នាយ ក្រឹម Archives - Kampuchea Thmey Daily

នាយ ក្រឹម ពោលពាក្យយ៉ាងក្ដុកក្ដួល ពេលចូលរួមបុណ្យសព នាយ ស្វិត

Din Thary — Mon, 29 Jan 2024 08:22:30 +0000

តារាកំប្លែងលោក អ៊ូ ប៉ុណ្ណារ៉ាត់ ហៅនាយ ក្រឹម បានបង្ហាញអារម្មណ៍សោកស្តាយជាពន់ពេក ខណៈបាត់បង់សមាជិកកំប្លែងមួយរូបគឺនាយស្វិត ដោយគ្មានថ្ងៃវិលត្រឡប់វិញឡើយ។ ក្នុងនោះដែរនាយ ក្រឹម ក៏បានពោលពាក្យយ៉ាងក្ដុកក្ដួលថ្ងៃទៅចូលរួមបុណ្យសពនាយ ស្វិត លាជាលើកចុងក្រោយ។

តារាកំប្លែងនាយ ក្រឹម បានរៀបរាប់អារម្មណ៍របស់ខ្លួនថា ពួកយើងបានមកលានាយ ជាលើកចុងក្រោយហើយបន្ទាប់ពីបេសកកម្មត្រូវបានបញ្ចប់គ្មានអ្វីត្រូវនិយាយក្រៅពីពាក្យថាសោកស្តាយ និង ក្តីអាឡោះអាល័យជាពន់ពេក សូមវិញ្ញាណក្ខន្ធរបស់នាយបានទៅកាន់ឋានសុគតិភព។

នាយ ក្រឹម បន្តថាក្នុងនាមជាមិត្តរួមអាជីព សូមគោរពថ្លែងអំណរគុណសម្តេចតេជោ និង សម្តេចកិត្តិព្រឹទ្ធបណ្ឌិត សម្តេចធិបតី ហ៊ុន ម៉ាណែត និងលោកជំទាវប ណ្ឌិត ពេជ្រ ចន្ទមុនី ដែលជានិច្ចកាលតែងតែគិតគូរដល់សិល្ប:និយាយជារួម និងនិយាយដោយឡែកលោកបានយកចិត្តទុក្ខដាក់ជួយដល់តារាកំប្លែងនាយ ស្វិត ក្នុងការព្យាបាលនៅមន្ទីរពេទ្យតែដោយអកុសលជំងឺរបស់នាយ ស្វិត គឺឈានដល់ដំណាក់កាលចុងក្រោយពុំអាចជួយជីវិតនាយចេញបានពីជំងឺដ៏កាចសាហាវនេះបាន។

តារាកំប្លែងនាយ ក្រឹម បានបញ្ជាក់បន្ថែមថា «អ្វីដែលមិនអាចកាត់ថ្លៃបានលោកម្ចាស់ទានក៏បានជួយជាថវិកាសម្រួលទុក្ខលំបាករបស់នាយ ស្វិត ផងដែរ នេះគឺជាគុណបំណាច់ដែលមិនអាចកាត់ថ្លៃបានរបស់សម្តេចតេជោ សម្តេចកិត្តិព្រឹទ្ធបណ្ឌិត សម្តេចធិបតី និងលោកជំទាវ ខ្ញុំបាទ និងសិល្បករ-សិល្បការិនី ជាមិត្តរួមអាជីពជាមួយនាយ ស្វិត សូមគោរពជូនពរសម្តេចតេជោ សម្តេចកិត្តិព្រឹទ្ធបណ្ឌិត សម្តេចបវរធិបតី ហ៊ុន ម៉ាណែត និងលោកជំទាវ សូមជួបប្រទះតែនឹងពុទ្ធពរទាំង ៥ប្រការ គឺ អាយុ វណ្ណៈ សុខៈ ពលៈ បដិភានៈ កុំឃ្លៀងឃ្លាតឡើយ»។

សូមបញ្ជាក់ថា តារាកំប្លែងនាយស្វិតបានទទួលមរណភាពកាលពីថ្ងៃទី២៧ ខែមករា ឆ្នាំ២០២៤ បន្ទាប់ពីធ្លាក់ ខ្លួនឈឺដោយសារជំងឺទឹកនោមផ្អែមខូចក្រលៀនធ្ងន់ធ្ងរ ។ ជាមួយដំណឹងមរណភាពរបស់តារាកំប្លែងនាយ ស្វិត បានធ្វើឲ្យមហាជន និងអ្នកគាំទ្រព្រមទាំងសិល្បករ-សិល្បការិនីជាច្រើនបានសម្តែងការសោកស្តាយ និងមានក្តីរន្ធត់ចិត្តជាពន់ពេក ខណៈមានខ្លះទៀតក៏ បានចូលរួមរំលែកទុក្ខដ៏ក្រៀមក្រំជាមួយក្រុមគ្រួសារនៃសពផងដែរ៕

អត្ថបទ៖ ចាន់រ៉ា

The post នាយ ក្រឹម ពោលពាក្យយ៉ាងក្ដុកក្ដួល ពេលចូលរួមបុណ្យសព នាយ ស្វិត appeared first on Kampuchea Thmey Daily.

