ជម្រើសជាតិនារី Archives - Kampuchea Thmey Daily

ក្រុមបាល់ទាត់នារីព្រះខ័នរាជស្វាយរៀង នឹងបង្ហាញខ្លួនក្នុងការប្រកួតកីឡាជាតិលើកទី ៣ ឆ្នាំ ២០២២

Sorn Phanith — Thu, 25 Aug 2022 06:48:41 +0000

ក្លិបបាល់ទាត់សមាគមមន្ទីរអប់រំ យុវជន និងកីឡា ចំនួន ១១ រាជធានីខេត្ត ស្មើ ២២ ក្រុម នឹងត្រៀមចូលរួមការប្រកួតកីឡាជាតិលើកទី ៣ ឆ្នាំ ២០២២ ដែលគ្រោងធ្វើនៅខែវិច្ឆិកា ខាងមុខនេះ។

ការប្រកួតកីឡាជាតិ ដែលខកខានរៀបចំ ១ លើករួចមកហើយកាលពីឆ្នាំ ២០២០ នឹងត្រូវរៀបចំឱ្យមានការប្រកួតឡើងវិញ នៅឆ្នាំ ២០២២ នេះដើម្បីត្រៀមមុនការប្រកួតស៊ីហ្គេម ២០២៣ មកដល់ ដោយទទួលបានការអនុញ្ញាតដ៏ខ្ពង់ខ្ពស់ពីសម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានសម្រេចជាគោលការណ៍ឲ្យក្រសួងអប់រំ យុវជន និងកីឡា រៀបចំការប្រកួតកីឡាជាតិ លើកទី ៣ ឆ្នាំ ២០២២ នៅពហុកីឡដ្ឋានជាតិមរតកតេជោ ចាប់ពីថ្ងៃទី ១៧-២៨ ខែវិច្ឆិកា ឆ្នាំ ២០២២ ខាងមុខ ដោយមានកីឡា ៣៩ ប្រភេទដាក់ឱ្យប្រកួត។

ចំពោះប្រភេទកីឡាដែលមានប្រជាប្រិយភាព (បាល់ទាត់) ត្រូវបានដឹងថាមានក្រុមសរុបចំនួន ២២ ក្រុម ក្នុងនោះនារី ១១ ក្រុម និងបុរស ១១ ក្រុម។

ក្រុមបុរសទាំង ១១ ក្រុមរួមមាន កំពតអេហ្វស៊ី, កែប, រាជធានីភ្នំពេញ (ភ្នំពេញហ្គាឡាក់ស៊ី), ខេត្តស្វាយរៀង, កំពង់ឆ្នាំង (ឬទ្ធីសែន), ខេត្តឧត្តរមានជ័យ, ខេត្តកំពង់ធំ (ក្លិបបាល់ទាត់សន្តិភាពខេត្តកំពង់ធំ), ខេត្តរតនៈគីរី (អធិរាជដំរីឦសាន), ក្រសួងសេដ្ឋកិច្ច, ក្រសួងមហាផ្ទៃ និងក្រសួងការពារជាតិ។ ដោយឡែកក្រុមនារី ទាំង ១១ ក្រុមរួមមាន ខេត្តសៀមរាប (ក្លិបបាល់ទាត់សៀមរាប), ខេត្តបាត់ដំបង, ខេត្តស្វាយរៀង (ព្រះខ័នរាជស្វាយរៀង), ខេត្តកំពង់ឆ្នាំង, ខេត្តកំពង់ស្ពឺ (ណាហ្គាវើលដ៍កំពង់ស្ពឺ), ខេត្តកណ្ដាល, ខេត្តកំពង់ចាម (បឹងកេតអេហ្វស៊ី), ខេត្តកំពង់ធំ, ខេត្តព្រៃវែង (ក្លិបវិសាខា), ខេត្តក្រចេះ និងខេត្តប៉ៃលិន។

