“បាឋកថាស្ដីពី «ជំហានដំបូងនៃការអនុវត្តនយោបាយ ឈ្នះ ឈ្នះ ចេញពីតំបន់ឱរ៉ាល់ ឆ្ពោះទៅសំឡូត» ដើរតួជាស្ពានផ្សារភ្ជាប់នូវគុណតម្លៃអន្តរជំនាន់ “។ នេះជាប្រសាសន៍ ឯកឧត្តម ហ៊ុន ម៉ានី សមាជិកគណៈអចិន្ត្រៃយ៍ និងជាអគ្គលេខាធិការគណៈចលនាមហាជននៃគណៈកម្មាធិការកណ្តាល ថ្លែងនាព្រឹកថ្ងៃទី១៤ ខែកុម្ភៈ ឆ្នាំ២០២៦ ក្នុងឱកាសអញ្ជើញជាអធិបតីក្នុងបាឋកថាស្ដីពី «ជំហានដំបូងនៃការអនុវត្តនយោបាយ ឈ្នះ ឈ្នះ ចេញពីតំបន់ឱរ៉ាល់ ឆ្ពោះទៅសំឡូត» ដែលបានប្រព្រឹត្តទៅនៅវិមាន ៧មករា ទីស្ដីការគណបក្សប្រជាជនកម្ពុជា។

ឯកឧត្តមបាន គូសបញ្ជាក់អំពីគោលបំណងសំខាន់ក្នុងការរៀបចំបាឋកថាដ៏មានអត្ថន័យនាឱកាសនេះ ដែលជាវេទិកាផ្សារភ្ជាប់អន្តរជំនាន់ និងជាការរៀបចំដោយអនុលោមតាមទស្សនៈដឹកនាំដ៏មុតស្រួចប្រកបដោយគតិបណ្ឌិតដ៏ខ្ពង់ខ្ពស់បំផុតរបស់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជា ពោលគឺ “ក្មេងមានកម្លាំង និងស្គាល់ផ្លូវ ចាស់មានបទពិសោធ”។

ឯកឧត្តម ហ៊ុន ម៉ានី បានបន្ថែមថា វេទិកានេះដើរតួជាស្ពានផ្សារភ្ជាប់នូវគុណតម្លៃអន្តរជំនាន់ តាមរយៈការចែករំលែកចំណេះដឹង និងបទពិសោធពីការអនុវត្តផ្ទាល់ ទាំងការលះបង់ និងបញ្ញាញាណរបស់ថ្នាក់ដឹកនាំជំនាន់មុន ដើម្បីបំពេញបន្ថែមជាមួយថាមពល និងនវានុវត្តន៍របស់ថ្នាក់ដឹកនាំជំនាន់ក្រោយដែលជាកម្លាំងបន្តវេនសំដៅធានាបាននូវអន្តរកាលនៃការផ្ទេរជំនាន់ដឹកនាំប្រកបដោយស្ថិរភាព ដែលជាបុរេលក្ខខណ្ឌដ៏ចាំបាច់សម្រាប់ការបន្តពង្រឹងវិបុលភាព និងធានាអនាគតនៃប្រទេសជាតិ។

ក្នុងនាមជាថ្នាក់ដឹកនាំជំនាន់ក្រោយ ឯកឧត្តម ហ៊ុន ម៉ានី បានបង្ហាញមោទនភាព និងដឹងគុណចំពោះគំរូវីរភាព និងការលះបង់នៃថ្នាក់ដឹកនាំជំនាន់មុន រួមជាមួយការចូលរួមរបស់តួអង្គនៅមូលដ្ឋាន ដែលជាប្រតិបត្តិករផ្ទាល់នៅថ្នាក់ក្រោមក្នុងការគោរព ចូលរួមអនុវត្តតាមគោលការណ៍ដឹកនាំរបស់ថ្នាក់ដឹកនាំ ដែលជាមូលដ្ឋានមិនអាចខ្វះបានក្នុងការនាំមកនូវសុខសន្តិភាព និងការអភិវឌ្ឍប្រទេសជាតិ មកដល់បច្ចុប្បន្ន។ជាមួយគ្នានេះ

ឯកឧត្តម ក៏បានប្តេជ្ញាបន្តរួមចំណែកដល់ការថែរក្សា ការពារនូវរាល់សមិទ្ធផលដែលជាមរតកដ៏មានតម្លៃ និងបន្តកសាងជាតិឱ្យកាន់តែរីកចម្រើនបន្ថែមទៀត៕

The post ឯកឧត្តម ហ៊ុន ម៉ានី៖ បាឋកថាស្ដីពី «ជំហានដំបូងនៃការអនុវត្តនយោបាយ ឈ្នះ ឈ្នះ ចេញពីតំបន់ឱរ៉ាល់ ឆ្ពោះទៅសំឡូត» ដើរតួជាស្ពានផ្សារភ្ជាប់នូវគុណតម្លៃអន្តរជំនាន់ appeared first on Kampuchea Thmey Daily.

