តារាជំនាន់ដើម Archives - Kampuchea Thmey Daily

លោក ហង្ស ធុនហាក់ បញ្ញវន្តខ្មែរមួយរូប មានចំណេះដឹងជ្រៅជ្រះលើផ្នែកសិល្បៈ វប្បធម៌ ល្ខោន

អ៊ិន ពិសី — Mon, 28 Aug 2023 23:35:00 +0000

នៅសម័យសង្គមរាស្ត្រនិយម លោកសាស្ត្រាចារ្យ ហង្ស ធុនហាក់ ជាស្ថាបនិកក្រុមល្ខោនជាតិ នៃប្រទេសកម្ពុជា និងជាបញ្ញវន្តមានចំណេះដឹងជ្រៅជ្រះណាស់លើផ្នែកសិល្បៈ វប្បធម៌ខ្មែរ ទាំង ល្ខោន និងរបាំ។

អំពី លោកសាស្ត្រាចារ្យ ហង្ស ធុនហាក់ ស្ថាបនិកក្រុមល្ខោនជាតិ នៃប្រទេសកម្ពុជា

មហាជននៅចាំមិនភ្លេចទេ ចំពោះស្នាដៃល្ខោននិយាយបែបទស្សនវិជ្ជាមួយរបស់ លោក ហង្ស ធុនហាក់ ដែលធ្លាប់បានសម្ដែងលើឆាកមហោស្រពធំៗ ពិសេសក្នុងកញ្ចក់ទូរទស្សន៍ជាតិ កាលពីសម័យសង្គមរាស្ត្រនិយម គឺ រឿង«សម្បុរឥតមេបា និង ពិសោធន៍ស្នេហា»។

មុនឆ្នាំ ១៩៧៥ លោក ហង្ស ធុនហាក់ មានឈ្មោះល្បីល្បាញណាស់ ដោយក្នុងសម័យសង្គមរាស្ត្រនិយម គេដឹងថា លោកជាស្ថាបនិកក្រុមល្ខោនជាតិ នៃប្រទេសកម្ពុជា និងជាបញ្ញវន្តមានចំណេះដឹងជ្រៅជ្រះណាស់លើផ្នែកសិល្បៈ វប្បធម៌ខ្មែរ ទាំងផ្នែកល្ខោន និងរបាំ។ ហើយមកដល់សម័យសាធារណរដ្ឋខ្មែរ កេរ្តិ៍ឈ្មោះរបស់លោក ហង្ស ធុនហាក់ ក៏ល្បីល្បាញថែមមួយកម្រិតទៀត ក្នុងនាមជាសកម្មជននយោបាយមួយរូប។

ស្ថាបនិកក្រុមល្ខោនជាតិ នៃប្រទេសកម្ពុជា លោក ហង្ស ធុនហាក់ កើតនៅថ្ងៃទី ២១ ខែសីហា ឆ្នាំ ១៩២៦ នាភូមិព្រែកកក់ ស្រុកស្ទឹងត្រង់ ខេត្តកំពង់ចាម ក្នុងត្រកូលគ្រួសារកសិករ។

កុមារ ហង្ស ធុនហាក់ កាលវ័យកុមារភាព បានស្នាក់អាស្រ័យរៀនសូត្រនៅក្នុងវត្ត នាស្រុកកំណើតរបស់ខ្លួន។ កុមារ ហង្ស ធុនហាក់ ចូលចិត្តអានសាស្ត្រារឿង និងទស្សនាល្ខោន អាយ៉ៃ ខ្លាំងណាស់។

លុះធំពេញវ័យ លោក ហង្ស ធុនហាក់ បានទៅបន្តការសិក្សានៅឯរាជធានីភ្នំពេញ ក្នុងសាលាឯកជនមួយ គឺ សាលា«កម្ពុជបុត្រ»។ មកដល់វ័យជំទង់ លោកក៏និយមអានសៀវភៅបារាំងល្អៗ ទាក់ទងនឹងនយោបាយ ព្រមទាំងសិល្បៈផងដែរ។

លោក ហង្ស ធុនហាក់ នៅឆ្នាំ ១៩៤៧ ប្រឡងជាប់អាហារូបករណ៍របស់រដ្ឋាភិបាលបារាំងសេស បានទៅសិក្សាវិជ្ជាល្ខោន នៅសាលានាដកម្ម សារ៉ាបេណាត់ នាទីក្រុងប៉ារីស ប្រទេសបារាំង។ ទៅដល់ទីនោះ លោក ហង្ស ធុនហាក់ ក្រៅពីការសិក្សា រៀនសូត្រ ផ្នែកនេះ លោក ក៏មានចំណូលចិត្តខ្ពស់ទៅលើការសិក្សាចិត្តវិទ្យា និងនយោបាយទៀតផង។ ពេលនោះហើយ ទើបធ្វើឲ្យលោកក្លាយជាបញ្ញវន្តខ្មែរមួយរូបដ៏គំរូសម្រាប់សិស្សបរទេសដទៃទៀត។

នៅឆ្នាំ ១៩៤១ បញ្ញវន្តខ្មែរដ៏គំរូ លោក ហង្ស ធុនហាក់ បានវិលត្រឡប់មកប្រទេសកម្ពុជាវិញ។ លោក ហង្ស ធុនហាក់ ពុំបានចូលបម្រើក្នុងជួររាជរដ្ឋាភិបាលឡើយ ដោយសម្រេចចិត្តថា ចូលព្រៃទៅភ្នំដងរែកជាមួយក្រុមលោក សឹង វុទ្ធថាញ់ ដើម្បីធ្វើចលនាទាមទារឯករាជ្យពីអាណានិគមនិយមបារាំង ហេតុនេះទើបលោកត្រូវបានគេហៅថាជាក្រុមមនុស្សភ្នំដងរែក។ កំឡុងពេលនោះ លោក ហង្ស ធុនហាក់ បានផ្សាយវិទ្យុក្នុងព្រៃលេងជារឿងល្ខោន ដើម្បីបង្ហាញការស្នេហាជាតិ នៃជនជាតិខ្មែរ ក្នុងចលនា នៃក្រុមភ្នំដងរែក។

ប្រទេសកម្ពុជា បានឯករាជ្យពេញបរិបូណ៌ នៅឆ្នាំ ១៩៥៣

លោក ហង្ស ធុនហាក់ បានវិលត្រឡប់មករាជធានីភ្នំពេញវិញ ដោយចូលធ្វើជាសាស្ត្រាចារ្យនៅវិទ្យាល័យព្រះស៊ីសុវត្ថិ។ ក្នុងនោះ ដោយជ្រាបអំពីសមាសភាពរបស់លោក សម្ដេចព្រះមហាក្សត្រិយានីជាអម្ចាស់ជីវិតលើត្បូង បានរាជានុញ្ញាតឲ្យលោក ហង្ស ធុនហាក់ រៀបចំសាលាល្ខោនជាតិ ឬ ល្ខោនទំនើប ដោយឲ្យបញ្ញវន្តរូបនេះ កាន់ជាចាងហ្វាងសាលាល្ខោននេះតែម្ដង។

