ថ្លែងប្រាប់ កម្ពុជាថ្មី លោក គី ហាំង បញ្ជាក់ថា ចម្ការលម៉ើរបស់លោកនៅពាក់កណ្ដាលខែមីនានេះ គឺផ្ដើមឱ្យផ្លែផ្កាជាបណ្ដើរៗហើយ។ លោកថា ដំណាំលម៉ើជាប្រភេទដំណាំមួយដែលអាចចាត់ទុកថាប្រើប្រាស់រយៈពេលយូរទម្រាំទទួលបានផល ពោលគឺទាល់តែ ១៥០ថ្ងៃ ឬស្មើនឹង ៤ខែកន្លះ ទើបអាចប្រមូលផលលក់បាន។

ចំពោះតម្លៃវិញ កសិកររូបនេះ បានឱ្យដឹងទៀត កាលពីឆ្នាំទៅមុន លម៉ើនៅក្នុងចម្ការ គី ហាំង របស់លោកអាចលក់ចេញទៅកាន់ទីផ្សារបានចន្លោះពី ១៥ដុល្លារ ទៅ ២០ដុល្លារ ក្នុង១គីឡូក្រាម។ ចំណែកអតិថិជនវិញ ភាគច្រើនពួកគាត់អញ្ជើញមកដើរកម្សាន្តទិញដល់ចម្ការផ្ទាល់ និងខ្លះទៀតក៏បានកម្មុងទិញតាមរយៈអនឡាញយ៉ាងច្រើនកុះករ ផងដែរ។

ក្រៅពីដាំផ្លែលម៉ើសម្រាប់ផ្គត់ផ្គង់ផ្លែស្រស់ទៅកាន់ទីផ្សារ លោក គី ហាំង និងគ្រួសារ ក៏មានរបរមួយទៀតនោះគឺការផ្គត់ផ្គង់កូនលម៉ើ សម្រាប់លក់ទៅកាន់អតិថិជន ពិសេសកសិករផ្សេងទៀតដែលមានបំណងចង់សាកល្បងដាំលម៉ើនេះសម្រាប់លម្អតាមមុខផ្ទះ និងអាចដាំសម្រាប់ធ្វើអាជីវកម្មក៏បានផងដែរ។

គួរ​ឱ្យដឹងថា ចម្ការលម៉ើរបស់លោក គី​ ហាំង ជាចម្ការលម៉ើមួយដែលមានទីតាំងស្ថិតនៅភូមិ កូនភ្នំខាងជើង ឃុំតាស្ដា ស្រុកសំពៅលូន ខេត្តបាត់ដំបង។ បច្ចុប្បន្នចម្ការលម៉ើរបស់កសិករូបនេះ មានដើមលម៉ើចំនួន ៤៥០ដើមក្នុងផ្ទៃដីសរុបជិត ២ហិកតា ដែលជាមធ្យម លម៉ើ១ដើម អាចប្រមូលផលបាន ៨០គីឡូក្រាម៕

អត្ថបទ ៖ សួស សិត

The post កសិករនៅខេត្តបាត់ដំបងម្នាក់រំពឹងថា ឆ្នាំនេះទិន្នផលលម៉ើនឹងទទួលបានផលខ្ពស់ appeared first on Kampuchea Thmey Daily.

អ្នកស្រី ហេង គីមឡាយ ជា​ម្ចាស់​ចម្ការ​លម៉ើ ដែល​មាន​ទីតាំង​ស្ថិត​ក្នុង​ភូមិ​ដូង ឃុំ​មានជ័យ ស្រុក​បាណន់ ខេត្ត​បាត់ដំបង បាន​រៀបរាប់​ថា ដំបូង​ឡើយ គឺជា​គំនិត​ស្វាមី​របស់​អ្នកស្រី​ផ្ទាល់ ដោយ​គាត់​បាន​គិត​ថា​ នៅ​បាត់ដំបង​មិន​ទាន់​មាន​នរណា​ម្នាក់​ដាំ​លម៉ើ​ឲ្យ​បាន​ធំដុំ​នៅឡើយ​ទេ។ ម្យ៉ាង ស្វាមី​របស់​គាត់ ធ្លាប់​ឆ្លងកាត់​ការ​សិក្សា​ផ្នែក​កសិកម្ម​ផង​ដែរ ដូច្នេះ​ហើយ​ទើប​ពួកគាត់​ចាប់ផ្ដើម​ដាំ​លម៉ើ​នេះ​តែម្ដង។

