យោងតាមស្ថានទូតបារាំងប្រចាំកម្ពុជា ការបោះឆ្នោតជ្រើសរើសចៅក្រមនេះគ្រោងនឹងប្រព្រឹត្តទៅនៅទីក្រុងញូវយ៉ក ក្នុងខែវិច្ឆិកា ឆ្នាំ២០២៦ ទាំងនៅក្នុងក្រុមប្រឹក្សាសន្តិសុខ និងសភាអង្គការសហប្រជាជាតិ។

ក្នុងសេចក្តីថ្លែងការណ៍មួយ លោក François Alabrune បានគូសបញ្ជាក់អំពីសារៈសំខាន់នៃស្ថាប័ននេះថា៖

«បួនដប់ឆ្នាំបន្ទាប់ពីការបង្កើតតុលាការយុត្តិធម៌អន្តរជាតិ សកម្មភាពរបស់ខ្លួននៅតែបន្តកើនឡើង ដែលឆ្លុះបញ្ចាំងពីទំនុកចិត្តយ៉ាងខ្លាំងលើស្ថាប័ននេះ។ ក្នុងពេលជាមួយគ្នានេះ អំណាច និងភាពជាសកលនៃច្បាប់អន្តរជាតិកំពុងត្រូវបានសាកល្បង។ ប្រសិនបើវិបត្តិបង្ហាញពីចំណុចខ្សោយនៃប្រព័ន្ធមួយ ខ្ញុំជឿជាក់ថា វាក៏អាចនាំឱ្យមានការកែប្រែថ្មីវិញផងដែរ។ ច្បាប់អន្តរជាតិ និងពហុភាគីនិយមនៅតែជាមូលដ្ឋានគ្រឹះដែលមិនអាចខ្វះបាននៃសន្តិភាពយូរអង្វែង»។

គួរបញ្ជាក់ថា តុលាការយុត្តិធម៌អន្តរជាតិ (ICJ) ត្រូវបានបង្កើតឡើងក្រោយសង្គ្រាមលោកលើកទី២ ក្នុងឆ្នាំ១៩៤៥ ក្នុងគោលបំណងដោះស្រាយវិវាទរវាងរដ្ឋនានាដោយសន្តិវិធី ស្របតាមច្បាប់អន្តរជាតិ។ ការដាក់បេក្ខភាពរបស់បារាំងនាពេលនេះ បានបង្ហាញពីការប្តេជ្ញាចិត្តរបស់ទីក្រុងប៉ារីសក្នុងការគាំទ្រដល់ពហុភាគីនិយម និងភាពរឹងមាំនៃច្បាប់អន្តរជាតិ បើទោះបីជាប្រឈមមុខនឹងវិបត្តិសកលក៏ដោយ។

លោក François Alabrune ជាអ្នកការទូត និងអ្នកជំនាញផ្នែកច្បាប់អន្តរជាតិដែលមានបទពិសោធន៍ខ្ពស់ ហើយការឈរឈ្មោះរបស់លោកត្រូវបានគេរំពឹងថានឹងទទួលបានការគាំទ្រពីបណ្តារដ្ឋសមាជិកជាច្រើន៕

The post បារាំងដាក់បេក្ខភាពលោក François Alabrune ឈរឈ្មោះជាចៅក្រមតុលាការយុត្តិធម៌អន្តរជាតិ ក្នុងឱកាសខួប៨០ឆ្នាំ appeared first on Kampuchea Thmey Daily.

ខាងក្រោមនេះ ជាសំណេរទាំងស្រុងរបស់សម្ដេចតេជោ ហ៊ុន សែន សរសេលើទំព័រហ្វេសប៊ុកផ្លូវការ៖

កម្ពុជាអំពាវនាវដល់បណ្តារដ្ឋដែលអនុវត្តនយោបាយការបរទេសផ្អែកលើច្បាប់ លើកទឹកចិត្តដល់ភាគីទាំងពីរដោះស្រាយបញ្ហាដោយសន្តិវិធី និងគោរពតាមច្បាប់។

សំណូមពររបស់កម្ពុជា គឺស្នើសុំឲ្យបណ្តារដ្ឋ ដែលគោរពច្បាប់ លើកទឹកចិត្តភាគីថៃ ដំណើរការក្តីតាមផ្លូវតុលាការយុត្តិធម៌អន្តរជាតិ ICJ លើសំណុំរឿងព្រំដែនជាមួយកម្ពុជាលើ៤ចំណុច៖

