​ផ្លែលម៉ើ​នៅតែមានទីផ្សារល្អនៅឆ្នាំនេះ ខណៈតម្លៃក៏កាន់តែប្រសើរ

កសិករដាំផ្លែលម៉ើពីរនាក់ប្ដីប្រពន្ធ ស្ថិតនៅខេត្តកំពង់ធំ អាចប្រមូលផលលម៉ើលក់ចេញទៅកាន់ទីផ្សារបានចន្លោះពី ៧ដុល្លារ​ ទៅ ១០ដុល្លារ ក្នុងមួយគីឡូក្រាម ខណៈតម្រូវការក្នុងស្រកនៅតែល្អ។

ស្ថិតនៅក្នុងវ័យ ៥៣ឆ្នាំ អ្នកស្រី ឆុង សោភា ជាម្ចាស់ចម្ការលម៉ើ ដែលមានទីតាំងស្ថិតនៅស្រុកតាំងគោក ខេត្តកំពង់ធំ ​ប្រាប់ កម្ពុជាថ្មី ថា ឆ្នាំនេះដំណាំលម៉ើក្នុងចម្ការអ្នកស្រី អាចប្រមូលផលបានច្រើនជាងឆ្នាំមុន ចំណែកតម្លៃវិញក៏បានល្អផងដែរ។

អ្នកស្រី បន្តថា ទិន្នផលលម៉ើឆ្នាំនេះ អាចលក់ចេញទៅកាន់ទីផ្សារបានចន្លោះពី ៧ដុល្លារ​ ទៅ ១០ដុល្លារ ក្នុងមួយគីឡូ ពោលគឺអាស្រ័យទៅលើការលក់ដុំ និងលក់រាយ។

ម្ចាស់ចម្ការរូបនេះ បានឱ្យដឹងដែរថា ចូលមកដល់ដើមខែសីហានេះ ចម្ការអ្នកស្រី កំពុងតែបើកទទួលភ្ញៀវទេសចរឱ្យចូលរួមទស្សនាក្នុងចម្ការ ​និងកំពុងតែបានដាក់លក់ផ្លែលម៉ើ និងទឹកលម៉ើស្រស់ នៅក្នុងចម្ការផ្ទាល់។

អ្នកស្រី ឆុង សោភា បញ្ជាក់ទៀតថា ដំណាំលម៉ើថ្វីត្បិតតែងាយស្រួលដាំដុះ និងអាចលក់បានតម្លៃខ្ពស់ តែក៏វាអាស្រ័យទៅលើយើងខ្លួនឯងចេះធ្វើទីផ្សារ មិនតែចំពោះតែការលក់ផ្ទាល់នៅចម្ការនោះទេ ការធ្វើទីផ្សារតាមអនឡាញ និងតាមរយៈការផ្សព្វផ្សាយផ្សេងៗ ក៏ជាកត្តាមួយសំខាន់ដែលនាំឱ្យមុខរបរនេះ អាចបន្តទៅមុខបាន ផងដែរ។

ក្រៅពីលក់ផ្លែលម៉ើ អ្នកស្រី ឆុង សោភា និងស្វាមី ក៏មានមុខរបរមួយទៀតនោះគឺ ជំនាញច្នៃស្រាលម៉ើ ដែលមានស្ដង់ដា មិនចាញ់ផលិតផលបរទេសនោះឡើយ។

ដំណាំលម៉ើរបស់អ្នកស្រី ឆុង សោភា ក្នុងមួយឆ្នាំ​ អាចប្រមូលផលបានចន្លោះពី ៧តោន ទៅ៨តោន ស្របទៅតាមអាកាសធាតុអំណោយផល ពិសេសគឺសម្បូរទឹកភ្លៀងច្រើនដូចឆ្នាំនេះជាដើម។

គិតមកទល់ពេលនេះ មុខរបរដាំផ្លែលម៉ើរបស់អ្នកស្រី ឆុង សោភា និងស្វាមី មានរយៈពេលប្រមាណជាង៤ឆ្នាំមកហើយ ពោលគឺចាប់តាំងពីឆ្នាំ២០២១មកម្ល៉េះ។ បច្ចុប្បន្ន ចម្ការលម៉ើរបស់អ្នកស្រី មានផ្ទៃដីដាំដុះសរុប២ហិកតា និងមានដើមលម៉ើដែលអាចប្រមូលបានចំនួន៤០០ដើម៕

អត្ថបទ ៖​ សួស សិត