នាយទាហានឡាវ ដែលទទួលប័ណ្ណសរសើរពេលនេះ គឺវរសេនីយ៍ត្រី ចន្ថាណម កែវឡោខាំ និងវរសេនីយ៍ត្រី សាយសាម៉ុន ស៊ុកផាស៊ើត។ លើកឡើងក្នុងពិធីប្រគល់ប័ណ្ណសរសើរ ដែលធ្វើឡើងកាលពីរសៀលថ្ងៃទី២៤ ខែកក្កដា ឆ្នាំ២០២៦ លោកនាយឧត្តមសេនីយ៍ វង្ស ពិសេន បានអរគុណចំពោះបក្ស រដ្ឋ និងកងទ័ពឡាវ ដែលបានគាំទ្រដល់ការអនុវត្តបទឈប់បាញ់រវាងកម្ពុជា-ថៃ និងបានបញ្ជូននាយទាហានមកបំពេញបេសកកម្មជាអ្នកសង្កេតការណ៍ ក្នុងស្មារតីសាមគ្គីភាពគ្រួសារអាស៊ាន។

លោកអគ្គមេបញ្ជាការ បានគូសបញ្ជាក់ថា ក្នុងបរិបទដែលកម្ពុជាកំពុងប្រឈមបញ្ហាជម្លោះជាមួយប្រទេសថៃ ការចូលរួមរបស់ឡាវក្នុងនាមជាអ្នកសង្កេតការណ៍អាស៊ាន បានឆ្លុះបញ្ចាំងពីការប្តេជ្ញាចិត្តរួមក្នុងការស្វែងរកសន្តិភាព ស្ថិរភាព វិបុលភាព និងការរក្សាមជ្ឈភាពរបស់អាស៊ាន។

លោក បានកោតសរសើរចំពោះការលះបង់កម្លាំងកាយចិត្ត ស្មារតីទទួលខុសត្រូវ និងវិជ្ជាជីវៈខ្ពស់របស់មន្ត្រីសង្កេតការណ៍ទាំងពីរ ដែលបានឃ្លាតឆ្ងាយពីគ្រួសារ និងមាតុភូមិ ដើម្បីចូលរួមកសាងសន្តិភាព និងប្រក្រតីភាពនៅតាមបណ្តោយព្រំដែនកម្ពុជា-ថៃ។

ជំនួសអាណត្តិការងាររបស់នាយទាហានទាំងពីរខាងលើ រដ្ឋាភិបាលឡាវក៏បានបន្តបញ្ជូននាយទាហានប្តូរវេនចំនួនពីររូបផ្សេងទៀត ដើម្បីចូលរួមជាមួយក្រុមអ្នកសង្កេតការណ៍អាស៊ាន (AOT) ប្រចាំកម្ពុជា ដែលដឹកនាំដោយប្រទេសហ្វីលីពីន ជាប្រធានប្តូរវេនអាស៊ាន ក្នុងការចុះសង្កេតការណ៍ និងផ្ទៀងផ្ទាត់ស្ថានភាពព្រំដែនកម្ពុជា-ថៃ ក្រោយបទឈប់បាញ់ចូលជាធរមាន។

កម្ពុជាតែងតែផ្តល់ការគាំទ្រយ៉ាងពេញទំហឹង និងពង្រឹងតួនាទីដល់ក្រុមអ្នកសង្កេតការណ៍អាស៊ាន ក្នុងការធានាការអនុវត្តបទឈប់បាញ់រវាងកម្ពុជា-ថៃ ដើម្បីលើកកម្ពស់តម្លាភាព ការជឿទុកចិត្តគ្នា និងការពារអាយុជីវិតប្រជាពលរដ្ឋ។ កម្ពុជាក៏ស្វាគមន៍ជានិច្ចចំពោះបណ្តាប្រទេសជាមិត្តក្នុងការបញ្ជូនអ្នកសង្កេតការណ៍ ឬចូលរួមជួយលើកិច្ចការសន្តិភាព៕

The post កម្ពុជាអរគុណឡាវចំពោះការរួមចំណែកជាអ្នកសង្កេតការណ៍លើបញ្ហាជម្លោះព្រំដែនកម្ពុជា-ថៃ appeared first on Kampuchea Thmey Daily.