ទី១ តំបន់មុំបីនៃព្រំដែនកម្ពុជា-ឡាវ-ថៃ

ទី២ ប្រាសាទតាមាន់ធំ

ទី៣ ប្រាសាទតាមាន់តូច និង

ទី៤ ប្រាសាទតាក្របី។

កម្ពុជាមិនស្នើសុំអាវុធ-គ្រាប់ ដើម្បីវាយប្រយុទ្ធបង្ហូរឈាមគ្នារវាងកម្ពុជានិងថៃនោះទេ តែកម្ពុជាស្នើសុំឲ្យលើកទឹកចិត្តដោះស្រាយដោយសន្តិវិធីតាមរយៈការចរចា តាមយន្តការទ្វេភាគីផង និងតាមផ្លូវតុលាការផង។ ព្រំដែនកម្ពុជា-ថៃមានប្រវែងជាង៨០០គីឡូម៉ែត្រ កម្ពុជាលើកតែ៤ចំណុច ដែលជាចំណុចក្តៅ​ និងរសើប ដែលងាយនឹងផ្ទុះអាវុធវាយប្រហារគ្នាប្តឹងទៅតុលាការដោះស្រាយជាមុន។ ៤ចំណុចដូចបានរៀបរាប់ខាងលើ មិនអាចរកការស្រុះស្រួលគ្នាតាមយន្តការទ្វេភាគីបានឡើយ សូម្បីតែ១០០ឆ្នាំទៀតក៏មិនអាចដោះស្រាយបានដែរ។ ដូចនេះមានតែតុលាការយុត្តិធម៌អន្តរជាតិ ICJ ប៉ុណ្ណោះ ទើបអាចដោះស្រាយបាន។

ការដោះស្រាយតាមផ្លូវតុលាការមិនមែនជាការបង្កហេតុបង្កសង្រ្គាមនោះឡើយ តែជាការដោះស្រាយដោយសន្តិវិធីតាមផ្លូវច្បាប់បញ្ជៀសការបង្ហូរឈាមនាពេលអនាគត។ សម្រាប់រាជរដ្ឋាភិបាលក៏ងាយស្រួលក្នុងការបកស្រាយជាមួយប្រជាជនខ្លួនផងដែរ ក្នុងករណីចាញ់ក្តីនៅតុលាការ។

ក្នុងចំណោមប្រទេសអាស៊ានមានឧទាហរណ៍ដ៏ល្អ ដែលឥណ្ឌូនេសុី និង ម៉ាឡេសុី, សឹង្ហបុរី និងម៉ាឡេសុី នាំយកជម្លោះទឹកដី ទៅឲ្យតុលាការយុត្តិធម៌អន្តរជាតិ ICJ ដោះស្រាយដោយភាគីនីមួយៗ គោរពតាមការសម្រេចរបស់តុលាការ។ ជាលទ្ធផលទំនាក់ទំនងរវាង ឥណ្ឌូនេស៉ី និងម៉ាឡេសុី និងទំនាក់ទំនងម៉ាឡេសុី ជាមួយសឹង្ហបុរី នៅតែល្អនិងគ្មានជម្លោះតកូនតចៅ។

ការគេចវេសណាមួយមិនហ៊ានចូលតាមផ្លូវតុលាការ វាមានន័យស្មើជាមួយការប្រព្រឹត្តបទល្មើស និងការមិនគោរពច្បាប់ ក្នុងសណ្តាប់ធ្នាប់ពិភពលោកមួយដែលគោរពច្បាប់៕

The post សម្ដេចតេជោ៖ កម្ពុជា​ មិនសុំអាវុធពីបរទេសដើម្បីធ្វើសង្គ្រាមទេ ប៉ុន្តែគ្រាន់តែសុំអន្តរជាតិប្រាប់ថៃឱ្យចូលទៅICJ ដោះស្រាយបញ្ហាព្រំដែន appeared first on Kampuchea Thmey Daily.

