ថ្មីៗនេះ កម្មវិធីជាតិផ្តល់ថ្នាំបង្ការ នៃមជ្ឈមណ្ឌលជាតិគាំពារមាតា និងទារក សហការជាមួយអង្គការ WHO UNICEF CHAI បានធ្វើយុទ្ធនាការផ្តល់បន្ថែមថ្នាំបង្ការជំងឺគ្រុនស្វិតដៃជើង នៅរាជធានីខេត្ត ចំនួន៨ រួមមាន រាជធានីភ្នំពេញ ខេត្តកណ្តាល ព្រះវិហារ បន្ទាយមានជ័យ ឧត្តរមានជ័យ មណ្ឌលគិរី រតនគិរី និងខេត្តស្ទឹងត្រែង។

ដូច្នេះឳពុកម្តាយ/អាណាព្យាបាល អាចនាំកុមារដែលមានអាយុក្រោម ៥ឆ្នាំទាំងអស់ ទៅទទួលថ្នាំបង្ការជំងឺគ្រុនស្វិតដៃជើងដូសបន្ថែម លើកទី២ ដោយឥតគិតថ្លៃ ចាប់ពីថ្ងៃទី៤-១៤ ខែឧសភា ឆ្នាំ២០២៦។ បើទោះបីកុមារធ្លាប់បានទទួលគ្រប់ចំនួន មិនទាន់គ្រប់ចំនួន មិនធ្លាប់បានទទួលទាល់តែសោះ ឬទើបនឹងទទួលរួចថ្មីៗនេះក៏ដោយ ក៏អាចទៅទទួលថ្នាំបង្ការជំងឺគ្រុនស្វិតដៃជើងដូសបន្ថែមនេះបានដែរ។

គួរជម្រាបដែរថា កម្មវិធីផ្តល់ថ្នាំបង្ការនេះ អនុវត្តចំនួន ២លើក លើកទី១ ចាប់ពីថ្ងៃទី៣០ ខែមីនា ដល់ថ្ងៃទី១០ ខែមេសា ឆ្នាំ២០២៦ និងលើកទី២ ចាប់ពីថ្ងៃទី៤ ដល់ថ្ងៃទី១៤ ខែឧសភា ឆ្នាំ២០២៦។

បើតាមអង្គការយូនីសេហ្វ យុទ្ធនាការផ្តល់បន្ថែមថ្នាំបង្ការជំងឺគ្រុនស្វិតដៃជើង ឆ្នាំ២០២៦ លើកទី១ បានបញ្ចប់ដោយជោគជ័យ ក្នុងនោះកុមារអាយុក្រោម ៥ឆ្នាំ សរុបចំនួន ៥៦៦ ៧១៣ នាក់ បានទទួលថ្នាំបង្ការជំងឺគ្រុនស្វិតដៃជើងដោយឥតគិតថ្លៃ ដែលលទ្ធផលនេះបានលើសពីផែនការគ្រោងទុក នៅទូទាំងរាជធានី-ខេត្តគោលដៅទាំង៨៕

The post កុមារអាយុក្រោម ៥ឆ្នាំ អាចទៅទទួលថ្នាំបង្ការជំងឺគ្រុនស្វិតដៃជើងដូសបន្ថែមលើកទី២ ចាប់ពីថ្ងៃទី៤-១៤ ខែឧសភា appeared first on Kampuchea Thmey Daily.

បើតាមអង្គការយូនីសេហ្វ ទោះបីកុមារធ្លាប់បានទទួលគ្រប់ចំនួន ឬមិនទាន់គ្រប់ចំនួន ឬមិនធ្លាប់បានទទួលថ្នាំបង្ការ ឬទើបនឹងទទួលរួចថ្មីៗនេះមកហើយក៏ដោយ ក៏ត្រូវទៅទទួលថ្នាំបង្ការជំងឺគ្រុនស្វិតដៃជើង ដូសបន្ថែមឱ្យបាន ២ដងបន្ថែមទៀត។ ការផ្តល់ជូននេះ ធ្វើឡើងនៅ ៨រាជធានី ខេត្ត រួមមាន ខេត្តព្រះវិហារ ស្ទឹងត្រែង រតនគិរី មណ្ឌលគិរី ឧត្តរមានជ័យ បន្ទាយមានជ័យ កណ្តាល និងរាជធានីភ្នំពេញ នៅតាមទីតាំងដែលមានចងបដាសម្គាល់នៅក្នុងភូមិ សាលារៀន ឬមណ្ឌលសុខភាព។

