ថៃថាតំបន់មុំបីជាដីថៃ៖ឧបនាយករដ្ឋមន្ត្រី ហ៊ុន ម៉ានី សួរវិញថា បើជាដីខ្លួនឯងហេតុអ្វីមិនទៅតុលាការអន្តរជាតិជាមួយកម្ពុជា?

ថៃ ចាត់ទុកថាតំបន់មុំបី ប្រាសាទតាមាន់តូច តាមាន់ធំ​ តាក្របី ដែលស្ថិតក្នុងផែនទីរបស់កម្ពុជា និងប្រាសាទដែលសាង សង់ដោយបុព្វបុរសខ្មែរ ថាជាទឹកដីរបស់ខ្លួន។ បញ្ហាទាំង៤នេះ គឺកម្ពុជា ខំដោះស្រាយជាមួយថៃ ប្រមាណ ២៥ឆ្នាំទៅហើយ តែមិនដាច់ស្រាច់ រហូតកើតមានសង្គ្រាមប្រដាប់អាវុធ និងពាក្យសម្ដី កើតឡើងកាលពីចុងខែឧសភា។ បន្ទាប់ពីកងទ័ពថៃ ឈ្លានពានបាញ់សម្លាប់ទ័ពរបស់ខ្លួន និងដោះស្រាយមិនចប់ងាយ រដ្ឋាភិបាលកម្ពុជា សម្រេចយកវិវាទទាំង៤នេះ ប្ដឹងទៅកាន់តុលាការយុត្តិធម៌អន្តរជាតិនៅទីក្រុងឡាអេ ប៉ុន្តែថៃវិញហាក់ខ្លាចតុលាការយុត្តិធម៌មួយនេះ បែជាទាមទារឱ្យបន្តចរចាទ្វេភាគី។  នៅថ្ងៃពុធ នេះ ឧបនាយករដ្ឋមន្ត្រី ហ៊ុន ម៉ានី ចោទសួរទៅកាន់ភាគីថៃថា បើច្បាស់ថាជាដីរបស់ខ្លួន ហេតុអ្វីមកយកបញ្ហានេះ ទៅកាន់តុលាការយុត្តិធម៌អន្តរជាតិជាមួយកម្ពុជា។  

ឧបនាយករដ្ឋមន្ត្រី ហ៊ុន ម៉ានី ប្រធានស.ស.យ.ក. ថ្លែងមកកាន់អ្នកសារព័ត៌មាន បន្ទាប់ចប់ពិធីសួរសុខទុក្ខកងទ័ពនៅសមរភូមិមុខ ដូច្នេះ៖«គេមានបំណង គេខំញុះញង់ គេខំកែឆ្នៃ គេខំលាបពណ៌យ៉ាងណាក៏ដោយទឹកដីកម្ពុជា នៅតែជាទឹកដីកម្ពុជា ហើយដើម្បីឱ្យមានភាពច្បាស់យើងទៅតុលាការយុត្តិធម៌អន្តរជាតិ នៅទីក្រុងឡាអេ ព្រោះថាគេក៏អះអាងថាជាដីរបស់គេ យើងក៏អះអាងថាជាដីរបស់យើង ហើយយើងច្បាស់ទឹកដីរបស់យើង។ អ៊ីចឹងហើយបានជាយើងដោយទៅតុលាការឡាអេ ដោយមិនចាំបាច់មានការព្រួយបារម្ភ ហើយដែលនិយាយថា មាសសុទ្ធមិនខ្លាចភ្លើង។ សំណួរដែលត្រូវតែចោទសួរមានតែប៉ុណ្ណេះ ហេតុអីគេមិនហ៊ានទៅ ​បើសិនជាគេមិនមានការព្រួយបារម្ភ ហើយគេមានភាពច្បាស់លាស់របស់គេ? »។

នា​ឱកាស​នោះ​ដែរ ឯកឧត្ដម ហ៊ុន ម៉ានី អំពាវនាវ​ដល់​ប្រជាពលរដ្ឋ​ទាំងអស់​ជួយ​លើក​ទឹកចិត្ត​កងទ័ព និង​ជឿជាក់​មក​លើ​រាជរដ្ឋាភិបាល​ក្នុង​ការ​ដោះស្រាយ​វិវាទ​ព្រំដែន​កម្ពុជា-ថៃ។

