នៅ​ក្នុង​ឱកាស​ជួប​សំណេះ​សំណាល​ជា​មួយអាជ្ញាធរដែនដី និង​ពលរដ្ឋនៅក្នុងសហគមន៍ តំបន់​ការពារ​ធម្មជាតិ​ព្រៃ​ធំ​អន្លង់ធំ ស្ថិតនៅលើខ្នងភ្នំគូលែន នៃឧទ្យានជាតិព្រះជ័យវរ្ម័ន នរោត្តម«ភ្នំគូលែន» ក្នុងភូមិ​សាស្រ្ត​ខេត្ត​សៀមរាប ​កាល​ពី​ពេល​ថ្មី​ៗ​នេះ លោក​រដ្ឋមន្ត្រី​ អ៊ាង សុផល្លែត បាន​មាន​ប្រសាសន៍​ថា​ ការពារនិង​អភិរក្សព្រៃឈើសហគមន៍ ក៏ជាកន្លែងដែលសហគមន៍ត្រូវធ្វើជាម្ចាស់ សម្រាប់ការអភិវឌ្ឍគោលដៅលំហែបៃតង ដែល​ត្រូវស្វាគមន៍ ភ្ញៀវទេសចរមកកម្សាន្ត តាមរយៈ​ការបោះតង់សម្រាក និងទស្សនាទេសភាពធម្មជាតិ ទីតាំងវប្បធម៌ ប្រវត្តិសាស្រ្ត សាសនា ជាដើម នៅក្នុងព្រៃសហគមន៍។ មិន​តែ​មិន​ប៉ុណ្ណោះ សហគមន៍​តំបន់​ការពារ​ធម្មជាតិ នៅ​លើ​ខ្នងភ្នំ​គូលែន ជា​តំបន់​ដែល​មានព្រៃឈើក្រាស់ មាន​ទេសភាព​ស្រស់ស្អាត អាចឱ្យ​ភ្ញៀវ​ទេសចរ​បោះតង់​សម្រាកក្បែរមាត់ទឹក​ផង​ដែរ​។

លោក​រដ្ឋមន្ត្រី ក៏​បាន​បន្ថែម​ដែរ​ថា តាមរយៈគម្រោងនិរន្តភាពតំបន់ទេសភាព និងទេសចរណ៍ធម្មជាតិកម្ពុជា ដែលហៅកាត់ថា CSLEP ដែលដឹក​នាំអនុវត្តដោយ​ក្រសួងបរិស្ថាន និងក្រសួងអភិវឌ្ឍជនបទ ក្រោម​ហិរញ្ញប្បទានធនាគារពិភពលោក មូល​និធិបរិស្ថានសកល និងរាជរដ្ឋាភិបាលកម្ពុជា ក្រសួងបរិស្ថាន បាន​ផ្តល់ផ្ទះតង់ ចំនួន ១០ផ្ទះ ជា​ជំហាន​ដំបូង ​ដល់​សហគមន៍តំបន់​ការពារ​ធម្មជាតិព្រៃធំអន្លង់ធំ ដែលការសាងសង់​នឹងចាប់ផ្តើមនៅថ្ងៃចន្ទ ទី០២ ខែធ្នូ ឆ្នាំ២០២៤ នេះ។

ជាក់ស្តែង តង់ស្នាក់​សម្រាប់ទេសចរណ៍ សាងសង់ឡើងតាមរចនាបទខ្មែរ និងមានលក្ខណៈទំនើប មានអនាម័យ សោភ័ណ​ភាពស្អាត ការលំហែកម្សាន្ត ប្រកបដោយសុខុដុមរមនាជាមួយធម្មជាតិ សម្រាប់ឱ្យភ្ញៀវជាតិ ឬ​អន្តរជាតិ ដែល​មក​កម្សាន្ត បោះតង់ និងដើរទស្សនាជុំវិញព្រៃសហគមន៍ តំបន់ទីទួលបុរាណ ប្រាសាទបុរាណ កន្លែងវប្បធម៌ ប្រវត្តិសាស្រ្ត និងតំបន់ទេសភាពធម្មជាតិផ្សេងទៀត លើខ្នងភ្នំគូលែន។

គួរ​បញ្ជាក់​ថា ក្រសួង​បរិស្ថាន បាន​និង​កំពុង​អភិវឌ្ឍ​គោលដៅ​លំហែបៃតង នៅតាម​សហគមន៍តំបន់​ការពារ​ធម្មជាតិ  ស្រប​តាមគោលនយោបាយ និងយុទ្ធសាស្រ្តរបស់រាជរដ្ឋាភិបាលកម្ពុជា ហើយ​យុទ្ធសាស្រ្តចក្រា​វិស័យ​បរិស្ថាន បាន​កំពុងធ្វើ​ឱ្យ​សហគមន៍​មាន​ចំណូល​​បន្ថែម និង​បង្កើតជម្រើសថ្មី សម្រាប់ការប្រកប​មុខ​របរចិញ្ចឹមជីវិត ដោយ​ផ្តល់​ចំណេះដឹង ជំនាញ និង​មុខរបរថ្មី ដូចជាការចិញ្ចឹមសត្វ ការដាំ​ដំណាំ​រួម​ផ្សំផ្សេងទៀត សម្រាប់​ប្រើប្រាស់​ប្រចាំថ្ងៃផង និងសម្រាប់លក់នៅលើទីផ្សារផងដែរ ព្រមទាំងជួយរៀប​ចំ​បង្កើត​ជា​អេកូទេសចរណ៍ នៅក្នុងតំបន់សហគមន៍៕

​

The post ខ្នងភ្នំគូលែនមានព្រៃឈើក្រាស់ អាច​បោះតង់​សម្រាក​​ក្បែរមាត់ទឹក និងទស្សនាប្រាសាទ​ក្នុងព្រៃ appeared first on Kampuchea Thmey Daily.

