ស្ថានទូតបញ្ជាក់ថា បេក្ខជនសុំទិដ្ឋាការដែលមានលក្ខណៈសម្បត្តិគ្រប់គ្រាន់ក្នុងការទទួលបានទិដ្ឋាការ B1/B2 ទៅសហរដ្ឋអាមេរិក នឹងតម្រូវឱ្យដាក់ប្រាក់ធានារហូតដល់ ១៥ ០០០ ដុល្លារសហរដ្ឋអាមេរិក មុនពេលទិដ្ឋាការអាចចេញជូនបាន។ ទិដ្ឋាការ (B1/B2) សំដៅទៅលើបេក្ខជនទិដ្ឋាការធុរកិច្ច/ទេសចរណ៍។ ប្រាក់ធានានឹងត្រូវបានប្រគល់ជូនបេក្ខជនវិញ ប្រសិនបើបេក្ខជនគោរពតាមលក្ខខណ្ឌទាំងអស់នៃទិដ្ឋាការ ហើយចាកចេញពីសហរដ្ឋអាមេរិកមុនការផុតកំណត់នៃរយៈពេលដែលអ្នកត្រូវបានអនុញ្ញាតឱ្យស្នាក់នៅ។

បើតាមស្ថានទូត លក្ខខណ្ឌនេះមិនអនុវត្តចំពោះបេក្ខជន ដែលបានទទួលទិដ្ឋាការ B1/B2 មានសុពលភាព និងបានចេញមុនថ្ងៃ 2 ខែ មេសាទេ។ ជាមួយគ្នានេះ ស្ថានទទូតក្រើនរំឭកដល់បេក្ខជនសូមកុំបង់ប្រាក់ធានាមុនពេលសម្ភាសន៍។ ស្ថានទូតបញ្ជាក់ថា៖‍«ការបង់ប្រាក់មុនមិនធានាឲ្យអ្នកទទួលបានទិដ្ឋាការនោះទេ ហើយគេហទំព័រផ្សេងក្រៅពីគេហទំព័រផ្លូវការរបស់រដ្ឋាភិបាលសហរដ្ឋអាមេរិកអាចជាគេហទំព័របោកប្រាស់។ ប្រាក់ដែលបានបង់មុនថ្ងៃសម្ភាសន៍មិនអាចដកវិញបានទេ»។

ស្ថានទូតអាមេរិក ក៏បានរំឭកថា សិស្ស និស្សិតដែលធ្វើដំណើរទៅសហរដ្ឋអាមេរិកដោយប្រើទិដ្ឋាការ F ឬ M មិនតម្រូវឲ្យដាក់ប្រាក់ធានាទិដ្ឋាការនោះទេ។ ការបង់ប្រាក់ធានានេះ គឺសម្រាប់តែបេក្ខជនទិដ្ឋាការធុរកិច្ច/ទេសចរណ៍ (B1/B2) ដែលមានលក្ខណៈសម្បត្តិគ្រប់គ្រាន់តែប៉ុណ្ណោះ៕

The post អ្នកជំនួញនិងទេសចរកម្ពុជា ដែលចង់ទៅអាមេរិក នឹងតម្រូវឱ្យដាក់ប្រាក់ធានាទិដ្ឋាការ ១ ៥០០០ ដុល្លារ appeared first on Kampuchea Thmey Daily.

យោងតាមភ្នាក់ងារ BBC ក្រសួងការបរទេសទីក្រុងប៉េកាំងបញ្ជាក់ពីកិច្ចព្រមព្រៀងទាំងនេះ កាលពីថ្ងៃអាទិត្យម្សិលមិញថា ទាំងពលរដ្ឋកាណាដា និងអង់គ្លេស អាចធ្វើដំណើរទៅកាន់ប្រទេសចិនដោយមិនចាំបាច់មានទិដ្ឋាការចាប់ពីថ្ងៃអង្គារទី១៧ ដោយគោលនយោបាយនេះ មានប្រសិទ្ធភាពរហូតដល់ថ្ងៃទី ៣១ ខែធ្នូ ឯណោះ។