ចំពោះកាលបរិច្ឆេទ លើកទី១ ចាប់ពីថ្ងៃទី៣០ ខែមីនា ដល់ថ្ងៃទី១០ខែមេសា ឆ្នាំ២០២៦ និងលើកទី ចាប់ពីថ្ងៃទី០៤ ដល់ថ្ងៃទី១៤ខែឧសភា ឆ្នាំ២០២៦។ សម្រាប់ព័ត៌មានបន្ថែម សូមសាកសួរ ប្រធានភូមិ ក្រុមទ្រទ្រង់សុខភាពភូមិ ឬបុគ្គលិកមណ្ឌលសុខភាព ដែលនៅជិតលោកអ្នកបំផុត។

យុទ្ធនាការនេះ រៀបចំដោយកម្មវិធីជាតិផ្តល់ថ្នាំបង្ការនៃមជ្ឈមណ្ឌលជាតិគាំពារមាតានិងទារក នៃ ក្រសួងសុខាភិបាលនៃព្រះរាជាណាចក្រកម្ពុជា គាំទ្រដោយ Global Polio Eradication Initiative Gavi, the Vaccine Alliance World Health Organization (WHO) Clinton Health Access Initiative និងយូនីសេហ្វ៕

The post កុមារអាយុក្រោម ៥ឆ្នាំ អាចទៅទទួលថ្នាំបង្ការជំងឺគ្រុនស្វិតដៃជើង ដូសបន្ថែម ២ដងទៀត ដោយឥតគិតថ្លៃ appeared first on Kampuchea Thmey Daily.

តាមការផ្សាយរបស់ VN Express កាលពីថ្ងៃអាទិត្យទី១៩ខែតុលាឆ្នាំ២០២៥, វ៉ាកសាំង Lenacapavir ដែលឆ្លងកាត់ការធ្វើតេស្តបង្ហាញប្រសិទ្ធភាពប្រឆាំងជំងឺអេដស៍សឹងតែ១០០%នោះ នឹងដាក់ឲ្យប្រើដំបូងគេនៅប្រទេសស៊ីមបាវ៉េ រួចបន្តចាក់នៅបុតស្វាណា អេស្វាទីនី កេនយ៉ា ឡេសូតូ នីហ្សេរីយ៉ា អាហ្វ្រិកខាងត្បូង តង់ហ្សានី អ៊ូហ្គង់ដា និងសំប៊ី។

ទន្ទឹមនោះដែរ ស្ថានទូតអាមេរិកប្រចាំនៅទីក្រុង ហារ៉ារ៉េ បានបង្ហោះសារលើបណ្តាញសង្គម X ថា «យើងរីករាយដែលសូមប្រកាសថា ប្រទេសស៊ីមបាវ៉េត្រូវបានជ្រើសរើស។ នេះគឺជាការអភិវឌ្ឍដ៏ប្លែកថ្មីមួយក្នុងសមរភូមិប្រយុទ្ធប្រឆាំងនឹងមេរោគ HIV»។

បើយោងតាមកម្មវិធីរួមរបស់អង្គការសហប្រជាជាតិស្តីពីមេរោគ HIV/ជំងឺអេដស៍ (UNAIDS), ស៊ីមបាវ៉េ បច្ចុប្បន្នមានអ្នកកើតជំងឺអេដស៍ ១.៣លាននាក់។ ទោះយ៉ាងណា អ្នកជំនាញផ្នែកសុខភាពសាធារណៈ UN និយាយថា ប្រទេសនេះមានហេដ្ឋារចនាសម្ព័ន្ធឆ្លើយតបនឹងមេរោគអេដស៍ខ្លាំងក្លា ជាពិសេសថ្មីៗ ប្រទេសនេះសម្រេចបានគោលដៅ UNAIDS 95-95-95 មានន័យថា ៩៥% នៃអ្នកជំងឺអេដស៍បានដឹងពីស្ថានភាពរបស់ពួកគេ។