ក្នុង​ចំណោម​ភ្ញៀវ​ទេសចរ​សរុប​ទាំង​អស់ ​ដែល​បាន​ដើរ​លេង​កម្សាន្ត​នៅ​តំបន់​ការពារ​ធម្មជាតិ ក្នុង​នោះ​មាន​ទេសចរបរទេស​ចំនួន ២៩៥នាក់។

លោក​ ខ្វៃ អាទិត្យា បាន​លើក​ឡើង​ថា តាម​រយៈ​នេះ ប្រជាពលរដ្ឋ​អាច​រក​ប្រាក់ចំណូល​សរុបចំនួន ១៧ ៣០៨ ដុល្លារ ពីការ​សម្រាក​លំហែកម្សាន្ត នៅតាមសហគមន៍​តំបន់​ការពារធម្មជាតិ។

អ្នកនាំពាក្យក្រសួងបរិស្ថាន​បានឱ្យដឹង​បន្ថែម​ថា សហគមន៍តំបន់ការពារធម្មជាតិ បង្កប់ដោយ​សក្តានុពល​សម្រាប់​លំហែ​បៃតង រួមមាន​វាលស្មៅស្រស់ស្អាត មានទឹកធ្លាក់ ផ្ទាំងថ្ម ផ្កាព្រៃ ព្រៃឈើ សត្វព្រៃ កន្លែងវប្បធម៌ និងប្រវត្តិសាស្រ្ត ជាដើម។ រតនសម្បត្តិធម្មជាតិទាំងអស់នេះ ត្រូវបានការពារនិងអភិរក្ស ពីមន្រ្តីឧទ្យានុរក្ស និង​អ្នកពាក់ព័ន្ធ ជាពិសេស​ពីប្រជាពលរដ្ឋមូលដ្ឋាន ដែលរស់នៅក្នុងសហគមន៍តំបន់ការពារធម្មជាតិទាំងអស់នោះ ដើម្បីការ​រស់​នៅ​ដោយ​ចីរភាព។

មិន​តែ​ប៉ុណ្ណោះ សហគមន៍តំបន់ការពារធម្មជាតិ មានតួនាទីសំខាន់ក្នុងការចូលរួមការពារ និងអភិរក្ស​ធនធាន​ធម្មជាតិ  ក៏ដូចជា​លើក​កម្ពស់ជីវភាពសហគមន៍ តាមរយៈជម្រើសមុខរបរសមស្រប ដែលមិនពឹងពាក់​លើធនធានធម្មជាតិ។

ស្របតាម​ក្រមបរិស្ថាន និង​ធនធានធម្មជាតិ ក្រសួងបរិស្ថាន បានរៀប​ចំបង្កើត​សហគមន៍​តំបន់​ការពារធម្មជាតិ សម្របសម្រួល​គម្រោង​អភិវឌ្ឍន៍​ទេសចរណ៍ធម្មជាតិ និងការរៀបចំ​របៀង​សហគមន៍​តំបន់​ការពារ​ធម្មជាតិ(គោលដៅ​លំហែ​បៃតង) ដើម្បីការប្រើប្រាស់ធនធានធម្មជាតិប្រកបដោយនិរន្តរភាព ការអភិរក្ស​បេតិកភណ្ឌធម្មជាតិ និងវប្បធម៌​សំដៅ​ចូលរួម​ចំណែក​គ្រប់គ្រង​ធនធានធម្មជាតិ កិច្ច​គាំពារ​បរិស្ថាន និងការអភិវឌ្ឍមូលដ្ឋានប្រកបដោយចីរភាព។

បច្ចុប្បន្ន សហគមន៍តំបន់ការពារធម្មជាតិ សរុបចំនួន ១៩៣ សហគមន៍ ត្រូវបាន​បង្កើតឡើងដោយមានការ​ចូលរួមពីប្រជាជនចំនួន ៧៣.១៩៤គ្រួសារ មកពី ៣៦២ ភូមិ ១១៥ឃុំ ចំនួន ១៦ខេត្ត គ្រប់គ្រងផ្ទៃដីទំហំ ៣៣២.១០៨ហិកតា។

តំបន់ការពារធម្មជាតិបាន​និងកំពុងទទួលផលប្រយោជន៍ជាច្រើន តាមរយៈការងារកសិកម្ម ចិញ្ចឹមសត្វ ក្រុម​សន្សំប្រាក់ អាជីវកម្មខ្នាតតូច ក៏ដូចជាការប្រមូលអនុផលព្រៃឈើ ដើម្បី​ទ្រទ្រង់​ជីវភាពរស់​នៅប្រចាំថ្ងៃ មាន​ជា​អាទិ៍ ផ្សិតប៉ក់ ផ្សិតក្ងោក ផ្សិតលីញជឺ ផ្លែសំរ៉ង ផ្លែគុយ ផ្លែរំដួល ជ័រទឹក ជ័រចុង ទឹកឃ្មុំ ជាដើម។

បើតាមមន្រ្តីអ្នកនាំពាក្យ​ក្រសួង​បរិស្ថាន សហគមន៍​តំបន់​ការពារ​ធម្មជាតិ​ចំនួន ៣៦ សហគមន៍ មានការគ្រប់គ្រង និងការវិវឌ្ឍរីក​ចម្រើន​ល្អគួរចាប់អារម្មណ៍ តាមរយៈ​ការរៀបចំ​ផ្តល់​សេវាកម្ម​ទេសចរណ៍​ធម្មជាតិ ដែល​ទាក់ទាញ​ភ្ញៀវទេសចរ​ជាតិ និង​អន្តរជាតិ៕

The post អុំទូក ៣ ថ្ងៃ សហគមន៍​តំបន់​ការពារធម្មជាតិរក​​ចំណូល​​​បាន​ ១៧ ៣០៨ ដុល្លារ ពីទេសចរដើរកម្សាន្ត​​ appeared first on Kampuchea Thmey Daily.