គួររម្លឹកថា ថ្ងៃទី១៥ ខែមិថុនា កាលពី៦៣ ឆ្នាំមុនកម្ពុជា (១៥ មិថុនា ១៩៦២ ) ជាថ្ងៃដែលកម្ពុជា ធ្លាប់ឈ្នះក្ដីលើប្រទេសថៃ ជុំវិញវិវាទប្រាសាទព្រះវិហារ។

ខាងក្រោមនេះគឺជាសំណេរទាំងស្រុងនៅលើគណនី facebook ផ្លូវការរបស់សម្ដេច ហ៊ុន ម៉ាណែត  នារាត្រីថ្ងៃស្រុកនេះ

ថ្ងៃសៅរ៍ទី១៤ មិថុនា ឆ្នាំ ២០២៥ ស្អែកនេះ គណៈកម្មការព្រំដែនចម្រុះ (JBC) កម្ពុជា-ថៃ និងជួបប្រជុំគ្នាក្រោយពីខកខានមិនបានប្រជុំអស់រយៈពេល ១២ឆ្នាំ។ កម្ពុជាបន្តសហការជាមួយភាគីថៃដើម្បីជំរុញការវាស់វែង ខ័ណ្ឌសីមា និងបោះបង្គោលព្រំដែនរវាងប្រទេសទាំងពីរដែលនៅសេសសល់ (ក្រៅពីតំបន់ប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី) ដោយប្រើប្រាស់យន្តការគណៈកម្មការព្រំដែនចម្រុះ(JBC) ។

ខ្ញុំសូមបញ្ជាក់ជូនបងប្អូនជនរួមជាតិឱ្យបានជ្រាបថា បញ្ហាពីរដែលនឹងមិនត្រូវលើកមកពិភាក្សានៅក្នុងកិច្ចប្រជុំ JBC ថ្ងៃស្អែកគឺ÷

១. បញ្ហាព្រំដែនពាក់ព័ន្ធនឹងប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី នឹងមិនត្រូវលើកយកមកពិភាក្សាក្នុងកិច្ចប្រជុំ JBC នេះទេ ព្រោះកម្ពុជាបានសម្រេចយកបញ្ហាព្រំដែននៅតំបន់ទាំងបួនទៅដោះស្រាយនៅតុលាការយុត្តិធម៌អន្តរជាតិ (ICJ) ។

ភាគីកម្ពុជានៅរង់ចាំការបញ្ជាក់ជំហររបស់ភាគីថៃក្នុងកិច្ចប្រជុំ JBC ស្អែកនេះថា តើថៃនិងចូលរួមជាមួយកម្ពុជាក្នុងការយកបញ្ហានៅតំបន់ទាំងបួននេះទៅតុលាការយុត្តិធម៌អន្តរជាតិឬទេ? ខ្ញុំសូមបញ្ជាក់ជូនបងប្អូនរួមជាតិសារជាតិថ្មីថា បើទោះជាភាគីថៃមិនព្រម ឬមិនផ្ដល់ចម្លើយ កម្ពុជានឹងប្ដឹងជាឯកតោភាគីទៅ ICJ នៅតំបន់ទាំងបួននេះ ដោយក្រសួងការបរទេស និងកិច្ចសហប្រតិបត្តិការអន្តរជាតិ នឹងបញ្ជូនលិខិតជាផ្លូវការទៅតុលាការយុត្តិធម៌អន្តរជាតិនៅថ្ងៃអាទិត្យទី ១៥ មិថុនា ២០២៥ ខានស្អែកនេះ។

២. បញ្ហាការបិទព្រំដែនក៏នឹងមិនត្រូវដាក់ជាកម្មវត្ថុក្នុងការពិភាក្សា ក្នុងកិច្ចប្រជុំ JBC ស្អែកនេះដែរ ម្យ៉ាងដោយសារការបិទឬបើកច្រកព្រំដែនមិនមែនជាសមត្ថកិច្ចរបស់ JBC ទេ។ ម្យ៉ាងទៀតគឺ ដំណោះស្រាយពាក់ព័ន្ធជាមួយនឹងការបិទច្រកព្រំដែននេះ គឺងាយស្រួលដោះស្រាយទេ បើសិនជាកងទ័ពថៃដែលបានចាប់ផ្ដើមដាក់វិធានការបិទច្រកព្រំដែនជាឯកតោភាគីកាលពីថ្ងៃទី៧ មិថុនាកន្លងទៅនេះ ធ្វើការបើកព្រំដែនដូចស្ថានភាពដើមជាឯកតោភាគីវិញនោះ។ កម្ពុជាមិនមានបំណងបង្កបញ្ហាដែលនាំឱ្យប៉ះពាល់ដល់ការធ្វើដំណើរ ឬការធ្វើពាណិជ្ជកម្មរបស់ប្រជាជនថៃនិងកម្ពុជាតាមព្រំដែនទេ។ ប៉ុន្តែកម្ពុជាក៏មានសមត្ថភាពគ្រប់គ្រាន់ ក្នុងការដាក់ចេញនូវវិធានការនានាដើម្បីឆ្លើយតបទៅនឹងការគំរាមកំហែងឬការដាក់សម្ពាធពីខាងក្រៅ។

