ធឿន ធារ៉ា Archives - Kampuchea Thmey Daily

កីឡាករលំដាប់ៗស្រុកខ្មែរច្រើននាក់បានចាញ់ក្នុងពេលបុណ្យអុំទូក

chean virakbot — Fri, 07 Nov 2025 01:30:26 +0000

នៅក្នុងឱកាសព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក មានការប្រកួតប្រដាល់គុនខ្មែរជាច្រើនគូ ក្នុងនោះមានការប្រកួតគុនចម្រុះ និងឃីកបុកស៊ីង ថែមទៀត។

លទ្ធផលពិតជាគួរឲ្យចាប់អារម្មណ៍ខ្លាំងមែនទែន។ កីឡាករ កីឡាការិនីកម្ពុជាលំដាប់ជួរមុខជាច្រើនគូបានបរាជ័យស្ទើរមិនគួរឲ្យជឿ។ ជើងខ្លាំងលំដាប់លេខ១ស្រុកខ្មែរទម្ងន់៥៧គីឡូក្រាម បឺត សង្ឃឹម បានចាញ់ក្នុងទឹកទី១ ហើយ មនុស្សឈើ សុខ ធី បានចាញ់ពិន្ទុ។

អ្វីដែលអ្នកគាំទ្រសោកស្តាយបំផុត គឺកីឡាករលំដាប់លេខ១ស្រុកខ្មែរទម្ងន់៧៣គីឡូក្រាម ធឿន ធារ៉ា បានចាញ់ដៃគូចាស់ បាវែល មកពីប្រទេសបេឡារុស្ស ដែលធ្វើឲ្យរូបគេធ្លាក់ត្រឹមវគ្គពាក់កណ្តាលផ្តាច់ព្រ័ត្រ ដណ្តើមខ្សែក្រវាត់គុនខ្មែរពិភពលោកដែលមានបេក្ខភាព៨នាក់ក្នុងមួយរាត្រី។

ជាមួយគ្នានេះ កីឡាករ គោរមៈ ច័ន្ទរាជ បានចាញ់ពិន្ទុកីឡាករចិនសម្រាប់ការប្រកួតឃីកបុកស៊ី ហើយកីឡាការិនី អេ យ៉ានុត បានចាញ់សន្លប់ក្រោមកណ្តាប់ដៃកីឡាការិនីអាមេរិក និងកីឡាករ គឹម វាសនា ក៏បានចាញ់សន្លប់។

ចំណែកការប្រកួតគុនចម្រុះវិញ គ្មានកីឡាករកម្ពុជាណាម្នាក់ដែលអាចទទួលបានជ័យជម្នះលើកីឡាករចិនឡើយ។

ទោះបីជាយ៉ាងណា លទ្ធផលដែលគួរឲ្យសរសើររបស់កីឡាករកម្ពុជាគឺ អេ អាំម៉ារីនភូថង ដណ្តើមខ្សែក្រវាត់បានពីកីឡាករអាមេរិន Even Boulton។ នេះជាបរាជ័យលើកទី១របស់កីឡាករអាមេរិក បន្ទាប់ពីរូបគេធ្លាប់ឈ្នះកីឡាករកម្ពុជាជាច្រើននាក់។ កូនប្រុសរបស់លោក អេ ភូថង ម្នាក់ទៀតគឺ ម៉ឺន មេឃា ក៏ទទួលបានជ័យជម្នះលើកីឡាករចិន សម្រាប់ការប្រកួតឃីកបុកស៊ីង ព្រមទាំងមានកីឡាករច្រើននាក់ទៀតដែលទទួលបានជោគជ័យ៕

អត្ថបទ៖ វីរបុត្រ

The post កីឡាករលំដាប់ៗស្រុកខ្មែរច្រើននាក់បានចាញ់ក្នុងពេលបុណ្យអុំទូក appeared first on Kampuchea Thmey Daily.

ធឿន ធារ៉ា កំពុងកាន់កំណត់ត្រា ជាកីឡាករប្រកួតខ្សែក្រវាត់ ៨ Men មិនធ្លាប់ចាញ់សោះ

Kosal Sem — Mon, 27 Oct 2025 08:36:40 +0000

អ្នកលេងពូថៅដៃ ធឿន ធារ៉ា កំពុងក្លាយជាកីឡាករគុនខ្មែរម្នាក់គត់ ដែលកំពុងកាន់កំណត់ត្រា ប្រកួតលក្ខណៈ ៨ នាក់ (៨ Men Tournament) ២ លើកមិនទាន់ចាញ់ទាល់តែសោះនៅក្នុងអាជីព។

