yoon Suk Yeol កាលពីថ្ងៃទី១៤ខែធ្នូ ដោយសំឡេង២០៤ រួមទាំងសមាជិកសភាគណបក្សកាន់អំណាចរបស់លោកផង។

មុនការបោះឆ្នោតប្រព្រឹត្តទៅនាថ្ងៃសុក្រនេះ ប្រធានសភាកូរ៉េខាងត្បូង លោក Woo Son-shik បាននិយាយថា ដើម្បីដកតំណែង ប្រធានាធិបតីស្តីទី លោក Han Duck-soo គឺត្រូវការសំឡេងគាំទ្រត្រឹម១៥១សំឡេង ប៉ុណ្ណោះព្រោះលោកកាន់តួនាទីជា នាយករដ្ឋមន្ត្រី។ ការបោះឆ្នោតទម្លាក់លោក Yoon គឺត្រូវការសំឡេងចំនួន២០០ដែលជាសំឡេងចាំបាច់ ២ភាគ៣។

ការដកដំណែងលោក Han បានសេចក្តីថា រដ្ឋមន្រ្តីហិរញ្ញវត្ថុ លោក Choi Sang-mok ត្រូវក្លាយជាប្រធានាធិបតីស្តីទីបន្ត៕

ដោយ រ៉ាន់ រើយ

The post សភាបក្សប្រឆាំងកូរ៉េខាងត្បូងបោះឆ្នោតទម្លាក់ប្រធានាធិបតីស្តីទីដែលកាន់អំណាច១៣ថ្ងៃ appeared first on Kampuchea Thmey Daily.

ទីបំផុត សភាកូរ៉េខាងត្បូងជោគជ័យព្យួរអំណាចលោក Yoon យ៉ាងងាយស្រួល ដោយសំឡេង២០៤

Rann Reuy — Sat, 14 Dec 2024 09:06:55 +0000

ទីបំផុតសភាកូរ៉េខាងត្បូងបានបោះឆ្នោតដកហូតអំណាចលោក Yoon Suk Yeol បានសម្រេចត្រឹមតែរយៈពេលខ្លីសម្រាប់ការបោះឆ្នោតលើកទី២ ដែលចាប់ផ្តើមនៅម៉ោង៥ល្ងាចម៉ោងនៅទីក្រុងសេអ៊ូលប្រទេសកូរ៉េខាងត្បូង ត្រូវម៉ោង៣រសៀលម៉ោងនៅកម្ពុជា។

ប្រធានាធិបតីកូរ៉េខាងត្បូងលោក Yoon Suk-yeol ត្រូវបានសភាជាតិចោទប្រកាន់ពីបទប៉ុនប៉ងរយៈពេលខ្លីក្នុងការដាក់ច្បាប់អាជ្ញាសឹក ដែលជាទង្វើមួយដែលបានធ្វើឱ្យប្រទេសកូរ៉េខាងត្បូងធ្លាក់ចូលទៅក្នុងភាពចលាចលនយោបាយក្នុងរយៈពេលពាក់កណ្តាលនៃការកាន់តំណែងជាប្រធានាធិបតីរបស់លោក Yoon។

រដ្ឋសភាកូរ៉េខាងត្បូងបានទទួលជោគជ័យក្នុងការបោះឆ្នោត ដោយទទួលបានសំឡេងគាំទ្រ២០៤ ទល់នឹងសំឡេងប្រឆាំង៨៥ សម្រាប់ការបោះឆ្នោតមុននេះ ដើម្បីចោទប្រកាន់លោក Yoon ដែលជាការបោះឆ្នោតលើកទីពីរក្នុងរយៈពេលប្រាំបីថ្ងៃ។ សមាជិកបីរូបបានបោះឆ្នោតអនុប្បវាទ ហើយសំឡេងប្រាំបីត្រូវបានប្រកាសថាគ្មានសុពលភាព។ យោងភ្នាក់ងារសារព័ត៌មាន Al Jazeera ដែលតាមដានព្រឹត្តិការណ៍នោះ។

ក្រោយការបោះឆ្នោតសភាបានជោគជ័យ ឯកសារច្បាប់ដកហូតអំំណាចនឹងត្រូវប្រគាល់ជូនការិយាល័យប្រធានាធិបតីដោយជូនដំណឹងពីការដកហូត ហើយ និងមួយច្បាប់ទៀតត្រូវបញ្ជូនទៅកាន់តុលាការធម្មនុញ្ញដើម្បីពិនិត្យដំណើរការច្បាប់នោះត្រឹមត្រូវគ្រប់លក្ខណៈ ដើម្បីដកហូតអំណាចនោះឬទេ។