តាមគម្រោងដើមឡើយ ការប្រកួតកីឡាជាតិ លើកទី ៣ នឹងរៀបចំការប្រកួតនៅទីលាន ៦ រាជធានី-ខេត្ត ពិសេសទីតាំងពហុកីឡដ្ឋានជាតិមរតកតេជោ ដែលជាកន្លែងប្រារព្ធពិធីបើក-បិទ ព្រឹត្តិការណ៍ស៊ីហ្គេម ឆ្នាំ២០២៣ ហើយមានប្រតិភូ គ្រូបង្វឹក កីឡាករ-កីឡាការិនី និងគណៈកម្មការចូលរួមប្រមាណ ៧,០០០ នាក់។ ចំពោះប្រភេទកីឡា ដែលគ្រោងរៀបចំក្នុងព្រឹត្តិការណ៍ដ៏មានសារសំខាន់នេះ គឺមាន ៣៩ ប្រភេទកីឡា និងកីឡាប៉ារ៉ាឡាំពិក ៧ ប្រភេទកីឡា។

ព្រឹត្តិការណ៍កីឡាជាតិ បានខកខានរៀបចំម្ដងរួចមកហើយ កាលពីឆ្នាំ ២០២០ ក្រោយផ្ទុះជំងឺរាតត្បាលជាសកលកូវីដ-១៩ បន្ទាប់ពីធ្លាប់រៀបចំដោយជោគជ័យចំនួន ២ លើក កាលពីឆ្នាំ ២០១៦ និងឆ្នាំ ២០១៨។ ដោយមើលឃើញ ពីស្ថានភាពកូវីដ-១៩ នៅកម្ពុជាធូរស្រាល ក្រសួងអប់រំ យុវជន និងកីឡា ក៏បានប្រកាសរៀបចំព្រឹត្តិការណ៍ ២ ឆ្នាំម្ដងនេះឡើងវិញ តាមទម្រង់ស៊ីហ្គេម ដើម្បីជាបទពិសោធក្នុងការត្រៀមខ្លួនធ្វើម្ចាស់ផ្ទះ ព្រឹត្តិការណ៍ជាប្រវត្តិសាស្ដ្រ នាឆ្នាំ ២០២៣។

អត្ថបទ៖ មន្នីរ័ត្ន

The post ក្រុមបាល់ទាត់នារីព្រះខ័នរាជស្វាយរៀង នឹងបង្ហាញខ្លួនក្នុងការប្រកួតកីឡាជាតិលើកទី ៣ ឆ្នាំ ២០២២ appeared first on Kampuchea Thmey Daily.

ជម្រើសជាតិនារីកម្ពុជា អាចចេញទៅហ្វឹកហាត់នៅចិនរយៈពេលយូរ ដើម្បីត្រៀមស៊ីហ្គេម ២០២៣

Sorn Phanith — Mon, 15 Aug 2022 01:50:37 +0000

មានការលេចឮដំណឹងថ្មីៗនេះមកថា ក្រុមបាល់ទាត់ជម្រើសជាតិនារីកម្ពុជា គ្រោងចេញទៅហ្វឹកហាត់រយៈពេលយូរនៅប្រទេសចិន ដើម្បីត្រៀមខ្លួនសម្រាប់ព្រឹត្តិការណ៍ស៊ីហ្គេម ឆ្នាំ ២០២៣ ដែលកម្ពុជាធ្វើជាម្ចាស់ផ្ទះ។

ដំណឹងនេះក៏បានបញ្ជាក់ទៀតផងដែរថា គឺគ្រោងនឹងចាកចេញទៅប្រទេសចិននៅអំឡុងខែសីហា ឆ្នាំ ២០២២ នេះផ្ទាល់តែម្ដង ហើយនឹងប្រើរយៈពេលហ្វឹកហាត់នៅទីនោះ ៣ ខែ ឬលើសនេះ ដោយមានកីឡាការិនី គ្រូបង្វឹក និងក្រុមការងារជាច្រើននាក់។ ក្រៅពីនេះក៏មានដំណឹងថា លើសពីការហ្វឹកហាត់ ក៏មានការប្រកួតមិត្តភាពដកស្រង់បច្ចេកទេសផងដែរ។

នេះជាការចេញទៅហ្វឹកហាត់នៅក្រៅប្រទេសលើកដំបូង សម្រាប់ជម្រើសជាតិនារីកម្ពុជា ចាប់តាំងពី ត្រូវបានបង្កើតឱ្យមានឡើងក្នុងឆ្នាំ ២០១៨។

