ឆក់ខ្សែភ្លើង Archives - Kampuchea Thmey Daily

អធិការកិច្ចក្រសួងការងារ ចុះពិនិត្យសិប្បកម្មធ្វើនំ ១ កន្លែង នៅខណ្ឌពោធិ៍សែនជ័យ ក្រោយមានកម្មករឆក់ខ្សែភ្លើងស្លាប់

អ៊ិន ពិសី — Fri, 10 Oct 2025 03:13:41 +0000

កាលពីវេលាម៉ោង ៨ និង ៣០ នាទីព្រឹក ថ្ងៃទី ១០ ខែតុលា ឆ្នាំ ២០២៥ ក្រុមការងារអធិការកិច្ច ក្រសួងការងារ បានចុះទៅសួរនាំ និងពិនិត្យទីតាំងរោងចក្រធុនតូចផលិតនំស្រួយ TT ១ កន្លែង នៅខណ្ឌពោធិ៍សែនជ័យ ក្រោយមានកម្មករឆក់ខ្សែភ្លើងស្លាប់។

ការចុះសួរនាំ និងពិនិត្យនេះ ក្រោយមានយុវជនម្នាក់ ជាកម្មករ បានឆក់ខ្សែភ្លើងស្លាប់ កាលពីវេលាម៉ោង ១០ និង ៤០ នាទីព្រឹក ថ្ងៃទី ៩ ខែតុលា ឆ្នាំ ២០២៥ ក្នុងសិប្បកម្មធ្វើនំ យីហោ TT ស្ថិតនៅតាមផ្លូវបេតុង ភូមិព្រៃជីសាក់ សង្កាត់ចោមចៅទី ៣ ខណ្ឌពោធិ៍សែនជ័យ រាជធានីភ្នំពេញ។ ជនរងគ្រោះឈ្មោះ ផុន ដាណា ភេទប្រុស អាយុ ១៧ ឆ្នាំ ជាកម្មករសិប្បកម្មផលិតនំ TT ស្នាក់នៅភូមិកើតហេតុ មានស្រុកកំណើតនៅឯខេត្តពោធិ៍សាត់។

តាមប្រភពព័ត៌មានបានឲ្យដឹងថា ជនរងគ្រោះ បានឆក់ចរន្តអគ្គិសនីនៅកន្លែងធ្វើការស្លាប់ភ្លាមៗ នៅកន្លែង ហើយត្រូវបានម្ចាស់ទីតាំងព្យាយាមបិទបាំងព័ត៌មាន មិនហ៊ានរាយការណ៍ទៅសមត្ថកិច្ចភ្លាមៗ ទេ។ ម្យ៉ាងទៀត ដោយជនរងគ្រោះជាអនីតិជន សុខចិត្តហៅជួលរថយន្តឯកជន ១ គ្រឿង ពណ៌ស ពាក់ស្លាកលេខ ភ្នំពេញ 2F-7954 ដឹកសពយកទៅវត្ត ហើយក៏មិនហ៊ានដាក់ចុះពីរថយន្តដែរ ទុករហូតដល់រសៀលថ្ងៃដដែល ទើបរាយការណ៍ទៅសមត្ថកិច្ចចុះទៅពិនិត្យ។

ប្រភពព័ត៌មានដដែលបន្តថា ការស្លាប់របស់យុវជនខាងលើ ទាំងម្ចាស់ទីតាំង ទាំងអ្នករកស៊ីដឹកសព ហាក់បីដូចជាលាក់បាំងព័ត៌មាន អូសបន្លាយច្រើនម៉ោង ទើបរាយការណ៍ជាក្រោយ ដើម្បីឲ្យជំនាញពិនិត្យកោសល្យវិច័យ មុននឹងដឹកយកទៅធ្វើបុណ្យតាមប្រពៃណីឯស្រុកកំណើត។

បន្ទាប់ពីមានកម្មករជាអនីតិជនស្លាប់ក្នុងសិប្បកម្មខាងលើ នៅព្រឹកនេះ អធិការកិច្ចក្រសួងការងារ បានបន្តចុះទៅសាកសួរដល់ទីតាំងកើតហេតុតែម្ដង៕

អត្ថបទ ៖ សុខា

The post អធិការកិច្ចក្រសួងការងារ ចុះពិនិត្យសិប្បកម្មធ្វើនំ ១ កន្លែង នៅខណ្ឌពោធិ៍សែនជ័យ ក្រោយមានកម្មករឆក់ខ្សែភ្លើងស្លាប់ appeared first on Kampuchea Thmey Daily.

