ដោយអនុវត្តតាមបទបញ្ជាដ៏ម៉ឹងម៉ាត់របស់ លោកនាយឧត្តមសេនីយ៍ ស ថេត អគ្គស្នងការនគរបាលជាតិ និងការចង្អុលណែនាំជាប្រចាំរបស់ លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ កាលពីថ្ងៃទី២១ ខែមករា ឆ្នាំ២០២៦ កម្លាំងការិយាល័យនគរបាលប្រឆាំងបទល្មើសសេដ្ឋកិច្ច ដឹកនាំបង្ក្រាបដោយលោកឧត្តមសេនីយ៍ទោ ពិត បញ្ញា ស្នងការរង ទទួលផែនការងារនគរបាលប្រឆាំងបទល្មើសសេដ្ឋកិច្ច និងលោកឧត្តមសេនីយ៍ទោ ម៉ៅ រង្សី ស្នងការរង ទទួលដឹកនាំការងារការិយាល័យនគរបាលប្រឆាំងបទល្មើសសេដ្ឋកិច្ច និងលោកវរសេនីយ៍ឯក យឹម សុជាតិ នាយការិយាល័យនគរបាលប្រឆាំងបទល្មើសសេដ្ឋកិច្ច បានធ្វើការឃាត់ពិនិត្យរថយន្តមួយគ្រឿង ដែលដឹកសាច់ជ្រូក និងសាច់មាន់បង្កក នៅចំណុចវិថីឈ្នះ ឈ្នះ ស្ថិតក្នុងសង្កាត់គោករកា ខណ្ឌព្រែកព្នៅ។

លោកវរសេនីយ៍ទោ ម៉ៅ សុទ្ធាគុណ នាយរងការិយាល័យ នគរបាលប្រឆាំងបទល្មើសសេដ្ឋកិច្ច បានឱ្យដឹងថា មន្ត្រីជំនាញបានតាមដានស្រាវជ្រាវ បង្រ្កាបការនាំចូលសាច់ជ្រូក និងសាច់មាន់បង្កក ចំនួន១១.៥តោន គ្មានលិខិតស្នាម និងខូចគុណភាព មកពីខេត្តស្វាយរៀង មកចែកចាយនៅរាជធានីភ្នំពេញ។ ដោយឡែកកម្លាំងជំនាញនូវតែបន្តស្រាវជ្រាវ ស៊ើបអង្កេត បង្ក្រាបរាល់ការនាំចូលផលិតផលគ្មានគុណភាព គ្មានសុវត្ថិភាព ដែលប៉ះពាល់ដល់សុខភាពប្រជាពលរដ្ឋ។

កម្លាំងការិយាល័យនគរបាលប្រឆាំងបទល្មើសសេដ្ឋកិច្ច សហការជាមួយក.ប.ប. រាជធានីភ្នំពេញ ដើម្បីយកទៅដុតបំផ្លាញចោល៕

The post សាច់បង្កកខូចគុណភាព និងគ្មានសុវត្ថិភាពជាង ១១តោន ត្រូវបានបង្រោ្កប និង ដុតបំផ្លាញចោល appeared first on Kampuchea Thmey Daily.

កាលពី​រសៀល​ថ្ងៃ​ទី ៦ ខែ​កុម្ភៈ ឆ្នាំ ២០២៥ កម្លាំង​ការិយាល័យ​ប្រឆាំង​បទល្មើស​សេដ្ឋកិច្ច នៃ​ស្នងការដ្ឋាន​នគរបាល​ខេត្ត​បាត់ដំបង សហការ​ជាមួយ​មន្ត្រី​សាខា ក ប ប ខេត្ត​បាត់ដំបង និង​តំណាង​ក្រុមហ៊ុន​យូ​អិន​ធី ហូល​សែ​ល ខូ​អិ​ល​ធី​ឌី បាន​ធ្វើការ​ដុត​កម្ទេច​ចោល​នូវ​ទឹកដោះគោ​ដែល​ឈ្មួញ​នាំចូល​រំលោភ​កម្មសិទ្ធិបញ្ញា​ចំនួន ២៤ កេស និង ១៩ ថង់ ដែល​មន្ត្រី​សាខា (​ក​.​ប​.​ប) ចាប់​បាន​នា​ពេល​កន្លងមក។

