ឌួង ហ្សូរីដា Archives - Kampuchea Thmey Daily

ឌួង ហ្សូរីដា ថា ចង់ឲ្យផ្លូវចិត្តកាន់តែរឹងមាំ ត្រូវមាន ៧ ចំណុច

អ៊ិន ពិសី — Fri, 10 Jan 2025 04:23:34 +0000

តារាសម្ដែង និងជាពិធីការិនី ឌួង ហ្សូរីដា ចែករំលែកបទពិសោធ ៧ ចំណុច ទៅកាន់មហាជនអ្នកគាំទ្រ បើចង់ឲ្យផ្លូវចិត្តកាន់តែរឹងមាំ។

ស្របពេលជាមួយគ្នាដែលឆ្នាំថ្មី ២០២៥ បានចូលមកដល់ តារាស្រី ឌួង ហ្សូរីដា នៅតែមានយីអ៊ុនខ្ពស់ មិនថាអាជីពផ្ទាល់ខ្លួន ឬ កិច្ចការងារផ្សេងៗ ទេ។ ម្យ៉ាងទៀតអ្វីដែលនាងបានរំលេចឡើងពេលនេះ គឺ ឌួង ហ្សូរីដា បានបង្ហាញដល់មហាជនថា បើចង់ឲ្យផ្លូវចិត្តកាន់តែរឹងមាំ ត្រូវមាន ៧ ចំណុចនេះ។

ឌួង ហ្សូរីដា បានលើកឡើងចែករំលែកជាបទពិសោធខ្លះៗ ថា ចង់ឲ្យផ្លូវចិត្តកាន់តែរឹងមាំ ក្នុងឆ្នាំ ២០២៥ ៖ ១.កុំដាក់សម្ពាធលើខ្លួនឯងជ្រុល , ២.កុំរំលឹករឿងដែលធ្លាប់បាក់ស្បាត , ៣.កុំត្រាំខ្លួនឯងក្នុងអតីតកាលមិនល្អ , ៤.កុំរស់ក្នុងសម្ដីអ្នកដទៃ , ៥.កុំខ្លាចក្នុងការចាប់ផ្ដើមម្តងទៀត , ៦.កុំស្រឡាញ់គេម្នាក់ឯង និង ៧.ហាមប្រៀបធៀបមើលងាយខ្លួនឯង។ តាមរយៈសំណេរនេះ អាចជាការពញ្ញាក់អារម្មណ៍សម្រាប់អ្នកគាំទ្រ ខណៈមានការលើកឡើថាវាជារឿងល្អចំពោះគំនិតនេះ។

កញ្ញា ឌួង ហ្សូរីដា កន្លងមក ត្រូវបានគេមើលឃើញថានាងតែងមានភាពលេចធ្លោលើសកម្មភាពមនុស្សធម៌ដោយចែករំលែកក្តីស្រលាញ់ជូនប្រជាពលរដ្ឋជួបការខ្វះខាត កុមារកំព្រា និងចាស់ជរាជាដើម…។ ទង្វើនេះ ទទួលបានការគាំទ្រ និងលើកសរសើរទឹកចិត្តពីមហាជនជាច្រើន។

ជាទូទៅ ស្រីស្អាត ឌួង ហ្សូរីដា ត្រូវគេដឹងថា នាងតែងរំលេចខ្លួនក្នុងរូបភាពស្លៀកសម្លៀកបំពាក់នារីខ្មែរយ៉ាងស្រស់ស្អាតដែលថតនៅទឹកដីប្រាសាទអង្គរវត្ត ឬ តំបន់រមណីយដ្ឋានទេសចរណ៍នានា ជាមួយការជំរុញទឹកចិត្តរួមគ្នាផ្សព្វផ្សាយមរតកដូនតាផងដែរ៕

អត្ថបទ ៖ ចាន់រ៉ា

The post ឌួង ហ្សូរីដា ថា ចង់ឲ្យផ្លូវចិត្តកាន់តែរឹងមាំ ត្រូវមាន ៧ ចំណុច appeared first on Kampuchea Thmey Daily.

ឌួង ហ្សូរីដា តារាឆ្នើមលើកពាន Outstanding Ceo Award 2023

អ៊ិន ពិសី — Fri, 15 Dec 2023 07:03:09 +0000

ពិធីការិនី ឌួង ហ្សូរីដា បានលើកពានជាអគ្គនាយិកាឆ្នើមប្រចាំឆ្នាំ ២០២៣ (Outstanding CEO Award2023) ពី Ceo MasterClub ដែលពិធីនេះរៀបចំកាលពីថ្ងៃទី ១៤ ខែធ្នូ ឆ្នាំ ២០២៣ នៅវិមានដឺ ព្រេមៀសេនធ័រ សែនសុខ រាជធានីភ្នំពេញ ក្រោមអធិបតីភាព ឯកឧត្ដម ហ៊ុន ម៉ានី រដ្ឋមន្ដ្រីក្រសួងមុខងារសាធារណៈ និងជាប្រធានសហភាពសហព័ន្ធយុវជនកម្ពុជា,លោកគ្រូធំ បណ្ឌិត អោម សេងបូរ៉ា ស្ថាបនិក Ceo Master Club និងម្ចាស់អាជីវកម្ម កម្ពុជា ជាច្រើននាក់ទៀត។