នាយ ក្រឹម បញ្ជាក់ថា ធ្លាប់សម្ដែងត្រាប់តាមភេទទី ៣ និងជួយឲ្យមានឈ្មោះល្បីច្រើននាក់

អ៊ិន ពិសី — Wed, 01 Nov 2023 04:05:59 +0000

ជាថ្មីម្តងទៀត តារាកំប្លែងល្បីឈ្មោះ នាយ ក្រឹម បានបញ្ជាក់ជំហររបស់ខ្លួនថា លោកមិនមានចេតនារើសអើងភេទទី ៣ ទេ ហើយបើស្អប់ ឬ រើសអើង ក៏មិនសម្ដែងត្រាប់តាមដែរ។

កាលពីយប់ថ្ងៃទី ៣១ ខែតុលា នាយ ក្រឹម បានលើកឡើង ក្រោយបញ្ចប់ការពិភាក្សា ថា «បញ្ហាត្រូវបានដោះស្រាយ ដោយការនិយាយ ដោយបើកចិត្ត និងបេះដូង ពូ ក្រឹម មិនមានចេតនារើសអើងភេទទី ៣ នោះទេ តែពាក្យពេចន៍ការនិយាយទៅ បែរជាប៉ះដល់អារម្មណ៍បងប្អូន ក្មួយៗ មួយចំនួន និងភេទទី ៣»។

តារាកំប្លែងនាយ ក្រឹម បញ្ជាក់ទៀតថា «បើខ្ញុំស្អប់ ឬក៏រើសអើង ខ្ញុំក៏មិនសម្ដែងត្រាប់តាមភេទទី ៣ ដែរ ហើយក៏មិនជួយឡង់សេភេទទី ៣ ជាច្រើននាក់កន្លងមកឲ្យមានកេរ្តិ៍ឈ្មោះដល់សព្វថ្ងៃនេះដែរ អ៊ីចឹងសូមបងប្អូន ក្មួយៗ ភេទទី ៣ ឈប់មានការខឹង ឬក៏វាយប្រហារតទៅទៀត សុទ្ធតែគ្នាយើង និងតារាកំប្លែងនាយ ក្រឹម និងភេទទី ៣ គឺជាអ្នកផ្តល់សំណើចសើចសប្បាយដូចគ្នា»។

បន្ថែមពីនេះ នាយ ក្រឹម ក៏បានអគុណ លោក កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជា និងលោកស្រី ចន ចន្ទ័លក្ខិណា ប្រធានសមាគមសិល្បករខ្មែរផងដែរ។

ប្រាកដណាស់ បន្ទាប់ពីបញ្ចប់ការពិភាក្សា និងដោះស្រាយសម្របសម្រួលករណីតារាកំប្លែងជើងចាស់ លោក អ៊ូ ប៊ុណ្ណារ៉ាត់ ហៅ នាយ ក្រឹម និង ណុប ដាណេ ពាក់ព័ន្ធករណីភេទទី ៣ លោកទេសរដ្ឋមន្ត្រី កែវ រ៉េមី ជាប្រធានគណៈកម្មាធិការសិទ្ធិមនុស្សកម្ពុជា បានបញ្ជាក់ថា ទទួលបាននូវលទ្ធផលជាវិជ្ជមាន៕

អត្ថបទ ៖ ចាន់រ៉ា

The post នាយ ក្រឹម បញ្ជាក់ថា ធ្លាប់សម្ដែងត្រាប់តាមភេទទី ៣ និងជួយឲ្យមានឈ្មោះល្បីច្រើននាក់ appeared first on Kampuchea Thmey Daily.