លោក យី យក់សាន នាយការិយាល័យ​ប្រឆាំង​បទល្មើស​សេដ្ឋកិច្ច នៃ​ស្នងការ​នគរបាល​ខេត្ត​បាត់ដំបង បាន​បញ្ជាក់​ថា ទឹកដោះគោ​ដែល​កម្ទេច​ខាងលើ ត្រូវ​បាន​កម្លាំង ក ប ប ធ្វើការ​ដកហូត​នា​ពេល​កន្លងមក ដែល​បាន​នាំចូល​រំលោភ​កម្មសិទ្ធិបញ្ញា​របស់​ក្រុមហ៊ុន Du tchmill (​ទឹកដោះគោ​នេះ​ជា​សិទ្ធិ​ចែកចាយ​ផ្ដាច់មុខ​ដោយ​ក្រុមហ៊ុន Du tchmill)។

ការ​ដុត​កម្ទេច​នេះ​ធ្វើឡើង​ក្រោម​វត្តមាន លោកស្រី នេត្រ សុផារិន ព្រះរាជអាជ្ញា​រង នៃ​អយ្យការ​អម​សាលាដំបូង​ខេត្ត​បាត់ដំបង និង​បន្ទាប់ពី​បាន​ការ​អនុញ្ញាត​ពី​លោក​ឧត្ដមសេនីយ៍​ទោ ដាញ់ អេង​ប៊ុន​ចាន់ ស្នងការ នៃ​ស្នងការដ្ឋាន​នគរបាល​ខេត្ត​បាត់ដំបង​ផង​ដែរ៕

អត្ថបទ ៖ សោ និយមរ័ត្ន

The post ទំនិញល្មើសកម្មសិទ្ធិបញ្ញាជាច្រើន ត្រូវកម្លាំងជំនាញដុតកម្ទេចចោល appeared first on Kampuchea Thmey Daily.

បើ​តាម​មន្ត្រី​គយ​បាន​ឱ្យដឹងថា ការ​ដុះ​បំផ្លាញ​ស្លាប​មាន់ គ្រឿង​ក្នុង​មាន់​បង្កក ជើងទាបង្កក និងចុងស្លាបមាន់​បង្កក​ នេះ គឺបានមក​ពី​ការបង្ក្រាប​បាន​តាំង​ពី​ថ្ងៃទី២៨ និង២៩ ខែសីហា​កន្លងមកនេះ។

មន្ត្រី​ដដែល​បញ្ជាក់​ទៀត​ថា គ្រឿង​សាច់​បង្កក​ទាំង​នេះ​ ឈ្មួញ​លួចលាក់​បង្កប់​ក្នុង​ទំនិញ​ដទៃ ដែល​នាំចូល​ពី​ប្រទេស​ថៃ តាម​ផែស្ងួត​ដូង ខ្លះទៀត លួចលាក់​ដឹកជញ្ជូន​តាម​ច្រករបៀង​ក្នុងភូមិ​សាស្ត្រ​ស្រុក​ស្វាយចេក ខេត្តបន្ទាយមានជ័យ និង​ លួចលាក់​ដឹក​តាម​ច្រក​របៀង​ក្នុង​ភូមិ​សាស្ត្រ​ស្រុក​ស្វាយចេក ខេត្ត​បន្ទាយមានជ័យ។