ខ្ញុំសូមបញ្ជាក់ថា កម្ពុជាមិនមែនជាអ្នកចាប់ផ្ដើមបញ្ហានេះទេ។ ហេតុដូច្នេះកម្ពុជាក៏មិនត្រូវជាអ្នកដែលបញ្ចប់បញ្ហានេះមុនដែរនោះទេ។ រឿងដែលកើតឡើងដោយឯកតោភាគី ត្រូវបញ្ចប់វិញដោយឯកតភាគី។ មិនមានការចាំបាច់ចរចាគ្នានោះទេ។ អ្នកណាចាប់ផ្ដើមមុន អ្នកនោះបញ្ចប់មុនទៅជាការស្រេច។

The post កម្ពុជា នឹងប្ដឹងរឿងព្រំដែនទៅICJ នៅថ្ងៃទី១៥ មិថុនា ចំថ្ងៃខួប៦៣ឆ្នាំ ថៃធ្លាប់ចុកចាប់ព្រោះចាញ់ក្ដីកម្ពុជារឿងប្រាសាទព្រះវិហារ appeared first on Kampuchea Thmey Daily.

ឧបនាយករដ្ឋមន្ត្រី ហ៊ុន ម៉ានី ប្រធានស.ស.យ.ក. ថ្លែងមកកាន់អ្នកសារព័ត៌មាន បន្ទាប់ចប់ពិធីសួរសុខទុក្ខកងទ័ពនៅសមរភូមិមុខ ដូច្នេះ៖«គេមានបំណង គេខំញុះញង់ គេខំកែឆ្នៃ គេខំលាបពណ៌យ៉ាងណាក៏ដោយទឹកដីកម្ពុជា នៅតែជាទឹកដីកម្ពុជា ហើយដើម្បីឱ្យមានភាពច្បាស់យើងទៅតុលាការយុត្តិធម៌អន្តរជាតិ នៅទីក្រុងឡាអេ ព្រោះថាគេក៏អះអាងថាជាដីរបស់គេ យើងក៏អះអាងថាជាដីរបស់យើង ហើយយើងច្បាស់ទឹកដីរបស់យើង។ អ៊ីចឹងហើយបានជាយើងដោយទៅតុលាការឡាអេ ដោយមិនចាំបាច់មានការព្រួយបារម្ភ ហើយដែលនិយាយថា មាសសុទ្ធមិនខ្លាចភ្លើង។ សំណួរដែលត្រូវតែចោទសួរមានតែប៉ុណ្ណេះ ហេតុអីគេមិនហ៊ានទៅ ​បើសិនជាគេមិនមានការព្រួយបារម្ភ ហើយគេមានភាពច្បាស់លាស់របស់គេ? »។

នា​ឱកាស​នោះ​ដែរ ឯកឧត្ដម ហ៊ុន ម៉ានី អំពាវនាវ​ដល់​ប្រជាពលរដ្ឋ​ទាំងអស់​ជួយ​លើក​ទឹកចិត្ត​កងទ័ព និង​ជឿជាក់​មក​លើ​រាជរដ្ឋាភិបាល​ក្នុង​ការ​ដោះស្រាយ​វិវាទ​ព្រំដែន​កម្ពុជា-ថៃ។

ឯកឧត្ដម ហ៊ុន ម៉ានី ក៏បាន​សង្កត់​ធ្ងន់​ថា ក្នុង​នាម​ប្រជាពលរដ្ឋ​ខ្មែរ ស្រលាញ់​ទឹកដី​របស់ខ្មែរ គឺ​ត្រូវ​តាមដាន​ស្ថានការណ៍​ព្រំដែន​កម្ពុជា-ថៃ គ្រប់​កាលៈទេសៈ និង​គាំទ្រ​លើ​ចំណាត់​ការ​ទាំង​បី​របស់​រាជរដ្ឋាភិបាល​ក្នុង​ការ​ដោះស្រាយ​បញ្ហា​ព្រំដែន​ជាមួយ​ភាគី​ថៃ ដែល​ក្នុង​រួមមាន ៖ ការទូត ច្បាប់ និង​យោធា។

