ពលរដ្ឋបានឱ្យដឹងថា ឆៃថាវ ជាបន្លែដែលងាយស្រួលដាំដុះ និងថែទាំបំផុត ដោយប្រើរយៈពេលត្រឹមតែ ៦ សប្ដាហ៍ អាចប្រមូលផលបាន។ មូលហេតុដែលពួកគាត់ជ្រើសរើសដាំឆៃថាវ គឺដោយសារទីផ្សារទូលាយ អាចយកទៅធ្វើម្ហូបស្រស់ៗ ធ្វើជ្រក់ ឬកែច្នៃជាឆៃប៉ូវ។

បច្ចុប្បន្ន មានក្រុមឈ្មួញចុះមកប្រមូលទិញដល់ចម្ការផ្ទាល់ មិនពិបាកដឹកជញ្ជូនទៅឆ្ងាយ។ ចំពោះតម្លៃកាលពីមុន ឆៃថាវអាចលក់បានតម្លៃ ៨០០ រៀល ក្នុងមួយគីឡូក្រាម ប៉ុន្តែបច្ចុប្បន្នចុះមកត្រឹម ៥០០ រៀល ក្នុងមួយគីឡូក្រាម ដោយសារមានកសិករដាំច្រើនក្នុងពេលតែមួយ។ ទោះជាយ៉ាងនេះក្ដី ពួកគាត់នៅតែបន្តដាំ ព្រោះវាឆាប់បានផល និងងាយស្រួលលក់។

ពលរដ្ឋបានប្រាប់ឱ្យដឹងថា ដើម្បីទទួលបានមើមឆៃថាវ មានគុណភាពល្អ គឺត្រូវភ្ជួររាស់ដីឱ្យម៉ដ្ឋល្អ រួចលើករង រោយជី និងដាក់គ្រាប់តាមរងនីមួយៗ ឱ្យមានចន្លោះសមស្រប។

ជាពិសេសត្រូវស្រោចទឹកឱ្យបានគ្រប់គ្រាន់ក្នុងរយៈពេល ៧ ថ្ងៃដំបូង រួចបន្តដាក់ជី និងបាញ់ថ្នាំសម្លាប់សត្វល្អិតឱ្យបាន ៤​ដង រហូតដល់ពេលប្រមូលផល។

ទោះបីជាការដាំដុះដំណើរការទៅដោយរលូន ប៉ុន្តែពួកគាត់នៅតែមានក្ដីបារម្ភលើបញ្ហាតម្លៃ។ ពួកគាត់បានសំណូម​ពរ​ឱ្យ​អាជ្ញាធរមូលដ្ឋាន និងផ្នែកពាក់ព័ន្ធ ជួយជំរុញការស្វែងរកទីផ្សារឱ្យកាន់តែទូលាយជាងមុន និងជួយទប់លំនឹងតម្លៃឱ្យបាន​សមរម្យ ដើម្បីជួយបង្កើនចំណូលគ្រួសារ និងលើកកម្ពស់ជីវភាពកសិករឱ្យកាន់តែប្រសើរឡើង៕

អត្ថបទ៖ ជុន កុសល

The post កសិករដាំឆៃថាវ សម្រុកប្រមូលផល នៅចំពេលឈ្មួញចុះទិញដល់ចម្ការ appeared first on Kampuchea Thmey Daily.

