ជម្លោះកម្ពុជានិងថៃ Archives - Kampuchea Thmey Daily

ភាពមិនប្រក្រតីជុំវិញការបោះឆ្នោតនៅថៃ ផ្ទុះឡើងច្រើនខេត្ត ខណៈ អានុទីនថា រួចរាល់ជាង៩០%

Rann Reuy — Tue, 10 Feb 2026 07:45:41 +0000

ភាពមិនប្រក្រតីនិងការបន្លំក្នុងការបោះឆ្នោតក្នុងប្រទេសថៃបានផ្ទុះឡើងជាបន្តបន្ទាប់ ដោយជំរុញឲ្យគណៈកម្មការរៀបចំការបោះឆ្នោតថៃ បើកកិច្ចប្រជុំផ្ទៃក្នុងបន្ទាន់មួយនៅថ្ងៃទី១០ខែកុម្ភៈនេះ ខណៈអតីតមន្ត្រីនៃគណកម្មការរៀបចំការបោះឆ្នោតចេញមករិះគន់ការបោះឆ្នោតលើកនេះ ព្រមទាំងព្រលយអំពីលទ្ធភាពដែលអាចឲ្យរៀបចំការបោះឆ្នោតឡើងវិញទៀតផង។

លោក អានុទីន ដឹកនាំមន្ត្រីរដ្ឋាភិបាលនៃរដ្ឋបាលចាស់ចូលប្រជុំនៅថ្ងៃទី១០ខែកុម្ភៈ។ Standard

សារព័ត៌មានថៃជាច្រើន បានងាកមកចាប់អារម្មណ៍ចុះផ្សាយយ៉ាងព្រោងព្រាតអំពីការតវ៉ារបស់ប្រជាជនថៃ នៅខេត្តមួយចំនួន មានដូចជា ខេត្ត Phatum Thani ខេត្ត Chon Buri ខេត្ត Ubon Ratchathani ខេត្ត Si Sa Ket ខេត្ត Phuket និង បណ្តាទីតាំងស្ថានីយបោះឆ្នោតជាច្រើនទៀត។

យោងការផ្សាយរបស់សារព័ត៌មាន Thai Enquirer គណៈកម្មការរៀបចំការបោះឆ្នោតថៃ បានបើកកិច្ចប្រជុំផ្ទៃក្នុងជុំវិញភាពមិនប្រក្រតីដែលត្រូវបានគេសង្ស័យនៅក្នុងការរាប់សន្លឹកឆ្នោត និង ការដោះស្រាយទំនាស់ ដោយគណៈកម្មការនេះត្រុវតម្រូវឲ្យប្រធានគណៈកម្មការបោះឆ្នោតតាមបណ្តាខេត្តសរសេរបកស្រាយ មុនគណៈកម្មការបោះឆ្នោតថ្នាក់ជាតិបកស្រាយទៅដល់សាធារណៈជន។

ភាពមិនប្រក្រតីនៃការបោះឆ្នោតនៅប្រទេសថៃបានផ្ទុះឡើងនិងរីករាលដាលយ៉ាងឆាប់រហ័សទៅច្រើនតំបន់ ខណៈមានថ្នាក់ដឹកនាំនយោបាយបានចេញមកទាមទារឲ្យមានការទទួលខុសត្រូវជាបន្តបន្ទាប់ដូចគ្នា។

សារព័ត៌មាន The Standard របស់ប្រទេសថៃ បានស្រង់សំណេររបស់ លោក Phumtham Wechayachai ថ្នាក់ដឹកនាំជាន់ខ្ពស់មួយរូបរបស់គណបក្សភឿថៃបង្ហោះនៅថ្ងៃទី១០កុម្ភៈនេះថា «ការបោះឆ្នោតមានភាពមិនប្រក្រតីនិងទាមទារឲ្យមានការទទួលខុសត្រូវ» ដោយសង្កត់ធ្ងន់ថា គណបក្សនេះក៏មើលឃើញនូវភាពមិនប្រក្រតីកើតឡើងដូចប្រជាជនជាច្រើនតំបន់បានមើលឃើញដែរ។

ជាមួយគ្នានោះអតីតសមាជិកគណកម្មការរៀបចំការបោះឆ្នោតថៃ លោក Somchai Srisutthiyakorn ត្រូវបានកាសែត Khaosod English របស់ប្រទេសថៃស្រង់សំណេរក្នុងហ្វេសប៊ូករបស់លោក បានផ្សាយថា ភាពមិនប្រក្រត្រីដែលបានកើតឡើងនេះ បង្ហាញពីភាពខ្វះវិជ្ជាជីវៈរបស់មន្ត្រី និងការគ្រប់គ្រងការបោះឆ្នោត។

តាមអ្វីដែលលោកបានលើកឡើង ការបោះឆ្នោតថ្ងៃទី៨ខែកុម្ភៈ ឆ្នាំ ២០២៦ បានឃើញបាតុភូតជាច្រើនដែលឆ្លុះបញ្ចាំងថា គណៈកម្មការរៀបចំការបោះឆ្នោតនៅតែមិនទាន់បានគ្រប់គ្រងការបោះឆ្នោតតាមរបៀបវិជ្ជាជីវៈនៅឡើយ។ មន្ត្រីការិយាល័យបោះឆ្នោតខ្វះស្តង់ដារស៊ីសង្វាក់គ្នាក្នុងការអនុវត្តភារកិច្ចរបស់ពួកគេ។

បើតាមការចុះផ្សាយនោះ ភាពមិនប្រក្រតីកើនឡើងយ៉ាងរហ័សនេះ ការរាប់សន្លឹកឆ្នោតនៅតាមស្ថានីយបោះឆ្នោតខ្លះមិនអាចឆ្លុះបញ្ចាំងពីដំណោះស្រាយទាំងមូលទេ ហើយ ដើម្បីដោះស្រាយបញ្ហានេះឲ្យបានល្អ ការបោះឆ្នោតឡើងវិញជាវិធីសាស្ត្រដើម្បីបញ្ចប់ការតវ៉ា។

នៅថ្ងៃទី១០ខែកុម្ភៈនេះ លោក អានុទីន ឆានវីរៈគុល នាយករដ្ឋមន្ត្រីចាំផ្ទុះ និងជារដ្ឋមន្ត្រីក្រសួងមហាផ្ទៃ បានផ្តល់បទសម្ភាសន៍មុនដឹកនាំកិច្ចប្រជុំគណៈរដ្ឋមន្ត្រីក្រោយថ្ងៃបោះឆ្នោត ដោយបញ្ជាក់ថា លទ្ធផលនៃការបោះឆ្នោតមិនទាន់ជាផ្លូវការនៅឡើយទេ គឺប្រហែល ៩២%។ ដូច្នេះ លោកបានបដិសេធមិនធ្វើអត្ថាធិប្បាយលើជំហររបស់ប្រធានសភាតំណាងរាស្ត្រ ឬការបង្កើតរដ្ឋាភិបាលថ្មីនោះទេ ដោយស្នើសុំឱ្យរង់ចាំការបញ្ជាក់ពេញលេញពីគណៈកម្មការរៀបចំការបោះឆ្នោត (EC)៕

រ៉ាន់ រើយ

The post ភាពមិនប្រក្រតីជុំវិញការបោះឆ្នោតនៅថៃ ផ្ទុះឡើងច្រើនខេត្ត ខណៈ អានុទីនថា រួចរាល់ជាង៩០% appeared first on Kampuchea Thmey Daily.