ក្នុង​ឱកាស​នោះ​ លោក អ៊ាង សុផល្លែត មាន​ប្រសាសន៍​ថា ភាពជា​ម្ចាស់រឹងមាំ​របស់​សហគមន៍​អាចជួយ​បង្កើន​ជីវភាព​មូលដ្ឋាន និង​ការពារ​ធនធាន​ធម្មជាតិ​ឱ្យបាន​គង់វង្ស។ ជាក់ស្តែង​ បច្ចុប្បន្ន​ក្រសួងបរិស្ថាន បាន​​កំពុង​ចូលរួមចំណែក និង​ផ្តល់ការគាំទ្រយ៉ាងពេញទំហឹង លើការចូលរួម របស់សហគមន៍មូលដ្ឋាន ក្នុងគោលដៅ​លើក​កំពស់​ជីវភាព ការ​អភិវឌ្ឍ​សហគមន៍ ក្នុង​ន័យកាត់បន្ថយ ដល់ការដាក់សម្ពាធ លើការ​ប្រើប្រាស់​ធនធាន​ធម្មជាតិ។

ដើម្បី​ជួយ​ដល់សហគមន៍តំបន់ការពារធម្មជាតិ លោក​រដ្ឋមន្ត្រី​ បាន​ដាក់​ចេញ​វិធាន​ការ ៥​ ចំណុច​ជា​គន្លឹះ ដូច​ជា៖ ទី​១-ជំរុញឱ្យអគ្គនាយកដ្ឋានសហគមន៍មូលដ្ឋានបន្តតាមដាន និងត្រួតពិនិត្យគម្រោងអភិវឌ្ឍន៍ និងវិនិយោគទាំងអស់ នៅក្នុងតំបន់ការពារធម្មជាតិ ត្រូវគោរពច្បាប់ជាធរមាន។​ ទី២-រាល់គម្រោង​អភិវឌ្ឍន៍ និង​វិនិយោគ​ទាំងឡាយណា ដែលមិនទទួលបានការឯកភាពពីប្រជាសហគមន៍ក្នុងតំបន់ត្រូវ​​បញ្ចប់ជាបន្ទាន់។

ទី​៣-រាល់គម្រោងអភិវឌ្ឍន៍ និងវិនិយោគទាំងអស់ ដែលបានអនុញ្ញាតិឱ្យដំណើរការ ត្រូវតែជួយ​បណ្តុះបណ្តាល ជំនាញ និង​ពង្រឹងស​មត្ថភាពដល់ប្រជាសហគមន៍ ដើម្បីផ្តល់ឱកាសនៅពេលអនាគត សហគមន៍​អាចធ្វើភាពជាម្ចាស់បាន។ ​ទី៤-ជំរុញបន្ថែម​ដល់ការ​បង្កើត​នូវ​សក្តានុពល​សហគមន៍​តំបន់​ការពារធម្មជាតិ​ទាំង​ ១៩៣ ជា​សហគមន៍​ទេសចរណ៍​ធម្មជាតិ ដើម្បីលើកកម្ពស់ជីវភាពសហគមន៍ និង​ជាសហគមន៍​អធ្យាក្រឹតកាបូននៅឆ្នាំ២០៥០ និង៥-បន្តអនុវត្តច្បាប់​១០០% ប្រឆាំងបទល្មើសធនធានធម្មជាតិ។

The post រដ្ឋមន្រ្តីបរិស្ថាន ដាក់ចេញវិធានការ ៥ ចំណុច ពង្រឹងសហគមន៍តំបន់ការពារធម្មជាតិ appeared first on Kampuchea Thmey Daily.

បើ​តាម​លោក ចៅ ជា តំបន់​ការពារ​ធម្មជាតិ​អូ​រពង្រូល ​ត្រូវ​បាន​ទទួល​ស្គាល់​បង្កើត​ជា​តំបន់​ការ​ព្រៃឈើ​អូរពង្រូល​នៅ​ឆ្នាំ​២០១២ និង​​ឆ្នាំ​២០២០ បាន​បង្វែរ​មក​ជា​តំបន់​ការ​ពារ​ធម្មជាតិ​អូ​រពង្រូល ដោយមាន​ការ​ទទួល​ស្គាល់​ពី​ក្រសួង​បរិស្ថាន​នៅ​ឆ្នាំ​២០២១។​

នៅតំបន់​ការពារ​ធម្មជាតិ​អូ​ពង្រូ​នេះ​ទៀត​សោត ត្រូវ​បាន​បែង​ចែក​ជា​ ៤ តំបន់​ផ្សេង​គ្នា​បន្ថែម​ទៀតមានដូចជា៖

ទី​១ គឺ​តំបន់​ព្រៃ​អភិរក្ស៖ តំបន់​ព្រៃ​អភិរក្ស​ ដែល​តំបន់​នេះមិន​មាន​​ប្រជា​សហគមន៍​ណា​ម្នាក់​​ចូល​ទៅ​កាប់​ទន្ទ្រាន​ឡើយ​ គឺ​មាន​ត្រឹម​តែ​ការ​អាស្រ័យ​ផល​ធម្មជាតិ​តែ​ប៉ុណ្ណោះ​។

ទី​២ តំបន់​ដក​ហូត​ និង​ដាំ​ស្តារ៖ ស្ថិត​នៅ​ជាយ​នៃ​តំបន់​ការពារ​ធម្មជាតិ​​អូ​រពង្រូល ដោយ​តំបន់​នេះ​នៅ​ពេល​ដែល​មាន​ប្រជា​សហគមន៍​​ខ្វះ​ខាត​ឈើ​សម្រាប់​ធ្វើ​ផ្ទះ​សំបែង ឬ​សម្រាប់​តម្រូវ​ការ​ប្រើប្រាស់​នានា​ដែល​ចាំ​បាច់​ ​អាច​ស្នើ​សុំ​គណៈកម្មការ ដោយ​ពិភាក្សា​ជា​មួយ​សមាជិក​របស់​សហគមន៍​ ដើម្បី​ធ្វើ​ការ​ស្នើសុំ​ជា​លិខិត​ក្នុង​ការ​ដក​ហូត​តាម​កំណត់​ដែល​មាន​ចែង​ក្នុង​ច្បាប់​របស់​សហគមន៍​។

ទី​៣ តំបន់​៣ ជា​តំបន់​អេកូ​ទេសចរណ៍​ ឬ​ជា​តំបន់​ដែល​សហគមន៍​បម្រុង​នឹង​បង្កើត​ជា​តំបន់​អេកូ​ទេសចរណ៍​។ គម្រោង​នេះ ត្រូវ​បាន​រៀប​ចំ​ឡើង​ដោយ​មើល​ឃើញ​ថា នៅ​តំបន់​៣ មាន​កន្លែង​​ទាក់​ទាញ​ជា​ច្រើន​ ដែល​អាច​ទាក់ទាញ​​អ្នក​ទេសចរ​មក​លេង​កម្សាន្ត​បាន ដូច​ជា​​ការ​ទៅ​បោះ​តង់ ទស្សនា​សត្វ​ព្រៃ ជា​ពិសេស​ព្រៃ​ឈើ​នៅ​ទី​​នោះ​។