នៅ​លើ​ផ្ទៃដី​ទំហំ ៤ ហិតា អ្នកស្រី ហេង គឹមឡាយ បាន​អះអាង​ថា គឺ​មាន​ដើម​លម៉ើ​ចំនួន ៤២០ ដើម ហើយ​ប្រភេទ​ដើម​លម៉ើ​នេះ គឺ ពូជ​មាន​ច្រើន​ប្រភេទ ប៉ុន្តែ​អ្នកស្រី​បាន​យក​ពូជ​ដែល​ផ្លែ​វា​ពណ៌​លឿង គឺជា​ពូជ​បាក់​ហ៊ី​លឿង នាំ​ចូល​មកពី​ប្រទេស​អង់គ្លេស។ រហូត​មក​ទល់​នឹង​ថ្ងៃនេះ ក្នុង​ការ​ដាំ​ដំណាំ​លម៉ើ មាន​រយៈពេល ៣ ឆ្នាំ​កន្លះ​ហើយ ទើប​ទទួល​បាន​ផល។

អ្នកស្រី បាន​បន្ថែម​ថា សម្រាប់​ការ​ថែទាំ​ គឺ​ដំណាំ​នេះ​ងាយស្រួល ​មិន​សូវ​ពិបាក​ទេ ដោយ​អ្នកស្រី​បាន​បង្កប់​ទុយោ​ទឹក​នៅ​ក្រោម​ដី ហើយ ២ ឬ​ ៣​ ថ្ងៃ​ ត្រូវ​បើក​ស្រោច​ម្ដង ទៅ​តាម​អាកាសធាតុ​ក្តៅ ឬ ត្រជាក់ ព្រោះ​ពេលខ្លះ​ក៏​មាន​ភ្លៀង​ធ្លាក់​ផង​ដែរ។ រីឯ​ការ​ទទួល​ផល​សម្រាប់​ដំណាំ​លម៉ើ​ដែល​អ្នកស្រី​ដាំ​នៅ​ពេលនេះ​ គឺ​ក្នុង​ ១​ ដើម ​អាច​ទទួល​បាន​ចាប់ពី ៣០ គីឡូក្រាម​ ឡើង​ទៅ ហើយ​នេះ​ជា​ទិន្នផល​មួយ​ដែល​អ្នកស្រី​អាច​ទទួល​យក​បាន​សម្រាប់​ដំណាំ​ប្រភេទ​នេះ ម្យ៉ាងទៀត​ តម្លៃ​ក៏បាន​ខ្ពស់​ សម្រាប់​ភ្ញៀវ​ទេសចរ​ទៅ​កម្សាន្ត ហើយ​ចង់​ទិញ​ញ៉ាំ​ គឺ​ក្នុង ១ ​គីឡូក្រាម ៤៥ ០០០ រៀល ប៉ុន្តែ​បើ​មាន​អតិថិជន​ចង់​ទៅ​ទិញ​ច្រើន​ដើម្បី​យក​មក​លក់​បន្ត នោះ​អ្នកស្រី​បាន​សង្កត់ធ្ងន់​ថា ​តម្លៃ​អាច​ចរចា​គ្នា​បាន។

ម្យ៉ាងវិញទៀត អ្នកស្រី ក៏បាន​អំពាវនាវ​ឲ្យ​ភ្ញៀវ​ទេសចរ​ក្នុងស្រុក ​ឬ​ ក្រៅ​ស្រុក​ អាច​ទៅ​កម្សាន្ត​នៅ​ក្នុង​ចម្ការ​នេះ​បាន ដើម្បី​ថត​យក​ទេសភាព​ស្អាតៗ​ បើទោះបីជា​មិន​បាន​ទិញ​លម៉ើ​របស់​អ្នកស្រី​ក៏​ដោយ ហើយ​នៅ​ក្នុង​ទីតាំង​ចម្ការ​នេះ​ ស្វាមី​របស់​អ្នកស្រី​ នឹង​មាន​គម្រោង​រៀបចំ​កែច្នៃ​បន្ថែម​ទៀត ដើម្បី​ធ្វើ​យ៉ាងណា​ឲ្យ​មាន​សោភ័ណភាព និង​ដើម្បី​ទាក់ទាញ​ភ្ញៀវ​ទេសចរ​ឲ្យ​ចូល​ទៅ​កម្សាន្ត​ដោយ​មិន​គិត​តម្លៃ​អ្វី​ឡើយ។