សាលាល្ខោនជាតិ នៃកម្ពុជា បានកើតឡើងជាលើកដំបូងក្នុងឆ្នាំ ១៩៥៤ ដោយពេលនោះលោក ហង្ស ធុនហាក់ ប្រមូលបញ្ញវន្ត និងសាស្ត្រាចារ្យមួយចំនួន យកមករៀបចំសាលានេះឡើង រួមមាន ៖លោក មាស គក ,លោក ពៅ យូឡេង ,លោក ផឹក សំផេន ,លោក ហង្ស ជួន ,លោក គុន សុវណ្ណគុណ ,លោក លី គឹមអួង ជាដើម…។ ហើយបើកទទួលសិស្សសិក្សាផ្នែកល្ខោននេះ តាំងពីពេលនោះមក។

លោក ហង្ស ធុនហាក់ ក្រៅពីតួនាទីជាចាងហ្វាងសាលាល្ខោនហើយ ក៏បានក្លាយជាទីប្រឹក្សាផ្ទាល់ នៃក្រុមរបាំព្រះរាជទ្រព្យ ក្រោមព្រះរាជកិច្ចដឹកនាំរបស់ សម្ដេចព្រះមហាក្សត្រិយានីទៀតផង។ ហើយលោក ក៏ជាអ្នករៀបរៀង និងរៀបដំឡើងរឿងរបាំជាច្រើន ជាមួយព្រឹទ្ធាចារ្យរបាំ នៃវង្សតន្ត្រីព្រះរាជទ្រព្យ ក្នុងព្រះបរមរាជវាំងផងដែរ។

លោក ហង្ស ធុនហាក់ បានបំពេញតួនាទីជាសមាជិកអ្នកដឹកនាំបេសកកម្មវប្បធម៌ខ្មែរ នៃរបាំព្រះរាជទ្រព្យ ទៅកាន់សាធារណរដ្ឋប្រជាមានិតចិន នៅឆ្នាំ ១៩៥៧។ ហើយនៅឆ្នាំ ១៩៥៩ លោក ហង្ស ធុនហាក់ និង សាស្ត្រាចារ្យជាច្រើន ក៏បានរួមគំនិតគ្នាបង្កើតក្រុមល្ខោនសិល្បៈមួយសម្រាប់សម្ដែងក្នុងពិធីធំៗ ជាច្រើន ដោយលោកដាក់ឈ្មោះថា «ក្រុមល្ខោនជាតិ នៃប្រទេសកម្ពុជា»។ ក្នុងគ្រានោះហើយ លោក ហង្ស ធុនហាក់ បាននិពន្ធល្ខោនបែបទស្សនៈវិទ្យា បែបស៊ីជម្រៅជាច្រើន ជាមួយនឹងតថភាពសង្គម ដើម្បីអប់រំប្រជាជនខ្មែរ តួយ៉ាងដូចជារឿង «ថ្មរាំ ,ពិសោធន៍ស្នេហា» ជាកិច្ចសហការជាមួយលោក ហង្ស ជួន និងលោក ផឹក សំផេន។ ល្ខោននិយាយរឿងពិសោធន៍ស្នេហានេះ លោក អ៊ុំ តារា និងលោក លី ហុកសេង បាននិពន្ធចម្រៀងរួមគ្នាមួយបទ គឺ បទ «ឲ្យបងសុំស្រលាញ់ផង» ដើម្បីបញ្ចូលក្នុងរឿងដ៏មានប្រជាប្រិយភាពមួយនេះ។ ប៉ុន្តែគួរឲ្យស្ដាយបទ «ឲ្យបងសុំស្រលាញ់ផង» ដែលជាសំនៀងដើមរបស់អ្នកចម្រៀង មាស ហុកសេង និងកវី អ៊ុំ តារា បានបាត់បង់ទៅហើយ នៅសេសសល់តែបទចម្រៀងថ្មី ច្រៀងឡើងដោយលោក ហួល ឡាវី តែប៉ុណ្ណោះ។ រឿងល្ខោនល្បីៗរបស់ លោក ហង្ស ធុនហាក់ មានជាបន្តទៀតដូចជា ៖ រឿង «នាងកញ្ញាចរិយា ,សំបុកឥតមេបា ,វង្សត្រកូលកម្សត់ ,ព្រះអាទិត្យរះហើយ ,ចិញ្ចៀនបញ្ចាំចិត្ត និង គូព្រេងមិនព្រាត់ ជាដើម…។ អំឡុងនោះ លោក ហង្ស ធុនហាក់ ក៏បានបកប្រែអត្ថបទល្ខោនបារាំងនៅអឺរ៉ុប មកជាភាសាខ្មែរ សម្រាប់សម្ដែងក្នុងក្រុមល្ខោនជាតិនេះ ដោយភាគច្រើនលោកបកប្រែរឿងរបស់ ខន នា និង សេកស្ពា ដូចជារឿង កិត្តិយស និងស្នេហា ,រ៉ូមីអូ និងសូរីយ៉េត ,លោកប្ដីជាទីស្នេហា ,រាត្រីនិម្មិត នៃវស្សន្តរដូវ ,លើស៊ីត ,ប៉ុលវីសនី និងរឿងកុំប្រឡែងនឹងសេចក្ដីស្នេហា របស់អ្នកនិពន្ធឈ្មោះ អាល់ហ្គេតដេម៉ុងសេ ដែលរឿងល្ខោននេះ ត្រូវបានលោក ពៅ យូឡេង រៀបសម្រួលឡើង ហើយបានឲ្យ លោក អ៊ុំ តារា និងលោក មាស ហុកសេង និពន្ធបទ «ចំណេះជិះកឯង» ដាក់បញ្ចូលក្នុងល្ខោនរឿងនេះទៀតផង។

លោក ហង្ស ធុនហាក់ ជាបញ្ញវន្តដ៏មានចំណេះដឹងជ្រៅជ្រះលើផ្នែកសិល្បៈ វប្បធម៌ ដោយលោកតែងតែសិក្សាស្រាវជ្រាវជារៀងរាល់ថ្ងៃ។ ក្រៅពីមានភារកិច្ចជាអ្នកគ្រប់គ្រងសាលាល្ខោន និងតួនាទីផ្សេងៗ ជារៀងរាល់សប្ដាហ៍ និងរៀងរាល់ខែ លោកតែងតែចេញផ្សាយអត្ថបទល្អៗ ជាច្រើនទាក់ទងនឹងវិស័យវប្បធម៌សិល្បៈខ្មែរ ដែលចេញផ្សាយក្នុងទំព័រកាសែត និងទស្សនាវដ្ដីជាច្រើនដូចជា ៖ ទស្សនាវដ្ដីកាំប៊ូសា ,ទស្សនាវដ្ដីអ្នកជាតិនិយម ,ទស្សនាវដ្ដីផ្សេងៗ ,ទស្សនាវដ្ដីរាត្រីភ្នំពេញ ,និងកាសែតរាស្ត្រសង្គមជាដើម …។

