លោក ហេង ឆេងលី ប្រធានសហគមន៍ទុរេនបែកអន្លូង ស្រុកស្ទឹងត្រង់ ខេត្តកំពង់ចាមប្រាប់ កម្ពុជា​ថ្មីនៅថ្ងៃទី ១៨ ខែមិថុនា ឆ្នាំ ២០២៥នេះថា បច្ចុប្បន្នកម្ពុជាមិនទាន់បាន​នាំចេញផ្ទាល់​ទៅ​ចិន​បានទេ ខណៈកំពុងរៀបចំឯកសារ។

លោក ហេង ឆេងលី បន្ថែមថា៖ «បើយើងនាំចេញយើងត្រូវពឹងផ្អែកលើប្រទេសជិតខាងដូចជាថៃ វៀតណាម អញ្ចឹងហើយដោយសារកត្តាតម្លៃនៅថៃ និងវៀតណាមដែលនាំចេញទៅចិន តម្លៃវាធូរ អញ្ចឹងឈ្មួញគាត់មិនអាចរកស៊ីបានទេ ដោយសារគាត់ទិញតាមតម្លៃប្រទេសជិតខាង កាល​ណា​ឱ្យ​​​​កសិករយើងខ្ពស់ គាត់អត់ចំណេញ ហើយកសិករខ្មែរគាត់ធ្លាប់លក់បានតម្លៃគួរសម បើសិន ឈ្មួញគាត់ឱ្យតម្លៃទាប ខ្មែរយើងគាត់លក់ដែរ អញ្ចឹងឈ្មួញទិញអត់បានដែរ ទើបធ្វើឱ្យការ​នាំចេញ​ធ្លាក់​ចុះ»។

លោក ហេង ឆេងលី បន្ថែមថា ទោះការនាំចេញធ្លាក់ចុះ ប៉ុន្តែតម្រូវការទីផ្សារក្នុងស្រុកនៅ​តែ​ដំ​ណើរ​​ការ​ល្អ ជា​មួយ​តម្លៃមានស្ថិរភាព។

យោងតាមក្រសួងកសិកម្ម គិតត្រឹមឆ្នាំ ២០២៤ កម្ពុជាមានផ្ទៃដី​ដាំដុះ​ទុរេនជាង ៩ ពាន់ហិកតា ក្នុងនោះផ្ទៃដីអាចប្រមូល​ផល​បាន ៥ ពាន់ហិកតា ដែលផ្ដល់​ទិន្នផល​ប្រមាណ ៨ ម៉ឺន ២ ពាន់តោន៕

អត្ថបទ៖ ឡេង ដេត

The post ការនាំចេញទុរេនកម្ពុជាធ្លាក់ចុះយ៉ាងគំហុក តែទីផ្សារនៅតែល្អ appeared first on Kampuchea Thmey Daily.

លោក ឃឹម ប៊ុនឡែន ប្រធានសហគមន៍ចម្ការស្តេចទុរេន បានលើកឡើងថា ការរឹតបន្តឹង​ការ​នាំ​ចូល​ទុរេនរបស់ប្រទេសចិនពីវៀតណាម និងថៃ ផ្ដល់ទាំងឱកាស និងផលអវិជ្ជ​មានសម្រាប់​ទុរេន​​​​កម្ពុជា។

លោក ឃឹម ប៊ុនឡែន បានលើកឡើងថា បញ្ហាគុណភាព សុវត្ថិភាពទុរេននៅប្រទេស​ជិត​ខាងរបស់​កម្ពុជា​ គឺបានធ្វើឱ្យមានការផ្លាស់ប្ដូរការគិតរបស់ប្រជាពលរដ្ឋក្នុងការ​យកចិត្តទុក​ដាក់​មកលើ​ទុរេន​​​ខ្មែរ ខណៈប្រទេសចិនបានអនុញ្ញាតឱ្យកម្ពុជានាំចូលទៅកាន់ទីផ្សារខ្លួន ដែល​ជាឱកាសឱ្យយើងបង្កើតម៉ាកទុរេនខ្មែរ។