សូមរម្លឹកជាថ្មីថា បន្ទាប់ពីអង្គសមាជព្រឹទ្ធសភា រដ្ឋសភា បោះឆ្នោត​គាំទ្រជាសំឡេងរួម​ឱ្យបន្តដំណើរការបណ្ដឹងទៅកាន់តុលាការអន្តរជាតិ រដ្ឋាភិបាលកម្ពុជា សម្រេចបញ្ជូនវិវាទព្រំដែនតំបន់មុំបី ប្រាសាទតាមាន់ធំ តាមាន់តូច និងតាក្របី ទៅតុលាការអន្តរជាតិ ICJ នៅទីក្រុងឡាអេ ដើម្បីដោះស្រាយបញ្ហាព្រំដែននេះ ប្រកបទៅដោយយុត្តិធម៌ មិនលម្អៀង និងយូរអង្វែង ដោយមិនដាក់របៀបវារៈវិវាទព្រំដែនទាំង៤ទីតាំងទៅជជែកក្នុងកិច្ចប្រជុំគណៈ​កម្មការ​ព្រំដែន​ចម្រុះ (JBC) ឡើយ ដែលគ្រោងរៀបចំនៅថ្ងៃទី១៤ ខែមិថុនា ខាងមុខឡើយ។

ប៉ុន្តែរដ្ឋាភិបាលថៃវិញ ឆ្លើយតបថាខ្លួនមិនចង់មានការប្ដឹងផ្ដល់ទៅតុលាការយុត្តិធម៌ទេ សុំត្រឹម​ការ​​ចរចា​រក​ដំណោះស្រាយ​ព្រំដែន​ជាមួយ​កម្ពុជា​ជា​លក្ខណៈ​ទ្វេភាគី​ដោយ​ប្រើ​យន្តការ គណៈ​កម្មការ​ព្រំដែន​ចម្រុះ (JBC) និង​គណៈកម្មការ​ព្រំដែន​ទូទៅ (GBC)។

ឆ្លើយតបនឹងជំហររបស់កម្ពុជា ដែលមិនដាក់បញ្ហាទាំង៤ ចូលក្នុងរបៀបវារៈកិច្ចប្រជុំគណៈ​កម្មការ​ព្រំដែន​ចម្រុះ (JBC) ថៃ គម្រាមកាត់ផ្ដាច់ចរន្តអគ្គិសនីតាមព្រំដែនជាមួយកម្ពុជា ប៉ុន្តែអ្នកនាំពាក្យក្រសួងការបរទេសកម្ពុជា លោក ជុំ សុន្ទរី ឆ្លើយតបវិញថា វិធីនេះមិនបានធ្វើឱ្យកម្ពុជាប្រែជំហរ ក្នុងការដោះស្រាយបញ្ហាព្រំដែនជាមួយថៃ និងរបៀបវារៈកិច្ចប្រជុំ JBC ខាងមុខនេះឡើយ៕

ដោយ៖ ង៉ិល ណារ៉ាត់

The post ថៃថាតំបន់មុំបីជាដីថៃ៖ឧបនាយករដ្ឋមន្ត្រី ហ៊ុន ម៉ានី សួរវិញថា បើជាដីខ្លួនឯងហេតុអ្វីមិនទៅតុលាការអន្តរជាតិជាមួយកម្ពុជា? appeared first on Kampuchea Thmey Daily.

គណៈកម្មការរៀបចំឯកសារដើម្បីប្តឹងទៅតុលាការយុត្តិធម៌អន្តរជាតិ មានភារកិច្ចពិនិត្យនិងសម្រេចជ្រើសរើសមេធាវីអន្តរជាតិដើម្បីការពារក្តី ពិនិត្យនិងសម្រេចឯកសារនានាដែលត្រូវដាក់ទៅតុលាការ ធ្វើទំនាក់ទំនងជាមួយតុលាការ និងធ្វើជាតំណាងរបស់កម្ពុជានៅចំពោះមុខតុលាការយុត្តិធម៌អន្តរជាតិ(ICJ)…។ បើតាមលោក ប៉ែន បូណា នេះគឺជាដំណើរការទៅមុខឥតងាករេស្របតាមឆន្ទៈដ៏មោះមុតរបស់រាជរដ្ឋាភិបាលក៏ដូចជាឆន្ទៈរបស់ប្រជាពលរដ្ឋខ្មែរក្នុងការប្តឹងករណីទាំង៤នេះទៅតុលាការយុត្តិធម៌អន្តរជាតិដើម្បីការពារបូរណភាពទឹកដីរបស់កម្ពុជា។