សូមជម្រាបជាថ្មី ថ្នាំបង្ការ Lenacapavir ​ផលិត​​​ឡើង​ដោយ​ក្រុមហ៊ុន​​​ឱសថ​សហរដ្ឋ​អាមេរិក Gilead។ វាជាថ្នាំបង្ការ HIV ចាក់មួយឆ្នាំ២ដងដំបូងគេលើពិភពលោក។

នៅ​ក្នុង​ការ​ពិសោធន៍​កន្លង​ទៅ អ្នកវិទ្យាសាស្រ្តបា​ន​រក​ឃើញ​ថា Lenacapavir មាន​ប្រសិទ្ធភាពសឹងតែ​១០០% បង្ការ​ការ​ឆ្លង​មេរោគ​អេដស៍ បន្ទាប់​ពី​​សាកល្បង​ពិសោធន៍​លើ​ស្ត្រី​​​ជាង ៥​ពាន់​នាក់​នៅ​អាហ្វ្រិក​ខាង​ត្បូង។

យោងតាមទិន្នន័យរបស់អង្គការសុខភាពពិភពលោក (WHO), ជំងឺអេដស៍បានសម្លាប់មនុស្ស ៤៤លាននាក់ ហើយនៅតែឆ្លង ១.៣លាននាក់ជារៀងរាល់ឆ្នាំ។ យ៉ាងណាអ្នកជំនាញ រួមទាំងវេជ្ជបណ្ឌិត និងសកម្មជននានា បានដាក់ក្តីសង្ឃឹមយ៉ាងមុតមាំថា វ៉ាក់សាំងនេះអាចជាអាវុធដ៏មុតស្រួចក្នុងការប្រយុទ្ធប្រឆាំងជំងឺអេដស៍៕

អត្ថបទ៖ សុខ សុវណ្ណ 

ចុចអាន៖ ដំណឹងល្អ! វ៉ាក់សាំងជំងឺអេដស៍តម្លៃ៤០ដុល្លារ នឹងដាក់លក់លើទីផ្សារនៅឆ្នាំ២០២៧

The post ថ្នាំបង្ការជំងឺអេដស៍មានប្រសិទ្ធភាពសឹង១០០% ​នឹងដាក់ឲ្យប្រើនៅ​១០ប្រទេស ចាប់ពីដើមឆ្នាំក្រោយ appeared first on Kampuchea Thmey Daily.

ថ្លែងក្នុងឱកាសនោះ លោកស្រី យក់ សម្បត្តិ បានបញ្ជាក់ថា កម្ពុជាជាប្រទេសដំបូងគេក្នុងតំបន់ ដែលបានដាក់ឱ្យប្រើប្រាស់ CAB-PrEP ដែលជាវិធីសាស្ត្រមួយ នៃយុទ្ធសាសាស្ត្របង្ការមេរោគអេដស៍។ លោកស្រីបានបន្ថែមថា CAB-PrEP ត្រូវចាក់រៀងរាល់ ២ខែម្តង ដែលផ្តល់នូវជម្រើសងាយស្រួល មានឯកជនភាព បន្ថែមពីលើ PrEP លេប ហើយមានប្រសិទ្ធិភាពខ្ពស់រហូតដល់៩៥% ក្នុងការបង្ការមេរោគអេដស៍។

«ក្នុងជំហានដំបូង ក្រសួងសុខាភិបាលនឹងដាក់ឱ្យប្រើប្រាស់ថ្នាំ CAB-PrEP នៅរាជធានីភ្នំពេញ ដែលមាននៅគ្លីនិកជាតិព្យាបាលជំងឺអេដស៍ សើស្បែក និងកាមរោគ ( ART-1 and ART-2), គ្លីនិកជាតិទីតាំងទី២ នៅទួលគោក (NCHADS-AHF ART-3 គឺមណ្ឌលសុខភាពទួលគោក និងសមាគមឈូកស (គ្លីនិកឈូកស)។ នេះបើតាមការគូសបញ្ជាក់របស់លោកស្រី យក់ សម្បត្តិ។

