សម្ដេចតេជោ ហ៊ុន សែន សរសេរនៅក្នុងខំមិន នារសៀលថ្ងៃអង្គា ទី២៤ ខែមិថុនា ដូច្នេះ៖«តាមការស្មានរបស់ខ្ញុំថៃនឹងមាន នាយករដ្ឋមន្ត្រីថ្មីក្នុងរង្វង់៣ខែខាងមុខហើយ ខ្ញុំក៏អាចដឹងមុនថាជាអ្នកណានឹងធ្វើនាយករដ្ឋមន្ត្រីតែខ្ញុំមិននិយាយទេទុកឲ្យឆ្ងល់។ សូមពួកអ្នកប្រមូលកម្លាំងដោះស្រាយជម្លោះផ្ទៃក្នុងជាជាងមករំខានខ្ញុំ។ »។​

សម្ដេចតេជោ ហ៊ុន សែន បានហៅពលរដ្ឋថៃ ដែលចូលបញ្ចេញមតិអសុរសក្នុងទំព័រហ្វេសប៊ុកថាជាចោរឈ្លានពាន។ សម្ដេច ហ៊ុន សែន ក៏បានប្រាប់ថាមូលហេតុដែលសម្ដេចបង្ហោះរូបកូនប្រុសទាំង៣ ដែលបានរួមគ្នាការពារព្រំដែនហើយទទួលបានការគាំទ្រខ្លាំងលើសលប់ពីពលរដ្ឋខ្មែរ ខុសពីថៃដែលកំពុងប្រជែងអំណាចគ្នា គឺព្រោះតែសម្ដេចចង់ដឹងថាពួកចោរឈ្លានពាន ចូលមករំខានទំព័រហ្វេសប៊ុករបស់សម្តេចតាមរបៀបណាខ្លះ។

សម្តេចតេជោ វាយតម្លៃបានថា ក្រុមមនុស្សដែលចូលមកបញ្ចេញមតិអសុរសរំខានទំព័រហ្វេសប៊ុករបស់សម្ដេច គឺមានការចាត់តាំងយ៉ាងច្បាស់លាស់ពីសំណាក់មេដឹកនាំរបស់ពួកគេ ដែលមានមូលដ្ឋាននៅទីក្រុងបាងកក និងចាត់ទុកទង្វើនេះថា ថៃឈ្លានពានទឹកដីខ្មែរផង និងរំខានទំព័រហ្វេសប៊ុកសម្ដេច ក្នុងគោលបំណងទុច្ចរិតបង្វែរជម្លោះក្នុងផ្ទះខ្លួនឯង មកឈ្លោះជាមួយកម្ពុជាទៅវិញ។

សម្ដេចតេជោ ហ៊ុន សែន សង្កត់ធ្ងន់ដូច្នេះ៖«ការបង្ករហេតុមិនមែនគ្រាន់តែធ្វើការ ឈ្លានពានទឹកដីទេសូម្បីតែFacebook ក៏វាមករំខានដែរ។ រឿងនេះយើងអាចវាយតម្លៃបានគឺ ពួកគេកំពុងផ្ទេរពីជម្លោះផ្ទៃក្នុងមក ជាជម្លោះជាមួយកម្ពុជាទៅវិញ។ តែទោះពួកអ្នកប្រឹងដល់កម្រិតណា ក៏ជម្លោះដណ្តើមអំណាចមិនអាចរលត់បានដែរ។ »។

ជុំវិញស្ថានភាពនៅក្នុងប្រទេសថៃ សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា កាលពីថ្ងៃទី២៣ ខែមិថុនា បង្ហាញការមើលឃើញថា​ ប្រទេសមួយនេះ កំពុងជួបប្រទះវិ​បត្តិនយោបាយផ្ទៃក្នុង ហែកហួរ ដណ្ដើមអំណាច និងថាប្រទេសនេះ បំផុសចលនាជាតិនិយមជ្រុល​ ដើម្បីកេងចំណេញនយោបាយផ្ទៃក្នុងប្រទេសខ្លួន ប៉ុន្តែបានរាលដាលដល់កម្ពុជា ហើយហ៊ានទាំងប្រើប្រាស់រឿងសេដ្ឋកិច្ចធ្វើជាអាវុធលាបពណ៌ទម្លាក់កំហុសដាក់កម្ពុជា និងប្រើប្រាស់កងទ័ពគំរាមកំហែងកម្ពុជា។

ទន្ទឹមនឹងនេះ សម្ដេច ហ៊ុន ម៉ាណែត ព្រមានទៅថៃថា ទោះបីជានយោបាយផ្ទៃក្នុងថៃធ្លាក់ដុនដាប បែកបាក់សាមគ្គីគ្នា​ ដណ្ដើមអំណាចគ្នា​ ឈានដល់ធ្វើរដ្ឋប្រហារយ៉ាងណាក៏ដោយ ក៏កម្ពុជាមិនលូកដៃឬជ្រៀតជ្រែកកិច្ចការផ្ទៃក្នុងរបស់ថៃឡើយ ប៉ុន្តែសម្ដេចហាមដាច់ខាត កុំថៃរាលដាល់មកកម្ពុជា។

សម្ដេចធិបតី នាយឧត្ដមសេនីយ៍ ហ៊ុន ម៉ាណែត ក៏បានព្រមានទៅថៃទៀតថា កម្ពុជា បានត្រៀមសព្វាវុធរួចរាល់ ដើម្បីបាញ់កម្ទេចរថក្រោះ និងយន្តហោះចម្បាំងថៃ បើកងទ័ពប្រទេសនេះឈ្លានពានកម្ពុជាម្ដងទៀត៕

ដោយ៖ ង៉ិល ណារ៉ាត់

The post សម្តេចតេជោ ៖ថៃអាចនឹងមាននាយករដ្ឋមន្ត្រីថ្មីក្នុងរង្វង់៣ខែខាងមុខ ព្រោះតែជម្លោះដណ្តើមអំណាចគ្នា appeared first on Kampuchea Thmey Daily.