លោក ឃឹម ប៊ុនឡែនបន្ថែមថា៖ «វាជាមេរៀនសម្រាប់យើង ដោយសារបញ្ហាគុណភាព សុវត្ថិ​ភាព​ ធ្វើឱ្យស្ថានភាពនៅថៃ ​និងវៀតណាមមានការរង្គោះរង្គើ អញ្ចឹងតើយើងត្រូវ​ត្រៀម​ខ្លួន​ម៉េច ព្រោះ​យើងអត់ទាន់បានចូលប្រឡូកក្នុងសៃវៀននៅ​ឡើយ​ទេ ផលិតផល​របស់យើង​រាល់​ថ្ងៃគឺ​ចេញតាមច្រកប្រទេសជិតខាង ហើយបាននាំបន្តទៅចិន អញ្ចឹងវាគឺជាមេរៀន​ល្អ​មួយ​ដែល ដែលកម្ពុជាយើងត្រូវរៀនសូត្រហើយ ហើយកុំពឹងផ្អែកទៅលើតែទីផ្សារ​ចិន​តែ​មួយ យើង​ត្រូវ​មើល​ទីផ្សារផ្សេងទៀត»។

ទន្ទឹមនឹងគុណសម្បត្តិ ក៏មានគុណវិបត្តិដែរ ប្រសិនបើបញ្ហានេះ នៅអូសបន្លាយវា​អាចប៉ះ​ពាល់​ទៅលើតម្លៃ នៅចំពេលដែលយើងប្រមូលផលទុរេននៅចុងខែ ឧសភានេះ ចាប់ផ្ដើម​ប្រមូល​ច្រើនប្រភេទពូជមាន់ថង។

បើតាមលោក ឃឹម ប៊ុនឡែន៖ «កាលណាទុរេននៅប្រទេសជិតខាង​ចុះថោក អាចមានលំ​ហូរ​ទុរេន​​ចូលមកស្រុកខ្មែរយើង​ដែលធ្វើឱ្យមានផលប៉ះពាល់ដល់សុខភាពអ្នកបរិភោគ ទុរេនដែល​ហូរ​ចូលមក មិនមែនជាទុរេនមានស្ដង់ដាខ្ពស់ដើម្បីនាំចេញទេ ទុរេនដែលល្អ គឺគេនាំ​ចេញទៅ​លក់នៅក្រៅប្រទេសហើយ ទុរេនដែលនាំចូលមកស្រុកខ្មែរ​ខ្ញុំហាននិយាយថា  ភាគច្រើនគឺ​ជា​ទុរេន​​ដែលគេបានបដិសេធគុណភាពស្ដង់ដា បានគេនាំយកមកស្រុកខ្មែរ​យើងលក់​ថោកៗ​ទុរេន​ថ្លៃគេលក់អស់ហើយ អញ្ចឹងខ្ញូំចង់ឱ្យបងប្អូនគិតគូសុខភាព សុវត្ថិភាព​ផ្ទាល់​ខ្លួន​ហើយ​អាហ្នឹង​គឺមាន​ផលប៉ះពាល់ខ្លាំងណាស់ ហើយ​វាក៏អាចប៉ះពាល់ដល់តម្លៃរបស់​ទុរេន​ក្នុងស្រុក​របស់យើង​ពេល​ប្រមូលផល»។

លោក ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្មមានប្រសាសន៍ថា អាជ្ញាធរស្ថាប័នពាក់ព័ន្ធបាន​ដាក់ចេញវិធានទប់ស្កាត់ការហាមឃាត់ទុរេនដែលមាន​​សារធាតុគីមីលួចនាំចូលមក។

លោក ប៉ែន សុវិជាតិ បន្ថែមថា ក្រសួងពាណិជ្ជកម្មបានអប់រំឱ្យម្ចាស់ចម្ការទុរេន និងអ្នកលក់ផ្លែឈើទាំងអស់កុំឱ្យនាំចូលទុរេនបរទេសហើយកុហកបន្លំថា ជាទុរេនរបស់ខ្មែរ ដើម្បីការពារអ្នកប្រើប្រាស់ និងសុខមាលភាពរបស់ប្រជាពលរដ្ឋ។

