តំណាងរាស្ត្រ Archives - Kampuchea Thmey Daily

តំណាងរាស្ត្រខេត្តបន្ទាយមានជ័យព្រួយបារម្ភពីសុវត្ថិភាពពលករខ្មែរដែលកំពុងនៅប្រទេសថៃ

hun sirivadh — Sat, 22 Nov 2025 04:20:49 +0000

តំណាងរាស្ត្រខេត្តបន្ទាយមានជ័យទាំង៦រូបបានបង្ហាញក្ដីព្រួយបារម្ភចំពោះសុវត្ថិភាពរបសពលករចំណាកស្រុកកម្ពុជាដែលកំពុងបម្រើការងារនៅប្រទេសថៃបន្ទាប់ពីកើតមានករណីទាហានថៃបានបំពានផ្លូវភេទលើពលការិនីខ្មែរ និងប្រើប្រាស់អំពើហិង្សាលើពលរដ្ឋកម្ពុជា។ តំណាងរាស្ត្របានលើកឡើងថា សកម្មភាពរបស់ថៃនៅពេលនេះគឺជាការរើសអើង គំរាមកំហែង មកលើជនស៊ីវិល។

ក្នុងញាត្តិថ្កោលទោសថ្ងៃទី១៩ ខែវិច្ឆិកា អ្នកតំណាងរាស្ត្រទាំង៦រូបដែលមានលោក កែ គឹមយ៉ាន លោក គោស៊ុំ សារឿត លោក អី ឡុង លោកស្រី នួម សុភ័ណ លោក សេរី កុសល និងលោក ខេង ស៊ុម បានចាត់ទុកទង្វើហិង្សារបស់ទាហានថៃលើពលការិនី និងពលករចំណាកស្រុកខ្មែរគឺជា សកម្មភាពព្រៃផ្សៃ និងអមនុស្សធម៌។

ក្នុងញាត្តិនោះលើកឡើងថា៖ «សកម្មភាពព្រៃផ្សៃ និងអមនុស្សធម៌នេះគឺជាការរំលោភបំពានធ្ងន់ធ្ងរលើសិទ្ធិមនុស្ស សិទ្ធិស្រ្តី ច្បាប់មនុស្សធម៌អន្តរជាតិ អនុសញ្ញាស្ដីពីការលុបបំបាត់រាល់ទម្រង់នៃការរើសអើងប្រឆាំងនឹងស្ត្រី ធម្មនុញ្ញ និងលិខិតតុបករណ៍អាស៊ាន និងច្បាប់អន្តរជាតិនានា»។

រដ្ឋមន្ត្រីសង្គមកិច្ចសុះសួរសុខទុក្ខស្រ្តីជនរងគ្រោះនៅមន្ទីរពេទ្យកាល់ម៉ែត្រថ្ងៃទី២០ ខែវិច្ឆិកា

តំណាងរាស្ត្រទាំង៦រូបបានអំពាវនាវដល់សហគមន៍អន្តរជាតិរួមទាំងអង្គការសហប្រជាជាតិផងដែរនោះឱ្យចាត់វិធានការច្បាស់លាស់និងបន្ទាប់ដើម្បីផ្ដល់យុត្តិធម៌ដល់នារីរងគ្រោះ និងបញ្ឈប់អំពើហិង្សាកុំឱ្យកើតឡើងជាថ្មីទៀត។

ដោយឡែកក្នុងញាត្តិថ្កោលទោសមួយផ្សេងទៀត អ្នកតំណាងរាស្ត្រមណ្ឌលខេត្តបន្ទាយមានជ័យ បានថ្កោលទោសការបាញ់ប្រហារពីកងទ័ពថៃលើពលរដ្ឋកម្ពុជានៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យផងដែរដោយបានថ្កោលទោស និងទាមទារឱ្យថៃទទួលខុសត្រូវចំពោះសកម្មភាពរំលោភបំពានដោយកំរោលនេះ។

ក្នុងញាត្តិនោះសរសេរថា៖ «សូមអំពាវនាវឱ្យភាគីថៃបញ្ឈប់ជាបន្ទាន់រាល់អរិភាព ដែលគំរាមកំហែងដល់សន្ដិភាព និងស្ថិរភាពតំបន់ និងងាកមកគោរពសេចក្ដីថ្លែងការណ៍រួមស្ដីពីកិច្ចព្រមព្រៀងសន្ដិភាព និងកាតាព្វកិច្ចក្រោមច្បាប់អន្តរជាតិឱ្យបានម៉ឺងម៉ាត់ ស្មោះត្រង់និងដោយឆន្ទៈពិតប្រាកដ»។

គួរជាការកត់សម្គាល់បន្ទាប់ពីថៃបានចុះហត្ថលេខាលើកិច្ចព្រមព្រៀងឈប់បាញ់កាលពីចុងខែកក្កដា មកសកម្មភាពយោធាថៃបានបង្វែរមកបំពានបំពានលើជនស៊ីវិលកម្ពុជាវិញដោយមានការចូលមករាយបន្លាលួស ដេញពលរដ្ឋខ្មែរចេញពីផ្ទះសំបែង បំផ្លាញផ្ទះសំបែងរបស់ពលរដ្ឋខ្មែរ និងឈានដល់ប្រើប្រាស់អំពើហិង្សា រួមទាំងការបាញ់សម្លាប់នៅថ្ងៃទី១២ ខែវិច្ឆិកា ខណៈទាហានថៃបានប្រើប្រាស់ហិង្សាលើពលករខ្មែរដែលវិលត្រលប់មកខ្មែរវិញ ដោយប្លន់យកទ្រព្យសម្បត្តិ និងចាប់រំលោភលើស្ត្រីជាពលករថែមទៀត។

គណៈកម្មាធិការសិទ្ធិមនុស្សកម្ពុជាទាមទារឱ្យថៃទទួលខុសត្រូវចំពោះសកម្មភាពបំពានលើជនស៊ីវិលទាំងនេះ និងឱ្យយកជនល្មើសមកដាក់ទោសឱ្យបាន ដោយបានលើកឡើងថា ប្រសិនជាថៃមិនផ្ដល់យុត្តិធម៌ជូនជនរងគ្រោះនោះទេ គឺបង្ហាញថាថៃជាប្រទេសដែលគ្មានច្បាប់ទម្លាប់ និងជាប្រទេសការពារឧក្រិដ្ឋជន៕

អត្ថបទដោយ ហ៊ុន សិរីវឌ្ឍន៍

The post តំណាងរាស្ត្រខេត្តបន្ទាយមានជ័យព្រួយបារម្ភពីសុវត្ថិភាពពលករខ្មែរដែលកំពុងនៅប្រទេសថៃ appeared first on Kampuchea Thmey Daily.