លទ្ធភាពជាប់គាំងនយោបាយនៅថៃនៅតែខ្ពស់ ខណៈក្រុមកែទម្រង់អាចត្រូវរារាំង

Rann Reuy — Sun, 08 Feb 2026 06:59:17 +0000

ការបោះឆ្នោតនៅក្នុងប្រទេសថៃកំពុងតែប្រព្រឹត្តទៅដើម្បីជ្រើសរើសរដ្ឋាភិបាលថ្មីជំនួសឲ្យអាណត្តិរដ្ឋាភិបាលដែលដើរតាមរដ្ឋធម្មនុញ្ញតាក់តែងដោយរបបយោធា និងការគាបសង្កត់ពីការប្រើប្រាស់អំណាចដ៏ខ្លាំងរបស់ស្តេចថៃដើម្បីបង្រ្កាបអ្នកប្រជាធិបតេយ្យ។

ទោះបីជាការបោះឆ្នោតនៅប្រទេសថៃលើកនេះបានរៀបចំ ក្រោមបរិយាកាសដ៏ឈឺចាប់នៃវិបត្តិសង្គម សេដ្ឋកិច្ច អស្ថិរភាពនយោបាយ និង ការបង្កសង្គ្រាមរបស់អ្នកនយោបាយថៃមកលើប្រទេសកម្ពុជា ក៏វិបត្តិខាងលើ មិនអាចដោះស្រាយបានដោយងាយដែរ។

ប្រទេសបានជួបប្រទះនូវវិបត្តិរដ្ឋធម្មនុញ្ញយ៉ាងធ្ងន់ធ្ងរ ដោយសារតែរដ្ឋធម្មនុញ្ញនោះរៀបចំឡើងដោយក្រោយយោធា លម្អៀងទៅរកស្ថាប័នរាជបល្ល័ង្ក ដោយសារតែច្បាប់រដ្ឋធម្មនុញ្ញនោះ កើតឡើងក្រោយ១ឆ្នាំនៃការឡើងសោយរាជរបស់ព្រះរាជាថៃបច្ចុប្បន្ន គឺ មហាវ៉ាជិរ៉ាឡុងកន រាមាទី១០ ក្រោយពីប្រទេសនេះបានធ្វើទុកបុកម្នេញអ្នកប្រជាធិបតេយ្យដែលឈ្នះការបោះឆ្នោតកន្លងមក មិនឲ្យឡើងកាន់អំណាចតាមឆន្ទៈដែលប្រជារាស្រ្តប្រគល់ឲ្យ។

ជាមួយគ្នានេះការបោះឆ្នោតនៅប្រទេសថៃលើកនេះ គឺ មានកម្រងសំណួរសម្រាប់ការធ្វើប្រជាមតិដើម្បីធ្វើវិសោធនកម្មផងដែរ។

ប៉ុន្តែលទ្ធផលនៃការស្ទង់មតិបង្ហាញថា គ្មានគណបក្សណាមួយទំនងជាទទួលបានសំឡេងភាគច្រើនសរុបនៃអាសនៈទាំង ៥០០ នៅក្នុងសភានោះទេ មានន័យថាពួកគេទំនងជាត្រូវបង្កើតរដ្ឋាភិបាលចម្រុះមួយ ដែលគេអាចមើលឃើញថា ក្រុមអ្នកប្រជាធិបតេយ្យកំណែទម្រង់ មានគណបក្សប្រជាជនថៃ និងគណបក្សភឿថៃ អាចនឹងបង្រួបបង្រួមជាមួយគណបក្សតូចៗផ្សេងទៀត។

លោក អានុទីន និង លោករឿងបញ្ញាវុឌ្ឍ ជាគូប្រជែងនយោបាយចុងក្រោយ។

ដោយឡែកគណបក្សភូមិចៃថៃរបស់លោក អានុទីន ឆានវីរៈគុល វិញក៏អាចមានលទ្ធភាពបង្កើតរដ្ឋាភិបាលចម្រុះដូចគ្នា បើខ្លួនទទួលបានការគាំទ្រច្រើន។ ទោះបីជាមានប្រជាប្រិយភាពក៏ដោយ ក៏ឱកាសនៅតែមានច្រើនប្រឆាំងនឹងគណបក្សប្រជាជន។

នៅឆ្នាំ ២០២៣ គណបក្សមុនរបស់គណបក្សប្រជាជនបច្ចុប្បន្ន គឺគណបក្ស Move Forward ត្រូវបានរារាំងមិនឱ្យបង្កើតរដ្ឋាភិបាល ទោះបីជាគណបក្សនេះបានឈ្នះការបោះឆ្នោតច្រើនបំផុតក៏ដោយ។ ការគាំទ្ររបស់គណបក្សនេះចំពោះការធ្វើវិសោធនកម្មច្បាប់ប្រមាថព្រះមហាក្សត្រដ៏ចម្រូងចម្រាសរបស់ប្រទេសថៃ បានធ្វើឱ្យគណបក្សនេះមានការខ្វែងគំនិតជាមួយក្រុមកម្លាំងអភិរក្សនិយមដ៏មានឥទ្ធិពលនៅក្នុងសភា ហើយ នៅទីបំផុត ក្រុមព្រឹទ្ធសមាជិកដែលកើតឡើងពីការតែងតាំងភាគច្រើនមិនគាំទ្រឲ្យកាន់អំណាចនោះទេ។

តាមសេចក្តីរាយការណ៍របស់ BBC មិនដូចឆ្នាំ ២០២៣ ទេ លើកនេះព្រឹទ្ធសភាមិនត្រូវបានអនុញ្ញាតឱ្យចូលរួមក្នុងការជ្រើសរើសរដ្ឋាភិបាលបន្ទាប់ទេ។

យ៉ាងណាក៏ដោយ មនុស្សគ្រប់គ្នានៅក្នុងប្រទេសថៃរំពឹងថានឹងមានចលនាមួយចំនួនដើម្បីរារាំងគណបក្សប្រជាជនម្តងទៀត។ មានសំណុំរឿងមួយត្រូវបានដាក់ប្តឹងប្រឆាំងនឹងឥស្សរជនឈានមុខគេចំនួន ៤៤ រូបរបស់ខ្លួន ដោយរួមទាំងបេក្ខជនសភាចំនួន ១៥ រូបរបស់ពួកគេ ជាមួយគណៈកម្មការប្រឆាំងអំពើពុករលួយជាតិ ជុំវិញការគាំទ្រផ្ទាល់ខ្លួនរបស់ពួកគេចំពោះសំណើប្រមាថព្រះមហាក្សត្រ។

បណ្តឹងដែលមានស្រាប់ស្ថិតនៅក្នុងដៃរបស់អាជ្ញាធរស៊ើបអង្កេតស្រាប់នោះអាចត្រូវបានប្រើដើម្បីហាមឃាត់ពួកគេទាំងអស់មិនឱ្យចូលរួមក្នុងនយោបាយ៕

រ៉ាន់ រើយ

The post លទ្ធភាពជាប់គាំងនយោបាយនៅថៃនៅតែខ្ពស់ ខណៈក្រុមកែទម្រង់អាចត្រូវរារាំង appeared first on Kampuchea Thmey Daily.