ឌួង ហ្សូរីដា បានប្រាប់អ្នកយកព័ត៌មានថា ពាន Outstanding Ceo Award 2023 នេះ ផ្ដោតលើអគ្គនាយក ឬ អគ្គនាយិកា ដ៏ឆ្នើមប្រចាំឆ្នាំ ហើយខាង Ceo Master Club មានគណៈកម្មការវាយតម្លៃច្បាស់លាស់ ពោល ទាល់តែក្រុមហ៊ុនមានស្តង់ដារគ្រប់គ្រាន់ ទើបអាចប្រលងយកពានមួយនេះបាន។

ហ្សូរីដា បន្ថែមថា កាលពីឆ្នាំ ២០១៨ នាងបានបញ្ចប់ការសិក្សាទាំង ១៣ វគ្គ ពី Ceo Master Club ហើយពានមួយនេះជាលើកទី ១ សម្រាប់ក្រុមហ៊ុននាង ដែលទទួលបាន ព្រោះទាល់តែមានសម្ថភាព ហើយក្រុមហ៊ុនសមស្របតាមស្តង់ដារក្នុងនាមជាសហគ្រិនទើបមេប្រយោគផ្ដល់ឲ្យឈ្នះពានមួយនេះបាន។ ហ្សូរីដា ថា កាលពីឆ្នាំ ២០១៦ នាងមានក្រុមហ៊ុនតែ ២ ទេ គឺ Cambodia Super Model និងដាណាម៉ា កាត់ដេរ តែប៉ុន្មានឆ្នាំចុងក្រោយនេះ បានពង្រីកក្រុមហ៊ុនជាបន្តបន្ទាប់ ហើយពាននេះបើរកស៊ីខាត ក៏គេមិនឲ្យឈ្នះពានដែរ។

ហ្សូរីដា បន្ថែមទៀតថា ក្នុងនាមជាសហគ្រិនម្នាក់ ពានមួយនេះជាកិត្តិយសមួយសម្រាប់រូបនាងជាថ្នាក់ដឹកនាំរបស់ក្រុមហ៊ុន ព្រោះពានហ្នឹងមិនមែនអ្នកណាចង់បានត្រូវតែបាននោះទេ គឺមានក្រុមហ៊ុនដល់ទៅ ១០០ ដែលចូលរួមប្រកួត តែពាន Outstanding Ceo Award 2023 ឆ្នាំនេះ ទទួលបានតែ ១០ នាក់ទេ ហើយក្នុងនោះគឺមាននាងម្នាក់ដែរ។ នាងថា ក្រោយទទួលបានពានមួយនេះហើយ ក្រុមហ៊ុននាងក៏អាចវិនិយោគជាមួយក្រុមហ៊ុនបរទេសបានដែរ ព្រោះអ្នករកស៊ីធំៗ គេត្រូវការក្រុមហ៊ុនស្តង់ដារ មានការបង់ពន្ធត្រឹមត្រូវ និងទទួលស្គាល់ពីរដ្ឋាភិបាល ដូចជាការទទួលបានពានមួយនេះដែរ។

គិតត្រឹមឆ្នាំ ២០២៣ នេះ ឌួង ហ្សូរីដា មានក្រុមហ៊ុនដូចជារៀបចំក្រុមម៉ូដែល(Agency) ហាងកាត់ដេរដាណាម៉ា,Mudhita Tranding Co.Ltd ជាក្រុមហ៊ុននាំចូលគ្រឿងសម្អាង និង ផលិតគ្រឿងសម្អាងខ្លួនឯង,ហាងTube Caffee និងហាងCaf’e Amazon ផងដែរ។

ហ្សូរីដា ថា សម្រាប់ឆ្នាំ ២០២៤ នេះ ដោយសារតែពិភពលោកប្រឈមវិបត្តិសេដ្ឋកិច្ចជាសកល ហេតុ នេះ នាងផ្អាកគម្រោងពង្រីកអាជីវកម្ម គឺធ្វើយ៉ាងណាទប់លំនឹងក្រុមហ៊ុនឲ្យដំណើរការធម្មតា និងមិនចំណាយអត់ប្រយោជន៍ទៅលើអ្វីដែលមិនចាំបាច់នោះទេ និយាយទៅមិនចាយវាយផ្ដេសផ្ដាសនោះទេ គឺមិនធ្វើអ្វីល្អតែមុខឡើយ តែពង្រឹងលើការផលិត និងនាំចូលផលិតផលមានគុណភាព។ ហ្សូរីដា អះអាងថា ក្រៅពីពាន Outstanding Ceo Award 2023 នេះ ក្រុមហ៊ុននាងធ្លាប់ទទួលបានពាននៅក្រៅស្រុក ៥ ទៅ ៦ ដង មកហើយ។