សូមបញ្ជាក់ថា ប្រភេទកីឡាបាល់ទាត់ វិញ្ញាសានារី ក៏នឹងមាននៅក្នុងស៊ីហ្គេម លើកទី ៣២ ឆ្នាំ ២០២៣ ដែលកម្ពុជា ធ្វើជាម្ចាស់ផ្ទះផងដែរ ខណៈនារីកម្ពុជា ក៏ទើបតែបានចូលរួមលើកដំបូងក្នុងស៊ីហ្គេម លើកទី ៣១ ឆ្នាំ ២០២១ (លើកមកឆ្នាំ ២០២២) នៅប្រទេសវៀតណាម ថ្មីៗនេះផងដែរ បើទោះបីជាពុំទាន់ទទួលបានលទ្ធផលល្អក៏ដោយ៕

អត្ថបទ៖ មន្នីរ័ត្ន

The post ជម្រើសជាតិនារីកម្ពុជា អាចចេញទៅហ្វឹកហាត់នៅចិនរយៈពេលយូរ ដើម្បីត្រៀមស៊ីហ្គេម ២០២៣ appeared first on Kampuchea Thmey Daily.

ជោគវាសនា U-18 នារីកម្ពុជា នឹងសម្រេចនៅល្ងាចនេះ ពេលជួបវៀតណាម

Sorn Phanith — Thu, 28 Jul 2022 03:59:31 +0000

ពានរង្វាន់បាល់ទាត់នារីអាស៊ានអាយុក្រោម ១៨ ឆ្នាំ (AFF Under-18 Women’s Championship 2022) នឹងបន្តការប្រកួតទី ៣ ប្រចាំពូល A ដោយថ្ងៃនេះ កម្ពុជា នឹងត្រូវជួបក្រុមខ្លាំងវៀតណាម។

ការប្រកួតរវាង U-18 នារីកម្ពុជា ជាមួយ U-18 នារីវៀតណាម នឹងធ្វើឡើងនៅវេលាម៉ោង ៣:៣០ នាទីរសៀល នាកីឡដ្ឋាន GELORA SRIWIJAYA ខេត្តប៉ាឡាំបាង ប្រទេសឥណ្ឌូណេស៊ី ខណៈប្រកួតនេះត្រូវបានចាត់ទុកថាជាប្រកួតកំណត់ជោគវាសនារបស់កម្ពុជា បានសេចក្ដីថា បើសិនជាឈ្នះនឹងបន្តមានឱកាសប្រជែងកៅអីទៅជុំបន្ទាប់ ប៉ុន្តែបើស្មើ ឬចាញ់ នោះនឹងអស់ឱកាសត្រឹមថ្ងៃនេះ ដ្បិតពិន្ទុក្រុមលេខ ២ បានដាច់ដល់ទៅ ៦ ពិន្ទុ។

មុនការប្រកួតមកដល់ U-18 នារីវៀតណាម បានយកឈ្នះ U-18 នារីសិង្ហបុរី ០-៩ និងប្រកួតទី ២ ឈ្នះម្ចាស់ផ្ទះឥណ្ឌូនេស៊ី ២-១ ខណៈ U-18 នារីកម្ពុជា បានចាញ់ U-18 នារីថៃ ៤-០ និងចាញ់ម្ចាស់ផ្ទះឥណ្ឌូណេស៊ី ១-០។ បច្ចុប្បន្នវៀតណាម ឈរកំពូលតារាង មាន ៦ ពិន្ទុពេញ ដោយឡែកកម្ពុជា ឈរនៅលេខ ៤ មាន ០ ពិន្ទុ។

បញ្ជាក់ថា U-18 នារីកម្ពុជា ស្ថិតនៅពូល A ជាមួយក្រុមខ្លាំងៗម្ចាស់ផ្ទះឥណ្ឌូណេស៊ី, វៀតណាម, ថៃ និងសិង្ហបុរី។ លទ្ធផលថ្ងៃនេះអាចនឹងសម្រេចជោគវាសនារបស់កម្ពុជា ក្នុងការឡើវគ្គបន្តផងដែរ៕

អត្ថបទ៖ មន្នីរ័ត្ន

The post ជោគវាសនា U-18 នារីកម្ពុជា នឹងសម្រេចនៅល្ងាចនេះ ពេលជួបវៀតណាម appeared first on Kampuchea Thmey Daily.