អគ្គលេខាធិការដ្ឋានគណៈចលនាមហាជននៃគណៈកម្មាធិការកណ្ដាលគណបក្សប្រជាជនកម្ពុជា នាព្រឹកថ្ងៃទី១៤ ខែកុម្ភៈ ឆ្នាំ២០២៦ បានរៀបចំបាឋកថាស្ដីពី «ជំហ៊ានដំបូងនៃការអនុវត្តនយោបាយ ឈ្នះ ឈ្នះ ចេញពីតំបន់ឱរ៉ាល់ ឆ្ពោះទៅសំឡូត» ដែលជាការចែករំលែកដោយវាគ្មិនកិត្តិយស ឯកឧត្តម កែវ ពង្ស អតីតមេបញ្ជាការខ្មែរក្រហមឈរជើងនៅតំបន់ឱរ៉ាល់មុនសមាហរណកម្ម បច្ចុប្បន្នជាសមាជិកគណៈកម្មាធិការកណ្ដាលគណបក្សប្រជាជនកម្ពុជា និងជាទីប្រឹក្សាផ្ទាល់សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីកម្ពុជា។

កម្មវិធីនេះ បានប្រព្រឹត្តទៅនៅវិមាន ៧ មករា ទីស្ដីការគណបក្សប្រជាជនកម្ពុជា ក្រោមវត្តមានដ៏ខ្ពង់ខ្ពស់ ឯកឧត្តម ហ៊ុន ម៉ានី សមាជិកគណៈអចិន្ត្រៃយ៍ និងជាអគ្គលេខាធិការគណៈចលនាមហាជននៃគណៈកម្មាធិការកណ្តាលគណបក្សប្រជាជនកម្ពុជា ប្រធានគណៈកម្មាធិការហិរញ្ញវត្ថុនៃគណៈកម្មាធិការកណ្តាលគណបក្សប្រជាជនកម្ពុជា ឯកឧត្តម លី យ៉ុងផាត់, សមាជិកគណៈអចិន្ត្រៃយ៍គណៈកម្មាធិការកណ្តាលគណបក្សប្រជាជនកម្ពុជា ឯកឧត្តម ប៉េង ពោធិ៍នា, សមាជិក សមាជិកាគណៈកម្មាធិការកណ្ដាលគណបក្ស និងតំណាងស្ថាប័នជំរុញគណៈកម្មាធិការកណ្ដាលគណបក្សជាច្រើនរូប។

គណៈចលនាមហាជននៃគណៈកម្មាធិការកណ្ដាលគណបក្សប្រជាជនកម្ពុជា ឱ្យដឹងថា បាឋកថានេះត្រូវបានរៀបចំឡើងក្នុងគោលបំណងចែករំលែកនូវរឿងរ៉ាវប្រវត្តិសាស្រ្តដល់មន្រ្តីគណបក្សបន្តវេនដោយវាគ្មិនកិត្តិយសដែលជាសាក្សីរស់ និងជាផ្នែកមួយនៃដំណើរស្វែងរកសន្តិភាព ការផ្សះផ្សារ និងការបង្រួបបង្រួមជាតិតាមរយៈនយោបាយឈ្នះ-ឈ្នះ។

តាមរយៈបទបង្ហាញផ្អែកលើបទពិសោធន៍ពិតពីតួអង្គដែលស្ថិតក្នុងព្រឹត្តិការណ៍ប្រវត្តិសាស្ត្រ បាឋកថានេះបានផ្ដល់ការយល់ដឹងជ្រាលជ្រៅអំពីចក្ខុវិស័យវែងឆ្ងាយ និងការសម្រេចចិត្តដ៏ក្លាហានរបស់ថ្នាក់ដឹកនាំជំនាន់មុន ក្នុងការជ្រើសរើសផ្លូវនយោបាយជំនួសអាវុធ ដើម្បីសម្រេចបាននូវការរួបរួម និងការឯកភាពជាតិពេញលេញ។ វេទិកានេះ បានរំលឹកពីគុណតម្លៃនៃថ្ងៃ ៧ មករា ដែលជាមូលដ្ឋានគ្រឹះនៃសន្តិភាពនៅកម្ពុជា និងជាមរតកផ្នែកស្មារតី សម្រាប់ការលើកកម្ពស់កតញ្ញុតា មោទនភាព និងភក្តីភាព ចំពោះជាតិ និងប្រជាជន។

គណៈចលនាមហាជននៃគណៈកម្មាធិការកណ្ដាលគណបក្សប្រជាជនកម្ពុជា អះអាងថា ការរៀបចំបាឋកថាដ៏មានសារៈសំខាន់នេះ គឺជាការចងក្រង និងរក្សាទុកឯកសារប្រវត្តិសាស្ត្រដ៏មានតម្លៃ ដែលជាភស្តុតាងប្រវត្តិសាស្ត្របញ្ជាក់ថា សុខសន្តិភាពដែលកម្ពុជាកំពុងទទួលបានសព្វថ្ងៃ មិនមែនកើតឡើងដោយចៃដន្យនោះទេ ប៉ុន្តែជាលទ្ធផលនៃការតស៊ូ ការលះបង់ និងការប្តេជ្ញាចិត្តដ៏មោះមុតរបស់ថ្នាក់ដឹកនាំ និងឥស្សរជនកម្ពុជាជំនាន់មុន៕