បើតាមសម្ដេច ហ៊ុន សែន សារសំឡេងសន្ទនាតាមទូរសព្ទរវាងសម្ដេច ជាមួយនាយករដ្ឋមន្ត្រីថៃ ដែលទើបនឹងបែកធ្លាយ គឺជាជំនួបតាមទូរសព្ទដែលធ្វើឡើងតាំងតែពីថ្ងៃទី១៥ ខែមិថុនា មកម៉្លេះ ដែលជំនួបនោះមានរយៈពេលជាង១៧នាទី។  សម្ដេច ថែមទាំងអះអាងទៀតថា រាល់ការជជែកគ្នាដោយសម្ងាត់អំពីបញ្ហាសំខាន់ៗ គឺសម្ដេចតែងតែថតសំឡេងសន្ទនាទុក ដើម្បីកុំឱ្យភាគីម្ខាងទៀត និយាយបាតដៃខ្នងដៃ ធ្វើសកម្មភាពផ្ទុយពីសម្ដីរបស់ខ្លួន និងដើម្បីធានាបញ្ហាផ្ទៃក្នុងរបស់កម្ពុជា។

សម្ដេចតេជោ ហ៊ុន សែន សរសេរលើទំព័រហ្វេស​ប៊ុកផ្លូវការ នាវេលារសៀលថ្ងៃពុធទី ១៨  ខែមិថុនា ដូច្នេះ៖« កាលពីល្ងាចថ្ងៃទី១៥ ខែមិថុនា ឆ្នាំ២០២៥ ខ្ញុំពិតជាបានសន្ទនាតាមទូរស័ព្ទជាមួយនាយករដ្ឋមន្រ្តីថៃ រយៈពេល១៧៖០៦នាទី ដោយមានលោក ឃ្លាំង ហួត ជាអ្នកបកប្រែ ហើយជាទម្លាប់ ដើម្បីកិច្ចការទាំងឡាយមិនបានគេបំភាន់ ឬបន្លំ ចាំបាច់ត្រូវការថតសម្លេង និងដើម្បីតម្លាភាពជាមួយផ្ទៃក្នុងរបស់កម្ពុជាផងដែរ។ »។

សម្ដេចតេជោ ហ៊ុន សែន ទម្លាយឱ្យដឹងថា ក្រោយពីបញ្ចប់ជំនួបតាមទូរសព្ទនោះទៅ សម្ដេចបានផ្ញើសំឡេងសន្ទនាសម្ងាត់នេះ​ ទៅកាន់សមាសភាពសំខាន់នៃគណបក្សប្រជាជនកម្ពុជា ក្រុមការងារនៃអង្គនីតិបញ្ញត្តិ  អ្នកជំនាញទំនាក់ទំនងអន្តរជាតិ ជំនាញការព្រំដែន និងកងកម្លាំងធានាសន្តិសុខ ប្រមាណ៨០នាក់។ សម្ដេចតេជោ ហ៊ុន សែន យល់ឃើញថា មូលហេតុដែលនាំឱ្យសារសម្ងាត់នៃការសន្ទនារវាងសម្ដេច ជាមួយនាយករដ្ឋមន្ត្រីថៃ បែកធ្លាយ គឺអាចមកពីអ្នកដែលទទួលបានពីសម្ដេច ខឹងនឹងថ្នាក់ដឹកនាំថៃ ដែលនិយាយស្ដីមិនកោតក្រែង វាយប្រហារមកលើសម្ដេចធិបតី នាយករដ្ឋមន្រ្តីកម្ពុជា ធ្វើនយោបាយគ្មានវិជ្ជាជីវៈ ធ្វើនយោបាយតាមហ្វេសប៊ុក។  សម្ដេច ហ៊ុន សែន បន្ថែមថា សម្ដេចនឹងទម្លាយសារសំឡេងសម្ងាត់នៃការសន្ទនាទាំងស្រុងព បើភាគីថៃចង់ដឹង។

សម្ដេចតេជោ ហ៊ុន សែន បញ្ជាក់អំពីការបញ្ជូនសារសន្ទនាទៅកាន់សមាសភាពសំខាន់ និងដាក់ការសង្ស័យអំពីមូលហេតុដែលនាំឱ្យបែកធ្លាយជាសាធារណៈដូច្នេះ៖«សំឡេងសន្ទនារវាងខ្ញុំ និងនាយករដ្ឋមន្រ្តីថៃ ខ្ញុំបានផ្ញើទៅគណៈអចិន្រ្តៃយ៍គណបក្ស ក្រុមការងារព្រឹទ្ធសភា ក្រុមការងារសភា ក្រុមការងារទទួលបន្ទុកកិច្ចការបរទេស ក្រុមការងារឃោសនាអប់រំ ក្រុមការងារព្រំដែន និងកងកម្លាំងប្រដាប់អាវុធ ប្រហាក់ប្រហែលសរុប៨០នាក់។ នៅក្នុងនោះប្រហែលអាចមាននរណាម្នាក់ មិនពេញចិត្តនឹងនាយករដ្ឋមន្រ្តីថៃ ព្រោះក្រោយនិយាយគ្នាជាមួយខ្ញុំប៉ុន្មានម៉ោង បែរជាមេដឹកនាំថៃចេញមក ចោទមេដឹកនាំកម្ពុជាថា ធ្វើនយោបាយអត់វិជ្ជាជីវៈ (Unprofessional) ធ្វើនយោបាយតាម Facebook ដែលនេះបង្ហាញពីទង្វើ និយាយផ្សេង ធ្វើផ្សឹង។ ទាក់ទងសារសំឡេងបែកធ្លាយនេះ ខ្ញុំឃើញគេបង្ហោះតែជាង៩នាទីប៉ុណ្ណោះ ដូច្នេះបើសិនភាគីថៃចង់បាន ខ្ញុំនឹងបញ្ជូលចេញទាំងស្រុងតែម្តងដែលមានរយៈពេល ១៧ៈ០៦នាទី។ »។