ធឿន ធារ៉ា

ធឿន ធារ៉ា បច្ចុប្បន្ន ត្រូវបានគេចាត់ទុកជាកីឡាករលំដាប់កំពូលមួយរូបប្រចាំប្រទេស កម្ពុជា ហើយសូម្បី Forbes ដែលជាទស្សនាវដ្តីដ៏ល្បីមួយរបស់ សហរដ្ឋអាមេរិក ក៏ធ្លាប់ចុះផ្សាយអំពីកិត្យានុភាពរបស់គេផងដែរ។ គិតត្រឹមខែ តុលា នេះ ធឿន ធារ៉ា ធ្លាប់ប្រកួតអាជីពចំនួន ១៣៧ ដង ឈ្នះ ១០៤ ដង (ផ្តួលដៃគូឱ្យសន្លប់ ៤០ ដង) ចាញ់ ២៧ ដង និងស្មើ ៦ ដង។

ជុំវិញស្ថិតិនៃការប្រកួតខាងលើ គឺកូនសិស្សរបស់លោកគ្រូ អេ ភូថង ធ្លាប់ឆ្លងកាត់ការប្រកួតលក្ខណៈ ៨ Men ចំនួន ២ លើក ហើយជាលទ្ធផលដ៏អស្ចារ្យ គឺរូបគេមិនធ្លាប់មានប្រវត្តិបរាជ័យនោះទេ។ ក្នុងចំណោមការប្រកួត ៨ Men ទាំង ២ លើក គឺលើកទី ១ កីឡាករទទួលបានរង្វាន់ធំឡានខ្លាញ់ (Pick Up) មួយគ្រឿង និងលើកទី ២ ទទួលបានផ្ទះវីឡាមួយខ្នង។

រម្លឹកអំពីការប្រកួត ៨ Men លើកទី ១ គឺ ធឿន ធារ៉ា បានឈ្នះការប្រកួតចំនួន ៣ ប្រកួតក្នុងមួយថ្ងៃ នៅថ្ងៃទី ២៣ ខែវិច្ឆិកា ឆ្នាំ ២០២៣ មុនដណ្តើមខ្សែក្រវាត់ IPCC Kun Khmer World Champion មួយខ្សែ និងឡាន Pick Up មួយគ្រឿង។ ក្នុងការប្រកួតដំបូង ធារ៉ា បានឈ្នះកីឡាករ អ៊ុយក្រែន WHITE SHARK ដោយពិន្ទុ, ប្រកួតទី ២ យកឈ្នះកីឡាករ ឆេក MICHAL ដោយផ្តួលឱ្យសន្លប់ទឹកទី ១ និងការប្រកួតចុងក្រោយ ដែលជាការប្រកួតវគ្គផ្តាច់ព្រ័ត្រ បានយកឈ្នះលើកីឡាករ ប្រេស៊ីល BENTO ដោយផ្តួលឱ្យសន្លប់ទឹកទី ១។

ធឿន ធារ៉ា

ចំណែកការប្រកួត 8 Men លើកទី ២ កាលពីថ្ងៃ សៅរិ៍ ទី ១៦ ខែ វិច្ឆិកា ឆ្នាំ ២០២៤ គឺ ធឿន ធារ៉ា បន្តឈ្នះ ៣ ប្រកួតទៀតក្នុងមួយថ្ងៃ និងដណ្តើមបានខ្សែក្រវាត់ ១ IPCC Kun Khmer មួយខ្សែ រួមជាមួយរង្វាន់ធំផ្ទះវីឡាមួយខ្នង។ ប្រកួតទី ១ កីឡាករមកពីខេត្ត ព្រៃវែង បានឈ្នះកីឡាករ ប្រេស៊ីល VICTOR TEIXEIRA ដោយផ្តួលឱ្យសន្លប់ទឹកទី ១, ប្រកួតទី ២ យកឈ្នះកីឡាករ បារាំង ALAN LEVEQUE ដោយផ្តួលឱ្យសន្លប់ទឹកទី ១ និងប្រកួតទី ៣ ដែលជាការប្រកួតវគ្គផ្តាច់ព្រ័ត្រ រូបគេបានឈ្នះកីឡាករ អូស្ត្រាលី STEVENS MATTHEW ដោយផ្តួលឱ្យសន្លប់ទឹកទី ៣។

តាមរយៈជ័យជម្នះលក្ខណៈ 8 Men ទាង ២ ខាងលើនេះ បានធ្វើឱ្យកិត្តិនាមរបស់អ្នកលេងពូថៅដៃកាន់តែល្បីរន្ទឺខ្លាំង ដោយមជ្ឍដ្ឋានជុំវិញ បានទទួលស្គាល់រូបគេ ជាកីឡាករ ដែលមានសមត្ថភាពខ្លាំង និងជាកីឡាករគុនខ្មែរដ៏ជោគជ័យបំផុតម្នាក់។