ឆ្លើយតបសំណួរថា តើហេតុអ្វីបានជា កញ្ញា ឌួង ហ្សូរីដា សម្រេចចិត្តដកខ្លួនពីការងារពិធីការិនីមកពង្រឹងអាជីវកម្មតាម Online នោះ នាងថា គឺកត្តាអាយុ ហើយគិតថាត្រូវគិតដល់គោលដៅជីវិតឲ្យពិតប្រាកដ តែការចាកចេញពីសិល្បៈនេះមិនមែននាងបញ្ចប់អាជីពសិល្បៈទាំងស្រុងទេ តែ Fan នាងនៅតែឃើញនាងតាមរយៈការ Live លក់ផលិតផល ហើយនាងស្ម័គ្រចិត្តជានិច្ចក្នុងការជួយដល់ការងារសង្គមដោយមិនយកថវិកាទេ ព្រោះនាងមានថ្ងៃនេះ ក៏ដោយសារតែសិល្បៈ អីចឹងមិនភ្លេចសិល្បៈឡើយ។

ឌួង ហ្សូរីដា បាននិយាយទាំងសម្រក់ទឹកភ្នែកនៅថ្ងៃនាងទទួលពាន Outstanding Ceo Award 2023 ដោយនាងនឹកដល់ម្ដាយនាងលោកស្រី យ៉ាលីន សុខលីម ដែលទទួលមរណភាព ក្នុងជន្មាយុ ៦០ ឆ្នាំ កាលពីថ្ងៃទី ១ ខែឧសភា ឆ្នាំ ២០២៣ ដោយសារតែជំងឺមហារីក។

ហ្សូរីដា ថ្លែងទាំងហូរទឹកភ្នែកថា ជោគជ័យទាំងអស់នេះគឺជាអ្វីដែលម្ដាយនាងចង់ឃើញ។ នាងថា សមិទ្ធផលទាំងអស់នេះគឺជារបស់គាត់(ម្ដាយ)អ្នកបង្កើតនាងមកក្លាយទៅជាស្ដ្រីដ៏រឹងមាំនៅថ្ងៃនេះ។

ហ្សូរីដា ថា ពានដែលទទួលបាននេះ នាងសូមឧទ្ទិសកុសលជូនដល់ម្ដាយនាង ព្រោះទោះជាលោកបានចាកចេញពីនាងទៅហើយក្ដី ប៉ុន្តែអារម្មណ៍នាងនៅតែគិតថាលោកនៅក្បែៗ និងតាមថែរក្សានាងជានិច្ច។ នាងថា បុគ្គលិកនាងគ្រប់ផ្នែកជាអ្នកនៅពីក្រោយខ្នង នៃភាពជោគជ័យរបស់នាង ពិសេសអតិថិជនទាំងអស់ជាអ្នកគាំទ្រក្រុមហ៊ុន Mudhita Tranding Co.Ltd ដែលដំណើរការដោយរលូនអស់រយៈពេល ៦ ឆ្នាំ មកនេះ។

គួរបញ្ជាក់ថា ឌួង ហ្សូរីដា ជាសមាជិកពេញមួយជីវិតរបស់ Ceo Master Club លេខរៀង ទី ១៥១ ហើយក្រុមហ៊ុនដែលនាងយកទៅប្រកួតឆ្នាំ ២០២៣ នេះ គឺក្រុមហ៊ុន Mudhita Tranding Co.Ltd រហូតទទួលបានពានជាអគ្គនាយិកាឆ្នើមប្រចាំឆ្នាំ ២០២៣ (Outstanding Ceo Award 2023 )៕

អត្ថបទ ៖ ចាន់រ៉ា

The post ឌួង ហ្សូរីដា តារាឆ្នើមលើកពាន Outstanding Ceo Award 2023 appeared first on Kampuchea Thmey Daily.

ឌួង ហ្សូរីដា ថា គ្មានកន្លែងណាល្អ ស្រួលរស់នៅជាងប្រទេសកម្ពុជាទេ

អ៊ិន ពិសី — Thu, 07 Dec 2023 01:46:27 +0000

តារាសម្តែងកញ្ញា ឌួង ហ្សូរីដា បន្ទាប់ពីធ្វើដំណើរកម្សាន្តរយៈពេល ១១ ថ្ងៃ នៅលើទឹកដីអឺរ៉ុប កាលពីថ្មីៗកន្លងទៅ ស្រាប់តារាស្រីរូបនេះបានទម្លាយនូវបទពិសោធន៍ និងរឿងរ៉ាវដ៏ហួសចិត្តដែលនាងជួបប្រទះក្នុងដំណើរកម្សាន្តមួយនេះ។