លោក ប៉ែន សុវិជាតិ បញ្ជាក់ថា៖ «ក្រសួងមិនព្រងើយកន្តើយទេ បច្ចុប្បន្ននេះ ហើយក៏សុំអំពាវនាវឱ្យ​មានកិច្ចសហការពីប្រជាជនអ្នកប្រើប្រាស់ អាចជូនដំណឹងមកក្រសួងពាណិជ្ជកម្ម ក្នុងករណីសង្ស័យថា ទុរេនដែលនាំចូល ឬដាក់លក់នៅកន្លែងណាមួយអាចជាទុរេនដែលមានផ្ទុកសារធាតុគីមី ឬទុរេននាំចូលពីក្រៅប្រទេស ហើយក្លែងបន្លំជាទុរេនកម្ពុជា ពី​ព្រោះ​​​​ឥឡូវនេះ យើងកំពុងយកចិត្តទុកដាក់ខ្ពស់បញ្ហាទុរេនដែលមានផ្ទុកសារធាតុដែលអាចបង្ករជាជំងឺផ្សេងៗ ខណៈជំងឺមហារីកកំពុងកើនឡើងនៅកម្ពុជា»។

យោងតាមក្រសួងកសិកម្ម រុក្ខាប្រមាញ់ និងនេសាទ គិតត្រឹមឆ្នាំ ២០២៤ កម្ពុជាមានផ្ទៃដីដាំដុះទុរេនជាង ៩ ពាន់ហិកតា ក្នុងនោះផ្ទៃដីអាចប្រមូល​ផល​បាន ៥ ពាន់ហិកតា ដែលផ្ដល់ទិន្នផលប្រមាណ ៨ ម៉ឺន ២ ពាន់តោន៕

អត្ថបទ៖ ឡេង ដេត

The post ការរឹតត្បិតនាំចូលទុរេនរបស់ចិន ផ្ដល់ទាំងឱកាស និងផលអវិជ្ជមានសម្រាប់ទុរេនកម្ពុជា appeared first on Kampuchea Thmey Daily.

បើតាម VnExpress ឈ្មួញនាំចេញទុរេននិយាយថា ការត្រួតពិនិត្យទុរេនតាមកុងតឺន័រវៀតណាមចំណាយពេលរហូត ១ សប្ដាហ៍ ហើយទម្រាំបានទៅដល់​កន្លែងលក់បោះដុំនៅចិន វាខូចគុណភាពបាត់ទៅហើយ។​ នេះគឺជាមូលហេតុដ៏ធំដែលធ្វើឱ្យ​ការនាំចេញទុរេនរបស់វៀតណាមធ្លាក់ចុះជាគំហុក ប្រមាណ ៨៣ ភាគរយ មកនៅត្រឹម ២៧ លានដុល្លារ ក្នុងរយៈពេល ២ ខែដើមឆ្នាំ។

​ស្ថានភាពបច្ចុប្បន្ន ត្រូវបានគេរាប់ថាជា «វិបត្តិទុរេនវៀតណាម» រួចបាត់ទៅហើយ។ ការរឹតបន្តឹងការត្រួតពិនិត្យរបស់ចិន បាន​បណ្ដាលឱ្យ​ឈ្មួលវៀតណាមខ្លាចមិនហ៊ានទិញទុរេនច្រើនសម្រាប់ការជួញដូររបស់ខ្លួន ដែលកាន់តែធ្វើឱ្យ​ការផ្គត់ផ្គង់ពីចម្ការរបស់កសិករមាន​កាន់តែច្រើន ខណៈតម្លៃកាន់តែថោក។ ​ក្រៅពីនេះ ឈ្មួលជា​ច្រើន​នៅ​តំបន់​ដាំ​ទុរេន​ដូច​ជាទីក្រុង Can Tho និង​ខេត្ត Ben Tre បាន​ឈប់​ទិញ​ទុរេន ព្រោះខ្លាចខាតបង់។ ​

VnExpress ផ្សាយកាលពីថ្ងៃចន្ទថា មកទល់ពេល​នេះ កសិករនៅតំបន់ដីសណ្តទន្លេមេគង្គ ​បាន​បញ្ចុះតម្លៃទុរេនរបស់ខ្លួន​មកនៅត្រឹម ៣៥ ០០០ – ៧០ ០០០ ដុង​ (១,៣៥-២,៦៩ ដុល្លារ)/គីឡូក្រាម ​ពោលគឺប្រហែល ១/៣ នៃតម្លៃកាលពីឆ្នាំមុន។ ​តម្លៃនេះ គឺប្រែប្រួលទៅតាមគុណភាពនៃប្រភេទទុរេន។