គួរឱ្យដឹងថា នៅក្នុងសារសន្ទនាដែលបែកធ្លាយនោះ គឺសម្ដេចតេជោ ហ៊ុន សែន និង នាយករដ្ឋមន្ត្រីថៃ ផែថងថាន ស៊ីណាវ៉ាត្រ បានជជែកអំពីជំហររវាងប្រទេសទាំងពីរ ក្នុងនោះនាយករដ្ឋមន្ត្រីថៃ ស្នើសម្ដេចតេជោ ហ៊ុន សែន កុំជឿលើសម្ដីរបស់មេទ័ពថៃប្រចាំភូមិភាគពីរ ប៊ុនស៊ីន ផាតក្លាង ព្រោះបុគ្គលនេះ បានប្រឆាំង និងយករដ្ឋាភិបាលថៃធ្វើជាសត្រូវ។ បន្ថែមពីនេះ នាយករដ្ឋមន្ត្រីថៃ ហ៊ាននិយាយខ្លាំងថា មេទ័ពថៃប្រចាំភូមិភាគពីររូបនេះ កំពុងតែប្រើសម្ដីដោយមិនចេះគិត និយាយផ្គាប់ចិត្តក្រុមជ្រុលនិយមថៃ ដើម្បីតែប្រជាប្រិយភាពផ្ទាល់ខ្លួន ដោយធ្វើឱ្យប៉ះពាល់ដល់ទំនាក់ទំនងប្រទេសទាំងពីរ និងស្នើសុំឱ្យសម្ដេចតេជោ ជួយដល់ខ្លួនព្រោះពលរដ្ឋថៃដាក់សម្ពាធខ្លួនខ្លាំង និងជជែកអំពីការបើកព្រំដែនឡើង តែសម្ដេចតេជោ បន្តជំហរថា កងទ័ពថៃជាអ្នកបិទច្រកព្រំដែនមុន ដូច្នេះត្រូវបើកមុន មិនត្រូវនាំកម្ពុជាទៅចរចា ធ្វើឱ្យបាក់មុខឡើយ៕

ដោយ៖​ង៉ិល ណារ៉ាត់

The post សម្ដេចតេជោ ទទួលស្គាល់ថា សារសន្ទនាជាមួយនាយករដ្ឋមន្ត្រីថៃដែលបែកធ្លាយ គឺជាសារដែលពិតប្រាកដ   appeared first on Kampuchea Thmey Daily.

គួរជា្របថា លោកស្រី ផែ ថងថាន បានដឹកនាំគណៈប្រតិភូជាន់ខ្ពស់ថៃមកកម្ពុជា តាមរយៈយន្តហោះពិសេស ដោយចុះចតនៅវេលាម៉ោង៩៖៤៥នាទីព្រឹកថ្ងៃទី២៣ ខែមេសា។ ភ្លាមបន្ទាប់ពីចុះពីយន្តហោះលោកស្រីនាយករដ្ឋមន្ត្រីថៃ​ បានចូលជួបសម្ដេច ហ៊ុន ម៉ាណែត នាយករដ្ឋមន្ត្រីកម្ពុជា នៅវិមានសន្តិភាព។ ភាគីទាំងពីរ បានពិភាក្សាអំពីការកំណត់ទិសដៅសកម្មភាព ក្នុងការធ្វើឱ្យកាន់តែស៊ីជម្រៅ និងពង្រីកបន្ថែមទៀតនូវកិច្ចសហប្រតិបត្តិការដែលមានផលប្រយោជន៍ទៅវិញទៅមក ចំពេលទំនាក់ទំនងនៃប្រទេសទាំងពីរឈានដល់ខួបទី៧៥ឆ្នាំ។

លទ្ធផលសំខាន់ៗ ដែលកើតចេញពីដំណើរទស្សនកិច្ចនេះ គឺមានដូចជា ភាគីថៃបានប្រគល់នូវវត្ថុបុរាណចំនួន២០ ដែលថៃរឹបអូសពីជនខិលខូចដែលលួចពីកម្ពុជាយកទៅប្រទេសថៃ​ ក្នុងពេលកម្ពុជាជួបប្រទះសង្គ្រាមពីអតីតកាល មកឱ្យកម្ពុជាឡើងវិញ។ ត្រង់ចំណុចនេះ សម្ដេចធិបតី ហ៊ុន ម៉ាណែត នាយករដ្ឋមន្រ្តី កម្ពុជា អរគុណភាគីថៃ ដែលប្រគល់វត្ថុបុរាណទាំង២០មកឱ្យកម្ពុជាវិញ ព្រោះវត្ថុបុរាណទាំងនេះ គឺជាដួងព្រលឹងរបស់ខ្មែរដែលព្រាត់ប្រាសពីមាតុភូមិក្នុងពេលមានសង្គ្រាម ហើយការប្រគល់ជូនមកវិញនេះ នឹងនាំឱ្យដួងព្រលឹងខ្មែរមកជួបជុំគ្នាវិញ។