ប្រឈមប្រជាប្រិយភាពដ៏អន់ លោក អានុទីន ថា លោក ស្គាល់ប្រព័ន្ធថៃ

Rann Reuy — Wed, 04 Feb 2026 03:51:16 +0000

ប្រធានគណបក្សភូមិចៃថៃ លោក អានុទីន ឆានវីរៈគុល ដែលបានជ្រើសរើសផ្លូវនយោបាយយកកម្ពុជាជាចំណាប់ខ្មាំង សម្រាប់បង្កើនប្រជាប្រិយភាពក្នុងការបោះឆ្នោតរបស់ខ្លួននោះ បានអះអាងអំពីក្តីរំពឹងទទួលបានទំនុកចិត្តពីអ្នកបោះឆ្នោតសម្រាប់ការបោះឆ្នោតនៅចុងសប្តាហ៍នេះ បើទោះបីជាការស្ទង់មតិថ្មីៗនេះបង្ហាញថា «លោកគ្មានប្រជាប្រិយភាពឈ្នះឆ្នោតឡើយ»។

លោក អានុទីន ឆានវីរៈគុល ពេលចុះឃោសនារកការគាំទ្រ។ Khaosod English

ក្នុងអំឡុងពេលចុះទៅឃោសនារកការគាំទ្រពីប្រជាជននៅខេត្តក្នុងភូមិភាគឦសាន្តប្រទេសថៃ រួមមានខេត្ត អ៊ូប៊ុន ខេត្តស៊ីសាកេត ខេត្តស៊ូរិន ដែលជាប់ព្រំដែនជាមួយប្រទេសកម្ពុជា និងដែលទើបបញ្ចប់ការប្រយុទ្ធគ្នាដោយអាវុធ លោក អានុទីន ដែលត្រូវបានស្ទាក់សួរដោយសារព័ត៌មាន Chanel News Asia (CNA) បាននិយាយថា៖«ខ្ញុំត្រូវតែនិយាយថា យើងប៉ុនប៉ងខ្ពស់។ ខ្ញុំគិតថា យើងនឹងមានលទ្ធភាពទទួលការទុកចិត្តនិងទំនុកចិត្តពីអ្នកបោះឆ្នោតរបស់យើង»។

CNA បានស្រង់សម្តីលោក អានុទីន ដូចបាននិយាយថា៖«យើងយល់នូវអ្វីដែលប្រជាជនថៃត្រូវការ។ យើងយល់ដឹងពីរបៀបដោះស្រាយប្រព័ន្ធដែលដំណើរការក្នុងប្រទេសថៃ យើងមានអ្នកជំនាញច្រើនដែលចូលរួមជាមួយយើងដើម្បីនាំប្រទេសថៃឆ្ពោះទៅមុខទៀត»។

លទ្ធផលស្ទង់មតិចេញផ្សាយកាលពីចុងសប្តាហ៍ដោយវិទ្យាស្ថានអភិវឌ្ឍន៍រដ្ឋបាលជាតិ (NIDA) បានបង្ហាញថា ការគាំទ្រលើលោកអានុទីន មានត្រឹមតែប្រមាណ១០ភាគរយប៉ុណ្ណោះ ខណៈការគាំទ្រលើបេក្ខភាពមកពីគណបក្សប្រជាជនថៃ មានរហូតដល់ជាង២០ភាគរយ។

លោក អានុទីន ឆានវីរៈគុល ដឹកនាំគណបក្សភូមិចៃថៃទទួលបានការគាំទ្រលំដាប់លេខរៀងទី៣កាលពីការបោះឆ្នោតក្នុងខែឧសភាឆ្នាំ២០២៣ ប៉ុន្តែបានឱកាសឡើងកាន់កៅអីនាយករដ្ឋមន្ត្រីទី៣២របស់ប្រទេសថៃ បន្ទាប់ពីលោកបានដឹកនាំគណបក្សនេះចេញពីរដ្ឋាភិបាលចម្រុះដឹកនាំដោយលោកស្រី ផែថងថាន ស៊ីណាវ៉ាត្រ ដែលត្រូវបានតុលាការធម្មនុញ្ញបណ្តេញចេញពីអំណាចកាលចុងខែសីហាឆ្នាំ២០២៥ ដោយសារតែការរកឃើញរំលោភក្រមរដ្ឋធម្មនុញ្ញដែលតាក់តែងឡើងដោយរបបយោធាថៃនោះ។

លោក អានុទីន ដែលផ្តាច់ខ្លួនពីរដ្ឋាភិបាលចម្រុះដឹកនាំដោយគណបក្សភឿថៃ ហើយ ទៅចងសម្ព័ន្ធភាពរយៈពេលខ្លីជាមួយគណបក្សប្រជាជនថៃ ដើម្បីដឹកនាំរដ្ឋាភិបាលថៃរយៈពេលត្រឹមតែ៤ខែ សម្រាប់ដឹកនាំធ្វើវិសោធនកម្មរដ្ឋធម្មនុញ្ញថៃ និងធានាប្រក្រតីភាពរដ្ឋាភិបាល ក្រោយពីដកលោកស្រី ផែថងថាន ប៉ុន្តែក្រោយទទួលបានអំណាចក្នុងដៃ លោក អានុទីន មិនបានអនុវត្តតាមកិច្ចព្រមព្រៀងជាមួយគណបក្សប្រជាជនថៃទេ។

អំឡុងពេលវិបត្តិនយោបាយផ្ទៃក្នុងថៃនោះ លោក អានុទីន បែរជាទៅបង្កើតភាពតានតឹងជាមួយកម្ពុជា បង្កជម្លោះនៅតាមព្រំដែន ប្រកាសដកខ្លួនចេញពីការអនុវត្តកិច្ចព្រមព្រៀងសន្តិភាពដែលខ្លួនបានចុះហត្ថលេខានៅទីក្រុងកូឡាឡាំពូកាលថ្ងៃទី២៦ខែតុលាឆ្នាំ២០២៥ ដែលសម្របសម្រួលនិងធ្វើជាសាក្សីដោយនាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម ជាប្រធានអាស៊ាន និងប្រធានាធិបតី សហរដ្ឋអាមេរិក លោក ដូណល់ ត្រាំ។