ប៉ុន្តែ បើតាម​ការចុះផ្សាយរបស់ Saigon News គិតត្រឹមថ្ងៃទី ១ ខែឧសភា តម្លៃធូរេនប្រភេទ Ri6 នៅតំបន់ដីសណ្តទន្លេមេគង្គរបស់វៀតណាម មានតម្លៃប្រហែល ០,៩៨ ដុល្លារ/គីឡូក្រាម ​នៅចម្ការ ​ពោលគឺធ្លាក់​ចុះចន្លោះពី ០,២០-០,៥៩ ដុល្លារ/គីឡូក្រាម ​ពីខែមុន។

យ៉ាងណាមិញ​ សារព័ត៌មាន​ដដែលបាន​ផ្សាយថា កង្វល់ដ៏ធំបំផុតសម្រាប់កសិករដាំទុរេនវៀតណាមនាពេលនេះ មិនមែនតម្លៃថោកនោះទេ ប៉ុន្តែគឺ​កង្វះឈ្មួញ​ទិញ។

កសិករនៅស្រុក Phong Dien (ទីក្រុង Can Tho) និងស្រុក Chau Thanh A (ខេត្ត Hau Giang) បានចាប់ផ្តើមលក់ទុរេនដោយផ្ទាល់ នៅតាមបណ្តោយផ្លូវជាតិលេខ 61C ដែលតភ្ជាប់ទីក្រុង Can Tho និង​ក្រុង Vi Thanh។ ការ​លក់​តាម​ផ្លូវដូច្នេះ អាច​​​ផ្តល់​ប្រាក់​ចំណេញ​ខ្ពស់​ជាង ដោយ​ទុរេន Ri6 លក់​បាន​ថ្លែ ១,១៧​-២,៣៤ ដុល្លារ​/​គីឡូក្រាម​ អាស្រ័យ​លើ​គុណភាព។

​Saigon News បាន​ស្រង់សម្ដីកសិករម្នាក់ ឈ្មោះ Nguyen Van Muoi ​នៅស្រុក Phong Dien ដែល​បាន​និយាយថា ​ការផ្គត់ផ្គង់លើសតម្រូវការ និងកង្វះអ្នកទិញ បានបង្ខំគ្រួសារលោកដាក់លក់​ទុរេនប្រមូល​ផលរួចនៅតាមដងផ្លូវ។ ​និន្នាការ​នេះ​ ក៏​ត្រូវ​បាន​គេ​ឃើញ​នៅតាមបណ្ដា​ខេត្ត​ដីសណ្ត​ទន្លេ​មេគង្គ​ផ្សេង​ទៀត​ ដូច​ជាខេត្ត Can Tho និង Vinh Long ជាដើម។

អនុប្រធានមន្ទីរកសិកម្ម និងបរិស្ថានខេត្ត Hau Giang លោក Nguyen Thi Giang បានចង្អុលបង្ហាញពីបញ្ហាប្រឈមនៅក្នុងទីផ្សារទុរេនវៀតណាម រួមទាំងការត្រួតពិនិត្យគុណភាព អស្ថិរភាពតម្លៃ និងតម្រូវការធ្លាក់ចុះ។ នៅពេល​តំបន់​ដាំដុះត្រូវបាន​ពង្រីក ការផ្គត់ផ្គង់បានកើនឡើង ខណៈ​​ប្រទេសនាំចូលបានបង្កើនស្តង់ដារគុណភាព។

បើតាម VnExpress ចំណែកទីផ្សារទុរេនរបស់វៀតណាម​ក្នុងប្រទេសចិន បានធ្លាក់ចុះពី ៦២ ភាគរយ មកនៅត្រឹម ៣៧ ភាគរយ ​ខណៈចំណែកទីផ្សាររបស់ថៃវិញ បានកើនឡើងពី ៣៧ ភាគរយ ទៅដល់ ៦២,៣ ភាគរយ។ ​កំណើនរបស់ថៃ កើត​ឡើង​ទោះបី​ចិន​អនុវត្ត​ការ​ត្រួត​ពិនិត្យ​តឹងរ៉ឹង​ស្មើ​គ្នា​ចំពោះ​ទុរេន​ថៃ​ក៏​ដោយ ដោយ​ព្រោះរដ្ឋាភិបាល​ថៃ​បាន​អនុវត្ត​វិធានការ​ផ្សេងៗ ដើម្បី​ធានា​ការ​នាំ​ចេញ​បន្ត​ក្នុង​បរិមាណ​ខ្ពស់។