កញ្ញា ឌួង ហ្សូរីដា ចាត់ទុកថា ដំណើរកម្សាន្តរយៈពេល ១១ ថ្ងៃ នៅអឺរ៉ុបកន្លងមកនេះ ធ្វើឲ្យនាងយល់ច្បាស់ និងភ្លឺភ្នែកថា គ្មានកន្លែងណាល្អ ស្រួលរស់នៅជាងប្រទេសកម្ពុជាឡើយ។

ពិធីការិនី ឌួង ហ្សូរីដា បានរៀបរាប់ថា «បទពិសោធន៍ ១១ ថ្ងៃ លើទឹកដីអឺរ៉ុប ទើបធ្វើឲ្យយើងច្បាស់ និង ភ្លឺភ្នែកថា គ្មានកន្លែងណាល្អស្រួលរស់នៅជាងប្រទេសកម្ពុជារបស់ខ្លួនឡើយ ប្រទេសគេជឿនលឿន សម្ភារៈនិយម ប៉ុន្តែសួរថាមានសុវត្ថិភាពអត់? មិនប្រាកដទេ នៅ បារាំង និង អ៊ីតាលី គឺសំបូរពួកស្បែកខ្មែរមកបន្លំខ្លួន និងឆក់យកកាបូប ទូរស័ព្ទភ្ញៀវទេសចរ មិនខ្លាចសូម្បី Polise ដើរហ្នឹងមុខ”។

នាងនិយាយបន្តទៀតថា «ប្រទេស Hight Show លក់ផលិតផលប្រេនលំដាប់កប់ គឺ បារាំង..ប៉ុន្តែពិបាករកបន្ទប់ទឹក ស្ទើរតែគ្មាន តាមផ្សារទំនើបក៏ដោយ លុះត្រាចូលហាងកាហ្វេធំៗ ឬហាងបាយទើបមាន។ រីឯប្រទេសផ្សេងពីបារាំង បន្ទប់ទឹកមានច្រើននៅតាមសាធារណៈ ប៉ុន្តែគិតលុយម្តង1£។ មិនមែនមកពីដើរលេងហើយ បង្អាប់ប្រទេសគេទេណា ប៉ុន្តែគ្រាន់តែចង់ប្រាប់ទៅបងប្អូននៅក្រៅប្រទេសមួយចំនួនចេះតែស្រែករិះគន់កម្ពុជាអន់ចេះអាក្រក់ចុះ សូមក្រឡេកមើលពីប្រទេសដែលខ្លួនកំពុងរស់នៅផង»។

ឌួង ហ្សូរីដា បានបញ្ជាក់ថា «ប្រទេសណាក៏មិនល្អជាងប្រទេសណាដែរ មានលក្ខណៈល្អ និងអាក្រក់ដូចគ្នា ដូច្នេះហើយយើងត្រូវរៀនទទួលយក និងកែសម្រួល ដើម្បីអភិវឌ្ឍន៍ប្រទេសដែលយើងនៅរៀងខ្លួនទៅ មួយទៀតចង់និយាយថា ទាំង ៥ ប្រទេស គឺ បារាំង,បែលហ្សិក, ឡុចសាំប៊ួ, ស្វីស និង អ៊ីតាលី សុទ្ធតែជាប្រទេសអ្នកមាន សួរថាមានអ្នកសុំទានអត់? Yes មានច្រើន ហើយសុទ្ធតែស្អាតៗ មានកាយសម្បទាគ្រប់គ្រាន់អាចទៅធ្វើការបាន តែអង្គុយយកឆ្កែ ឬឆ្មាមកសុំទាន»។

សូមជម្រាបដែរថា កាលពីថ្មីៗនេះ តារាសម្តែង និងពិធីការិនីជើងចាស់ កញ្ញា ឌួង ហ្សូរីដា និងប្អូនត្រកូលឌួងរបស់នាង ២ នាក់ ផ្សេងទៀត បានសម្រេចបំណង ដោយនាំគ្នាចេញទៅដើរលេងកម្សាន្តរយៈពេល ១១ ថ្ងៃ នៅតាមបណ្ដាប្រទេសចំនួន ៥ នាប៉ែកអឺរ៉ុប ដើម្បីលំហែអារម្មណ៍៕

អត្ថបទ ៖ ចាន់រ៉ា

The post ឌួង ហ្សូរីដា ថា គ្មានកន្លែងណាល្អ ស្រួលរស់នៅជាងប្រទេសកម្ពុជាទេ appeared first on Kampuchea Thmey Daily.

