ជីវិតកម្សាន្ដ

ឌួង ហ្សូរីដា បំផុសប្រជាជនខ្មែរ ឲ្យមានឆន្ទៈគោរពស្រឡាញ់ជាតិសាសន៍ កេរមរតកដូនតា

បានផុស

៣ years មុន

នៅ

ថ្ងៃពុធ ១៨ តុលា ២០២៣

ដោយ

ពិធីការិនី និងជាតារាសម្តែងស្រី ឌួង ហ្សូរីដា ថ្មីៗ នេះ បានបំផុសដោយស្នើពលរដ្ឋ និងយុវជនខ្មែរគ្រប់រូប ត្រូវមានឆន្ទៈគោរពស្រឡាញ់ជាតិសាសន៍ មរតកកេរពីដូនតាដែលបន្សល់ទុកសម្រាប់កូនចៅជំនាន់ក្រោយៗ បានស្គាល់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បង្ហោះរូបភាព និងវីដេអូស្ថិតក្នុងសម្លៀកបំពាក់នារីខ្មែរយ៉ាងស្រស់ស្អាតដែលបានថតនៅប្រាសាទអង្គរវត្តពីសំណាក់កញ្ញា ឌួង ហ្សូរីដា កាន់តែទទួលបានការចាប់អារម្មណ៍ និងសរសើរច្រើនពីមហាជនគ្រប់មជ្ឈដ្ឋាន។ តាមរយៈការបង្ហោះភ្ជាប់ជាមួយរូបភាពទាំងនេះដែរ តារាសម្តែង ឌួង ហ្សូរីដា ក៏បានស្នើដល់អ្នកគាំទ្រ និងកូនខ្មែរគ្រប់រូប ឲ្យចូលរួមបន្តការចែករំលែកផ្សព្វផ្សាយកេរមរតកពីដូនតាផងដែរ។

កញ្ញា ឌួង ហ្សូរីដា បានថ្លែងដោយបញ្ជាក់ថា នាងមិនដែលហត់នឿយនឹងការថតផ្សព្វផ្សាយកេរមរតកដូនតាខ្មែរទេ គ្រប់ពេលទៅប្រាសាទអង្គរវត្តជាមួយសំលៀកបំពាក់ជានារីខ្មែរ ព្រោះនាងជាខ្មែរ មិនមែនទើបតែជ្រួលតាមខ្យល់បក់ទេ ប៉ុន្តែគឺរៀងរាល់ឆ្នាំជាទម្លាប់។

ឌួង ហ្សូរីដា អំពាវនាវថា «សូមឲ្យប្រជាជនខ្មែរមានឆន្ទៈគោរពស្រឡាញ់ជាតិសាសន៍ និងមរតកកេរពីដូនតារបស់ខ្លួន កុំឲ្យបាត់បង់ ហើយកុំមានចិត្តស្រឡាញ់គ្រាន់តែដូចភ្លើងចំបើង ប្រទេសជិតខាង នឹងចម្លងយកម្តងមួយៗ ប្រែកាឡៃប្រវត្តិសាស្ត្រដោយឥតអៀនខ្មាស យើងធ្លាប់បាត់បង់ខេត្តមួយភាគធំឲ្យទៅប្រទេសអាណានិគមឈ្លានពាន ហើយគេឈ្នះគេក៏បានកែប្រែប្រវត្តិសាស្ត្រទៅជារឿងផ្សេងដែរ»។ បន្ថែមពីនេះ កញ្ញា ឌួង ហ្សូរីដា ក៏លើកឡើងថា «ដូច្នេះហើយយើងត្រូវ និងរក្សាកុំឲ្យបាត់បង់ជាដាច់ខាត វប្បធម៌រលត់ ជាតិរលាយ វប្បធម៌ពណ្ណរាយ ជាតិថ្កើងថ្កាន»។

គួរជម្រាបថា នេះពុំមែនជាលើកទី ១ ទេ ដែលតារាស្រី ឌួង ហ្សូរីដា បង្ហាញការស្លៀកពាក់តុបតែងខ្លួនក្នុងសម្លៀកបំពាក់ប្រពៃណីបុរាណខ្មែរ ដើម្បីបន្តចូលរួមផ្សព្វផ្សាយវប្បធម៌ អរិយធម៌ មរតកដូនតា៕

អត្ថបទ ៖ ចាន់រ៉ា