កសិករដាំឆៃថាវថា ទិន្នផល និងទីផ្សារមានភាពល្អប្រសើរនៅឆ្នាំនេះ

កសិករដាំឆៃថាវ លោក ប្រាយ រ៉ាវុធ អាយុ៣១ឆ្នាំ ស្ថិតនៅស្រុកបរសេដ្ឋ ខេត្តកំពង់ស្ពឺ បានឱ្យដឹងថានៅក្នុងឆ្នាំនេះ ការប្រមូលផលដំណាំឆៃថាវរបស់លោកទទួលបានផលជាង១៥តោន និងអាច​លក់ចេញយ៉ាងឆាប់រហ័សទៅកាន់ទីផ្សារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាកសិករវ័យក្មេង លោក ប្រាយ រ៉ាវុធ ប្រាប់កម្ពុជាថ្មីថា ឆ្នាំ២០២៥នេះ មុខរបរដាំដំណាំវិលជុំ កំពុងទទួលបានផលល្អប្រសើរ និងមានទីផ្សារគួរសម ខណៈតម្លៃក៏អាចលក់ចេញបានសមរម្យ បើធៀបនឹងឆ្នាំទៅមុន។

លោកបានប្រាប់ឱ្យដឹងទៀតថា ឆ្នាំនេះការប្រមូលផលឆៃថាវ ទទួលបានផលជាង ១៥តោន ចំណែកតម្លៃវិញ ឆៃថាវ ១គីឡូ អាចលក់ទៅឱ្យឈ្មួញបានចន្លោះពី ៦០០រៀល ទៅ៧០០រៀល តម្លៃនេះ លោក ប្រាយ រ៉ាវុធ គិតថាអាចចំណេញបានខ្លះ ដោយគិតទៅលើថ្លៃដើមផលិត។

យោងតាមតារាងតម្លៃរបស់ធនាគារ ARDB ចេញផ្សាយនៅថ្ងៃទី ១៣ ខែកុម្ភ ឆ្នាំ ២០២៥ តម្លៃឆៃថាវបោះដុំក្នុងតម្លៃ ១ ៥០០ រៀល ក្នុងមួយគីឡូក្រាម និងលក់រាយតម្លៃ ៣០០០ រៀល ក្នុងមួយគីឡូក្រាម។

លោក ប្រាយ រ៉ាវុធ បានបញ្ជាក់ទៀតថា ចំពោះទីផ្សារវិញ ឆ្នាំនេះមិនពិបាកស្វែងរកទីផ្សារ ដូចឆ្នាំទៅមុននោះឡើយ នេះក៏ដោយសារតែមានឈ្មួញចាស់ៗ បានចុះមកទិញដល់ចម្ការផ្ទាល់តែម្ដង។

កសិកររូបនេះ បានបង្ហើបឱ្យដឹងទៀតថា បន្ទាប់ពីអស់ពីដំណាំឆៃថាវ លោកបានដាំត្រឡាច ក្នុងផ្ទៃដីជាង១ហិកតា ដោយរំពឹងថានឹងទទួលបានផលល្អ និងមានទីផ្សារខ្ពស់ ដូចដំណាំឆៃថាវ ផងដែរ។

លោក ប្រាយ រ៉ាវុធ បានឱ្យដឹងទៀតថា នៅរៀងរាល់ឆ្នាំ លោកតែងតែជ្រើសរើសការដាំដំណាំវិលជុំ ឬអាចហៅម្យ៉ាងទៀតថា ដំណាំចម្រុះ ក្នុងនោះមាន៖ ដំណាំឆៃថាវ ត្រឡាច តាសក់ និងដាំស្រូវ តាមរដូវកាល ដោយមិនទុកដីឱ្យនៅទំនេរចោលនោះឡើយ៕

អត្ថបទ ៖ សួស សិត