ដោយឡែកចំពោះវិស័យសិល្បៈភាពយន្តវិញ លោក ហង្ស ធុនហាក់ បាននិពន្ធសាច់រឿង និងសេនារីយោ ខ្សែភាពយន្ត ៣ រឿង គឺ រឿង «បងពុកឲ្យហៅ» បានផលិតជាខ្សែភាពយន្តដោយផលិតកម្មឃ្មោះមាសភាពយន្ត នៅឆ្នាំ ១៩៦៦។ រឿង «វាសនា ឬ ការកសាង» បានផលិតជាខ្សែភាពយន្តនៅឆ្នាំ ១៩៦៥ និងរឿង «ថ្មរាំ» វណ្ណកម្មរបស់ផលិតកម្មបាយ័នភាពយន្ត ផលិតជាខ្សែភាពយន្តនៅឆ្នាំ ១៩៧៤។ ហើយរវាងពីឆ្នាំ ១៩៦៦ ដល់ឆ្នាំ ១៩៧០ សម្ដេចព្រះប្រមុខរដ្ឋ បានតែងតាំង លោក ហង្ស ធុនហាក់ ឲ្យក្លាយជាសកលវិទ្យាធិការ នៃសាកលវិទ្យាល័យវិចិត្រសិល្បៈ នៃប្រទេសកម្ពុជា។

គួរជម្រាបថា ស្ថាបនិកក្រុមល្ខោនជាតិ នៃប្រទេសកម្ពុជា និងជាបញ្ញវន្តមានចំណេះដឹងជ្រៅជ្រះលើផ្នែកសិល្បៈ វប្បធម៌ខ្មែរ ទាំងផ្នែកល្ខោន និងរបាំ លោក ហង្ស ធុនហាក់ បានបាត់បង់ជីវិត នៅថ្ងៃទី ១៨ ខែមេសា ឆ្នាំ ១៩៧៥។ នេះបើយោងតាមការឲ្យដឹងពីក្រុមគ្រួសាររបស់ លោក ហង្ស ធុនហាក់៕

ប្រភព ៖ ក្រុមព្រះសុរិយា

អត្ថបទ ៖ ពិសី

The post លោក ហង្ស ធុនហាក់ បញ្ញវន្តខ្មែរមួយរូប មានចំណេះដឹងជ្រៅជ្រះលើផ្នែកសិល្បៈ វប្បធម៌ ល្ខោន appeared first on Kampuchea Thmey Daily.

លីវ តឹក បុរសសំនៀងឯកស្រែកបែកអាកាស ល្បីល្បាញនៅកម្ពុជា មុនឆ្នាំ ១៩៧៥

អ៊ិន ពិសី — Wed, 23 Aug 2023 03:14:34 +0000

បុរសសំនៀងឯកស្រែកបែកអាកាស ល្បីល្បាញនៅកម្ពុជា មុនឆ្នាំ ១៩៧៥ លោក លីវ តឹក មានឈ្មោះ និងសំឡេង ល្បីរន្ទឺ មិនធម្មតានោះទេ។ ជំនាន់នោះ គ្រាន់តែនិយាយពីឈ្មោះតារាចម្រៀង លីវ តឹក ភ្លាម គេនឹកឃើញដល់សំនៀងរបស់លោកភ្លែត ដែលនិយមច្រៀងស្រែក ស្ទើរតែបែកបំពង់ក។

តោះមកស្គាល់បុរសសំនៀងឯកស្រែកបែកអាកាសដ៏ល្បីល្បាញ នៃកម្ពុជា កាលពីមុនឆ្នាំ ១៩៧៥ លោក លីវ តឹក ដែល «ក្រុមព្រះសុរិយា» បានខិតខំស្រាវជ្រាវមកយ៉ាងលំបាក ដើម្បីទុកចែកជូនកូនខ្មែរជំនាន់ក្រោយបានដឹង និងស្គាល់ ៖

កាលណានិយាយដល់ឈ្មោះលោក លីវ តឹក លោកអ៊ំ លោកពូ អ្នកមីង ជាច្រើនណាស់ នឹកឃើញគ្រារីករាយមួយពេលដែល កម្ពុជា មានឈ្មោះថា «កោះសន្តិភាព» ក្រោមព្រះរាជកិច្ចដឹកនាំដ៏ឆ្នើម នៃ សម្ដេចព្រះ នរោត្តម សីហនុ ព្រះប្រមុខរដ្ឋ។

លោក លីវ តឹក ជាតារាចម្រៀងបុរសដ៏មានប្រជាប្រិយភាពមួយដួង នៃវង្សតន្ត្រី«យោធាភិរម្យ» កាលពីដើមទសវត្សឆ្នាំ ៦០។

តារាចម្រៀងបុរសដ៏មានប្រជាប្រិយភាព លោក លីវ តឹក មានឈ្មោះ និងសំឡេង ល្បីល្បាញមិនធម្មតានោះទេ។ ជំនាន់នោះ គ្រាន់តែនិយាយពីឈ្មោះតារាចម្រៀង លីវ តឹក ភ្លាម គេនឹកឃើញដល់សំនៀងរបស់លោកភ្លែត ដែលនិយមច្រៀងស្រែកស្ទើរតែបែកបំពង់ក។

ឈ្មោះ និងសំឡេង លោក លីវ តឹក មានកូនខ្មែរជំនាន់ក្រោយតិចណាស់បានស្គាល់តារាចម្រៀងបុរសរូបនេះ ក៏ព្រោះតែចម្រៀងរបស់លោកនៅសេសសល់តិចតួចបំផុត ដែលបានរកឃើញតែ ៥ ទៅ ៦ បទប៉ុណ្ណោះ។

តារាចម្រៀងប្រុសរូបនេះ តែងតែបង្ហាញខ្លួនជានិច្ចកាលនៅក្នុងកម្មវិធីប្រគំតន្ត្រីនានា ដង្ហែ សម្ដេចព្រះ នរោត្តមសីហនុ សម្ពោធសមិទ្ធផលនានា…។ កាលពីពេលនោះ លោក លីវ តឹក តែងតែបង្ហាញខ្លួនជាមួយតារាចម្រៀងប្រុស-ស្រី ល្បីៗ ដទៃទៀត ដូចជា «លោកស្រី ម៉ៅ សារ៉េត ,លោក តូច តេង , លោកស្រី ឈួន ម៉ាឡៃ និង លោក មាស សាម៉ន ជាដើម…»។

នៅដើមសម័យសាធារណរដ្ឋខ្មែរ ចម្រៀងមួយបទរបស់ លោក លីវ តឹក គឺ បទ«សឹងឯងសាសន៍អី» បានល្បីកក្រើកពាសពេញផ្ទៃប្រទេសតែម្ដង។

គួរជម្រាបថា ចម្រៀងល្បីៗ របស់តារាចម្រៀងបុរសដ៏មានប្រជាប្រិយភាពលោក លីវ តឹក ភាគច្រើនជាបទរាំវង្ស និងចង្វាក់សកល ដែលអាចថាមានខ្ទង់រយបទ តែងតែចេញផ្សាយនៅក្នុងវិទ្យុជាតិ តែបានបាត់បង់ស្ទើរតែគ្មានសល់ តួយ៉ាងដូចជា ៖ បទ«ជនជាតិខ្មែរ កើតនៅលើដីខ្មែរ , អាវឡេវខ្នង ,មើលកុកមើលទុង ,ស្រមោលស្ទឹងកំពត ,ចិន្ដាមាសបង ,កាំពីដួងចិត្ត ,ជ្រោះអូរចេង ,តុកកែយំយប់ ,ផ្កាយស្នេហា ,ភ្នំគូលែន ,មិនអាចបំភ្លេចអូនបាន ,អញ្ជើញរាំចង្វាក់ស៊ូល ជាដើម…»៕

អត្ថបទ ៖ ពិសី

សូមស្តាប់បទចម្រៀង លោក លីវ តឹក បុរសសំនៀងឯកស្រែកបែកអាកាស ៖

The post លីវ តឹក បុរសសំនៀងឯកស្រែកបែកអាកាស ល្បីល្បាញនៅកម្ពុជា មុនឆ្នាំ ១៩៧៥ appeared first on Kampuchea Thmey Daily.