គ្រូ U-18 នារីកម្ពុជា សរសើរកូនក្រុមធ្វើបានល្អ ទោះចាញ់ម្ចាស់ផ្ទះឥណ្ឌូណេស៊ី ចុងម៉ោង

Sorn Phanith — Mon, 25 Jul 2022 04:21:38 +0000

ក្រុមបាល់ទាត់ជម្រើសជាតិនារី បានរងបរាជ័យប្រកួតទី ២ ពានរង្វាន់ជើងឯកនារីអាស៊ានអាយុក្រោម ១៨ ឆ្នាំ (AFF U-18 Women’s Championship 2022) ក្រោមថ្វីជើងម្ចាស់ផ្ទះឥណ្ឌូណេស៊ី យ៉ាងតានតឹងដោយលទ្ធផល ១-០ នាយប់ថ្ងៃទី ២៤ ខែកក្កដា។

ការប្រកួតដែលស្ទើរតែបញ្ចប់ការប្រកួតជាមួយលទ្ធផលស្មើទៅហើយ ប៉ុន្តែក្រុមម្ចាស់ផ្ទះបានទាត់ចូលគ្រាប់ជ័យជម្នះនៅនាទី ៩០+៣ ដោយកីឡាការិនី Sheva Imut តាមរយៈបាល់ហ្រីឃីគពីចម្ងាយ។

បើទោះបីជារងបរាជ័យក៏ពិតមែន ប៉ុន្តែគ្រូបង្វឹក U-18 នារីកម្ពុជា លោក ទុំ សារ៉ាយ បានសរសើរដល់កូនក្រុមថា ធ្វើបានល្អ គ្រាដែលគ្រូ U-18 នារីឥណ្ឌូណេស៊ី ក៏បាននិយាយពីប្រព័ន្ធការពារដ៏ល្អរបស់កម្ពុជាផងដែរ។

ក្រោយចប់ការប្រកួត លោក ទុំ សារ៉ាយ បាននិយាយថា៖ «ទោះបីជាចាញ់ក៏ដោយ ខ្ញុំគិតថាពួកយើងពិតជាធ្វើបានល្អ។ យើងមានបញ្ហាខ្លះនៅចុងបញ្ចប់ ដូច្នេះវាជារឿងអកុសលបន្តិចក្នុងការចាញ់នៅពេលដែលកីឡាករបានព្យាយាមយ៉ាងខ្លាំង»។

ដោយឡែកគ្រូ U-18 នារីឥណ្ឌូណេស៊ី វិញលោក Rudy Eka Priyambada បានបញ្ជាក់ថា៖ «គ្រាប់ចុងក្រោយបានបំបែកភាពជាប់គាំងរបស់យើង។ វាជាការប្រកួតដ៏ស្វិតស្វាញមួយដែលយើងព្យាយាមគ្រប់ជម្រើសដែលមានទល់ជាមួយនឹងកម្ពុជា ដែលការពារបានជ្រៅ ល្អ និងរឹង។ មានផ្នែកមួយចំនួនដែលយើងត្រូវធ្វើការជាពិសេសលើការរក្សាការគ្រប់គ្រងបាល់។»

គួរបញ្ជាក់ថា លទ្ធផលចាញ់នេះធ្វើឱ្យនារីកម្ពុជា ឈរនៅលេខ ៤ ជាបណ្ដោះអាសន្ន ជាមួយនឹងការនៅពីលើ U-18 នារីសិង្ហបុរី ដោយកម្ពុជា ត្រូវបានគេទាត់ចូលច្រើនជាង ២ ប្រកួតកម្ពុជា របូត៥គ្រាប់ ខណៈ សិង្ហបុរី ២ ប្រកួតរបូត ១០ គ្រាប់។ ដោយឡែកប្រកួតបន្ទាប់របស់ U-18 នារីកម្ពុជា ត្រូវជួបក្រុម U-18 នារីវៀតណាម នៅថ្ងៃទី ២៨ ខែកក្កដា ខាងមុខ ដែលអាចជាការប្រកួតកំណត់ជោគវាសនាចុងក្រោយរបស់កម្ពុជា៕

អត្ថបទ៖ មន្នីរ័ត្ន

The post គ្រូ U-18 នារីកម្ពុជា សរសើរកូនក្រុមធ្វើបានល្អ ទោះចាញ់ម្ចាស់ផ្ទះឥណ្ឌូណេស៊ី ចុងម៉ោង appeared first on Kampuchea Thmey Daily.