ក្រសួងការបរទេសបានបញ្ចាក់នៅក្នុងសេចក្តីថ្លែងការណ៍មួយផ្សេងទៀតថា អ្នកកាន់លិខិតឆ្លងដែនធម្មតាពីប្រទេសទាំងនេះ អាចចូលទៅកាន់ទឹកដីចិន ដោយមិនចាំបាច់មានទិដ្ឋាការសម្រាប់អាជីវកម្ម ទេសចរណ៍ ទៅលេងសាច់ញាតិ និងមិត្តភក្តិ ការផ្លាស់ប្តូរ ឬការឆ្លងកាត់សម្រាប់រយៈពេលមិនលើសពី ៣០ ថ្ងៃ។ នេះ​គឺ​ដើម្បីសម្រួល​បន្ថែម​ដល់​ការ​ផ្លាស់ប្ដូរ​រវាង​ប្រជាជន​និង​ប្រជាជន​ រវាង​ប្រទេស​ចិន​និង​ប្រទេស​ដទៃ​ទៀតផងដែរ។

ការលើកឡើងទិដ្ឋាការរយៈពេល៣០ថ្ងៃនេះកើតឡើង បន្ទាប់ពីនាយករដ្ឋមន្ត្រីអង់គ្លេស និងកាណាដា លោក Keir Starmer និងលោក Mark Carney សុទ្ធតែបានទៅទស្សនកិច្ចទីក្រុងប៉េកាំងកាលពីខែមករា ដោយស្វែងរកការពង្រឹងទំនាក់ទំនងជាមួយចិន និងងាកចេញពីសហរដ្ឋអាមេរិកដែលមានភាពប្រែប្រួលកាន់តែខ្លាំងឡើង។ មេដឹកនាំទាំងពីរបានសាទរចំពោះវឌ្ឍនភាព បន្ទាប់ពីកិច្ចប្រជុំជាមួយមេដឹកនាំកំពូលៗរបស់ចិន និងប្រធានាធិបតី ស៊ី ជិនពីង រួមទាំងបញ្ហាដូចជា ការចូលប្រើប្រាស់ដោយមិនចាំបាច់មានទិដ្ឋាការសម្រាប់ពលរដ្ឋរបស់ពួកគេទៅកាន់ប្រទេសចិន៕

អត្ថបទ៖ សាង ស្រីល័ក្ខ

The post ចាប់ពីស្អែក ទាំងពលរដ្ឋអង់គ្លេស និងកាណាដា អាចទៅប្រទេសចិន ដោយមិនចាំបាច់មានទិដ្ឋាការ appeared first on Kampuchea Thmey Daily.

យោង​តាម​រ៉យទ័រ លោក Starmer បាន​និយាយ​បន្ទាប់​ពី​កិច្ច​ពិភាក្សា​របស់​ខ្លួន​ជា​មួយ​ប្រធា​នា​ធិប​តី លោក ស៊ី​ ជីន​ពីង [Xi Jinping] ថា៖«ពល​រដ្ឋ​អង់គ្លេស​នឹង​ត្រូវ​អនុញ្ញាត​ឱ្យ​ទៅ​ទស្សនា​ប្រទេស​ចិន​ដោយ​គ្មាន​ទិដ្ឋាការ (Visa) ប្រសិន​បើ​ពួក​គេ​ធ្វើ​ដំណើរ​ក្រោម​៣០ថ្ងៃ។

លោក Starmer បាន​និយាយ​ក្នុង​សេច​ក្តី​​ថ្លែង​​ការណ៍​​មួយ​ថា​៖ «​ក្រុម​ហ៊ុន​នានា​​​កំពុងស្វែង​រក​វិធី​សាស្ត្រ​ ដើម្បី​ពង្រីក​ទំនាក់​ទំនង​របស់​ពួក​គេ​នៅ​ក្នុង​ប្រទេស​ចិន​។ ចំណែក​ការ​ធ្វើ​ដំណើរ​ដោយ​គ្មាន​ទិដ្ឋាការ​ នឹង​ជួយ​សម្រួល​ដល់​ការ​ពង្រីក​ទីផ្សារ​ បង្កើន​ការងារ​​នៅ​តាម​ផ្ទះ»។