តំណាងរាស្ត្រខេត្តរតនគិរី ឱ្យពលរដ្ឋនៅក្បែរទន្លេស្រែពកប្រុងប្រយ័ត្ន និងត្រៀមខ្លួនទៅរកទីទួលសុវត្ថិភាព បើភ្លៀងបន្តធ្លាក់ខ្លាំង

Ngoeul Narath — Mon, 22 Jul 2024 14:47:32 +0000

នាព្រឹកថ្ងៃទី២២ ខែកក្កដា ឆ្នាំ២០២៤ តំណាងរាស្ត្រខេត្តរតនគិរី លោក គិត ទ្រី អំពាវនាវឲ្យប្រជាពលរដ្ឋរស់នៅតាមដងទន្លេស្រែពកមានការប្រុងប្រយ័ត្នខ្ពស់ នូវឧបហេតុផ្សេងៗដែលអាចកើតដោយសារទឹកជំនន់ និងបញ្ចៀសសត្វពាហនៈ ទៅរកទីទួលសុវត្ថិភាពផងដែរ ប្រសិនបើភ្លៀងនៅតែបន្តធ្លាក់។

លោក គិត ទ្រី សមាជិកគណៈកម្មការទី១ នៃរដ្ឋសភា និងជាតំណាងរាស្ត្រមណ្ឌលខេត្តរតនគិរីអំពាវនាវបែបនេះ ក្នុងឱកាសដែលលោក រួមជាមួយលោក នូ ថេរ អភិបាលស្រុកលំផាត់ បានចុះពិនិត្យស្ថានភាពជំនន់ទឹកភ្លៀង នៅភូមិកាទឹង ឃុំល្បាំង១ ភូមិព្រួក ឃុំបាតាង ភូមិប៉ាតត់ ភូមិថ្មី និងភូមិកែងសាន់ ឃុំសេដា ស្រុកលំផាត់ ខេត្តរតនគិរី។

សូមបញ្ជាក់ថា ជំនន់ទឹកភ្លៀងនេះមានរយៈពេលខ្លី ពុំមានប៉ះពាល់ដល់អាយុជីវិតមនុស្ស ឬសត្វពាហនៈនៅឡើយនោះទេ ហើយក៏មិនទាន់ដល់ពេលប្រកាសអាសន្ននៅឡើយដែរ៕

អត្ថបទ÷ វុទ្ធឦសាន

The post តំណាងរាស្ត្រខេត្តរតនគិរី ឱ្យពលរដ្ឋនៅក្បែរទន្លេស្រែពកប្រុងប្រយ័ត្ន និងត្រៀមខ្លួនទៅរកទីទួលសុវត្ថិភាព បើភ្លៀងបន្តធ្លាក់ខ្លាំង appeared first on Kampuchea Thmey Daily.

រដ្ឋបាលខេត្ត និងតំណាងរាស្ត្រមណ្ឌលស្វាយរៀង ចុះដឹកនាំដាក់លូរំដោះទឹក កាយប្រឡាយ ជូនគ្រួសារយោធិនពិការ

Ken Malis — Sat, 07 Oct 2023 02:47:58 +0000

លោក ម៉ែន អេង អភិបាលរងខេត្ដ និងលោកស្រី ដួង វណ្ណា អ្នកតំណាងរាស្ត្រខេត្តស្វាយរៀង បានចុះដឹកនាំដាក់លូរំដោះទឹក កាយប្រឡាយ ជូនគ្រួសារយោធិនពិការនៅផ្ទះ ៤០០ខ្នង ក្នុងភូមិជីកដី ឃុំអណ្តូងត្របែក ស្រុករមាសហែក។

លោកស្រី ដួង វណ្ណា បានឱ្យដឹងថា បញ្ហាលិចលង់ភូមិឋានប្រជាពលរដ្ឋនៅតំបន់នេះ ជាកង្វល់របស់អាជ្ញាធរ ដូច្នេះជំនាញពាក់ព័ន្ធទាំងអស់ ត្រូវតែរួមគ្នារិះរកឱ្យអស់គ្រប់មធ្យោបាយធ្វើយ៉ាងណា នាំទឹកឱ្យអស់ចេញពីតំបន់ទំនាប នោះការលិចលង់នឹងអាចដោះស្រាយបាន។ លោកស្រីថា ត្រូវដាក់លូបន្ថែម ស្តារ កាយប្រឡាយទឹកហូរ ឱ្យបានលឿន និងមួយផ្នែកទៀតត្រូវស្តារ និងកាយប្រឡាយទឹកនេះ ឱ្យហូរទៅប្រឡាយខាងក្រោម ដើម្បីឱ្យទឹកហូរលឿន។ ចំណែក ក្រុមការងារជាងត្រូវដាក់លូឱ្យបានឆាប់រហ័ស និងមានគុណភាព ទើបអាចរំដោះទឹកបានទាន់ពេលវេលា មិនធ្វើឱ្យខូចខាតផលដំណាំរបស់ពួកគាត់។

ការដាក់លូរំដោះទឹក កាយប្រឡាយ ជូនគ្រួសារយោធិនពិការនាពេលនេះ ក្រោមការជួយឧបត្ថម្ភគាំទ្រថវិកាពីលោក វង សូត អនុប្រធានទី២រដ្ឋសភា នាយឧត្តមសេនីយ៍ សៅ សុខា មេបញ្ជារកងរាជអាវុធហត្ថលើផ្ទៃប្រទេស និងជាប្រធានក្រុមការងាររាជរដ្ឋាភិបាលចុះជួយស្រុករមាសហែក លោក ហុង វិណុល មេបញ្ជាររងកងរាជអាវុធហត្ថលើផ្ទៃប្រទេស និងជាអនុប្រធានក្រុមការងាររាជរដ្ឋាភិបាលចុះជួយស្រុករមាសហែក។