ឯកឧត្ដម ហ៊ុន ម៉ានី ក៏បាន​សង្កត់​ធ្ងន់​ថា ក្នុង​នាម​ប្រជាពលរដ្ឋ​ខ្មែរ ស្រលាញ់​ទឹកដី​របស់ខ្មែរ គឺ​ត្រូវ​តាមដាន​ស្ថានការណ៍​ព្រំដែន​កម្ពុជា-ថៃ គ្រប់​កាលៈទេសៈ និង​គាំទ្រ​លើ​ចំណាត់​ការ​ទាំង​បី​របស់​រាជរដ្ឋាភិបាល​ក្នុង​ការ​ដោះស្រាយ​បញ្ហា​ព្រំដែន​ជាមួយ​ភាគី​ថៃ ដែល​ក្នុង​រួមមាន ៖ ការទូត ច្បាប់ និង​យោធា។

សូមរម្លឹកជាថ្មីថា បន្ទាប់ពីអង្គសមាជព្រឹទ្ធសភា រដ្ឋសភា បោះឆ្នោត​គាំទ្រជាសំឡេងរួម​ឱ្យបន្តដំណើរការបណ្ដឹងទៅកាន់តុលាការអន្តរជាតិ រដ្ឋាភិបាលកម្ពុជា សម្រេចបញ្ជូនវិវាទព្រំដែនតំបន់មុំបី ប្រាសាទតាមាន់ធំ តាមាន់តូច និងតាក្របី ទៅតុលាការអន្តរជាតិ ICJ នៅទីក្រុងឡាអេ ដើម្បីដោះស្រាយបញ្ហាព្រំដែននេះ ប្រកបទៅដោយយុត្តិធម៌ មិនលម្អៀង និងយូរអង្វែង ដោយមិនដាក់របៀបវារៈវិវាទព្រំដែនទាំង៤ទីតាំងទៅជជែកក្នុងកិច្ចប្រជុំគណៈ​កម្មការ​ព្រំដែន​ចម្រុះ (JBC) ឡើយ ដែលគ្រោងរៀបចំនៅថ្ងៃទី១៤ ខែមិថុនា ខាងមុខឡើយ។

ប៉ុន្តែរដ្ឋាភិបាលថៃវិញ ឆ្លើយតបថាខ្លួនមិនចង់មានការប្ដឹងផ្ដល់ទៅតុលាការយុត្តិធម៌ទេ សុំត្រឹម​ការ​​ចរចា​រក​ដំណោះស្រាយ​ព្រំដែន​ជាមួយ​កម្ពុជា​ជា​លក្ខណៈ​ទ្វេភាគី​ដោយ​ប្រើ​យន្តការ គណៈ​កម្មការ​ព្រំដែន​ចម្រុះ (JBC) និង​គណៈកម្មការ​ព្រំដែន​ទូទៅ (GBC)។

ឆ្លើយតបនឹងជំហររបស់កម្ពុជា ដែលមិនដាក់បញ្ហាទាំង៤ ចូលក្នុងរបៀបវារៈកិច្ចប្រជុំគណៈ​កម្មការ​ព្រំដែន​ចម្រុះ (JBC) ថៃ គម្រាមកាត់ផ្ដាច់ចរន្តអគ្គិសនីតាមព្រំដែនជាមួយកម្ពុជា ប៉ុន្តែអ្នកនាំពាក្យក្រសួងការបរទេសកម្ពុជា លោក ជុំ សុន្ទរី ឆ្លើយតបវិញថា វិធីនេះមិនបានធ្វើឱ្យកម្ពុជាប្រែជំហរ ក្នុងការដោះស្រាយបញ្ហាព្រំដែនជាមួយថៃ និងរបៀបវារៈកិច្ចប្រជុំ JBC ខាងមុខនេះឡើយ៕

ដោយ៖ ង៉ិល ណារ៉ាត់