សូមបញ្ជាក់ថា ថ្នាំ​ប្រឹព​ប្រភេទ​ចាក់​នេះ​ អាច​ការពារ​មេរោគ​អេដស៍​បាន​រយៈពេល ​២​ខែ ខណៈ​បច្ចុប្បន្ន​ កម្ពុជាមាន​ថ្នាំ​ប្រឹព​សម្រាប់​លេប​ប្រចាំថ្ងៃ​មុនពេល​រួមភេទ និង​ថ្នាំ​ប្រឹពសម្រាប់​លេប​ក្រោយពេល​នឹង​គ្រោះថ្នាក់​ឆ្លង​មេរោគ​អេដស៍ ដូចជា នៅ​ពេល​រួមភេទ​ដោយ​មិន​មាន​សុវត្ថិភាព ស្រោមអនាម័យ​ដាច់​រហែក ភ្លេច​ពាក់​ស្រោមអនាម័យ និង​មុត​សម្ភារៈ​មុត​ស្រួច​ជាដើម។

បើតាមលោក​វេជ្ជបណ្ឌិត អ៊ុក វិជ្ជា ប្រធាន​មជ្ឈមណ្ឌល​ជាតិ​ប្រយុទ្ធ​នឹង​ជំងឺ​អេដស៍​សើ​ស្បែក និង​កាមរោគ នៃ​ក្រសួងសុខាភិបាល បានឱ្យដឹងថា ថ្នាំ​ប្រឹព​ប្រភេទ​កាបូ​តេ​ត្រា​វៀ​នេះ គឺចាក់​នៅ​ត្រគាក និង​សាច់ដុំ​ ហើយ​មិន​មាន​ផល​ប៉ះពាល់​ដល់​អ្នក​ចាក់​ទេ និង​អាច​បង្ការ​បាន​តែ​ជំងឺ​អេដស៍​ប៉ុណ្ណោះ ​មិន​អាច​ការពារ​ការ​ឆ្លង​ជំងឺ​ស្វាយ ជំងឺ​ប្រមេះ និង​ជំងឺ​កាមរោគ​ផ្សេងទៀត​បានទេ គឺ​មានតែ​ការប្រើប្រាស់​ស្រោមអនាម័យ​ឱ្យ​បាន​ត្រឹមត្រូវ និង​ជាប់​លាប់​តែប៉ុណ្ណោះ ​ដែល​អាច​បង្ការ​ការ​ឆ្លង​មេរោគ​អេដស៍ និងជងឺ​កាមរោគ​គ្រប់​ប្រភេទ​បាន។

តាម​ការ​ប៉ាន់ស្មាន​ឆ្នាំ ២០២៤ កម្ពុជា មាន​ចំនួន​អ្នក​រស់នៅ​ជាមួយ​មេរោគ​អេដស៍​ប្រមាណ ៧៦ ០០០ នាក់ ក្នុងនោះ ​មាន​អ្នកជំងឺ​អេដស៍​សកម្ម​ដែល​កំពុង​ទទួល​សេវា​ព្យាបាល​ដោយ​ឱសថ​ប្រឆាំង​មេរោគ​អេដស៍​ទាំង ៧៤ កន្លែង ជិត ​៧​ ម៉ឺន​នាក់ ហើយ​ប្រហែល​នៅសល់​អ្នក​រស់នៅ​ជាមួយ​មេរោគ​អេដស៍ ៦ ០០០ នាក់ ទៅ ៧ ០០០ នាក់ ​នៅ​មិនទាន់​បាន​ដឹង​ខ្លួន និង​មិន​ទាន់​បាន​ធ្វើតេស្ត និង​ទទួល​សេវា​ព្យាបាល​នៅឡើយ​ទេ ខណៈ​ក្នុង ១ ឆ្នាំៗ​ មាន​អ្នក​ឆ្លង​ថ្មី​ នៃ​មេរោគ​អេដស៍ ប្រមាណ ១ ២០០ នាក់​ និង​ស្លាប់​ប្រមាណ ១ ១០០ នាក់៕

The post ឱសថបង្ការមេរោគអេដស៍ថ្មី ប្រសិទ្ធភាពខ្ពស់ដល់ ៩៥% ដាក់ឱ្យប្រើប្រាស់ជាផ្លូវការមុនគេ នៅរាជធានីភ្នំពេញ appeared first on Kampuchea Thmey Daily.