ជារៀងរាល់ឆ្នាំនារដូវភ្លៀងធ្លាក់ កង្វល់របស់ប្រជាពលរដ្ឋទូទៅក៏ចាប់ផ្តើមកើតមាន ព្រោះតែពេលខ្លះ ពួកគាត់ត្រូវខកខាន ឬយឺតយ៉ាវការងារ ដោយសារឧបសគ្គភ្លៀងធ្លាក់ ហើយរឹតតែពិបាកទៀតនោះ គឺក្រោយពេលរាំង ក្នុងតំបន់មួយចំនួន ត្រូវស្ទះប្រឡាយ ធ្វើឲ្យទឹកលិចផ្លូវផលដំណាំ រឹតតែបង្កឧបសគ្គថែមមួយកម្រិតទៀត៕

ដោយ៖ ភក្ដី

The post រដ្ឋបាលខេត្ត និងតំណាងរាស្ត្រមណ្ឌលស្វាយរៀង ចុះដឹកនាំដាក់លូរំដោះទឹក កាយប្រឡាយ ជូនគ្រួសារយោធិនពិការ appeared first on Kampuchea Thmey Daily.

តើឥស្សរជនណាខ្លះ ដែលជាប់ឆ្នោតជាសមាជិករដ្ឋសភា ៧អាណត្តិជាប់ៗគ្នា?

Thoeun Vansong — Wed, 16 Aug 2023 06:59:52 +0000

នៅតែប៉ុន្មានថ្ងៃទៀតប៉ុណ្ណោះ ពោល គឺនៅថ្ងៃទី២១ ខែសីហា ឆ្នាំ២០២៣ សមាជិករដ្ឋសភា នីតិកាលទី៧ នឹងត្រូវប្រកាសសុពលភាពចូលកាន់តំណែងជាផ្លូវការ។ ក្នុងនោះ គេសង្កេតឃើញថា ឥស្សរជនចំនួន៩រូប របស់គណបក្សប្រជាជនកម្ពុជា បានបន្តជាប់ឆ្នោតជាសមាជិករដ្ឋសភា ៧អាណត្តិជាប់ៗគ្នា ចាប់តាំងពីនីតិកាលទី១ នៃរដ្ឋសភា។

ឥស្សរជនទាំង៩រូប របស់គណបក្សប្រជាជនកម្ពុជា ដែលបានជាប់ឆ្នោតជាសមាជិករដ្ឋសភា ៧អាណត្តិជាប់ៗគ្នា រួមមាន៖

១/ សម្ដេចតេជោ ហ៊ុន សែន

សម្ដេចតេជោ ហ៊ុន សែន ជាស្ថាបនិកដ៏សំខាន់នៃកិច្ចព្រមព្រៀងសន្តិភាពទីក្រុងប៉ារីស ដែលបាននាំឱ្យកម្ពុជាមានសុខសន្តិភាព ការបង្រួបបង្រួមជាតិ រហូតឈានដល់ការរៀបចំបោះឆ្នោតជាសកល លើកដំបូងនៅកម្ពុជា ក្នុងឆ្នាំ១៩៩៣។ តាមរយៈការបោះឆ្នោត ឆ្នាំ១៩៩៣ ដែលជានីតិកាលទី១ នៃរដ្ឋសភា សម្ដេចតេជោ ហ៊ុន បានជាប់ឆ្នោតជាសមាជិករដ្ឋសភា មណ្ឌលខេត្តកំពង់ចាម និងជាសហនាយករដ្ឋមន្ត្រី នៃរាជរដ្ឋាភិបាលចម្រុះលើកដំបូងរបស់កម្ពុជា។

ចាប់ពីនីតិកាលទី២ សម្ដេចតេជោ ហ៊ុន សែន ក្នុងនាមជាបេក្ខភាពនាយករដ្ឋមន្ត្រីរបស់គណបក្សប្រជាជនកម្ពុជា បានប្ដូរមកឈរឈ្មោះនៅមណ្ឌលខេត្តកណ្ដាល ហើយក៏បានបន្តជាប់ឆ្នោតជាសមាជិករដ្ឋសភា រហូតដល់នីតិកាលទី៧ ឆ្នាំ ២០២៣នេះ បើទោះបីជាអាណត្តិនេះ សម្ដេចមិនបន្តធ្វើជានាយករដ្ឋមន្ត្រីក៏ដោយ។

២/ សម្ដេចពញាចក្រី ហេង សំរិន

សម្ដេចពញាចក្រី ហេង សំរិន ជាតំណាងរាស្ត្រក្នុងរដ្ឋសភាមានវ័យច្រើនជាងគេ សម្រាប់នីតិកាលទី៧នេះ ខណៈដែលការបន្តជាប់ឆ្នោតពេលនេះ បាននាំឱ្យសម្ដេច ហេង សំរិន ក្លាយជាតំណាងរាស្ត្រ ៧អាណត្តិជាប់ៗគ្នា។ ៧អាណត្តិមក នេះ សម្ដេច ហេង សំរិន ធ្លាប់បានជាប់ជាតំណាងរាស្ត្រនៅខេត្តចំនួន៣ គឺតំណាងរាស្ត្រខេត្តកណ្ដាល ក្នុងនីតិកាលទី១ ហើយក្រោយមក ក្នុងនីតិកាលទី២ សម្ដេចជាតំណាងរាស្ត្រខេត្តកំពង់ចាម រហូដល់នីតិកាលទី៦ និងទី៧នេះ ជាប់ឆ្នោតជាសំណាងរាស្រ្តខេត្តត្បូងឃ្មុំ។

៣/ សម្ដេចក្រឡាហោម ស ខេង

ជាអ្នកនយោបាយជាន់ខ្ពស់នៃគណបក្សប្រជាជនកម្ពុជា សម្ដេចក្រឡាហោម ស ខេង បានជាប់ជាសមាជិករដ្ឋសភា និងជាអ្នកតំណាងរាស្ត្រ មណ្ឌលខេត្តបាត់ដំបង ចាប់តាំងពីនីតិកាលទី១ ឆ្នាំ១៩៩៣។ បន្ថែមពីសមាជិករដ្ឋសភា ៧អាណត្តិជាប់ៗគ្នានេះ សម្ដេច ស ខេង ក៏ធ្លាប់ធ្វើជាសហរដ្ឋមន្ត្រីក្រសួងមហាផ្ទៃ នៃរដ្ឋាភិបាលចម្រុះជាមួយគណបក្សហ្វ៊ុនស៊ិនប៉ិច និងក្រោយមកជាឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ។