បើ​តាម​ការ​ពិនិត្យ​ជាក់ស្ដែង ផលិតផល​សត្វ​បង្កក​ទាំងអស់​នេះ នាំចូល​ពី​បរទេស ស្តុក​ទុក និង​លក់​ចែកចាយ​នៅ​រាជធានី​ភ្នំពេញ ដោយ​គ្មាន​លិខិត​អនុញ្ញាត​អ្វី​ទាំងអស់ និង​ជា​ផលិតផល​បំណែក​សាច់​បង្កក ដែល​ក្រសួងពាណិជ្ជកម្ម និង​ក្រសួងកសិកម្ម ចាត់វិធានការ​ផ្អាក​ធ្វើការ​នាំចូល​ជា​បណ្ដោះអាសន្ន​រយៈពេល ០៦ ខែ កាលពី​ថ្ងៃ​ទី ១២ ខែ​មេសា ឆ្នាំ ២០២៤ កន្លង​ទៅ៕

The post សាច់​មាន់​បង្កក និងគ្រឿង​ក្នុង​បង្កក​ ដែល​នាំ​ចូល​ខុសច្បាប់​ប្រមាណ​ជាង៤តោន ​ត្រូវ​សមត្ថកិច្ច​ពាក់ព័ន្ធ​ដុត​បំផ្លាញ​ចោល appeared first on Kampuchea Thmey Daily.

លោក ហ៊ុន សារ៉ាត់ បាន​ឲ្យ​ដឹង​ថា ជើង​មាន់​បង្កក​ខាង​លើ​នេះ ក្រុមការងារ​បាន​ឃាត់​ចាប់ កាលពី​វេលា​ម៉ោង ១០ និង ៣០ នាទី ថ្ងៃ​ទី ១៤ ខែ​សីហា ឆ្នាំ ២០២៤ ដោយ​មាន​ការ​បញ្ជា​ផ្ទាល់​ពី​លោក តាន់ ផាន់ណារ៉ា ប្រតិភូ​ទទួល​បន្ទុក​ជា​អគ្គនាយក នៃ​អគ្គនាយកដ្ឋាន​សុខភាព​សត្វ និង​ផលិតកម្ម​ ឲ្យ​ក្រុមការងារ​អន្តរាគមន៍​បង្ក្រាប​បទល្មើស​ចលនា​សត្វ និង​ផលិតផល​សត្វ របស់​អគ្គនាយកដ្ឋាន​សុខភាព​សត្វ និង​ផលិតកម្ម​សត្វ ចុះ​ឃាត់​ត្រួតពិនិត្យ​លើ​រថយន្ត ១ គ្រឿង ម៉ាក HYUNDIA ពាក់​ស្លាក​លេខ ភ្នំពេញ 3F-5070 នៅ​ជិត​ផ្សារ​ទួល​ពង្រ ភូមិ​ត្រពាំង​រំចេក សង្កាត់​ចោមចៅ ខណ្ឌ​ពោធិ៍​សែន​ជ័យ រាជធានី​ភ្នំពេញ លើ​ផ្លូវ​បេតុង។

លោក​បាន​បន្ត​ថា ការ​ដុត​កម្ទេច​ចោល​ជើងមាន់​បង្កក​ចំនួន ២ តោន ខាង​លើ​នេះ ដោយ​មាន​ការ​អនុញ្ញាត​ពី​ព្រះរាជអាជ្ញា នៃ​អយ្យការ​អម​សាលាដំបូង​រាជធានី​ភ្នំពេញ ផង​ដែរ។ តាម​ការ​ពិនិត្យ​ជាក់ស្ដែង ផលិតផល​សត្វ​បង្កក​ទាំងអស់​នេះ នាំចូល​ពី​បរទេស ស្តុក​ទុក និង​លក់​ចែកចាយ​នៅ​រាជធានី​ភ្នំពេញ ដោយ​គ្មាន​លិខិត​អនុញ្ញាត​អ្វី​ទាំងអស់ និង​ជា​ផលិតផល​បំណែក​សាច់​បង្កក ដែល​ក្រសួងពាណិជ្ជកម្ម និង​ក្រសួងកសិកម្ម ចាត់វិធានការ​ផ្អាក​ធ្វើការ​នាំចូល​ជា​បណ្ដោះអាសន្ន​រយៈពេល ០៦ ខែ កាលពី​ថ្ងៃ​ទី ១២ ខែ​មេសា ឆ្នាំ ២០២៤ កន្លង​ទៅ៕

អត្ថបទ ៖ សំណាង

The post ដុតកម្ទេចជើងមាន់បង្កក ២ តោន នាំចូលពីបរទេស appeared first on Kampuchea Thmey Daily.