៤ ឆ្នាំមុន ជម្រើសជាតិនារីកម្ពុជា ឈ្នះ ទីម័រខាងកើត ១២-០ ខណៈល្ងាចនេះត្រូវតតាំងគ្នាម្ដងទៀត

Sorn Phanith — Wed, 13 Jul 2022 06:35:05 +0000

ក្រុមបាល់ទាត់នារីជម្រើសជាតិកម្ពុជា នឹងបន្តការប្រកួតចុងក្រោយរបស់ខ្លួន ក្នុងការប្រកួតពានរង្វាន់ AFF WOMEN’S CHAMPIONSHIP 2022 វេលាម៉ោង ៦ ល្ងាច ថ្ងៃទី ១៣ ខែកក្កដានេះ នៅកីឡដ្ឋាន IMUS GRANDSTAND ក្នុងប្រទេសហ្វីលីពីន។

ក្រុមទាំងពីរបានអស់ឱកាសដូចគ្នាក្នុងការឡើងទៅវគ្គបន្ត ប៉ុន្តែនេះជាការប្រកួតដើម្បីដណ្ដើមពិន្ទុឈរលេខ ៣ ក្នុងពូល។ ខណៈបើនិយាយពីប្រវត្តិជួបគ្នាវិញ កម្ពុជា ធ្លាប់ជួប ទីម័រខាងកើត ម្ដងកាលពីឆ្នាំ ២០១៨ ជាលទ្ធផលកម្ពុជា បានយកឈ្នះ ទីម័រខាងកើត ១២-០។

ជុំវិញបទពិសោធន៍ក្នុងពានរង្វាន់នេះវិញ ទីម័រខាងកើត ហាក់មានបទពិសោធន៍ច្រើនជាងកម្ពុជាបន្តិច ដោយបានចូលរួមតាំងពីឆ្នាំ ២០១៦ រីឯកម្ពុជា ទើបតែចូលរួមនៅឆ្នាំ២០១៨។ ស្ថានភាពបច្ចុប្បន្នវិញ ទីម័រខាងកើត ប្រកួតបាន ៣ ប្រកួត ហើយបានរងបរាជ័យទាំង ៣ ប្រកួតរួមមានចាញ់មីយ៉ាន់ម៉ា ៧-០, ចាញ់ឡាវ ២-០ និងចាញ់វៀតណាម ០-៦ ខណៈកម្ពុជាវិញ ប្រកួតបាន ៣ ប្រកួតស្មើជាមួយឡាវ ១-១, ចាញ់វៀតណាម ៣-០ និងចាញ់មីយ៉ាន់ម៉ា ៣-០៕

អត្ថបទ៖ មន្នីរ័ត្ន

The post ៤ ឆ្នាំមុន ជម្រើសជាតិនារីកម្ពុជា ឈ្នះ ទីម័រខាងកើត ១២-០ ខណៈល្ងាចនេះត្រូវតតាំងគ្នាម្ដងទៀត appeared first on Kampuchea Thmey Daily.

ជម្រើសជាតិនារីកម្ពុជា ជួបក្រុមខ្លាំងមីយ៉ាន់ម៉ា ដែលឡើងវគ្គពាក់កណ្ដាលផ្ដាច់ព្រ័ត្ររៀងរាល់ឆ្នាំ

Sorn Phanith — Sat, 09 Jul 2022 04:12:55 +0000

ក្រុមបាល់ទាត់នារីជម្រើសជាតិកម្ពុជា នឹងត្រូវបន្តធ្វើការងារដ៏ធ្ងន់មួយទៀត ពោលគឺត្រូវជួបប្រកួតជាមួយក្រុមជម្រើសជាតិនារីខ្លាំងគឺ មីយ៉ាន់ម៉ា ក្នុងពានរង្វាន់ AFF WOMEN’S CHAMPIONSHIP 2022 វេលាម៉ោង៣រសៀល ថ្ងៃទី ០៩ ខែកក្កដានេះ នៅកីឡដ្ឋាន BINAN ក្នុងប្រទេសហ្វីលីពីន។