លោក ប៉ែន បូណា បន្តរម្លឹកថា បណ្តឹងនេះបានទទួលការគាំទ្រជាឯកច្ឆន្ទពីរដ្ឋសភានិងព្រឹទ្ធសភា ក៏ដូចជាពីសំណាក់ប្រជាពលរដ្ឋខ្មែរទាំងក្នុងនិងក្រៅប្រទេស និងគ្រប់និន្នាការនយោបាយដែលស្តែងឱ្យឃើញពីឯកភាពជាតិខ្មែរនិងក្លាយជាចលនាមហាសាមគ្គីជាតិដ៏ធំមួយនៅពីក្រោយរាជរដ្ឋាភិបាល និងនៅពីក្រោយកងទ័ពខ្មែរដ៏អង់អាចក្លាហាននិងស្តែងឱ្យឃើញផងដែរពីជំនឿចិត្តយ៉ាងមុតមាំនិងពីភាពកក់ក្តៅយ៉ាងខ្លាំងរបស់ប្រជាពលរដ្ឋខ្មែរចំពោះរាជរដ្ឋាភិបាល។

អ្នកនាំពាក្យរាជរដ្ឋាភិបាលកម្ពុជា អះអាងថា រាជរដ្ឋាភិបាលដែលមានសម្តេចតេជោ ហ៊ុន សែន អតីតនាយករដ្ឋមន្ត្រីនិងសម្តេចធិបតី ហ៊ុន ម៉ាណែត នាយករដ្ឋមន្រ្តីបច្ចុប្បន្ន បានខិតខំប្រឹងប្រែងនិងប្តូរផ្តាច់បំផុតក្នុងការការពារបូរណភាពទឹកដីដោយមិនអនុញ្ញាតឱ្យបាត់បង់សូម្បីតែមួយមីល្លីម៉ែត្រឡើយ។ ការប្តេជ្ញាចិត្តនេះមិនមែនត្រឹមតែពាក្យសម្តី ប៉ុន្តែ គឺជាសកម្មភាពជាក់ស្តែង។ ការចរចាបោះបង្គោលព្រំដែនជាមួយប្រទេសជិតខាង និងការកសាងផ្លូវក្រវាត់ព្រំដែនដែលរាជរដ្ឋាភិបាលបាននិងកំពុងធ្វើគឺជាឧទាហរណ៍ស្រាប់។

លោក ប៉ែន បូណា ប្រាប់ឱ្យពលរដ្ឋជឿជាក់លើរដ្ឋាភិបាលចំពោះការដាក់បណ្ដឹងវិវាទព្រំដែនទាំង៤ទៅតលាការអន្តរជាតិទីក្រុងឡាអេថូច្នេះ÷”ឥឡូវនេះភាពប្តូរផ្តាច់ក្នុងការនាំយកករណីតំបន់មុំបី ប្រាសាទតាមាន់ធំ ប្រាសាទតាមាន់តូច និងប្រាសាទតាក្របីទៅតុលាការយុត្តិធម៌អន្តរជាតិគឺជាភស្តុតាងថ្មីមួយទៀតដែលបញ្ជាក់ពីភាពប្តូរផ្តាច់របស់រាជរដ្ឋាភិបាលនៃគណបក្សប្រជាជនកម្ពុជាចំពោះបូរណភាពទឹកដី។ សូមកុំភ្លេចថា ថ្នាក់ដឹកនាំរបស់យើងទាំងសម្តេចតេជោ ទាំងសម្តេចធិបតី មានបទពិសោធន៍គ្រប់គ្រាន់ និងមានភាពរឹងប៉ឹងណាស់ ហើយដឹងច្បាស់ថា ដំណាក់កាលណាត្រូវធ្វើអ្វី។“។

យ៉ាងណា អ្នកនាំពាក្យរដ្ឋាភិបាលកម្ពុជា អំពាវនាវឱ្យពលរដ្ឋស្ងប់ចិត្ត កុំចាញ់បោកភាគីឈ្លានពានកម្ពុជាឱ្យសោះ។