ដោយឡែក លោក រ៉ា​មី គឺជា​ភ្ញៀវ​ទេសចរ​មួយរូប​ដែល​បាន​ទៅ​កម្សាន្ត​នៅ​ក្នុង​ចម្ការ​លម៉ើ​នេះ បាន​លើក​សរសើរ​អំពី​ម្ចាស់​ចម្ការ​ដែល​បាន​កែច្នៃ​ និង​ដាំ​ដំណាំ​លម៉ើ​នេះ​បាន​យ៉ាង​ល្អ​ ហើយ​មាន​រសជាតិ​ស្រួយ ផ្អែម​ឆ្ងាញ់ ដោយ​មិន​មាន​ជាតិ​ចត់​ឡើយ។ លោក​បាន​សរសើរ​មិន​ដាច់​ពី​មាត់​ដល់​ស្នាដៃ​របស់​ម្ចាស់​ចម្ការ​ ដែល​នេះ​ខ្មែរ​ក៏​អាច​ធ្វើ​បាន៕

អត្ថបទ ៖ សោ និយមរ័ត្ន

The post ចម្ការលម៉ើដ៏ធំមួយ បានកកើតឡើងនៅលើទឹកដីស្រុកបាណន់ appeared first on Kampuchea Thmey Daily.

ស្ថិតនៅក្នុងវ័យ ៣៨ឆ្នាំ លោក គី ហាំង ជាម្ចាស់ចម្ការលម៉ើ ស្ថិតនៅស្រុកសំពៅលូន ខេត្តបាត់ដំបង ប្រាប់ កម្ពុជាថ្មី ថា ចម្ការលម៉ើរបស់លោក បច្ចុប្បន្នមានលម៉ើចំនួន៧រសជាតិ ដែលកំពុងទទួលបានការពេញនិយមខ្លាំងពីសំណាក់ភ្ញៀវទេសចរ និងអតិថិជនដែលអញ្ជើញមកដល់ចម្ការផ្ទាល់។ គី ហាំង បន្តថា ដំណាំលម៉ើនេះ លោក និងភរិយា បានចាប់ផ្ដើមដាំវាឡើងមកតាំងពីឆ្នាំ ២០២១មកម្ល៉េះ។

ផ្ដើមចេញពីអ្នកលក់លម៉ើដែលទិញពីចម្ការរបស់គេ លោក គី ហាំង បានសម្រេចក្ដីស្រមៃខ្លួនឯង ដោយប្រែក្លាយដីចម្ការផ្ទាល់ខ្លួនចំនួន ២ហិកតាកន្លះ ដាក់ដាំលម៉ើចំនួនជាង៤០០ដើម រហូតទទួលបានផល និងអាចលក់បានតម្លៃមួយ៉ាងល្អ នៅលើទីផ្សារបច្ចុប្បន្ន។

ម្ចាស់ចម្ការរូបនេះ បានឱ្យដឹងទៀតថា ដំណាំលម៉ើទាំង ៧រសជាតិក្នុងចម្ការរបស់លោក ជាប្រភេទពូជលម៉ើក្រហម ឬអាចហៅបានថា «ពូជប៉ាហ៊ី» និងប្រភេទខ្លះទៀត មានពណ៌លឿង ដែលសុទ្ធសឹងតែជាប្រភេទផ្លែលម៉ើដែលមានរសជាតិផ្អែម និងស្រូយ ងាយស្រួលទទួលទាន។

សម្រាប់ពេលបច្ចុប្បន្ន ចម្ការលម៉ើរបស់លោក គី ហាំង កំពុងបានដាក់ឱ្យភ្ញៀវទេសចរ ចូលរួមទស្សនា និងភ្លក្សរសជាតិ ផ្លែលម៉ើទាំង៧រសជាតិ​ នៅក្នុងចម្ការផ្ទាល់។ ជាងនេះទៅទៀត ផ្លែលម៉ើនៅក្នុងចម្ការរបស់លោក គី ហាំង ក៏មានការគាំទ្រពីសំណាក់ប្រជាជនខ្មែរតាមរយៈបណ្ដាសង្គម ដោយអតិថិជនខ្លះ ក៏បានកម្មុងទិញលម៉ើស្រស់ៗនេះ តាមរយៈអនឡាញបានមួយចំនួនធំ ផងដែរ។

ចំពោះតម្លៃវិញ លោក គី ហាំង បានឱ្យដឹងដែរថា លម៉ើស្រស់ អាចលក់ចេញទៅកាន់ទីផ្សារបានចន្លោះពី ១៥ដុល្លារ ទៅ ២០ដុល្លារ ក៏អាស្រ័យទៅលើប្រភេទពូជរបស់វា។