តុលាការធម្មនុញ្ញកូរ៉េខាងត្បូងមានសមាជិក៩រូប ដោយការបោះឆ្នោតត្រូវគាំទ្រច្បាប់នោះត្រូវការសំឡេង២ភាគ៣ ដូចករណីនៅសភាដែរ។ តុលាការធម្មនុញ្ញមានរយៈពេល១៨០ថ្ងៃដើម្បីពិនិត្យមើលដំណើរការច្បាប់នេះ។ ប៉ុន្តែករណី លោក Yoon Suk Yeol អាចនឹងប្រើពេលឆាប់ ដើម្បីបញ្ចៀសផលប៉ះពាល់ដែលអាចស្មានមិនដល់ក្នុងករណី លោក Yoon បន្តកាន់អំណាច៕

The post ទីបំផុត សភាកូរ៉េខាងត្បូងជោគជ័យព្យួរអំណាចលោក Yoon យ៉ាងងាយស្រួល ដោយសំឡេង២០៤ appeared first on Kampuchea Thmey Daily.

អ្នកវិភាគយុទ្ធសាស្រ្តកូរ៉េថា សមាជិកសភាបក្សកាន់អំណាចកូរ៉េខាងត្បូង«មិនស្មោះត្រង់»

Rann Reuy — Sat, 07 Dec 2024 11:43:44 +0000

បន្ទាប់ពីជាប់គាំងក្នុងរដ្ឋសភាកូរ៉េដែលកំពុងស្វែងរកការបោះឆ្នោតបង្គ្រាប់កូរ៉ុមដើម្បីដកហូតអំណាចប្រធានាធិបតី Yoon Suk Yeol ដែលប្រកាសឲ្យប្រើច្បាប់អាជ្ញាសឹកដែលបរាជ័យក្នុងប្រទេសកូរ៉េខាងត្បូង អ្នកវិភាគមើលឃើញថា សមាជិកភាគបក្សកាន់អំណាចដែលយល់ថា «ការប្រកាសនោះខុស» គឺមិនស្មោះត្រង់នោះទេ។

ប្រធានសមាជិកសភាបក្សកាន់អំណាច លោក Han Dong-hoon បានប្រកាន់ជំហរមិនច្បាស់លាស់ក្នុងអំឡុងប៉ុន្មានថ្ងៃនេះ ដោយដំបូងឡើយ លោកយល់់ថា ការប្រកាសរបស់ប្រធានាធិបតី គឺ «ខុស» ប៉ុន្តែលោកប្រកាសថា មិនគាំទ្របក្សប្រជាធិបតេយ្យដែលចង់ដកដំណែងប្រធានាធិបតី។ មួយថ្ងៃក្រោយមក លោកប្រកាសជំហរគាំទ្រឲ្យផ្អាកដំណែងប្រធានាធីបតីរបស់លោក Yoon កាន់តែឆាប់ដោយពណ៌នាថា វាមានហានិភ័យណាស់ដែលលោកអាចប្រើច្បាប់នោះជាថ្មី។

ប៉ុន្តែនៅព្រឹកថ្ងៃសៅរ៍នេះ ប្រធានាធិបតី លោក Yoon Suk Yeol បានប្រកាសសុំទោសជាសាធារណៈហើយថា លោកនឹងលែងឲ្យប្រើច្បាប់នោះហើយ ប្រធានបក្សកាន់អំណាចនៅក្នុងសភារូបនេះ បែជាលែងគាំទ្រច្បាប់ដកហូតអំណាចដែលផ្តួចផ្តើមដោយបក្សប្រជាធិបតេយ្យដែលជាបក្សជំទាស់គ្រប់គ្រងរដ្ឋសភាទៅវិញ។

លោក Sydney Seiler ប្រធានមជ្ឈមណ្ឌលសិក្សាយុទ្ធសាស្ត្រ និងអន្តរជាតិកូរ៉េ

លោក Sydney Seiler ប្រធានមជ្ឈមណ្ឌលសិក្សាយុទ្ធសាស្ត្រ និងអន្តរជាតិកូរ៉េ បាននិយាយថា ខណៈដែលការប្រកាសសង្គ្រាមរបស់លោកប្រធានាធិបតី Yoon កាលពីយប់ថ្ងៃអង្គារ ត្រូវបានគេមើលឃើញថា មិនអាចទទួលយកបានដោយសមាជិកសភានៃគ្រប់បក្សទាំងអស់នោះ ការបោះឆ្នោតឱ្យលោក Yoon ត្រូវបានចោទប្រកាន់ដកហូតអំណាច គឺមិនមានភាពស្មោះត្រង់នោះទេ។

លោក Seiler បានប្រាប់ BBC News ដោយកត់សម្គាល់ពីជំហរផ្លូវការរបស់គណបក្សកាន់អំណាចក្នុងការបោះឆ្នោតប្រឆាំងនឹងច្បាប់ដកហូតអំណាចប្រធានាធិបតីនេះ ថា៖«វាគឺជាបញ្ហាស្មុគស្មាញមួយដែលប៉ះពាល់ដល់ការប្រឈមមុខដាក់គ្នារវាងគណបក្សកាន់អំណាច និងគណបក្សប្រឆាំង»។