អ្នកគាំទ្រចាំមិនភ្លេច ថ្ងៃនេះខួបកំណើត ៩០ ឆ្នាំ អធិរាជសំឡេងមាស លោកតា ស៊ីន ស៊ីសាមុត

អ៊ិន ពិសី — Wed, 23 Aug 2023 03:09:20 +0000

នៅពេលរម្លឹកដល់ឈ្មោះវីរសិល្បករជើងចាស់ដ៏ល្បីល្បាញលោកតា ស៊ីន ស៊ីសាមុត មហាជនពិតជានៅស្គាល់ និងចងចាំបានយ៉ាងច្បាស់ ទោះបីជាលោកបានចែកឋានទៅហើយក្ដី ប៉ុន្តែអ្វីដែលមិនអាចបំភ្លេចបាននោះគឺកេរ្តិ៍ឈ្មោះ និងទឹកដមសំនៀងដ៏ផ្អែមពីរោះរណ្ដំចិត្តតែម្ដង។

តារាចម្រៀងលោកតា ស៊ីន ស៊ីសាមុត គឺជាអ្នកនិពន្ធបទចម្រៀង និងអ្នកចម្រៀងខ្មែរដ៏ល្បីល្បាញនាអំឡុងទសវត្ស ៥០ ដល់ ៧០។ លោកតា មានរហស្សនាមថា «អធិរាជសំឡេងមាស»។ យ៉ាងណាមិញ ថ្ងៃនេះ ក៏ត្រូវបានគេដឹងថា ជាថ្ងៃគម្រប់ខួបកំណើត ៩០ ឆ្នាំ របស់លោកតា ស៊ីន ស៊ីសាមុត។

ទន្ទឹមគ្នា នៃការរម្លឹកដល់ថ្ងៃកំណើតរបស់លោកតា ស៊ីន ស៊ីសាមុត នេះដែរ គេឃើញមានទស្សនិកជន និងអ្នកគាំទ្រជាច្រើន បានបង្ហោះភ្ជាប់រូបភាពអមដោយសំណេរនឹករលឹកដល់អធិរាជសំឡេងមាស លោកតា ស៊ិន ស៊ីសាមុត ផងដែរ។

តួយ៉ាងនៅលើទំព័រផេកហ្វេសប៊ុករបស់ «ចៅកម្ពុជា» បានសរសេរថា «ថ្ងៃនេះគឺជាថ្ងៃកំណើតរបស់លោក ស៊ីន ស៊ីសាមុត គម្រប់ ៩០ ឆ្នាំ ពោលគឺ លោក ស៊ីន ស៊ីសាមុត បានកើតនៅក្នុងថ្ងៃទី ២៣ ខែសីហា ឆ្នាំ ១៩៣៣ នាទឹកដីខេត្តស្ទឹងត្រែង»។

ជាមួយគ្នានោះក៏មានការលើកឡើងដែរថា «ទោះបីរូបកាយឃ្លាតបាត់ តែសំឡេងនៅរស់ជានិច្ចក្នុងសង្គមបច្ចុប្បន្ន។ សូមសំឡេងរបស់លោកនៅតែបន្តរស់រានមានជីវិតជារៀងដរាបនៅក្នុងសោតិន្ទ្រិយមនុស្សលោក បើទោះជាមានការកែច្នៃបំភ្លៃយ៉ាងណាក៏ដោយ»។

សូមជម្រាបដែរថា លោកតា ស៊ីន ស៊ីសាមុត ទទួលមរណៈភាពក្នុងរបបប្រល័យពូជសាសន៍ខ្មែរក្រហម នៅឆ្នាំ ១៩៧៦។ លោកតា ស៊ីន ស៊ីសាមុត ជាវរជនតែមួយគត់ដែលបានបន្សល់ទុកនូវកេរ្តិ៍ឈ្មោះដ៏ល្អសម្រាប់ជាតិខ្មែរនាសតវត្សទី ២០។ វិស័យសិល្បៈសំឡេងចម្រៀងរបស់លោកសមជាអធិរាជសំឡេងមាស ស្ថិតដក់ជាប់ក្នុងអារម្មណ៍អ្នកចម្រៀងខ្មែរក្រោយៗមក៕

អត្ថបទ ៖ ចាន់រ៉ា

The post អ្នកគាំទ្រចាំមិនភ្លេច ថ្ងៃនេះខួបកំណើត ៩០ ឆ្នាំ អធិរាជសំឡេងមាស លោកតា ស៊ីន ស៊ីសាមុត appeared first on Kampuchea Thmey Daily.

តារាប្រុសជំនាន់មុន ៣ ដួង និយមសម្ដែងជាតួរង តួសំខាន់ កាចសាហាវ

អ៊ិន ពិសី — Tue, 15 Aug 2023 07:40:16 +0000

ចំណោមសិល្បករ-សិល្បការិនីជាច្រើន ក៏មាន តារាភាពយន្តផ្នែកបុរសជំនាន់មុន ចំនួន ៣ ដួង ដែលប្រជាទស្សនិកជនខ្មែរស្គាល់ថា ពួកគាត់និយមសម្ដែងជាតួរង តួសំខាន់ និងកាចសាហាវ ក្នុងខ្សែភាពយន្តផងដែរ។

ត្រួសៗ ពី តារាភាពយន្ត ៣ ដួង សម្ដែងជាតួរង តួសំខាន់ និងកាចសាហាវ ក្នុងខ្សែភាពយន្តជំនាន់មុន

១–លោក ឱ ឌុំ

លោក ឱ ឌុំ កើតនៅឆ្នាំ ១៩៣៥ នាទឹកដីខេត្តបាត់ដំបង។ លោក ឱ ឌុំ ជាតារាភាពយន្តនិយមសម្ដែងជាតួអង្គរង តួសំខាន់ ក្នុងសភាពកាចសាហាវ ដែលមហាជននៅចងចាំជានិច្ច។

តារាភាពយន្តរូបនេះ ប្រឡូកវិស័យសិល្បៈភាពយន្តជាលើកដំបូងបង្អស់នៅឆ្នាំ ១៩៥៩ ក្នុងខ្សែភាពយន្តរឿង «នេះហើយប្ដីខ្ញុំ» តាមការណែនាំរបស់លោក អឿ សំខាន់។