នាយ ក្រឹម សុំយោគយល់ ព្រោះគ្មានចេតនារើសអើងភេទទី ៣ ខណៈលោក កែវ រ៉េមី ថា ទទួលលទ្ធផលវិជ្ជមាន

Din Thary — Tue, 31 Oct 2023 09:04:21 +0000

នៅថ្ងៃទី៣១ ខែតុលា ឆ្នាំ២០២៣ ក្នុងជំនួបពិភាក្សា និងបំភ្លឺរបស់តារាកំប្លែង នាយ ក្រឹម ចំពោះករណីនៃការរិះគន់រើសអើងភេទទី៣ តាមការកោះហៅរបស់គណៈកម្មការសិទ្ធិមនុស្សកម្ពុជាជាការបញ្ជាក់ គឺ នាយ ក្រឹម បានអះអាងថា លោកពុំមានការរើសអើងអ្នកស្រឡាញ់ភេទដូចគ្នានោះឡើយ ហើយលោកក៏បានចូលរួមក្នុងសកម្មភាពលើកកម្ពស់សិទ្ធិអ្នកស្រឡាញ់ភេទដូចគ្នាតាំងពីឆ្នាំ១៩៨៥ មកម៉្លេះ។

បើតាមប្រភពព័ត៌មានបានឲ្យដឹងថា ក្នុងកិច្ចពិភាក្សានៅស្នាក់ការគណៈកម្មការសិទ្ធិមនុស្សដោយមានការចូលរួមពីលោក កែវ រ៉េមី ទេសរដ្ឋមន្ត្រី និងជាប្រធានគណៈកម្មាធិការសិទ្ធិមនុស្សកម្ពុជា និងអ្នកនាង ចន ច័ន្ទលក្ខិណា ប្រធានសមាគមសិល្បករខ្មែរគឺ ជាគោលការណ៍បានផ្ដោតគោលជំហរ និងរកដំណោះស្រាយដើម្បីបង្កើតឲ្យមានការយោគយល់គ្នាឡើងវិញ។

ប្រភពបានបញ្ជាក់ថា ស្តាប់តាមការលើកឡើងរបស់ នាយ ក្រឹម ជាគោលជំហរ គឺលោកពុំដែលមានបំណងរើសអើង ឬបំផុសឲ្យមានការរើសអើងអ្នកស្រឡាញ់ភេទដូចគ្នានោះឡើយ ហើយរូបលោកផ្ទាល់បានចូលរួមក្នុងសកម្មភាពលើកកម្ពស់សិទ្ធអ្នកស្រឡាញ់ភេទដូចគ្នាតាំងពីឆ្នាំ១៩៨៥ មកម៉្លេះ។

ជាមួយគ្នានេះ តារាកំប្លែង នាយ ក្រឹម បានលើកឡើងដោយសុំការយោគយល់អធ្យាស្រ័យពីសំណាក់មហាជនជាពិសេសគឺ អ្នកស្រឡាញ់ភេទដូចគ្នាទាំងអស់ចំពោះពាក្យសម្ដីឆ្គាំឆ្គងកន្លងមកផងដែរ។

ចំណែកលោកទេសរដ្ឋមន្រ្ដី កែវ រ៉េមី ជាប្រធានគណៈកម្មាធិការសិទ្ធិមនុស្សកម្ពុជាបានបង្ហោះនៅលើបណ្ដាញសង្គមហ្វេសប៊ុកមុននេះបន្តិចថា ក្រោយពីបានជួបជជែគ្នាទាំងសងខាងគណៈកម្មាធិការសិទ្ធិមនុស្សកម្ពុជាទទួលបាននូវលទ្ធផលជាវិជ្ជមាន។ ខ្លឹមសារនឹងមានការផ្សព្វផ្សាយតាមរយៈវីដេអូខ្លី។

លោក កែវ រ៉េមី បានបញ្ជាក់ថា «សូមអរគុណលោក ស្រី ចន ច័ន្ទលក្ខិណា ប្រធានសមាគមសិល្បករខ្មែរបានជួយអន្តរាគមន៍ និងអរគុណជាអនេកជូនដល់ លោក អ៊ូ ប៊ុណ្ណារ៉ាត់ និង ក្មួយ ណុប ដាណេ ដែលបានចូលរួមដោះស្រាយដើម្បីសុខដុមក្នុងសង្គមជាតិយើង»។

គួរបញ្ជាក់ថា ប៉ុន្មានថ្ងៃនេះ មានផ្ទុះការវែកញែក និងរិះគន់រឿងតារាកំប្លែង នាយ ក្រឹម និយាយប៉ះពាល់ដល់ភេទទី៣ នាំឲ្យមានការរើសអើងនោះ គេឃើញមានប្រតិកម្មច្រើនពីមហាជន ពិសេសអ្នកមានទំនោរស្រឡាញ់ភេទដូចគ្នាមានការថ្នាំងថ្នាក់យ៉ាងខ្លាំង៕

អត្ថបទ៖ ចាន់រ៉ា

The post នាយ ក្រឹម សុំយោគយល់ ព្រោះគ្មានចេតនារើសអើងភេទទី ៣ ខណៈលោក កែវ រ៉េមី ថា ទទួលលទ្ធផលវិជ្ជមាន appeared first on Kampuchea Thmey Daily.