យ៉ាងណា នៅថ្ងៃទី ៦ ខែ វិច្ឆិកា ឆ្នាំ ២០២៥ ខាងមុខ រូបគេទទួលបានឱកាសថ្មី ដើម្បីប្រកួត 8 Men ជាថ្មីម្តងទៀត ដែលជាលើកទី ៣ ក្នុងអាជីព។ សម្រាប់សមាសភាពកីឡាករក៏ត្រូវបានប្រកាសរួចរាល់ផងដែរ ក្នុងនោះមាន ធឿន ធារ៉ា, កីឡាករ ប៊ែលឡារុស Pavel Crishanovich, កីឡាករ អ៊ីរ៉ង់ Majid Shahriyari, កីឡាករ រុស្ស៊ី Vassili Thaikilla, កីឡាករ ម៉ារ៉ុក Mohammed Ali, កីឡាករ នូវែលសេឡង់ Nivek Hook, កីឡាករ ចិន Li Po Ling និងកីឡាករ អេស្ប៉ាញ Mohammed Bullalmaun៕

ធឿន ធារ៉ា

អត្ថបទ៖ សេម កុសល

The post ធឿន ធារ៉ា កំពុងកាន់កំណត់ត្រា ជាកីឡាករប្រកួតខ្សែក្រវាត់ ៨ Men មិនធ្លាប់ចាញ់សោះ appeared first on Kampuchea Thmey Daily.

លោក អេ ភូថង ចង់ឲ្យ ធឿន ធារ៉ា សងសឹកដៃគូចាស់ ប៉ុន្តែសុំលេងហ្គង់ធំ ៥ទឹក

Sina Noun — Thu, 02 Oct 2025 04:20:04 +0000

គ្រូប្រដាល់ជើងចាស់លោក អេ ភូថង ចង់ឲ្យ ធឿន ធារ៉ា សងសឹកដៃគូចាស់កីឡាករ RUSLAN NAGIYEV ដែលឈ្នះនៅទឹកទី១ កាលពីថ្ងៃទី២៦ កញ្ញា ២០២៥ ប៉ុន្តែប៉ះគ្នាជាថ្មីសុំវាយបែបលក្ខណៈហ្គង់ធំ ចំនួន ៥ទឹកវិញម្ដង។

កីឡាករផ្ដួល ធារ៉ា (Town Sports)

លោក អេ ភូថង បានឲ្យដឹងថា លោកមានបំណងចង់ឲ្យកូនសិស្សរបស់លោកគឺ ធឿន ធារ៉ា សងសឹកលើកីឡាករ RUSLAN NAGIYEV ដែលទើបឈ្នះក្នុងទឹកទី១ កាលពីថ្ងៃទី២៦ ខែកញ្ញា ឆ្នាំ២០២៥ ថ្មីៗនេះម្ដងទៀត។

យ៉ាងណាចាំមើលរបួសជាសៈស្បើយសិន និងសាកសួរម្ចាស់ខ្លួនផងដែរ។ ប៉ុន្តែបើរូបលោកផ្ទាល់បណ្ដោយគឺចង់ឲ្យប្រកួតសងសឹកវិញ ប៉ុន្តែសុំវាយបែបហ្គង់ធំ ចំនួន៥ទឹក។ លោកក៏មានបំណងលែងចង់ឲ្យ ធារ៉ា ប្រកួតបែបអំបោះឆៅតទៀតដែរ។

លោក អេ ភូថង (រូបភាពផេកសហព័ន្ធ)

បញ្ជាក់ដែរថា កីឡាករ ធឿន ធារ៉ា បានរងរបួសឈឺភ្នែកខាងស្ដាំបន្ទាប់ពីចូលកណ្ដាប់ដៃឆ្វេងរបស់កីឡាករបរទេស RUSLAN NAGIYEV អំឡុងទឹកទី១ និងត្រូវបោះបង់ការប្រកួតក្នុងជំនួបមិត្តភាពអន្តរជាតិលើសង្វៀនថោន កាលពីថ្ងៃទី២៦ ខែកញ្ញា ឆ្នាំ២០២៥៕

ធារ៉ា និង RUSLAN NAGIYEV

អត្ថបទដោយ៖ នួន ស៊ីណា

The post លោក អេ ភូថង ចង់ឲ្យ ធឿន ធារ៉ា សងសឹកដៃគូចាស់ ប៉ុន្តែសុំលេងហ្គង់ធំ ៥ទឹក appeared first on Kampuchea Thmey Daily.

លោក អេ ភូថង៖ របួសភ្នែក ធឿន ធារ៉ា មិនអីទេធូរស្រាលហើយ

Sina Noun — Tue, 30 Sep 2025 01:53:11 +0000

លោក អេ ភូថង ថារបួសភ្នែករបស់ ធឿន ធារ៉ា គឺមិនអីទេធូរស្រាលហើយ និងកំពុងញុំថ្នាំតាមដានតាមគ្រូពេទ្យប្រាប់បន្តទៀត ខណៈការហ្វឹកហាត់មិនទាន់អាចចូលវិញនៅឡើយទេ។

ធឿន ធារ៉ា និងដៃគូ

គ្រូប្រដាល់ជើងចាស់លោក អេ ភូថង ថាចំពោះស្ថានភាពរបួសភ្នែករបស់កូនសិស្សខ្លួននៅពេលនេះមានសភាពធូរស្រាលឡើងវិញហើយ ពោលពេលត្រូវអំឡុងពេលប្រកួតនោះគឺចុកភ្លាមៗតែម្ដង។