ទី​៤ គឺ​តំបន់​ព្រៃ​កម្សត់ តំបន់​នេះ​មាន​​ទាំង​តំបន់​ព្រៃ​តំណម ​ព្រៃ​កប់​សព និង​តំបន់​អារក្ស​​។ តំបន់​នេះ​ទៀត​សោត ​គ្មាន​ប្រជា​សហគមន៍​ណា​ម្នាក់​អាច​ចូល​ទៅ​ប៉ះពាល់​ កាប់​ឆ្ការ ឬ​អា​ស្រ័យ​ផល​បាន​ទេ ព្រោះ​ព្រៃ​តំណម​ កន្លែង​ដី​ច្រាប និង​ព្រៃ​កប់​សព ប្រសិន​បើ​មាន​អ្នកណា​ម្នាក់​ហ៊ាន​ប៉ះពាល់​អាច​នឹង​មាន​បញ្ហា​គ្រួសារ និង​ការ​រស់​នៅ​របស់​អ្នក​ភូមិ​នៅ​ក្នុង​សហគមន៍​ផ្ទាល់​។

ទន្ទឹមនេះ លោក ចៅ ជា ក៏​បាន​ថ្លែង​អំណរ​គុណ​ដល់​រាជ​រដ្ឋាភិបាល​កម្ពុជា​ ជាពិសេសគម្រោង​រ៉េត​បូក ក្រសួង​បរិស្ថាន​ ដែល​បាន​យក​ចិត្ត​ទុកដាក់​មក​លើ​សហគមន៍ ទាំង​សហគមន៍​ដី​ចុះ​បញ្ជី​ និងមិនទាន់បានចុះបញ្ជី ព្រមទាំងដី​តំបន់​ការពារ​ធម្មជាតិ​អូ​រពង្រូល ដែល​បាន​ចុះ​បញ្ជី និង​ទទួល​ស្គាល់ ហើយបាន​ធ្វើ​ឱ្យ​សហគមន៍​នៅ​ក្នុង​ភូមិ​ប៉ក្រុង​មាន​ភាព​រឹង​មាំ​ ព្រម​ទាំង​​ធ្វើ​ឱ្យ​ប្រជា​សហគមន៍​មាន​ដី​បន្ត​សម្រាប់​រស់​នៅ និង​អាស្រ័យ​ផល​ សម្រាប់​ទៅ​ថ្ងៃ​អនាគត​ ព្រមទាំងបានធ្វើឱ្យប្រជា​សហគមន៍​ដែលរស់នៅបច្ចុប្បន្នមាន​ដី​សម្រាប់​អាស្រ័យ​ផល រស់​នៅ​ស្រួល មាន​មុខ​របរ​ត្រឹម​ត្រូវ​ដែល​មិន​ធ្វើ​ឱ្យ​ប៉ះពាល់​ដល់​ព្រៃ​ឈើ៕

The post សហគមន៍អូរពង្រូលជនជាតិដើម​ភាគតិច បែង​ចែក ៤ តំបន់ ទុកអភិរក្សនិងការពារធនធានព្រៃឈើ appeared first on Kampuchea Thmey Daily.

កាលពីថ្ងៃទី១២ ខែតុលា ឆ្នាំ ២០២៤ បុរសម្នាក់ឈ្មោះ កោះ សៀម រស់នៅភូមិត្រពាំងរាំង ឃុំ រណសិរ្ស ស្រុកសង្គមថ្មី ខេត្តព្រះវិហារ ត្រូវបានកងកម្លាំងមន្ត្រីអភិរក្សព្រៃឈើរបស់លោក បេន ដាវីស ចំនួន ០៦ នាក់ ដឹកនាំដោយលោក បេន ដាវីស  ក្នុងនោះមានមន្ត្រីសហគមន៍០២នាក់ កម្លាំងកងរាជអាវុធហត្ថ០២នាក់ និងក្រុមការងារលោក បេន ដាវីស ០២នាក់ បានចុះមកចាប់ខ្លួនលោក ក្នុងភូមិខាងលើ នៅវេលាម៉ោងប្រហែល១០ ព្រឹក ដោយពុំដឹងមូលហេតុ។

លោក បេន ដាវីស ដែលជាប្រធានក្រុមមន្ត្រីអភិរក្សភ្នំពកភ្នំត្នោត  លោកបានបញ្ជាក់ប្រាប់អ្នកសារព័ត៌មានថា លោក កោះ សៀម បានធ្វើសកម្មភាពដាក់ដៃយកត្រីនៅក្នុងដងស្ទឹង ដែលជាតំបន់ការពារបស់រូបលោក។

បើតាមការបញ្ជាក់របស់លោក ម៉ូត ឌី ដែលជាមេភូមិ បានដឹងថា លោក កោះ សៀម ពិតជាបានដាក់ដៃនៅក្នុងស្ទឹង ដើម្បីយកត្រីពិតប្រាកដមែន  ក៏ប៉ុន្តែក្នុងលក្ខណៈតិចតួចចិញ្ចឹមឆ្នាំងតែប៉ុណ្ណោះ ហើយក៏មិនបានដាក់ចូលទៅក្នុងដី ដែលជាដែនការពាររបស់លោក បេន ដាវីស ដូចការចោទប្រកាន់របស់លោក បេន ដាវីស នោះទេ ព្រោះវាស្ថិតនៅក្នុងជើងភូមិត្រពាំងរាំងតែម្ដង នៅឆ្ងាយពី៥០០ម៉ែត្រពីភូមិតែប៉ុណ្ណោះ។

លោកមេភូមិ បន្តទៀតថា លោក បេន ដាវីស  និងមន្ត្រីអភិរក្សរបស់ខ្លួន ដែលចូលមកចាប់ និងប្រើអំពើហិង្សាមកប្រជាពលរដ្ឋនៅក្នុងផ្ទះ ហើយបានប្រើអំពើហិង្សាមកលើឈ្មោះ កោះ សៀម ឱ្យរបួសស្នាមបាក់ឆ្អឹងថ្គាម ក្ដោងច្រមុះ ប៉ះពាល់ដល់សួត និងរបួសមុតដៃខាងស្ដាំ បច្ចុប្បន្នកំពុងសង្គ្រោះបន្ទាន់ នៅមន្ទីរពេទ្យខេត្តព្រះវិហារ។ លោកមេភូមិក៏បានសំណូមពរឲ្យថ្នាក់ដឹកនាំគ្រប់ជាន់ថ្នាក់ជួយរកយុត្តិធម៌ជូនលោក កោះ សៀម ផងដែរ។

