ការរឹតត្បិតនាំចូលទុរេនរបស់ចិន ផ្ដល់ទាំងឱកាស និងផលអវិជ្ជមានសម្រាប់ទុរេនកម្ពុជា

ប្រទេសចិនដែលជាទីផ្សារស្រូបទាញទុរេនដ៏ធំរបស់វៀតណាម និងថៃ បានរឹតបន្តឹងការនាំចូល​ទុរេន​​​ពីវៀតណាម និងថៃ ដោយបានធ្វើតេស្តរកសារធាតុគីមីម្យ៉ាង ដែលអាចបង្កជាជំងឺមហារីក ក្រោយ​ចិនរកឃើញសារធាតុនេះនៅលើផ្លែទុរេនថៃកាលពីដំណាច់ឆ្នាំមុន។

លោក ឃឹម ប៊ុនឡែន ប្រធានសហគមន៍ចម្ការស្តេចទុរេន បានលើកឡើងថា ការរឹតបន្តឹង​ការ​នាំ​ចូល​ទុរេនរបស់ប្រទេសចិនពីវៀតណាម និងថៃ ផ្ដល់ទាំងឱកាស និងផលអវិជ្ជ​មានសម្រាប់​ទុរេន​​​​កម្ពុជា។

លោក ឃឹម ប៊ុនឡែន បានលើកឡើងថា បញ្ហាគុណភាព សុវត្ថិភាពទុរេននៅប្រទេស​ជិត​ខាងរបស់​កម្ពុជា​ គឺបានធ្វើឱ្យមានការផ្លាស់ប្ដូរការគិតរបស់ប្រជាពលរដ្ឋក្នុងការ​យកចិត្តទុក​ដាក់​មកលើ​ទុរេន​​​ខ្មែរ ខណៈប្រទេសចិនបានអនុញ្ញាតឱ្យកម្ពុជានាំចូលទៅកាន់ទីផ្សារខ្លួន ដែល​ជាឱកាសឱ្យយើងបង្កើតម៉ាកទុរេនខ្មែរ។

លោក ឃឹម ប៊ុនឡែនបន្ថែមថា៖ «វាជាមេរៀនសម្រាប់យើង ដោយសារបញ្ហាគុណភាព សុវត្ថិ​ភាព​ ធ្វើឱ្យស្ថានភាពនៅថៃ ​និងវៀតណាមមានការរង្គោះរង្គើ អញ្ចឹងតើយើងត្រូវ​ត្រៀម​ខ្លួន​ម៉េច ព្រោះ​យើងអត់ទាន់បានចូលប្រឡូកក្នុងសៃវៀននៅ​ឡើយ​ទេ ផលិតផល​របស់យើង​រាល់​ថ្ងៃគឺ​ចេញតាមច្រកប្រទេសជិតខាង ហើយបាននាំបន្តទៅចិន អញ្ចឹងវាគឺជាមេរៀន​ល្អ​មួយ​ដែល ដែលកម្ពុជាយើងត្រូវរៀនសូត្រហើយ ហើយកុំពឹងផ្អែកទៅលើតែទីផ្សារ​ចិន​តែ​មួយ យើង​ត្រូវ​មើល​ទីផ្សារផ្សេងទៀត»។

ទន្ទឹមនឹងគុណសម្បត្តិ ក៏មានគុណវិបត្តិដែរ ប្រសិនបើបញ្ហានេះ នៅអូសបន្លាយវា​អាចប៉ះ​ពាល់​ទៅលើតម្លៃ នៅចំពេលដែលយើងប្រមូលផលទុរេននៅចុងខែ ឧសភានេះ ចាប់ផ្ដើម​ប្រមូល​ច្រើនប្រភេទពូជមាន់ថង។