ពិធីដុតកម្ទេចនេះ មានវត្តមានចូលរួមពីសំណាក់លោកនាយឧត្តមសេនីយ៍ មាស វិរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀន លោក ងួន ណារ៉ា ប្រធានសាលាដំបូងរាជធានីភ្នំពេញ និងលោក ហ៊ុន សុរិទ្ធី អភិបាលរងរាជធានីភ្នំពេញ ព្រមទាំងតំណាងស្ថាប័នពាក់ព័ន្ធផ្សេងៗទៀត។

សារធាតុញៀន និងសារធាតុគីមី ដែលត្រូវដុតកម្ទេចពេលនេះ គឺជាវត្ថុតាងគ្រឿងញៀនដែលទាក់ទងនឹងការផលិត ការជួញដូរ ការចែកចាយ និងប្រើប្រាស់គ្រឿងញៀន។ ក្នុងនោះ សារធាតុគីមីផ្សំ សារធាតុគីមី ទាក់ទងការកែច្នៃ-ផលិត ការជួញដូរ ដោយខុសច្បាប់នូវសារធាតុញៀនដែលត្រូវបានសាលាដំបូងរាជធានីភ្នំពេញ សម្រេចរឹបអូស ហើយប្រគល់ជូនដល់គណៈកម្មការដុតបំផ្លាញគ្រឿងញៀន ឆ្នាំ២០២៤ មានសរុប ៧តោន ៣៥៤គីឡួក្រាម ១០៨,៧៦ក្រាម ក្នុងសំណុំរឿងគ្រឿងញៀនចំនួន ៥៤សំណុំរឿង។ នេះបើតាមរបាយការណ៍របស់អាជ្ញាធរជាតិប្រយុទ្ធប្រឆាំងគ្រឿងញៀន។

តែដោយសារធាតុគីមីផ្សំដែលរឹបអូសបានតាមលក្ខណៈគីមីមិនអាចធ្វើការកម្ទេចដោយវិធីដុតទាំងអស់បាន គឺបានសម្រេចកម្ទេចដោយវិធីសាស្ត្រដុតនូវសារធាតុញៀន និងសារធាតុគីមីចំនួន ៤តោន ១០០គីឡូក្រាម ១០៨,៧៦ក្រាមប៉ុណ្ណោះ និងដោយឡែកមួយចំនួនទៀត គឺការបំផ្លាញដោយវិធីសាស្ត្របន្សាបនូវសារធាតុគីមីផ្សំចំនួន ៣តោន ២៥៤គីឡូក្រាម ដែលជាអាស៊ីតមិនអាចធ្វើការបំផ្លាញដោយវិធីដុតបាន៕

The post សារធាតុញៀន និងសារធាតុគីមីជាង ៤តោន ត្រូវបានដុតកម្ទេចនៅថ្ងៃទី១៤ ខែមិថុនានេះ appeared first on Kampuchea Thmey Daily.