អភិបាលស្រុកសសង្គមថ្មី ខេត្តព្រះវិហារ  លោកស៊ាប កែវីវ៉ា បានឲ្យដឹងថា ករណីនេះលោកបានទទួលសេចក្តីរាយការណ៍ពីលោកអធិការស្រុកមកថា មានករណីហិង្សាជាមួយពលរដ្ឋ ជាមួយក្រុមលោកបេន រហូតបណ្តាលឲ្យរងរបួសធ្ងន់កំពុងសម្រាកព្យាបាលនៅមន្ទីរពេទ្យបង្អែកខេត្តព្រះវិហារ។

លោកបន្តថា បច្ចុប្បន្នសមត្ថកិច្ចជំនាញកំពុងស្រាវជ្រាវករណីនេះយ៉ាងយកចិត្តទុកដាក់ ដើម្បីឈានទៅភាពយុត្តិធម៌ទាំងសងខាង៕

ដោយ៖ជុន កុសល

The post ក្រុមមន្ត្រីអភិរក្សធនធានធម្មជាតិរបស់លោក បេន ដាវីស  រងការចោទប្រកាន់ថាប្រើអំពើហិង្សាលើពលរដ្ឋម្នាក់ appeared first on Kampuchea Thmey Daily.

យោង​តាម​សេចក្តី​ប្រកាស​ព័ត៌មាន​របស់​ក្រសួង​បរិស្ថាន​ចុះ​នៅ​រសៀល​ថ្ងៃ​ទី​២៧ ខែ​កុម្ភៈ ឆ្នាំ​២០២៤ បាន​ឲ្យ​ដឹង​ថា រហូតមកដល់​ពេលនេះ នៅតែ​មានបុគ្គលឆ្លៀត​ឱកាស​មួយចំនួនតូច បាន​ធ្វើចលនា​បំផុស​ឲ្យប្រជាពលរដ្ឋចូលកាប់ រុករាន ទន្ទ្រានដីព្រៃសហគមន៍តំបន់ការពារធម្មជាតិ និងដីព្រៃក្នុងតំបន់ការពារធម្មជាតិ យកមកធ្វើជា​ប្រយោជន៍ផ្ទាល់​ខ្លួនក្នុងរូប​ភាពជា​ដីអាស្រ័យផល។

ក្រសួង​បរិស្ថានចាត់​ទុក​ទង្វើបែបនេះ គឺ​ជាការប្រព្រឹត្ត​ខុសច្បាប់​យ៉ាង​ធ្ងន់ធ្ងរ ផ្ទុយ​ទៅនឹង​មាត្រា២៦ នៃច្បាប់​ស្តីពីតំបន់ការពារធម្មជាតិ ដូច​មានចែង​ថា “សហគមន៍​មូលដ្ឋាន និង​ជនជាតិ​ដើម​ភាគតិច​ពុំមាន​សិទ្ធិកាប់​គាស់ ឬ​ឈូស​ឆាយ​ដីព្រៃក្នុង​សហគមន៍ តំបន់​ការពារ​ធម្មជាតិ ដែល​បាន​ចុះកិច្ចព្រមព្រៀង​ជាមួយរដ្ឋបាលការពារ និង​អភិរក្សធម្មជាតិ នៃ​ក្រសួង បរិស្ថាន និង​បង្វែធ្វើជាដី​កសិកម្ម ឬ​ធ្វើជាកម្មសិទ្ធិបុគ្គល ឬ លក់ ប្តូរ ជួល បញ្ចាំ ប្រវាស់ បែងចែក ដោះដូរ ឬធ្វើការ​ផ្ទេរតំបន់​គ្រប់គ្រង​របស់សហគមន៍​តំបន់​ការពារ​ធម្មជាតិ​ឲ្យទៅជារូបវន្តបុគ្គល ឬនីតិបុគ្គល ណាមួយ បានឡើយ»។

ក្នុង​ន័យ​នេះ ក្រសួង​បរិស្ថាន​ បាន​ដាក់​ចេញ​វិធាន​ការ​ ៤ ចំណុច​រួម​មាន៖

-គណៈកម្មការ​សហគមន៍​តំបន់​ការពារ​ធម្មជាតិ ត្រូវ​ការពារ​ថែរក្សា​ផ្ទៃដី​ព្រៃ​សហគមន៍​ឲ្យ​បាន​គង់វង្ស ស្របតាម​ប្រកាស​របស់ក្រសួងបរិស្ថាន។ ក្នុង​ករណីចាំបាច់ គណៈកម្មការ​សហគមន៍​តំបន់​ការពារ ធម្មជាតិ ត្រូវផ្ដល់​ព័ត៌មាន​ជាបន្ទាន់​ដល់​មន្ទីរបរិស្ថានខេត្តសាមី ដើម្បី​ស្នើសុំការណែនាំ និង​ចាត់​វិធានការតាមផ្លូវច្បាប់​ឲ្យទាន់ពេល

-រូបវន្តបុគ្គល ឬ​នីតិបុគ្គល​ពាក់ព័ន្ធ​ត្រូវបញ្ឈប់ជា​បន្ទាន់​រាល់​សកម្មភាព​កាប់ឆ្ការ រុករាន ទន្ទ្រាន ហ៊ុមព័ទ្ធ ដាំដុះ​ដំណាំ​នៅលើដី​សហគមន៍​តំបន់​ការពារធម្មជាតិ

-បុគ្គលដែល​បាន​កាប់រុករាន ទន្ទ្រានដីព្រៃ​សហគមន៍​តំបន់​ការពារធម្មជាតិ ត្រូវ​ប្រគល់​ដីនោះ​ឲ្យទៅសហគមន៍​វិញ​ដោយ​ឥតលក្ខខណ្ឌ និងធ្វើការ​ដាំស្តារព្រៃឈើនៅលើដីដែលបានកាប់រានឡើងវិញ