​ បន្ថែមពីនេះ រដ្ឋាភិបាលកម្ពុជា ថៃ បានចុះកិច្ចព្រមព្រៀង និងអនុស្សរណៈចំនួន៧ ដូចជា ទី១/ កិច្ចព្រមព្រៀងស្ដីពីការប្រើប្រាស់កម្លាំងពលកម្មរវាងរដ្ឋាភិបាលកម្ពុជា និងថៃ។ ទី២/អនុស្សារណៈយោគយល់គ្នារវាងរដ្ឋាភិបាលកម្ពុជា និងថៃ ស្ដីពីកិច្ចសហប្រតិបត្តិការលើវិស័យការងារ។ ទី៣/អនុស្សារណៈយោគយល់គ្នារវាងក្រសួងបរិស្ថានកម្ពុជា និងក្រសួងធនធានធម្មជាតិ និងបរិស្ថានថៃ ស្ដីពីកិច្ចសហប្រតិបត្តិការកិច្ចគាំពារបរិស្ថានឆ្លងដែន(ដែលហៅថា ទប់ស្កាត់ការបំពុលខ្យល់ តាមរយៈការផ្លាស់ប្ដូរព័ត៌មានអំពីគុណភាពខ្យល់ពុល និងការកសាងសមត្ថភាព។ ទី៤/ កិច្ចព្រមព្រៀងរវាងកម្ពុជានិងថៃ ស្ដីពីការគ្រប់គ្រង និងថៃទាំស្ពានមិត្តភាពកម្ពុជា-ថៃ (ស្ទឹងបត់-បានណនអៀន)។

ទី៥/ កិច្ចព្រមព្រៀងរវាងកម្ពុជា-ថៃ ស្ដីពីការសាងសង់ស្ពានព្រំដែនផ្សារព្រំ-​បានផាកាត។ ទី៦/ កំណត់ហេតុស្តីពីការផ្តល់ជំនួយ បច្ចេកទេសលើការសិក្សាសមិទ្ធិលទ្ធ ភាពលើគម្រោងលើកកម្រិតគុណភាព ផ្លូវជាតិលេខ ៥៧ (បាត់ដំបង-ច្រកទ្វារ អន្តរជាតិព្រំ) រវាងក្រសួងសាធារណការនិងដឹកជញ្ជូនកម្ពុជា និងទីភ្នាក់ងារសហប្រតិបត្តិការ ដើម្បីអភិវឌ្ឍសេដ្ឋកិច្ចនៃប្រទេសជិតខាងនៃ ប្រទេសថៃ និងទី៧/លិខិតប្តូរសារ ស្តីពីគម្រោងពង្រឹងសមត្ថភាពវិទ្យាស្ថានអភិវឌ្ឍន៍ មុខជំនាញកម្ពុជា-ថៃ។

ក្រៅពីនេះ ស្របពេលដែលបទល្មើសបច្ចេកវិទ្យា ការឆបោកតាមអនឡាញ កំពុងរីកសាយភាយ ភាគីថៃ វាយតម្លៃចំពោះកិច្ចសហការរវាងកងកម្លាំងនគរបាល ក្នុងការប្រឆាំងអំពើឆបោកអនឡាញ ហើយប្ដេជ្ញាបន្ដសហការដើម្បីលុបបំបាត់បណ្ដាញឧក្រិដ្ឋកម្មនេះឲ្យអស់ពីព្រំដែនកម្ពុជា-ថៃ។

ចំពោះបញ្ហាព្រំដែន ដែលជាបញ្ហាដ៏ក្ដៅគគុកបែបនេះ រដ្ឋាភិបាលថៃនឹងពង្រឹងភាពជាដៃគូសន្តិសុខជាមួយកម្ពុជា ដោយឯកភាពជំរុញនូវកិច្ចសហប្រតិបត្តិការយោធាឱ្យកាន់តែជិតស្និទ្ធ និងគ្រប់កម្រិត ដើម្បីរក្សាបាននូវសន្តិភាព ស្ថិរភាព និងសន្តិសុខនៅតាមព្រំដែនរួមរបស់ប្រទេសទាំងពីរ។

ជាមួយគ្នា ប្រមុខរាជរដ្ឋាភិបាលកម្ពុជា សម្ដេចធិបតី ហ៊ុន ម៉ាណែត​ អះអាងថា កម្ពុជា  មិនបណ្ដោយឱ្យមានបុគ្គលណាម្នាក់ប្រើប្រាស់ទឹកដីកម្ពុជាប្រឆាំងថៃ ឬបង្កគ្រោះថ្នាក់ដល់ប្រទេសថៃឡើយ។ ចំណែក នាយករដ្ឋមន្ត្រីថៃ លោក​ស្រី ផែ ថងថាន ក៏អះអាងដូចគ្នាថា ថៃមិនបណ្ដោយឱ្យមានបុគ្គលណាម្នាក់ប្រើប្រាស់ទឹកដីថៃប្រឆាំងកម្ពុជា ឬបង្កគ្រោះថ្នាក់ដល់ប្រទេសកម្ពុជាឡើយ។ ហើយភាគីទាំងក៏បានអរគុណគ្នាទៅវិញទៅមក ចំពោះការសម្រេចបែបនេះ។

នៅក្នុងជំនួបសម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា គូសបញ្ជាក់ពីសារៈសំខាន់នៃការកសាងព្រំដែនមួយ ប្រកបដោយសន្តិភាព ស្ថិរភាព វិបុលភាព ហើយ កម្ពុជា ថៃបានឯកភាពគ្នាពង្រឹងកិច្ចសហប្រតិបត្តិការកងទ័ព ជាពិសេសក្នុងចំណោមបណ្តាអង្គភាព ដែលឈរជើងនៅតាមបណ្តាព្រំដែន ដើម្បីសន្តិភាព ស្ថិរភាពនៅតាមព្រំដែន។ ចំណែកនាយករដ្ឋមន្រ្តីថៃ បានឯកភាពបន្តធ្វើការរួមគ្នា ដើម្បីជំរុញភាពជាដៃគូយុទ្ធសាស្ត្ររវាងប្រទេសទាំងពីរ ឱ្យឈានទៅដល់កម្រិតកាន់តែខ្ពស់ន្ថែមទៀត ដើម្បីនាំមកនូវកំណើន សុខុមាលភាព វិបុលភាពរួម សម្រាប់ប្រជាជាតិ និងប្រជាជនទាំងពីរ កម្ពុជា-ថៃ។