ការណែនាំនេះ ធ្វើឡើងក្នុង​​ឱកាស លោករដ្ឋមន្ត្រី អញ្ជើញចុះពិនិត្យការផ្តល់សេវាចាក់ថ្នាំបង្ការ នៅមជ្ឈមណ្ឌលជាតិគាំពារមាតា និងទារក និងសំណេះសំណាលជាមួយបុគ្គលិក មន្ត្រីរាជការនៃកម្មវិធីជាតិផ្តល់ថ្នាំបង្ការ ក្នុងគោលបំណងដើម្បីពិនិត្យវឌ្ឍនភាព និងលើកទិសដៅការងារបន្ត ក្នុងការសម្រេចឱ្យបានអត្រាគ្របដណ្តប់នៃការផ្តល់ថ្នាំបង្ការទាំង១៣មុខ របស់កម្មវិធីជាតិផ្តល់ថ្នាំបង្ការ នៅទូទាំងប្រទេស នាថ្ងៃទី២ ខែកញ្ញា ឆ្នាំ២០២៤។

ក្នុងឱកាសនោះ លោករដ្ឋមន្ត្រី បានបញ្ជាក់ថា ដើម្បីជួយដល់សុខភាពស្ត្រី ទារក កុមារ និងប្រជាពលរដ្ឋគ្រប់រូប គោលដៅចម្បងរបស់កម្មវិធីផ្តល់ថ្នាំបង្ការគឺ ធ្វើឱ្យសម្រេចបាននូវអត្រាគ្របដណ្តប់ថ្នាំបង្ការទាំង ១២មុខ ប្រមាណ១០០% តាមរយៈការបង្កើនការផ្តល់ថ្នាំបង្ការនៅនឹងមន្ទីរពេទ្យ មណ្ឌលសុខភាព ដោយបង្កើនការចុះតាមដានស្រាវជ្រាវរក និងផ្តល់ថ្នាំបង្ការដល់ទារក និងកុមារដែលមិនទាន់បានទទួល គ្រប់ទីកន្លែង ពិសេសនៅតំបន់ដាច់ស្រយាល។

បន្ថែមពីនេះ លោកបានផ្តាំផ្ញើដល់មន្ត្រីរាជការនៃកម្មវិធីជាតិផ្តល់ថ្នាំបង្ការ ត្រូវរៀបចំស្នូលនៃចក្ខុវិស័យសម្រាប់ការបង្ការជំងឺទាំង ១២មុខ ដោយផ្អែកលើចំណេះ ជំនាញ គុណតម្លៃពីថ្នាក់ជាតិ រហូតដល់មូលដ្ឋានភូមិ ឃុំ។ ព្រមទាំងបង្កើនការអប់រំសុខភាពជូនប្រជាពលរដ្ឋ ដោយពន្យល់អំពីផលប្រយោជន៍នៃការផ្តល់ថ្នាំបង្ការជំងឺទាំង ១២មុខ និងផលវិបាកនៃការឆ្លងជំងឺ ពិការភាព ឬស្លាប់ក្នុងករណីដែលមិនព្រមទទួលថ្នាំបង្ការ និងរៀបចំផែនការឆ្នាំ ផែនការរំកិល ៣ឆ្នាំ ទិសដៅនាពេលអនាគតសម្រាប់ការផ្តល់ថ្នាំបង្ការ និងផែនការពង្រីកការផ្តល់ថ្នាំបង្ការជំងឺផ្សេងៗបន្ថែមទៀត។ លើសពីនេះ ត្រូវពង្រឹងកិច្ចសហការលើកទឹកចិត្តមន្ត្រី បុគ្គលិកសុខាភិបាល ជាមួយអាជ្ញាធរមូលដ្ឋាន ភូមិ ឃុំ ក្នុងបង្កើនការផ្សព្វផ្សាយអំពីសារៈសំខាន់នៃការចាក់ថ្នាំបង្ការជំងឺ។