សន្តិសុខម្នាក់ ខណៈកំពុងឈរហាលខោអាវ ត្រូវខ្សែភ្លើងឆក់ស្លាប់ភ្លាមៗ មុខបន្ទប់ជួល

អ៊ិន ពិសី — Thu, 04 Sep 2025 23:30:00 +0000

បុរសជាសន្តិសុខម្នាក់ ខណៈពេលកំពុងឈរហាលខោអាវដែលទើបបោកគក់រួច ត្រូវបានខ្សែភ្លើងឆក់ស្លាប់ភ្លាមៗ នៅនឹងកន្លែងកើតហេតុ មុខបន្ទប់ជួល។

ហេតុការណ៍នេះបានកើតឡើងកាលពីវេលាម៉ោង ៥ និង ០០ នាទីទៀបភ្លឺ ថ្ងៃទី ៤ ខែកញ្ញា ឆ្នាំ ២០២៥ ស្ថិតនៅភូមិជ័យជំនះ ឃុំសៀមរាប ស្រុកកណ្តាលស្ទឹង ខេត្តកណ្ដាល។

តាមប្រភពពីកន្លែងកើតហេតុ បានឲ្យដឹងថា រាល់ដងនៅពេលជនរងគ្រោះមកពីធ្វើការវិញ តែងតែបោកសម្លៀកបំពាក់រួចទើបទៅសម្រាក ដោយសារគាត់ជាសន្តិសុខយាមពេលយប់ ដូច្នេះហើយទើបឆ្លៀតពេលបោកសម្លៀកបំពាក់។

ប្រភពដដែលបន្តថា ហើយនៅវេលាម៉ោងប្រមាណ ៥ និង ០០ នាទី ទៀបភ្លឺ ថ្ងៃទី ៤ កញ្ញា គាត់កំពុងតែរៀបចំបើកតូបលក់ដូរ ពេលនោះក៏មានអ្នកស្នាក់នៅផ្ទះជួលក្បែរនោះមកប្រាប់ថា ជនរងគ្រោះឆក់ខ្សែភ្លើងស្លាប់បាត់ហើយ រួចគាត់ក៏រត់ទៅមើល និងបិទកុងទ័រភ្លើង។ ភ្លាមៗ នោះ អ្នកនៅក្បែរខាងបានព្យាយាមជួយសង្គ្រោះ និងទាក់ទងហៅរថយន្តរបស់មន្ទីរពេទ្យមកជួយ តែជាអកុសលជនរងគ្រោះបានស្លាប់បាត់ទៅហើយ គាត់ក៏បានរាយការណ៍ទៅអាជ្ញាធរមូលដ្ឋានឲ្យ ចុះមកអន្តរាគមន៍នៅនឹងទីតាំងកើតហេតុភ្លាមៗ។

បើតាមការបញ្ជាក់ពីសមត្ថកិច្ច បានឲ្យដឹងថា ជនរងគ្រោះឈ្មោះ ញ៉េប វាស្នា ភេទប្រុស អាយុ ៣៣ ឆ្នាំ បច្ចុប្បន្នស្នាក់នៅបន្ទប់ជួលភូមិ-ឃុំកើតហេតុខាងលើ មានស្រុកកំណើតនៅភូមិឃ្លៃ ឃុំជ្រៃបាក់ ស្រុករលាប្អៀរ ខេត្តកំពង់ឆ្នាំង។