-មន្ទីរ​បរិស្ថានខេត្ត ត្រូវដឹកនាំ​មន្ត្រី​ឧទ្យានុរក្ស សហការ​ជាមួយ​រដ្ឋបាល​ថ្នាក់ក្រោមជាតិ អង្គភាព​មាន សមត្ថកិច្ច​ពាក់ព័ន្ធ និង​គណៈកម្មការ​សហគមន៍​តំបន់​ការពារ​ធម្មជាតិ ចុះ​អនុវត្ត​ទប់​ស្កាត់​រាល់ សកម្មភាព​កាប់ឆ្ការ​ដី​ព្រៃ​សហគមន៍ ស្រប​តាម​ច្បាប់ជាធរមាន

ក្រសួង​បរិស្ថានបាន​សង្កត់​ធ្ងន់​ថា ក្រោយ​ពី​ទទួល​បានសេចក្តីប្រកាស​ព័ត៌មាននេះ ក្រសួងស្ថាប័នមាន​សមត្ថកិច្ច រដ្ឋបាល​ថ្នាក់ក្រោមជាតិ មន្ទីរបរិស្ថានខេត្ត ត្រូវចាត់​វិធាន​ការតាមផ្លូវច្បាប់ ដើម្បីឈាន​ទៅបញ្ចប់រាល់​សកម្មភាពកាប់ រុករាន ទន្ទ្រានដី ព្រៃសហគមន៍តំបន់ការពារធម្មជាតិ ក្នុងតំបន់ការពារធម្មជាតិ​ឲ្យមានប្រសិទ្ធភាព៕

The post ចេញ​វិធានការ ៤ ចំណុចបញ្ឈប់សកម្មភាពកាប់​ទន្ទ្រានដីព្រៃក្នុងតំបន់ការពារធម្មជាតិ appeared first on Kampuchea Thmey Daily.

ការរកឃើញតំបន់ការពារធម្មជាតិ ២៧កន្លែងនេះ ត្រូវបានបង្ហាញនៅក្នុងពិធី “ផ្សព្វផ្សាយផែនទីកំណត់ទីតាំងបេតិកភណ្ឌវប្បធម៌ដែលស្ថិតក្នុងតំបន់ការពារធម្មជាតិ” នៅថ្ងៃនេះ នាទីស្តីការក្រសួងបរិស្ថាន ក្រោមអធិបតីភាព បណ្ឌិតសភាចារ្យ ភឿង សក្ខណា រដ្ឋមន្រ្តី ក្រសួងវប្បធម៌ និងសិល្បៈ និង លោក សាយ សំអាល់ រដ្ឋមន្រ្តី ក្រសួង បរិស្ថាន។

លោក សេង សោត អគ្គនាយករង នៃអគ្គនាយកដ្ឋានតំបន់ការពារធម្មជាតិ បានមានប្រសាសន៍ថា សមិទ្ធិផលដ៏ត្រចះត្រចង់ និងមានសារប្រយោជន៍ដល់សង្គមជាតិដល់ការថែរក្សាការពារ និងអភិរក្សធនធានធម្មជាតិ និងមរតកវប្បធម៌ឱ្យបានគង់វង្ស អាចលេចចេញជារូបរាងបាននាពេលនេះ ដោយសារតែគំនិតផ្តួចផ្តើម ប្រកបដោយចក្ខុវិស័យវែងឆ្ងាយ និងការណែនាំរបស់ រដ្ឋមន្ត្រី សាយ សំអាល់ និងមានកិច្ចសហការល្អពីក្រុមការងារ នៃក្រសួងវប្បធម៌ និងវិចិត្រសិល្បៈ ដែលបានធ្វើការយ៉ាងជិតស្និតជាមួយគ្នា ប្រកបដោយស្មារតីទទួលខុសត្រូវ និងតម្កល់ផលប្រយោជន៍ជាតិជាធំ។

លោក សេង សោត មានប្រសាសន៍បន្តថា ជាលទ្ធផល នៅក្នុងចំណោមតំបន់ការពារធម្មជាតិទាំង ៧៣កន្លែង ក្រុមការងារបានរកឃើញតំបន់ការពារធម្មជាតិចំនួន ២៧កន្លែង ដែលមានទីតាំងបេតិកភណ្ឌវប្បធម៌ ដោយមិនរាប់បញ្ចូលតំបន់ការពារទេសភាពអង្គរ តំបន់ការពារទេសភាពព្រះវិហារ និងតំបន់ការពារទេសភាពសម្បូរព្រៃគុក ដែលមានព្រះរាជក្រឹត្យ និងមានអង្គភាពគ្រប់គ្រងដោយឡែករួចទៅហើយ។ សំខាន់ជាងនេះទៅទៀត ក្រុមការងារបានរកឃើញទីតាំងបេតិកភណ្ឌវប្បធម៌ នៅតាមតំបន់ការពារធម្មជាតិមួយចំនួន ដូចបានគោរពជម្រាបជូនខាងលើមានចំនួនកើនឡើង បើប្រៀបធៀបជាមួយទិន្នន័យដែលបានស្រាវជ្រាវ និងធ្វើការផ្សព្វផ្សាយកន្លងមក ដោយសាលាបារាំងចុងបូព៌ា។ ជាក់ស្តែងក្រុមការងារបានរកឃើញទីតាំងបេតិកភណ្ឌវប្បធម៌ ដែលមានក្នុង ឧទ្យានជាតិព្រះជ័យវរ្ម័ន-នរោត្តម “ភ្នំគូលែន” មានចំនួនរហូតដល់ទៅ ១ ០៦៩កន្លែង។

បណ្ឌិតសភាចារ្យ ភឿង សក្ខណា បានថ្លែងអំណរគុណ និងកោតសរសើរចំពោះកិច្ចខិតខំប្រឹងប្រែងរបស់ក្រុមការងារក្រសួងទាំង២ ក្នុងការចូលរួមថែរក្សា ការពារ និងអភិរក្សតំបន់បេតិកភណ្ឌវប្បធម៌ ដែលមានទីតាំងស្ថិតក្នុងតំបន់ការពារធម្មជាតិ និងជាតឹកតាងប្រវត្តិសាស្រ្ត អរិយធម៌ វប្បធម៌ ប្រពៃណីទំនៀមទំលាប់សាសនា និងព្រលឹងដូនតាបុព្វបុរសខ្មែរ តាំងពីសម័យបុរេប្រវត្តិមកម្ល៉េះ។