ទីបំផុតនាយ ក្រឹម ចូលបំភ្លឺករណីនិយាយបែបរើសអើងភេទទី៣

Sokhom Khon — Tue, 31 Oct 2023 07:45:14 +0000

ទីបំផុតតារាកំប្លែងនាយ ក្រឹម បានបង្ហាញខ្លួនចូលរួមដោះស្រាយលើករណីរើសអើងភេទទី៣ ដោយមានលោក កែវ រ៉េមី ទេសរដ្ឋមន្រ្ដី និងជាប្រធានគណៈកម្មាធិការសិទ្ធិមនុស្សកម្ពុជា និងភាគីពាក់ព័ន្ធដើម្បីស្តាប់ការបំភ្លឺ និងបកស្រាយជុំវិញរឿងរ៉ាវនេះ។

លោកទេសរដ្ឋមន្រ្ដី កែវ រ៉េមី ជាប្រធានគណៈកម្មាធិការសិទ្ធិមនុស្សកម្ពុជា បានបង្ហោះនៅលើបណ្តាញសង្គមហ្វេសប៊ុកមុននេះបន្តិចថា ក្រោយពីបានជួបជជែកគ្នាទាំងសងខាង គណ:កម្មាធិការសិទ្ធិមនុស្សកម្ពុជាទទួលបាននូវលទ្ធផលជាវិជ្ជាមាន។ ខ្លឹមសារនឹងមានការផ្សព្វផ្សាយតាមរយ:វីដេអូខ្លី។

លោក កែវ រ៉េមី បានបញ្ជាក់ថា សូមអរគុណលោកស្រី ចន ច័ន្ទលក្ខិណា ប្រធានសមាគមសិល្បករខ្មែរបានជួយអន្តរាគមន៍ និងអរគុណជាអនេកជូនដល់លោក អ៊ូ ប៊ុណ្ណារ៉ាត់ និងក្មួយ ណុប ដាណេ ដែលបានចូលរួមដោះស្រាយដើម្បីសុខដុមក្នុងសង្គមជាតិយើង។

គួរបញ្ជាក់ថា ប៉ុន្មានថ្ងៃនេះ គឺបានផ្ទុះការវែកញែក និងរិះគន់រឿងតារាកំប្លែងនាយ ក្រឹម និយាយប៉ះពាល់ដល់ភេទទី៣នាំឲ្យមានការរើសអើងនោះគេឃើញមានប្រតិកម្មច្រើនពីមហាជនពិសេសអ្នកមានទំនោរស្រឡាញ់ភេទដូចគ្នាមានការថ្នាំងថ្នាក់យ៉ាងខ្លាំង៕

អត្ថបទ៖ ចាន់រ៉ា

The post ទីបំផុតនាយ ក្រឹម ចូលបំភ្លឺករណីនិយាយបែបរើសអើងភេទទី៣ appeared first on Kampuchea Thmey Daily.

នាយ ក្រឹម ចេញមុខមកបញ្ជាក់ ក្រោយផ្ទុះការរិះគន់រឿងភេទទី៣

Sokhom Khon — Tue, 31 Oct 2023 00:39:16 +0000

តារាកំប្លែងជើងចាស់ល្បីឈ្មោះប្រចាំប្រទេសលោក អ៊ូ បុណ្ណារ៉ាត់ ហៅនាយ ក្រឹម បន្ទាប់ពីមានការរិះយ៉ាងច្រើនពេលនេះបានចេញមកបញ្ជាក់ថា លោកមិនបានរើសអើងពួកគាត់ទេ (ភេទទី៣ ឬខ្ទើយ)។

ការចេញមុខបញ្ជាក់ពីសំណាក់នាយ ក្រឹម នេះស្របពេលដែលផ្ទុះការរិះគន់ និងវែកញែកនៅលើបណ្តាញសង្គមយ៉ាងព្រោងព្រាតជុំវិញពាក្យសម្តីនិយាយប៉ះពាល់ដល់ភេទទី៣។ ដោយឡែកក្នុងនោះក៏មានខ្លះទៀតក៏បានបកស្រាយថា ការនិយាយរបស់នាយ ក្រឹម ពេលនោះគ្រាន់តែជាការលេងសើចហើយមិនបានបកស្រាយឲ្យគ្រប់ជ្រុងជ្រោយចំពោះបញ្ហានេះទើបបណ្តាលឲ្យកើតមានរឿងបែបនេះឡើង។

តារាកំប្លែងនាយ ក្រឹម បាននិយាយកាលពីយប់ថ្ងៃទី៣០ ខែតុលា ឆ្នាំ២០២៣ថា “អរគុណក្មួយដែលយល់ពីការបកស្រាយរបស់ពូ ពូមិនបានរេីសអេីងពួកគាត់ទេ”។ ខ្លឹមសារនេះបានធ្វើឲ្យអ្នកគាំទ្រលោកមួយចំនួនបញ្ចេញមតិយល់ឃើញដែរថា ដឹងតើពូ ក្រឹម គាត់ចង់និយាយថា អត់កូនតពូជតែអ្នកមិនចូលចិត្តគាត់ចេះតែជាន់ពន្លិចគាត់។