នៅក្នុងលទ្ធផលស្ទង់មតិជាបន្តបន្ទាប់នៅមុនការបោះឆ្នោតផ្លូវការ បេក្ខភាពនាយករដ្ឋមន្ត្រីរបស់លោក អានុទីន និងគណបក្សភូមិចៃថៃរបស់លោក គ្មានប្រជាប្រិយភាពឈ្នះការបោះឆ្នោតនៅពេលខាងមុខនោះទេ ដោយនៅពីក្រោយឆ្ងាយគណបក្សប្រជាជនថៃដឹកនាំដោយក្រុមយុវជនកំណែទម្រង់ និងគណបក្សភឿថៃដឹកនាំដោយអ្នកស្និទ្ធនឹងអតីតនាយករដ្ឋមន្ត្រី ថាក់ស៊ីន ស៊ីណាវ៉ាត្រ ដែលកំពុងជាប់ពន្ធនាគារក្នុងទីក្រុងបាងកក ក្រោមបទចោទសូកប៉ាន់ប៉ូលិសកាលពីជាង១០ឆ្នាំមុន៕

រ៉ាន់ រើយ

The post ប្រឈមប្រជាប្រិយភាពដ៏អន់ លោក អានុទីន ថា លោក ស្គាល់ប្រព័ន្ធថៃ appeared first on Kampuchea Thmey Daily.

អ្នកសារព័ត៌មាន AL Jazeera៖ ប្រាសាទដែលទាហានថៃដណ្តើមកាន់កាប់ជារបស់ខ្មែរពិតៗ

Rann Reuy — Thu, 22 Jan 2026 04:58:26 +0000

អ្នកសារព័ត៌មានអន្តរជាតិនៃបណ្តាញសារព័ត៌មាន Al Jazeera លោក Tony Cheng បានអត្ថាធិប្បាយនៅមុខប្រាសាទតាមាន់ធំដែលបែកបាក់ក្រោយការបំផ្លិចបំផ្លាញដោយយោធាថៃក្នុងពេលកន្លងមកថា «ប្រាសាទទាំងនោះជារបស់កម្ពុជាយ៉ាងពិតប្រាកដ»។

រូបភាពកាត់ចេញពីការដើរអត្ថាធិប្បាយព័ត៌មាននៅប្រាសាទតាមាន់ធំ។ Al Jazeera English

ការធ្វើសេចក្តីរាយការណ៍របស់លោកកើតឡើង នៅពេលដែល ក្រុមយោធាថៃ បានដឹកនាំអ្នកសារព័ត៌មានអន្តរជាតិ ទៅផ្តិតយករូបភាពនៅតំបន់ទីតាំងប្រាសាទតាមាន់ធំ ដែលក្រុមយោធាថៃកំពុងធ្វើពិធីបែបសាសនាដោយខុសច្បាប់ ដែលបង្ហាញពីទង្វើកាន់កាប់ដោយការឈ្លានពានរបស់ពួកគេក្នុងពេលកន្លងមក។

លោក Tony Cheng បាននិយាយនៅក្នុងការធ្វើសេចក្តីរាយការណ៍នោះថា៖‍«ទីនេះប្រាសាទមាន់ធំ នៅលើតំបន់ព្រំដែនតែម្តង។ អ្នកអាចមើលឃើញចម្លាក់ខ្មែរដ៏អស្ចារ្យទាំងអស់នេះ ហើយចម្លាក់ទាំងនោះជារបស់ខ្មែរពិតៗ ពីពេលវេលានៃអាណាចក្រខ្មែរលាតសន្ធឹងនៅទូទាំងអាស៊ីអាគ្នេយ៍»។

នៅក្នុងសេចក្តីរាយការណ៍ដដែលនោះ អ្នករាយការណ៍ព័ត៌មាននេះក៏បានរំលេច នូវប្រាសាទតាក្របី ដែលស្ថ្តិតនៅលើភ្នំដែលស្ទើរតែគ្មានអ្វីប៉ះពាល់បានក៏រងការបំផ្លាញស្ទើរទាំងស្រុងដែរ។

បន្ទាប់ពីការច្រានចោលមិនចូលទៅដោះស្រាយបញ្ហាជម្លោះតាមតំបន់មួយចំនួននៅតាមបណ្តោយព្រំដែន យោធាថៃដែលកាលពីខែកក្កដាឆ្នាំ២០២៥ ដឹកនាំដោយ ឧត្តមសេនីយ៍ ប៊ុនស៊ីន ផាតក្លាង បានធ្វើសកម្មភាពបង្កហេតុ និងបើកការវាយប្រហារមកលើកងទ័ពកម្ពុជា។

សង្គ្រាមនៅតាមតំបន់ព្រំដែនមិនបានបញ្ចប់ត្រឹមថ្ងៃទី២៨ខែកក្កដាដែលភាគីទាំងពីរបានចុះហត្ថលេខាលើបទឈប់បាញ់នោះទេ ដោយរដ្ឋាភិបាលថៃដឹកនាំដោយលោក អានុទីន ឆានវីរៈគុល បានធ្វើសកម្មបង្កហេតុដោយយកលេសការជាន់មីនរបស់យោធាខ្លួន និងបានបើកការវាយប្រហារជាថ្មីនិងសាហាវបំផុតមកលើបូរណៈភាពទឹកដីកម្ពុជា ក្នុងនោះមានការបំផ្លាញប្រាសាទបុរាណ វត្តអារាម ស្ពាន លំនៅឋាន ទីផ្សារ និងហេដ្ឋារចនាសម្ព័ន្ធស៊ីវិលច្រើនទៀត។

ប្រធានាធិបតីសហរដ្ឋអាមេរិក លោក ដូណាល់ ត្រាំ កាលថ្ងៃទី១៣ខែធ្នូ បានបង្ហោះសារលើបណ្តាញសង្គមរបស់លោក ថា ឧបទ្ធវហេតុផ្ទុះគ្រាន់នៅតាមផ្លូវ ប៉ុន្តែថៃបានឆ្លើយតបវិញដោយបើកការវាយប្រហារ។ ការលើកឡើងរបស់ប្រធានាធិបតី ត្រាំ បានកើតឡើងក្រោយពេលលោកសម្របសម្រួលឲ្យមានការបញ្ចប់ការប្រយុទ្ធគ្នាជាថ្មី បន្ទាប់ពីផ្ទុះឡើងជាលើកទី២ ដែលថៃបើកការវាយប្រហារកាលថ្ងៃទី៧ខែធ្នូ២០២៥៕

រ៉ាន់ រើយ

https://www.facebook.com/share/v/16mnAzLw2P/?mibextid=wwXIfr

The post អ្នកសារព័ត៌មាន AL Jazeera៖ ប្រាសាទដែលទាហានថៃដណ្តើមកាន់កាប់ជារបស់ខ្មែរពិតៗ appeared first on Kampuchea Thmey Daily.