The post គណៈចលនាមហាជននៃគណៈកម្មាធិការកណ្ដាលគណបក្សប្រជាជនកម្ពុជា រៀបចំបាឋកថាស្ដីពី«ជំហ៊ានដំបូងនៃការអនុវត្តនយោបាយ ឈ្នះ ឈ្នះ ចេញពីតំបន់ឱរ៉ាល់ ឆ្ពោះទៅសំឡូត» appeared first on Kampuchea Thmey Daily.

ថ្លែងក្នុងវីដេអូបទសម្ភាសន៍ពីវឌ្ឍនភាពរបស់ស៊ីម៉ាក់លោក ហេង រតនា បាន​លើកឡើងថារហូតមកដល់ពេលនេះកម្លាំងរបស់ស៊ីម៉ាក់បានធ្វើការស្រាវជ្រាវបានជាង១ពាន់ភូមិ និងបានកំណត់តំបន់ដែលរងការទម្លាក់គ្រាប់បែកដែលបានកំណត់ទីតាំងច្បាស់លាស់មានជាង២ពាន់កន្លែងនឹងត្រូវដាក់ទៅក្នុងទន្និន័យស្រាវជ្រាវ AI ដែលមានការគាំទ្រពីជប៉ុន និងអាល្លឺម៉ង់។ 

លោកថា៖ «ខ្ញុំយល់ថាក្រោយពីការស្រាវជ្រាវបានពេញលេញនោះយើងងាយស្រួលក្នុងការរៀបចំផែនការយុទ្ធសាស្ត្រក្នុងរយៈពេលវែងដែលប្រទេសរបស់យើងអាចរស់នៅជាមួយនឹងបញ្ហានេះរយៈពេលយូរតទៅមុខទៀត។ ជាពិសេសជាមួយគ្រាប់បែកចង្កោម​ហើយនឹងគ្រាប់បែកទម្លាក់ពីយន្តហោះដែលនៅពាសពេញប្រទេសកម្ពុជាយើង»។  

ទិន្នន័យដែលស៊ីម៉ាក់ទទួលបានកន្លងមកឱ្យដឹងថាអាមេរិកបានទម្លាក់គ្រាប់បែកគ្រប់ប្រភេទជាង២សែន៣ម៉ឺនទីតាំងនៅទូទាំងប្រទេសកម្ពុជា។ ក្នុងឆ្នាំ២០០១ ស៊ីម៉ាក់បានរកឃើញថាសំណល់យុទ្ធភ័ណ្ឌមិនទាន់ផ្ទុះប្រមាណ ៤ ៤៤៦គីឡូម៉ែត្រក្រឡា ប៉ះពាល់ផ្ទាល់ដល់ជាង៣លានគ្រួសារ ហើយនៅចុងឆ្នាំ២០២៣ ផ្ទៃដីដែលគ្រោះថ្នាក់ទាំងនោះធ្លាក់មកនៅជាង ១ ៧៥០គីឡូម៉ែត្រក្រឡា សល់ការគំរាមកំហែងប្រជាពលរដ្ឋជាង១លានគ្រួសារ៕

អត្ថបទដោយ ហ៊ុន សិរីវឌ្ឍន៍

The post ស៊ីម៉ាក់កំណត់តំបន់ដែលរងការទម្លាក់គ្រាប់បែកចង្កោមមានជាង២ពាន់កន្លែង appeared first on Kampuchea Thmey Daily.

តាមរយៈបណ្តាញទំនាក់ទំនងសង្គមកាលពីយប់ថ្ងៃអាទិត្យ សម្តេចតេជោ ហ៊ុន សែន បានសរសេរថា៖ «ថ្ងៃនេះ ខ្ញុំបានរៀនសូត្រពីឧបនាយករដ្ឋមន្ត្រីទៀ សីហា និងនាយឧត្តមសេនីយ៍ សុខ ភាព លើការអនុវត្តន៍នយោយឈ្នះ ឈ្នះ។ តាមពិតដូចពួកគាត់និយាយ គឺការធានាទាំង៣យ៉ាងពុំមានចែងក្នុងកិច្ចព្រមព្រៀងណាមួយនោះទេ គឺចេញពីសំដីរបស់ហ៊ុន សែន ផ្សព្វផ្សាយបន្ត និងអនុវត្តជាក់ស្តែងដោយការជឿទុកចិត្តដែលបង្កើតបានសន្តិភាពការបង្រួបបង្រួមជាតិ និងឯកភាពទឹកដីរយៈពេល២៦ឆ្នាំ និងបើរាប់ពីការចាប់ផ្តើមអនុវត្តនយោបាយឈ្នះ ឈ្នះនាដើមឆ្នាំ១៩៩៦មានរយៈពេល២៨ឆ្នាំ»។