ចំណែកខ្លះទៀតលើកឡើងថា” ខ្ញុំយល់ពីអ្វីដែលពូចង់និយាយច្បាស់ណាស់ គឺពូនិយាយត្រូវពូនិយាយសំដៅលើចំនួនមនុស្សវានឹងមិនកើនឡើងច្រើនបើសិនជាមនុស្ស១៧លាននាក់ហើយភេទទីបីមាន៥ទៅ ៦ លាននាក់មូលហេតុបាត់បង់ការផលិតមនុស្សតាមបែបធម្មជាតិ។ ក្នុងករណីចាក់មេជីវិតយកកូន គឺបានមិនមែនអត់បាននោះទេ តែត្រូវការធនធានច្រើនឧទាហរណ៍ លុយ អញ្ចឹងសរុបមកពាក្យថា ធនធានសំដៅលើ អ្វីច្រើនយ៉ាងដែលមាននៅលើផែនដីរាប់មិនអស់ទេ រួមទាំងភេទទីបីផងដែរ។

សូមជម្រាបថា តារាកំប្លែងជើងចាស់ល្បីឈ្មោះប្រចាំប្រទេស គឺនាយ ក្រឹម បាននិយាយនៅក្នុងកម្មវិធីមួយដោយលោកធ្វើជាគណ:កម្មការប៉ុន្តែរឿងដ៏ហួសចិត្តនោះតារាកំប្លែងរូនេះបានរិះគន់ប៉ះពាល់ដល់ភេទទី៣ (ខ្ទើយ)រហូតផ្ទុះប្រតិកម្មយ៉ាងច្រើននៅលើបណ្តាញសង្គម។

ប្រាកដណាស់ដោយក្នុងនោះដែគេក៏សង្កេតឃើញមានមហាជន និងអ្នកប្រើប្រាស់បណ្តាញសង្គមជាច្រើនបានសម្តែងការហួសចិត្តនិងរិះគន់ចំពោះកាលើកឡើ ងរបស់នាយ ក្រឹម ដែលធ្វើឲ្យប៉ះពាល់អារម្មណ៍ភេទទី៣ដែលពួកគាត់ (ខ្ទើយ) ក៏ជាមនុស្សមានតម្លៃរស់នៅក្នុងសង្គមដូចគ្នា៕

អត្ថបទ៖ ចាន់រ៉ា

The post នាយ ក្រឹម ចេញមុខមកបញ្ជាក់ ក្រោយផ្ទុះការរិះគន់រឿងភេទទី៣ appeared first on Kampuchea Thmey Daily.

លោក កែវ រ៉េមី បង្កើតក្រុមការងារពិនិត្យករណី នាយ ក្រឹម រើសអើងភេទទី៣

Din Thary — Mon, 30 Oct 2023 07:51:11 +0000

ឆ្លើយតបនិងការស្នើសុំរបស់សហគមន៍ឥន្ទធនូ កម្ពុជា (រ៉ក់) លើករណីតារាកំប្លែងល្បីឈ្មោះ នាយ ក្រឹម បាននិយាយលក្ខណៈរើសអើងប៉ះពាល់ដល់ភេទទី៣ នោះ លោក កែវ រ៉េមី ទេសរដ្ឋមន្ត្រី និង ជាប្រធានគណៈកម្មាធិការសិទ្ធិមនុស្សកម្ពុជាបានបញ្ជាក់ថា លោក បានបង្កើតក្រុមការងារហើយដែលនឹងចាប់ផ្ដើមធ្វើកិច្ចការនេះនៅថ្ងៃទី៣០ ខែតុលា ឆ្នាំ២០២៣ នេះ។

លោក កែវ រ៉េមី បានឆ្លើយតបទៅនឹងការស្នើសុំដូច្នេះថា លោកបានទទួលលិខិតរបស់បងប្អូន កូនក្មួយសហគមន៍ Rock រួចហើយ។ តាមការពិតលោកបានបង្កើតក្រុមការងារតាំងតែពីព្រឹកថ្ងៃអាទិត្យ ពោល គឺតាំងតែពីម៉ោង ៧និង ១៧នាទី មកម្ល៉េះហើយក្រុមការងារនឹងធ្វើកិច្ចការនេះ។