យ៉ាងណា ធារ៉ា ត្រូវបន្តតាមដានរបួសភ្នែកតាមដែលគ្រូពេទ្យបានប្រាប់ និងត្រូវទៅជួបពេទ្យតាមការណាត់ជាដើម។ បច្ចុប្បន្ននេះគឺកូនសិស្សរបស់ខ្លួនខាងលើគឺនៅមិនទាន់អាចចូលហ្វឹកហាត់វិញនោះបានទេ។

រូបភាពលើផេកថោន

បញ្ជាក់ដែរថា កីឡាករ ធឿន ធារ៉ា បានរងរបួសឈឺភ្នែកខាងស្ដាំបន្ទាប់ពីចូលកណ្ដាប់ដៃឆ្វេងរបស់កីឡាករបរទេស RUSLAN NAGIYEV អំឡុងទឹកទី១ ក្នុងជំនួបមិត្តភាពអន្តរជាតិលើសង្វៀនថោន កាលពីថ្ងៃទី២៦ ខែកញ្ញា ឆ្នាំ២០២៥។ រូបគេបោះបង់ការប្រកួតត្រឹមទឹកទី១ នោះតែម្ដង ខណៈការចាញ់ដ៏លឿននេះបានធ្វើឲ្យអ្នកគាំទ្រគុនខ្មែរមានការភ្ញាក់ផ្អើលជាខ្លាំង៕

RUSLAN NAGIYEV ពេលឈ្នះ ធារ៉ា (រូបភាពផេកថោន)

អត្ថបទដោយ៖ នួន ស៊ីណា

The post លោក អេ ភូថង៖ របួសភ្នែក ធឿន ធារ៉ា មិនអីទេធូរស្រាលហើយ appeared first on Kampuchea Thmey Daily.

ខានចាញ់យូរ ធឿន ធារ៉ា និង អេ អាំម៉ារីន ចាប់ដៃគ្នាចាញ់ក្នុងកម្មវិធីតែមួយ

Sina Noun — Mon, 29 Sep 2025 03:27:46 +0000

អ្នកប្រដាល់ល្បីឈ្មោះកម្រចាញ់ និងជាសិស្សគុនរបស់លោក អេ ភូថង គឺកីឡាករ ធឿន ធារ៉ា និងកូនប្រុសរបស់លោក អេ អាំម៉ារីន ជើងខ្លាំងរបស់កម្ពុជាទាំងពីរចាញ់ដូចគ្នាក្នុងកម្មវិធីប្រដាល់តែមួយកាលពីថ្ងៃទី២៦ ខែកញ្ញា ឆ្នាំ២០២៥ លើសង្វៀនថោន។

ធារ៉ា និង អាំម៉ារីន

ការចាញ់របស់ ធឿន ធារ៉ា ហាក់ធ្វើឲ្យអ្នកគាំទ្រគុនខ្មែរមានការភ្ញាក់ផ្អើលខ្លាំង ព្រោះកម្រឃើញកីឡាកររូបនេះចាញ់សន្លប់ណាស់ពិសេសរាល់ការប្រកួតរបស់គេនៅសង្វៀនថោនតែងតែធ្វើបានល្អ។ ការចាញ់នេះហាក់លឿនខ្លាំងពេកត្រឹមទឹកទី១ ខណៈម្នាក់ៗមិនទាន់ចេញស្នៀតអស់នៅឡើយទេ។

ការប្រកួតបែបរុំអំបោះឆៅនេះគឺប្រឈមនិងគ្រោះថ្នាក់ខ្លាំង ដូច្នេះទាល់តែមានការប្រុងប្រយ័ត្នគ្រប់ពេលទើបបាន។ ទឹកទី១ កីឡាករ RUSLAN NAGIYEV រូបនេះគឺទម្រង់វាយល្អចេញចូលលឿន និងឆក់ដៃបានច្រើន ប៉ុន្តែមិនសូវត្រូវ។ ការសន្លប់របស់ ធារ៉ា នេះដោយសារតែរូបគេឆក់វាយឆ្វេងទៅលើពោះរបស់ RUSLAN NAGIYEV ក៏ភ្លាត់ត្រូវដៃឆ្វេងរបស់ដៃគូវិញត្រង់ភ្នែកស្ដាំធ្វើឲ្យឈឺរហូតបោះបង់ការប្រកួតនៅពេលនោះតែម្ដងទៅ។

រូបភាពលើផេក Town Sports

ចំណែក អេ អាំម៉ារីន វិញមិនចាញ់សន្លប់ដូច ធារ៉ា ឡើយ ប៉ុន្តែអស់ស៊ុហ្វរលីងដោយសារប្ដូរគ្នាផង និងដៃគូវាយត្រូវច្រើនផង។ កូនប្រុសលោក អេ ភូថង រូបនេះក៏កម្រចាញ់ការប្រកួតផងដែរ ពោលតាមរយៈកាយសម្បទាខ្ពស់ វែងល្អ និងចង្វាក់វាយកាច រួមផ្សំការបោះជង្គង់ល្អផងនោះទើបរូបគេកម្រចាញ់ការប្រកួតណាស់។