៤/ សម្ដេចពិជ័យសេនា ទៀ បាញ់

ការបោះឆ្នោតជាតិ នីតិកាលទី១ ឆ្នាំ១៩៩៣ សម្ដេចពិជ័យសេនា ទៀ បាញ់ បានជាប់ឆ្នោតជាសមាជិករដ្ឋសភា និងជាតំណាងរាស្ត្រ មណ្ឌលខេត្តសៀមរាប រហូតដល់នីតិកាលទី៧ ឆ្នាំ២០២៣នេះ សម្ដេច ទៀ បាញ់ ក៏នៅតែបន្តជាប់ជាសមាជិកសភា មណ្ឌលខេត្តសៀមរាបដដែល។

៥/ សម្ដេចកិត្តិសង្គហបណ្ឌិត ម៉ែន សំអន

សម្ដេចកិត្តិសង្គហបណ្ឌិត ម៉ែន សំអន គឺជាតំណាងរាស្ត្ររបស់គណបក្សប្រជាជនកម្ពុជា ៧អាណត្តិជាប់ៗគ្នា មណ្ឌលខេត្តស្វាយរៀង។ បន្ថែមពីលើតួនាទីជាតំណាងរាស្ត្រ សម្ដេច ម៉ែន សំអន ក៏ជាឥស្សរជនស្ត្រី ដែលធ្លាប់កាន់តំណែងជាច្រើន ជាអាទិ៍ ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការ អនុប្រធានក្រុមប្រឹក្សាជាតិប្រឆាំងអំពើពុករលួយ និងជានាយទាហានជាន់ខ្ពស់ថ្នាក់ឧត្តមសេនីយ៍។

៦/ សម្ដេច គង់ សំអុល

សម្ដេច គង់ សំអុល ជាសមាជិកអចិន្ត្រៃយ៍គណបក្សប្រជាជនកម្ពុជា ហើយបានជាប់ឆ្នោតជាតំណាងរាស្ត្រខេត្តកំពង់ឆ្នាំង តាំងពីឆ្នាំ១៩៩៣។ មុនក្លាយជាតំណាងរាស្រ្ត សម្ដេច គង់ សំអុល ធ្លាប់ធ្វើជារដ្ឋមន្ត្រីក្រសួងកសិកម្ម ក្នុងចន្លោះឆ្នាំ១៩៨៦ ដល់ឆ្នាំ១៩៨៩ ខណៈនៅក្នុងឆ្នាំ១៩៩៨ សម្ដេច គង់ សំអុល បានបន្តជាប់ឆ្នោតជាតំណាងរាស្រ្ត និងត្រូវតែងតាំងជារដ្ឋមន្ត្រីក្រសួងព្រះបរមរាជវាំង រហូដល់បច្ចុប្បន្ន។

៧/ លោក ជាម យៀប

លោក ជាម យៀប បានធ្វើជាអ្នកតំណាងរាស្ត្រមណ្ឌលខេត្តព្រៃវែង និងជាអតីតប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម នៃរដ្ឋសភា ចាប់តាំងពីនីតិកាលទី១ មកម្ល៉េះ។ អ្នកនយោបាយចាស់វស្សារូបនេះ នឹងត្រូវបន្តកាន់តំណែងជាអនុប្រធានទី១ នៃរដ្ឋសភាដដែល ក្នុងនីតិកាលទី៧នេះ បន្ទាប់ពីលោកបានកាន់តំណែងនេះ កាលពីអំឡុង ខែវិច្ឆិកា ឆ្នាំ២០២១។

៨/ លោកស្រី និន សាផុន

លោកស្រី និន សាផុន ជាអ្នកនយោបាយស្រ្តីជួរមុខរបស់គណបក្សប្រជាជនកម្ពុជា ដែលបានជាប់ជាអ្នកតំណាងរាស្ត្រមណ្ឌលខេត្តតាកែវ អស់រយៈពេល ៣០ឆ្នាំមកហើយ។ នៅក្នុងការងារសភា លោកស្រី និន សាផុន មានតួនាទីជាប្រធានគណៈកម្មការសាធារណការ ដឹកជញ្ជូន ទូរគមនាគមន៍ ប្រៃសណីយ៍ ឧស្សាហកម្ម រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់ នៃរដ្ឋសភា។

៩/ លោក ហ៊ូ ស្រ៊ី

លោក ហ៊ូ ស៊្រី ជាតំណាងរាស្ត្រជាប់ឆ្នោត ៧អាណត្តិជាប់ៗគ្នា នៅមណ្ឌលរាជធានីភ្នំពេញ។ ក្នុងនីតិកាលទី៦ កន្លងទៅនេះ លោក ហ៊ូ ស្រ៊ី មានតួនាទីជាអនុប្រធានគណៈកម្មការផែនការ វិនិយោគ កសិកម្ម អភិវឌ្ឍន៍ជនបទ បរិស្ថាន និងធនធានទឹក នៃរដ្ឋសភា។ អ្នកតំណាងរាស្ត្ររូបនេះ គឺជាអតីតប្រធានក្រុមប្រឹក្សាអប់រំ (នាយក) នៃវិទ្យាល័យភ្នំដូនពេញ ដែលបច្ចុប្បន្នជាវិទ្យាល័យព្រះស៊ីសុវត្ថិ៕

ដោយ៖ ធឿន វ៉ាន់សុង

The post តើឥស្សរជនណាខ្លះ ដែលជាប់ឆ្នោតជាសមាជិករដ្ឋសភា ៧អាណត្តិជាប់ៗគ្នា? appeared first on Kampuchea Thmey Daily.