ឌួង ហ្សូរីដា បំផុសប្រជាជនខ្មែរ ឲ្យមានឆន្ទៈគោរពស្រឡាញ់ជាតិសាសន៍ កេរមរតកដូនតា

អ៊ិន ពិសី — Wed, 18 Oct 2023 03:01:57 +0000

ពិធីការិនី និងជាតារាសម្តែងស្រី ឌួង ហ្សូរីដា ថ្មីៗ នេះ បានបំផុសដោយស្នើពលរដ្ឋ និងយុវជនខ្មែរគ្រប់រូប ត្រូវមានឆន្ទៈគោរពស្រឡាញ់ជាតិសាសន៍ មរតកកេរពីដូនតាដែលបន្សល់ទុកសម្រាប់កូនចៅជំនាន់ក្រោយៗ បានស្គាល់។

បង្ហោះរូបភាព និងវីដេអូស្ថិតក្នុងសម្លៀកបំពាក់នារីខ្មែរយ៉ាងស្រស់ស្អាតដែលបានថតនៅប្រាសាទអង្គរវត្តពីសំណាក់កញ្ញា ឌួង ហ្សូរីដា កាន់តែទទួលបានការចាប់អារម្មណ៍ និងសរសើរច្រើនពីមហាជនគ្រប់មជ្ឈដ្ឋាន។ តាមរយៈការបង្ហោះភ្ជាប់ជាមួយរូបភាពទាំងនេះដែរ តារាសម្តែង ឌួង ហ្សូរីដា ក៏បានស្នើដល់អ្នកគាំទ្រ និងកូនខ្មែរគ្រប់រូប ឲ្យចូលរួមបន្តការចែករំលែកផ្សព្វផ្សាយកេរមរតកពីដូនតាផងដែរ។

កញ្ញា ឌួង ហ្សូរីដា បានថ្លែងដោយបញ្ជាក់ថា នាងមិនដែលហត់នឿយនឹងការថតផ្សព្វផ្សាយកេរមរតកដូនតាខ្មែរទេ គ្រប់ពេលទៅប្រាសាទអង្គរវត្តជាមួយសំលៀកបំពាក់ជានារីខ្មែរ ព្រោះនាងជាខ្មែរ មិនមែនទើបតែជ្រួលតាមខ្យល់បក់ទេ ប៉ុន្តែគឺរៀងរាល់ឆ្នាំជាទម្លាប់។

ឌួង ហ្សូរីដា អំពាវនាវថា «សូមឲ្យប្រជាជនខ្មែរមានឆន្ទៈគោរពស្រឡាញ់ជាតិសាសន៍ និងមរតកកេរពីដូនតារបស់ខ្លួន កុំឲ្យបាត់បង់ ហើយកុំមានចិត្តស្រឡាញ់គ្រាន់តែដូចភ្លើងចំបើង ប្រទេសជិតខាង នឹងចម្លងយកម្តងមួយៗ ប្រែកាឡៃប្រវត្តិសាស្ត្រដោយឥតអៀនខ្មាស យើងធ្លាប់បាត់បង់ខេត្តមួយភាគធំឲ្យទៅប្រទេសអាណានិគមឈ្លានពាន ហើយគេឈ្នះគេក៏បានកែប្រែប្រវត្តិសាស្ត្រទៅជារឿងផ្សេងដែរ»។ បន្ថែមពីនេះ កញ្ញា ឌួង ហ្សូរីដា ក៏លើកឡើងថា «ដូច្នេះហើយយើងត្រូវ និងរក្សាកុំឲ្យបាត់បង់ជាដាច់ខាត វប្បធម៌រលត់ ជាតិរលាយ វប្បធម៌ពណ្ណរាយ ជាតិថ្កើងថ្កាន»។

គួរជម្រាបថា នេះពុំមែនជាលើកទី ១ ទេ ដែលតារាស្រី ឌួង ហ្សូរីដា បង្ហាញការស្លៀកពាក់តុបតែងខ្លួនក្នុងសម្លៀកបំពាក់ប្រពៃណីបុរាណខ្មែរ ដើម្បីបន្តចូលរួមផ្សព្វផ្សាយវប្បធម៌ អរិយធម៌ មរតកដូនតា៕

អត្ថបទ ៖ ចាន់រ៉ា

The post ឌួង ហ្សូរីដា បំផុសប្រជាជនខ្មែរ ឲ្យមានឆន្ទៈគោរពស្រឡាញ់ជាតិសាសន៍ កេរមរតកដូនតា appeared first on Kampuchea Thmey Daily.