កសិកររូបនេះ បានដាំបន្លែតាំងពីឆ្នាំ ២០១០ បច្ចុប្បន្ននេះលោកមានដាំដំណាំចម្រុះគ្នា ដូចជា សណ្តែកកួរ ឆៃថាវ សម្រាប់លក់ទៅទីផ្សារបានលុង ខេត្តរតនគិរីជារៀងរាល់ថ្ងៃ។ ផ្ទៃដីដែលលោកមានសម្រាប់ដាំដុះបន្លែឆៃថាវ សរុប ៣០ម៉ែត្រ×៤០ម៉ែត្រ ។ លោកថា ឆៃថាវ ជាប្រភេទដាំណាំដែលរើសរដូវ ដាំបានតែនៅរដូវប្រាំងប៉ុណ្ណោះ ចំណែកនៅរដូវវស្សា ដាំទៅច្រើនតែរលួយ ។ ថៃថាវដាំបានទទួលមើមល្អ ចាប់ពីចុងខែតុលា រហូតដល់ខែឧសភា ជាពេលវេលាល្អ បង្កបង្កើនផលប្រភេទ ដំណាំប្រភេទនេះ ។ ចំពោះការមើលថែវិញ នៅពេលឆៃថាវលូតលាស់ចេញជាស្លឹកហើយ ត្រូវពិនិត្យមើលសត្វមេអំបៅ ស្លាបវាពណ៌ ស និងសត្វដង្កូវនៅតាមស្លឹករបស់វា បើឃើញមានដង្កូវស៊ីស្លឹក ត្រូវបាញ់ថ្នាំ ទប់ស្កាត់កុំឲ្យកើតបន្តទៀត ។ ប្រសិនជាមើមឆៃថាវល្អ គេនឹងប្រមូលផលនៅពេលដាំបាន ១ខែ ៥ថ្ងៃ ប៉ុន្តែ បើមើមមិនសូវល្អ គេប្រមូលពេលដាំបានចាប់ពី ១ខែ ១០ថ្ងៃ។

ចំពោះរបៀបដាំសណ្តែកកួរវិញ គឺត្រូវសម្អាតដីឲ្យស្ងួតល្អ កាប់រណ្តៅដាក់ជីលាយជាមួយ ដាំរួចស្រោចទឹក ដោយជ្រើសរើស ប្រភេទគ្រាប់ពូជសញ្ញាព្រួញ ដែលទៅវិញពីផ្សារ ។ ការមើលថែមិនសូវខុសគ្នាពីការដាំឆៃថាវ ប៉ុន្មាននោះទេ ពិសេស គេត្រូវមើលថែទាំដង្ហូវ និងសត្វល្អិត ជារឿងដែលសំខាន់ និងត្រូវយកចិត្តទុកដាក់ ។ នៅពេលសណ្តែកកួរដុះលូតលាស់ចាប់ពី មួយចំអាម ត្រូវជ្រំជើងដាក់ជី រួចរៀបចំទ្រើងរបស់វា សម្រាប់ឲ្យដើមសណ្តែកតោងឡើង ។ ការរៀបចំដាក់ជី និងទ្រើងនេះដែរ អាស្រ័យទៅតាម ការលូតលាស់របស់ដើមសណ្តែក។ បន្ទាប់ពីគ្រប់ខែចេញផ្លែត្រូវប្រមូលផលអាចលក់ចេញក្នុង ១គីឡូ ២៥០០រៀល នៅខែនេះ បេះបានពី ៥ ទៅ ១០ គីឡូក្រាមប៉ុណ្ណោះ ។  ចាប់ពីដាំចាប់ពី១ ខែ ២០ ថ្ងៃ ទើបប្រមូលផលបាន ប្រើរយៈពេលយូរជាងឆៃថាវ ។ សណ្តែកកួរនេះដែរចាប់ពីមានផ្លែ ដែលអាចបេះបានទៅលក់ មានរយៈ២០ថ្ងៃចាប់ផ្តើមអស់ផ្លែ និងពុំសូវមានផ្លែ និងងាប់ដើមទៅវិញ ។ នេះបើតាម លោក ធី ជា។

ជាទូទៅ ដំណាំឆៃថាវ និងសណ្តែក ជាប្រភេទបន្លែដែលប្រជាកសិករដាំដុះច្រើន ពីព្រោះវាអំណោយផលដល់ដល់រដូវកាល ស្របជាគ្នាអាកាសធាតុ ព្រោះថា ខែវស្សាមានស្លឹកច្រើនជាងផ្លែ ចំណែកឆៃថាវវិញ នៅខែវស្សាពុំសូវទទួលបានមើមល្អនោះទេ ភាគច្រើនខែភ្លៀងជាំទឹក និងរលួយមើមមិនដូចខែប្រាំងមានមើមល្អ ។