ក្រោយពេលពិនិត្យរួច សមត្ថកិច្ចជំនាញ និងក្រុមគ្រូពេទ្យ បានសន្និដ្ឋានថា ជនរងគ្រោះបានស្លាប់ដោយសារឆក់ចរន្តអគ្គិសនី។ ចំណែកសពត្រូវបានប្រគល់ជូនសាច់ញាតិ ដើម្បីរៀបចំធ្វើបុណ្យតាមប្រពៃណីនៅស្រុកកំណើត៕

អត្ថបទ ៖ ម៉េង

The post សន្តិសុខម្នាក់ ខណៈកំពុងឈរហាលខោអាវ ត្រូវខ្សែភ្លើងឆក់ស្លាប់ភ្លាមៗ មុខបន្ទប់ជួល appeared first on Kampuchea Thmey Daily.

បុរសម្នាក់ជនជាតិទំពួន រស់នៅខេត្តរតនគិរី ត្រូវបានខ្សែភ្លើងឆក់បណ្តាលឱ្យរងរបួសធ្ងន់ធ្ងរ

អុន ស្រីមាន — Mon, 20 Jan 2025 03:12:11 +0000

បុរសម្នាក់ ត្រូវបានខ្សែភ្លើងឆក់ បង្កឱ្យមានរបួសធ្ងន់ធ្ងរ ឈ្មោះ ឃេីច ឌេម អាយុ ៣៤ឆ្នាំ ជនជាតិ ទំពួន មុខរបរ មិនពិតប្រាកដ ទីលំនៅភូមិកាចូន ឃុំកាចូន ស្រុកវេីនសៃ ខេត្តរតនគិរី បច្ចុប្បន្នកំពុងសង្គ្រោះនៅមន្ទីរពេទ្យបង្អែកខេត្តរតនគិរី។

ហេតុការណ៍នេះ បានកើតឡើងនៅត្រង់ចំណុចក្បែរបង្គោលភ្លេីងមួយកន្លែង (ត្រង់ហ្វូលេខ១៦០) ម្ដុំសត្វឃាត ស្ថិតក្នុងភូមិអភិវឌ្ឍន៍ សង្កាត់ឡាបានសៀក ក្រុងបានលុង ខេត្តរតនគិរី នៅវេលាម៉ោង៦ព្រឹក ថ្ងៃទី១៩ ខែមករា ឆ្នាំ២០២៥។ បន្ទាប់ពីកើតហេតុ លោក រស់ ឈាងហេង មេភូមិអភិវឌ្ឍន៍ ក៏បានរាយការណ៍ទៅកម្លាំងប៉ុស្តិ៍ឡាបានសៀក មកជួយអន្តរាគមន៍។

សមត្ថកិច្ចបានទៅដល់កន្លែងកើតហេតុ និងបានបញ្ជូនជនរងគ្រោះ តាមរថយន្តទៅជួយសង្គ្រោះនៅនៅមន្ទីរពេទ្យបង្អែកខេត្តរតនគិរីភ្លាមៗ បន្ទាប់ពិនិត្យឃេីញថាជនរងគ្រោះពិតជា ត្រូវបានខ្សែភ្លេីងឆក់ប្រាកដមែន។ ដោយស្ថានភាពរបួសជនរងគ្រោះមានសភាពធ្ងន់ធ្ងរ កម្លាំងប៉ុសិ៍ដឡាបានសៀក និងកម្លាំងអធិការដ្ឋានក្រុងបានលុង ក៏បានដឹកជនរងគ្រោះតាមរថយន្តរបស់អធិការដ្ឋាននគរបាលក្រុងបានលុង មកជួយសង្គ្រោះនៅមន្ទីពេទ្យបង្អែកខេត្តរតនគិរី៕

ដោយ៖ ខៀវ ចាប

The post បុរសម្នាក់ជនជាតិទំពួន រស់នៅខេត្តរតនគិរី ត្រូវបានខ្សែភ្លើងឆក់បណ្តាលឱ្យរងរបួសធ្ងន់ធ្ងរ appeared first on Kampuchea Thmey Daily.