ស្ថាបនិកនយោបាយ ឮឈ្នះឈ្នះ និងជាបិតាសន្តិភាពនៅកម្ពុជា បានគូសបញ្ជាក់ឱ្យដឹងទៀតថា ជំនឿទុកចិត្តក្នុងការអនុវត្តនយោបាយឈ្នះឈ្នះនៅក្នុងប្រទេសកម្ពុជា គឺមានតម្លៃជាងកិច្ចព្រមព្រៀងសន្តិភាពនៅប្រទេសមួយចំនួនដែលតែងតែមានការរំលោភ ពិសេស រំលោភលើកិច្ចព្រមព្រៀងឈប់បាញ់។ បើតាមសម្តេចតេជោ បទពិសោធន៍នៅកម្ពុជាបញ្ចប់សង្រ្គាមដោយគ្មានកិច្ចព្រមព្រៀង និងលិខិតផ្លូវការណាមួយជាក់លាក់នោះឡើយ តែបែរជាចេញពីជំនឿទុកចិត្តទៅវិញ។

នយោបាយឈ្នះឈ្នះ  គឺជារូបមន្តដ៏ស័ក្តិសិទ្ធិ និងជាស្នាដៃឯករបស់សម្តេចតេជោ ហ៊ុន សែន ក្នុងការបញ្ចប់ទាំងស្រុងនូវសង្គ្រាមស៊ីវិលដ៏រ៉ាំរ៉ៃដែលបានអូសបន្លាយជិត៣ទសវត្សរ៍ និងដែលបានរុញច្រានប្រទេសឱ្យធ្លាក់ចូលក្នុងរបបវាលពិឃាដដ៏មហាប្រល័យ និងរកបានសន្តិភាពពេញលេញជូនជាតិមាតភូមិនៅថ្ងៃទី២៩ ខែធ្នូ ឆ្នាំ១៩៩៨។ លោក ប៉ែន បូណា ប្រធានអង្គភាពអ្នកនាំពាក្យរាជរដ្ឋាភិបាលធ្លាប់បានពន្យល់ថា ដែលហៅថា នយោបាយឈ្នះឈ្នះ គឺជាការបញ្ចប់សង្គ្រាមដោយគ្មានការបង្ហូរឈាម និងគ្មានអ្នករងគ្រោះ ពោល គឺខ្មែរឈ្នះទាំងអស់គ្នា។

អាថ៌កំបាំងនៃនយោបាយឈ្នះឈ្នះ ត្រូវបានសម្តេចតេជោ បង្ហាញជាសាធារណៈរួចហើយ ដោយវាមានធាតុផ្សំសំខាន់៣ គឺ ទី១.ធានាអាយុជីវិត ទី២. ធានាអាជីពនិងមុខរបរ និងទី៣. ធានាកម្មសិទ្ធិឯកជន ជូនដល់គូជម្លោះ។ រូបមន្តទាំង៣នេះ ត្រូវបានថ្នាក់ដឹកនាំកម្ពុជាជំនាន់ក្រោយយកមករៀនសូត្រ ចងចាំ និងអនុវត្តតាម។ នៅក្នុងទិវា សន្តិភាពនៅកម្ពុជា នៅថ្ងៃទី២៩ ខែធ្នូ ឆ្នាំ២០២៤ ម្សិលមិញ លោកនាយឧត្តមសេនីយ៍ ទៀ សីហា ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ បានលើកឡើងម្តងជាពីរដងពីរូបមន្តដ៏ពិសេសនេះ។ ប្រមុខការពារជាតិកម្ពុជា ក៏បានបញ្ជាក់ឱ្យដឹងថា នយោបាយឈ្នះឈ្នះរបស់សម្តេចតេជោ គឺជាការនិយាយសន្យាដោយផ្ទាល់មាត់ គ្មានកិច្ចព្រមព្រៀងផ្លូវការទេ ប៉ុន្តែ បានគោរពតាមពាក្យសន្យា ធ្វើឱ្យភាគីជម្លោះមានជំនឿទុកចិត្ត និងបានទម្លាក់អាវុធបញ្ចប់សង្រ្គាមទាំងស្រុង៕

The post សម្តេចតេជោ៖ ជំនឿទុកចិត្តក្នុងការអនុវត្តនយោបាយឈ្នះឈ្នះនៅកម្ពុជា មានតម្លៃជាងកិច្ចព្រមព្រៀងសន្តិភាពនៅប្រទេសខ្លះ appeared first on Kampuchea Thmey Daily.