ឌួង ហ្សូរីដា ថា អស់សំណាង ក្រោយបាត់បង់ម្ដាយ និងកំព្រាឪពុកជិត ២៤ ឆ្នាំ

អ៊ិន ពិសី — Wed, 13 Sep 2023 06:53:17 +0000

អ្នកម្ដាយជាទីស្រលាញ់របស់តារាសម្ដែង និងជាពិធីការិនីល្បីឈ្មោះកញ្ញា ឌួង ហ្សូរីដា គិតមកដល់ ពេលនេះ បានចែកឋានមានរយៈពេលប្រមាណជាង ៤ ខែ មកហើយ ប៉ុន្តែក្ដីនឹករលឹកចំពោះអ្នកម្ដាយ គឺ ហ្សូរីដា នៅតែមានជានិច្ច។

ជាការពិតថ្វីត្បិតអ្នកម្តាយ-លោកឪពុកបានចែកឋានទៅហើយក្ដី តែសម្រាប់តារាស្រី ឌួង ហ្សូរីដា នៅតែបង្ហាញការឈឺចាប់ និងបង្ហោះខ្លឹមសារត្អូញត្អែរនឹកដល់លោកមានគុណទាំងពីរដោយមិនទាន់មានក្តីរំសាយចិត្ត ឬ បំភ្លេចបាន។ ហេតុផលនេះ ទើប ឌួង ហ្សូរីដា បានបញ្ជាក់ថា អារម្មណ៍នាងតែលតោលខ្លាំងណាស់ ក្រោយបាត់បង់ម្ដាយ និងកំព្រាឪពុកជិត ២៤ ឆ្នាំ។

ពិធីការិនីកញ្ញា ឌួង ហ្សូរីដា បង្ហោះភ្ជាប់ខ្លឹមសារមួយដែលបានលើកឡើងថា «ព្រោះមានម៉ែនៅឈរចាំពីក្រោយទើបរឿងជាច្រើនខ្ញុំអាចឆ្លងវាមកបាន អ្នកដែលនៅមានម៉ែគឺសំណាងល្អបំផុតហើយ»។

ឌួង ហ្សូរីដា បញ្ជាក់ថា «ប៉ុន្តែពួកខ្ញុំអស់សំណាងហើយ កំព្រាឪពុកជិត ២៤ ឆ្នាំ ឥឡូវបាត់បង់ម្ដាយទៀត អារម្មណ៍ពិតជាតែលតោលខ្លាំងណាស់»។

គួររម្លឹកថា ពិធីការិនី ឌួង ហ្សូរីដា នាងបាត់បង់ម្ដាយជាទីស្រលាញ់របស់ខ្លួន ដោយលោកស្រី យ៉ាលីន សុខលីម បានទទួលមរណភាពកាលពីថ្ងៃទី ០១ ខែឧសភា ឆ្នាំ ២០២៣ ដោយសារតែជំងឺមហារីក។ កន្លងមក ឌួង ហ្សូរីដា តែងបាននាំម្ដាយចេញទៅព្យាបាលនៅប្រទេសថៃអស់រយៈពេលជាច្រើនឆ្នាំមកហើយ។ លោកស្រី យ៉ាលីន បានកើតជំងឺកាចសាហាវ(មហារីក) នាអំឡុងចុងឆ្នាំ ២០១៨ តែពេលនោះ ហ្សូរីដា ព្យាបាលម្ដាយទាន់ពេលវេលា ទើបលោកស្រីអាចរស់នៅជាមួយកូនៗជាង ៥ ឆ្នាំទៀត ក៏ទទួលមរណភាពក្នុងអាយុ ៦០ ឆ្នាំ ដែលធ្វើឲ្យ ហ្សូរីដា និងប្អូនស្រីទាំងពីររបស់នាង ត្រូវកំព្រាម្ដាយជារៀងរហូត៕

អត្ថបទ ៖ ចាន់រ៉ា

The post ឌួង ហ្សូរីដា ថា អស់សំណាង ក្រោយបាត់បង់ម្ដាយ និងកំព្រាឪពុកជិត ២៤ ឆ្នាំ appeared first on Kampuchea Thmey Daily.

ឌួង ហ្សូរីដា ថា ភាសាបេះដូងសម្រាប់ កម្ពុជា មិនមែនគ្រាន់តែនិយាយ ប៉ុន្តែខ្មែរធ្វើបាន

អ៊ិន ពិសី — Tue, 18 Apr 2023 07:01:54 +0000

តារាសម្ដែង និងជាពិធីការិនីកញ្ញា ឌួង ហ្សូរីដា កន្លងមក ត្រូវបានគេមើលឃើញថា នាងតែងមានភាពលេចធ្លោលើសកម្មភាពសង្គមនានាដូចជា ការចូលរួមផ្សព្វផ្សាយពីសិល្បៈ វប្បធម៌ អរិយធម៌ខ្មែរ ទៅកាន់ពិភពលោក និងមនុស្សធម៌ ដោយចែករំលែកក្ដីស្រលាញ់ជូនប្រជាពលរដ្ឋជួបការខ្វះខាត កុមារកំព្រា និងចាស់ជរាជាដើម។