ស្ទូចដងបុកគ្រឹះដាក់លើរថយន្តមិនប្រយ័ត្ន ប៉ះខ្សែភ្លើង ឆក់ស្លាប់ម្នាក់ របួស ២ នាក់

អ៊ិន ពិសី — Thu, 16 Jan 2025 03:00:41 +0000

កម្មករបុកគ្រឹះ ចំនួន ៣ នាក់ ស្ទូចដងបុកគ្រឹះដាក់លើរថយន្តមិនប្រយ័ត្នប៉ះខ្សែភ្លើង បណ្ដាលឲ្យឆក់ស្លាប់ម្នាក់ និងរងរបួស ២ នាក់។

ហេតុការណ៍នេះបានកើតឡើងកាលពីវេលាម៉ោង ១១ និង ២០ នាទី ថ្ងៃទី ១៥ ខែមករា ឆ្នាំ ២០២៥ ម្សិលមិញ ស្ថិតក្នុងភូមិត្រពាំងប្រិយ ឃុំអង្គខ្នុរ ស្រុកទ្រាំង ខេត្តតាកែវ។

សមត្ថកិច្ចស្រុកទ្រាំង បានឲ្យដឹងថា ជនរងគ្រោះទាំង ៣ នាក់ រួមមាន ៖ ១.ឈ្មោះ ម៉ៃ ស៊ីណា ភេទប្រុស អាយុ ២៤ ឆ្នាំ (របួស) មានស្រុកកំណើតភូមិតាខិណ ឃុំចន្ត្រី ស្រុករមាសហែក ខេត្តស្វាយរៀង ជាអ្នកបញ្ជាឡានស្ទូច។ បច្ចុប្បន្ន ស្នាក់នៅជាមួយថៅកែ សង្កាត់ភ្លើងឆេះរទេះ ខណ្ឌកំបូល រាជធានីភ្នំពេញ។ ២.ឈ្មោះ រាម ឡង ភេទប្រុស អាយុ ២៧ ឆ្នាំ (របួស) មានស្រុកកំណើតនៅភូមិគោកជ ឃុំស្តៅ ស្រុករតនៈមណ្ឌល ខេត្តបាត់ដំបង។ បច្ចុប្បន្ន ស្នាក់នៅភូមិដំណាក់សង្កែ សង្កាត់ព្រែកកំពឹស ខណ្ឌដង្កោ រាជធានីភ្នំពេញ។ ៣.ឈ្មោះ ដុក រដ្ឋា ភេទប្រុស អាយុ ៣៧ ឆ្នាំ (ស្លាប់) មានស្រុកកំណើតភូមិទេពអជូន ឃុំកោះខែល ស្រុកស្អាង ខេត្តកណ្ដាល។ បច្ចុប្បន្នរស់នៅភូមិឫស្សី សង្កាត់បារាយណ៍ ក្រុងដូនកែវ ខេត្តតាកែវ។

សមត្ថកិច្ចបញ្ជាក់ថា កាលពីថ្ងៃទី ១៥ ខែមករា ឆ្នាំ ២០២៥ ជនរងគ្រោះទាំង ៣ នាក់ ខាងលើ បានបើករថយន្តមានដងសន្ទូច ១ គ្រឿង ពាក់ស្លាកលេខ ភ្នំពេញ 3A 8074 មកបុកគ្រឹះផ្ទះរបស់ឈ្មោះ អៀម ស៊ីណា លុះដល់ម៉ោងកើតហេតុខាងលើ កម្មករទាំង ៣ នាក់ ដែលឈ្មោះ ម៉ៃ ស៊ីណា ជាអ្នកបញ្ជាដងសន្ទូច បានស្ទូចដងបុកគ្រឹះដាក់លើរថយន្តក្រោមខ្សែកាបធំ (ផ្លូវបេតុង ១២៩B) ដោយកម្មករ ២ នាក់ កាន់ដងបុកគ្រឹះដាក់លើរថយន្ត ក៏ឆ្លងចរន្តអគ្គិសនីតាមដងសន្ទូចឆក់ទាំង ៣ នាក់ ស្លាប់ម្នាក់ ជាកម្មករនៅនឹងកន្លែងកើតហេតុ និង ២ នាក់ រងរបួស ត្រូវបានបញ្ជូនទៅសង្គ្រោះបន្ទាន់។