តាមសំណេរដដែល ក.ប.ប សហការជាមន្រ្តីជំនាញគយចល័តតំបន់៤ ស្ថិតនៅតំបន់អូរតាគី បានធ្វើការត្រួតពិនិត្យលើឆ្អឹងជំនីជ្រូក និងជើងជ្រូកបង្កកដែលបាននាំចូល ហើយមន្រ្តីជំនាញសាខា ក.ប.ប. ខេត្តបាត់ដំបង ពិនិត្យរួចឃើញថាសាច់បង្កកនេះមានលក្ខណៈមិនសមស្របតាមស្តង់ដាសាច់បង្កកឡើយ។

បន្ទាប់ពីបានពិនិត្យលើសាច់បង្កករួចបានរកឃើញថាមិនមានលក្ខណៈសមស្រប មន្រ្តីជំនាញសាខា ក.ប.ប. ខេត្តបាត់ដំបង និងមន្រ្តីជំនាញគយចល័តតំបន់៤ បានដុតកម្ទេចនូវឆ្អឹងជំនីរជ្រូក និងជើងជ្រូកបង្កកចោលតាមនីតិវិធី។

គួរឱ្យដឹងថា ការដុតកម្ទេចនេះ គឺស្ថិតក្រោមការសម្របសម្រួលពីលោក ទុត វីនីត ព្រះរាជអាជ្ញារង នៃអយ្យការអមសាលាដំបូងខេត្ត និងមានការចូលរួមពីមន្រ្តីជំនាញគយចល័តតំបន់៤ និងអាជ្ញាធរដែនដីផងដែរ៕

ដោយ៖ ង៉ិល ណារ៉ាត់

The post ក.ប.ប ដុតចោលឆ្អឹងជំនីរ និងជើងជ្រូកបង្កក ចំនួន ២ ៣៥២Kg appeared first on Kampuchea Thmey Daily.

ក្រោម​ការ​ចង្អុលបង្ហាញ​ពី​សំណាក់ លោក ផាន អូន ប្រតិភូ​រាជរដ្ឋាភិបាល ទទួល​បន្ទុក​ជា​អគ្គនាយក នៃ​អគ្គនាយកដ្ឋាន ក​.​ប​.​ប មន្ត្រី​សាខា ក​.​ប​.​ប រាជធានី​ភ្នំពេញ បាន​ប្រារព្ធ​ពិធី​ដុត​កម្ទេច​ចោល​សាច់​បង្កក មើម​ខ្ញី និង​ខ្ញី​ហាន់​រួច ខូចគុណភាព កង្វះ​អនាម័យ មិន​អនុលោម​តាម​បទប្បញ្ញត្តិ​បច្ចេកទេស និង​មាន​ការ​ត្រាំ​នូវ​សារធាតុ​គីមី Sodium Hydrosulfite ដែល​មន្ត្រី​ជំនាញ​បង្ក្រាប​បាន នា​ពេល​ថ្មីៗ​នេះ។

បើ​តាម​មន្ត្រី​ជំនាញ ផលិតផល​ដែល​ត្រូវ​បាន​បំផ្លាញ​ចោល​ទាំងនោះ​រួមមាន ៖ សាច់​បង្កក​ខូច​គុណភាព ចំនួន ២,២២៨ គីឡូក្រាម និង មើម​ខ្ញី ខ្ញី​ហាន់​ត្រាំ (​មាន​ផ្ទុក​សារធាតុ​គីមី​ហាមឃាត់ Sodium Hydrosulfite) ចំនួន ១០ ការុង ស្មើនឹង ១៧០ គីឡូក្រាម។

គួរ​ជម្រាប​ថា ក្នុង​ពិធី​ដុត​កម្ទេច​ចោល​សាច់​បង្កក មើម​ខ្ញី និង​ខ្ញី​ហាន់​រួច ខូចគុណភាព កង្វះ​អនាម័យ មិន​អនុលោម​តាម​បទប្បញ្ញត្តិ​បច្ចេកទេស និង​មាន​ការ​ត្រាំ​នូវ​សារធាតុ​គីមី Sodium Hydrosulfite នេះ ក៏​មាន​ការ​សម្របសម្រួល និង​ចូលរួម​ពី​អាជ្ញាធរ​ដែនដី និង​ការិយាល័យ​នគរបាល​ប្រឆាំង​បទល្មើស​សេដ្ឋកិច្ច នៃ​ស្នងការដ្ឋាន​នគរបាល​រាជធានី​ភ្នំពេញ ផង​ដែរ៕

អត្ថបទ ៖ ពិសី

The post មន្ត្រី ក.ប.ប ដុតកម្ទេចចោលសាច់បង្កក មើមខ្ញី និង ខ្ញីហាន់ ខូចគុណភាព លាយសារធាតុគីមី ជាង ២ ពាន់គីឡូក្រាម appeared first on Kampuchea Thmey Daily.