ក្នុងពិធីរម្លឹកខួប៤៧ឆ្នាំ នៃដំណើរឆ្ពោះទៅការផ្ដួលរំលំរបបប្រល័យពូជសាសន៍ ប៉ុល ពត (២០ មិថុនា ១៩៧៧ – ២០ មិថុនា ២០២៤) នៅតំបន់ប្រវត្តិសាស្រ្តយោធាតេជោកោះថ្ម​ សម្ដេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា បានថ្លែងដូច្នេះថា «នយោបាយឈ្នះឈ្នះ នៅតែដើរតួនាទីយ៉ាង​សំខាន់​ក្នុងការទប់ស្កាត់ជនឱកាសនិយមនៅកម្ពុជា និងជាមូល ដ្ឋានជំនឿទុកចិត្តរបស់ប្រជាពលរដ្ឋក្នុងការចូលរួមបោះឆ្នោតទាំងសកល និងអសកល ដែលរួមចំណែកយ៉ាងសំខាន់ក្នុងការអភិវឌ្ឍសេដ្ឋកិច្ច-សង្គមនៅកម្ពុជាឱ្យកាន់តែមានភាពរីកចម្រើន»។

សម្តេចធិបតី ហ៊ុន ម៉ាណែត មានប្រសាសន៍ថា ទំព័រប្រវត្តិសាស្ត្រ បានតភ្ជាប់ពីដំណាក់កាលមួយទៅដំណាក់កាលមួយ ដែលបានចាប់ផ្តើមពីចលនាតស៊ូនៅក្នុងដំណើរឈានឆ្ពោះទៅការផ្ដួលរំលំរបបប្រល័យពូជសាសន៍ នាថ្ងៃទី២០ ខែមិថុនា ឆ្នាំ១៩៧៧ ដែលសម្តេច​តេជោ ហ៊ុន សែន និងយុទ្ធមិត្តរួមអាវុធដ៏ស្មោះស្ម័គ្រ៤រូបទៀត បានរួមគ្នាយកជីវិតធ្វើជា​ដើម​ទុន​ចេញទៅកាន់ប្រទេសវៀតណាម ស្វែងរកការគាំទ្រដើម្បីរំដោះជាតិ និងប្រជា​ជន​កម្ពុជា ចេញពីរបបប្រល័យពូជសាសន៍ដ៏ឃោរឃៅរបស់ ប៉ុល ពត។

ចលនាដែលដឹកនាំដោយសម្ដេចយតេជោ ក៏បានឈានទៅបង្កើតអង្គការចាត់តាំង​នយោបាយដំបូង គឺរណសិរ្សសាមគ្គីសង្គ្រោះជាតិកម្ពុជា ២ ធ្នូ ១៩៧៨ ហើយឈានទៅសម្រេចជ័យជម្នះក្នុងការសង្គ្រោះ និងរំដោះប្រទេសឱ្យរួចផុតពីរបបប្រល័យពូជសាសន៍ ជាស្ថាពរនៅថ្ងៃ៧ មករា ឆ្នាំ១៩៧៩។

សម្ដេចធិបតីនាយករដ្ឋមន្ត្រី បានរៀបរាប់បន្តទៀតថា ទោះបីជាប្រទេសជាតិត្រូវបានរំដោះក៏ពិតមែន តែសម្ដេចតេជោ បានខិតខំកសាងប្រទេសជាតិឡើងវិញចេញពីចំណុចសូន្យ ដោយដៃម្ខាងកាន់អាវុធការពារ ទប់ស្កាត់ការប៉ុនប៉ងវិល ត្រឡប់មកវិញនៃរបបប្រល័យពូជសាសន៍ ហើយដៃម្ខាងទៀតខិតខំកសាងប្រទេសជាតិ រហូតឈានដល់ការសម្រេចបានកិច្ចព្រមព្រៀងសន្តិភាពទីក្រុងប៉ារីស ២៣ តុលា ១៩៩១ និងការដាក់ចេញនយោបាយឈ្នះ-ឈ្នះ បញ្ចប់សង្គ្រាមស៊ីវិល នៅកម្ពុជាទាំងស្រុង នាំមកនូវសុខសន្តិភាព និងឯកភាពទឹកដីពេញលេញ។

ដំណើរតស៊ូទាំងនេះហើយ ទើបឈានដល់ការបើកឡើងនូវទំព័រប្រវត្តិសាស្ត្រថ្មីមួយ ដែលមានលក្ខណៈប្តូរផ្តាច់ក្នុងការប្រឆាំងជាមួយនឹងបដិវត្តន៍ពណ៌ ពោលគឺជាដំណាក់កាលថែរក្សាការពារសន្តិភាព ដែលជាបុព្វបទនៃការអភិវឌ្ឍប្រទេសជាតិ និងភាពសុខដុមរមនារបស់ប្រជាពលរដ្ឋកម្ពុជាទាំងមូល ក្រោមម្លប់នៃសុខសន្តិភាព ដែលបានមកពីនយោបាយឈ្នះ-ឈ្នះ របស់សម្តេចតេជោ អតីតនាយករដ្ឋមន្ត្រី។ នេះជាការគូសបញ្ជាក់បន្ថែមរបស់សម្ដេចធិបតី ហ៊ុន ម៉ាណែត៕

The post សម្ដេចធិបតី ថា នយោបាយឈ្នះឈ្នះនៅតែដើរតួសំខាន់​ដើម្បីទប់ស្កាត់ជនឱកាសនិយមនៅកម្ពុជា appeared first on Kampuchea Thmey Daily.