រូបភាពលើផេក Town Sports

អាចថាជាការចៃដន្យខ្លាំងណាស់កូនសិស្ស និងកូនបង្កើតរបស់លោក អេ ភូថង ទាំងពីរបែរជាបរាជ័យចាញ់ដៃគូប្រកួតដូចគ្នានៅលើកម្មវិធីតែមួយជាមួយគ្នាកាលពីយប់ថ្ងៃទី២៦ ខែកញ្ញា ឆ្នាំ២០២៥ លើសង្វៀនថោននៅពេលនោះ៕

អត្ថបទដោយ៖ នួន ស៊ីណា

The post ខានចាញ់យូរ ធឿន ធារ៉ា និង អេ អាំម៉ារីន ចាប់ដៃគ្នាចាញ់ក្នុងកម្មវិធីតែមួយ appeared first on Kampuchea Thmey Daily.

លោក អេ ភូថង ប្រាប់ថា មិនដឹងរឿងផ្ទាល់ខ្លួនរបស់ ធឿន ធារ៉ា ខណៈបែកធ្លាយវីដេអូជក់បារីអេឡិចត្រូនិក

chean virakbot — Fri, 16 May 2025 07:57:54 +0000

កីឡាករប្រដាល់គុនខ្មែរជួរមុខ ធឿន ធារ៉ា បានកំពុងត្រូវបានមហាជនរិះគន់យ៉ាងខ្លាំងពីវីដេអូឃ្លីបដែលបែកធ្លាយពីការជក់បារីអេឡិចត្រូនិក។ ការបែកធ្លាយវីដេអូឃ្លីបនេះបានកើតមានឡើងស្របពេលកម្រិតគុណភាពប្រកួតលើសង្វៀនហាក់ដូចជាធ្លាក់ចុះ។

លោក អេ ភូថង និងភរិយា ព្រមទាំង ធឿនធារ៉ា

ធឿន ធារ៉ា មិនសូវបានប្រកួតញឹកញាប់ទេក្នុងឆ្នាំ២០២៥។ រាល់ពេលឡើងប្រកួតម្តងៗក្នុងមួយរយៈពេលចុងក្រោយនេះ រូបគេឆាប់អស់កម្លាំងស៊ុហ្វ។ ជាពិសេសការប្រកួតជាមួយកីឡាករសេណេហ្គាល់ Abdoulaye Diallo កាលពីថ្ងៃទី៤ ខែឧសភា ឆ្នាំ២០២៥ ធឿន ធារ៉ា បានកើតមានអាការគ្រុនញាក់ ក្រោយការប្រកួត។ ពេលនោះមានការលើកឡើងពីមូលហេតុថា រូបគេបានឡើងប្រកួតទាំងឈឺ ដោយសារផ្កាសាយ ពេលទៅថ្លឹងទម្ងន់ប៉ះទឹកភ្លៀង។

ករណីអស់កម្លាំងស៊ុហ្វ និងឈឺពេលឡើងប្រកួតក៏ជាផ្នែកមួយដែលធ្វើឲ្យមហាជនចាប់អារម្មណ៍ទៅហើយ ប៉ុន្តែចុងក្រោយបំផុតនេះ ស្រាប់តែបែកធ្លាយវីដេអូឃ្លីបជក់បារីអេឡិចត្រូនិក។ គេមិនទាន់ដឹងច្បាស់ថា វីដេអូឃ្លីបនេះកើតឡើងតាំងពីពេលណា ហើយជាវីដេអូឃ្លីបមែនទែន ឬជាការថតសម្តែងអ្វីមួយ។

ជុំវិញរឿងនេះ លោក អេ ភូថង ដែលជាគ្រូបង្វឹករបស់ ធឿន ធារ៉ា បានឆ្លើយតបនឹងសារព័ត៌មាន«កម្ពុជាថ្មី»ថា ៖«អត់ដឹងទេ អត់ដឹងទេ កុំសួរលោកគ្រូ។ ការហ្វឹកហាត់ធម្មតាទេ មានឈ្មោះវ៉ៃក៏ហ្វឹកហាត់ធម្មតា អត់មានឈ្មោះវ៉ៃ គាត់នៅផ្ទះគាត់។ ដឹងតែប៉ុណ្ណោះ បើវា (ធារ៉ា) ទៅធ្វើអីទៀត គ្រូអត់សូវដឹងទេ តែមិនអីទេ ចាំមកហាត់វិញ គ្រូដាស់តឿនទៀត ដើម្បីកុំឲ្យបំពុលសង្គម។ យើងជាបុគ្គលល្បី ត្រូវធ្វើជាគំរូដល់មហាជន ចាំគ្រូជួយដាស់តឿនថែមទៀត»។