រវាងពីឆ្នាំ ១៩៥៩ ដល់ឆ្នាំ ១៩៧៥ រយៈពេលជាង ១០ ឆ្នាំ តារាភាពយន្តលោក ឱ ឌុំ សម្ដែងខ្សែភាពយន្តបានជិត ១០០ រឿង។

២–លោក ប៉ិច សាលឿន

លោក ប៉ិច សាលឿន កើតនៅឆ្នាំ ១៩៣៥ នារាជធានីភ្នំពេញ។ លោក ប៉ិច សាលឿន ជាតារាភាពយន្តនិយមសម្ដែងជាតួរង តួសំខាន់ ក្នុងសភាពជាតួកាច ដែលមហាជននៅចងចាំ។

តារារូបនេះ បានប្រឡូកវិស័យសិល្បៈភាពយន្តជាលើកដំបូងបង្អស់នៅឆ្នាំ ១៩៦១ ក្នុងខ្សែភាពយន្តរឿង «ក្បូនជីវិត» តាមរយៈការណែនាំរបស់លោក ម៉ក់ ហូ។

រយៈពេលជាង ១០ ឆ្នាំ លោក ប៉ិច សាលឿន តារាភាពយន្តនិយមសម្ដែងជាតួរង តួសំខាន់ ក្នុងសភាពជាតួកាច សម្ដែងបានខ្សែភាពយន្តជាង ៦០ រឿង។

៣–លោក លឹម សុផន

លោក លឹម សុផន ជាតារាភាពយន្តនិយមសម្ដែងជាតួរងសំខាន់ ដែលមហាជននៅស្រលាញ់ និងចងចាំជានិច្ច។ លោកមានស្រុកកំណើតនៅទឹកដីខេត្តបាត់ដំបង។

តារាភាពយន្តរូបនេះ ប្រឡូកវិស័យសិល្បៈភាពយន្តដំបូងបង្អស់នៅឆ្នាំ ១៩៦៤។ រយៈពេលជាង ១០ ឆ្នាំ លោកសម្ដែងខ្សែភាពយន្តបានជិត ៥០ រឿង៕

ប្រភព ៖ ក្រុមព្រះសុរិយា

អត្ថបទ ៖ ពិសី

The post តារាប្រុសជំនាន់មុន ៣ ដួង និយមសម្ដែងជាតួរង តួសំខាន់ កាចសាហាវ appeared first on Kampuchea Thmey Daily.

ត្រួសៗ ពី តារាប្រុស ៤ ដួង ឈរលំដាប់ទី ២ ប្រចាំប្រទេសកម្ពុជា កាលជំនាន់ដើម

អ៊ិន ពិសី — Fri, 11 Aug 2023 06:35:44 +0000

នៅយុគមាស នៃភាពយន្តខ្មែរ តារាភាពយន្តជំនាន់ដើម ៤ ដួង ឈរលំដាប់ទី ២ ប្រចាំប្រទេសកម្ពុជា មហាជនដក់ចិត្តស្រលាញ់ និងចងចាំ ចំណោមសិល្បករសិល្បការិនីជាច្រើន ដែលបានបូជាកម្លាំងកាយចិត្ត ជួយលើកស្ទួយវិស័យភាពយន្តខ្មែរ។

តារាភាពយន្តផ្នែកបុរស ចំនួន ០៤ ដួង ឈរលំដាប់ទី ២ ដែលមហាជនដក់ចិត្តស្រលាញ់ និងចងចាំ បើយោងតាម «ក្រុមព្រះសុរិយា» រួមមាន ៖

១–លោក វ៉ាន់ វណ្ណៈ

លោក វ៉ាន់ វណ្ណៈ កើតនៅឆ្នាំ ១៩៤១ នៅស្រុកស្រែអំបិល ខេត្តព្រះសីហនុ។ លោកជាតារាភាពយន្តរូបសង្ហាបែបបុរសខ្មែរអង្គរ។

តារាភាពយន្តរូបសង្ហាបែបបុរសខ្មែរអង្គររូបនេះ បានប្រឡូកវិស័យភាពយន្តជាលើកដំបូងបង្អស់ នៅឆ្នាំ ១៩៦៦ ជាតួឯកក្នុងខ្សែភាពយន្តរឿង «នាងសក់ក្រអូប» តាមការណែនាំរបស់លោក ប៊ីវ ឆៃលាង។ រវាងពីឆ្នាំ ១៩៦៦ ដល់ឆ្នាំ ១៩៧៥ រយៈពេលជិត ១០ ឆ្នាំ លោក វ៉ាន់ វណ្ណៈ សម្ដែងខ្សែភាពយន្តបានជាង ៤០ រឿង។

២–លោក ម៉ៃ យ៉ាសិទ្ធិ

លោក ម៉ៃ យ៉ាសិទ្ធិ ដែលមានឈ្មោះដើមថា «នង ឈុំម៉ៃយ៉ាសិទ្ធិ» ជាតារាភាពយន្តរូបស្រស់ សម្បុរខ្មែរអង្គរ។ តារាភាពយន្តប្រុសរូបនេះ កើតនៅឆ្នាំ ១៩៤០ នារាជធានីភ្នំពេញ។

លោក ម៉ៃ យ៉ាសិទ្ធិ បានប្រឡូកវិស័យសិល្បៈភាពយន្តជាលើកដំបូងបង្អស់ក្នុងឆ្នាំ ១៩៦៣។

រវាងពីឆ្នាំ ១៩៦៣ ដល់ឆ្នាំ ១៩៧៥ រយៈពេលជាង ១០ ឆ្នាំ លោក ម៉ៃ យ៉ាសិទ្ធិ សម្ដែងខ្សែភាពយន្តបានជាង ៥០ រឿង ក្នុងនោះលោកសម្ដែងជាតួរងផង និងជាតួឯកផង។

៣–លោក សូ ហៀន

លោក សូ ហៀន ជាតារារូបស្រស់បែបអន្តរជាតិ។ តារារូបនេះ កើតនៅឆ្នាំ ១៩៤២ នារាជធានីភ្នំពេញ ក្នុងត្រកូលគ្រួសារជាពាណិជ្ជករ។

ក្រោយវិលត្រឡប់ការសិក្សាពីប្រទេសចិនវិញ លោក សូ ហៀន បានចូលប្រឡូកវិស័យភាពយន្តជាលើកដំបូងបង្អស់នៅឆ្នាំ ១៩៦៦ ជាតួរងក្នុងខ្សែភាពយន្តរឿង «ទឹកភ្នែកលើខ្នងភ្នំ» តាមរយៈការណែនាំរបស់លោក ហ៊ុយ គឹង។

រវាងពីឆ្នាំ ១៩៦៦ ដល់ឆ្នាំ ១៩៧៥ រយៈពេលជិត ១០ ឆ្នាំ លោក សូ ហៀន សម្ដែងខ្សែភាពយន្តបានជាង ៣០ រឿង។