ការដោះលែងវីរៈយុទ្ធជនកម្ពុជាទាំង១៨រូបនៅតែស្រពេចស្រពិលនៅឡើយ ដោយសារភាគីថៃ

Rann Reuy — Tue, 30 Dec 2025 10:14:54 +0000

អ្នកនាំពាក្យក្រសួងការបរទេសថៃលោក Nikorndej Balankura បាននិយាយក្នុងសន្និសីទសារព័ត៌មាននៅរសៀលសថ្ងៃអង្គារនេះថា៖«ប្រសិនបើគ្មានអ្វីកើតឡើងធំដុំទេ ទាហានកម្ពុជាទាំង១៨នាក់នឹងត្រូវដោះលែងជាជំហានបន្ទាប់» ប៉ុន្តែលោកមិនបានបញ្ជាក់ពីពេលវេលាជាក់លាក់ ដោយគ្រាន់តែអះអាងថា រដ្ឋមន្ត្រីការបរទេសនៃប្រទេសទាំងពីរនឹងជួបប្រជុំទ្វេភាគីនៅក្រោយឆ្លងឆ្នាំ២០២៥។

អ្នកនាំពាក្យក្រសួងការបរទេសថៃលោក Nikorndej Balankura។

ការដោះលែងវីរៈយុទ្ធកម្ពុជាទាំង១៨រូប គឺត្រូវអនុវត្តភ្លាមៗ ក្រោយការអនុវត្តបទឈប់បាញ់រយៈពេល៧២ម៉ោងដែលចូលជាធរមាននៅត្រឹមថ្ងៃត្រង់ថ្ងៃទី៣០ខែធ្នូនេះ ដោយផ្អែកតាមកិច្ចព្រមព្រៀងដែលភាគីថៃនិងកម្ពុជា បានឯកភាពគ្នាក្នុងកិច្ចប្រជុំគណៈកម្មការព្រំដែនទូទៅកាល់ថ្ងៃទី២៧ខែធ្នូ។

ការទាមទារឲ្យដោះលែងវីរៈកងទ័ពកម្ពុជាទាំង១៨រូបនេះ ក៏ត្រូវបានលើកឡើងក្នុងជំនួបត្រីភាគីថ្នាក់រដ្ឋមន្ត្រីការបរទេសជាមួយភាគីចិន នៅខេត្តយូណានប្រទេសថៃចិនកាលថ្ងៃទី២៩ខែធ្នូ ប៉ុន្តែភាគីថៃនៅតែបន្តរកលេសផ្សេងតាមតែខ្លួននឹកឃើញដើម្បីពន្យាពេលដោះលែងយោធាកម្ពុជាទាំង១៨រូបដែលថៃបន្តឃុំឃាំងដោយខុសច្បាប់ ដោយសារតែការចាប់ខ្លួនពួកគេធ្វើឡើងកាលថ្ងៃទី២៩ខែកក្កដា ក្រោយភាគីទាំងពីរអនុវត្តបទឈប់បាញ់ជាង៧ម៉ោង។

សហគមន៍អាស៊ាន អង្គការសហប្រជាជាតិ រួមទាំងសហរដ្ឋអាមេរិកដែលជាអ្នកជំរុញការសម្របសម្រួលបញ្ជប់ការប្រយុទ្ធគ្នានេះ ក៏បានជំរុញឲ្យថៃដោះលែងយោធាកម្ពុជាទាំង១៨រូប ដើម្បីឲ្យវិលមកកាន់មាតុប្រទេសវិញ ក្រោយការចុះហត្ថលេខាលើកិច្ចព្រមព្រៀងសន្តិភាពកាលថ្ងៃទី២៦ខែតុលាឆ្នាំ២០២៥ នៅទីក្រុងកូឡាឡាំពួ ប្រទេសម៉ាឡេស៊ី។

ទោះជាបែបនេះក្តី ប្រទេសថៃបានបង្កហេតុផ្ទុះអាវុធ ដោយយកលេសនៃការជាន់មីនត្រូវរបួសរបស់ទាហានថៃនៅតាមព្រំដែន ទៅជាការបើកការវាយប្រហារទ្រង់ទ្រាយធំ ដោយប្រើយន្តហោះចម្បាំងជាច្រើនគ្រឿង វាយប្រហារកម្ទេចប្រាសាទបុរាណ ផ្តាច់ស្ពាន កម្ទេចវត្តអារាម ផ្ទះប្រជាជន និងហេដ្ឋារចនាសម្ព័ន្ធស៊ីវិលជាច្រើននៅតាមបណ្តោយព្រំដែន។

ប្រធានាធិបតីសហរដ្ឋអាមេរិក លោក ដូណាល់ ត្រាំ កាលថ្ងៃទី១៣ខែធ្នូ បានហៅហេតុការណ៍ជាន់មីននោះថា ជាហេតុការណ៍ចៃដន្យ ប៉ុន្តែការឆ្លើយតបរបស់ថៃដោយការវាយប្រហារ។ ការហៅរបស់ប្រធានាធិបតីអាមេរិក លោក ដូណាល់ ត្រាំ បានធ្វើឲ្យភាគីថៃអាក់អន់ស្រពន់ចិត្តយ៉ាងខ្លាំងនាពេលនោះ៕

រ៉ាន់ រើយ

The post ការដោះលែងវីរៈយុទ្ធជនកម្ពុជាទាំង១៨រូបនៅតែស្រពេចស្រពិលនៅឡើយ ដោយសារភាគីថៃ appeared first on Kampuchea Thmey Daily.

ចិនឃើញជំហានសន្តិភាព ក្រោយជំនួបដាច់ដោយឡែកជាមួយរដ្ឋមន្ត្រីការបរទេសកម្ពុជានិងថៃ

Rann Reuy — Mon, 29 Dec 2025 04:10:17 +0000

ក្រោយជំនួបបញ្ជប់រវាងរដ្ឋមន្ត្រីការបរទេសចិន លោក វ៉ាង យី ជាមួយរដ្ឋមន្ត្រីការបរទេសថៃ អ្នកនាំពាក្យក្រសួងការបរទេសចិន លោក Guo Jiakun បានបង្ហោះសារ ថា ចិនរីករាយដើម្បីឃើញការវិវត្តន៍នៃដំណើរឆ្ពោះទៅរកសន្តិភាព បន្ទាប់ពីភាគីទាំងពីរសម្រេចបាននូវកិច្ចព្រមព្រៀងបទឈប់បាញ់នោះមក។

អ្នកនាំពាក្យក្រសួងការបរទេសចិន លោក Guo Jiakun

ដោយការថ្លែងអំណរគុណដល់ភាគីកម្ពុជានិងថៃ ដែលសម្រេចបានកិច្ចព្រមព្រៀងបទឈប់បាញ់ និងចាត់ទុកថា វាជាជំហានដំបូងសំដៅទៅរកសន្តិភាពនោះ អ្នកនាំពាក្យក្រសួងការបរទេសចិន លោក Guo Jiakun បានលើកឡើងថា ចិនរីករាយឃើញការវិវត្តន៍ថ្មីៗ។