លោកគ្រូបានបញ្ជាក់ថា ៖«មានគេតេសួរគ្រូច្រើនណាស់ គ្រូមិចដឹង គ្រូអត់ដឹង ដោយសារគ្រូបង្ហាត់ពេលដែលគាត់មកហាត់ហ្នឹង។ ពេលក្រោយហ្វឹកហាត់គាត់ទៅធ្វើអី គ្រូអត់ដឹងទេ»។

នេះមិនមែនជាលើកទី១ទេដែលមហាជនចាប់អារម្មណ៍ និងរិះគន់ទៅលើសកម្មភាពផ្ទាល់ខ្លួនរបស់ ធឿន ធារ៉ា។ កន្លងមក រូបគេបានខកខានក្នុងការប្រកួតម៉ារ៉ាតុងអន្តរជាតិដែលមានបេក្ខភាព៨នាក់ មកពី៨ប្រទេសផ្សេងគ្នា ដោយសារលេងបាល់ទាត់ក៏កើតមានបញ្ហារបួស។ មុនពេលមានរបួសនោះ រូបគេត្រូវបានឃើញលេចមុខថតសម្តែងក្នុងវីដេអូកំប្លែងជាបន្តបន្ទាប់។

ធឿន ធារ៉ា ជាកីឡាករលំដាប់កំពូលប្រចាំប្រទេសកម្ពុជាក្នុងទម្ងន់៧២គីឡូក្រាម។ រូបគេជាកីឡាករកម្ពុជាតែម្នាក់គត់ដែលមានឈ្មោះក្នុងទស្សនាវដ្តីល្បីអាមេរិក Forbes និងឈ្នះខ្សែក្រវាត់ជាច្រើនខ្សែ រថយន្ត និងវីឡា។ កាលពីពេលថ្មីៗនេះ រូបគេក៏ទើបតែមានឈ្មោះជាប់ក្នុងជម្រើសជាតិគុនខ្មែរជាលើកដំបូងដែលត្រូវត្រៀមខ្លួនសម្រាប់ការប្រកួតអន្តរជាតិដូចជាកីឡាស៊ីហ្គេមជាដើម៕

អត្ថបទ៖ វីរបុត្រ

The post លោក អេ ភូថង ប្រាប់ថា មិនដឹងរឿងផ្ទាល់ខ្លួនរបស់ ធឿន ធារ៉ា ខណៈបែកធ្លាយវីដេអូជក់បារីអេឡិចត្រូនិក appeared first on Kampuchea Thmey Daily.

ធឿន ធារ៉ា ដណ្តើមខ្សែក្រវាត់ទី១០ ក្នុងអាជីព ប៉ះដៃគូមានប្រវត្តិមិនធម្មតា

Kosal Sem — Tue, 25 Mar 2025 01:14:14 +0000

ក្រោយសម្រាកនៅក្រៅសង្វៀនមួយរយៈធំ ទីបំផុតអ្នកលេងពូថៅដៃពិឃាដ ធឿន ធារ៉ា បានត្រឡប់មកកាន់សង្វៀនវិញហើយ ដោយនៅថ្ងៃ សុក្រ ទី ២៨ ចុងខែ មីនា នេះ ត្រូវជួបអ្នកប្រដាល់មកពីសហរដ្ឋអាមេរិក Maximiliano Cruz ដើម្បីដណ្តើមខ្សែក្រវាត់ IPCC តេជោសន្តិភាពពិភពលោក (TECHO SANTEPHEAP IPCC WORLD KUN KHMER CHAMPION)។

នេះជាបទពិសោធថ្មីមួយទៀត សម្រាប់កីឡាករកម្ពុជា ធឿន ធារ៉ា ដោយលើកនេះ រូបគេនឹងត្រូវជួបកីឡាករមកពីប្រទេស សហរដ្ឋអាមេរិក ដែលមានប្រវត្តិមិនធម្មតា។ យោងតាមប្រភពពីបណ្តាញសង្គម បច្ចុប្បន្នកីឡាករ Max Cruz មានវ័យ ២៦ ឆ្នាំ កម្ពស់ខ្ពស់ ១.៨០ ម៉ែត្រ។

Max Cruz ជាកីឡាករម្នាក់ ដែលបានហ្វឹកហាត់ប្រដាល់សេរីតាំងពីក្មេង និងបានប្រកួតជាច្រើនលើក ប៉ុន្តែគេបានចាប់ផ្តើមប្រឡូកចូលជាអ្នកប្រដាល់អាជីព នៅក្នុងឆ្នាំ ២០២២។ ក្នុងនោះគេធ្លាប់ឆ្លងកាត់ការប្រកួត ២០ ឈ្នះ ១២ ដង (ផ្តួលដៃគូឱ្យសន្លប់ ៩ដង) ចាញ់ ៦ ដង និងស្មើ ២ ដង។ ការប្រកួតចុងក្រោយកាលពីថ្ងៃទី ១៥ ខែ មីនា រូបគេបានស្មើគ្នាជាមួយកីឡាករ Alex Herrada។ ចំណុចពិសេស របស់កីឡាករ អាមេរិក រូបនេះ គឺមានកណ្តាប់ដៃត្រង់ ហើយអាចប្រើបានទាំងជង្គង់ និងកែងទៀតផង។