ទាហានវៀតណាមដែលទទួលប័ណ្ណសរសើរនេះ គឺវរសេនីយ៍ឯក ង៉ូ ស៊ុន ជឿង និងវរសេនីយ៍ឯកបម្រុង បៀវ ស៊ុន យឿង ខណៈដែលនាយទាហានទាំងពីរត្រូវបញ្ចប់អាណត្តិបេសកកម្មរបស់ខ្លួននៅកម្ពុជា។

លើកឡើងក្នុងពិធីប្រគល់ប័ណ្ណសរសើរដែលធ្វើឡើងកាលពីរសៀលថ្ងៃទី១៤ ខែកក្កដា ឆ្នាំ២០២៦ លោកនាយឧត្តមសេនីយ៍ វង្ស ពិសេន បានថ្លែងអំណរគុណចំពោះបក្ស រដ្ឋ និងកងទ័ពវៀតណាម ដែលបានគាំទ្រការអនុវត្តបទឈប់បាញ់រវាងកម្ពុជា-ថៃ និងបានបញ្ជូននាយទាហានមកបំពេញបេសកកម្មជាក្រុមអ្នកសង្កេតការណ៍អាស៊ាននៅកម្ពុជា ក្នុងស្មារតីសាមគ្គីភាព និងទំនួលខុសត្រូវរួមរបស់គ្រួសារអាស៊ាន។

លោកនាយឧត្តមសេនីយ៍ បានរំលេចពីចំណងមិត្តភាពកម្ពុជា និងវៀតណាម ដែលជាប្រទេសជិតខាងគ្នា មានប្រវត្តិសហការជួយគ្នាទៅវិញទៅមក ទាំងក្នុងសម័យសង្គ្រាម និងសន្តិភាព។ ចំពោះក្នុងបរិបទដែលកម្ពុជាកំពុងប្រឈមបញ្ហាជម្លោះជាមួយប្រទេសថៃ លោក ថា ការចូលរួមរបស់វៀតណាមក្នុងនាមជាអ្នកសង្កេតការណ៍អាស៊ាន បានឆ្លុះបញ្ចាំងពីការប្តេជ្ញាចិត្តរួមក្នុងការស្វែងរកសន្តិភាព ស្ថិរភាព និងការរក្សាមជ្ឈភាពរបស់អាស៊ាន។

លោកអគ្គមេបញ្ជាការ ក៏បានកោតសរសើរចំពោះការលះបង់ ការទទួលខុសត្រូវ និងវិជ្ជាជីវៈរបស់ក្រុមអ្នកសង្កេតការណ៍អាស៊ានទាំងអស់ ដែលបានត្រូវឃ្លាតឆ្ងាយពីគ្រួសារ និងប្រទេសកំណើត ដើម្បីចូលរួមកសាងសន្តិភាព ស្ថិរភាព និងប្រក្រតីភាពឡើងវិញនៅតាមបណ្តោយព្រំដែនកម្ពុជា-ថៃ និងក្នុងតំបន់អាស៊ានផងដែរ។

គួរកត់សម្គាល់ថា កម្ពុជាតែងតែបានផ្តល់ការគាំទ្រដល់ក្រុមអ្នកសង្កេតការណ៍អាស៊ាន (AOT) ព្រមទាំងសង្កត់ធ្ងន់ទៅលើសារៈសំខាន់មិនអាចខ្វះបានក្នុងការពង្រឹងតួនាទី និងអាណត្តិរបស់ AOT ដើម្បីផ្ទៀងផ្ទាត់ និងធានាថាការអនុវត្តបទឈប់បាញ់ ក៏ដូចជាវិធានការនានា ដែលបានឯកភាពគ្នារវាងកម្ពុជានិងថៃ ត្រូវបានអនុវត្តពេញលេញ និងដោយប្រសិទ្ធភាព។

បន្ទាប់ពីម៉ាឡេស៊ី បច្ចុប្បន្នប្រទេសហ្វីលីពីន ដែលជាប្រធានប្ដូរវេនអាស៊ាន បានដឹកនាំក្រុមអ្នកសង្កេតការណ៍អាស៊ាននេះ ក្នុងការចុះសង្កេតការណ៍ ផ្ទៀងផ្ទាត់ និងរាយការណ៍អំពីស្ថានភាពតាមតំបន់ព្រំដែនកម្ពុជា-ថៃ ក្រោយបទឈប់បាញ់ចូលជាធរមាន៕

ដោយ៖ ធឿន វ៉ាន់សុង

The post កម្ពុជាអរគុណវៀតណាមចំពោះការរួមចំណែកជាអ្នកសង្កេតការណ៍ក្នុងបញ្ហាជម្លោះព្រំដែនកម្ពុជា-ថៃ appeared first on Kampuchea Thmey Daily.

លើកឡើងនៅក្នុងជំនួបពិភាក្សាការងារជាមួយលោកនាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ ដែលធ្វើឡើងនាព្រឹកថ្ងៃទី៣០ ខែមិថុនា ឆ្នាំ២០២៦ លោកវរសេនីយ៍ឯក Adhishek Arora បានវាយតម្លៃចំពោះកិច្ចសហប្រតិបត្តិការដ៏ល្អរវាងកងទ័ពកម្ពុជា និងឥណ្ឌា។ លោកអនុព័ន្ធយោធា គូសបញ្ជាក់ថា ឥណ្ឌាស្វាគមន៍ និងត្រៀមខ្លួនបន្តគាំទ្ររាល់សំណើរបស់កម្ពុជា ក្នុងការបណ្តុះបណ្តាល និងពង្រឹងសមត្ថភាពកងទ័ព ស្របតាមតម្រូវការជាក់ស្តែង។