លោក ប៉ែន បូណា អំពាវទៅកាន់ពលរដ្ឋដូច្នេះ ÷”សូមបងប្អូនយើងស្ងប់ចិត្ត កុំអន្ទះសារ និងរង់ចាំចំណាត់ការជាបន្តបន្ទាប់របស់រាជរដ្ឋាភិបាល ដោយត្រូវប្រកាន់ខ្ជាប់នូវឥរិយាបថនឹងនរ អត់ធ្មត់ ហើយប្រើបញ្ញាជាជាងប្រើអារម្មណ៍ ជាពិសេសកុំនាំគ្នាកញ្ជ្រោលតាមការញុះញង់របស់ក្រុមជ្រុលនិយមជិតខាងដែលចង់បានទឹកដីយើងឱ្យសោះ។ សូមបងប្អូនពិចារណាសារសម្តេចធិបតីនៅថ្ងៃនេះដែលសម្តេចបានលើកយកទស្សនៈរបស់កំពូលអ្នកប្រាជ្ញចិន ឡៅ ជឺ មកសរសេរក្នុងហ្វេសប៊ុកថា «រក្សាភាពស្ងៀមស្ងាត់ ផ្តោតជានិច្ចលើគោលដៅធំ ពេលមានឱកាសកុំរារែកក្នុងការវាយលុក»“៕

ដោយ÷ ង៉ិល ណារ៉ាត់

The post អ្នកនាំពាក្យរដ្ឋាភិបាល៖ បណ្តឹងទៅកាន់តុលាការយុត្តិធម៌អន្តរជាតិ ICJ បោះជំហានទៅមុខឥតប្រែប្រួលក្រោមឯកភាពជាតិខ្មែរដ៏រឹងមាំ appeared first on Kampuchea Thmey Daily.

យោងតាម​និក្ខេបទ​បណ្ឌិតរបស់​លោកបណ្ឌិត​ យង់ ពៅ អំពីវិវាទ កម្ពុជា ថៃ (២០០៦-២០១២) លោបណ្ឌិតបាន​ឱ្យដឹង​ថា​ក្រោយពី​តុលាការយុត្ដិធម៌​អន្តរជាតិបានចេញសាលក្រមថាប្រាសាទព្រះវិហារស្ថិតក្នុងដែន​ដីកម្ពុជា​នៅ​ថ្ងៃទី១៥ ខែមិថុនា ឆ្នាំ១៩៦២ មួយថ្ងៃក្រោយមកសេនាប្រមុខ សារិត ថាណារ៉ាត នាយករដ្ឋមន្ត្រីថៃ​បានធ្វើសន្និសីទ​នៅព្រលានយន្ត​ហោះឈាងម៉ៃដោយច្រានចោលសេចក្ដីសម្រេច​នេះ និង​បញ្ជាក់ថា​ប្រទេសថៃនៅតែមានអធិបតេយ្យលើប្រាសាទព្រះវិហារដដែល និងបញ្ជាឱ្យកង​ទ័ព​ថៃត្រៀមចូលទៅទីតាំងប្រាសាទទៀតផង។

លោកបណ្ឌិតបានប្រាប់​មកកម្ពុជាថ្មី​ផងដែរថា៖ «កន្លែង​នេះចង់​បញ្ជាក់ថា​ប្រទេស​ថៃ​មិន​ទទួល​យក​សាលក្រម សាលដីការរបស់តុលាការយុត្តិធម៌អន្តរជាតិ ICJ នេះទេ គឺ​នៅ​បាន​បង្ហាញនូវភាពគឃ្លើន​ដោយអសីលធម៌ទៅលើច្បាប់អន្តរជាតិតែ​ទោះជាយ៉ាងណា​ក៏​ដោយ​ទាំងប្រទេស​បារាំង សហរដ្ឋអាមេរិក និងប្រទេស​មហាអំណាចមួយចំនួនទៀតមិន​សប្បាយចិត្ត​នឹងឥរិយាបថនយោបាយរបស់ថៃ​នោះទេ»។

លោកបណ្ឌិតបន្ថែមថាពេល​នោះអន្តរជាតិបានព្រមានថៃ​ថា ប្រទេសនេះបានបង្ហាញអាកប្បកិរិយាអសីលធម៌ ហើយបើមិនគោរពសេចក្ដីសម្រេច​របស់តុលាការយុត្តិធម៌អន្តរជាតិនោះទេ សកម្មភាព​នេះវានឹង​បង្កឱ្យមាន​បញ្ហា​ក្នុងកិច្ចការ​អន្តរជាតិ រហូត​ដល់​ក្រុមប្រឹក្សាសន្ដិសុខ​ដែលមាន​ប្រទេស បារាំង អង់គ្លេស អាមេរិក សហភាពសូវៀត ចិន ព្រមានដកថៃចេញពីអង្គការសហប្រជាជាតិថែមទៀត។