គោល​ការណ៍​នេះ ជា​ផ្នែក​មួយ​ដែល​ចក្រភព​អង់​គ្លេស​ហៅ​ថា​ «ភាព​ជា​ដៃ​គូ​ថ្មី»។ មិន​តែ​ប៉ុណ្ណោះ ប្រទេស​ទាំង​ពីរ​ក៏​បាន​យល់​ព្រម​​សិក្សា​ពី​លទ្ធភាព​ដែល​អាច​ត្រួស​ត្រាយ​ផ្លូវ​ឆ្ពោះ​ទៅ​រក​កិច្ច​ព្រម​ព្រៀង​ ទំនាក់​ទំនង​សេ​វា​កម្ម​ទ្វេភាគី ​នឹង​ជួយ​បន្ថែម​ដល់​ក្រុម​ហ៊ុន​អង់​គ្លេស​ដែលធ្វើ​អា​ជីវ​កម្ម​នៅ​ក្នុង​ប្រទេសចិន។​

សេច​ក្តី​ថ្លែង​ការណ៍​ បាន​បន្ថែម​ទៀត​​ថា ​សេដ្ឋកិច្ច​របស់​ចក្រភព​អង់​គ្លេស​ត្រូវ​បាន​គាំទ្រ​ដោយ​វិស័យ​សេវាកម្ម​ដ៏​ធំ​របស់​ខ្លួន​មួយ​ដំណាក់​កាល​រួច​ហើយ​ តែ​ភាព​ជា​ដៃ​គូ​នឹង​មាន​គោល​បំណង​ពង្រីក​ទំនាក់​ទំនងបន្ថែម ​ក្នុង​វិស័យ​ថែ​ទាំសុខ​ភាព ហិរញ្ញ​វត្ថុ និង​សេវា​កម្ម​វិជ្ជា​ជីវៈ សេវា​ច្បាប់ ការ​អប់​រំ​ និង​ជំនាញ​ផ្សេង​ទៀត​។

គួរ​បញ្ជាក់​ថា ចក្រ​ភព​អង់​គ្លេស​បាន​នាំ​ចេញ​សេវាកម្ម​នានា​ មាន​តម្លៃ ​១៣ប៊ីលាន​ផោន​( ជាង​១៧ប៊ីលាន​ដុល្លារ)​ ទៅ​កាន់​ប្រទេស​ចិន​ជា​រៀង​រាល់​ឆ្នាំ ហើយ​តម្រូវ​ការ​ពី​ប្រទេស​ចិន​កំពុង​កើន​ឡើង​៕

ប្រែ​សម្រួល៖ ណឺ មិនា

The post ចិន​លើក​លែង​​ទិដ្ឋាការ​ដល់​​ប្រជាជន​អង់គ្លេស​ចំពោះ​​ដំណើរ​កម្សាន្ត​​​ក្រោម​៣០ថ្ងៃ​ appeared first on Kampuchea Thmey Daily.

​រាជរដ្ឋាភិបាល​ក៏បានអនុញ្ញាត​ឱ្យ​ក្រសួងការបរទេស និងសហប្រតិបត្តិការអន្តរជាតិ ដាក់ស្មើ និង​ចរចាជាមួយ​ភាគីរដ្ឋា​ភិបាលចិនឱ្យបន្ធូរបន្ថយ​ និងសម្រួលនីតិវិធីនៃការស្នើសុំទិដ្ឋាការ​ដល់ទេសចរ​ខ្មែរ ​ទៅប្រទេសចិន ​ដើម្បីឈានដល់ការអនុវត្តការលើកលែងទិដ្ឋាការបដិការ​តែម្តងនាពេល​អនាគត។

​លោក ធួន ស៊ីណាន ប្រធាន​សមាគម​ទេសចរណ៍​អាស៊ី​ប៉ាស៊ីហ្វិក​កម្ពុជា (PATA) យល់ឃើញថា នេះ​ជា​ការសាកល្បងដំបូងនៅក្នុងប្រវត្តិសាស្ត្រសម្រាប់កម្ពុជា ព្រោះយើងមិនធ្លាប់លើក​លែងទិដ្ឋា​ការ​ចំពោះប្រទេសណាមួយនោះទេ។​

លោក ធួន ស៊ីណាន បញ្ជាក់ថា៖« នេះជាការសាកល្បងដ៏ធំ ដំបូងបំផុតទី១ ដែលពុំធ្លាប់មាន ហើយ​ខ្ញុំសង្ឃឹមថា រដ្ឋាភិបាលនឹងបន្តលើកលែងទៅដល់ប្រទេសគោលដៅធំៗទៀត ដូចជាគោល​ដៅ​អា​មេរិក អឺរ៉ុប ឥណ្ឌា និងប្រទេសផ្សេងៗទៀត ដែលយើងគិតថាជាគោលដៅ ដែលមាន​សក្ដា​នុពល​សម្រាប់កម្ពុជា»។​