គួរបញ្ជាក់ថា នៅអាណត្តិទី១ នៃព្រះរាជាណាចក្រកម្ពុជាទី២ រាជរដ្ឋាភិបាលបានបង្កើតតំបន់ការពារធម្មជាតិចំនួន ២៣កន្លែង តាមព្រះរាជក្រឹត្យ ចុះថ្ងៃទី១ ខែវិច្ឆិកា ឆ្នាំ១៩៩៣។ ប៉ុន្តែ នេះមិនមែនមានន័យថា ព្រះរាជាណាចក្រកម្ពុជាទើបចាប់ផ្តើមបង្កើតតំបន់ការពារធម្មជាតិនោះទេ។ ជាអាទិ តំបន់អង្គរ ធ្លាប់មានងារជាឧទ្យានជាតិតាំងពីឆ្នាំ១៩២៥ មកម៉្លេះ ដែលជាតំបន់ការពារធម្មជាតិទី១ នៅកម្ពុជា ហើយក៏ជាតំបន់ការពារធម្មជាតិទី១ នៅអាស៊ីអគ្នេយ៍៕

The post រកឃើញតំបន់ការពារធម្មជាតិ ២៧កន្លែង មានទីតាំងបេតិកភណ្ឌវប្បធម៌ appeared first on Kampuchea Thmey Daily.

តើបច្ចុប្បន្ននេះ កម្ពុជាមានតំបន់ការពារធនធានធម្មជាតិប៉ុន្មានកន្លែង​ទូទាំង​ប្រទេស?

បើ​តាម​ឯកសារ​ក្រសួងបរិស្ថាន រហូតមកដល់ឆ្នាំ២០២១ នេះ កម្ពុជា​មាន​តំបន់​ការពារ​ធនធាន​ធម្មជាតិចំនួន ៧៣ កន្លែង។ តំបន់ការពារធនធានធម្មជាតិចំនួនទាំង​ ៧៣ កន្លែង​នេះ​ ស្ថិតនៅក្នុងប្រភេទតំបន់ការពារធំៗចំនួន ៨ ផ្សេងគ្នា។

ទី១៖ តំបន់ឧទ្យានជាតិ

តំបន់ឧទ្យានជាតិនេះមានចំនួន ១១ តំបន់៖

-ឧទ្យានជាតិកែប
-ឧទ្យានជាតិ​ព្រះមុនីវង្ស «បូកគោ»
-ឧទ្យានជាតិ​ព្រះសុរាម្រិត-កុសមៈ «គិរីរម្យ»
-ឧទ្យានជាតិ​សីហនុ-រាម
-ឧទ្យានជាតិ​បុទុមសាគរ
-ឧទ្យានជាតិ​ព្រះជ័យវរ្ម័ន-នរោត្តម «ភ្នំគូលែន»
-ឧទ្យានជាតិវីរជ័យ
-ឧទ្យានជាតិវើនសៃ-សៀមប៉ាង
-ឧទ្យានជាតិអូរយ៉ាដាវ
-ឧទ្យានជាតិជួរភ្នំក្រវាញកណ្តាល និងឧទ្យានជាតិជួរភ្នំក្រវាញខាងត្បូង

តំបន់ឧទ្យានជាតិ សម្បូរទៅដោយសត្វព្រៃកម្រជាច្រើនប្រភេទ និងព្រៃស្រោង ព្រៃរបោះ និងជាតំបន់ទាក់ទាញភ្ញៀវទេសចរឱ្យចូលទស្សនា។

ទី២៖ តំបន់ដែនជម្រកសត្វព្រៃ

តំបន់ដែនជម្រកសត្វព្រៃនេះត្រូវបែងចែកជា ១៩ តំបន់ផ្សេងគ្នា៖

-ដែនជម្រកសត្វព្រៃឱរ៉ាល់
-ដែនជម្រកសត្វព្រៃពាមក្រសោប
-ដែនជម្រកសត្វព្រៃភ្នំសំកុស
-ដែនជម្រកសត្វព្រៃគូលែន-ព្រហ្មទេព
-ដែនជម្រកសត្វព្រៃបឹងពែរ
-ដែនជម្រកសត្វព្រៃលំផាត់
-ដែនជម្រកសត្វព្រៃភ្នំព្រេច
-ដែនជម្រកសត្វព្រៃភ្នំណាមលៀរ
-ដែនជម្រកសត្វព្រៃព្រៃឡង់
-ដែនជម្រកសត្វព្រៃព្រះរកា
-ដែនជម្រកសត្វព្រៃឆែប
-ដែនជម្រកសត្វព្រៃតាតៃ
-ដែនជម្រកសត្វព្រៃកែវសីមា
-ដែនជម្រកសត្វព្រៃស្រែពក
-ដែនជម្រកសត្វព្រៃភ្នំត្នោត-ភ្នំពក
-ដែនជម្រកសត្វព្រៃសង្ឃរុក្ខវ័ន្ត
-ដែនជម្រកសត្វព្រៃព្រែកប្រសព្វ
-ដែនជម្រកសត្វព្រៃសំបូរ
-ដែនជម្រកសត្វព្រៃសៀមប៉ាង។

តំបន់​ដែនជម្រក​សត្វព្រៃ​ សម្បូរទៅដោយប្រភេទសត្វព្រៃជិតផុតពូជ សត្វព្រៃកម្រ សត្វព្រៃ​រង​ការ​គំរាមកំហែង ពពួក​មច្ឆាជាតិ​ជិតផុត​ពូជ និង​កម្រ ព្រមទាំងជា​ជម្រកសត្វព្រៃនិង​ជីវចម្រុះ​ជាច្រើន​ប្រភេទ ពិសេស​សម្បូរទៅដោយ​ធនធានធម្មជាតិ ព្រៃស្រោង និង​ព្រៃរបោះជាដើម។