ការដាំដំណាំទាំងពីរប្រភេទមុខនេះ អាស្រ័យទៅលើប្រភេទពូជ។ សម្រាប់លោក ធី ជា ជ្រើសរើស ស្លាក់សញ្ញាឃ្លោក ភាគច្រើនគ្រាប់ពូជឃ្លោកនេះ នៅបណ្តុះកូនទៅមានរយដុះច្រើន ។ លុះចាប់ផ្តើមប្រមូលផល លាងទឹកឲ្យស្អាតស្រកជាមួយថង់ប្លាស្ទិច ដោយថ្លឹងគីឡូ ក្នុង១គីឡូ ទទួលបានប្រាក់ ១២០០ រៀល តម្លៃនេះនៅមានឡើង បើឡើងថ្លៃវិញ បាន ១០០ រៀល នៅខែដែលសម្បូរ និងបើចុះថ្លៃចាប់ពី ៣០០ រៀល ទៅ ៥០០ រៀល ។ លោកបញ្ជាក់ប្រាប់ថា ការដាំបន្លែនេះថ្ងៃទី១ ទៅបោះលក់ឲ្យឈ្មួញ ១ គីឡូ បានតម្លៃ ១៥០០ រៀល ដល់ទៅថ្ងៃទី ២ បានតែ ១២០០ រៀល ប៉ុណ្ណោះ ។

ការធ្វើកសិកម្ម ដាំបន្លែនេះ លោកថា ទទួលបានប្រាក់កម្រៃច្រើនគួរសម ប៉ុន្តែ គិតលើការទូទាត់ទៅលើចំណាយ ទៅលើថ្នាំសម្លាប់ល្អិត ម្ហូបអាហារប្រចាំថ្ងៃ សម្រាប់តែ១រដូវកាល ទៅមួយរដូវកាលប៉ុណ្ណោះ៕

ដោយ៖ ខៀវ ចាប

The post កសិករម្នាក់នៅខេត្តរតនគិរី ដាំឆៃថាវ និងសណ្តែកកួរ បានតែរដូវប្រាំងដើម្បីផ្គត់ផ្គង់គ្រួសារ appeared first on Kampuchea Thmey Daily.

លោក ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ នៅរសៀលថ្ងៃទី១៩ ខែកុម្ភៈ ឆ្នាំ២០២៥ បានជួបពិភាក្សាការងារជាមួយលោក សុង ដុងអ៉ីល (Song Dong-il) ប្រធានសមាគមកសិ-ឧស្សាហកម្មសាធារណរដ្ឋកូរ៉េ (K-Agro) នៅទីស្តីការក្រសួងកសិកម្ម រុក្ខាប្រមាញ់ និងនេសាទ។

សមាគមកូរ៉េបានបញ្ជាក់ថា ខ្លួនបានប្រមូលផ្តុំដោយបណ្តុំក្រុមហ៊ុនជាច្រើនផ្នែកដូចជា ក្រុមហ៊ុនកែច្នៃ ចែកចាយ និងក្រុមហ៊ុនដឹកជញ្ជូន ដែលអាចចងជាសម្ព័ន្ធខ្សែច្រវាក់ផ្គត់ផ្គង់ផលិតផលកសិកម្មពីកម្ពុជាទៅទីផ្សារអន្តរជាតិ។

ទន្ទឹមនឹងនេះ សមាគមបានបង្ហាញពីបំណងក្នុងការដាំដុះសាកល្បងលើកសិផលមួយចំនួននៅកម្ពុជាដូចជាដំឡូងផ្អែម និងឆៃថាវ ដើម្បីពិនិត្យ និងសិក្សាពីលទ្ធភាពនៃការដាំដុះ ផលិតកម្ម តម្រូវការ និងតម្លៃសេដ្ឋកិច្ចនៃដំណាំនេះ។