​បើតាមលោក ធួន ស៊ីណាន រដ្ឋាភិបាលត្រូវបន្តខិតខំប្រឹងប្រែងទៅលើការផ្សព្វផ្សាយ គោលដៅសុវត្ថិភាព​សម្រាប់​ទេសចរចិនមកកម្ពុជា ហើយរាជរដ្ឋាភិបាល​ចាំបាច់បន្ត​បោស​សម្អាត​ឧក្រិដ្ឋជន​អនឡាញ​នៅ​កម្ពុជានៅតំបន់គោលដៅមួយចំនួន ដែលកំពុងជាឧបសគ្គរាំងស្ទះដល់វិស័យទេសចរណ៍​។

យោងតាមក្រសួងទេសចរណ៍ គិតត្រឹមរយៈពេល ៩ ខែ ឆ្នាំ ២០២៥ កម្ពុជា​បាន​ស្វាគមន៍​ភ្ញៀវ​ទេសចរ​អន្តរ​ជាតិ​ប្រមា​ណ ៤,៣ លាននាក់ ធ្លាក់ចុះ ៨,៨% ធៀបនឹងរយៈពេលដូចគ្នានៅឆ្នាំ ២០២៤។​

ក្នុង​ចំណោម​ភ្ញៀវទេសចរ​អន្តរជាតិជាង​ ៤,៣ លាន​​នាក់ ​ទេសចរណ៍​ថៃឈរ​នៅ​លំដាប់​លេខរៀងទី១ ចំនួន​ជាង​ ៩៧ ម៉ឺននាក់ ធ្លាក់ចុះ ​៣៥,៩% វៀតណាមជាង ៩០ ម៉ឺននាក់ ធ្លាក់ចុះ ​ជិត ៧% ចិន ៨៨ ម៉ឺន​នាក់ កើន ៤៦,៣% ​អាមេរិកជាង ១៤ ម៉ឺននាក់ ​ធ្លាក់ចុះ ១,៦% ​កូរ៉េជាង ​១២ ម៉ឺននាក់ ​ធ្លាក់ចុះជិត ​១០,៨%។

នៅក្នុងឆ្នាំ ២០២៤ កម្ពុជាទទួលបានភ្ញៀវទេសចរអន្តរជាតិចំនួន ៦,៧ លាននាក់ កើនឡើង ២២,៩% ធៀបនឹងឆ្នាំ ២០២៣៕

អត្ថបទ៖ ឡេង ដេត

The post ​កម្ពុជា​លើកលែង​ទិដ្ឋាការ​សាកល្បង​រយៈ​ពេល​ ៤ ខែ ​សម្រាប់​ភ្ញៀវ​ទេសចរ​ចិន appeared first on Kampuchea Thmey Daily.

យោងតាមសេចក្តីប្រកាសព័ត៌មានរាជរដ្ឋាភិបាលកម្ពុជា នៅរសៀលថ្ងៃទី២៨ ខែធ្នូ ឆ្នាំ២០២៤នេះ បានឱ្យដឹងថា ក្នុងគោលដៅផ្តល់ភាពងាយស្រួលដល់អ្នកដំណើរ និងទេសចរដែលចូលមកប្រទេសកម្ពុជា គឺរាជរដ្ឋាភិបាលកម្ពុជា បានណែនាំដល់ក្រសួងស្ថាប័នពាក់ព័ន្ធឱ្យកែលម្អ និងសម្រួលនីតិវិធីក្នុងការផ្តល់ទិដ្ឋាការតាមប្រព័ន្ធ e-Visa និងប្រព័ន្ធ e-Arrival ឱ្យមកនៅក្នុង Ecosystem តែមួយរបស់រាជរដ្ឋាភិបាល។

ជាមួយគ្នានេះ រាជរដ្ឋាភិបាលកម្ពុជា ក៏បញ្ចុះតម្លៃទិដ្ឋាការអេឡិចត្រូនិក (e-Visa) ប្រភេទទេសចរ (T) និងប្រភេទធម្មតា (E) ដោយតម្លៃទិដ្ឋាការអេឡិចត្រូនិក ត្រូវបានបញ្ចុះតម្លៃសម្រាប់ e-Visa T ពី ៣៦ដុល្លារ មកនៅត្រឹម ៣០ដុល្លារ និង e-Visa E បញ្ចុះតម្លៃពី ៤២ដុល្លារ មកនៅត្រឹម ៣៥ដុល្លារ។