វានឹងក្លាយជាការប្រកួតដ៏លំបាកដទៃទៀត សម្រាប់ក្រុមនារីកម្ពុជាល្ងាចនេះ ពីព្រោះក្រុមបាល់ទាត់នារីជម្រើសជាតិមីយ៉ាន់ម៉ា ត្រូវបានចាត់ទុកថាជាក្រុមខ្លាំងលំដាប់ទី ៣ ក្នុងតំបន់អាស៊ានបន្ទាប់ពីវៀតណាម និងថៃ។

ចាត់ទុកជាក្រុមខ្លាំងបែបនេះ គឺបន្ទាប់ពីគេធ្លាប់ឈ្នះជើងឯកនារីអាស៊ាន ២ លើក (២០០៤ និង២០០៧) រងជើងឯក ៣ លើក (២០១១, ២០១២ និង២០១៥) ហើយក្រៅពីនេះគេបានលេខ ៣ ចំនួន ២ លើក (២០១៦ និង២០១៩) និងលេខ ៤ ចំនួន ៤ លើក (២០០៦, ២០០៨, ២០១៣ និង២០១៨)។ អាចនិយាយបានដោយខ្លីថា ក្រុមបាល់ទាត់ជម្រើសជាតិនារីមីយ៉ាន់ម៉ា គឺបានឡើងទៅវគ្គពាក់កណ្ដាលផ្ដាច់ព្រ័ត្រ រៀងរាល់ឆ្នាំ រាប់ចាប់តាំងពីពានបង្កើតឡើងលើកដំបូងនៅឆ្នាំ ២០០៤។

ប្រវត្តិជួបគ្នាវិញ កម្ពុជា ធ្លាប់ជួប មីយ៉ាន់ម៉ា ម្ដងកាលពីឆ្នាំ ២០១៨ ជាលទ្ធផលមីយ៉ាន់ម៉ា បានយកឈ្នះ កម្ពុជា ១០-១។ ស្ថានភាពបច្ចុប្បន្នវិញ មីយ៉ាន់ម៉ា ទើបតែប្រកួតបាន ១ ប្រកួត ហើយបានយកឈ្នះទីម័រខាងកើត ៧-០ ខណៈកម្ពុជាវិញ ប្រកួតបាន ២ ប្រកួតស្មើជាមួយឡាវ ១-១ និងចាញ់វៀតណាម ៣-០៕

អត្ថបទ៖ មន្នីរ័ត្ន

The post ជម្រើសជាតិនារីកម្ពុជា ជួបក្រុមខ្លាំងមីយ៉ាន់ម៉ា ដែលឡើងវគ្គពាក់កណ្ដាលផ្ដាច់ព្រ័ត្ររៀងរាល់ឆ្នាំ appeared first on Kampuchea Thmey Daily.

នារីកម្ពុជា តាមស្មើឡាវចុងម៉ោង ដើម្បីឈរលេខ ២ ក្នុងពូល B ពានបាល់ទាត់នារីអាស៊ាន

Sorn Phanith — Wed, 06 Jul 2022 00:27:07 +0000

ក្រុមបាល់ទាត់ជម្រើសជាតិកម្ពុជា បានប្រកួតស្មើជាមួយ ក្រុមជម្រើសជាតិនារីឡាវ ក្នុងជំនួបបើកពូល B ពានរង្វាន់ជើងឯកនារីអាស៊ាន (AFF Women’s Championship 2022) លទ្ធផល ១-១ នាយប់ថ្ងៃទី ០៥ ខែកក្កដា។

ក្នុងការប្រកួតកម្ពុជា ធ្វើបានយ៉ាងល្អជាមួយនឹងឱកាសទាត់ ២ ដងនៅដើមវគ្គទី ១ ប៉ុន្តែត្រូវបានរារាំងដោយអ្នកចាំទី។ យ៉ាងណាមិញចូលដល់នាទី ២១ ឡាវ បានកីឡាការិនី Phimpha Thongsavang ក្រោយមកកម្ពុជា បានព្យាយាមរកគ្រាប់បាល់តាមស្មើ ប៉ុន្តែធ្វើមិនបានសម្រេចដោយសារអ្នកចាំទីឡាវ ធ្វើបានយ៉ាងល្អជាមួយនឹងការសង្គ្រោះបាល់ជាច្រើន ហើយក៏បានរក្សាលទ្ធផល ១-០ ដល់ចប់វគ្គទី ១។