សកម្មភាពទាំងនេះបានធ្វើឲ្យប្រជាប្រិយភាព និងការគាំទ្ររបស់តារាស្រីកញ្ញា ឌួង ហ្សូរីដា នៅរក្សាបានលើទីផ្សារសិល្បៈបច្ចុប្បន្ន។ កាន់តែចាប់អារម្មណ៍ថែមទៀតនោះ ស្រីស្អាត ឌួង ហ្សូរីដា បានចេញមកបញ្ជាក់ដោយក្តីស្រលាញ់ និងគោរព តាមរយៈអត្ថន័យបែបនេះថា ភាសាបេះដូងសម្រាប់ កម្ពុជា មិនមែនគ្រាន់តែនិយាយ ប៉ុន្តែខ្មែរធ្វើបានដោយបង្កើតបេះដូងចេញពីស្នាដៃកូនខ្មែរគ្រប់រូបរួមបញ្ចូលគ្នារហូតទទួលបាន«បេះដូងច្រើនជាងគេលើពិភពលោក» នៅបរិវេណប្រាសាទអង្គរវត្ត។

ឌួង ហ្សូរីដា បាននិយាយទៀតថា សូមជម្រាបផងដែរថា ក្នុងពិធីបើកផ្លូវការព្រឹត្តិការណ៍អង្គរសង្ក្រាន្ត ឆ្នាំ ២០២៣ សម្ដេច បានសម្ដែងនូវការរីករាយចំពោះការបំបែកបាននូវឯតទគ្គកម្ម«បេះដូងច្រើនជាងគេលើពិភពលោក» ចំនួន ៣,៩១៧,៨០៥ បេះដូង របស់ កម្ពុជា ដែលការចូលរួមបត់បេះដូងពីប្រជាជនកម្ពុជាគ្រប់វ័យ គ្រប់ស្រទាប់វណ្ណៈនេះ បានបង្ហាញពីក្ដីស្រលាញ់ និងអត្ថន័យ នៃភាសាបេះដូងសម្រាប់កម្ពុជា។

សូមជម្រាបដែរថា ពិធីការិនីរូបស្រស់កញ្ញា ឌួង ហ្សូរីដា មកដល់ពេលបច្ចុប្បន្ននេះ ត្រូវបានគេចាត់ថា នាងក៏ជាបុគ្គលម្នាក់ដែលពូកែ ហើយឆ្នើមមិនធម្មតាឡើយ ពោលគឺមិនត្រឹមតែជោគជ័យលើមុខរបរជាពិធីការិនីអាជីពច្បាស់លាស់ប៉ុណ្ណោះទេ តែនាងក៏ច្បាស់ជាមួយមុខជំនួញគ្រប់បែបយ៉ាងទៀតផង៕

អត្ថបទ ៖ ចាន់រ៉ា

The post ឌួង ហ្សូរីដា ថា ភាសាបេះដូងសម្រាប់ កម្ពុជា មិនមែនគ្រាន់តែនិយាយ ប៉ុន្តែខ្មែរធ្វើបាន appeared first on Kampuchea Thmey Daily.

មិនធម្មតា! ឌួង ហ្សូរីដា ទទួលបានពានបុគ្គលឆ្នើម ៤ ផ្សេងគ្នានៅថៃ

Sorn Phanith — Tue, 26 Apr 2022 04:13:17 +0000

ពិធីការិនី និងជាតារាសម្តែងកញ្ញា ឌួង ហ្សូរីដា បានបង្ហាញនូវអារម្មណ៍រំភើប និងត្រេកអរខ្លាំងខណៈទទួលបានពានជាបុគ្គលឆ្នើម ៤ ផ្សេងគ្នានៅថៃ។ ម្យ៉ាងទៀតនាក៏ក្លាយជាបុគ្គលមានមុខមាត់លើផ្នែកជំនួញមិនធម្មតាឡើយ។

តួយ៉ាងថ្មីៗនេះ ត្រូវបានគេកត់សម្គាល់ថា តារាស្រី ឌួង ហ្សូរីដា អាចដណ្តើមយកបានពានកាន់ក្នុងដៃនៅលើឆាកលំដាប់អន្តរជាតិក្នុងទឹកដីប្រទេសថៃ។ ភ្លាមៗនោះគេឃើញអ្នកគាំទ្រ និងមហាជនបានសម្តែងការចូលរួមអបអរ ឌួង ហ្សូរីដា គឺជាស្ត្រីកម្ពុជា នាពេលបច្ចុប្បន្នមិនត្រឹមតែស្អាតតែក៏ឆ្លាតពូកែមិនចាញ់បុរសឡើយ។

កញ្ញា ឌួង ហ្សូរីដា បានបញ្ជាក់ថាថ្ងៃទី ២៤ ខែមេសា ឆ្នាំ ២០២២ នេះ ជាជោគជ័យថ្មីសម្រាប់នាងខ្ញុំ និងក្រុមគ្រួសារ ដែលមានឱកាសទទួលបានពានរង្វាន់ចំនួន ៤ ផ្សេងគ្នាលំដាប់អន្តរជាតិ នៅប្រទេសថៃជាលើកទី ៣ សម្រាប់ក្រុមហ៊ុនMudhita។ អរគុណអតិថិជនទាំងក្នុង និងក្រៅប្រទេស ដែលគាំទ្រផលិតផលរយៈ ពេល ៥ ឆ្នាំ ដោយការជឿជាក់ និងផ្តល់ការទុកចិត្តខ្ពស់មកលើយើងខ្ញុំ។