សម្តេចធិបតី ហ៊ុន ម៉ាណែត បានថ្លែងថា គ្រប់ភាគីជម្លោះ ជាពិសេសភាគីខ្មែរក្រហម បានកាន់ទ័ពរាប់ពាន់នាក់ និងមានប្រជាជនរាប់ម៉ឺននាក់នៅក្នុងដៃដែលស្ថិតនៅក្នុងតំបន់ត្រួតត្រា រួមទាំងមានសព្វាវុធគ្រប់ប្រភេទនៅតាមបណ្ដោយព្រំដែន តើចាំបាច់អីត្រូវបោះបង់ចោល ហើយមកចូលរួមជាមួយរាជរដ្ឋាភិបាល​។ ត្រង់ន័យនេះ សម្ដេចធិបតី បានបញ្ជាក់ថា ពិតណាស់ បើមិនមានការជឿទុកចិត្តលើអ្នកធានា ពិសេសតួអង្គសម្ដេចតេជោ ដែលជាអ្នកធានាផ្ទាល់នោះទេ ក៏ភាគីទាំងនោះមិនបញ្ចប់ជម្លោះខ្មែរនិងខ្មែរដែរ ដូច្នេះហើយ ភាពជឿទុកចិត្ត ជាកត្តាដ៏សំខាន់ណាស់ ដែលជាកត្តាគន្លឹះមួយធ្វើឱ្យនយោបាយឈ្នះឈ្នះ ជោគជ័យ។

សម្ដេច ហ៊ុន ម៉ាណែត ថ្លែងអះអាងដូច្នេះថា៖ «គឺការជឿទុកចិត្តលើសម្ដេចតេជោ ក្នុងការគោរពនូវពាក្យសន្យារបស់ខ្លួន ដោយមិនរារែកនេះហើយ ដែលជាកិច្ចការធំ គឺការទុកចិត្ត។ នយោបាយឈ្នះឈ្នះ អត់មានឯកសារ ឬការចុះហត្ថលេខាលើកិច្ចព្រៀងអ្វីនោះទេ ក៏ប៉ុន្តែមានតែការធានាតែម្ដង។ នយោបាយឈ្នះឈ្នះ ជោគជ័យ គឺការបង្កើតការជឿទុកចិត្ត មិនមែននៅលើប្រដាស ប៉ុន្តែវាកើតឡើងនៅលើដីតែម្ដង គឺការសមាហរណកម្ម និងការអភិវឌ្ឍ ដោយរាជរដ្ឋាភិបាលមិនយកទោសពៃ ហើយការធានាគ្រប់បែបយ៉ាងសម្រាប់ភាគីទាំងនោះ»។

នយោបាយឈ្នះ-ឈ្នះ របស់សម្ដេចតេជោ ហ៊ុន សែន មិនត្រឹមតែបញ្ចប់សង្គ្រាមនាំមកនូវសន្តិភាព និងការឯកភាពជាតិពេញលេញប៉ុណ្ណោះទេ ប៉ុន្តែ​រក្សាបាននូវស្ថិរភាព សន្តិសុខ និងការអភិវឌ្ឍ ប្រទេសជាតិប្រកបដោយ​ចីរភាព​ទៀតផង។ ជាក់ស្ដែងប្រទេសកម្ពុជាក្រោមទង់នៃសន្តិភាពពេញលេញ និង​ការដឹកនាំរបស់រាជរដ្ឋាភិបាល ដែលមានសម្តេចតេជោ ហ៊ុន សែន ជាប្រមុខរាជរដ្ឋាភិបាល ក្រោមម្លប់សន្តិភាពពេញលេញរយៈពេល​២៥ឆ្នាំ​កន្លងមកនេះ បានធ្វើឱ្យប្រទេសជាតិមានការអភិវឌ្ឍលើគ្រប់វិស័យកាន់តែមានភាពរីក​ចម្រើន លើកកម្ពស់កម្រិតជីវភាពប្រជាជនកាន់តែប្រសើរឡើងជាលំដាប់ទៀត៕

The post សម្ដេច ហ៊ុន ម៉ាណែត៖ ជោគជ័យនៃនយោបាយឈ្នះឈ្នះ គឺការជឿទុកចិត្តលើសម្ដេចតេជោ ដែលជាស្ថាបនិកនៃនយោបាយនេះ appeared first on Kampuchea Thmey Daily.

