កីឡា

ជោគវាសនា U-18 នារីកម្ពុជា នឹងសម្រេចនៅល្ងាចនេះ ពេលជួបវៀតណាម

បានផុស

៤ years មុន

នៅ

ថ្ងៃព្រហស្បតិ៍ ២៨ កក្កដា ២០២២

ដោយ

ពានរង្វាន់បាល់ទាត់នារីអាស៊ានអាយុក្រោម ១៨ ឆ្នាំ (AFF Under-18 Women’s Championship 2022) នឹងបន្តការប្រកួតទី ៣ ប្រចាំពូល A ដោយថ្ងៃនេះ កម្ពុជា នឹងត្រូវជួបក្រុមខ្លាំងវៀតណាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតរវាង U-18 នារីកម្ពុជា ជាមួយ U-18 នារីវៀតណាម នឹងធ្វើឡើងនៅវេលាម៉ោង ៣:៣០ នាទីរសៀល នាកីឡដ្ឋាន GELORA SRIWIJAYA ខេត្តប៉ាឡាំបាង ប្រទេសឥណ្ឌូណេស៊ី ខណៈប្រកួតនេះត្រូវបានចាត់ទុកថាជាប្រកួតកំណត់ជោគវាសនារបស់កម្ពុជា បានសេចក្ដីថា បើសិនជាឈ្នះនឹងបន្តមានឱកាសប្រជែងកៅអីទៅជុំបន្ទាប់ ប៉ុន្តែបើស្មើ ឬចាញ់ នោះនឹងអស់ឱកាសត្រឹមថ្ងៃនេះ ដ្បិតពិន្ទុក្រុមលេខ ២ បានដាច់ដល់ទៅ ៦ ពិន្ទុ។

មុនការប្រកួតមកដល់ U-18 នារីវៀតណាម បានយកឈ្នះ U-18 នារីសិង្ហបុរី ០-៩ និងប្រកួតទី ២ ឈ្នះម្ចាស់ផ្ទះឥណ្ឌូនេស៊ី ២-១ ខណៈ U-18 នារីកម្ពុជា បានចាញ់ U-18 នារីថៃ ៤-០ និងចាញ់ម្ចាស់ផ្ទះឥណ្ឌូណេស៊ី ១-០។ បច្ចុប្បន្នវៀតណាម ឈរកំពូលតារាង មាន ៦ ពិន្ទុពេញ ដោយឡែកកម្ពុជា ឈរនៅលេខ ៤ មាន ០ ពិន្ទុ។

បញ្ជាក់ថា U-18 នារីកម្ពុជា ស្ថិតនៅពូល A ជាមួយក្រុមខ្លាំងៗម្ចាស់ផ្ទះឥណ្ឌូណេស៊ី, វៀតណាម, ថៃ និងសិង្ហបុរី។ លទ្ធផលថ្ងៃនេះអាចនឹងសម្រេចជោគវាសនារបស់កម្ពុជា ក្នុងការឡើវគ្គបន្តផងដែរ៕

អត្ថបទ៖ មន្នីរ័ត្ន