គួរបញ្ជាក់ថា ការប្រកួតនៅថ្ងៃទី ២៨ ចុងខែនេះ គឺជាការប្រកួតលក្ខណៈដណ្តើមខ្សែក្រវាត់ ដូច្នេះប្រសិនបើការប្រកួតនេះ អ្នកប្រដាល់មកពីខេត្តព្រៃវែង កូនសិស្សលោកគ្រូ អេភូថង អាចទទួលបានជ័យជម្នះ នោះរូបគេនឹងក្លាយជាកីឡាករកម្ពុជា ដែលមានខ្សែក្រវាត់ច្រើនជាងគេម្នាក់ ពោលគឺចំនួន ១០ ខ្សែ៕

អត្ថបទ៖ សេម កុសល

The post ធឿន ធារ៉ា ដណ្តើមខ្សែក្រវាត់ទី១០ ក្នុងអាជីព ប៉ះដៃគូមានប្រវត្តិមិនធម្មតា appeared first on Kampuchea Thmey Daily.

តាមរយៈការសុំទោស ធឿន ធារ៉ា ប្តេជ្ញាមិនឲ្យអ្នកគាំទ្រខកបំណងទៀត

chean virakbot — Thu, 02 Jan 2025 01:48:38 +0000

កីឡាករប្រដាល់គុនខ្មែរ ធឿន ធារ៉ា បានសុំទោសអ្នកគាំទ្រ និងបានប្តេជ្ញាមិនធ្វើឲ្យអ្នកគាទ្រខកបំណងទៀតឡើយ បន្ទាប់ពីរូបគេបានខកខានក្នុងការប្រកួតនាថ្ងៃទី៧ ខែមករា ឆ្នាំ២០២៥ ដោយសាររបួស។

ធឿន ធារ៉ា បានលើកឡើងថា ៖«ខ្ញុំពិតជាសុំទោសយ៉ាងខ្លាំងមែនទែនចំពោះការអាក់ខាន មិនបានប្រកួតសម្រាប់ថ្ងៃទី៧មករាខាងមុខនេះ។ ខ្ញុំគ្មានពាក្យអ្វីនិយាយកែខ្លួនទេ ព្រោះគ្រប់យ៉ាងជាកំហុសរបស់ខ្ញុំដែលប្រមាថ មិនចេះប្រុងប្រយ័ត្ន»។

កីឡាករបន្ថែមថា ៖«សុំទោសពុកម៉ែបងប្អូន អ្នកគាំទ្រទាំងអស់ ទូទាំងប្រទេស។ សុំទោសសម្តេចពុក សុំទោសមេធំ សុំទោសមេ Tommy។ ខ្ញុំ ធឿន ធារ៉ា សុំពេលសម្រាកព្យាបាលរបួសមួយរយៈ បន្ទាប់ពីនេះ ខ្ញុំនឹងមិនធ្វើឲ្យពុកម៉ែបងប្អូន ខកបំណងទៀតឡើយ»។

ការប្តេជ្ញាចិត្ត និងការសុំទោស បានកើតមានឡើង បន្ទាប់ពីរូបគេបានធ្វើឲ្យខកខានក្នុងការចូលរួមប្រកួតក្នុងព្រឹត្តិការណ៍ធំមួយនាថ្ងៃទី៧ ខែមករា ឆ្នាំ២០២៥ របស់សង្វៀនថោន ដោយសាររបួសនៅពេលរូបគេបានចូលរួមលេងបាល់ទាត់មិត្តភាពដើម្បីសប្បុរសធម៌កាលពីប៉ុន្មានថ្ងៃមុន។

ព្រឹត្តិការណ៍ប្រកួតគ្រោងធ្វើនៅថ្ងៃទី៧ ខែមករា ខាងមុខ ត្រូវបានរៀបចំជាច្រើនខែមកហើយដែលមានកីឡាករបារាំង Omar Samb ដែលធ្លាប់ឈ្នះ ឈឿង ល្វៃ នៅប្រទេសបារាំង និងធ្លាប់ឈ្នះកីឡាករបរទេសនៅកម្ពុជា។ កីឡាករបារាំងរូបនេះបានលើកឡើងជាយូរមកហើយដែលរូបគេចង់ជួប ធឿន ធារ៉ា ហើយជារឿយៗរូបគេបង្ហាញសារជាសាធារណៈអំពីការមកប្រកួតនៅកម្ពុជានាខែមករានេះ។ ទោះបីជាយ៉ាងណា បំណងរបស់កីឡាករបារាំងនាពេលនេះបានរលាយសូន្យ ពីព្រោះគ្មានវត្តមាន ធឿន ធារ៉ា ឡើយ។