បើតាមលោក ឃឹម ប៊ុនឡែន៖ «កាលណាទុរេននៅប្រទេសជិតខាង​ចុះថោក អាចមានលំ​ហូរ​ទុរេន​​ចូលមកស្រុកខ្មែរយើង​ដែលធ្វើឱ្យមានផលប៉ះពាល់ដល់សុខភាពអ្នកបរិភោគ ទុរេនដែល​ហូរ​ចូលមក មិនមែនជាទុរេនមានស្ដង់ដាខ្ពស់ដើម្បីនាំចេញទេ ទុរេនដែលល្អ គឺគេនាំ​ចេញទៅ​លក់នៅក្រៅប្រទេសហើយ ទុរេនដែលនាំចូលមកស្រុកខ្មែរ​ខ្ញុំហាននិយាយថា  ភាគច្រើនគឺ​ជា​ទុរេន​​ដែលគេបានបដិសេធគុណភាពស្ដង់ដា បានគេនាំយកមកស្រុកខ្មែរ​យើងលក់​ថោកៗ​ទុរេន​ថ្លៃគេលក់អស់ហើយ អញ្ចឹងខ្ញូំចង់ឱ្យបងប្អូនគិតគូសុខភាព សុវត្ថិភាព​ផ្ទាល់​ខ្លួន​ហើយ​អាហ្នឹង​គឺមាន​ផលប៉ះពាល់ខ្លាំងណាស់ ហើយ​វាក៏អាចប៉ះពាល់ដល់តម្លៃរបស់​ទុរេន​ក្នុងស្រុក​របស់យើង​ពេល​ប្រមូលផល»។

លោក ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្មមានប្រសាសន៍ថា អាជ្ញាធរស្ថាប័នពាក់ព័ន្ធបាន​ដាក់ចេញវិធានទប់ស្កាត់ការហាមឃាត់ទុរេនដែលមាន​​សារធាតុគីមីលួចនាំចូលមក។

លោក ប៉ែន សុវិជាតិ បន្ថែមថា ក្រសួងពាណិជ្ជកម្មបានអប់រំឱ្យម្ចាស់ចម្ការទុរេន និងអ្នកលក់ផ្លែឈើទាំងអស់កុំឱ្យនាំចូលទុរេនបរទេសហើយកុហកបន្លំថា ជាទុរេនរបស់ខ្មែរ ដើម្បីការពារអ្នកប្រើប្រាស់ និងសុខមាលភាពរបស់ប្រជាពលរដ្ឋ។

លោក ប៉ែន សុវិជាតិ បញ្ជាក់ថា៖ «ក្រសួងមិនព្រងើយកន្តើយទេ បច្ចុប្បន្ននេះ ហើយក៏សុំអំពាវនាវឱ្យ​មានកិច្ចសហការពីប្រជាជនអ្នកប្រើប្រាស់ អាចជូនដំណឹងមកក្រសួងពាណិជ្ជកម្ម ក្នុងករណីសង្ស័យថា ទុរេនដែលនាំចូល ឬដាក់លក់នៅកន្លែងណាមួយអាចជាទុរេនដែលមានផ្ទុកសារធាតុគីមី ឬទុរេននាំចូលពីក្រៅប្រទេស ហើយក្លែងបន្លំជាទុរេនកម្ពុជា ពី​ព្រោះ​​​​ឥឡូវនេះ យើងកំពុងយកចិត្តទុកដាក់ខ្ពស់បញ្ហាទុរេនដែលមានផ្ទុកសារធាតុដែលអាចបង្ករជាជំងឺផ្សេងៗ ខណៈជំងឺមហារីកកំពុងកើនឡើងនៅកម្ពុជា»។

យោងតាមក្រសួងកសិកម្ម រុក្ខាប្រមាញ់ និងនេសាទ គិតត្រឹមឆ្នាំ ២០២៤ កម្ពុជាមានផ្ទៃដីដាំដុះទុរេនជាង ៩ ពាន់ហិកតា ក្នុងនោះផ្ទៃដីអាចប្រមូល​ផល​បាន ៥ ពាន់ហិកតា ដែលផ្ដល់ទិន្នផលប្រមាណ ៨ ម៉ឺន ២ ពាន់តោន៕

អត្ថបទ៖ ឡេង ដេត