ក្រោយកើតហេតុ កម្លាំងជំនាញ បានចុះស្រាវជ្រាវដល់កន្លែងកើតហេតុ ដោយមានការចូលរួមពីក្រុមគ្រួសារសព អ្នកគ្រូពេទ្យ លោកមេឃុំ លោកមេភូមិ ពិនិត្យកន្លែងកើតហេតុ ពិនិត្យសព និងជនរងគ្រោះ ឃើញថា ពិតជាឆក់ចរន្តអគ្គិសនីមែន និងប្រគល់សពជូនក្រុមគ្រួសារយកទៅធ្វើបុណ្យតាមប្រពៃណី៕

អត្ថបទ ៖ វីរៈ

The post ស្ទូចដងបុកគ្រឹះដាក់លើរថយន្តមិនប្រយ័ត្ន ប៉ះខ្សែភ្លើង ឆក់ស្លាប់ម្នាក់ របួស ២ នាក់ appeared first on Kampuchea Thmey Daily.

ស្លាប់ពីរនាក់ ដោយសារលេងទូរស័ព្ទពេលកំពុងសាកថ្ម

Sokhom Khon — Wed, 18 Sep 2024 02:09:20 +0000

បុរសជាជនជាតិវៀតណាមពីរនាក់ត្រូវបានចរន្ដអគ្គិសនីឆក់ស្លាប់ភ្លាមៗ ខណៈពួកគេកំពុងចុចទូរស័ព្ទលេងពេលកំពុងសាកថ្ម និងមានភ្លៀងសើមចូលក្នុងផ្ទះ។ ករណីឆ្លងចរន្ដរហូតផ្ដាច់ជីវិតបុរសជនជាតិវៀតណាមពីរនាក់នេះ បានកើតឡើងកាលពីល្ងាចថ្ងៃទី១៧ ខែកញ្ញា ឆ្នាំ២០២៤ នៅចំណុចផ្ទះជួលគ្មានលេខ ផ្លូវលំ ភូមិដើមចាន់១ សង្កាត់ច្បារអំពៅ២ ខណ្ឌច្បារអំពៅ រាជធានីភ្នំពេញ។

តាមរបាយការណ៍របស់សមត្ថកិច្ចបានឲ្យដឹងថា ជនរងគ្រោះត្រូវបានគេស្គាល់ឈ្មោះ គូ សុភារិទ្ធ ភេទប្រុស អាយុ៤៨ឆ្នាំ ជនជាតិវៀតណាម មុខរបរនៅផ្ទះ (ម្ចាស់ផ្ទះ) ស្នាក់នៅកន្លែងកើតហេតុ។ ឈ្មោះ យឿង ពៅ (ហៅ អ៊ុក) ភេទប្រុស អាយុ៣៧ឆ្នាំ ជនជាតិវៀតណាម មុខរបរនៅផ្ទះ ស្នាក់នៅផ្ទះជួលគ្មានលេខ ផ្លូវលំ ភូមិដើមចាន់១ សង្កាត់ច្បារអំពៅ២ ខណ្ឌច្បារអំពៅ រាជធានីភ្នំពេញ។