ចូលដល់វគ្គទី ២ កម្ពុជាព្យាយាមរកក្រាប់បាល់តាមស្មើមកវិញ ប៉ុន្តែខកខានជាច្រើនលើកច្រើនសារប៉ុន្តែនៅតែមិនបានសម្រេច និងអូសបន្លាយដល់នាទី ៩០ ទើបអាចរកគ្រាប់បាល់បានដោយបាល់ពិន័យ ១១ ម៉ែត្រ ធ្វើបានសម្រេចដោយកីឡាការិនី ពឿន គន្ធា រហូតដល់លទ្ធផលបញ្ចប់ចុងក្រោយ កម្ពុជា ស្មើជាមួយ ឡាវ ១-១។

ដូច្នេះលទ្ធផលស្មើនេះ ធ្វើឱ្យនារីកម្ពុជា ឈរនៅលេខ ២ បណ្ដោះអាសន្ន បន្ទាប់ពីមួយគូទៀត មីយ៉ាន់ម៉ា បានយកឈ្នះ ទីម័រខាងកើត ដល់ទៅ ៧-០។ កម្ពុជា ឈរនៅលើ ឡាវ ដោយសារមានកាតលឿង តិចជាងឡាវ។ ដោយឡែកប្រកួតបន្ទាប់របស់ កម្ពុជា ត្រូវជួប ក្រុមខ្លាំង វៀតណាម នៅថ្ងៃទី ០៧ ខែកក្កដា ខាងមុខ៕

អត្ថបទ៖ មន្នីរ័ត្ន

The post នារីកម្ពុជា តាមស្មើឡាវចុងម៉ោង ដើម្បីឈរលេខ ២ ក្នុងពូល B ពានបាល់ទាត់នារីអាស៊ាន appeared first on Kampuchea Thmey Daily.

គ្រូបង្វឹកជម្រើសជាតិនារីកម្ពុជា ជុំវិញការជ្រើសរើសកីឡាការិនី ២០ នាក់ ចុងក្រោយទៅស៊ីហ្គេម

Sorn Phanith — Sat, 30 Apr 2022 09:15:04 +0000

នៅព្រឹកថ្ងៃទី ៣០ ខែមេសា ឆ្នាំ ២០២២ សហព័ន្ធកីឡាបាល់ទាត់កម្ពុជា បានប្រកាសបញ្ជីឈ្មោះផ្លូវការ កីឡាការិនីជម្រើសជាតិកម្ពុជា ២០ នាក់ ដើម្បីត្រៀមការប្រកួតកីឡាបាល់ទាត់ នៃព្រឹត្តិការណ៍កីឡាអាស៊ីអាគ្នេយ៍ លើកទី ៣១ ឆ្នាំ ២០២២ នៅប្រទេសវៀតណាម។

កីឡាការិនីទាំង ២០ នាក់ ត្រូវបានជ្រើសរើសចេញពីកីឡាការិនី ៣៥ នាក់ ក្រោមការតាមដាន និងសង្កេតយ៉ាងយកចិត្តទុកដាក់ពីសំណាក់ លោក ប្រាក់ វុទ្ធី ដែលជាគ្រូបង្វឹកនៃក្រុមជម្រើសជាតិនារីកម្ពុជា ខណៈលោកបានបង្ហើបឱ្យដឹងពីចំណុចដែលត្រូវបានជ្រើសរើសគឺផ្ដោតទៅលើកត្តាសំខាន់ៗចំនួន ៣។