តាមសេចក្ដីប្រកាសព័ត៌មាននេះ ការកែទម្រង់ ខាងលើ នឹងចាប់ផ្តើមអនុវត្តចាប់ពីថ្ងៃទី១ ខែមករា ឆ្នាំ២០២៥ តទៅ៕

The post កម្ពុជា បញ្ចុះតម្លៃទិដ្ឋាការអេឡិចត្រូនិក (e-Visa) នៅដើមឆ្នាំ២០២៥ appeared first on Kampuchea Thmey Daily.

បើតាមលោករដ្ឋមន្រ្តីការបរទេសថៃ ការផ្តល់អនុគ្រោះនេះ គឺជាការលើកទឹកចិត្តឱ្យប្រជាជនកម្ពុជា បានចូលរួមក្នុងវិស័យពាណិជ្ជកម្មនៅតាមព្រំដែន និងការធ្វើដំណើរកំសាន្តទេសចរណ៍ជាដើម។ រាជរដ្ឋាភិបាលថៃ ក៏បានជំរុញឱ្យវិស័យឯកជនបានចូលរួមជាមួយរាជរដ្ឋាភិបាលនៃប្រទេសទាំងពីរក្នុងការជំរុញការវិនិយោគលើវិស័យសំខាន់ៗជាច្រើន។ លោក Maris SANGIAMPONGSA ថា រាជរដ្ឋាភិបាលថៃ មើលឃើញថា ទំហំទេសចរណ៍បរទេសចូលទៅទស្សនាប្រទេសថៃមានចំនួនច្រើន ដូច្នេះ ភ្ញៀវទេសចរបរទេសទាំងអស់នោះ ក៏អាចបន្តមកទស្សនាប្រទេសកម្ពុជាបានផងដែរ ដើម្បីរួមចំណែកទាំងអស់គ្នាក្នុងភាពរីកចម្រើននៃវិស័យទេសចរណ៍។

សម្ដេចតេជោ ហ៊ុន សែន បានអរគុណដល់ប្រទេសថៃដែលបានបង្កលក្ខណៈងាយស្រួលដល់ពលរដ្ឋ និងពលករកម្ពុជា បានទៅធ្វើការក្នុងប្រទេសថៃ ដោយបានបង្កើនរយៈពេលស្នាក់មិនចាំបាច់មានទិដ្ឋាការពីរយៈពេល៤០ថ្ងៃ ទៅ៦០ថ្ងៃនេះ។ សម្រាប់សម្តេចតេជោ ការបង្កភាពងាយស្រួលនេះ មិនត្រឹមតែបានអនុញ្ញាតឱ្យពលករកម្ពុជាមានចំណូលប៉ុណ្ណោះទេ ថែមទាំងទទួលបាននូវជំនាញថែមទៀតផងដែរ ព្រមទាំងផ្ដល់ឱកាសឱ្យប្រជាជននៃប្រទេសទាំង២ មានទំនាក់ទំនងកាន់តែស៊ីជម្រៅទាំងវិស័យវិនិយោគ និងទេសចរណ៍។ សម្តេចតេជោ ប្រធានព្រឹទ្ធសភា បានលើកឡើងឱ្យដឹងថា ប្រទេសថៃ ជាគោលដៅមួយដែលពលរដ្ឋខ្មែរតែងតែទៅពិនិត្យសុខភាព ហើយសម្តេចសង្ឃឹមថា ភាពរីកចម្រើនក្នុងវិស័យវេជ្ជសាស្ត្ររបស់ថៃ អាចនឹងជួយសម្រួលដល់ប្រជាជនប្រទេសជិតខាង មានកម្ពុជា ឡាវ មីយ៉ាន់ម៉ា ដែលនឹងទៅស្វែងរកសេវាសុខាភិបាលនេះ។