ឥណ្ឌាដែលមានភាពជឿនលឿនក្នុងឧស្សាហកម្មការពារជាតិ ក៏មានលទ្ធភាពគាំទ្រលើបច្ចេកវិទ្យា និងឧបករណ៍ទំនើប ដូចជា ឧបករណ៍ដោះមីន និងដ្រូនស៊ើបការណ៍ផងដែរ។ លោកអនុព័ន្ធយោធាឥណ្ឌា លើកឡើងបន្ថែមដូច្នេះ។

ការលើកឡើងរបស់ភាគីឥណ្ឌាដូច្នេះ ជាការឆ្លើយតបទៅនឹងសំណើរបស់អគ្គមេបញ្ជាការកងទ័ពកម្ពុជា នាយឧត្តមសេនីយ៍ វង្ស ពិសេន។ លោក វង្ស ពិសេន បានស្នើឱ្យភាគីឥណ្ឌា បន្តគាំទ្រការបណ្តុះបណ្តាលកងទ័ពកម្ពុជា ការផ្លាស់ប្តូរទស្សនកិច្ចគ្រប់កម្រិត ការផ្លាស់ប្តូរព័ត៌មាន ការប្រយុទ្ធប្រឆាំងឧក្រិដ្ឋកម្មឆ្លងដែន កិច្ចសហប្រតិបត្តិការសង្គ្រោះគ្រោះមហន្តរាយ បេសកកម្មរក្សាសន្តិភាព ការដោះមីន កិច្ចសហប្រតិបត្តិការរវាងប្រភេទទ័ព ការធ្វើសមយុទ្ធរួម និងការចូលចតនាវា។

លោកអគ្គមេបញ្ជាការ បានអរគុណដល់ភាគីឥណ្ឌាចំពោះការគាំទ្រកម្ពុជាជាបន្តបន្ទាប់ដល់ការអភិវឌ្ឍសមត្ថភាពកងទ័ពកម្ពុជា តាមរយៈការបង្កើនវគ្គសិក្សាជាច្រើនជំនាញ ព្រមទាំងជោគជ័យនៃសមយុទ្ធទ្វេភាគីកម្ពុជា-ឥណ្ឌា លើកទី២ ក្នុងឆ្នាំ២០២៦កន្លងទៅ ដែលបានរួមចំណែកពង្រឹងនូវសមត្ថភាព និងកិច្ចសហប្រតិបត្តិការរវាងកងទ័ពប្រទេសទាំងពីរ។

គួរឱ្យដឹងថា កាលពីដើមខែឧសភា កងទ័ពជើងគោកកម្ពុជាបានធ្វើសមយុទ្ធយោធារួមគ្នា CINBAX II ជាមួយកងទ័ពជើងគោកឥណ្ឌា រយៈពេល១៥ថ្ងៃ នៅមូលដ្ឋានកងយោធពលខេមរភូមិន្ទ តេជោសែន ភ្នំធំម្រះព្រៅ ស្ថិតក្នុងស្រុកសំរោងទង ខេត្តកំពង់ស្ពឺ។ សមយុទ្ធនេះ បានអនុវត្តសកម្មភាពហ្វឹកហ្វឺនរួមគ្នាជាច្រើន ទាំងនៅក្នុងទីបញ្ជាការ និងលើទីលានអនុវត្តជាក់ស្តែង ផ្តោតទៅលើការពង្រឹងអន្តរប្រតិបត្តិការ ការផ្លាស់ប្តូរបទពិសោធវិជ្ជាជីវៈ និងការកសាងទំនុកចិត្តរវាងកងទ័ពនៃប្រទេសទាំងពីរ៕

The post ឥណ្ឌាប្រកាសត្រៀមជួយពង្រឹងសមត្ថភាពកងទ័ពកម្ពុជា និងគាំទ្របច្ចេកវិទ្យាការពារជាតិ appeared first on Kampuchea Thmey Daily.

លោកសង្កត់ធ្ងន់ថា មិនត្រូវឱ្យមានការពាក់ព័ន្ធ ឬកិច្ចការពារពីសំណាក់មន្ត្រីអាជ្ញាធរ ឬកងកម្លាំងណាម្នាក់ជាមួយជនល្មើសឡើយ ដោយព្រមានថា បើរកឃើញមានការកាង ឬឃុបឃិត នឹងត្រូវអនុវត្តវិន័យកងទ័ព ជាមួយនឹងការប្រឈមទោសទណ្ឌតាមផ្លូវច្បាប់ជាធរមាន។ ចំពោះឧបករណ៍នេសាទខុសច្បាប់មួយចំនួន ដែលរឹបអូសបានពីការបង្ក្រាប លោក ថា ត្រូវបំផ្លាញចោលភ្លាម ដោយមិនត្រូវយកបម្រើឱ្យបេសកកម្មបង្ក្រាបនោះទេ។