តាមរបាយការណ៍បន្ថែមថា មុនពេលកើតហេតុវេលាម៉ោងប្រហែល ១៦និង៥០នាទី ឈ្មោះ យឿង ពៅ បានមកអង្គុយលេងនៅផ្ទះឈ្មោះ គូ សុភារិទ្ធ ជជែកគ្នាលេងពីរឿងបបួលគ្នាចូលលុយទិញនុយទុកទៅស្ទូចត្រី ដោយនិយាយគ្នាបណ្តើរសាកថ្មទូរស័ព្ទនឹងរ៉ូឡូខ្សែភ្លើង និងចុចលេងម្នាក់មួយបណ្តើរក្នុងពេលមេឃភ្លៀងរលឹមស្រិចៗសើមចូលក្នុងផ្ទះ។ ប្រភពបន្ថែមថា បន្តិចក្រោយមកប្រពន្ធរបស់ គូ សុភារិទ្ធ (ម្ចាស់ផ្ទះ) ដែលកំពុងដាំបាយនៅខាងក្រោយបានឃើញជនរងគ្រោះទាំងពីរនាក់ប្រកាច់ចូលគ្នា ដោយជើងរបស់ឈ្មោះ យឿង ពៅ នៅជាប់ជាមួយរ៉ូឡូខ្សែភ្លើង។ ភ្លាមនោះប្រពន្ធម្ចាស់ផ្ទះក៏បានយកអំបោសជ័រមកវាយរ៉ូឡូខ្សែភ្លើងចេញ រួចក៏ស្រែកហៅអ្នកជិតខាងឲ្យមកជួយ ប៉ុន្តែជនរងគ្រោះទាំងពីរបានស្លាប់បាត់ទៅហើយ។

តាមការពិនិត្យរបស់មន្ត្រីការិយាល័យបច្ចេកទេស និងតាមការពិនិត្យរបស់ឧកញ៉ាវេជ្ជបណ្ឌិត នង សុវណ្ណរ័ត្ន គ្រូពេទ្យកោសល្យវិច័យរាជធានីភ្នំពេញ បានបញ្ជាក់ថា ជនរងគ្រោះទាំងពីរនាក់ស្លាប់ដោយសារ ឆក់ចរន្តអគ្គីសនី។ សពជនរងគ្រោះត្រូវបានសមត្ថកិច្ចជំនាញធ្វើកំណត់ហេតុ និងប្រគល់ជូនក្រុមគ្រួសារដើម្បីយកទៅធ្វើបុណ្យតាមប្រពៃណី៕

អត្ថបទ៖ នរា

The post ស្លាប់ពីរនាក់ ដោយសារលេងទូរស័ព្ទពេលកំពុងសាកថ្ម appeared first on Kampuchea Thmey Daily.

កម្មករសំណង់ម្នាក់ ឆក់ខ្សែភ្លើងស្លាប់ក្នុងការដ្ឋានកំពុងសាងសង់មួយកន្លែង នៅខណ្ឌសែនសុខ

អ៊ិន ពិសី — Fri, 19 Jul 2024 04:01:01 +0000

បុរសជាកម្មករសំណង់ម្នាក់ បានឲ្យបុរសជាកម្មករដូចគ្នាម្នាក់ទៀត យកឌុយទៅដោតនៅនឹងហ្វ្រីភ្លើង ក៏បណ្ដាលឲ្យឆ្លងចរន្តឆក់ខ្លួនឯងស្លាប់បាត់បង់ជីវិតនៅក្នុងការដ្ឋានកំពុងតែស្នាក់នៅ។

ហេតុការណ៍នេះបានកើតឡើងកាលពីវេលាម៉ោង ៨ និង ៣០ នាទីយប់ ថ្ងៃទី ១៨ ខែកក្កដា ឆ្នាំ ២០២៤ ចំណុចផ្លូវបេតុងក្នុង សង្កាត់គោកឃ្លាង ខណ្ឌសែនសុខ រាជធានីភ្នំពេញ។