សហគមន៍ឥន្ទធនូ កម្ពុជា (រ៉ក់) បានសរសេរលិខិតថា នេះគឺជាលិខិតរបស់សហគមន៍ ឥន្ទធនូ កម្ពុជា (រ៉ក់) ដែលគោរពជូនឯកឧត្ដម កែវ រ៉េមី ទេសរដ្ឋមន្ត្រី និង ជាប្រធានគណៈកម្មាធិការសិទ្ធិមនុស្សកម្ពុជាដែលស្នើឲ្យមានកិច្ចអន្តរាគមន៍ដើម្បីជួបពិភាក្សា និងបំភ្លឺជាមួយលោក អ៊ូ បុណ្ណារ៉ាត់ ឬ លោក ពូ ក្រឹម ដែលជាគណៈ កម្មការ (judge) មួយរូបជុំវិញមតិយោបល់មានលក្ខណៈរើសអើងលើបេក្ខជនមួយរូបក៏ដូចជាបុគ្គល និងសហគមន៍អ្នកស្រឡាញ់ភេទដូចគ្នាដទៃទៀត។

ប្រភពបានបញ្ជាក់ថា លោក ក្រឹម បានធ្វើឡើងនៅក្នុងកម្មវិធីបង្ហាញទេពកោសល្យសមត្ថភាពលំដាប់ពិភពលោក Cambodia’s Got Talent រដូវកាលទី៣ នៅរាត្រីថ្ងៃសៅរ៍ ទី២៨ ខែតុលា ឆ្នាំ២០២៣ ។

សូមជម្រាបថា ដូចមហាជនបានដឹងហើយថ្មីៗនេះ តារាកំប្លែងជើងចាស់ល្បីឈ្មោះប្រចាំប្រទេសគឺ នាយ ក្រឹម បាននិយាយនៅក្នុងកម្មវិធីមួយដោយលោកធ្វើជាគណៈកម្មការ ប៉ុន្តែរឿងដ៏ហួសចិត្តនោះតារាកំប្លែងរូប នេះ បានរិះគន់ប៉ះពាល់ដល់ភេទទី៣ (ខ្ទើយ) រហូតផ្ទុះប្រតិកម្មយ៉ាងច្រើននៅលើបណ្តាញសង្គម។

ប្រាកដណាស់ដោយ ក្នុងនោះដែរគេក៏សង្កេតឃើញមានមហាជន និងអ្នកប្រើប្រាស់បណ្ដាញសង្គមជាច្រើនបានសម្ដែងការហួសចិត្ត និងរិះគន់ចំពោះការលើកឡើងរបស់នាយ ក្រឹម ដែលធ្វើឲ្យប៉ះពាល់អារម្មណ៍ភេទទី៣ ដែលពួកគាត់ក៏ជាមនុស្សមានតម្លៃរស់ នៅក្នុងសង្គមដូចគ្នា៕

អត្ថបទ៖ ចាន់រ៉ា

The post លោក កែវ រ៉េមី បង្កើតក្រុមការងារពិនិត្យករណី នាយ ក្រឹម រើសអើងភេទទី៣ appeared first on Kampuchea Thmey Daily.

ម៉ា ដូណា បដិសេធសុំមិនឆ្លើយរឿង នាយ ក្រឹម និយាយចំឈ្មោះពាក់ព័ន្ធភេទទី ៣

Din Thary — Mon, 30 Oct 2023 04:34:49 +0000

មហាជនបានដឹងហើយថាថ្មីៗនេះតារាកំប្លែងជើងចាស់ល្បីឈ្មោះ នាយ ក្រឹម បាននិយាយនៅក្នុងកម្មវិធីមួយដោយលោកធ្វើជាគណៈកម្មការ ប៉ុន្តែរឿងដ៏ហួសចិត្តនោះ គឺតារាកំប្លែងរូបនេះ បានរិះគន់ប៉ះពាល់ដល់ភេទទី៣ (ខ្ទើយ) រហូតផ្ទុះប្រតិកម្មយ៉ាងច្រើននៅលើបណ្ដាញសង្គម។

ប្រាកដណាស់ដោយក្នុងនោះដែរ គេសង្កេតឃើញមានមហាជន និងអ្នកប្រើប្រាស់បណ្ដាញសង្គមជាច្រើនបានសម្ដែងការហួសចិត្ត និងរិះគន់ចំពោះការលើកឡើងរបស់ នាយ ក្រឹម ដែលធ្វើឲ្យប៉ះពាល់អារម្មណ៍ភេទទី៣ ដែលពួកគាត់ក៏ជាមនុស្សមានតម្លៃរស់នៅក្នុងសង្គមដូចគ្នា។