យោងតាមរបាយការណ៍ ក្នុងរយៈពេល១៨ខែមកនេះ កងកម្លាំងចម្រុះដែលដឹកនាំមានយោធា ក្រោមកិច្ចសហការពីអាជ្ញាធរដែនដី បានចុះល្បាត ទប់ស្កាត់ និងបង្ក្រាបបទល្មើសនេសាទខុសច្បាប់ជាបន្តបន្ទាប់ក្នុងភូមិសាស្ត្រខេត្តជុំវិញបឹងទន្លេសាប ដែលក្នុងនោះបានឃាត់ខ្លួនជនល្មើស ដកហូត និងបំផ្លាញចោលឧបករណ៍នេសាទខុសច្បាប់ជាច្រើនករណី។

នាយឧត្តមសេនីយ៍ វង្ស ពិសេន បានថ្លែងកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់កងកម្លាំងចម្រុះ អាជ្ញាធរខេត្តទាំង៥ និងមន្ត្រីពាក់ព័ន្ធទាំងអស់ ដែលបានរួមគ្នាយ៉ាងសកម្មលើកិច្ចការពារធនធានធម្មជាតិ និងមច្ឆជាតិដ៏មានតម្លៃរបស់ជាតិប្រកបដោយជោគជ័យ។

ដើម្បីបង្កើនប្រសិទ្ធភាពការងារនេះឱ្យកាន់តែរឹងមាំថែមទៀត នាយឧត្ដមសេនីយ៍ បានជំរុញឱ្យកម្លាំងមានសមត្ថកិច្ច និងអាជ្ញាធរពាក់ព័ន្ធបន្តគោរពតាមបទបញ្ជារបស់រាជរដ្ឋាភិបាល ដើម្បីទប់ស្កាត់ និងបង្ក្រាបបទល្មើសនេសាទត្រី ព្រៃឈើ និងទន្ទ្រានដី ដោយកម្លាំងសមត្ថកិច្ចគ្រប់ប្រភេទ ត្រូវរួមគ្នាស្រាវជ្រាវបង្ក្រាបបទល្មើស កសាងសំណុំរឿង បញ្ជូនជនល្មើសទៅផ្ដន្ទាទោសតាមច្បាប់។

ទន្ទឹមនឹងការបង្ក្រាប លោក ថា ត្រូវមានការអប់រំឱ្យប្រជាពលរដ្ឋយល់អំពីច្បាប់ស្ដីពីជលផលដើម្បីឱ្យពួកគាត់ចូលរួមទប់ស្កាត់ និងបង្ក្រាបបទល្មើស ហើយត្រូវបន្តស្រាវជ្រាវដកហូតឧបករណ៍នេសាទខុសច្បាប់។

គួរកត់សម្គាល់ថា កិច្ចប្រជុំខាងលើ បានប្រព្រឹត្តទៅនៅសាលប្រជុំសាលាខេត្តពោធិ៍សាត់ ដោយមានការចូលរួមពីសំណាក់លោកនាយឧត្ដមសេនីយ៍ ម៉ៅ សុផាន់ អគ្គមេបញ្ជាការរង និងជាមេបញ្ជាការកងទ័ពជើងគោក ព្រមទាំងតំណាងក្រសួង-ស្ថាប័នពាក់ព័ន្ធ អភិបាលខេត្តក្នុងភូមិសាស្ត្រជុំវិញបឹងទន្លេសាប មេបញ្ជាការកងកម្លាំងប្រដាប់អាវុធគ្រប់ប្រភេទ ដើម្បីត្រួតពិនិត្យវឌ្ឍនភាព និងលើកទិសដៅការងារបន្តក្នុងការអនុវត្តយុទ្ធនាការទប់ស្កាត់ និងបង្ក្រាបបទល្មើសនេសាទគ្រប់ប្រភេទលើផ្ទៃបឹងទន្លេសាទ ជាពិសេសការរួមគ្នាពិភាក្សា និងដោះស្រាយបញ្ហាប្រឈមនានាចំពោះមុខ៕

The post អគ្គមេបញ្ជាការទ័ពព្រមានមន្ត្រីកុំឱ្យកាងក្នុងបទល្មើសនេសាទ ខណៈកម្លាំងត្រូវបង្កើនការបង្ក្រាប appeared first on Kampuchea Thmey Daily.