តាមប្រភពពីកន្លែងកើតហេតុបានឲ្យដឹងថា នៅមុនពេលកើតហេតុ ដោយកម្មករក្នុងការដ្ឋានទាំងអស់ដល់ម៉ោងសម្រាកពីការងារ ដោយឡែកជនរងគ្រោះវិញ ក៏បានទៅយកខ្សែភ្លើងមកត (ខ្សែភ្លើងមានស្នាមដាច់ និងធ្លាប់ឆក់ម្ដងរួចមកហើយ)។ ក្រោយពីបានខ្សែភ្លើង ក៏បានឲ្យបុរសជាកម្មករដូចគ្នាម្នាក់ទៀត យកឌុយទៅដោតនៅនឹងហ្វ្រីភ្លើង ស្រាប់តែឆ្លងចរន្តឆក់ទៅលើជនរងគ្រោះដេកដួលនៅនឹងកន្លែង ពេលនោះដែរ កម្មកររស់នៅក្បែរខាង បាននាំគ្នារត់ទៅជួយលើកជនរងគ្រោះទៅកប់ខ្សាច់ និងទាក់ទងរថយន្តសាមុយឲ្យចុះមកពិនិត្យភ្លាមៗ។ បន្ទាប់ពីក្រុមគ្រូពេទ្យពិនិត្យរួច ឃើញថា បុរសរងគ្រោះបានដាច់ខ្យល់ស្លាប់បាត់ហើយ រួចនាំគ្នារាយការណ៍ទៅសមត្ថកិច្ចមូលដ្ឋានឲ្យចុះមកពិនិត្យលើសព។

ក្រោយសមត្ថកិច្ចមូលដ្ឋានចុះមកដល់ ក៏បានទាក់ទងទៅជំនាញកោសល្យវិច័យរបស់ស្នងការដ្ឋាននគរបាលរាជធានីភ្នំពេញ មកពិនិត្យលើសព។ ក្រោយខាងជំនាញពិនិត្យរួច ឃើញថា ជនរងគ្រោះពិតជាស្លាប់ដោយឆក់ខ្សែភ្លើងមែន។ ក្រោយសមត្ថកិច្ចធ្វើកំណត់ហេតុរួច ក៏បានប្រគល់សពជនរងគ្រោះជូនទៅក្រុមគ្រួសារយកធ្វើបុណ្យតាមប្រពៃណី៕

អត្ថបទ ៖ សំណាង

The post កម្មករសំណង់ម្នាក់ ឆក់ខ្សែភ្លើងស្លាប់ក្នុងការដ្ឋានកំពុងសាងសង់មួយកន្លែង នៅខណ្ឌសែនសុខ appeared first on Kampuchea Thmey Daily.

យាយតាយកចៅអាយុ៦ខែ ទៅងូតទឹក ត្រូវខ្សែភ្លើងឆក់ស្លាប់ទាំង៣នាក់ យ៉ាងអាណោចអាធ័ម

Ngoeul Narath — Fri, 05 Jul 2024 12:25:13 +0000

ជីដូន និងជីតាបានយកចៅអាយុ៦ខែទៅងូតទឹកក្បែរពាង រួចលូកដៃតោងស័ង្កសី ក៏ត្រូវចរន្តអគ្គីសនី ដែលឆ្លងពីម៉ាស៊ីនបោកខោអាវមកស័ង្កសីឆក់បណ្តាលឲ្យស្លាប់ទាំង៣នាក់ យ៉ាងអាណោចអាធ័ម។

ហេតុការណ៍នេះបានកើតឡើង នៅវេលាម៉ោង ១៣៖១៥នាទីរសៀល ថ្ងៃទី៥ ខែកក្កដា ឆ្នាំ២០២៤ ស្ថិតនៅភូមិចំការដូង សង្កាត់ច្បារមន ក្រុង ច្បារមន ខេត្តកំពង់ស្ពឺ។

បើតាមប្រភពពីសមត្ថកិច្ចក្រុងច្បារមន បានឲ្យដឹងថា ករណីឆក់បណ្តាលឲ្យ ស្លាប់មនុស្សចំនួន០៣នាក់មានឈ្មោះ ឡា ណែន អាយុ៥១ឆ្នាំ ប្តី និងប្រពន្ធឈ្មោះ ណិន សុន អាយុ៤៧ឆ្នាំ ព្រមទាំងចៅស្រី ឈ្មោះ អូន សុវណ្ណខេម៉ា អាយុ៦ខែ។

ជុំវិញករណីនេះសមត្ថកិច្ចបានសន្និដ្ឋានថា មូលហេតុឆ្លងចរន្តអគ្គិសនី នៅក្នុងបន្ទប់ទឹកពីម៉ាស៊ីនបោកខោអាវ មកស័ង្កសីដែល ជនរងគ្រោះបានតោងងូតទឹក៕

អត្ថបទ៖ ម៉េង

The post យាយតាយកចៅអាយុ៦ខែ ទៅងូតទឹក ត្រូវខ្សែភ្លើងឆក់ស្លាប់ទាំង៣នាក់ យ៉ាងអាណោចអាធ័ម appeared first on Kampuchea Thmey Daily.