លោកពណ៌នាអំពីការប្រកាសច្បាប់អាជ្ញាសឹកថាជា «ការប្រើញញួរដើម្បីដំម្ជុលចូលទៅក្នុងជញ្ជាំង»។

លោកថ្លែងថា៖«មានការព្រមព្រៀងជាសកលដែលវាមិនអាចទទួលយកបាន ប៉ុន្តែបញ្ហានយោបាយ [រវាងភាគីនានាមាន] នៅចំពោះមុខច្បាប់អាជ្ញាសឹក ហើយនឹងបន្ត»។

ទោះយ៉ាងណាក៏ដោយ Seiler បន្ថែមថាគាត់មានសុទិដ្ឋិនិយមថា៖«ការប្រជាធិបតេយ្យដែលនៅនឹងកន្លែង [នៅក្នុងប្រទេសកូរ៉េខាងត្បូង] តែងតែដំណើរការចេញ»៕

ដោយ រ៉ាន់ រើយ

The post អ្នកវិភាគយុទ្ធសាស្រ្តកូរ៉េថា សមាជិកសភាបក្សកាន់អំណាចកូរ៉េខាងត្បូង«មិនស្មោះត្រង់» appeared first on Kampuchea Thmey Daily.

​ច្បាប់​អាជ្ញាសឹក Archives - Kampuchea Thmey Daily

​​​តុលាការ​​ធម្មនុញ្ញកូរ៉េខាងត្បូង​ឈាន​ដល់​​សវនាការ​បូកសរុប​​​​​នៅសប្តាហ៍ក្រោយ​

លោក Yoon ​ទំនង​គ្មានវាសនា​វិលកាន់អំណាច​វិញទេ​ ខណៈសំណុំរឿងចាក់ស្រេះ​កាន់តែ​ខ្លាំង​

​លោក Yoon ​យល់​ព្រម​សហការ​​ជាមួយ​តុលាការ​​ធម្មនុញ្ញ​​ ក្រោយ​តុលាការ​ក្រុង​​សេអ៊ូល​ឃុំខ្លួន​​

​​លោក Yoon ​បន្ត​មិនសហការ​​ជាមួយ​CIO ដែលទំនង​​ស្នើ​ដីកា​ចាប់ខ្លួន ដើម្បី​ឃុំខ្លួន​​​ផ្លូវការ​រហូត​២០ថ្ងៃ​

សភា​បក្ស​ប្រឆាំង​​កូរ៉េ​ខាងត្បូង​​បោះឆ្នោត​ទម្លាក់​ប្រធានាធិបតីស្តីទី​ដែលកាន់​អំណាច​១៣ថ្ងៃ​​

​ទីបំផុត​ សភា​​កូរ៉េខាងត្បូ​ង​ជោគជ័យ​ព្យួរ​អំណាច​លោក Yoon យ៉ាងងាយស្រួល​ ដោយ​សំឡេង​២០៤​

​អ្នក​វិភាគ​យុទ្ធសាស្រ្ត​កូរ៉េ​ថា សមាជិក​សភា​បក្ស​កាន់​អំណាច​កូរ៉េខាងត្បូង​​«មិនស្មោះត្រង់»

ច្បាប់អាជ្ញាសឹក Archives - Kampuchea Thmey Daily

តុលាការធម្មនុញ្ញកូរ៉េខាងត្បូងឈានដល់សវនាការបូកសរុបនៅសប្តាហ៍ក្រោយ

លោក Yoon ទំនងគ្មានវាសនាវិលកាន់អំណាចវិញទេ ខណៈសំណុំរឿងចាក់ស្រេះកាន់តែខ្លាំង

លោក Yoon យល់ព្រមសហការជាមួយតុលាការធម្មនុញ្ញ ក្រោយតុលាការក្រុងសេអ៊ូលឃុំខ្លួន

លោក Yoon បន្តមិនសហការជាមួយCIO ដែលទំនងស្នើដីកាចាប់ខ្លួន ដើម្បីឃុំខ្លួនផ្លូវការរហូត២០ថ្ងៃ

សភាបក្សប្រឆាំងកូរ៉េខាងត្បូងបោះឆ្នោតទម្លាក់ប្រធានាធិបតីស្តីទីដែលកាន់អំណាច១៣ថ្ងៃ

ទីបំផុត សភាកូរ៉េខាងត្បូងជោគជ័យព្យួរអំណាចលោក Yoon យ៉ាងងាយស្រួល ដោយសំឡេង២០៤

អ្នកវិភាគយុទ្ធសាស្រ្តកូរ៉េថា សមាជិកសភាបក្សកាន់អំណាចកូរ៉េខាងត្បូង«មិនស្មោះត្រង់»