ជាមួយគ្នានេះដែរ លោករដ្ឋមន្រ្តី បានកោតសរសើរ ចំពោះលទ្ធផលដែលសម្រេចបានតាមរយៈការខិតខំប្រឹងប្រែងរបស់មន្រ្តីកម្មវិធីជាតិ ក្នុងការផ្តល់ការគាំទ្រ ណែនាំ និងអភិបាលដល់មន្ត្រីថ្នាក់ក្រោមជាតិទាំង ២៥ខេត្ត រាជធានី រហូតសម្រេចបានជោគជ័យគួរជាទីមោទនៈ។ ក្នុងនោះ លើសពីការបំបាត់បានជំងឺកាចសាហាវ និងផ្តល់ពិការភាព ដូចជាជំងឺស្វិតដៃជើង ជំងឺកញ្ជ្រិល ជំងឺតេតាណូស របេង ជាដើម ក៏នៅមានជំងឺជាច្រើនត្រូវបានកាត់បន្ថយមកអប្បរិមា មានជំងឺរលាកថ្លើមបេ រលាកសួត រលាកខួរក្បាល និងស្រោមខួរ។ល។

ទន្ទឹមនេះ លោកក៏បានអរគុណដល់បុគ្គលិកនៃកម្មវិធីផ្តល់ថ្នាំបង្ការទាំងអស់ និងប្រាប់ឱ្យមានស្មារតីរួបរួមគ្នា ចេះជួយគ្នា សាមគ្គីភាពភាព គោរពវិន័យការងារ ដើម្បីជាប្រយោជន៍រួមធានា ក្នុងការបម្រើសេវាជូនដល់ប្រជាពលរដ្ឋ ប្រកបដោយគុណភាព សុវត្ថិភាព ប្រសិទ្ធភាព ស័ក្តិសិទ្ធភាព និងសមធម៌ ដើម្បីឈានទៅសម្រេចបាននូវការគ្របដណ្តប់សុខភាពជាសកល៕

The post រដ្ឋមន្ត្រីសុខាភិបាល ប្រាប់មន្ត្រីរាជការនៃកម្មវិធីជាតិផ្តល់ថ្នាំបង្ការ អនុវត្តការងារឱ្យមានគុណភាព និងគ្រប់ទីកន្លែង appeared first on Kampuchea Thmey Daily.

លោក​វេជ្ជបណ្ឌិត អ៊ុក ​វិជ្ជា ប្រធាន​មជ្ឈមណ្ឌល​ជាតិ​ប្រយុទ្ធ​នឹង​ជំងឺអេដស៍​សើស្បែក​ និង​កាមរោគ​នៃ​ក្រសួងសុខាភិបាល​បាន​ឱ្យដឹង​នៅ​ព្រឹកថ្ងៃទី​១១ ខែសីហាថា ​តាមគម្រោងនឹងដាក់ឱ្យប្រើប្រាស់ថ្នាំចាក់បង្ការមេរោគអេដស៍ដោយឥតគិតថ្លៃនៅចុងឆ្នាំ២០២៤ខាងមុខនេះហើយ បន្ទាប់ពីបានស្នើសុំមុនគេទៅមូលនិធិសាកល។

លោកបន្តថា ថ្នាំចាក់នេះអាចការពារមេរោគអេដស៍បានរយៈពេល២ខែ ខណៈបច្ចុប្បន្ន កម្ពុជា មានថ្នាំប្រឹពសម្រាប់លេបប្រចាំថ្ងៃមុនពេលរួមភេទ និងប្រឹបសម្រាប់លេបក្រោយរួមភេទ៧២ម៉ោង នៅពេលរួមភេទដោយមិនមានសុវត្តិភាពដូចជា ស្រោមអនាម័យដាច់រហែក និងភ្លេចពាក់ស្រោមអនាម័យជាដើម។