លោក ប្រាក់ វុទ្ធី បានលើកឡើងជាដំបូងយ៉ាងដូច្នេះថា៖ «ក្នុងការត្រៀមលក្ខណៈរបស់យើង គឺយើងត្រៀមរយៈពេល ១៦ ថ្ងៃ ពីថ្ងៃទី ២០ រហូតដល់ថ្ងៃទី ០៦ ហើយថ្ងៃទី ៧ យើងនឹងធ្វើដំណើរទៅកាន់ប្រទេសវៀតណាម។ ការហ្វឹកហាត់រយៈពេល ១៧ ថ្ងៃនេះ គឺអ្វីដែលយើងផ្ដោតសំខាន់ទៅលើស្មារតីក្រុមរបស់យើង ព្រោះយើងដឹងហើយថាកីឡាការិនីរបស់យើងគឺជាលើកដំបូងត្រូវចូលរួមប្រកួតស៊ីហ្គេម។»

«ការប្រកួតនេះមានសារៈសំខាន់សម្រាប់ក្រុមបាល់ទាត់នារីរបស់យើង ដែលយើងអាចគិតថាជាម៉ែត្រវាស់អំពីកម្រិតសមត្ថភាព គុណភាព របស់កីឡាការិនីរបស់យើង ដែលយើងនឹងត្រូវត្រៀមធ្វើជាម្ចាស់ផ្ទះការប្រកួតស៊ីហ្គេម ឆ្នាំ ២០២៣ ផងដែរ ជាម៉ែត្រវាស់ដ៏សំខាន់ ហើយពង្រឹងកាយសម្បទា និងសមត្ថភាពរយៈពេល ១៦ ថ្ងៃនេះ ដើម្បីត្រៀមជាមួយនឹងការប្រកួតស៊ីហ្គេមនេះឯង។» លោក ប្រាក់ វុទ្ធី បានបន្ថែម។

អតីតគ្រូបង្វឹករបស់ក្លិបបឹងកេត និងអគ្គិសនីកម្ពុជា បានបន្តទៀតថា៖ «សម្រាប់ ២០ រូបដែលត្រៀមទៅវៀតណាម គឺយើងមានឆ្លងកាត់ការបណ្ដុះបណ្ដាលជារៀងរាល់ថ្ងៃ ពិនិត្យមើលសកម្មភាពហ្វឹកហាត់ តើកម្រិតរបស់គាត់អាចធ្វើអ្វីបានទៅតាមដែរយើងចង់បាន ទី ២ តាមរយៈនៃការប្រកួតសាកល្បង ក្នុងនោះយើងវាយតម្លៃទៅលើគុណផលម្នាក់ៗក្នុងរយៈពេល ១៦ ថ្ងៃហ្នឹង ពិនិត្យទៅលើស្មារតីរបស់គាត់ តើគាត់ប្រឹងប្រែងបានកម្រិតណា ហើយគាត់ព្យាយាមធ្វើទៅតាមអ្វីដែលយើងចង់បានដល់កម្រិតណា។»

ក្រុមបាល់ទាត់នារីជម្រើសជាតិកម្ពុជា ត្រូវបានចាប់ឆ្នោតស្ថិតទៅពូល A សម្រាប់ប្រភេទកីឡាបាល់ទាត់លើវិញ្ញាសាបាល់ទាត់នារី ក្នុងព្រឹត្តិការណ៍កីឡាអាស៊ីអាគ្នេយ៍ លើកទី៣១ នៅប្រទេសវៀតណាម ដោយរួមពូលជាមួយក្រុមខ្លាំងកម្រិតពិពភលោក វៀតណាម និងហ្វីលីពីន ដែលទាំងពីរក្រុមនេះ នឹងត្រៀមចូលរួមការប្រកួតបាល់ទាត់ពិភពលោកនារី (FIFA Women’s World Cup) នៅឆ្នាំ២០២៣ ខាងមុខ។

ចំពោះការប្រកួតវិញ កម្ពុជា នឹងបើកឆាកគឺនៅថ្ងៃទី ០៩ ខែឧសភា ដោយត្រូវជួបហ្វីលីពីន បន្ទាប់មកប្រកួតចុងក្រោយជួបម្ចាស់ផ្ទះវៀតណាម នៅថ្ងៃទី ១៤ ខែឧសភា ឆ្នាំ ២០២២៕

អត្ថបទ៖ មន្នីរ័ត្ន

The post គ្រូបង្វឹកជម្រើសជាតិនារីកម្ពុជា ជុំវិញការជ្រើសរើសកីឡាការិនី ២០ នាក់ ចុងក្រោយទៅស៊ីហ្គេម appeared first on Kampuchea Thmey Daily.