ក្នុងបរិបទសង្គ្រាមពាណិជ្ជកម្ម ភាគីកម្ពុជា និងថៃ បានជជែក និងឯកភាពគ្នាថា នឹងបង្កើនទំហំពាណិជ្ជកម្មពី១០ពាន់លានដុល្លារអាមេរិក ដល់ទៅ១៥ពាន់លានដុល្លារអាមេរិកនៅឆ្នាំ២០២៧។ត្រង់ចំណុចនេះ សូមរម្លឹកឡើងវិញថា យោងតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជាបង្ហាញថា នៅក្នុងឆ្នាំ ២០២៤ ពាណិជ្ជកម្មទ្វេភាគីកម្ពុជា-ថៃ សម្រេច​បាន​ជាង ៤,២៨ ពាន់លានដុល្លារ ក្នុងនោះកម្ពុជានាំចេញទៅថៃបាន ៨៤៥ លានដុល្លារ ។​​ចំណែក​​ថៃនាំចូលមកវិញ ៣,៤៤ ពាន់លានដុល្លារ។ក្នុងបច្ចុប្បន្ន គិតត្រឹមខែមករាដើមឆ្នាំ២០២៥ ទំហំពាណិជ្ជកម្មកម្ពុជា-ថៃសម្រេចបាន​ទឹកប្រាក់ជាង ៣៧០ លានដុល្លារអាមេរិក ដោយកើនឡើងជាង ៨ ភាគរយ ធៀបនឹងរយៈពេលដូចគ្នាកាលពីឆ្នាំ២០២៤។

នាយករដ្ឋមន្ត្រីថៃ ក៏បានចូលជួបជាមួយសម្ដេចតេជោ ហ៊ុន​ សែន ប្រធានព្រឹទ្ធសភាកម្ពុជា នៅរសៀលដដែល។ នៅចំពោះមុខសម្តេចតេជោ ហ៊ុន សែន ប្រធានព្រឹទ្ធសភាកម្ពុជា លោកស្រី Paetongtarn Shinawatra នាយករដ្ឋមន្រ្តីថៃ បានអះអាងថា លោកស្រី និងសម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា មានសំណាងណាស់ដែលមានឪពុកសុទ្ធតែជាមេដឹកនាំប្រទេសដ៏ពូកែ និងបានធ្វើជាទីប្រឹក្សាដ៏ល្អសម្រាប់កិច្ចការងារដឹកនាំប្រទេស។

នាយករដ្ឋម​​ន្ត្រីថៃ ក៏បានចូលជួបសម្ដេច ឃួន សុដារី ប្រធានរដ្ឋសភាកម្ពុជា នៅរសៀលថ្ងៃដដែល។ នៅក្នុងជំនួបនាយករដ្ឋមន្ត្រីថៃ លោកស្រី ផែថងថាន ស៊ីណាវ៉ាត្រ បានលើកឡើងថាភាពជាមិត្តជិតខាងល្អជាមួយកម្ពុជាបាន​ធ្វើឱ្យប្រទេសកម្ពុជានិងថៃជម្នះនូវបញ្ហាជាច្រើន ទទួលបានផលប្រយោជន៍ខ្ពស់ និងការអភិវឌ្ឍក្នុងតំបន់។

លោកស្រីនាយករដ្ឋមន្ត្រី ក៏បានចូលក្រាបថ្វាយបង្គុំគាល់ព្រះករុណា ព្រះបាទសម្ដេចព្រះបរមនាថ នរោត្ដម សីហមុនី ព្រះមហាក្សត្រនៃកម្ពុជា នៅព្រះបរមរាជវាំង មុននឹងចាកចេញពីកម្ពុជា៕

The post នាយករដ្ឋមន្ត្រីថៃ បញ្ចប់ដំណើរទស្សនកិច្ចផ្លូវការនៅកម្ពុជា appeared first on Kampuchea Thmey Daily.

​គណបក្ស​ប្រតិភូថៃ​ ដឹកនាំ​ដោយ​​នាយករដ្ឋមន្ត្រី​ទី​៣១ និង​ជាស្រ្តីក្មេង​បំផុត​ក្នុងប្រវត្តិសាស្រ្តថៃ បានមកដល់អាកាសយានដ្ឋានអន្តរជាតិភ្នំពេញ នាព្រឹកថ្ងៃទី២៣ខែមេសា ដោយ​មាន​ការ​ទទួល​ស្វាគមន៍​យ៉ាងកក់​ក្តៅ​​ពី​សំណាក់​ប្រតិភូ​របស់​ប្រទេសកម្ពុជា ​ដឹកនាំ​ដោយ​ លោក ជំទាវ​ ចម និម្មល រដ្ឋមន្ត្រី​ក្រសួង​ពាណិជ្ជកម្ម​។

នៅក្នុងឱកាសដែលលោកស្រីមកបំពេញទស្សនកិច្ចផ្លូវការនៅកម្ពុជា ចាប់ពីថ្ងៃទី២៣ ដល់ថ្ងៃទី២៤ ខែមេសា ឆ្នាំ២០២៥ តបតាមការអញ្ជើញរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រ​កម្ពុជា ហើយទស្សនកិច្ចនេះក៏កើតមានឡើងស្របពេលដែលប្រទេសទាំងពីរ កម្ពុជា-ថៃ ប្រារព្ធខួប៧៥ឆ្នាំនៃទំនាក់ទំនងការទូត។

