សារធាតុញៀន និងសារធាតុគីមីជាង ៤តោន ត្រូវបានដុតកម្ទេចនៅថ្ងៃទី១៤ ខែមិថុនានេះ

នាព្រឹកថ្ងៃទី១៤ ខែមិថុនា ឆ្នាំ២០២៤នេះ អាជ្ញាធរជាតិប្រយុទ្ធប្រឆាំងគ្រឿងញៀន បានដុតកម្ទេចសារធាតុញៀន និងសារធាតុគីមីសរុបប្រមាណជាង ៤តោន ដែលវត្ថុតាងរឹបអូសបានពាក់ព័ន្ធនឹងសំណុំរឿងគ្រឿងញៀនខុសច្បាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពិធីដុតកម្ទេចនេះ មានវត្តមានចូលរួមពីសំណាក់លោកនាយឧត្តមសេនីយ៍ មាស វិរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀន លោក ងួន ណារ៉ា ប្រធានសាលាដំបូងរាជធានីភ្នំពេញ និងលោក ហ៊ុន សុរិទ្ធី អភិបាលរងរាជធានីភ្នំពេញ ព្រមទាំងតំណាងស្ថាប័នពាក់ព័ន្ធផ្សេងៗទៀត។

សារធាតុញៀន និងសារធាតុគីមី ដែលត្រូវដុតកម្ទេចពេលនេះ គឺជាវត្ថុតាងគ្រឿងញៀនដែលទាក់ទងនឹងការផលិត ការជួញដូរ ការចែកចាយ និងប្រើប្រាស់គ្រឿងញៀន។ ក្នុងនោះ សារធាតុគីមីផ្សំ សារធាតុគីមី ទាក់ទងការកែច្នៃ-ផលិត ការជួញដូរ ដោយខុសច្បាប់នូវសារធាតុញៀនដែលត្រូវបានសាលាដំបូងរាជធានីភ្នំពេញ សម្រេចរឹបអូស ហើយប្រគល់ជូនដល់គណៈកម្មការដុតបំផ្លាញគ្រឿងញៀន ឆ្នាំ២០២៤ មានសរុប ៧តោន ៣៥៤គីឡួក្រាម ១០៨,៧៦ក្រាម ក្នុងសំណុំរឿងគ្រឿងញៀនចំនួន ៥៤សំណុំរឿង។ នេះបើតាមរបាយការណ៍របស់អាជ្ញាធរជាតិប្រយុទ្ធប្រឆាំងគ្រឿងញៀន។

តែដោយសារធាតុគីមីផ្សំដែលរឹបអូសបានតាមលក្ខណៈគីមីមិនអាចធ្វើការកម្ទេចដោយវិធីដុតទាំងអស់បាន គឺបានសម្រេចកម្ទេចដោយវិធីសាស្ត្រដុតនូវសារធាតុញៀន និងសារធាតុគីមីចំនួន ៤តោន ១០០គីឡូក្រាម ១០៨,៧៦ក្រាមប៉ុណ្ណោះ និងដោយឡែកមួយចំនួនទៀត គឺការបំផ្លាញដោយវិធីសាស្ត្របន្សាបនូវសារធាតុគីមីផ្សំចំនួន ៣តោន ២៥៤គីឡូក្រាម ដែលជាអាស៊ីតមិនអាចធ្វើការបំផ្លាញដោយវិធីដុតបាន៕