អ្នកជំនាញបានលើកឡើងថា នៅពេលខាងមុខ ទុរេនវៀតណាមនឹង​កាន់តែរងការប្រកួតប្រជែង ចំពេលចិន​បានបង្កើនការនាំចូលពីប្រទេសផ្សេងៗនៅអាស៊ីអាគ្នេយ៍ រួមទាំងម៉ាឡេស៊ី ឥណ្ឌូណេស៊ី ថៃ ក៏ដូចជាកម្ពុជា ដែលទើបបានចុះហត្ថលេខាលើពិធីសារជាមួយចិន​កាលពីខែមេសា ស្តីពីលក្ខខណ្ឌតម្រូវ​ភូតគាម​អនាម័យសម្រាប់ការនាំចេញផ្លែទុរេនស្រស់ពីកម្ពុជា ទៅកាន់ប្រទេសចិន។

បច្ចុប្បន្ន អាជ្ញាធរវៀតណាម កំពុងណែនាំកសិករឱ្យគោរពតាមបទប្បញ្ញត្តិសុវត្ថិភាពចំណីអាហារអន្តរជាតិ ដើម្បីរក្សាលទ្ធភាពទទួលបានទីផ្សារ និងកំពុងជំរុញការវិនិយោគលើបច្ចេកវិទ្យាកសិកម្ម ដើម្បីបង្កើនគុណភាពផ្លែឈើ រួមទាំងទុរេន៕

The post វិបត្តិទុរេនវៀតណាម៖ តម្លៃធ្លាក់ចុះគំហុក ខណៈកសិករគ្មានជម្រើសក្រៅពីដាក់លក់តាមផ្លូវ appeared first on Kampuchea Thmey Daily.

បុរសជាកសិករដាំទុរេនម្នាក់នៅតំបន់ដីសណ្ដទន្លេមេគង្គ បាន​និយាយថា មាន​ឈ្មួលចុះទិញ​ទុរេនតិចតួច ខណៈ​រដូវមកផលធំខិតចូលមកដល់ហើយ។ លោកនិយាយថា ​ឈ្មួញខ្លះបានចុះហត្ថលេខាលើកិច្ចសន្យាទិញ​តាំងពីខែ​មីនាដើម្បីទិញ​ទុរេន​របស់​លោក​ក្នុងតម្លៃ ៦០ ០០០ ដុង/គីឡូក្រាម ​ប៉ុន្តែ​លោក​បារម្ភថា ពួកគេអាចនឹងលុបចោលការទិញវិញនៅពេលដែល​តម្លៃទុរេនបន្តធ្លាក់ចុះ។​ កសិករដែល​នៅក្នុងខេត្ត Tien Giang ដដែល បន្តថា៖ «ជម្រើសតែមួយគត់ឥឡូវនេះ គឺលក់ឱ្យឈ្មួញលក់រាយតូច»។

លោក Minh Thai ​ដែលជាពាណិជ្ជករ​ក្នុងខេត្ត Tien Giang បាននិយាយថា កាលពីឆ្នាំមុន លោក​បានទិញទុរេនរហូតដល់ ៣០ តោន/ថ្ងៃ សម្រាប់​នាំ​ចេញទៅប្រទេសចិន ដែលជាទីផ្សារ​ទុរេនដ៏ធំបំផុតរបស់ពិភពលោក ប៉ុន្តែនៅឆ្នាំនេះលោក​ទិញត្រឹមតែប្រហែល ៣-៤ តោនប៉ុណ្ណោះ ដើម្បីលក់លើទីផ្សារក្នុងស្រុក បន្ទាប់ពីចិនរឹតត្បឹត​លើ​ការនាំចូលទុរេន។

បើតាម​ VnExpress ​ឈ្មួញភាគច្រើន​នៅ​តំបន់​ដាំ​ទុរេន​ផ្សេងទៀត​ដូចជា​ទីក្រុង Can Tho និង​ខេត្ត Ben Tre បាន​​ផ្អាកការទិញ​​ទុរេន​​ដូចគ្នា​ ដោយ​ខ្លាច​​ខាត​។