មិនត្រឹមតែលើកឡើងពីបញ្ហានេះទេ រដ្ឋមន្រ្តីការបរទេសថៃ លោក Maris SANGIAMPONGSA ក៏បានលើកឡើងពីការសម្រេចចិត្តរបស់នាយករដ្ឋមន្រ្តីនៃប្រទេសទាំង២ ដែលគាំទ្រអនុញ្ញាតឱ្យបើកស្ថានអគ្គកុងស៊ុលនៅខេត្តសៀមរាប និងស្ថានអគ្គកុងស៊ុលកម្ពុជានៅខេត្តសុងក្លាជម្រាបជូនសម្តេចតេជោ ផងដែរ។ លោករដ្ឋមន្រ្តីការបរទេសថៃសង្ឃឹមថា បន្ទាប់ពីបើកឱ្យដំណើរការ ស្ថានអគ្គកុងស៊ុលទាំង២នេះ នឹងជំរុញថែមទៀតដល់ការតភ្ជាប់រវាងប្រជាជន និងប្រជាជន ជាពិសេស ការវិនិយោគផ្សេងៗ។ លោកថែមទាំងបានលើកជាយោបល់ថា នាយករដ្ឋមន្ត្រីនៃប្រទេសទាំង២ អាចនឹងផ្ដល់កិត្តិយសចូលរួមក្នុងការបើកអគ្គកុងស៊ុលនៅប្រទេសទាំង២ ដើម្បីជានិម្មិតរូបបង្ហាញថា រាជរដ្ឋាភិបាលនៃប្រទេសទាំង២ ធ្វើការជាមួយគ្នាយ៉ាងជិតស្និទ្ធ ដើម្បីជំរុញការតភ្ជាប់រវាងប្រជាជន និងប្រជាជន៕

ដោយ៖ វណ្ណ សុគន្ធា

The post ប្រមុខការទូតថៃ៖ ពលរដ្ឋកម្ពុជា អាចចូលទៅលេង និងស្នាក់នៅប្រទេសថៃរយៈពេល៦០ថ្ងៃ ដោយមិនចាំបាច់មានទិដ្ឋាការ appeared first on Kampuchea Thmey Daily.

ការ​លើក​ឡើង​បែបនេះ បន្ទាប់ពី​រាជរដ្ឋាភិបាល​បាន​ប្រកាស​មិន​យក​ថ្លៃ​សេវា​បង់​ប្រាក់​លើ​ការ​ធ្វើ​ដំណើរ​ទៅវិញទៅមក (Re-Entry) របស់​ពលករ​ខ្មែរ​កំពុង​ធ្វើការ និង​រស់នៅ​ប្រទេស​ថៃ ដែល​វិល​ត្រឡប់​មក​លេង​ស្រុកកំណើត ក្នុងអំឡុងពេល​ចូលឆ្នាំ​ខ្មែរ ចាប់ពី​ថ្ងៃ​ទី ០១ ខែ​មេសា រហូតដល់​ថ្ងៃ​ទី ១៥ ខែ​ឧសភា ឆ្នាំ ២០២៤។

លោកស្រី សំ ស៊ីនួន ជា​ពលករ​ខ្មែរ​ធ្វើការ​នៅ​ប្រទេស​ថៃ​ម្នាក់ លើក​ឡើង​ថា «​អរគុណ សម្តេច​មហា​បវរ​ធិបតី ហ៊ុន ម៉ាណែត នាយករដ្ឋមន្ត្រី ដែល​មិន​យក​កម្រៃ​សេវា​បង់​ប្រាក់​ចេញ​-​ចូល​ដល់​ពលករ​ខ្មែរ​ដែល​ធ្វើការ និង​រស់នៅ​ប្រទេស​ថៃ ក្នុងអំឡុងពេល​បុណ្យចូលឆ្នាំ​ខ្មែរ ខាងមុខនេះ​»។

ពលករ​រូប​នេះ អរគុណ​រាជរដ្ឋាភិបាល ក៏ដូចជា​អាជ្ញាធរ ដែល​បាន​យកចិត្តទុកដាក់​ដល់​ពលករ​ដែល​វិល​ត្រលប់​មកលេង​ស្រុកកំណើត ហើយ​បាន​ផ្តល់​អាហារសម្រន់​ដូចជា នំប៉័ង និង​ទឹក​សុទ្ធ រួម​ទាំង​ការ​ជួយ​សម្រួល​កិច្ច​ការងារ​ផ្សេងៗ ជូន​ដល់​ពលករ​តាម​ច្រក​ព្រំដែន​ផង​ដែរ។