នៅក្នុងកិច្ចប្រជុំនោះ អគ្គមេបញ្ជាការកងទ័ពនៃបណ្តាប្រទេសសមាជិកអាស៊ាន បានផ្លាស់ប្តូរទស្សនៈ និងពិភាក្សាយ៉ាងស៊ីជម្រៅអំពីបញ្ហាសន្តិសុខ ដែលជាក្តីកង្វល់រួម ដូចជាបញ្ហាសន្តិសុខដែនសមុទ្រ ភេរវកម្ម ឧក្រិដ្ឋកម្ម ការគំរាមកំហែងតាមប្រព័ន្ធអ៊ីនធឺណេត និងការត្រៀមលក្ខណៈឆ្លើយតបនឹងគ្រោះមហន្តរាយធម្មជាតិ។

ក្នុងសុន្ទរកថាបើក លោកនាយឧត្តមសេនីយ៍ រ៉ូមេអូ ប្រាវនើ ចេអរ នាយសេនាធិការកងទ័ពហ្វីលីពីន ដែលជាប្រធាននៃកិច្ចប្រជុំ ក៏បានគូសរំលេចអំពីតួនាទីរបស់ក្រុមអ្នកសង្កេតការណ៍អាស៊ាន ក្នុងការចូលរួមតាមដានស្ថានការណ៍នៃជម្លោះព្រំដែនកម្ពុជា-ថៃផងដែរ ដោយបានទទួលស្គាល់ការគ្រប់គ្រងរបស់ម៉ាឡេស៊ីលើក្រុមអ្នកសង្កេតការណ៍អាស៊ាន និងកិច្ចខិតខំប្រឹងប្រែងរបស់ខ្លួនក្នុងការគាំទ្រយន្តការត្រួតពិនិត្យបទឈប់បាញ់នៅតាមបណ្តោយព្រំដែនកម្ពុជា-ថៃ។

លោក ចាត់ទុកកិច្ចខិតខំប្រឹងប្រែងរបស់ម៉ាឡេស៊ី បានបង្ហាញពីតម្លៃដ៏យូរអង្វែងនៃការសន្ទនា ការអត់ធ្មត់ និងកិច្ចសហប្រតិបត្តិការក្នុងការរក្សាស្ថិរភាពក្នុងតំបន់ ស្របតាមមាគ៌ាអាស៊ាន។ តាមលោក រ៉ូមេអូ ប្រទេសហ្វីលីពីន ក្នុងនាមប្រធានអាស៊ានឆ្នាំនេះ ទទួលយកការទទួលខុសត្រូវនេះ ហើយយល់ដឹងយ៉ាងច្បាស់ថា ការសន្ទនា ការកសាងទំនុកចិត្ត ត្រូវតែពង្រឹងជាបន្តបន្ទាប់ ហើយសន្តិភាពត្រូវតែការពារ តាមរយៈកិច្ចខិតខំប្រឹងប្រែងរួមគ្នា។

លើកឡើងនៅក្នុងកិច្ចប្រជុំនោះដែរ លោកនាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទបានថ្លែងអំណរគុណដល់បណ្តាប្រទេសសមាជិកអាស៊ាន ជាពិសេសម៉ាឡេស៊ី ដែលជាប្រធានប្តូរវេនអាស៊ានឆ្នាំ២០២៥ និងហ្វីលីពីន ប្រធានប្តូរវេនអាស៊ានឆ្នាំ២០២៦ ចំពោះតួនាទីដ៏សំខាន់ក្នុងការគាំទ្របទឈប់តាមបណ្តោយព្រំដែនកម្ពុជា-ថៃ។

នាយឧត្តមសេនីយ៍ វង្ស ពិសេន បានវាយតម្លៃខ្ពស់ចំពោះការបញ្ជូននាយទាហានមកចូលរួមក្នុងបេសកកម្មជាអ្នកសង្កេតការណ៍បទឈប់បាញ់នៅកម្ពុជា និងបញ្ជាក់ថា អាស៊ានអាចដោះស្រាយបញ្ហាផ្ទៃក្នុងអាស៊ានដោយខ្លួនឯង។ លោកបានបញ្ជាក់ជាថ្មីថា កម្ពុជាបានត្រៀមខ្លួនរួចជាស្រេចក្នុងការបន្តធ្វើការយ៉ាងជិតស្និទ្ធក្នុងអាណត្តិដឹកនាំដោយហ្វីលីពីន ដើម្បីធានាឱ្យមានការដោះស្រាយបញ្ហាប្រឈមដោយសន្តិវិធី ផ្អែកលើច្បាប់អន្តរជាតិ។

លោក វង្ស ពិសេន ក៏បានអះអាងជាថ្មីពីការប្រកាន់ខ្ជាប់គោលការណ៍ព្រំដែនមិនត្រូវបានកែប្រែដោយការប្រើប្រាស់កម្លាំង ព្រមទាំងការខិតខំធ្វើឱ្យស្ថានការណ៍នៅតាមបណ្តោយព្រំដែនកម្ពុជា-ថៃ វិលត្រឡប់ទៅរកភាពប្រក្រតីឡើងវិញ។