ដោយឡែក ងាកមកចាប់អារម្មណ៍តារាកំប្លែង និងសម្ដែងភេទទី៣ លោក ម៉ា ដូណា ដែលត្រូវបាន នាយ ក្រឹម លើកឈ្មោះទៅនិយាយចំៗនៅក្នុងកម្មវិធីទូរទស្សន៍ គឺតារាភេទទី៣ រូបនេះហាក់មិនមានប្រតិកម្មឆ្លើយតប ឬសកម្មភាពអ្វីឡើយដោយលោកនិយាយខ្លីថា“ខ្ញុំសុំមិនឆ្លើយ ជារឿងបុគ្គលរៀងៗខ្លួន“។

យ៉ាងណាមិញ រហូតមកដល់ពេលនេះ សម្លេងនៃការរិះគុណដោយការហួសចិត្តពីសំណាក់មហាជន និងក្រុមភេទទី៣ ទៅលើតារាកម្លែងនាយ ក្រឹម នៅមិនទាន់ស្ងប់រលត់នៅឡើយទេ បន្ទាប់ពីនាយ ក្រឹម និយាយប៉ះពាល់ហាក់មិនឲ្យតម្លៃដល់មនុស្សភេទទី៣ ឬខ្ទើយ។

ចំណែក ប៉ីប៉ី ឌី ប្រតិកម្មចំពោះរឿងនេះថា «សូមលោក ពូក្រឡេក មើលភេទទី៣ មួយចំនួនធំគេមានbusinessមានការងារល្អ មានចំណូលចង់ពន្ធជូនរដ្ឋដូចគ្នាតើ ធនធានមនុស្សសំដៅតែចំពោះភេទប្រុស និងភេទស្រី ឬយ៉ាងម៉េច? ក្រែងលោកពូធ្លាប់សម្តែងធ្វើជាភេទទី៣ ដែរតើមិនអ៊ីចឹង? ភេទទី៣ មួយចំនួននិយាយស្តីបានឆ្លងកាត់ខួរ និងមានសុជីវធម៌ជាងមនុស្សប្រុសមួយចំនួនផង វាមិនអាស្រ័យលើភេទទេពូ វាអាស្រ័យលើខួរ និងទង្វើរបស់មនុស្ស ពូខ្លាចបាត់បង់ធនធានមនុស្សដោយសារមានភេទទី៣ ច្រើន? តែខ្ញុំខ្លាចមនុស្សនិយាយច្រើនបាត់ខួរ»៕

អត្ថបទ៖ ចាន់រ៉ា

The post ម៉ា ដូណា បដិសេធសុំមិនឆ្លើយរឿង នាយ ក្រឹម និយាយចំឈ្មោះពាក់ព័ន្ធភេទទី ៣ appeared first on Kampuchea Thmey Daily.

តារាហ្វេសប៊ុកល្បីឈ្មោះ Alex Rayuth ផ្ទុះប្រតិកម្មក្រោយនាយ ក្រឹម និយាយប៉ះពាល់ភេទទី៣

Sokhom Khon — Sun, 29 Oct 2023 05:45:18 +0000

លោក Alex Rayuth ដែលជាតារាហ្វេសប៊ុកល្បីឈ្មោះ និងជាអ្នកលក់onlineនៅប្រទេសថៃ បានផ្ទុះប្រតិកម្មភ្លាមៗបន្ទាប់ពីតារាកំប្លែងជើងចាស់ល្បីឈ្មោះ គឺនាយ ក្រឹម បាននិយាយប៉ះពាល់ដល់ភេទទី៣(ខ្ទើយ)។ ក្នុងនោះដែរគេក៏ឃើញមានមហាជន និងអ្នកប្រើប្រាស់បណ្តាញសង្គមជាច្រើនបានសម្តែងការហួសចិត្ត និងរិះគន់ចំពោះការលើកឡើងរបស់នាយ ក្រឹម ផងដែរ។

ក្នុងនាមខ្លួនជាភេទទី៣ផងនោះ លោក Alex Rayuth បានលើកឡើងដោយការមិនពេញចិត្តថា“ខ្ញុំមិនចង់និយាយអី្វទេ ខ្ញុំជាអ្នកដែលពូកំពុងនិយាយ ពូជា idol ខ្ញុំពិតមែន ដោយសារកំប្លែកមកដល់ពេលនេះនៅតែគាំទ្រលោកពូ តែពូសូមមេត្តាប្រើសភាសារអោយតម្លៃ Gay ladyboy ស្រីស្រលាញ់ស្រី“។

Alex Rayu th បាននិយាយបន្តថា រឿងក្នុងសង្គមរាល់ថ្ងៃមិនមែនកើតឡើងពីពួកខ្ញុំទេ…ហើយក៏មិនបានបាត់បង់ធនធានមនុស្សដោយសារពួកខ្ញុំដែរ ដូចឃើញអ៊ីចឹង ផឹកសុីអូនបង វៃគ្នាដណ្ដើមគ្នាកាប់ចាក់បែកស្លុយ ប្ដីក្បត់ប្រពន្ធប្រពន្ធក្បត់ប្ដី ឈ្លោះគ្នាឆក់ប្លន់បាញ់គ្នា គ្រោះថ្នាក់បើកបរស្រវឹង លេងថ្នាំញៀញលក់គ្រឿងញៀនភាគច្រើនកើតទៅ ស្រីប្រុស កើតឡើងដោយសង្គមស្រីប្រុសច្រើនជាងភេទទី៣ ហេតុអ្វីមើលងាយ និងរើសអើងពួកខ្ញុំម្លេះ។