លោក ភារុន ជា​ពលករ​ខ្មែរ​ធ្វើការ​នៅ​ប្រទេស​ថៃ​ម្នាក់ទៀត ក៏បាន​លើកឡើង​ដែរ​ថា «​ខ្ញុំ​មក​លេង​ស្រុក​កំណើត​នៅ​ឆ្នាំនេះ​អត់​មាន​ការ​បង់ថ្លៃ​សេវា​ចេញ​-​ចូល (​ទិដ្ឋាការ​) ទេ។ ខ្ញុំ​ចំណាយ​តែ​ទៅលើ​ការ​ធ្វើ​ដំណើរ​ពី​ក្រុង​បាងកក មកកាន់​ច្រក​ព្រំដែន​របស់​យើង។ ខ្ញុំ​សប្បាយចិត្ត ព្រោះ​កាត់បន្ថយ​ចំណាយ​បាន​ខ្លះ​ដែរ​»។

គួរ​កត់​សម្គាល់​ថា ត្រឹម​ថ្ងៃ​ទី ១ ខែ​មេសា ឆ្នាំ ២០២៤ ពលរដ្ឋ​ខ្មែរ បាន​ធ្វើ​ដំណើរ​វិលត្រឡប់​ចូល​ប្រទេស​វិញ​នៅ​តាម​បណ្តា​ប៉ុស្តិ៍​នគរបាល​ច្រកទ្វារ​ព្រំដែន​អន្តរជាតិ​សរុប​ចំនួន ១៩០,៤០ នាក់ ក្នុង​នោះ​ច្រក​ព្រំដែន​កម្ពុជា​-​ថៃ ចំនួន ១៨,២៩៥ នាក់។ ទន្ទឹម​នឹង​នេះ ភាគី​ពាក់ព័ន្ធ បាន​យកចិត្តទុកដាក់​ខ្ពស់​ក្នុង​ការ​សម្រួល​ដំណើរ​របស់​ពលរដ្ឋ​ខ្មែរ ក្នុង​នោះ​ក៏​មាន​មន្ត្រី​របស់​ក្រសួង​ការងារ និង​បណ្ដុះបណ្ដាល​វិជ្ជាជីវៈ​ប្រចាំការ​នៅ​ទីនោះ​ផង​ដែរ។

គូស​បញ្ជាក់​ដែរ​ថា សម្តេច​មហា​បវរ​ធិបតី ហ៊ុន ម៉ាណែត នាយករដ្ឋមន្ត្រី​កម្ពុជា កាលពី​ថ្ងៃ​ទី ៨ ខែ​កុម្ភៈ ឆ្នាំ ២០២៤ បាន​លើក​ឡើង​ថា រាជរដ្ឋាភិបាល​កម្ពុជា និង​ថៃ បាន​សម្រេច​មិន​យក​ថ្លៃ​ទិដ្ឋាការ​ចេញ​-​ចូល​ប្រទេស​ថៃ (Re-Entry) ដើម្បី​កាត់បន្ថយ​ការ​ចំណាយ​ពលករ​ខ្មែរ ដែល​នឹង​ធ្វើ​ដំណើរ​ត្រឡប់​មក​កម្ពុជា​ក្នុង​ឱកាស​ពិធីបុណ្យ​ចូលឆ្នាំ​ខ្មែរ​ប្រពៃណី​ជាតិ​ខាងមុខនេះ៕

The post ពលករខ្មែរវិលត្រឡប់ពីថៃ សប្បាយចិត្តដែលរាជរដ្ឋាភិបាលមិនយក​ថ្លៃសេវាទិដ្ឋាការចេញ-ចូល អំឡុងចូលឆ្នាំ appeared first on Kampuchea Thmey Daily.

ការ​ចេញ​សារ​ថ្លែងអំណរគុណ​នេះ ធ្វើឡើង​ក្នុង​ឱកាស សម្តេច​មហា​បវរ​ធិបតី ហ៊ុន ម៉ាណែត នាយករដ្ឋមន្ត្រី នៃ​កម្ពុជា នឹង​ដឹកនាំ​ប្រតិភូ​កម្ពុជា អញ្ជើញ​ទៅ​បំពេញ​ទស្សនកិច្ច​ផ្លូវការ នៅ​ទីក្រុង​បាងកក ប្រទេស​ថៃ នា​ថ្ងៃ​ទី ៧ ខែ​កុម្ភៈ ឆ្នាំ ២០២៤ ខាងមុខនេះ។