គួរកត់សម្គាល់ថា កិច្ចប្រជុំអគ្គមេបញ្ជាការកងទ័ពអាស៊ានលើកទី២៣ (ACDFM-23) បានប្រព្រឹត្តទៅក្រោមប្រធានបទ៖ «ធានាអនាគតរបស់យើងរួមគ្នា»។ តាមរយៈប្រធានបទនេះ លោកនាយឧត្តមសេនីយ៍ រ៉ូមេអូ ប្រាវនើ ចេអរ នាយសេនាធិការកងទ័ពហ្វីលីពីន ដែលជាប្រធាននៃកិច្ចប្រជុំ បានលើកឡើងថា ជាការឆ្លុះបញ្ចាំងពីការពិតត្រូវទទួលស្គាល់ទាំងអស់គ្នាលើបញ្ហាប្រឈមសន្តិសុខនាពេលបច្ចុប្បន្ន និងការឆ្លើយតប៕

The post មេបញ្ជាការទ័ពនៃប្រទេសអាស៊ាន ជួបប្រជុំគ្នាដោយជជែកពីការឆ្លើយតបលើបញ្ហាប្រឈមសន្តិសុខក្នុងតំបន់ appeared first on Kampuchea Thmey Daily.

លោកបានលើកឡើងក្នុងពិធីសំណេះសំណាល និងប្រគល់ប័ណ្ណសរសើរជូនក្រុមអ្នកសង្កេតការអាស៊ាន (AOT) ប្រចាំកម្ពុជា នាព្រឹកថ្ងៃទី២ ខែមេសា ឆ្នាំ២០២៦នេះ ថា ការគាំទ្ររបស់បណ្ដាប្រទេសជាសមាជិកអាស៊ាន គឺបានបង្ហាញអំពីសាមគ្គីភាព ឯកភាពរបស់អាស៊ាន ក្នុងការរក្សាសន្តិភាព ស្ថិរភាពក្នុងតំបន់ ស្របពេលដែលសភាពការណ៍ពិភពលោកស្ថិតក្នុងភាពតានតឹង និងស្មុគស្វាញគួរឱ្យព្រួយបារម្ភ។

លោកនាយឧត្តមសេនីយ៍ វង្ស ពិសេន បានគូសបញ្ជាក់ថា ការបង្កើតក្រុម AOT គឺមិនមែនកើតឡើងដោយចៃដន្យនោះឡើយ ហើយបេសកកម្មរបស់ក្រុម AOT នេះ នឹងត្រូវបានចារទុកក្នុងប្រវត្តិសាស្ត្រអាស៊ានដែលបានចូលរួមដោះស្រាយបញ្ហាជម្លោះប្រដាប់អាវុធរវាងសមាជិកអាស៊ានខ្លួនឯង។

លោកបានកោតសរសើរចំពោះក្រុម AOT ប្រចាំកម្ពុជា ដែលបានខិតខំដោយមិនរុញរានិងលះបង់គ្រប់កាលៈទេសៈ បើទោះបីបេសកកម្មតម្រូវឱ្យទៅសង្កេតការណ៍យប់ព្រលប់ ត្រួតពិនិត្យការកែសម្រួលសភាវុធ ក្រោមកម្ដៅថ្ងៃ និងភ្លៀង និងពេលខ្លះក្រោមសម្ពាធនៃការគំរាមកំហែងដោយស្នូរកាំភ្លើងពីភាគីម្ខាងទៀតក៏ដោយ។

«ក្នុងនាមជាប្រទេសសមាជិកអាស៊ាន យើងគួរថែរក្សាឱ្យបានសាមគ្គីភាព ឯកភាព និងមជ្ឈភាពអាស៊ាន ដើម្បីរួមគ្នាឆ្ពោះទៅរកសន្តិភាព វិបុលភាព និងការអភិវឌ្ឍ»។ នេះជាការគូសបញ្ជាក់របស់នាយឧត្តមសេនីយ៍ វង្ស ពិសេន ដោយលោក បញ្ជាក់ថា សម្រាប់កម្ពុជា នៅតែបន្តរក្សាចំហរ និងការប្ដេជ្ញាចិត្តក្នុងការដោះស្រាយបញ្ហាព្រំដែនដោយសន្តិវិធី និងស្របតាមច្បាប់អន្តរជាតិ។

ពីវេទិកាខាងលើ នាយឧត្តមសេនីយ៍ អគ្គមេបញ្ជាការ ក៏បានអរគុណដល់បណ្ដាប្រទេសជាសមាជិកអាស៊ាន ជាពិសេស រាជរដ្ឋាភិបាល និងកងទ័ពម៉ាឡេស៊ី ដែលបានគាំទ្រការអនុវត្តឈប់បាញ់រវាងកម្ពុជា-ថៃ និងបានបញ្ជូននាយទាហានមកចូលរួមក្នុងបេសកកម្មសង្កេតការណ៍នៅកម្ពុជា ក្នុងនាមជាគ្រួសារអាស៊ាន។ ខណៈក្នុងឆ្នាំ២០២៦នេះ ហ្វីលីពីន ដែលជាប្រធានអាស៊ាន លោក រំពឹងថា ហ្វីលីពីននឹងបន្តដឹកនាំក្រុម AOT ក្នុងការចូលរួមសម្របសម្រួល និងដោះស្រាយបញ្ហាប្រឈមដែលកើតមានឡើងតាមបណ្ដោយព្រំដែនកម្ពុជា-ថៃបន្តទៀត ឱ្យវិលត្រឡប់ទៅកាន់ប្រក្រតីភាពឡើងវិញ។