រដ្ឋមន្ត្រីការប្រទេសចិន លោក វ៉ាង យី បានជួបជាមួយរដ្ឋមន្ត្រីការបរទេសថៃ លោក ស៊ីហាសាក់ ភួងកេតុកែវ ( Sihasak Phuangketkeow) នៅថ្ងៃទី២៨ខែធ្នូ បន្ទាប់ពីបានជួបដាច់ដោយឡែកជាមួយរដ្ឋមន្ត្រីការបរទេសកម្ពុជា ឯកឧត្តម ប្រាក់ សុខុន ដើម្បីពិភាក្សាលើប្រធានបទដូចគ្នា គឺ ដំណោះស្រាយជម្លោះព្រំដែននៃប្រទេសទាំងពីរ។

ក្នុងជំនួបជាមួយរដ្ឋមន្ត្រីការបរទេស ដោយមានវត្តមានរបស់សមន្ត្រីយោធាជាន់ខ្ពស់នៃប្រទេសមានជម្លោះព្រំដែនដែលប្រព្រឹត្តទៅនៅទីក្រុង Yuxi ខេត្តយូណាន ភាគនិរតីប្រទេសចិន រដ្ឋមន្ត្រីការបរទេសចិន លោក វ៉ាង យី បានប្រើប្រាស់កិច្ចខិតខំប្រឹងប្រែងរបស់ប្រទេសចិនដើម្បីបញ្ចប់ការប្រយុទ្ធគ្នារវាងប្រទេសថៃនិងកម្ពុជាដែលមានព្រំដែនគោកជាប់គ្នាជាង៨០០គីឡូម៉ែត្រ។

ក្រោយជំនួបជាមួយរដ្ឋមន្ត្រីការបរទេសចិន ក្រសួងការបរទេសថៃបានបញ្ចេញសារតាមគេហទំព័រក្រសួងការបរទេសថៃ ដោយអរគុណចំពោះតួនាទីរបស់ចិន និងការយោគយល់ក្នុងការគាំទ្រសន្តិភាពរវាងថៃនិងកម្ពុជា តាមមធ្យោបាយរបស់អាស៊ី។ នៅក្នុងសារនោះដែរ រដ្ឋមន្ត្រីការបរទេសថៃ បានអះអាងនៅមុខភាគីចិនថា ខ្លួននឹងពិចារណាដោះលែងវីរៈកងទ័ពកម្ពុជាទាំង១៨រូប បន្ទាប់ពីការតាមដានរយៈពេល៧២ម៉ោងនៃបទឈប់បាញ់។

ក្នុងជំនួបជាមួយភាគីកម្ពុជា តាមសេចក្តីរាយការណ៍របស់សារព័ត៌មានចិន China Daily រដ្ឋមន្ត្រីការបរទេសចិន លោក វ៉ាង យី បានលើកឡើងថា ប្រទេសចិនបានតាមដានស្ថានការណ៍តានតឹងនៅតាមព្រំដែនកម្ពុជា-ថៃយ៉ាងដិតដល់ ហើយនៅតែប្តេជ្ញាចិត្តក្នុងការសម្របសម្រួលសន្តិភាពតាមរយៈការចរចា ដោយបន្ថែមថា ប្រទេសចិនអបអរសាទរភាគីទាំងពីរចំពោះកិច្ចព្រមព្រៀងឈប់បាញ់។

មិនខុសពីបណ្តាប្រទេសជាច្រើនទៀតក្នុងពិភពលោក លោក វ៉ាង បានសង្កត់ធ្ងន់ថា បទឈប់បាញ់នេះគឺជាការចាប់ផ្តើមនៃការកសាងសន្តិភាព ដោយ លោក វ៉ា បានអំពាវនាវឱ្យភាគីទាំងពីរដំណើរការជាដំណាក់កាល និងវិធានការមួយ ដើម្បីលើកកម្ពស់បទឈប់បាញ់ដ៏ទូលំទូលាយ និងយូរអង្វែង ស្តារទំនាក់ទំនងធម្មតា កសាងទំនុកចិត្តគ្នាទៅវិញទៅមក សម្រេចបានការផ្លាស់ប្តូរទំនាក់ទំនងទ្វេភាគី និងរក្សាសន្តិភាព និងស្ថិរភាពក្នុងតំបន់។

នៅក្នុងកិច្ចពិភាក្សាទ្វេភាគីនោះដែរ លោក វ៉ា បាននិយាយថា ប្រទេសចិនគាំទ្រអាស៊ានក្នុងការដើរតួនាទីត្រឹមត្រូវរបស់ខ្លួន និងត្រៀមខ្លួនជាស្រេចក្នុងការផ្តល់ជំនួយដល់បេសកកម្មសង្កេតការណ៍អាស៊ានក្នុងការត្រួតពិនិត្យបទឈប់បាញ់។

លោកបានបន្ថែមថា ប្រទេសចិនក៏សង្ឃឹមថាកម្ពុជានឹងបន្តពង្រឹងការការពារពលរដ្ឋចិន និងគម្រោងនានានៅក្នុងប្រទេសកម្ពុជា៕

រ៉ាន់ រើយ

រដ្ឋមន្ត្រីការបរទេសចិន លោក វ៉ាង យី ជួបជាមួយរដ្ឋមន្ត្រីការបរទេសកម្ពុជា ឯកឧត្តម ប្រាក់ សុខុន។

លោក វ៉ាង យី ជួបជាមួយរដ្ឋមន្ត្រីការបទេសថៃ។

The post ចិនឃើញជំហានសន្តិភាព ក្រោយជំនួបដាច់ដោយឡែកជាមួយរដ្ឋមន្ត្រីការបរទេសកម្ពុជានិងថៃ appeared first on Kampuchea Thmey Daily.

ចិនប្រកាសជំនួយមនុស្សធម៌ជិត៣លានដុល្លារដល់កម្ពុជា និងត្រៀមជួយតាមដានបទឈប់បាញ់

Rann Reuy — Sun, 28 Dec 2025 13:15:23 +0000

ប្រទេសចិនប្រកាសផ្តល់ជំនួយមនុស្សធម៌មានតម្លៃ២.៨៥ លានដុល្លារ ដល់ប្រទេសកម្ពុជាសម្រាប់ជួយដល់ជនភៀសសឹក ដោយសាររងផលប៉ះពាល់ពីការបាញ់ផ្លោងរបស់កងទ័ពថៃចូលទឹកដីរបស់ប្រទេសកម្ពុជាតាំងពីថ្ងៃទី៧ខែធ្នូឆ្នាំ ២០២៥។

ការប្រកាសផ្តល់ជំនួយមនុស្សធម៌នេះ បានកើតឡើងក្នុងអំឡុងពេលដែលមានជំនួបទ្វេភាគីរវាង រដ្ឋមន្ត្រីការបរទេសចិន លោក វ៉ាង យី (Wang Yi) និងឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេសនិងសហប្រតិបត្តិការអន្តរជាតិនៃប្រទេសកម្ពុជា នៅទីក្រុង Yuxi ខេត្តយូណាន (Yunnan) ភាគនិរតីនៃប្រទេសចិន កាលពីថ្ងៃអាទិត្យ។