លោកស្រី ចម និម្មល ជាតំណាងរាស្ត្រស្ត្រីជាប់ឆ្នោតក្មេងជាងគេសម្រាប់អាណត្តិទី៧នេះ

អុន ស្រីមាន — Mon, 14 Aug 2023 08:21:18 +0000

លោកស្រី ចម និម្មល គឺជាតំណាងរាស្ត្រស្រ្តីដែលមានវ័យក្មេងជាងគេបំផុតក្នុងចំណោមឥស្សរជនស្ត្រីផ្សេងទៀតដែលបានជាប់ជាតំណាងរាស្ត្រសម្រាប់អាណត្តិទី៧នេះ។ លោកស្រី ចម និម្មល ដែលជាអនាគតរដ្ឋមន្រ្តីថ្មីនៅក្នុងរាជរដ្ឋាភិបាលដឹកនាំដោយឯកឧត្តមបណ្ឌិត ហ៊ុន ម៉ាណែត នៅក្នុងអាណត្តិនេះ មានវ័យត្រឹមតែ ៤៣ឆ្នាំប៉ុណ្ណោះ។

លោកស្រី ចម និម្មល កើតនៅថ្ងៃទី១៨ ខែឧសភា ឆ្នាំ១៩៨០ ជារដ្ឋលេខាធិការក្រសួងពាណិជ្ជកម្ម និងជាកូនស្រីបង្កើត របស់លោក ចម ប្រសិទ្ធិ ទេសរដ្ឋមន្ត្រី រដ្ឋមន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានិវត្តន៍។ លោកស្រី បានចូលបម្រើការនៅក្រសួងពាណិជ្ជកម្ម ជាង២០ឆ្នាំមកហើយ។ ជាមួយនឹងការដឹកនាំយ៉ាងល្អ ក្នុងនាមជាស្ត្រីមានតួនាទីក្នុងរដ្ឋាភិបាលមួយរូប វត្តមានរបស់លោកស្រី ក៏ជាផ្នែកមួយធ្វើឱ្យកម្ពុជាមានការអភិវឌ្ឍខ្លាំង។ ជាពិសេស តាមរយៈនេះ លោកស្រី បានលើកស្ទួយដល់ស្ត្រីក្នុងភាពជាអ្នកដឹកនាំ និងបង្ហាញឱ្យឃើញពីថាមពលរបស់ស្ត្រីក្នុងការចូលរួមចំណែកដឹកនាំប្រទេសផងដែរ។

កាលពីថ្ងៃទី០៥ ខែសីហា ឆ្នាំ២០២៣កន្លងទៅ គណៈកម្មាធិការជាតិរៀបចំការបោះឆ្នោត (គ.ជ.ប) បានប្រកាសពីបេក្ខជនជាប់ឆ្នោតជាតំណាងរាស្ត្រសម្រាប់អាណត្តិទី៧ សរុបទាំងអស់មាន ១២៥ រូប។ ក្នុងចំណោមបេក្ខជនទាំង ១២៥រូបនោះ មានតំណាងរាស្ត្រជាស្រ្តីចំនួន ១៦រូប បានជាប់ដែលសុទ្ធតែជាឥស្សរជនឆ្នើម និងមានសមត្ថភាពក្នុងការដឹកនាំប្រទេសជាតិ។ លោកស្រី ចម និម្មល គឺជាស្រ្តីម្នាក់ដែលជាប់ជាតំណាងរាស្ត្រនៅខេត្តកំពត និងមានវ័យក្មេងជាងគេ។

សូមជម្រាបជូនថា លោកស្រី ចម និម្មល គឺជាបញ្ញវន្តខ្មែរមួយរូបដែលបានបញ្ចប់ការសិក្សានៅសហរដ្ឋអាមេរិក មុខជំនាញផ្នែកសេដ្ឋកិច្ចអន្តរជាតិ និងវិទ្យាសាស្ត្រសង្គម៕

The post លោកស្រី ចម និម្មល ជាតំណាងរាស្ត្រស្ត្រីជាប់ឆ្នោតក្មេងជាងគេសម្រាប់អាណត្តិទី៧នេះ appeared first on Kampuchea Thmey Daily.

ឥស្សរជនជាស្ត្រី ១៦រូប បានជាប់ឆ្នោតជាតំណាងរាស្រ្ត សម្រាប់អាណត្តិទី៧នេះ

អុន ស្រីមាន — Thu, 10 Aug 2023 08:38:59 +0000

ឥស្សរជនជាស្ត្រីដែលបម្រើការក្នុងជួររាជរដ្ឋាភិបាល និងមកពីគណបក្សប្រជាជនកម្ពុជាចំនួន ១៦រូប បានជាប់ឆ្នោតជាតំណាងរាស្ត្រ នីតិកាលទី៧នេះ។ ខាងក្រោមនេះ គឺឥស្សរជនជាស្ត្រីឆ្នើមទាំង១៦រូប ជាមួយនឹងតួនាទីដែលធ្លាប់កាន់នៅក្នុងអាណត្តិទី៦៖

សម្តេច ម៉ែន សំអន អាយុ ៦៩ឆ្នាំ ជាឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច បានជាប់ឆ្នោតជាតំណាងរាស្ត្រនៅខេត្តស្វាយរៀង។ រីឯ លោកស្រី នួម សុភ័ណ ជាសមាជិការគណៈកម្មការទី៧ នៃរដ្ឋសភា បានជាប់ជាតំណាងរាស្ត្រនៅខេត្តបន្ទាយមានជ័យ ក្នុងអាយុ ៦៨ឆ្នាំ។

សម្តេច ម៉ែន សំអន

លោកស្រី ឃួន សុដារី ក្នុងអាណត្តិទី៦ កាន់តំណែងជាអនុប្រធានទី២ នៃរដ្ឋសភា។ លោកស្រីអាយុ៧០ឆ្នាំ បានជាប់ជាតំណាងរាស្ត្រនៅខេត្តកណ្តាល។ នៅក្នុងអាណត្តិទី៧ខាងមុខនេះ លោកស្រី នឹងក្លាយជាប្រធានរដ្ឋសភា និងជាប្រវត្តិសាស្ត្រថ្មីមួយរបស់កម្ពុជា មិនធ្លាប់មានពីមុនមក ដែលមានស្ត្រីកាន់តំណែងមួយនេះ។