លោក Alex Rayuth បានលើកឡើងទៀតថា ន័យខ្ញុំនិយាយនេះ ចង់ថាអោយតែបងៗមួយចំនួនតូចដែលបានរើសអាងមិនចូលចិត្តស្អប់ប្រភេទមនុស្សដូចពួកខ្ញុំGay ladyboy ស្រីស្រលាញ់ស្រីតែសង្គមខ្ទើយមិនសូវមានរឿងអាស្រូវរឿងអាក្រក់នាំមរឿងដល់សង្គមទេបើមានក៏តិចបំផុតជាងស្រីប្រុស “។

Alex Rayuthបន្ថែមថា បងៗដែលមានកូនខ្ទើយគាត់យល់ច្បាស់ណាស់ខ្ទើយភាគច្រើនគាត់សុភាពប្រឹង ខំធ្វើការកលុយ ប្រឹងជំនះពាក្យមើលងាយថាជាខ្ទើយធ្វើអី្វមិនកើតខំរកលុយជួយគ្រួសារជួយបងប្អូន ខ្ទើយវាមានដូចគ្នានឹងស្រីប្រុសតែមួយៗចូលចិត្តជាន់ខ្ទើយម្ល៉េះចូលចិត្តវាតំម្លៃខ្ទើយថាសង្គមមិនទទួលស្គាល់ប ងៗចាំណាពួកខ្ញុំមានបេះដូងដូងបងដែលណា។

ជាមួយគ្នានេះគេក៏ឃើញបវរកញ្ញាចក្រវាឡកម្ពុជាឆ្នាំ២០១៨ កញ្ញា រឿន ណាត និងតារាភេទី៣ ប៉ីប៉ី ឌី ក៏ប្រតិកម្មចំពោះការលើកឡើងពីសំណាក់នាយ ក្រឹម ហាក់មានការរើសអើងភេទទី៣ផងដែរ។ កញ្ញា រឿន ណាត បានលើកឡើងថាសុទ្ធតែអ្នកស្រឡាញ់ភេទដូចគ្នាមិនអាចបង្កើតកូនបាន តែបើបង្កើតគេហើយគ្មានទំនួលខុសត្រូវលើគេដូចពូកុំបង្កើតគេមកល្អជាង គ្រួសារពូខ្ញុំស្គាល់ច្បាស់ណាស់ តែដឹងត្រឹមថា ខ្ញុំមិនចង់ឱ្យសង្គមមួយនេះ មានធនធានមនុស្សប្រុសសុទ្ធដូចជាពូច្រើនទេ ព្រោះពូមិនមែនជាបុរសល្អ មិនមែនជាប្ដីល្អ មិនមែនជាឪពុកល្អ។

ចំណែក ប៉ីប៉ី ឌី បាននិយាយដែរថា..Respect បងឃីម…..ហើយសូមលោកពូក្រឡេកមើលភេទទី៣ មួយចំនួនធំគេមានbusinessមានការងារល្អមានចំណូលបង់ពន្ធជូនរដ្ឋដូចគ្នា តើធនធានមនុស្សសំដៅតែចំពោះភេទប្រុស និងភេទស្រីឬយ៉ាងម៉េច ? ក្រែងលោកពូធ្លាប់សម្តែងធ្វើជាភេទទី៣ដែរតើមិនអ៊ីចឹង? ភេទទី៣មួយចំនួននិយាយស្តីបានឆ្លងកាត់ខួរនិងមានសុជីវធម៌ជាងមនុស្សប្រុសមួយចំនួនផង វាមិនអាស្រ័យលើភេទទេពូ វាអាស្រ័យលើខួរ និងទង្វើររបស់មនុស្សពូខ្លាចបាត់បង់ធនធានមនុស្សដោយសារមានភេទទី៣ច្រើន? តែខ្ញុំខ្លាចមនុស្សនិយាយច្រើនបាត់ខួរ៕

អត្ថបទ៖ ចាន់រ៉ា

The post តារាហ្វេសប៊ុកល្បីឈ្មោះ Alex Rayuth ផ្ទុះប្រតិកម្មក្រោយនាយ ក្រឹម និយាយប៉ះពាល់ភេទទី៣ appeared first on Kampuchea Thmey Daily.