៤–លោក មាស សំអ៊ែល

លោក មាស សំអ៊ែល ជាតារាភាពយន្តរូបល្អបែបបុរសខ្មែរអង្គរ។ តារាភាពយន្តរូបនេះ កើតនៅឆ្នាំ ១៩៣៧ នាទឹកដីខេត្តព្រៃវែង ក្នុងត្រកូលគ្រួសារកសិករ។

លោក មាស សំអ៊ែល បានប្រឡូកវិស័យសិល្បៈភាពយន្តជាលើកដំបូងបង្អស់នៅឆ្នាំ ១៩៦២ ជាតួឯកក្នុងខ្សែភាពយន្តរឿង «បក្សីឋានសួគ៌» តាមការណែនាំរបស់លោក ម៉ាក់សេកាម៊ូស។

ជាង ១០ ឆ្នាំ លោក មាស សំអ៊ែល ប្រឡូកក្នុងវិស័យសិល្បៈភាពយន្តខ្មែរ សម្ដែងបានខ្សែភាពយន្តជាង ៤០ រឿង៕

អត្ថបទ ៖ ពិសី

The post ត្រួសៗ ពី តារាប្រុស ៤ ដួង ឈរលំដាប់ទី ២ ប្រចាំប្រទេសកម្ពុជា កាលជំនាន់ដើម appeared first on Kampuchea Thmey Daily.

កវី ពៅ ស៊ីផូ ស្ថាបនិកចម្រៀងសម័យខ្មែរ មុនឆ្នាំ ១៩៧៥

អ៊ិន ពិសី — Mon, 31 Jul 2023 02:51:49 +0000

កវី ពៅ ស៊ីផូ ជាស្ថាបនិកមួយរូប នៃការបង្កើតក្រុមតន្ត្រីសម័យនៅកម្ពុជា និងសិល្បករ ដែលមានស្នាដៃមហិមា មុនឆ្នាំ ១៩៧៥ និងមានជំនាញច្រើនណាស់លើផ្នែកតូយ៌តន្ត្រីដូចជា «និពន្ធបទភ្លេង និពន្ធទំនុកច្រៀង សម្រួលតន្ត្រីប្រគំ» ហើយលោកក៏អាចលេងឧបករណ៍រនាតដែកបានយ៉ាងពីរោះផងដែរ។

លោកអ៊ំ លោកពូ អ្នកមីង ដែលមានអាយុជាង ៦០ ឡើង ប្រាកដជាស្គាល់ឈ្មោះ កវី ពៅ ស៊ីផូ យ៉ាងច្បាស់ តាមរយៈរលកវិទ្យុជាតិ និងលើទំព័រកាសែត ថាសចម្រៀង និងសៀវភៅចម្រៀងនានា តាំងពីទសវត្ស ៥០ រហូតដល់ពេលខ្មែរក្រហមឡើងកាន់អំណាច។

ស្ដេចភ្លេង នៃកម្ពុជា រូបនេះ បានចូលបម្រើវិស័យសិល្បៈចម្រៀងខ្មែរមុនគេបង្អស់ គឺ មុនកវី វ៉ោយហូ , កវី យ៉ង់ ឈាង , កវី ស្វាយ សំអឿ ព្រមទាំងអ្នកចម្រៀង ស៊ីន ស៊ីសាមុត និង លោក សុះម៉ាត់ ទៅទៀត។

ដើមទសវត្សឆ្នាំ ៥០ តាំងពីតន្ត្រីសម័យចេញផ្សាយដំបូងនៅរលកវិទ្យុជាតិ គេបានឮនាមរបស់ ស្ដេចភ្លេង នៃកម្ពុជា រូបនេះ ទៅហើយ ដែលខណៈពេលនោះ កវី ពៅ ស៊ីផូ នេះហើយ ជាស្ថាបនិកមួយរូប នៃការកសាងវិស័យចម្រៀងសម័យខ្មែរ។

កវី ពៅ ស៊ីផូ មានជំនាញច្រើនណាស់លើផ្នែកតូយ៌តន្ត្រី ដែលជំនាញទាំងអស់នោះ លោកបានចេះច្បាស់លាស់ទាំងអស់ដូចជា ៖ និពន្ធបទភ្លេង និពន្ធទំនុកច្រៀង សម្រួលតន្ត្រីប្រគំ និងអាចលេងឧបករណ៍រនាតដែកបានយ៉ាងពីរោះផងដែរ។ បន្ថែមនោះ លោកក៏ជាគ្រូបង្ហាត់ដ៏ជំនាញមួយរូប ដែលបានបង្វឹកបណ្ដុះបណ្ដាលសិល្បករល្បីៗ ជាច្រើន ទៅតាមបច្ចេកទេសច្រៀងទាំងអស់នោះ និងបង្ហាត់ពន្យល់ពីភាសាបេះដូងនៅក្នុងចម្រៀងទៀតផង។

ស្ថាបនិកចម្រៀងសម័យខ្មែររូបនេះ មានស្នាដៃច្រើនណាស់ ហើយសុទ្ធសឹងតែជាបទល្បីៗ ដែលរស់ក្នុងដួងចិត្តមហាជន តាំងពីដើមរហូតមកដល់សព្វថ្ងៃ រួមមាន ៖ បទ «ព្រែកឯក ,ស្ទឹងខៀវ , រ៉ែពេលល្ងាច, សម្ដីបុរស ,ស្គាល់រសជាតិស្នេហ៍ ,ដួងនេត្រា ,ភ្លើងគ្មានផ្សែង ,ទឹកហូរ ,យំអស់ទឹកភ្នែក, ល្មមហើយណាស្រី ,ព្រាត់ទាំងស្រឡាញ់ ,ពេលមេឃស្រទំ ,ស្លឹកឈើ ,អូនគង់ដឹងខ្លួន និងបទបេះចិត្តខ្ញុំចុះ ជាដើម…»៕

អត្ថបទ ៖ ពិសី

ប្រភព ៖ ក្រុមព្រះសុរិយា

The post កវី ពៅ ស៊ីផូ ស្ថាបនិកចម្រៀងសម័យខ្មែរ មុនឆ្នាំ ១៩៧៥ appeared first on Kampuchea Thmey Daily.