ការលើកទឹកចិត្តនេះ បានធ្វើឡើងក្នុងពិធីអបអរសាទរ “ខួបលើកទី ២៥ នៃការបញ្ចប់សង្គ្រាមស៊ីវិលនៅកម្ពុជា និងការអនុវត្តប្រកបដោយជោគជ័យនយោបាយឈ្នះឈ្នះ និងខួប ៥ឆ្នាំ នៃការកសាងវិមានឈ្នះឈ្នះ” នាព្រឹកថ្ងៃទី ២៩ ខែធ្នូ ឆ្នាំ ២០២៣នេះ។

នៅក្នុងពិធីនេះ សម្ដេចធិបតី ហ៊ុន ម៉ាណែត បានលើកទឹកចិត្តឲ្យបន្តស្រាវជ្រាវ និងចងក្រងនូវឯកសារពាក់ព័ន្ធនឹងនយោបាយឈ្នះឈ្នះ និងដំណើរការពាក់ព័ន្ធនឹងដំណើរការសន្តិភាព ព្រមទាំងការបញ្ចប់សង្រ្គាមនៅកម្ពុជា ដែលនេះជាចំណុចដ៏សំខាន់មួយ។

សម្ដេចនាយករដ្ឋមន្ត្រី បានលើកឡើងថា នយោបាយឈ្នះឈ្នះ ត្រូវបានដាក់ចេញដោយសម្ដេចតេជោ ហ៊ុន សែន អតីតនាយករដ្ឋមន្ត្រី ហើយមានការចូលរួមពីប្រតិបត្តិករ ហើយកន្លងមកមានការស្រាវជ្រាវ និងចងក្រងមួយចំនួនរួចមកហើយ ។ ប៉ុន្តែសម្ដេចគិតថា នៅសល់ចំណុចមួយចំនួនទៀត ដែលត្រូវស្រាវជ្រាវ និងចងក្រងបន្ថែម។​

សម្ដេចធិបតី ហ៊ុន ម៉ាណែត បានថ្លែងថា «នយោបាយឈ្នះឈ្នះ បានបញ្ចប់មកដោយប្រតិបត្តិករជាច្រើន ឯកឧត្តម នាយឧត្តមសេនីយ៍ ណឹម សុវត្ថិ និងក្រុមការងារបានខិតខំស្រាវជ្រាវ ចងក្រង សម្ដេចពិជ័យសេនា និងតួអង្គជាច្រើន រួមជាមួយសម្ដេចតេជោ បានផ្ដល់នូវធាតុផ្សំជាច្រើនមកហើយ ប៉ុន្តែខ្ញុំគិតថា បទពិសោធន៍ និងជ្រុងផ្សេងៗ នៅមានច្រើនទៀត សូមបន្ត»។

ការលើកទឹកចិត្តឲ្យមានការស្រាវជ្រាវ និងចងក្រងឯកសារពាក់ព័ន្ធនឹងនយោបាយឈ្នះឈ្នះ បន្តទៀតនេះ ដោយសារតែអ្នកស្រាវជ្រាវ និងចងក្រងទាំងនោះ គឺជាប្រតិបត្តិករផ្ទាល់ និងអាចដឹងនូវព័ត៌មាន​ច្រើន ហើយអាចប្រមូលនូវធាតុផ្សំចងក្រងទុក ឲ្យអ្នកជំនាន់ក្រោយរាប់រយឆ្នាំទៀត។ ត្រង់ចំណុចនេះ សម្ដេចធិបតី បានបន្ថែមថា «បើមិនអញ្ចឹងទេ នៅក្នុង ២០ឆ្នាំ ៣០ឆ្នាំ ៥០ឆ្នាំទៀត ឯកសារថ្មី គឺបានត្រឹមពីអ្នកសរសេរពីការស្រាវជ្រាវបន្ត ចឹងគឺសុំបន្តស្រាវជ្រាវយកចិត្តទុកដាក់បន្ថែម ទៅលើកិច្ចការងារនេះ»។

សូមជម្រាបថា នយោបាយឈ្នះ-ឈ្នះ ត្រូវបានដាក់ចេញដោយសម្តេចតេជោ ហ៊ុន សែន អតីតនាយករដ្ឋមន្ត្រី ដែលជាស្ថាបនិកមគ្គុ​ទ្ទេស​ក៍​ឯក​ ដើម្បីពន្លត់ភ្លើងសង្គ្រាមស៊ីវិលនៅកម្ពុជា នៅថ្ងៃ​ទី​ ១១ ខែកុម្ភៈ ឆ្នាំ ១៩៩៦ ហើយត្រូវបានបិទបញ្ចប់ទាំងស្រុង នៅថ្ងៃទី ២៩ ខែធ្នូ ឆ្នាំ ១៩​៩៨៕

The post នាយករដ្ឋមន្ត្រី លើកទឹកចិត្តឲ្យបន្តស្រាវជ្រាវ និងចងក្រងឯកសារពាក់ព័ន្ធនឹងនយោបាយឈ្នះឈ្ន បន្តទៀត appeared first on Kampuchea Thmey Daily.