គួរគូស​បញ្ជាក់ថា តម្លៃទុរេនវៀតណាម​បាន​ធ្លាក់ចុះ​ធ្ងន់ធ្ងរ​ ក្រោយ​ចិន​រឹតបណ្ដឹងលើទុរេននាំចូលកាលពីដើមឆ្នាំ ដែលធ្វើឱ្យ​​ឈ្មួញ​វៀតណាម​ត្រូវផ្គត់ផ្គង់ច្រើន​លើសតម្រូវការក្នុងស្រុក។ ការដឹកជញ្ជូនជាច្រើនត្រូវជាប់គាំងនៅត្រឹមច្រកព្រំដែន ដើម្បីរងចាំការត្រួតពិនិត្យរកសារធាតុគីមីរហូតដល់រយៈពេល​រហូតដល់ ១ សប្ដាហ៍ ខណៈកាលពីមុនចំណាយពេលត្រឹមតែ ១-២ ថ្ងៃប៉ុណ្ណោះ។

កាលពីឆ្នាំ ២០២៤ វៀតណាម​បាន​នាំ​ចេញ​ទុរេន​ក្នុង​តម្លៃ​ ៣,៣​ ប៊ីលាន​ដុល្លារ​​ ឬ​ជិត​ពាក់​កណ្តាល​នៃ​ការ​នាំ​ចេញ​ផ្លែ​ឈើ​ និង​បន្លែ ​ទាំង​អស់។ តួលេខនេះបានធ្លាក់ចុះ ៦៩ ភាគរយ ក្នុងអត្រាប្រចាំឆ្នាំ ​មកត្រឹម ៥២,៧ លានដុល្លារ ក្នុងរយៈពេល ២ ខែដំបូងនៃដើម​ឆ្នាំ ២០២៥ ដោយការដឹកជញ្ជូនទៅកាន់ប្រទេសចិន បានធ្លាក់ចុះ ៨៣ ភាគរយ មកនៅត្រឹម ២៧ លានដុល្លារ៕

The post តម្លៃទុរេនវៀតណាមបន្តធ្លាក់ចុះធ្ងន់ ខណៈរដូវប្រមូលផលធំចូលមកដល់ appeared first on Kampuchea Thmey Daily.

លោក ហេង ឆេងលី ប្រធានសហគមន៍ទុរេនបែកអន្លូង ស្រុកស្ទឹងត្រង់ ខេត្តកំពង់ចាម ប្រាប់​កម្ពុ​ជាថ្មីថា រដូវកាលប្រមូលផលទុរេននៅឆ្នាំ ២០២៥ បានចាប់ផ្ដើមបណ្ដើរៗ​ជាមួយ​នឹង​ប្រ​ភេទ​ពូជ​ទុរេន មូសាំងឃីង និងពូជស្រាលមួយចំនួនទៀត ខណៈទុរេនមាន់ថង នឹងអាច​ប្រ​មូផល​បាន​នៅ​ដំណាច់ខែមេសានេះ។

លោក ហេង ឆេងលី ប្រាប់ថា ទិន្នផលឆ្នាំនេះ ល្អប្រសើរ បើធៀបនឹងឆ្នាំមុន ខណៈតម្លៃ​ប្រភេទ​ពូជ​មូសាំងឃីងបានល្អចន្លោះពី ១ ម៉ឺន ៧ ពាន់ ដល់ ២ ម៉ឺន ៥ ពាន់រៀល លក់ចេញពីចម្ការ។

យោងតាមក្រសួងកសិកម្ម កម្ពុជាមានផ្ទៃដី​ដាំដុះ​ដំណាំ​ទុរេនជាង ៩ ពាន់​ហិក​តា ក្នុងនោះផ្ទៃដីប្រមូល​ផលប្រមាណ ៥ ពាន់ហិកតា ខណៈបាននាំ​ចេញ​ផ្លែទុរេន​ចំនួន​ជាង ៧ ពាន់តោនកាលពីឆ្នាំ ២០២៤៕

អត្ថបទ៖ ឡេង ដេត

The post កម្ពុជាផ្ដើមប្រមូលផលទុរេនរដូវកាលថ្មី appeared first on Kampuchea Thmey Daily.