យកឧបករណ៍ទៅឆក់ត្រី ភ្លាត់ស្នៀតឆក់ខ្លួនឯងស្លាប់

Sokhom Khon — Mon, 06 May 2024 04:28:15 +0000

បុរសម្នាក់ក្រោយពីទំនេរពីការងារឆ្លៀតរកម្ហូបដោយយកឧបករណ៍ឆក់ត្រីទៅឆក់នៅក្នុងត្រពាំងមួយកន្លែងបែជាភ្លាត់ស្នៀតឆក់ខ្លួនឯងស្លាប់ បង្កការភ្ញាក់ផ្អេីលកាលពីវេលាម៉ោង៨និង៣០នាទី ថ្ងៃទី០៥ ខែឧសភា ឆ្នាំ២០២៤ នៅចំណុចទឹកបឹង ក្នុងបរិវេណអតីតទីលានប្រណាំងរថយន្ត ភូមិតាភេម សង្កាត់កំបូល ខណ្ឌកំបូល រាជធានីភ្នំពេញ។

សពនរងគ្រោះឈ្មោះ ប៊ូ ម៉ាណា ភេទប្រុស អាយុ២៤ឆ្នាំ មុខរបរនៅផ្ទះ ទីលំនៅភូមិត្រពាំងទឹម ឃុំស្ដើងជ័យ ស្រុកជើងព្រៃ ខេត្តកំពង់ចាម។ ស្នាក់នៅបន្ទប់ជួលសង្កាត់កន្ទោក ខណ្ឌកំបូល រាជធានីភ្នំពេញ។ មានប្រពន្ធឈ្មោះ ឌឿន អែម ភេទស្រី អាយុ២៣ឆ្នាំ ។

តាមស្តីប្រពន្ធជនរងគ្រោះបានឱ្យដឹងថា នៅមុនពេលកេីតហេតុប្តីរបស់គាត់បានរៀបចំឧបករណ៍ឆក់ត្រី ចុះទៅក្នុងទឹកបឹង ដូចសព្វមួយដង ពេលកំពុងតែឆក់ត្រីស្រាប់បាត់មិនឃើញពន្លឺពិលដែលប្ដីគាត់ពាក់នៅលេីក្បាល ទើបគាត់បញ្ចាំងពិលមើលឃើញប្ដីគាត់ផ្កាប់មុខក្នុងទឹក ទើបរត់មកផ្លូវស្រែកហៅឱ្យអ្នកភូមិជួយ។ បន្ទាប់មកក៏មានអ្នកជិតខាងមកជួយទាញប្ដីគាត់ឡើងគោកធ្វើចលនាសង្គ្រោះ រួចដឹកមកមន្ទីរពេទ្យ។ ពេលមកដល់គ្រូពេទ្យពិនិត្យប្រាប់ថា ប្ដីរបស់គាត់បានស្លាប់បាត់ទៅហើយ ទេីបរាយការណ៍ទៅសមត្ថកិច្ចតែម្តង។

យោងតាមការពិនិត្យកន្លែងកើតហេតុ និងការបញ្ជាក់ពីលោកវេជ្ជបណ្ឌិត នង សុវណ្ណរ័ត្ន បានបញ្ជាក់ថា ជនរងគ្រោះស្លាប់ដោយសារឆក់ចរន្តអគ្គិសនី៕

អត្ថបទ៖ សុខា

The post យកឧបករណ៍ទៅឆក់ត្រី ភ្លាត់ស្នៀតឆក់ខ្លួនឯងស្លាប់ appeared first on Kampuchea Thmey Daily.