ទី៣៖ តំបន់ទេសភាព

តំបន់ទេសភាពនេះ​ត្រូវបែងចែកជា ១៣ តំបន់៖

-តំបន់រមណីយដ្ឋានអង្គរ
-តំបន់បន្ទាយឆ្មារ
-តំបន់ព្រះវិហារ
-តំបន់អង្លង់ព្រីង
-តំបន់ទំនាបខាងជើងទន្លេសាប
-តំបន់បឹងព្រែកល្ពៅ
-តំបន់អាងត្រពាំងថ្ម
-តំបន់ប្រាសាទបាកាន «ព្រះខ័នកំពង់ស្វាយ»
-តំបន់រនាមដូនសំ
-តំបន់សំបូរព្រៃគុក
-តំបន់បឹងលំកុដ
-តំបន់ភ្នំក្រាំងដីមាស
-តំបន់បឹងយ៉ាកអោម-យ៉ាកការ៉ា។

សម្រាប់តំបន់ទេសភាពនេះ គឺសម្បូរទៅដោយប្រាង្គប្រាសាទបុរាណ សម្បត្តិបេតិកភណ្ឌវប្បធម៌ ព្រៃឈើ និងធនធានធម្មជាតិជាច្រើនទៀត។

ទី៤៖ តំបន់ប្រើប្រាស់ច្រើនយ៉ាង

តំបន់ប្រើប្រាស់ច្រើនយ៉ាងបែងចែកជា ៨ តំបន់៖

-តំបន់ដងព្រែក
-តំបន់សំឡូត
-តំបន់ទន្លេសាប
-តំបន់ពញាក្រែក
-តំបន់ព្រែកទឹកសាបក្បាលឆាយ
-តំបន់ភ្នំនាងកង្រី-ភ្នំទូកមាស
-តំបន់សសរស្តម្ភសត្វតោ
-តំបន់បឹងយក្ខឡោម។

ទី៥៖ តំបន់រ៉ាមសារ

តំបន់រ៉ាមសារចែកជា ៥ តំបន់៖

-តំបន់ស្ទឹងត្រែង
-តំបន់កោះកាពិ
-បឹងទន្លេឆ្មារ
-តំបន់ព្រែកទាល់
-តំបន់ស្ទឹងសែន។

ទី៦៖ តំបន់ស្នូលនៃបឋនីយជីវមណ្ឌល

តំបន់ស្នូលនៃបឋនីយជីវមណ្ឌល​បែងចែកជា ៣ តំបន់​ផ្សេងគ្នា​៖

-តំបន់ព្រែកទាល់
-តំបន់ស្ទឹងសែន
-តំបន់បឹងទន្លេឆ្មារ។

ទី៧៖ តំបន់បេតិកភណ្ឌធម្មជាតិ

តំបន់បេតិកភណ្ឌធម្មជាតិបែងចែកជា ១១ តំបន់៖

-តំបន់ភ្នំត្បែង
-តំបន់ភ្នំយ៉ាត
-តំបន់ភ្នំប្រាំពីរ
-តំបន់ជញ្ជាំង
-តំបន់គិរីយង់
-តំបន់ភ្នំទាក់ទ្រាំង
-តំបន់ភ្នំព្រះនេត្រព្រះ
-តំបន់ភ្នំព្រះ-ភ្នំវែង
-តំបន់ភ្នំយាយសំ
-តំបន់ភ្នំបាក់
-តំបន់ភ្នំស្វាយ។

ទី៨៖ តំបន់ឧទ្យានសមុទ្រកោះរ៉ុង

តំបន់ឧទ្យានសមុទ្រកោះរ៉ុងដែល​រួម​បញ្ចូល កោះរ៉ុង កោះរ៉ុងសន្លឹម កូនកូន កោះតូច កោះតាទៀម កោះម្នាស់ក្រៅ កោះម្នាស់ក្នុងនិង​សមុទ្រ​ជុំវិញស្ថិតនៅក្នុងភូមិសាស្រ្ត​ខេត្តព្រះសីហនុនិងខេត្តកោះកុង។

ក្រៅពីនេះក៏នៅមានតំបន់អភិរក្សទឹកសាបបឹងព្រែកទប់ដែលមានផ្ទៃដីសរុប ១,៦៣០ ហិកតា និងរបៀងអភិរក្សជីវចម្រុះដែលមានផ្ទៃដីសរុប ១៤២,៧៩៤០ ហិកតា។

ការបង្កើតឱ្យមានតំបន់ការពារទាំងអស់នេះរបស់រាជរដ្ឋាភិបាល គឺក្នុង​គោលបំណង​កែប្រែ​តំបន់​នានា​ឱ្យ​ក្លាយ​ទៅជា​តំបន់​បេតិកភណ្ឌធម្មជាតិ​ភ្នំ លើក​ស្ទួយ​តម្លៃទៅលើ​ប្រវត្តិសាស្ត្រ វប្បធម៌ ការ​អភិរក្ស ជីវចម្រុះ លើក​ស្ទួយជីវភាព​ប្រជាពលរដ្ឋ និងវិស័យទេសចរណ៍នៅតំបន់​ទាំងនោះ។

ថ្មីៗនេះ​រដ្ឋាភិបាល​បានចេញអនុក្រឹត្យកែប្រែ​ទំហំផ្ទៃដី​​ឧទ្យានជាតិមួយ​ចំនួន​ដូចជាឧទ្យានជាតិ​ព្រះមុនីវង្ស «បូកគោ» ដែនជម្រក​សត្វព្រៃតាតៃ ដែនជម្រកសត្វព្រៃកែវសីមា និង​ការ​បង្កើត​ឧទ្យានជាតិជួរ​ភ្នំក្រវាញដែលបានមកពីការកាត់បញ្ចូល​ឧទ្យានជាតិជួរ​​ភ្នំក្រវាញខាងត្បូង ឧទ្យានជាតិ​ជួរភ្នំក្រវាញកណ្តាល​ និងផ្នែក​ខ្លះនៃ​របៀងអភិរក្សជីវចម្រុះជួរភ្នំក្រវាញ៕

The post ​ស្វែងយល់! តំបន់ការពារធនធានធម្មជាតិ​​នៅកម្ពុជា​​មាន ៧៣ កន្លែង ចែកជា ៨ តំបន់​ផ្សេង​​គ្នា appeared first on Kampuchea Thmey Daily.