លោកវេជ្ជបណ្ឌិតបានបន្តទៀតថា ជាជំហានដំបូងគឺជ្រើសរើសមនុស្ស៧០០០នាក់ដែលមានដៃគូច្រើនជាមុនសិន ព្រោះថាពួកគេប្រឈមនឹងការឆ្លងមេរោគអេដស៍ ដោយជំហានដំបូងត្រូវចាក់១ខែម្តង បន្ទាប់មកទៀតចាក់២ខែម្តង នៅតាមគ្លីនិកចំនួន៣នៅរាជធានីភ្នំពេញរួមមានគ្លីនិកបង្ការថែទាំនិងព្យាបាលបន្ត គ្លីនិកឈូកស និងគ្លីនិករបស់មជ្ឈមណ្ឌលជាតិប្រយុទ្ធនឹងជំងឺអេដស៍សើស្បែកនិងកាមរោគ។

លោកវេជ្ជបណ្ឌិតបានបន្ថែមថា ថ្នាំកាបូតេត្រាវៀនេះ ចាក់នៅត្រគៀក និងសាច់ដុំហើយមិនមានផលប៉ះពាល់ដល់អ្នកចាក់ទេ និងអាចបង្ការបានតែជំងឺអេដស៍ប៉ុណ្ណោះ។ ចំពោះជំងឺស្វាយ និងជំងឺកាមរោគមិនអាចការពារបានទេ។ ប៉ុន្តែមុននឹងដាក់ឱ្យដំណើរការជាផ្លូវការមជ្ឈមណ្ឌលនឹងរៀបចំជាគោលការណ៍ណែនាំ និងលក្ខខណ្ឌមួយចំនួនថា តើបុគ្គលណាខ្លះដែលអាចចាក់មុននឹងដាក់ជូនក្រសួងសុខាភិបាលសម្រេចចុងក្រោយ។

លោកវេជ្ជបណ្ឌិតបានបញ្ជាក់ថា «អ្វីដែលយើងមានការព្រួយបារម្ភនោះគឺថាខ្លាចអ្នកចាក់ហើយមិនមកចាក់ទៀតទាត់។ អីចឹងពេលដាក់ប្រើប្រាស់នាពេលខាងមុខ យើងនឹងធ្វើការផ្សព្វផ្សាយឱ្យបនាទូលំទូលាយដើម្បីឱ្យអ្នកដែលធ្លាប់ប្រើថ្នាំលេបប្រចាំថ្ងៃងាកមកប្រើថ្នាំចាក់ដែលអាចការពារការឆ្លងមេរោគអេដស៍បាន២ខែ»។

យោងតាមរបាយការណ៍របស់មជ្ឈមណ្ឌលជាតិប្រយុទ្ធនឹងជំងឺអេដស៍សើស្បែក និងកាមរោគនៃក្រសួងសុខាភិបាល បានឱ្យដឹងថាឆ្នាំ២០២៣ កម្ពុជាត្រូវបានគេប៉ាន់ប្រមាណថាមានអ្នកផ្ទុកមេរោគអេដស៍ប្រមាណ៧៦០០០នាក់។ ក្នុងនោះមានអ្នកជំងឺមកទទួលសេវាព្យាបាលចំនួន៦៨៨០២នាក់ និងអ្នកជំងឺសង្ស័យ៧១៩៨នាក់នៅមិនទាន់បានមកទទួលសេវាព្យាបាលនៅឡើយទេ ពោល គឺជាក្រុមលាក់មុខ និងមានអ្នកឆ្លងថ្មីនៃមេរោគអេដស៍ប្រមាណ១២០០នាក់និងស្លាប់ប្រមាណ១០០០នាក់ក្នុង១ឆ្នាំ៕

អត្ថបទ៖សំអឿន

The post កម្ពុជាគ្រោងនឹងប្រើថ្នាំចាក់ អាចបង្ការមេរោគអេដស៍រយៈពេល២ខែ នៅចុងឆ្នាំ២០២៤ appeared first on Kampuchea Thmey Daily.