លោក ម៉ៃ វណ្ណៈ ពលករ​ខ្មែរ​កំពុង​ស្នាក់នៅ និង​ធ្វើការ​នៅ​ខេត្ត​នគររាជ​សី​ម៉ា ប្រទេស​ថៃ បាន​លើក​ឡើង​ថា «ខ្ញុំ សូម​ថ្លែងអំណរគុណ​យ៉ាង​ក្រៃលែង​ដល់ សម្តេច​មហា​បវរ​ធិបតី ដែល​បាន​ស្នើសុំ​រាជរដ្ឋាភិបាល​ថៃ ឱ្យ​ជួយ​បញ្ចុះ​តម្លៃ​វីសា ពី ១៩០០ បាត មក ៥០០ បាត ជូន​ដល់​បងប្អូន​ពលករ​ខ្មែរ​យើង»។

លោក យន់ សៃ​ធូ ជា​ពលករ​ដែល​កំពុង​ស្នាក់នៅ និង​ធ្វើការ​នៅ​ខេត្ត​សារៈ​បុរី ប្រទេស​ថៃ ក៏បាន​លើក​ឡើង​ដែរ​ថា «​សូម​ថ្លែងអំណរគុណ​យ៉ាង​ក្រៃលែង​ដល់ សម្តេច​បវរ​ធិបតី ដែល​បាន​ស្នើសុំ​រាជរដ្ឋាភិបាល​ថៃ ឱ្យ​ជួយ​បញ្ចុះ​តម្លៃ​វីសា ពី ១៩០០ បាត មក ៥០០ បាត ជូន​ដល់​បងប្អូន​ពលករ​ខ្មែរ​យើង។ ជា​ចុងក្រោយ ខ្ញុំបាទ​/​នាង​ខ្ញុំ សូម​គោរព​ជូនពរ សម្តេច​មហា​បវរ​ធិបតី ទទួល​បាន​ជោគជ័យ ក្នុង​ដំណើរ​ទស្សនកិច្ច​នេះ​»។

គួរ​រំលឹក​ថា កាលពី​ថ្ងៃ​ទី ២៨ ខែ​កញ្ញា ឆ្នាំ ២០២៣ តប​តាម​ការ​អញ្ជើញ​របស់ សម្តេច​មហា​បវរ​ធិបតី ហ៊ុន ម៉ាណែត នាយករដ្ឋមន្ត្រី នៃ​កម្ពុជា លោក សេដ្ឋា ថាវីស៊ីន នាយករដ្ឋមន្ត្រី​ថៃ បាន​អញ្ជើញ​មក​ដល់​រាជធានី​ភ្នំពេញ ដើម្បី​បំពេញ​ទស្សនកិច្ច​ផ្លូវការ​លើក​ដំបូង​នៅ​កម្ពុជា។

ដំណើរ​ទស្សនកិច្ច​ផ្លូវការ​លើកដំបូង​របស់ លោកនាយក​រដ្ឋមន្ត្រី សេដ្ឋា ថា​វី​ស៊ីន មកកាន់​កម្ពុជា បាន​ពង្រឹង​បន្ថែម​ទៀត​នូវ​ចំណងមិត្តភាព​ជា​ប្រពៃណី និង​លើកកម្ពស់​កិច្ច​សហប្រតិបត្តិការ​ពហុ​វិស័យ រវាង​ប្រទេស​ទាំងពីរ ស្របតាម​ស្មារតី នៃ«​ការ​ពង្រឹង​ភាពជា​ដៃគូ​ដើម្បី​សន្តិភាព និង​វិបុលភាព​» ដែល​ផ្តល់​ផលប្រយោជន៍​ទៅវិញទៅមក​សម្រាប់​ប្រជាជន នៃ​ប្រទេស​ទាំងពីរ ព្រមទាំង​រួមចំណែក​ដល់​ការ​លើក​កម្ពស់​សន្តិភាព ស្ថិរភាព និង​វិបុលភាព ក្នុង​សហគមន៍​អាស៊ាន និង​អន្តរជាតិ៕

The post ពលករខ្មែរនៅថៃ ថ្លែងអំណរគុណ សម្ដេចធិបតី ចំពោះការស្នើឱ្យភាគីថៃ បញ្ចុះតម្លៃទិដ្ឋាការ appeared first on Kampuchea Thmey Daily.