ធឿន ធារ៉ា ជាកីឡាករគុនខ្មែរដ៏ល្បីល្បាញមួយរូបនាប្រមាណ៣ឆ្នាំចុងក្រោយ។ រូបគេមានតម្លៃខ្ពស់មិនក្រោម២០០០ដុល្លារក្នុងមួយប្រកួត។ នៅឆ្នាំ២០២៤កន្លងទៅ រូបគេរកចំណូលបានមិនក្រោម១០ម៉ឺនដុល្លារអាមេរិកឡើយដែលបូកសរុបតម្លៃខ្លួន ប្រាក់រង្វាន់ និងផ្ទះវីឡា។

ធឿន ធារ៉ា ជាអត្តពលិកកម្ពុជាតែម្នាក់គត់បានជាប់ឈ្មោះក្នុងទស្សនាវដ្តីអាមេរិក Forbes ក្នុងឆ្នាំ២០២៤ ប្រចាំតំបន់អាស៊ីដែលផ្តោតលើសហគ្រិនជោគជ័យ បុគ្គលមានឥទ្ធិពល និងបុគ្គលមានវឌ្ឍភាពក្នុងអាជីពឈានដល់កម្រិតកំពូល។

តាមរយៈភាពល្បីល្បាញនៅលើសង្វៀនទាំងក្នុង និងក្រៅប្រទេស ធឿន ធារ៉ា ទទួលបានឱកាសផ្សេងៗច្រើនដូចជា ការថតផ្សាយពាណិជ្ជកម្ម ការចូលរួមក្នុងកម្មវិធីសង្គម ការប្រកួតបាល់ទាត់មិត្តភាពដើម្បីសប្បុរសធម៌ និងថតវីដេអូឃ្លីបបែបកំប្លែងជាដើម៕

អត្ថបទ៖ វីរបុត្រ

The post តាមរយៈការសុំទោស ធឿន ធារ៉ា ប្តេជ្ញាមិនឲ្យអ្នកគាំទ្រខកបំណងទៀត appeared first on Kampuchea Thmey Daily.

ធឿន ធារ៉ា Archives - Kampuchea Thmey Daily

កីឡាករ​លំដាប់​ៗ​​ស្រុក​ខ្មែរ​ច្រើន​នាក់​​បាន​ចាញ់​ក្នុង​ពេល​បុណ្យ​អុំទូក

ធឿន ធារ៉ា កំពុងកាន់កំណត់ត្រា ជាកីឡាករប្រកួតខ្សែក្រវាត់ ៨ Men មិនធ្លាប់ចាញ់សោះ

លោក​ អេ​ ភូថង​ ចង់​ឲ្យ​ ធឿន​ ធារ៉ា​ សងសឹក​ដៃគូ​ចាស់​ ប៉ុន្តែ​សុំ​លេង​ហ្គង់ធំ​ ៥ទឹក​

លោក​ អេ​ ភូថង​៖​ របួស​ភ្នែក​ ធឿន​ ធារ៉ា​ មិន​អីទេ​ធូរស្រាល​ហើយ​

ខាន​​ចាញ់​យូរ​ ធឿន​ ធារ៉ា​ និង​ អេ អាំម៉ារីន ចាប់ដៃ​គ្នាចាញ់​​ក្នុង​កម្មវិធី​តែ​មួយ​

ធឿន ធារ៉ា ដណ្តើមខ្សែក្រវាត់ទី១០ ក្នុងអាជីព ប៉ះ​ដៃគូ​មានប្រវត្តិមិនធម្មតា

តាម​រយៈ​ការ​សុំទោស ធឿន ធារ៉ា ប្តេជ្ញា​មិន​ឲ្យ​អ្នក​គាំទ្រ​ខក​បំណង​ទៀត

កីឡាករលំដាប់ៗស្រុកខ្មែរច្រើននាក់បានចាញ់ក្នុងពេលបុណ្យអុំទូក

លោក អេ ភូថង ចង់ឲ្យ ធឿន ធារ៉ា សងសឹកដៃគូចាស់ ប៉ុន្តែសុំលេងហ្គង់ធំ ៥ទឹក

លោក អេ ភូថង៖ របួសភ្នែក ធឿន ធារ៉ា មិនអីទេធូរស្រាលហើយ

ខានចាញ់យូរ ធឿន ធារ៉ា និង អេ អាំម៉ារីន ចាប់ដៃគ្នាចាញ់ក្នុងកម្មវិធីតែមួយ

ធឿន ធារ៉ា ដណ្តើមខ្សែក្រវាត់ទី១០ ក្នុងអាជីព ប៉ះដៃគូមានប្រវត្តិមិនធម្មតា

តាមរយៈការសុំទោស ធឿន ធារ៉ា ប្តេជ្ញាមិនឲ្យអ្នកគាំទ្រខកបំណងទៀត