ពិធីនេះបានធ្វើឡើងនាព្រឹកថៃ្ងទី២៨ ខែមិថុនា ឆាំ២០២៣នេះ ក្នុងឱកាសអបអរសាទរទិវាអន្តរជាតិប្រយុទ្ធប្រឆាំងគ្រឿងញៀនថ្ងៃទី២៦ ខែមិថុនា ឆ្នាំ២០២៣ ក្រោមប្រធានបទ “អ្វីៗដើម្បីប្រជាជនជាចម្បង បញ្ឈប់ការរើសអើង និងមាក់ងាយអ្នកញៀនគ្រឿងញៀន ពង្រឹងការងារអប់រំបង្ការ” ក្រោមអធិបតីភាពសម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងមានការចូលរួមពីអាជ្ញាធរ កងកម្លាំង ប្រជាពលរដ្ឋ និងយុវជន ប្រមាណជាង ៣ពាន់នាក់នៅនៅមជ្ឈមណ្ឌលសន្និបាត និងពិព័រណ៍កោះពេជ្រ ។

សម្ដេចក្រឡាហោម ស ខេង បានមានប្រសាសន៍លើកឡើងថា៖ “ក្នុងរយៈពេល៥ខែដើមឆ្នាំ២០២៣នេះ កម្លាំងមានសមត្ថកិច្ចរបស់យើងបង្ក្រាបគ្រឿងញៀនបានចំនួន៣១៤៣ករណី និងឃាត់ខ្លួនជនសង្ស័យបានចំនួន៧៤៨០នាក់ ជាមួយនឹងការរឹបអូសគ្រឿងញៀនបានចំនួន៨៣៨គីឡូក្រាម៧៧២,៦ក្រាម។

ពាក់ព័ន្ធនឹងគ្រឿងញៀននេះ គ្រាន់តែនៅរាជធានីភ្នំពេញ កម្លាំងមានសមត្ថកិច្ចយើងបង្ក្រាបបានជាង ៥តោនកន្លះ ដែលយើងត្រូវដុតបំផ្លាញចោលពេលនេះ។ ប៉ុន្តែក្នុងចំនួននេះមិនបានគិតពីសារធាតុគីមីផ្សេងៗ ដែលយើងត្រូវបន្សាបនិងរំលាយចោលនៅពេលក្រោយនោះទេ”។

សម្ដេចក្រឡាហោម ស ខេង ក៏បានបញ្ជាក់ផងដែរថា ករណីគ្រឿងនេះ នៅតែកើនឡើងជាលំដាប់ដែលទាមទារឱ្យ អាជ្ញាធរ កងកម្លាំងមានសមត្ថកិច្ចទាំងអស់ ត្រូវតែមានឆន្ទៈខ្ពស់ ក្នុងការបង្ក្រាប ព្រោះថា វាជាគ្រោះថ្នាក់ដ៏ធ្ងន់ធ្ងរ សម្រាប់ប្រជាពលរដ្ឋ ពិសេសស្រទាប់យុវវ័យ ដែលជាទំពាំងស្នងឬស្សីរបស់ជាតិតែម្តង។