លោកស្រី ឃួន សុដារី

លោកស្រី ដួង វណ្ណា អាយុ ៧០ឆ្នាំ ជាប្រធានកិត្តិយសសាខាកាកបាទក្រហមកម្ពុជា ខេត្តស្វាយរៀង ក្នុងអាណត្តិមុន បានជាប់ជាតំណាងរាស្ត្រ នៅខេត្តស្វាយរៀង។ លោកស្រី ក្រួច ចំអាន អនុប្រធានគណៈកម្មការនីតិកម្ម និងយុត្តិធម៌ នៃរដ្ឋសភា បានជាប់ជាតំណាងរាស្ត្រនៅភ្នំពេញ។

លោកស្រី និន សាផុន អាយុ៧៥ឆ្នាំ កនុងអាណត្តិទី៦ លោកស្រី មានតួនាទីជា ប្រធានគណៈកម្មការសាធារណការ ដឹកជញ្ជូន ទូរគមនាគមន៍ ប្រៃសណីយ៍ ឧស្សាហកម្ម រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់ (គណៈកម្មការទី៩) នៃរដ្ឋសភា បានជាប់ឆ្នោតជាតំណាងរាស្ត្រ នៅខេត្តតាកែវ។

ដោយឡែក លោកស្រី អ៊ុន សុគន្ធា ជាលេខាធិការគណៈកម្មការមហាផ្ទៃ ការពារជាតិ និងមុខងារសាធារណៈនៃរដ្ឋសភា អាយុ៦៨ឆ្នាំ បានជាប់ឆ្នោតជាតំណាងរាស្ត្រនៅខេត្តកំពត។ ចំណែក លោកស្រី ឡោក ខេង ប្រធានគណៈកម្មការទី៨នៃរដ្ឋសភា បានជាប់ឆ្នោតជាតំណាងរាស្ត្រនៅភ្នំពេញ ក្នុងវ័យ ៦៨ឆ្នាំ។

លោកស្រី អ៉ឹង កន្ថាផាវី អាយុ៦៣ឆ្នាំ ជារដ្ឋមន្ត្រីក្រសួងកិច្ចការនារី បានជាប់ឆ្នោតជាតំណាងរាស្ត្រនៅភ្នំពេញ។ លោកស្រី ឯក សុវណ្ណភារៈ អភិបាលរងខេត្តស្វាយរៀង បានជាប់ចាតំណាងរាស្ត្រខេត្តស្វាយរៀង ក្នុងអាយុ ៥៥ឆ្នាំ។

លោកស្រី អ៉ឹង កន្ថាផាវី

រីឯ លោកស្រី គង់ សាឡន សមាជិការគណៈកម្មការទី១០ នៃរដ្ឋសភា អាយុ៦៥ឆ្នាំ ជាប់ឆ្នោតជាតំណារាស្ត្រនៅខេត្តព្រៃវែង។ លោកស្រី កែ ចន្ទមុនី អាយុ៦៤ឆ្នាំ បានជាប់ឆ្នោតជាតំណាងរាស្ត្រនៅខេត្តកំពង់ឆ្នាំង។ លោកស្រី ខេង សំវ៉ាដា រដ្ឋលេខាធិការក្រសួងកិច្ចការនារី អាយុ៦៦ឆ្នាំ បានជាប់ឆ្នោតតំណាងរាស្រ្តនៅខេត្តកំពង់ស្ពឺ។ លោកស្រី នូ សុវណ្ណនី អតីតអភិបាលរងខេត្តតាកែវ ជាប់ឆ្នោតជាតំណាងរាស្ត្រខេត្តតាកែវ ក្នុងអាយុ ៦៦ឆ្នាំ។

ជាមួយគ្នានេះ លោកស្រី តឹករ៉េត កំរង អាយុ ៥០ឆ្នាំ ជារដ្ឋលេខាធិការក្រសួងពាណិជ្ជកម្ម បានជាប់ឆ្នោតជាតំណាងរាស្ត្រក្នុងអាណត្តិទី៧នេះ នៅខេត្តសៀមរាប។ លោកស្រី ចម និម្មល រដ្ឋលេខាក្រសួងពាណិជ្ជកម្ម មានអាយុ ៤៣ឆ្នាំ ជាប់ជាតំណាងរាស្ត្រខេត្តកំពត និងជាតំណាងរាស្ត្រស្ត្រីវ័យក្មេងជាងគេក្នុងចំណោមស្ត្រីទាំង១៦រូប ខាងលើ។

លោកស្រី ចម និម្មល

សូមបញ្ជាក់ជាថ្មីថា តួនាទី និងមុខតំណាងខាងលើនេះ គឺជាតំណែងនៅអាណត្តិទី៦។ ចំពោះអាណត្តិទី៧ថ្មីនេះ មានការប្រែប្រួលតួនាទីយ៉ាងណានោះ នៅមិនទាន់លេចចេញជាផ្លូវការនៅឡើយទេ។ តែទោះជាយ៉ាងណា សម្តេចតេជោ ហ៊ុន សែន បានបញ្ជាក់កាលពីថ្ងៃទី៩ ខែសីហា ឆ្នាំ២០២៣ថា លោកស្រី ឃួន សុដារី បច្ចុប្បន្នជាអនុប្រធានទី២ នៃរដ្ឋសភា នឹងក្លាយជាប្រធានរដ្ឋសភានៅថ្ងៃអនាគត។ ទាំងនេះ បានបង្ហាញឱ្យឃើញថា កម្ពុជាបានយកចិត្តទុកដាក់ លើកស្ទួយស្ត្រីក្នុងភាពជាអ្នកដឹកនាំ ឱ្យមានសិទ្ធិកាន់តួនាទីធំៗ មិនចាញ់បុរសឡើយ៕

The post ឥស្សរជនជាស្ត្រី ១៦រូប បានជាប់ឆ្នោតជាតំណាងរាស្រ្ត សម្រាប់អាណត្តិទី៧នេះ appeared first on Kampuchea Thmey Daily.