បើតាមរបាយការណ៍របស់់លោកវរសេនីយ៍ឯក MOHD FARID BIN MOHD YUSOP ប្រធានក្រុម AOT ក្នុងរយៈពេលជិត៧ខែមកនេះ ក្រុម AOT បានបំពេញភារកិច្ចរបស់ខ្លួនយ៉ាងសកម្មក្នុងការតាមដានស្ថានភាពនៅទីតាំងជាក់ស្ដែង ការលើកកម្ពស់តម្លាភាព ការកសាងទំនុកចិត្តរវាងភាគីពាក់ព័ន្ធ និងការគាំទ្រដល់កិច្ចខិតខំដើម្បីរក្សាឱ្យបានស្ថិរភាព ទប់ស្កាត់ការកើនឡើងនូវភាពតានតឹង៕

The post អគ្គមេបញ្ជាការទ័ពបញ្ជាក់ជាថ្មីពីជំហរកម្ពុជាបន្តដោះស្រាយបញ្ហាព្រំដែនជាមួយថៃដោយសន្តិវិធី ស្របតាមច្បាប់អន្តរជាតិ appeared first on Kampuchea Thmey Daily.

នាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ បានកត់សម្គាល់ពីកិច្ចខិតខំប្រឹងប្រែងរបស់នាយឧត្ដមសេនីយ៍ អេចជេ ម៉ូដ នីហ្សាម ចាហ្វា អគ្គមេបញ្ជាការកងទ័ពម៉ាឡេស៊ី ក្នុងតួនាទីជាអ្នកសម្របសម្រួលកិច្ចប្រជុំ GBC ឱ្យប្រព្រឹត្តទៅដោយភាពជោគជ័យ និងឈានដល់ការសម្រេចបាននូវការឯកភាពគ្នារបស់ភាគីកម្ពុជា និងថៃ លើលក្ខខណ្ឌនៃបទឈប់បាញ់ និងការរៀបចំយន្តការសម្រាប់អនុវត្ត។

យោងតាមខ្លឹមសារនៃលិខិតរបស់លោកនាយឧត្តមសេនីយ៍ វង្ស ពិសេន គូសបញ្ជាក់ថា ភាពជាអ្នកដឹកនាំ មិនលំអៀង និងការយកចិត្តទុកដាក់របស់ម៉ាឡេស៊ី ជាកត្តាសំខាន់ក្នុងការធានាថា កិច្ចប្រជុំនេះ ត្រូវបានធ្វើឡើងដោយការយល់គ្នាទៅវិញទៅមក និងទទួលបានលទ្ធផលជាផ្លែផ្កា ដែលរួមចំណែកដល់សន្តិភាព និងស្ថិរភាពក្នុងតំបន់។

អគ្គមេបញ្ជាការទ័ពកម្ពុជា បានសង្កត់ធ្ងន់ចំពោះតួនាទីរបស់លោកអគ្គមេបញ្ជាការទ័ពម៉ាឡេស៊ី ដែលបានសម្រុះសម្រួលឱ្យមានការអនុវត្តកិច្ចព្រមព្រៀងបទឈប់បាញ់ ដោយបានធ្វើដំណើរមកកាន់ប្រទេសកម្ពុជា និងប្រទេសថៃ ដើម្បីសង្កេតមើលការអនុវត្តលើបទឈប់បាញ់ ពិសេសជំរុញឱ្យមានការបង្កើតក្រុមអ្នកសង្កេតការណ៍បណ្តោះអាសន្ន ហើយឈានដល់ការរៀបចំលក្ខខណ្ឌយោង ដែលត្រួសត្រាយផ្លូវសម្រាប់ការបង្កើតក្រុមអ្នកសង្កេតការណ៍អាស៊ានឱ្យបានឆាប់រហ័សបំផុត។

ការរួមចំណែកទាំងនេះជាសក្ខីភាពមួយចំពោះការប្តេជ្ញាចិត្តមិនងាករេរបស់ម៉ាឡេស៊ីចំពោះសន្តិភាព និងកិច្ចសហប្រតិបត្តិការក្នុងតំបន់ ពោលគឺបញ្ជាក់អំពីស្មារតីសាមគ្គីភាព និងកិច្ចសហប្រតិបត្តិការអាស៊ានជាគ្រួសារដែលមិនអាចបំបែកបាន។ លោក វង្ស ពិសេន លើកឡើងបន្ថែមក្នុងលិខិតដែលផ្ញើទៅកាន់លោកអគ្គមេបញ្ជាការទ័ពម៉ាឡេស៊ី៕

ដោយ៖ ធឿន វ៉ាន់សុង

The post កម្ពុជាអរគុណមេបញ្ជាការទ័ពម៉ាឡេស៊ីដែលខ្នះខ្នែងជួយទប់ស្កាត់ជម្លោះប្រដាប់អាវុធនៅព្រំដែន appeared first on Kampuchea Thmey Daily.