ការ​លើក​ឡើង​នេះ ក្នុង​ឱកាស ឯកឧត្ដម ហ៊ុន ម៉ានី រដ្ឋមន្ត្រី​ក្រសួង​មុខងារ​សាធារណៈ និង​ជា​ប្រធាន​សហភាព​សហព័ន្ធ​យុវជន​កម្ពុជា ប្រកាស​អបអរសាទរ ខួប​លើក​ទី ២៥ នៃ​ការ​បញ្ចប់​សង្គ្រាម​ស៊ីវិល​នៅ​កម្ពុជា និង​ការ​អនុវត្ត​ប្រកប​ដោយ​ជោគជ័យ នយោបាយ ឈ្នះ ឈ្នះ នៅ​ព្រឹក​ថ្ងៃ​ទី ២៩ ខែ​ធ្នូ ឆ្នាំ ២០២៣ នេះ។

ឯកឧត្ដម ហ៊ុន ម៉ានី បាន​លើក​ឡើង​ថា «២៥ ឆ្នាំ មកនេះ ព្រះរាជាណាចក្រ​កម្ពុជា បាន​ស្គាល់​នូវ​ភាព​រុងរឿង សំបូរ​សប្បាយ ព្រមទាំង​ការ​អភិវឌ្ឍ​ឥត​ឈប់ឈរ។ យើង​រក្សា​បាន​កំណើន​សេដ្ឋកិច្ច ប្រកប​ដោយ​ស្ថិរភាព ដែល​បាន​ប្រែ​ក្លាយ​ខ្លួន​ជា​ប្រទេស​មាន​ចំណូល​មធ្យម​កម្រិត​ទាប និង​កំពុង​ធ្វើ​ដំណើរ​ឆ្ពោះ​ទៅ​ក្លាយ​ជា​ប្រទេស​មាន​ចំណូល​មធ្យម​កម្រិត​ខ្ពស់​នៅ​ឆ្នាំ ២០៣០ និង​ជា​ប្រទេស​អភិវឌ្ឍន៍​ក្នុង​ឆ្នាំ ២០៥០»។

ឯកឧត្ដម ហ៊ុន ម៉ានី សង្កត់​ធ្ងន់​ថា នយោបាយ​ឈ្នះ ឈ្នះ បាន​នាំ​មក​នូវ​សុខ​សន្តិភាព និង​បើក​ចេញ​សក្ដានុពល​ដ៏​ខ្លាំងក្លា​របស់​កម្ពុជា។ ក្រោម​ម្លប់ នៃ​សន្តិភាព ក្រោម​ដំបូល​រដ្ឋធម្មនុញ្ញ និង​ក្រោម​ម្លប់ នៃ​ព្រះមហាក្សត្រ ព្រះរាជាណាចក្រ​កម្ពុជា ឈរ​យ៉ាង​រឹងមាំ ប្រកប​ដោយ​ថាមពល និង​កំពុង​បោះ​ជំហាន​ទៅមុខ​យ៉ាង​ស្វាហាប់។ នេះ​ជា​កេរដំណែល​ដ៏​ថ្លៃថ្លា​ដែល​នយោបាយ​ឈ្នះ ឈ្នះ បាន​បន្សល់​ទុក​ឲ្យ​ប្រជាជាតិ​ខ្មែរ។

ឯកឧត្ដម ហ៊ុន ម៉ានី បន្ត​ថា ឯកឧត្ដម ចងចាំ និង​ដឹងគុណ​ជានិច្ច ស្ថាបនិក មគ្គុទ្ទេសក៍​ឯក និង​ប្រតិបត្តិ​ករ​ទាំងឡាយ នៃ​នយោបាយ​ឈ្នះ ឈ្នះ ដែល​បាន​នាំ​មក​នូវ​សុខ​សន្តិភាព និង​ការ​អភិវឌ្ឍ​ជូន​ជាតិ​មាតុភូមិ។

គួរ​ជម្រាប​ថា នៅ​ថ្ងៃ​ទី ២៩ ខែ​ធ្នូ ឆ្នាំ ២០២៣ នេះ គឺជា​ខួប ២៥ ឆ្នាំ ហើយ នៃ​ការ​បញ្ចប់​សង្គ្រាម​នៅ កម្ពុជា។ ក្រោម​នយោបាយ ឈ្នះ-ឈ្នះ (២៩ ធ្នូ ១៩៩៨-២៩ ធ្នូ ២០២៣) ដែល កម្ពុជា រក​បាន​នូវ​សុខ​សន្តិភាព​ពេញលេញ និង​មាន​ការ​ឯកភាព​ជាតិ​ទាំងស្រុង​ជា​ប្រវត្តិសាស្ត្រ៕

អត្ថបទ ៖ ពិសី

The post ឯកឧត្ដម ហ៊ុន ម៉ានី ៖ ២៥ ឆ្នាំ មកនេះ កម្ពុជា បានស្គាល់ភាពរុងរឿង សំបូរសប្បាយ ការអភិវឌ្ឍឥតឈប់ឈរ appeared first on Kampuchea Thmey Daily.