យោងសេចក្តីរាយការណ៍របស់សារព័ត៌មានចិននៅល្ងាចថ្ងៃអាទិត្យនេះ លោក វ៉ាង យី ដែលជាសមាជិកការិយាល័យនយោបាយនៃគណៈកម្មាធិការមជ្ឈិមបក្សកុម្មុយនិស្តចិន បាននិយាយថា ប្រទេសចិនមានឆន្ទៈក្នុងការផ្តល់ការផ្គត់ផ្គង់មនុស្សធម៌ដល់ប្រទេសកម្ពុជាសម្រាប់ការតាំងទីលំនៅរបស់ជនភៀសខ្លួននៅតាមតំបន់ព្រំដែន។

រដ្ឋមន្ត្រីការបរទេសចិន កំពុងរៀបចំជំនួបដាច់ដោយឡែករវាងរដ្ឋមន្ត្រីការបរទេសកម្ពុជា និង ថៃ បន្ទាប់ពីភាគីតាំងពីរ បានចុះហត្ថលេខាលើសេចក្តីថ្លែងការណ៍រួមដែលយល់ព្រមឲ្យមានបទឈប់បាញ់កាលពីថ្ងៃទី២៧ខែធ្នូ ហើយជំនួបជាមួយរដ្ឋមន្ត្រីការបរទេសកម្ពុជាធ្វើឡើងនៅថ្ងៃទី២៨ខែធ្នូ ខណៈជំនួបជាមួយរដ្ឋមន្ត្រីការបរទេសថៃ នឹងធ្វើឡើងនៅថ្ងៃទី២៩ខែធ្នូ។

សេចក្តីរាយការណ៍របស់សារព័ត៌មានចិន China Daily បានឲ្យដឹងថា លោក វ៉ាង បានលើកឡើងថា ប្រទេសចិនបានតាមដានស្ថានការណ៍តានតឹងនៅតាមព្រំដែនកម្ពុជា-ថៃយ៉ាងដិតដល់ ហើយនៅតែប្តេជ្ញាចិត្តក្នុងការសម្របសម្រួលសន្តិភាពតាមរយៈការចរចា ដោយបន្ថែមថា ប្រទេសចិនអបអរសាទរភាគីទាំងពីរចំពោះកិច្ចព្រមព្រៀងឈប់បាញ់។

លោកបានបន្ថែមថា ប្រទេសចិនក៏សង្ឃឹមថាកម្ពុជានឹងបន្តពង្រឹងការការពារពលរដ្ឋចិន និងគម្រោងនានានៅក្នុងប្រទេស។

The post ចិនប្រកាសជំនួយមនុស្សធម៌ជិត៣លានដុល្លារដល់កម្ពុជា និងត្រៀមជួយតាមដានបទឈប់បាញ់ appeared first on Kampuchea Thmey Daily.

ប្រទេសមានឥទ្ធិពលសំខាន់ៗ បង្ហាញជំហរក្រោយកិច្ចព្រមព្រៀងបទឈប់បាញ់កម្ពុជា-ថៃ

Rann Reuy — Sun, 28 Dec 2025 02:53:00 +0000

ប្រទេសជាច្រើនបានទម្លាក់សារអបអរសាទរចំពោះបទឈប់ដែលកម្ពុជានិងថៃ ចុះហត្ថលេខាកាលថ្ងៃទី២៧ខែធ្នូ បន្ទាប់ពីការប្រយុទ្ធអស់រយៈពេល២១ថ្ងៃ ចាប់ពីថ្ងៃទី៧ខែធ្នូដែលភាគីថៃបើកការវាយប្រហារមើលលើបូរណៈភាពរបស់ប្រទេសកម្ពុជា រហូតដល់ថ្ងៃទី២៧ខែធ្នូ។

ក្រោយការចុះហត្ថលេខាលើកិច្ចព្រមព្រៀងបទឈប់បាញ់នោះប៉ុន្មានម៉ោង សហរដ្ឋអាមេរិកបានប្រកាសស្វាគមន៍ភ្លាម ក្រោយរដ្ឋបាលសហរដ្ឋអាមេរិក បានប្រឹងប្រែងជាញឹកញាប់ដើម្បីទាញភាគីទាំងពីរឲ្យអនុវត្តបទឈប់បាញ់។ ជាមួយសារស្វាគមន៍របស់រដ្ឋមន្ត្រីការបរទេសសហរដ្ឋអាមេរិកលោក Marco Rubio ក៏បានជំរុញឱ្យប្រទេសទាំងពីរអនុវត្តកិច្ចព្រមព្រៀងសន្តិភាពទីក្រុងគូឡាឡាំពួ។

រដ្ឋមន្ត្រីការបរទេសអាមេរិក លោក ម៉ាកូ រ៉ូប៊ីយ៉ូ (Marco Rubio) បានជំរុញឱ្យកម្ពុជា និងថៃ៖«គោរពការប្តេជ្ញាចិត្តនេះភ្លាមៗ និងអនុវត្តឱ្យបានពេញលេញនូវលក្ខខណ្ឌនៃកិច្ចព្រមព្រៀងសន្តិភាពទីក្រុងគូឡាឡាំពួ»។ នេះបើយោងតាមសេចក្តីថ្លែងការណ៍។

អគ្គលេខាធិការអង្គការសហប្រជាជាតិ លោក Antonio Guterres បានហៅកិច្ចព្រមព្រៀងបទឈប់បាញ់ដែលបានចុះហត្ថលេខាកាលថ្ងៃសៅរ៍នោះ ថា «ជាជំហានវិជ្ជមានឆ្ពោះទៅរកការបន្ធូរបន្ថយការឈឺចាប់របស់ជនស៊ីវិល បញ្ចប់អរិភាពបច្ចុប្បន្ន និងបង្កើតបរិយាកាសអំណោយផលដល់ការសម្រេចបាននូវសន្តិភាពយូរអង្វែង»។

អគ្គលេខាធិការអង្គការសហប្រជាជាតិ ក៏បានកោតសរសើរចំពោះប្រធានអាស៊ាន ម៉ាឡេស៊ី ចិន និងសហរដ្ឋអាមេរិក ចំពោះ «កិច្ចខិតខំប្រឹងប្រែងរបស់ពួកគេក្នុងការគាំទ្រដល់ដំណោះស្រាយដោយសន្តិវិធីនៃស្ថានភាព»។

លោក Guterres បានបន្ថែមថា អង្គការសហប្រជាជាតិ «ត្រៀមខ្លួនរួចជាស្រេច ដើម្បីគាំទ្រកិច្ចខិតខំប្រឹងប្រែង សំដៅរក្សាសន្តិភាព និងស្ថិរភាពក្នុងតំបន់»។