តារាខ្មែរសម័យសង្គមរាស្ត្រនិយម ៧ ដួង ចេះក្បាច់គុនល្បុក្កតោយ៉ាងស្ទាត់ជំនាញ

អ៊ិន ពិសី — Thu, 27 Jul 2023 08:56:35 +0000

តារាភាពយន្តខ្មែរជំនាន់ដើម ៧ ដួង ចេះក្បាច់គុនល្បុក្កតោយ៉ាងស្ទាត់ជំនាញ ខណៈសិល្បៈបុរាណសម័យគ្រប់ទម្រង់ និងក្បាច់គុនបុរាណខ្មែរ ត្រូវបានប្រមូលផ្ដុំ ចងក្រង ឲ្យចេញជារូបរាងផ្លូវការ ក្នុងសម័យសង្គមរាស្ត្រនិយម មកដល់បច្ចុប្បន្ន និងនៅរាយប៉ាយតាមស្រុក តំបន់ ពាសពេញប្រទេស។

នៅសម័យសង្គមរាស្ត្រនិយម មានតារាភាពយន្ត ៧ ដួង ចេះក្បាច់គុនល្បុក្កតោយ៉ាងស្ទាត់ជំនាញ ក្នុងនោះ ក្រៅពីហាត់រៀនចេះចាំស្ទាត់ តារាទាំងនេះ ក៏តែងបង្ហាញក្បាច់គុនទាំងនោះក្នុងខ្សែភាពយន្តជាច្រើនផងដែរ។

តាមរយៈការស្រាវជ្រាវយ៉ាងយកចិត្តទុកដាក់របស់«ក្រុមព្រះសុរិយា» បានឲ្យដឹងថា តារាភាពយន្តខ្មែរ ៧ ដួង ដែលចេះក្បាច់គុនល្បុក្កតោ រួមមាន ៖ ១.លោក ហ៊ុយ សាន់ (ជំនាញគុនដំបងវែង) ,២.លោក ឡាញ់ ដូរ៉ (ជំនាញក្បាច់ស្រង៉ែពេន), ៣.លោក ជា យុទ្ធថន (ជំនាញក្បាច់ឃុំ ,ទាត់ស្មង…) ,៤.លោក វណ្ណ វណ្ណៈ (ជំនាញគុនដាវព្រះរៀមថ្លែងស ,កិន្នរពាំផ្កា), ៥.លោក សាសា គុយនី (ជំនាញក្បាច់ខ្លាទះ), ៦.លោក ឱ ឌុំ (ជំនាញក្បាច់ស្រង៉ែពេន), ៧.លោក សេរី រតនា (ជំនាញក្បាច់ដាល់ និងឃុំ)។

យ៉ាងណាមិញនៅក្នុងរបបប្រល័យពូជសាសន៍ខ្មែរក្រហម សាស្ត្រាចារ្យ តារាភាពយន្ត និងសិស្សគុន ដែលចេះក្បាច់គុនល្បុក្កតោ ត្រូវបានខ្មែរក្រហមសម្លាប់ស្ទើរគ្មានសល់ គួរឲ្យសោកស្ដាយរកទីបំផុតគ្មាន។

ងាកមកបច្ចុប្បន្ន ក្រោយ កម្ពុជា មានសុខសន្តិភាព ក្រោមការដឹកនាំរបស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក្បាច់គុនល្បុក្កតោ ក៏ត្រូវបានប្រមូលរៀបចំឡើងវិញ និងចេញជារូបរាងផ្លូវការជាថ្មី ប្រកបដោយមុខមាត់ខ្ពស់ គួរឲ្យមោទនភាពជាខ្លាំង។

កាលពីថ្ងៃទី ២៩ ខែវិច្ឆិកា ឆ្នាំ ២០២២ ក្បាច់គុនល្បុក្កតោ ត្រូវបានចុះក្នុងបញ្ជីបេតិកភណ្ឌសម្បត្តិវប្បធម៌អរូបិយ នៃមនុស្សជាតិ របស់អង្គការយូណេស្កូ ជាផ្លូវការ នៅទីក្រុងរ៉ាបាត នៃប្រទេសម៉ារ៉ុក ហើយក្បាច់គុននេះ ទំនងជាកើតឡើងដំណាលគ្នា នៃការកកើតទឹកដីខ្មែរផងដែរ។ រឿងរ៉ាវនេះ អាចត្រូវបានស្វែងយល់តាមរយៈរឿងព្រេងខ្មែរ នូវការដំណាលតៗគ្នារបស់ដូនតាខ្មែរ។

ក្បាច់គុនល្បុក្កតោ មានប្រវត្តិដ៏ចំណាស់ កើតចេញពីពលទាហានម្នាក់ បានប្រើប្រាស់ដំបងរួមគ្នាជាមួយនឹង ក្បាច់ដៃ ជង្គង់ ដើម្បីវាយសត្វតោមួយក្បាល ដែលតែងតែមកវាយប្រហារយាយីសម្លាប់ និងបំផ្លាញទ្រព្យសម្បត្តិអ្នកភូមិជាញឹកញាប់។

ប្រវត្តិសាស្ត្រក្បាច់គុនល្បុក្កតោ ត្រូវបានប្រវត្តិវិទូរកឃើញថា«មានឆ្លាក់តាមជញ្ជាំងប្រាសាទ តាំងពីទសវត្សទី ៩ ដូចជា ប្រាសាទព្រះគោ បន្ទាយស្រី អង្គរវត្ត និងបាពួន»។ ក្បាច់គុននេះ បានចាក់គ្រឹះយ៉ាងរឹងមាំនៅក្នុងប្រពៃណី ទំនៀមទម្លាប់ វប្បធម៌ និងជីវភាពរស់នៅប្រចាំថ្ងៃរបស់ប្រជាជនកម្ពុជា ហើយក្លាយទៅជានិមិត្តរូប នៃអរិយធម៌ខ្មែរ រហូតមកដល់សព្វថ្ងៃ។

ក្បាច់គុនល្បុក្កតោ ដូចក្បាច់គុនខ្មែរផ្សេងៗទៀតដែរ បានប្រមូលផ្ដុំដោយក្បាច់ និងស្នៀតយ៉ាងច្រើន ដែលយកតម្រាប់តាមតថភាពធម្មជាតិ នៃជីវភាពរស់នៅប្រចាំថ្ងៃរបស់មនុស្សនាសម័យនោះ និងកាយវិការសត្វ ដូចជា បក្សី សេះ ខ្លា ដំរី កេនរ ក្រពើ ក្ដាម ពស់ នាគ និង ទា ជាដើម…។ ចំពោះទម្រង់ នៃគុនល្បុក្កតោ បានបង្កប់ខ្លួននៅក្នុងសិល្បៈបុរាណរបស់ខ្មែរ ដូចជា របាំប្រជាប្រិយ ល្បែងប្រជាប្រិយ និងរបាំបុរាណ។ រីឯ ចលនា ស្នៀត ក្បាច់ និងកាយវិការនីមួយៗ នៃក្បាច់គុននេះ បានបង្កប់ភាពទន់ភ្លន់ ស្លូតបូត រស់រវើក រឹងមាំ រហ័សរហួន និងឥរិយាបថរស់នៅរបស់មនុស្សក្នុងសង្គម។ ក្បាច់គុននេះ តម្រូវឲ្យវាយកៀកនឹងគូប្រយុទ្ធ ដោយប្រើកែងដៃ និងជង្គង់ ជាមូលដ្ឋាន៕

អត្ថបទ ៖ ពិសី

The post តារាខ្មែរសម័យសង្គមរាស្ត្រនិយម ៧ ដួង ចេះក្បាច់គុនល្បុក្កតោយ៉ាងស្ទាត់ជំនាញ appeared first on Kampuchea Thmey Daily.