លោក ប្រាក់ ដាវីដ រដ្ឋលេខាធិការបានស្វាគមន៍ចំពោះសមាគម និងក្រុមហ៊ុនដែលមានបំណងសហការចូលរួមវិនិយោគលើវិស័យកសិកម្ម ជាពិសេសលើការកែច្នៃកសិផលដែលមានស្រាប់នៅកម្ពុជា ដើម្បីរួមចំណែកលើកស្ទួយវិស័យនេះឱ្យកាន់តែមានការរីកចម្រើន ស្របពេលដែលកម្ពុជាមានកិច្ចព្រមព្រៀងពាណិជ្ជកម្មសេរីទ្វេភាគីជាមួយប្រទេសជាច្រើន ដែលនេះនឹងផ្តល់ឱកាសដល់វិនិយោគិនកូរ៉េក្នុងការនាំចេញផលិតផលកសិកម្មទៅកាន់ទីផ្សារអន្តរជាតិកាន់តែធំទូលាយ។

ចំពោះការដាំដុះសាកល្បងលើដំណាំខាងលើ លោករដ្ឋលេខាធិការបានណែនាំឱ្យសមាគម ព្រមទាំងក្រុមហ៊ុនកូរ៉េធ្វើការសិក្សាពីទីផ្សារ និងវិភាគតម្លៃសេដ្ឋកិច្ចនៃដំណាំនេះឱ្យច្បាស់លាស់ជាមុន ដើម្បីធានាថានឹងផ្តល់អត្ថប្រយោជន៍ជូនប្រជាកសិករ និងវិនិយោគិន៕

The post ក្រុមហ៊ុនកូរ៉េ មានបំណងសាកល្បងដាំដំឡូងផ្អែម និងឆៃថាវ នាំចេញទៅទីផ្សារកូរ៉េ និងអន្តរជាតិ appeared first on Kampuchea Thmey Daily.

ជាកសិករវ័យក្មេង លោក ប្រាយ រ៉ាវុធ ប្រាប់កម្ពុជាថ្មីថា ឆ្នាំ២០២៥នេះ មុខរបរដាំដំណាំវិលជុំ កំពុងទទួលបានផលល្អប្រសើរ និងមានទីផ្សារគួរសម ខណៈតម្លៃក៏អាចលក់ចេញបានសមរម្យ បើធៀបនឹងឆ្នាំទៅមុន។

លោកបានប្រាប់ឱ្យដឹងទៀតថា ឆ្នាំនេះការប្រមូលផលឆៃថាវ ទទួលបានផលជាង ១៥តោន ចំណែកតម្លៃវិញ ឆៃថាវ ១គីឡូ អាចលក់ទៅឱ្យឈ្មួញបានចន្លោះពី ៦០០រៀល ទៅ៧០០រៀល តម្លៃនេះ លោក ប្រាយ រ៉ាវុធ គិតថាអាចចំណេញបានខ្លះ ដោយគិតទៅលើថ្លៃដើមផលិត។

យោងតាមតារាងតម្លៃរបស់ធនាគារ ARDB ចេញផ្សាយនៅថ្ងៃទី ១៣ ខែកុម្ភ ឆ្នាំ ២០២៥ តម្លៃឆៃថាវបោះដុំក្នុងតម្លៃ ១ ៥០០ រៀល ក្នុងមួយគីឡូក្រាម និងលក់រាយតម្លៃ ៣០០០ រៀល ក្នុងមួយគីឡូក្រាម។

លោក ប្រាយ រ៉ាវុធ បានបញ្ជាក់ទៀតថា ចំពោះទីផ្សារវិញ ឆ្នាំនេះមិនពិបាកស្វែងរកទីផ្សារ ដូចឆ្នាំទៅមុននោះឡើយ នេះក៏ដោយសារតែមានឈ្មួញចាស់ៗ បានចុះមកទិញដល់ចម្ការផ្ទាល់តែម្ដង។