មហាអំណាចចិនក៏បានចេញសារស្វាគមន៍បទឈប់បាញ់នេះដែរ។ អ្នកនាំពាក្យក្រសួងការបរទេសចិន បានបង្ហោះសារតាមប្រព័ន្ធបណ្តាញសង្គម X ថា «នេះបង្ហាញថាការសន្ទនា និងការពិគ្រោះយោបល់គឺជាមធ្យោបាយដែលអាចសម្រេចបាន និងមានប្រសិទ្ធភាពក្នុងការដោះស្រាយជម្លោះដ៏ស្មុគស្មាញ»។

សេចក្តីថ្លែងការណ៍បានបន្ថែមថា៖«ប្រទេសចិន អាស៊ាន និងសហគមន៍អន្តរជាតិបានខិតខំប្រឹងប្រែងរួមគ្នាដើម្បីបញ្ចប់បញ្ហានេះ។ ប្រទេសចិនបានត្រៀមខ្លួនរួចជាស្រេចក្នុងការបន្តផ្តល់វេទិកា និងបង្កើតលក្ខខណ្ឌសម្រាប់កម្ពុជា និងថៃក្នុងការទំនាក់ទំនងកាន់តែពេញលេញ និងលម្អិតល្អន់បន្ថែមទៀត»។

ជាមួយការបង្ហាញសារសាទរនេះ រដ្ឋមន្ត្រីការបរទេសចិន លោក វ៉ាង យី (Wang Yi) ក៏បានរៀបចំកិច្ចប្រជុំត្រីភាគីដើម្បីសម្របសម្រួលកម្ពុជានិងថៃនៅខេត្តយូណាន ដោយមានវត្តមានប្រតិភូកម្ពុជាដឹកនាំ ដោយ លោក ប្រាក់ សុខុន និងសមភាគីថៃ លោក ស៊ីហាសាក់ ភូងកេតកែវ (Sihasak Phuangketkeow) ចាប់ពីថ្ងៃអាទិត្យ ដល់ថ្ងៃចន្ទ។ តាមការបញ្ជាក់របស់អ្នកនាំពាក្យក្រសួងការបរទេសចិន កិច្ចប្រជុំនោះក៏មានវត្តមានចូលរួមជាមួយតំណាងយោធាផងដែរ។

ប្រទេសជប៉ុន អាល្លឺម៉ង់ អូស្ត្រាលី ប្រទេសម៉ាឡេស៊ីក្នុងនាមប្រធានអាស៊ាន សុទ្ធតែបានបង្ហាញនូវសារអបអរសាទរ ដោយប្រទេសទាំងនោះបានបង្ហាញនូវតួនាទីសំខាន់របស់អាស៊ានក្នុងការដំណើរការទៅអនុវត្តពេញលេញនូវបទឈប់បាញ់ និងអនុវត្តកិច្ចព្រមព្រៀងសន្តិភាពដែលភាគីទាំងពីរបានចុះហត្ថលេខារួចហើយកាលពីចុងខែតុលាឆ្នាំនេះ៕

ដោយ រ៉ាន់ រើយ

The post ប្រទេសមានឥទ្ធិពលសំខាន់ៗ បង្ហាញជំហរក្រោយកិច្ចព្រមព្រៀងបទឈប់បាញ់កម្ពុជា-ថៃ appeared first on Kampuchea Thmey Daily.

​ជម្លោះកម្ពុជានិង​ថៃ Archives - Kampuchea Thmey Daily

ភាពមិនប្រក្រតីជុំវិញការបោះឆ្នោតនៅថៃ​ ផ្ទុះ​ឡើង​ច្រើនខេត្ត ខណៈ អានុទីន​​ថា​ រួចរាល់​ជាង​៩០%​​

​​​លទ្ធភាព​ជាប់គាំងនយោបាយ​នៅថៃ​នៅតែខ្ពស់​ ខណៈ​​ក្រុម​​កែទម្រង់​​​អាច​ត្រូវរារាំង​

​​​​ប្រឈម​​​ប្រជាប្រិយភាព​ដ៏អន់​ លោក អានុទីន ថា ​លោក ស្គាល់​ប្រព័ន្ធថៃ​

អ្នក​សារ​ព័ត៌មាន AL Jazeera៖ ប្រា​សា​ទ​​​​ដែលទាហានថៃ​ដណ្តើម​កាន់​កាប់​ជា​របស់ខ្មែរពិតៗ​

​ការ​ដោះលែង​​​​វីរៈយុទ្ធ​ជន​កម្ពុជា​​ទាំង​១៨​រូប​នៅតែ​ស្រពេច​ស្រពិល​​នៅឡើយ​ ដោយសារ​ភាគី​ថៃ​​

​ចិន​​ឃើញ​​​ជំហានសន្តិភាព​​ ក្រោយ​ជំនួប​​​ដាច់​ដោយ​ឡែក​ជាមួយរដ្ឋមន្ត្រី​ការបរទេស​កម្ពុជា​និងថៃ​​

​ចិន​ប្រកាសជំនួយ​​មនុស្សធម៌ជិត​៣លានដុល្លារ​ដល់​កម្ពុជា ​និង​ត្រៀម​ជួយ​​​តាមដានបទឈប់បាញ់​​​

​ប្រទេស​មាន​ឥទ្ធិពល​​​​សំខាន់ៗ បង្ហា​ញជំហរ​​​​ក្រោយ​កិច្ចព្រមព្រៀង​​បទ​ឈប់​បាញ់​​​កម្ពុជា​​-ថៃ​

ជម្លោះកម្ពុជានិងថៃ Archives - Kampuchea Thmey Daily

ភាពមិនប្រក្រតីជុំវិញការបោះឆ្នោតនៅថៃ ផ្ទុះឡើងច្រើនខេត្ត ខណៈ អានុទីនថា រួចរាល់ជាង៩០%

លទ្ធភាពជាប់គាំងនយោបាយនៅថៃនៅតែខ្ពស់ ខណៈក្រុមកែទម្រង់អាចត្រូវរារាំង

ប្រឈមប្រជាប្រិយភាពដ៏អន់ លោក អានុទីន ថា លោក ស្គាល់ប្រព័ន្ធថៃ

អ្នកសារព័ត៌មាន AL Jazeera៖ ប្រាសាទដែលទាហានថៃដណ្តើមកាន់កាប់ជារបស់ខ្មែរពិតៗ

ការដោះលែងវីរៈយុទ្ធជនកម្ពុជាទាំង១៨រូបនៅតែស្រពេចស្រពិលនៅឡើយ ដោយសារភាគីថៃ

ចិនឃើញជំហានសន្តិភាព ក្រោយជំនួបដាច់ដោយឡែកជាមួយរដ្ឋមន្ត្រីការបរទេសកម្ពុជានិងថៃ

ចិនប្រកាសជំនួយមនុស្សធម៌ជិត៣លានដុល្លារដល់កម្ពុជា និងត្រៀមជួយតាមដានបទឈប់បាញ់

ប្រទេសមានឥទ្ធិពលសំខាន់ៗ បង្ហាញជំហរក្រោយកិច្ចព្រមព្រៀងបទឈប់បាញ់កម្ពុជា-ថៃ