ការអញ្ជើញមកដល់របស់នាយករដ្ឋមន្ត្រីថៃវ័យក្មេងបំផុត​ នៅឯអាកាសយានដ្ឋានអន្តរជាតិភ្នំពេញកាលពីព្រឹកមិញនេះ លោកស្រីបាន​ស្លៀកសម្លៀកបំពាក់​​ច្នៃ​ចេញ​ពី​ក្រណាត់សូត្រថៃ អម​ដោយ​គ្រឿង​អលង្ការ​តូចៗលម្អ​ខ្លួនជា​ច្រើន ដែល​មើល​ទៅ​សមសួន និងស៊ីវិល័យ​មែនទែន។ ​ក្នុងចំណោម​គ្រឿង​អលង្ការ ដូចជា ​ក្រវិល ចិញ្ចៀន ខ្សែក កន្លាស់​អាវ ២ ពណ៌​មាស និង​ប្រាក់ជាដើមដែល​គេ​មិនអាចដឹង​ពីតម្លៃ​លម្អិត​នោះទេ​ ហើយ​ អ្វី​ដែល​គេ​ចាប់អារម្មណ៍​ខ្លាំង គឺ​នាឡិកា​​ដៃ​ដែល​នាយករដ្ឋមន្ត្រី​វ័យ​៣៩​ឆ្នាំ​ និង​មានទ្រព្យសម្បត្តិសរុប​រហូត​ដល់​៤០០​លានដុល្លារ​នេះ បាន​ពាក់​ជាប់​នឹង​ខ្លួន។​

មាន​ការ​ចុះ​ផ្សាយ​​ខ្លះ​បង្ហាញថា លោកស្រីនាយករដ្ឋមន្ត្រី ផែថងថាន ដែល​ជា​កូនស្រីពៅរបស់​លោកថាក់ស៊ីន បានពាក់​នូវនាឡិកាដៃ​​ប្រណីតពណ៌​ប្រាក់-មាស ​ជាម៉ាកយីហោ​ល្បី​លំដាប់​ពិភពលោក​ផលិត​នៅ​ប្រទេសស្វីស នោះគឺ​នាឡិកា​ម៉ាក «Patek Philippe»។

សម្រាប់តម្លៃរបស់នាឡិកាប្រណីតដែលនាយករដ្ឋមន្ត្រីថៃទី៣១ ពាក់មកដំណើរបំពេញទស្សនកិច្ចផ្លូវការក្នុងប្រទេស​កម្ពុជា ដោយយោងទៅតាមគេហទំព័ររបស់នាឡិកាបានបញ្ចាក់ឲ្យដឹងថា មួយគ្រឿងនេះមានតម្លៃ ​ចន្លោះ​ពី ៦២ ០០០ ទៅ​ដល់ ៩៨ ០០០ ដុល្លារ​ឯណោះ។

យ៉ាងណាមិញ នេះក៏មិនមែនជារឿងចម្លែកឡើយ សម្រាប់នាយករដ្ឋមន្ត្រីថៃ ផែថងថាន ដែលតែងតែនិយមបង្ហាញភាពស៊ីវល័យ និងបង្ហាញនូវម៉ាក់យីហោប្រេនៗ រាល់ពេលដែលលោកស្រីមានវត្តមានក្នុងជំនួបជាមួយមេដឹកនាំពិភពលោក។ ស្រ្តីវ័យ៣៨ឆ្នាំរូបនេះ ត្រូវបានសារព័ត៌មានធំៗចុះផ្សាយថា មានទ្រព្យសម្បត្តិសរុបជាង ៤០០លានដុល្លារ ព្រមទាំងកាបូបប្រណីតចំនួន ២០១៧ និងនាឡិកាប្រណីតចំនួន ៧៥ ដែលនោះសបញ្ចាក់ថា លោកស្រីមានជាងគេបង្អស់ក្នុងចំណោមបងប្អូនប្រុស-ស្រីទាំង៣រូប៕

អត្ថបទ៖ សាង ស្រីល័ក្ខ

ចុចអាន៖នាយករដ្ឋមន្ត្រីថៃអរគុណកម្ពុជាដែលបានរួមប្រយុទ្ធប្រឆាំងអំពើឆបោកតាមអនឡាញ

The post ផ្ទុះ​កា​រចាប់​អារម្មណ៍ខ្លាំង​​​ចំពោះ​នាឡិកាដៃ​ប្រណីត​តម្លៃខ្ទង់​១០ម៉ឺន​ដុល្លារ ដែលនាយក​រដ្ឋមន្ត្រីថៃ ពាក់ ពេល​​មកបំពេញទស្សនកិច្ច​នៅកម្ពុជា appeared first on Kampuchea Thmey Daily.

ថ្លែងក្នុងសន្នីសិទសារព័ត៌មានបន្ទាប់ពីពិធីចុះអនុស្សារណចំនួន៧រវាងរដ្ឋាភិបាលកម្ពុជា-ថៃ វេលាថ្ងៃត្រង់ទី២៣ ខែមេសា ឆ្នាំ២០២៥នេះ សម្ដេចធិបតី ហ៊ុន ម៉ាណែត បាន​ថ្លែងថា៖ «ខ្ញុំសូមអរគុណនូវគោលនយោបាយរបស់ប្រទេសថៃដែលមិនអនុញ្ញាតឱ្យជនណាម្នាក់ប្រើប្រាស់ទឹកដីប្រទេសថៃដើម្បីជ្រៀតជ្រែកកិច្ចការផ្ទៃក្នុងឬធ្វើសកម្មភាពដែលបង្កគ្រោះថ្នាក់ដល់កម្ពុជា រាជរដ្ឋាភិបាលកម្ពុជានឹងអនុវត្តគោលការណ៍នេះដូចគ្នា»។