កសិកររូបនេះ បានបង្ហើបឱ្យដឹងទៀតថា បន្ទាប់ពីអស់ពីដំណាំឆៃថាវ លោកបានដាំត្រឡាច ក្នុងផ្ទៃដីជាង១ហិកតា ដោយរំពឹងថានឹងទទួលបានផលល្អ និងមានទីផ្សារខ្ពស់ ដូចដំណាំឆៃថាវ ផងដែរ។

លោក ប្រាយ រ៉ាវុធ បានឱ្យដឹងទៀតថា នៅរៀងរាល់ឆ្នាំ លោកតែងតែជ្រើសរើសការដាំដំណាំវិលជុំ ឬអាចហៅម្យ៉ាងទៀតថា ដំណាំចម្រុះ ក្នុងនោះមាន៖ ដំណាំឆៃថាវ ត្រឡាច តាសក់ និងដាំស្រូវ តាមរដូវកាល ដោយមិនទុកដីឱ្យនៅទំនេរចោលនោះឡើយ៕

អត្ថបទ ៖ សួស សិត

The post កសិករដាំឆៃថាវថា ទិន្នផល និងទីផ្សារមានភាពល្អប្រសើរនៅឆ្នាំនេះ appeared first on Kampuchea Thmey Daily.

លោក ប្រាយ រ៉ាវុធ កសិករដាំឆៃថាវ បន្ថែមទៀតថា សម្រាប់តម្លៃលក់ចេញ ​នៅឆ្នាំនេះ លោកអាចលក់ចេញទៅកាន់ទីផ្សារបានក្នុងតម្លៃ បោះដុំ ១គីឡូក្រាម ៦០០រៀល និងលក់រាយ ក្នុងតម្លៃ ៦០០រៀល ទៅ ៧០០រៀល ក្នុង ១គីឡូក្រាម ទៅតាមតម្លៃទីផ្សារបច្ចុប្បន្ន។

កសិកររូបនេះ បន្តទៀតថា សម្រាប់អតិថិជន ឬម៉ូយ ដែលមកទិញដល់ចំការ ភាគច្រើនគឺ អាជីវករ រស់នៅក្នុងមូលដ្ឋានជាមួយគ្នា ដែលពួកគាត់មកទទួលទិញយកទៅលក់បន្តនៅផ្សារក្បែរៗផ្ទះ និងខ្លះទៀតជាអ្នកដំណើរដែលមកដើរលេងកម្សន្ត ក៏បានជួយទិញឆៃថាវ ពីចំការរបស់លោកទៅផ្ញើបងប្អូន នៅរាជធានីភ្នំពេញ ផងដែរ។

លោក ប្រាយ រ៉ាវុធ ក៏បានបញ្ជាក់ទៀតថា បើធៀបទៅនឹងបណ្ដាឆ្នាំមុនៗ តម្លៃឆៃថាវ មានការថយចុះយ៉ាងខ្លាំង តែលោកនៅតែបន្តលក់ចេញដើម្បីបានថវិកាខ្លះមកវិញ ព្រោះការដាំឆៃថាវ នៅឆ្នាំនេះ ត្រូវចំណាយថ្លៃដើមទៅលើជី និងទឹកសម្រាប់ស្រោចស្រពដំណាំ ម្ល៉ោះហើយ ទើបលោកត្រូវប្រញាប់លក់ចេញ ម៉្យាងដោយសារតម្លៃទីផ្សារបច្ចុប្បន្ននេះមានការថយចុះដូចគ្នា មិនថាដំណាំ ឆៃថាវ ស្វាយ ត្រសក់ នោះទេ គឺអាចលក់ចេញបានត្រឹមតែ ក្នុងតម្លៃមួយដែលអាចទប់ទល់នឹងថ្លៃដើម តែប៉ុណ្ណោះ៕

អត្ថបទ ៖ សួស សិត

The post ជិត ១សប្ដាហ៍ លោក ប្រាយ រ៉ាវុធ លក់ឆៃថាវបានប្រមាណជាង ១៥តោន ក្រោយបារម្ភរឿងទីផ្សារកន្លងមក appeared first on Kampuchea Thmey Daily.