លោកបណ្ឌិត យង់ ពៅ៖ «ប្រទេសមហាអំណាច​បានព្រមានដល់ប្រទេស​ថៃថា​នឹង​ត្រូវបញ្ឈប់ពីតួនាទីជាសមាជិកអង្គការសហប្រជាជាតិប្រសិនបើប្រទេស​ថៃមិនព្រមទទួលយក​នូវ​សាលក្រមរបស់តុលាការអន្តរជាតិបើ​មិន​ព្រមលះបង់ចោលនូវប្រាសាទព្រះវិហារ និងទឹកដីមួយចំនួនដែលខ្លួនកាន់កាប់ដោយខុសច្បាប់នោះទេ»។

ការព្រមាននេះហើយ​ទើបធ្វើឱ្យថៃសុខចិត្តប្រគល់ឱ្យខ្មែរ​វិញ​នូវ​ប្រាសាទព្រះវិហារ និង​គោរពនូវ​សេចក្ដីសម្រេច​របស់តុលាការយុត្តិធម៌អន្តរជាតិ នៅថ្ងៃទី២១ ខែ​មិថុនា ឆ្នាំ១៩៦២ ដោយសេនាប្រមុខ សារិត ថាណារ៉ាត់ បាន​ប្រកាស​ថា​ប្រទេស​លោក​លំអោនកាយ​ទទួលយក​សេចក្ដីសម្រេច​របស់តុលាការអន្តរជាតិដើម្បីគោរព​នូវ​កិច្ចសន្យារបស់ខ្លួនទៅនឹង​ធម្មនុញ្ញរបស់អង្គការសហប្រជាជាតិ។ ហើយនៅថ្ងៃទី៦ កក្កដា ឆ្នាំ១៩៦២ រដ្ឋមន្ត្រីការបរទេសថៃបានផ្ញើលិខិតទទួលស្គាល់នូវសាលក្រម​របស់តុលាការអន្តរជាតិទៅកាន់អគ្គលេខាធិការអង្គការសហប្រជាជាតិ។

លោកបណ្ឌិត យង់ ពៅ ទោះជាថៃ​ប្រកាស​ទទួលស្គាល់​សាលក្រមរបស់តុលាការក្ដីពួកគេ​នៅ​តែចិញ្ចឹមចិត្តក្នុងការ​បំពាន​លើ​ដី​ខ្មែរ​ដដែល​ដោយ​សំអាង​លើ​ផែន​ទី​ដែល​គូរ​ដោយ​ខ្លួនឯង។ លោកបណ្ឌិត បាន​ធ្វើ​សេចក្ដីសន្និដ្ឋានក្នុង​និក្ខេបទបណ្ឌិតរបស់លោកថាដើម្បី​ការពារពីការបំពាន​របស់ថៃ​កម្ពុជា​ត្រូវតែ​បង្កើន​នូវសមត្ថភាពយោធាឱ្យ​ខ្លាំងដើម្បីឆ្លើយតបភ្លាមៗទៅនឹងការបំពាន រួមជាមួយការប្រើប្រាស់ច្បាប់ និង​តុលាការអន្តរជាតិ ដើម្បី​ឱ្យ​អន្តរជាតិ​បាន​ឃើញ​នូវភាព​ព្រហើន​របស់​ថៃ និង​ចរិតវាតទីនិយម​របស់​ប្រទេស​នេះ។

លោកថា​ទោះ​បី​ជា​ថៃ​មិន​ព្រម​ទៅតតាំង​ក្ដី​ ICJ តែសាលក្រម​របស់តុលាការនេះពិតជាមានអំណាចដល់ប្រទេស​ដែលជាសមាជិកអង្គការសហប្រជាជាតិ​ទាំង​អស់ដែលថៃ​ត្រូវ​តែគោរព៕

អត្ដបទដោយ ហ៊ុន សិរីវឌ្ឍន៍

The post ក្រុមប្រឹក្សាសន្ដិសុខធ្លាប់ព្រមានដក​ថៃចេញពីអង្គការសហប្រជាជាតិក្រោយ​ពីមិនទទួលស្គាល់សេចក្ដីសម្រេចរបស់ ICJ appeared first on Kampuchea Thmey Daily.