ក្រៅពីដាំផ្លែលម៉ើសម្រាប់ផ្គត់ផ្គង់ផ្លែស្រស់ទៅកាន់ទីផ្សារ លោក គី ហាំង និងភរិយា ក៏មុខរបរមួយទៀតគឺការផ្គត់ផ្គង់កូនលម៉ើសម្រាប់លក់ទៅកាន់អតិថិជន និងកសិករផ្សេងទៀត ដែលមានបំណងចង់សាកល្បងដាំលម៉ើនេះជាលក្ខណៈកម្សាន្តក៏បាន និងសម្រាប់ធ្វើអាជីវកម្ម ក៏បានផងដែរ។

ចម្ការលម៉ើរបស់លោក គី​ ហាំង ជាចម្ការលម៉ើមួយដែលមានទីតាំងស្ថិតនៅភូមិ កូនភ្នំខាងជើង ឃុំតាស្ដា ស្រុកសំពៅលូន ខេត្តបាត់ដំបង។ បច្ចុប្បន្នចម្ការលម៉ើរបស់កសិករូបនេះ មានដើមលម៉ើចំនួន ៤៥០ដើមក្នុងផ្ទៃដីសរុប ២ហិកតាកន្លះ ដែលជាមធ្យម លម៉ើ១ដើម អាចប្រមូលផលបាន ៨០គីឡូក្រាម៕

អត្ថបទ ៖ សួស សិត

The post កសិករនៅខេត្តបាត់ដំបងម្នាក់ ដាំលម៉ើ៧រសជាតិ លក់បាន១គីឡូ ២០ដុល្លារ appeared first on Kampuchea Thmey Daily.

ស្ថិតនៅក្នុងវ័យ ៥៣ឆ្នាំ អ្នកស្រី ឆុង សោភា ជាម្ចាស់ចម្ការលម៉ើ ដែលមានទីតាំងស្ថិតនៅស្រុកតាំងគោក ខេត្តកំពង់ធំ ​ប្រាប់ កម្ពុជាថ្មី ថា ឆ្នាំនេះដំណាំលម៉ើក្នុងចម្ការអ្នកស្រី អាចប្រមូលផលបានច្រើនជាងឆ្នាំមុន ចំណែកតម្លៃវិញក៏បានល្អផងដែរ។

អ្នកស្រី បន្តថា ទិន្នផលលម៉ើឆ្នាំនេះ អាចលក់ចេញទៅកាន់ទីផ្សារបានចន្លោះពី ៧ដុល្លារ​ ទៅ ១០ដុល្លារ ក្នុងមួយគីឡូ ពោលគឺអាស្រ័យទៅលើការលក់ដុំ និងលក់រាយ។

ម្ចាស់ចម្ការរូបនេះ បានឱ្យដឹងដែរថា ចូលមកដល់ដើមខែសីហានេះ ចម្ការអ្នកស្រី កំពុងតែបើកទទួលភ្ញៀវទេសចរឱ្យចូលរួមទស្សនាក្នុងចម្ការ ​និងកំពុងតែបានដាក់លក់ផ្លែលម៉ើ និងទឹកលម៉ើស្រស់ នៅក្នុងចម្ការផ្ទាល់។

អ្នកស្រី ឆុង សោភា បញ្ជាក់ទៀតថា ដំណាំលម៉ើថ្វីត្បិតតែងាយស្រួលដាំដុះ និងអាចលក់បានតម្លៃខ្ពស់ តែក៏វាអាស្រ័យទៅលើយើងខ្លួនឯងចេះធ្វើទីផ្សារ មិនតែចំពោះតែការលក់ផ្ទាល់នៅចម្ការនោះទេ ការធ្វើទីផ្សារតាមអនឡាញ និងតាមរយៈការផ្សព្វផ្សាយផ្សេងៗ ក៏ជាកត្តាមួយសំខាន់ដែលនាំឱ្យមុខរបរនេះ អាចបន្តទៅមុខបាន ផងដែរ។

ក្រៅពីលក់ផ្លែលម៉ើ អ្នកស្រី ឆុង សោភា និងស្វាមី ក៏មានមុខរបរមួយទៀតនោះគឺ ជំនាញច្នៃស្រាលម៉ើ ដែលមានស្ដង់ដា មិនចាញ់ផលិតផលបរទេសនោះឡើយ។

ដំណាំលម៉ើរបស់អ្នកស្រី ឆុង សោភា ក្នុងមួយឆ្នាំ​ អាចប្រមូលផលបានចន្លោះពី ៧តោន ទៅ៨តោន ស្របទៅតាមអាកាសធាតុអំណោយផល ពិសេសគឺសម្បូរទឹកភ្លៀងច្រើនដូចឆ្នាំនេះជាដើម។