តារាជំនាន់ដើម ៣ ដួង ដែលបូជាកម្លាំងកាយចិត្ត លើកស្ទួយវិស័យភាពយន្តខ្មែរ

អ៊ិន ពិសី — Thu, 27 Jul 2023 04:56:02 +0000

តារាភាពយន្តខ្មែរជំនាន់ដើម ៣ ដួង ឈរលំដាប់ទី ១ នៅព្រះរាជាណាចក្រកម្ពុជា មហាជនដក់ចិត្តស្រលាញ់ និងចងចាំ ក្នុងចំណោមសិល្បករជាច្រើន ដែលបូជាកម្លាំងកាយចិត្ត លើកស្ទួយវិស័យភាពយន្តខ្មែរ។

ប្រវត្តិត្រួសៗ ពីតារាភាពយន្តខ្មែរជំនាន់ដើម ៣ ដួង ឈរក្នុងលំដាប់ទី ១ ដែលមហាជននៅតែចងចាំ ដោយយោងតាមក្រុមព្រះសុរិយា រួមមាន ៖

១-លោក គង់ សំអឿន

តារាភាពយន្តប្រជាប្រិយ គង់ សំអឿន កើតនៅឆ្នាំ ១៩៤១ នាទឹកដីខេត្តកណ្ដាល ក្នុងត្រកូលគ្រួសាររាជការ។ តារាភាពយន្តប្រជាប្រិយរូបនេះ បានប្រឡូកក្នុងវិស័យសិល្បៈភាពយន្តជាលើកដំបូងបង្អស់ នាឆ្នាំ ១៩៦០ ជាតួឯកក្នុងខ្សែភាពយន្តរឿង«កម្មម្ដាយ»។

នៅឆ្នាំ ១៩៦៤ លោក គង់ សំអឿន បានក្លាយជាតួឯកលើកដំបូងបង្អស់ក្នុងខ្សែភាពយន្តរឿង«កោដ្ឋមួយពីរនាក់» តាមរយៈការណែនាំរបស់លោក អុម វ៉ូ។ តារាភាពយន្តប្រជាប្រិយ លោក គង់ សំអឿន ចាប់តាំងពីពេលនោះមក ក៏បានទទួលតួនាទីជាតួឯករហូត។

ចាប់ពីឆ្នាំ ១៩៦០ ដល់ឆ្នាំ ១៩៧៥ រយៈពេលជាង ១០ ឆ្នាំ លោក គង់ សំអឿន សម្ដែងបានខ្សែភាពយន្តជាង ១០០ រឿង។ តារាភាពយន្តរូបនេះ មហាជននៅតែដក់ចិត្តស្រលាញ់ និងចងចាំជានិច្ចនូវទេពកោសល្យសម្ដែងរបស់លោក។

២-លោក ណុប ណែម

តារាអន្តរជាតិ ណុប ណែម កើតនៅឆ្នាំ ១៩៣៨ នាស្រុកត្រាំកក់ ខេត្តតាកែវ ក្នុងត្រកូលគ្រួសារកសិករ។ តារាអន្តរជាតិរូបនេះ បានប្រឡូកវិស័យសិល្បៈភាពយន្តជាលើកដំបូងបង្អស់នាឆ្នាំ ១៩៥៩ ជាតួរង ក្នុងខ្សែភាពយន្តរឿង «ឱសង្សារបងអើយ»។

តារាប្រុស ណុប ណែម នៅឆ្នាំ ១៩៦២ បានទទួលនាទីជាតួឯកលើកដំបូងបង្អស់ក្នុងខ្សែភាពយន្តរឿង«ការពារព្រហ្មចារីស្រីទុរគត»។

កិត្តិនាមរបស់លោក ណុប ណែម មានឈ្មោះល្បីល្បាញសុសសាយពាសពេញប្រទេសកម្ពុជា និងពេញឆាកអន្តរជាតិ តាមរយៈខ្សែភាពយន្តជាច្រើន ហើយគេបានចាត់ទុកតារារូបនេះជាតួអន្តរជាតិមួយដែលសម្ដែងប្រកបដោយបច្ចេកទេសខ្ពស់ទៀតផង។ លោក ណុប ណែម ក៏ជាតារាភាពយន្តមួយរូប ដែលអាចសម្ដែងគ្រប់តួទាំងអស់ ជាតួរងក៏បាន និងតួឯកក៏បាន។

នៅឆ្នាំ ១៩៥៩ ដល់ឆ្នាំ ១៩៧៥ រយៈពេល ១៦ ឆ្នាំ នៃការប្រឡូកខ្សែភាពយន្ត លោក ណុប ណែម សម្ដែងខ្សែភាពយន្តបានជិត ២០០ រឿង ទាំងជាតួឯក និងតួរង។

៣-លោក ជា យុទ្ធថន

តារាសាច់ដុំលោក ជា យុទ្ធថន កើតនៅឆ្នាំ ១៩៣៧ នាតំបន់ជ្រោយចង្វារ រាជធានីភ្នំពេញ។ តារាសាច់ដុំរូបនេះ បានប្រឡូកវិស័យសិល្បៈភាពយន្តជាលើកដំបូងបង្អស់នៅឆ្នាំ ១៩៦១ ជាតួរង ក្នុងខ្សែភាពយន្តរឿង«ផែនដីដែលខ្ញុំស្រលាញ់»។

លោក ជា យុទ្ធថន នៅឆ្នាំ ១៩៦២ បានទទួលនាទីសម្ដែងជាតួឯកជាលើកដំបូងបង្អស់ក្នុងខ្សែភាពយន្តរឿង«កូនប្រុសរបស់ផលិតកម្មគោកធ្លកភាពយន្ត»។ តាំងពីពេលនោះមក កិត្តិនាមរបស់លោក បានល្បីសុសសាយពាសពេញព្រះរាជាណាចក្រកម្ពុជា។

លោក ជា យុទ្ធថន មិនត្រឹមតែមានទេពកោសល្យក្នុងការសម្ដែងប៉ុណ្ណោះទេ តែលោកក៏ជាកីឡាករតេក្វាន់ដូ ដ៏ឆ្នើមមួយដួងផងដែរ។

នៅឆ្នាំ ១៩៦០ ដល់ឆ្នាំ ១៩៧៥ រយៈពេល ១៥ ឆ្នាំ តារាសាច់ដុំលោក ជា យុទ្ធថន បានសម្ដែងខ្សែភាពយន្តជាង ១០០ រឿង។ តារាសាច់ដុំរូបនេះ ក៏ជាតារាមួយដួង ចំណោមសិល្បករជាច្រើន ដែល បានបូជាកម្លាំងកាយ ចិត្ត លើកស្ទួយវិស័យភាពយន្តខ្មែរផងដែរ។

នៅយុគមាស នៃភាពយន្តខ្មែរ មានសិល្បករសិល្បការិនីជាច្រើន បូជាកម្លាំងកាយចិត្ត ដើម្បីជួយលើកស្ទួយវិស័យភាពយន្តខ្មែរ ក្នុងនោះ មហាជន ក៏បានចាត់ទុកតារាទាំងនេះជាបុព្វបុរស នៃភាពយន្តផងដែរ៕

អត្ថបទ ៖ ពិសី

The post តារាជំនាន់ដើម ៣ ដួង ដែលបូជាកម្លាំងកាយចិត្ត លើកស្ទួយវិស័យភាពយន្តខ្មែរ appeared first on Kampuchea Thmey Daily.