បេក្ខជនជាប់ឆ្នោត ១២រូប នៃគណបក្សប្រជាជនកម្ពុជា មានអាយុក្រោម ៤៥ឆ្នាំ

Thoeun Vansong — Tue, 08 Aug 2023 04:35:25 +0000

លទ្ធផលផ្លូវការ បានបង្ហាញថា គណបក្សប្រជាជនកម្ពុជា បានទទួលជ័យជម្នះក្នុងការបោះឆ្នោតជាតិ អាណត្តិទី៧ នេះ ដោយបានគ្រប់គ្រងអាសនៈចំនួន ១២០។ ក្នុងនោះ បេក្ខជនជាប់ឆ្នោតចំនួន ១២រូប នៃគណបក្សប្រជាជន គឺមានអាយុក្រោម ៤៥ឆ្នាំ ខណៈឯកឧត្តមបណ្ឌិត ហ៊ុន ម៉ាណែត តំណាងរាស្ត្រជាប់ឆ្នោតមណ្ឌលរាជធានីភ្នំពេញ និងជានាយករដ្ឋមន្ត្រីថ្មី មានវ័យជិត ៤៦ឆ្នាំ។

បើតាមបញ្ជីរាយនាមបេក្ខជនជាប់ឆ្នោត ចេញដោយគណៈកម្មាធិការជាតិរៀបចំការបោះឆ្នោត (គ.ជ.ប) លោក កើត រិទ្ធ តំណាងរាស្ត្រជាប់ឆ្នោតមណ្ឌលខេត្តបាត់ដំបង លោក ឌិត ទីណា តំណាងរាស្ត្រមណ្ឌលខេត្តត្បូងឃ្មុំ និងលោក ឃឹង នុភាព តំណាងរាស្ត្រជាប់ឆ្នោតមណ្ឌលខេត្តកំពង់ធំ មានវ័យ ៤៤ឆ្នាំ ដូចគ្នា។

រីឯតំណាងរាស្ត្រជាប់ឆ្នោតនៃគណបក្សប្រជាជន ដែលមានវ័យ ៤៣ឆ្នាំ គឺរួមមាន លោក សាយ សំអាល់ តំណាងរាស្ត្រមណ្ឌលខេត្តព្រះសីហនុ លោក សេង ញ៉ក់ តំណាងរាស្ត្រមណ្ឌលខេត្តកំពង់ស្ពឺ និងលោកស្រី ចម និម្មល តំណាងរាស្ត្រមណ្ឌលខេត្តកំពត។

សម្រាប់ លោក ទៀ សីហា តំណាងរាស្រ្តជាប់ឆ្នោតមណ្ឌលខេត្តសៀមរាប លោក ម៉ាត់ សេត តំណាងរាស្ត្រមណ្ឌលខេត្តកំពត លោក ឃុត ចាន់ដារ៉ា តំណាងរាស្ត្រមណ្ឌលរាជធានីភ្នំពេញ និងតំណាងរាស្ត្រមណ្ឌលខេត្តព្រៃវែង លោក ស សុខា បានក្លាយជាតំណាងរាស្ត្រវ័យក្មេងរបស់គណបក្សប្រជាជនកម្ពុជា ក្នុងអាយុ ៤២ឆ្នាំ។

ដោយឡែកបេក្ខជនចំនួន ២រូបទៀត នៃគណបក្សប្រជាជនកម្ពុជា ដែលបានជាប់ឆ្នោតជាតំណាងរាស្ត្រ ហើយមានអាយុតិចជាងគេនោះ គឺឯកឧត្តម ហ៊ុន ម៉ានី និង លោក នង វាសនា។ ក្នុងវ័យ ៤០ឆ្នាំ ឯកឧត្តម ហ៊ុន ម៉ានី បានបន្តជាប់ជាតំណាងរាស្ត្រមណ្ឌលខេត្តកំពង់ស្ពឺ ៣អាណត្តិជាប់ៗគ្នា គឺនៅអាណត្តិទី៥ ទី៦ និងទី៧ នេះ ខណៈ លោក នង វាសនា ក្នុងវ័យ ៤១ឆ្នាំ បានបន្តជាប់ឆ្នោតនៅមណ្ឌលខេត្តកំពង់ធំ ផងដែរ៕
អត្ថបទ៖ ធឿន វ៉ាន់សុង

The post បេក្ខជនជាប់ឆ្នោត ១២រូប នៃគណបក្សប្រជាជនកម្ពុជា មានអាយុក្រោម ៤៥ឆ្នាំ appeared first on Kampuchea Thmey Daily.

ឯកឧត្តម ហ៊ុន ម៉ានី និងតំណាងរាស្រ្ត ២រូបទៀត មានវ័យក្មេងជាងគេក្នុងរដ្ឋសភា

Thoeun Vansong — Tue, 08 Aug 2023 02:25:50 +0000

ឯកឧត្តម ហ៊ុន ម៉ានី ដែលជាបេក្ខជនជាប់ឆ្នោតរបស់គណបក្សប្រជាជនកម្ពុជា និងបេក្ខជនជាប់ឆ្នោតមកពីគណបក្សហ្វ៊ុនស៊ិនប៉ិចចំនួន ២រូបផ្សេងទៀត គឺជាតំណាងរាស្ត្រមានអាយុតិចជាងគេ សម្រាប់នីតិកាលទី៧ នេះ។

បើតាមបញ្ជីរាយនាមបេក្ខជនជាប់ឆ្នោតជាតំណាងរាស្ត្រ នីតិកាលទី៧ នេះ ឯកឧត្តម ហ៊ុន ម៉ានី បានជាប់ជាតំណាងរាស្ត្ររបស់គណបក្សប្រជាជនកម្ពុជា មណ្ឌលខេត្តកំពង់ស្ពឺ ដែលមានអាយុ ៤០ឆ្នាំ។ ការជាប់ជាតំណាងរាស្ត្រ នីតិកាលទី៧ នេះ មិនមែនជាលើកទី១ របស់ឯកឧត្តម ហ៊ុន ម៉ានី ឡើយ ខណៈឯកឧត្តមបានជាប់ឆ្នោតជាតំណាងរាស្ត្រ ២អាណត្តិមកហើយ គឺនៅអាណត្តិទី៥ និងអាណត្តិទី៦ ហើយនៅអាណត្តិទី៧ នេះ ឯកឧត្តមក៏បានបន្តជាប់ឆ្នោតជាថ្មីម្ដងទៀត។