សម្ដេចថាប្រទេសថៃគឺជាដ៏គូរសំខាន់ និងជាដៃគូរវិនិយោគរបស់កម្ពុជានឹងប្ដេជ្ញាពង្រឹងកិច្ចសហការជាមួយប្រទេសថៃផងដែរ។ សម្ដេចធិបតី​ក៏បានគូសបញ្ជាក់ពីកិច្ចសហប្រតិបត្តិការយោធាតាមព្រំដែនប្រទេសទាំងពីរដើម្បីថែរក្សាសន្ដិភាព និងស្ថិរភាពផងដែរ។

នាយករដ្ឋមន្ត្រីថៃលោកស្រី ផែថងថាន ស៊ីណាវ៉ាត្រ បានថ្លែងផងដែរពីការរក្សាសន្តិភាព ស្ថិរភាពរវាងប្រទេសទាំងពីរ ជាពិសេស​កិច្ចសហប្រតិបត្តិការណ៍យោធានៅតាមព្រំដែនប្រទេសទាំងពីរ។

លោកស្រីថា៖ «យើងនឹងជំរុញកិច្ចសហប្រតិបត្តិការវិស័យយោធាឱ្យបានគ្រប់កម្រិតដើម្បីសន្ដិសុខជាតិ និងសុវត្ថិភាពនៅតាមព្រំដែនរបស់យើង»។

គួរឱ្យដឹងផងដែរថានាយករដ្ឋមន្ត្រីថៃលោកស្រី ផែថងថាន ស៊ីណាវ៉ាត្រ បានអញ្ជើញមកបំពេញទស្សនកិច្ចរយៈពេល២ថ្ងៃនៅកម្ពុជា ដោយចាប់ផ្ដើមពីថ្ងៃទី២៣ ខែមេសានេះ។ ដំណើរទស្សនកិច្ចនេះធ្វើឡើងស្របពេលដែលកម្ពុជា-ថៃប្រារព្ធខួប៧៥ឆ្នាំនៃទំនាក់ទំនងការទូត ដែលនឹងពង្រឹងបន្ថែមទៀតនូវចំណងមិត្តភាពជាប្រពៃណីរវាងប្រជាជនទាំងពីរ៕

អត្ថបទដោយ ហ៊ុន សិរីវឌ្ឍន៍

The post កម្ពុជា-ថៃ បន្តធានាមិនឱ្យមានការប្រើប្រាស់ទឹកដីប្រទេសមួយប្រឆាំងប្រទេសមួយទៀត appeared first on Kampuchea Thmey Daily.

ឯកសារកិច្ចព្រមព្រៀងទាំង៧រួមមានទី១/ កិច្ចព្រមព្រៀងស្ដីពីការប្រើប្រាស់កម្លាំងពលកម្មរវាងរដ្ឋាភិបាលកម្ពុជា និងថៃ។ ទី២/អនុស្សារណៈយោគយល់គ្នារវាងរដ្ឋាភិបាលកម្ពុជា និងថៃ ស្ដីពីកិច្ចសហប្រតិបត្តិការលើវិស័យការងារ។ ទី៣/អនុស្សារណៈយោគយល់គ្នារវាងក្រសួងបរិស្ថានកម្ពុជា និងក្រសួងធនធានធម្មជាតិ និងបរិស្ថានថៃ។ ទី៤/ កិច្ចព្រមព្រៀងរវាងកម្ពុជានិងថៃ ស្ដីពីការគ្រប់គ្រង និងថៃទាំស្ពានមិត្តភាពកម្ពុជា-ថៃ (ស្ទឹងបត់-បានណនអៀន)។

ទី៥/ កិច្ចព្រមព្រៀងរវាងកម្ពុជា-ថៃ ស្ដីពីការសាងសង់ស្ពានព្រំដែនផ្សារព្រំ-​បានផាកាត។ ទី៦/ កំណត់ហេតុស្តីពីការផ្តល់ជំនួយ បច្ចេកទេសលើការសិក្សាសមិទ្ធិលទ្ធ ភាពលើគម្រោងលើកកម្រិតគុណភាព ផ្លូវជាតិលេខ ៥៧ (បាត់ដំបង-ច្រកទ្វារ អន្តរជាតិព្រំ) រវាងក្រសួងសាធារណការនិងដឹកជញ្ជូនកម្ពុជា និងទីភ្នាក់ងារសហប្រតិបត្តិការ ដើម្បីអភិវឌ្ឍសេដ្ឋកិច្ចនៃប្រទេសជិតខាងនៃ ប្រទេសថៃ និងទី៧/លិខិតប្តូរសារ ស្តីពីគម្រោងពង្រឹងសមត្ថភាពវិទ្យាស្ថានអភិវឌ្ឍន៍ មុខជំនាញកម្ពុជា-ថៃ។

ដំណើរទស្សនកិច្ចរបស់នាយករដ្ឋមន្ត្រីថៃ មកកាន់កម្ពុជាក្នុងឆ្នាំ២០២៥ នេះ គឺចំគ្រាដែលទំនាក់ទំនងការទូតនៃប្រទេសទាំងឈានដល់ខួបទី៧៥ឆ្នាំ។

គួរជ្រាបថា កម្ពុជា-ថៃ បានចាប់ផ្តើមទំនាក់ទំនងការទូតជាមួយគ្នាឡើងវិញ នៅថ្ងៃទី១៩ ខែធ្នូ ឆ្នាំ១៩៥០ ហើយក្នុងឆ្នាំ២០២៥នេះ គឺជាខួបអនុស្សាវរីយ៍លើកទី៧៥ឆ្នាំ នៃការបង្កើតទំនាក់ទំនងការទូតរបស់ប្រទេសទាំងពីរ៕

The post កម្ពុជា-ថៃ ចុះកិច្ចព្រមព្រៀងចំនួន៧ ស្ដីពីវិស័យការងារ ការគាំពារបរិស្ថានឆ្លងដែន វិស័យសាធារណៈការ appeared first on Kampuchea Thmey Daily.

