កីឡា

លោក អេ ភូថង ប្រាប់ថា មិនដឹងរឿងផ្ទាល់ខ្លួនរបស់ ធឿន ធារ៉ា ខណៈបែកធ្លាយវីដេអូជក់បារីអេឡិចត្រូនិក

បានផុស

១ year មុន

នៅ

ថ្ងៃសុក្រ ១៦ ឧសភា ២០២៥

ដោយ

កីឡាករប្រដាល់គុនខ្មែរជួរមុខ ធឿន ធារ៉ា បានកំពុងត្រូវបានមហាជនរិះគន់យ៉ាងខ្លាំងពីវីដេអូឃ្លីបដែលបែកធ្លាយពីការជក់បារីអេឡិចត្រូនិក។ ការបែកធ្លាយវីដេអូឃ្លីបនេះបានកើតមានឡើងស្របពេលកម្រិតគុណភាពប្រកួតលើសង្វៀនហាក់ដូចជាធ្លាក់ចុះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ធឿន ធារ៉ា មិនសូវបានប្រកួតញឹកញាប់ទេក្នុងឆ្នាំ២០២៥។ រាល់ពេលឡើងប្រកួតម្តងៗក្នុងមួយរយៈពេលចុងក្រោយនេះ រូបគេឆាប់អស់កម្លាំងស៊ុហ្វ។ ជាពិសេសការប្រកួតជាមួយកីឡាករសេណេហ្គាល់ Abdoulaye Diallo កាលពីថ្ងៃទី៤ ខែឧសភា ឆ្នាំ២០២៥ ធឿន ធារ៉ា បានកើតមានអាការគ្រុនញាក់ ក្រោយការប្រកួត។ ពេលនោះមានការលើកឡើងពីមូលហេតុថា រូបគេបានឡើងប្រកួតទាំងឈឺ ដោយសារផ្កាសាយ ពេលទៅថ្លឹងទម្ងន់ប៉ះទឹកភ្លៀង។

ករណីអស់កម្លាំងស៊ុហ្វ និងឈឺពេលឡើងប្រកួតក៏ជាផ្នែកមួយដែលធ្វើឲ្យមហាជនចាប់អារម្មណ៍ទៅហើយ ប៉ុន្តែចុងក្រោយបំផុតនេះ ស្រាប់តែបែកធ្លាយវីដេអូឃ្លីបជក់បារីអេឡិចត្រូនិក។ គេមិនទាន់ដឹងច្បាស់ថា វីដេអូឃ្លីបនេះកើតឡើងតាំងពីពេលណា ហើយជាវីដេអូឃ្លីបមែនទែន ឬជាការថតសម្តែងអ្វីមួយ។

ជុំវិញរឿងនេះ លោក អេ ភូថង ដែលជាគ្រូបង្វឹករបស់ ធឿន ធារ៉ា បានឆ្លើយតបនឹងសារព័ត៌មាន«កម្ពុជាថ្មី»ថា ៖«អត់ដឹងទេ អត់ដឹងទេ កុំសួរលោកគ្រូ។ ការហ្វឹកហាត់ធម្មតាទេ មានឈ្មោះវ៉ៃក៏ហ្វឹកហាត់ធម្មតា អត់មានឈ្មោះវ៉ៃ គាត់នៅផ្ទះគាត់។ ដឹងតែប៉ុណ្ណោះ បើវា (ធារ៉ា) ទៅធ្វើអីទៀត គ្រូអត់សូវដឹងទេ តែមិនអីទេ ចាំមកហាត់វិញ គ្រូដាស់តឿនទៀត ដើម្បីកុំឲ្យបំពុលសង្គម។ យើងជាបុគ្គលល្បី ត្រូវធ្វើជាគំរូដល់មហាជន ចាំគ្រូជួយដាស់តឿនថែមទៀត»។

លោកគ្រូបានបញ្ជាក់ថា ៖«មានគេតេសួរគ្រូច្រើនណាស់ គ្រូមិចដឹង គ្រូអត់ដឹង ដោយសារគ្រូបង្ហាត់ពេលដែលគាត់មកហាត់ហ្នឹង។ ពេលក្រោយហ្វឹកហាត់គាត់ទៅធ្វើអី គ្រូអត់ដឹងទេ»។

នេះមិនមែនជាលើកទី១ទេដែលមហាជនចាប់អារម្មណ៍ និងរិះគន់ទៅលើសកម្មភាពផ្ទាល់ខ្លួនរបស់ ធឿន ធារ៉ា។ កន្លងមក រូបគេបានខកខានក្នុងការប្រកួតម៉ារ៉ាតុងអន្តរជាតិដែលមានបេក្ខភាព៨នាក់ មកពី៨ប្រទេសផ្សេងគ្នា ដោយសារលេងបាល់ទាត់ក៏កើតមានបញ្ហារបួស។ មុនពេលមានរបួសនោះ រូបគេត្រូវបានឃើញលេចមុខថតសម្តែងក្នុងវីដេអូកំប្លែងជាបន្តបន្ទាប់។

ធឿន ធារ៉ា ជាកីឡាករលំដាប់កំពូលប្រចាំប្រទេសកម្ពុជាក្នុងទម្ងន់៧២គីឡូក្រាម។ រូបគេជាកីឡាករកម្ពុជាតែម្នាក់គត់ដែលមានឈ្មោះក្នុងទស្សនាវដ្តីល្បីអាមេរិក Forbes និងឈ្នះខ្សែក្រវាត់ជាច្រើនខ្សែ រថយន្ត និងវីឡា។ កាលពីពេលថ្មីៗនេះ រូបគេក៏ទើបតែមានឈ្មោះជាប់ក្នុងជម្រើសជាតិគុនខ្មែរជាលើកដំបូងដែលត្រូវត្រៀមខ្លួនសម្រាប់ការប្រកួតអន្តរជាតិដូចជាកីឡាស៊ីហ្គេមជាដើម៕