គិតមកទល់ពេលនេះ មុខរបរដាំផ្លែលម៉ើរបស់អ្នកស្រី ឆុង សោភា និងស្វាមី មានរយៈពេលប្រមាណជាង៤ឆ្នាំមកហើយ ពោលគឺចាប់តាំងពីឆ្នាំ២០២១មកម្ល៉េះ។ បច្ចុប្បន្ន ចម្ការលម៉ើរបស់អ្នកស្រី មានផ្ទៃដីដាំដុះសរុប២ហិកតា និងមានដើមលម៉ើដែលអាចប្រមូលបានចំនួន៤០០ដើម៕

អត្ថបទ ៖​ សួស សិត

The post ​ផ្លែលម៉ើ​នៅតែមានទីផ្សារល្អនៅឆ្នាំនេះ ខណៈតម្លៃក៏កាន់តែប្រសើរ appeared first on Kampuchea Thmey Daily.

អ្នកស្រី ឆុង សោភា អាយុ៥៣ឆ្នាំ ជាម្ចាស់ចម្ការលម៉ើ ដែលមានទីតាំងស្ថិតនៅស្រុកតាំងគោក ខេត្តកំពង់ធំ ប្រាប់ កម្ពុជាថ្មី ថា ឆ្នាំនេះ អ្នកស្រី រំពឹងថា ដំណាំលម៉ើរបស់អ្នកស្រី នឹងទទួលបានផលយ៉ាងហោចណាស់ ៧តោន ទៅ៨តោន ខណៈអាកាសធាតុឆ្នាំនេះ ពុំសូវក្ដៅខ្លាំងដូចឆ្នាំមុន។

អ្នកស្រី បានឱ្យដឹងដែរថា ចំពោះដំណាំលម៉ើកាលពីឆ្នាំមុន អាចប្រមូលផលបានត្រឹមតែ ៤តោន ទៅ៥តោន នៃផ្ទៃដីសរុប២ហិកតា តែប៉ុណ្ណោះ។ សម្រាប់តម្លៃវិញ ម្ចាស់ចម្ការរូបនេះ បញ្ជាក់ថា៖ «ដំណាំលម៉ើទុំ អាចលក់បានចន្លោះពី ៨ដុល្លារ​ ទៅ១០ដុល្លារ ក្នុង១គីឡូក្រាម»។

អ្នកស្រី ឆុង សោភា បានឱ្យដឹងទៀតថា ដំណាំលម៉ើនៅក្នុងចម្ការរបស់អ្នកស្រី នឹងត្រូវប្រមូលផលនាខែកក្កដាខាងមុខនេះ។ អ្នកស្រី ដាក់ក្ដីរំពឹងខ្ពស់ថាឆ្នាំនេះ ផ្លែលម៉ើនឹងប្រមូលផលបានច្រើន និងមានគុណភាពល្អ ដោយសារអាកាសធាតុអំណោយផលទឹកភ្លៀងច្រើនជាងឆ្នាំទៅមុន។

ក្រៅពីការដាំផ្លែលម៉ើសម្រាប់លក់ទៅកាន់ទីផ្សារទំនើបនានា អ្នកស្រី ឆុង សោភា ក៏មានមុខរបរមួយបន្ថែមទៀត នោះគឺ ការកែច្នៃផ្លែលម៉ើផលិតចេញទៅជាស្រាលម៉ើដែលមានគុណភាពខ្ពស់ មិនចាញ់ស្រាក្រហមរបស់បរទេសនោះឡើយ។

គួរឱ្យដឹងថា មុខរបរដាំផ្លែលម៉ើរបស់អ្នកស្រី ឆុង សោភា មានអាយុកាលប្រមាណជាង៤ឆ្នាំមកហើយ ពោលគឺចាប់តាំងពីឆ្នាំ២០២១មកម្ល៉េះ។ បច្ចុប្បន្ន ចម្ការលម៉ើរបស់អ្នកស្រី មានផ្ទៃដីដាំដុះសរុប២ហិកតា និងមានដើមលម៉ើដែលអាចប្រមូលបានចំនួន៤០០ដើម៕

អត្ថបទ ៖​ សួស សិត

The post កសិករដាំផ្លែលម៉ើម្នាក់រំពឹងថា ឆ្នាំនេះទទួលបានផលច្រើន និងមានទីផ្សារខ្ពស់ appeared first on Kampuchea Thmey Daily.