អ្នកស្រី ផែថងថាន កើតនៅថ្ងៃទី ២១ ខែសីហា ឆ្នាំ ១៩៨៦ ក្នុងទីក្រុងបាងកក ប្រទេសថៃ។ អ្នកស្រី គឺជាកូនស្រីពៅរបស់អតីតនាយករដ្ឋមន្ត្រី ថាក់ស៊ីន ស៊ីណាវ៉ាត្រ និងលោកស្រី Potjaman Na Pombejra។

ចំពោះការសិក្សា អ្នកស្រីបានទទួលបរិញ្ញាបត្រផ្នែកវិទ្យាសាស្ត្រនយោបាយ សង្គមវិទ្យា និងនរវិទ្យាពីសាកលវិទ្យាល័យ Chulalongkorn ក្នុងឆ្នាំ ២០០៨ ហើយក្រោយមកបានបន្តការសិក្សាបន្ថែមទៀតនៅសាកលវិទ្យាល័យ Surrey ក្នុងចក្រភពអង់គ្លេស។

មុន​ពេល​ចូល​ប្រឡូក​ក្នុង​ឆាក​នយោបាយ អ្នកស្រី ផែថងថាន បាន​ចូល​រួម​ក្នុង​ការ​គ្រប់​គ្រង​អាជីវកម្ម​របស់​គ្រួសារ​អ្នកស្រី ​ដែល​រួម​មាន​ អចលនទ្រព្យ សណ្ឋាគារ និង​ទីលាន​វាយ​កូនហ្គោល​។ ក្នុង​ឆ្នាំ ២០២១ អ្នកស្រីក៏​បានប្រឡូកក្នុងឆាកនយោបាយ​ជា​ផ្លូវ​ការ​ដោយ​ចូល​រួម​ជាមួយ​គណបក្ស​ភឿថៃ​ក្នុង​នាម​ជា​ប្រធាន​គណៈកម្មាធិការ​បង្កើត​ថ្មី និង​ការ​រួម​បញ្ចូល​គ្នា​។

បន្ទាប់ពី​តុលាការធម្មនុញ្ញ​ដក​តំណែង​ នាយករដ្ឋ​មន្ត្រី​ សេដ្ឋា ថាវីស៊ីន (Srettha Thavisin) កាលពីថ្ងៃទី១៤ ខែសីហា ឆ្នាំ២០២៤ អ្នកស្រី ផែថងថាន ត្រូវបាន​តែងតាំង​ដោយ​គណបក្សភឿថៃ​ឱ្យ​ឡើង​ស្នង​តំណែង​បន្ត​​ដើម្បី​សុំ​​ការ​បោះឆ្នោត​​ផ្តល់​សេចក្តី​ទុក​ចិត្តពិសភា​។ ការ​តែងតាំង​របស់​លោកស្រី​ត្រូវ​បាន​សភា​ថៃ​អនុម័ត​នៅ​ថ្ងៃ​ទី​១៦ ខែ​សីហា ឆ្នាំ​២០២៤ ដោយ​មាន​សំឡេង​គាំទ្រ ៣១៩​សំឡេង។ នេះ​ជា​ការ​សម្គាល់ដែលអ្នកស្រី ​ជា​ស្ត្រី​​​ក្មេង​បំផុត និង​ជា​ស្ត្រី​ទី​ពីរ​ដែល​បាន​ក្លាយ​ជា​នាយក​រដ្ឋមន្ត្រី​ក្នុង​ប្រវត្តិសាស្ត្រ​របស់​ប្រទេស​ថៃ។

ចំពោះជីវិតផ្ទាល់ខ្លួនឈ្មោះហៅក្រៅរបស់អ្នកស្រីគឺ «Ung Ing» ដែលពេលខ្លះត្រូវបានហៅខ្លីថា «Ing»។  អ្នកស្រីបានរៀបការជាមួយអ្នកជំនួញថៃលោក Pitaka Suksawat ក្នុងឆ្នាំ២០១៩ ដែលជានាយករងផ្នែកវិនិយោគនៃក្រុមហ៊ុន Rende Development Co., Ltd. និងជាសមាជិកក្រុមប្រឹក្សាភិបាលនៃមូលនិធិ Thaicom។

ប្តីប្រពន្ធមួយគូនេះមានកូនពីរនាក់ ដោយកូនស្រីមាន ឈ្មោះ Thitara Suksawat កើតនៅថ្ងៃទី១០ ខែមករា ឆ្នាំ ២០២១ និងកូនប្រុសម្នាក់ឈ្មោះ Phrutthasin Suksawat កើតនៅថ្ងៃទី​១ ខែឧសភា ឆ្នាំ២០២៣ មុនពេលការបោះឆ្នោតសកលនៅខែដដែល។

នៅក្នុងការប្រកាសទ្រព្យសម្បត្តិផ្ទាល់ខ្លួនរបស់អ្នកស្រីក្នុងឆ្នាំ ២០២៤ អ្នកស្រីបានបង្ហាញពីកាបូបប្រណីតចំនួន ២០១៧ និងនាឡិកាប្រណីតចំនួន ៧៥ ដែលមានទ្រព្យសម្បត្តិសរុបជាង ៤០០លានដុល្លារ៕

អត្ថបទ៖ ប៊ុន​ សុភាព

The post ត្រួសៗអំពី​ ជីវិត​គូ គ្រួសារ​ មុខជំនួញ​ និង​នយោបាយ​ របស់​នាយករដ្ឋមន្ត្រីថៃ ផែថងថាន​​ appeared first on Kampuchea Thmey Daily.