ការបញ្ជាក់ដូច្នេះរបស់លោកនាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ ធ្វើឡើងនៅក្នុងឱកាសអញ្ជើញជាអធិបតីពិធីបើកវគ្គហ្វឹកហ្វឺនបំប៉នវិក្រឹតការដល់នាយទាហានទ័ពជំនាញទ័ពជើងគោក ថ្នាក់អនុសេនីយ៍ជំនាន់ទី១ នៅវិទ្យាស្ថាននាយទាហានចម្រុះ កាលពីរសៀលថ្ងៃទី២៧ ខែមិថុនា ឆ្នាំ២០២៥។

នៅចំពោះមុខកងទ័ព លោកនាយឧត្ដមសេនីយ៍ បានលើកឡើងពីហេតុការណ៍ឆ្មក់ចូលមកវាយប្រហារលើកងទ័ពកម្ពុជាពីកងទ័ពថៃ កាលពីព្រឹកថ្ងៃទី២៨ ខែឧសភា នៅចំណុចព្រំដែនមុំ៣ ក្នុងខេត្តព្រះវិហារ បណ្ដាលឱ្យកងទ័ពកម្ពុជាម្នាក់ស្លាប់បាត់បង់ជីវិត ដែលជាចេតនាបង្កហេតុរបស់កងទ័ពថៃដើម្បីឈ្លានពានកម្ពុជា។

លោកនាយឧត្តមសេនីយ៍ វង្ស ពិសេន បន្តថា ទោះក្នុងហេតុការណ៍ដូចនេះក្តី សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានលើកឡើងពីការចង់ដោះស្រាយបញ្ហាព្រំដែនដោយសន្ដិភាព និងផ្អែកលើច្បាប់អន្តរជាតិ ជាមួយនោះ កម្ពុជា ក៏រក្សាសិទ្ធិក្នុងការការពារបូរណភាពទឹកដីរបស់ខ្លួន តាមគ្រប់មធ្យោបាយ បើសិនជាមានការឈ្លានពានលើដីកម្ពុជា។

លោក បានគូសបញ្ជាក់ពីការសម្រេចចិត្តរបស់រាជរដ្ឋាភិបាលកម្ពុជា នៅក្នុងការដាក់ពាក្យបណ្តឹងទៅកាន់តុលាការយុត្តិធម៌អន្តរជាតិ (ICJ) នៅទីក្រុងឡាអេ ប្រទេសហូឡង់ កាលពីថ្ងៃទី១៥ ខែមិថុនា ឆ្នាំ២០២៥ ដើម្បីឱ្យជួយកាត់ក្តីវិវាទជាមួយថៃ នៅប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំ៣។

លោកអគ្គមេបញ្ជាការ បញ្ជាក់ថា ការជ្រើសរើសយកយន្តការតុលាការយុត្តិធម៌អន្តរជាតិ ជាដំណើរការទៅមុខឥតដកថយ និងឆន្ទៈមោះមុតរបស់រាជរដ្ឋាភិបាល ស្របតាមឆន្ទៈរបស់ប្រជាពលរដ្ឋ ដើម្បីយុតិ្តធម៌ ភាពត្រឹមត្រូវ និងច្បាស់លាស់មួយ ក្នុងការកំណត់ខ្សែបន្ទាត់ព្រំដែនជាមួយប្រទេសជិតខាងសម្រាប់កូនចៅជំនាន់ក្រោយ។

លោក បានបញ្ជាក់ពីការគាំទ្រពេញទំហឹងរបស់កងយោធពលខេមរភូមិន្ទ ចំពោះចំណាត់ការរបស់រាជរដ្ឋាភិបាលកម្ពុជា ក្នុងការដោះស្រាយជម្លោះព្រំដែនតាមច្បាប់អន្តរជាតិ និងដោយសន្តិវិធី។ ទន្ទឹមនេះបានប្រុងប្រៀបជាស្រេចត្រៀមប្រយុទ្ធតាមបទបញ្ជារបស់រាជរដ្ឋាភិបាល និងក្រសួងការពារជាតិ ដោយមិនញញើតក្នុងការលះបង់សាច់ស្រស់ឈាមស្រស់ ការពារជាតិមាតុភូមិទោះក្នុងតម្លៃណាក៏ដោយ៕

The post អគ្គមេបញ្ជាការទ័ព៖កម្ពុជាស្រលាញ់សន្តិភាព ស្អប់ខ្ពើមសង្គ្រាម តែកម្ពុជាមិនរាថយ ករណីមានការឈ្លានពានពីសត្រូវ appeared first on Kampuchea Thmey Daily.