ជាមួយគ្នានោះ លោក ហ៊ុន សុរិទ្ធី អភិបាលរងរាជធានីភ្នំពេញ តំណាងឱ្យ លោក ឃួង ស្រេង អភិបាលរាជធានីភ្នំពេញ បានមានប្រសាសន៍លើកឡើងថា ក្នុងឆ្នាំ២០២២កន្លងមកនេះ គណៈកម្មាធិការត្រួតពិនិត្យគ្រឿងញៀនរាជធានីភ្នំពេញ បានបង្ក្រាបបទល្មើសគ្រឿងញៀនចំនួន ៩៧៨ ករណី ឃាត់ខ្លួនជនសង្ស័យចំនួន ១.៨៥៧ នាក់ (នារី ១៧៨ នាក់) ពាក់ព័ន្ធបទល្មើសដូចជា ជួញដូរ និងរក្សាទុក គ្រឿងញៀន, ដឹកជញ្ជូន និងរក្សាទុកគ្រឿងញៀន, ចាត់ចែង-សម្រួលឱ្យប្រើប្រាស់គ្រឿងញៀន, បើកបរក្រោមឥទ្ធិពលគ្រឿងញៀន និងករណីប្រើប្រាស់គ្រឿងញៀន ជាដើម។ ដោយឡែក ចំពោះការងារអប់រំកែប្រែ និងស្តារនីតិសម្បទា គណៈកម្មាធិការបានយកចិត្តទុកដាក់បញ្ចូនជនរងគ្រោះ ដោយសារគ្រឿងញៀនទាំងដើមគ្រា និងក្នុងគ្រា បញ្ចូនទៅមជ្ឈមណ្ឌលឱកាសខ្ញុំ សរុបចំនួន ៧.១៧៦ នាក់ (នារី ៣៥២ នាក់) បញ្ចូនទៅព្យាបាលនៅតាមសហគមន៍ចំនួន ៧ នាក់ (នារី ១ នាក់) និងបានធ្វើសមាហរណកម្មជនរងគ្រោះ ដែលបានទទួលការព្យាបាលរួច ឱ្យចូលទៅរស់នៅក្នុងសហគមន៍វិញចំនួន ៥.២៩០ នាក់ (នារី ២៧៩ នាក់) ផងដែរ។

លោកបន្តថា ការជួបជុំគ្នាប្រារព្ធទិវាអន្តរជាតិប្រយុទ្ធប្រឆាំងគ្រឿងញៀនក្នុងថ្ងៃនេះ ធ្វើឡើងក្នុងគោលបំណងដាស់តឿន រំលឹក និងផ្សព្វផ្សាយដល់ប្រជាពលរដ្ឋទូទៅ ជាពិសេសយុវជន ឱ្យយល់ដឹងច្បាស់ពីគ្រោះថ្នាក់ និងផលប៉ះពាល់ យ៉ាងធ្ងន់ធ្ងរបង្កឡើងដោយគ្រឿងញៀន ហើយក៏ជាសារព្រមានដល់ក្រុមឧក្រិដ្ឋជនទាំងឡាយ ឱ្យបញ្ឈប់ជាបន្ទាន់នូវរាល់ សកម្មភាពល្មើសច្បាប់ពាក់ព័ន្ធបញ្ហាគ្រឿងញៀន និងឧក្រិដ្ឋកម្មឆ្លងដែនផងដែរ។  រាជរដ្ឋាភិបាលកម្ពុជា ក៏ដូចជាអាជ្ញាធរ គ្រប់ជាន់ថ្នាក់ មានឆន្ទៈយ៉ាងមោះមុតក្នុងប្រយុទ្ធប្រឆាំងគ្រឿងញៀនខុសច្បាប់ និងប្តេជ្ញាបង្ក្រាបឱ្យខានតែបាន ដោយ គ្មានការលើកលែងណាមួយឡើយ៕

អត្ថបទដោយ៖ ស្រីរ័ត្ន

The post គ្រឿងញៀនជាង ៥តោន ត្រូវបានដុតកម្ទេចក្នុងទិវាអន្តរជាតិប្រយុទ្ធប្រឆាំងគ្រឿងញៀន appeared first on Kampuchea Thmey Daily.