យ៉ាងណាមិញនៅពីក្រោយស្នាមញញឹមនេះដែរ ឌួង ហ្សូរីដា គឺមានការតស៊ូក្រាញននៀលជាមួយមុខរបរទាំងយប់ទាំងថ្ងៃ ដោយខំប្រឹងក្រោយឈដើរមិនចុះចាញ់ទេ។ ឌួង ហ្សូរីដា ត្រូវបានគេចាត់ថា នាងពូកែឆ្នើមមិនធម្មតាឡើយមិនត្រឹមតែជោគជ័យលើមុខរបរជាពិធីការិនីអាជីពច្បាស់លាស់ប៉ុណ្ណោះទេ តែក៏ច្បាស់ជាមួយជំនួញគ្រប់បែបយ៉ាងទៀតផង៕

អត្ថបទ៖ ចាន់រ៉ា

The post មិនធម្មតា! ឌួង ហ្សូរីដា ទទួលបានពានបុគ្គលឆ្នើម ៤ ផ្សេងគ្នានៅថៃ appeared first on Kampuchea Thmey Daily.

ឌួង ហ្សូរីដា ពោលពាក្យ ១ ឃ្លា ក្រោយអ្នកគាំទ្រកោតសរសើរពិធីការិនីជើងចាស់ ២ រូប

Sorn Phanith — Mon, 04 Apr 2022 09:25:57 +0000

បច្ចុប្បន្នវិស័យសិល្បៈខ្មែរ កំពុងតែមានការរីកចម្រើនគួរឲ្យកត់សម្គាល់ទាំងវិស័យចម្រៀង, សម្តែង,ដើរម៉ូដ និងពិធីការិនីជាដើម។ ខណៈដែលអ្នកសិល្បៈក្មេងៗជំនាន់ក្រោយក៏កំពុងបង្ហាញវត្តមានព្រោងព្រាតលើវិថីមួយនេះផងដែរ។

ដោយឡែកបើងាកមកចាប់អារម្មណ៍ពិធីការិនីជើងចាស់ចំនួន ២ រូប ដែលកម្ពុជាថ្មីលើកយកមកបង្ហាញថ្ងៃនេះវិញ ថ្វីត្បិតតែមកដល់ពេលនេះ ពួកគេមានវ័យជ្រេហើយពិតមែន ប៉ុន្តែតំណែងនិងប្រជាប្រិយភាព ឬការគាំទ្រនៅរក្សាបានដូចដើមដោយគ្មានសិល្បៈជំនាន់ក្រោយរូបណាអាចប្រជែងទីផ្សារបានទេ។

ចំពោះពិធីការិនីទាំងពីររូបនេះគឺ ទី ១. អ្នកនាង គង់ សុជាតិ និងទី ២. អ្នកនាង យុគ ចិន្តា។ អ្នកទាំង២ ត្រូវបានគេចាត់ទុកថា ជាខ្ញីចាស់ដែលកាន់តែចាស់កាន់តែហិរដោយពុំមានប្រៀបប្រដូចបានឡើយ។ អ្នកនាង គង់ សុជាតិ និងអ្នកនាង យុគ ចិន្តា គឺទទួលបានការគាំទ្រលើប្រជាប្រិយភាពសមត្ថភាពនិងកោតសរសើរទាំងទេពកោសល្យជាដើម។

យុគ ចិន្តា

គង់ សុជាតិ

ជាក់ស្តែងមិនខុសពីមហាជននោះទេ សូម្បីអ្នកសិល្បៈដូចគ្នាក៏សរសើរអ្នកនាង គង់ សុជាតិ និងអ្នក នាង យុគ ចិន្តា ផងដែរ។ កញ្ញា ឌួង ហ្សូរីដា បានលើកឡើងថា បងស្រី គង់ សុជាតិ គឺជាពិធីការិនីរៀមច្បង និងជា Idol បន្ទាប់ពីបងស្រី យុគ ចិន្តា។ ពេលវេលាប្រឡូកក្នុងសិល្បៈជិត ២០ ឆ្នាំ ហើយក្តីប៉ុន្តែការរាប់អាននៅដោយក្តីគោរព និងស្រឡាញ់នៅតែមានចំពោះគ្នាពួកគាត់៕

អត្ថបទ៖ ចាន់រ៉ា

The post ឌួង ហ្សូរីដា ពោលពាក្យ ១ ឃ្លា ក្រោយអ្នកគាំទ្រកោតសរសើរពិធីការិនីជើងចាស់ ២ រូប appeared first on Kampuchea Thmey Daily.