នៅក្នុងអាណត្តិទី៦ កន្លងមកនេះ ឯកឧត្តម ហ៊ុន ម៉ានី ក៏ត្រូវបានរដ្ឋសភាបោះឆ្នោតជ្រើសតាំងជា ប្រធានគណៈកម្មការទី៧ នៃរដ្ឋសភា គឺគណៈកម្មការអប់រំ យុវជន កីឡា ធម្មការ កិច្ចការសាសនា វប្បធម៌ និងទេសចរណ៍។ ក្រៅពីកិច្ចការនៅរដ្ឋសភា ឯកឧត្តម ហ៊ុន ម៉ានី ក៏កំពុងកាន់ជាប្រធានសហភាពសហព័ន្ធយុវជនកម្ពុជា។

ឯកឧត្តម ហ៊ុន ម៉ានី កើតនៅថ្ងៃទី២៧ ខែវិច្ឆិកា ឆ្នាំ១៩៨២ ជាកូនប្រុសទី៤ របស់សម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន។ ឯកឧត្តម បានឆ្លងកាត់ការសិក្សាមកពីប្រទេសបារាំង សហរដ្ឋអាមេរិក និងអូស្ត្រាលី។ ឯកឧត្តម ហ៊ុន ម៉ានី បានបញ្ចប់ការសិក្សាសញ្ញាបត្រអនុបណ្ឌិតចំនួន២ គឺសញ្ញាបត្រអនុបណ្ឌិតទំនាក់ទំនងអន្តរជាតិ នៅទីក្រុង Melbourne ប្រទេសអូស្ត្រាលី និងសញ្ញាបត្រអនុបណ្ឌិតយោធា ជំនាញសន្តិសុខជាយុទ្ធសាស្ត្រ ដែលផ្ដោតលើការប្រឆាំងអំពើភេរវកម្ម នៃសាកលវិទ្យាការពារជាតិ សហរដ្ឋអាមេរិក។

រីឯបេក្ខជនជាប់ឆ្នោតជាតំណាងរាស្ត្រ មកពីគណបក្សហ្វ៊ុនស៊ិនប៉ិចចំនួន ២រូបផ្សេងទៀត ដែលមានអាយុតិចជាងគេនោះ គឺលោក ញឿន រ៉ាដែន និងលោក នាង ចាន់ណាក់។ លោក ញឿន រ៉ាដែន បានជាប់ជាតំណាងរាស្ត្រ ដែលមានអាយុតិចជាងគេបំផុត ក្នុងវ័យត្រឹមតែ ៣៧ឆ្នាំប៉ុណ្ណោះ។ ការជាប់ជាតំណាងរាស្ត្រ នាពេលនេះ ជាលើកដំបូងហើយរបស់លោក ញឿន រ៉ាដែន ក្រោយពេលលោកបានឈរឈ្មោះជាបេក្ខជនពេញសិទ្ធិរបស់ គណបក្សហ្វ៊ុនស៊ិនប៉ិច នៅលេខរៀងទី១ មណ្ឌលខេត្តកំពង់ចាម សម្រាប់ការបោះឆ្នោតជាតិ នីតិកាលទី៧ នេះ។

ក្រោយជាប់ជាសមាជិករដ្ឋសភា ក្នុងអាណត្តិថ្មីនេះ លោក ញឿន រ៉ាដែន បានថ្លែងអំណរគុណដល់ម្ចាស់ឆ្នោតទាំងអស់ ដែលបានអញ្ជើញទៅបោះឆ្នោត និងបានគាំទ្រដល់គណបក្សរាជានិយម ហ៊្វុនស៊ិនប៉ិច កាលពីថ្ងៃទី២៣ ខែកក្កដា ឆ្នាំ ២០២៣ កន្លងទៅនេះ។ ក្នុងនាមជាតំណាងរាស្ត្រមួយរូប លោក ញឿន រ៉ាដែន បានប្ដេជ្ញាចិត្តបំពេញបេសកកម្មក្នុងការបម្រើ ការពារផលប្រយោជន៍ជាតិ ប្រជាជន ដោយស្មារតីជាតិនិយមជានិច្ច។ សព្វថ្ងៃ លោក ញឿន រ៉ាដែន គឺកំពុងកាន់តួនាទីជាអ្នកនាំពាក្យ និងជា ប្រធានក្រុមការងារខេត្តកំពង់ចាមរបស់គណបក្សហ្វ៊ុនស៊ិនប៉ិច។

ដោយឡែក លោក នាង ចាន់ណាក់ ក៏បានក្លាយជាបេក្ខជនជាប់ឆ្នោតដែលមានវ័យក្មេងជាងគេផងដែរ ក្នុងចំណោមតំណាងរាស្ត្រជាប់ឆ្នោតទាំងអស់ចំនួន ១២៥រូប។ លោក នាង ចាន់ណាក់ ជាតំណាងរាស្រ្តជាប់ឆ្នោតនៅមណ្ឌលខេត្តកំពង់ធំ ដែលមានអាយុ ៣៩ឆ្នាំ និងជាតំណាងរាស្រ្តមួយរូបក្នុងចំណោម ៥រូប មកពី គណបក្សរាជានិយម ហ៊្វុនស៊ិនប៉ិច។

កាលពីអាណត្តិទី៥ ឆ្នាំ២០១៣ លោក នាង ចាន់ណាក់ ធ្លាប់ធ្វើជាតំណាងរាស្ត្រមណ្ឌលខេត្តកំពង់ធំ ម្ដងរួចមកហើយ ក្រោយពេលដែលអតីតគណបក្សសង្គ្រោះជាតិ ត្រូវបានប្រកាសរំលាយដោយអំណាចតុលាការ ហើយអាសនៈទាំងអស់របស់អតីតបក្សប្រឆាំងនេះ គឺត្រូវបែងចែកឱ្យគណបក្សផ្សេងទៀត ខណៈពេលនោះ គណបក្សហ្វ៊ុនស៊ិនប៉ិច ក៏ទទួលបានអាសនៈមួយចំនួនផងដែរ៕

អត្ថបទ៖ ធឿន វ៉ាន់សុង

The post ឯកឧត្តម ហ៊ុន ម៉ានី និងតំណាងរាស្រ្ត ២រូបទៀត មានវ័យក្មេងជាងគេក្នុងរដ្ឋសភា appeared first on Kampuchea Thmey Daily.