ដោយអនុវត្ដតាមបទបញ្ជាការណែនាំដ៏ខ្ពង់ ខ្ពស់របស់លោក នាយឧត្ដមសេនីយ៍ ស ថេត អគ្គស្នងការនគរបាលជាតិ លោកឧត្ដមសេនីយ៍ទោ ឃឹម សុកខៃ ស្នងការនគរបាលខេត្ដកំពង់ស្ពឺ ណែនាំដល់ កំលាំង ផែនការងារសណ្ដាប់ធ្នាប់ការិយាល័យនគរបាលចរាចរណ៍ផ្លូវគោក ផ្នែកសណ្ដាប់ធ្នាប់ នៃអធិការដ្ឋាននគរបាលក្រុង-ស្រុក ត្រូវអនុវត្ដវិធានការច្បាប់ ចំពោះមធ្យោបាយយានគ្រប់ប្រភេទដែលកែច្នៃលក្ខណៈបច្ចេកទេសខុសពី ឯកសារផ្លូវការចេញដោយក្រសួងសាធារណការ បណ្ណសម្គាល់ទោចក្រយានយន្ត និងវិញ្ញាបនបត្រ ត្រួតពិនិត្យលក្ខណៈបច្ចេកទេស (ឈៀករថយន្ដ) ករណីឃាត់ពិនិត្យឃើញថា មធ្យោបាយមួយចំនួនខុសពី ឯកសារ ឬកែច្នៃខុសលក្ខណៈបច្ចេកទេសត្រូវឃាត់ ទុកដើម្បីធ្វើការត្រួតពិនិត្យនិងអនុវត្ដតាមនីតិវិធី។

ជាមួយគ្នាផងដែរ សមត្ថកិច្ចជំនាញក៏បានស្នើដល់ម្ចាស់យានគ្រប់ប្រភេទ ត្រូវអនុវត្ដតាមគោលការណ៍ច្បាប់ក្នុងប្រើប្រាស់មធ្យោបាយគ្រប់ប្រភេទ បំរើដល់អាជីវកម្មនិងបទដ្ឋានយាន ដើម្បីបញ្ជៀសនូវការរងទណ្ឌកម្មផាកពិន័យនិងខកខានពេលវេលាក្នុងការរកស៊ីប្រចាំថៃ្ង៕

The post សមត្ថកិច្ចខេត្តកំពង់ស្ពឺ អនុវត្ដវិធានការច្បាប់ចំពោះមធ្យោបាយយានគ្រប់ប្រភេទដែលកែច្នៃលក្ខណៈបច្ចេកទេសខុស appeared first on Kampuchea Thmey Daily.

ថ្លែងចេញពីទិវាសប្ដាហ៍ជាតិសុវត្ថិភាពចរាចរណ៍ផ្លូវគោក ដែលប្រារព្ធឡើងនៅខេត្តព្រៃវែង កាលពីព្រឹកថ្ងៃទី៩ ខែមិថុនា ឆ្នាំ២០២៥ លោកឧបនាយករដ្ឋមន្ត្រី ស សុខា រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក នៅតែទទូចឱ្យប្រជាពលរដ្ឋ ដែលរអ៊ូរទាំចំពោះការអនុវត្តច្បាប់ពាក់ព័ន្ធនឹងការបើកបរលើសល្បឿនកំណត់ ហើយមេត្ដាគិតគូរឡើងវិញថាតើមូលហេតុអ្វីបានជាសមត្ថកិច្ចធ្វើយ៉ាងដូច្នេះ។

ឧបនាយករដ្ឋមន្ត្រី ស សុខា អះអាងថា នគរបាលមិនមែនចង់បានថវិកាពីការផាកពិន័យនោះទេ ក៏ប៉ុន្តែដើម្បីសុវត្ថិភាពចរាចរណ៍របស់អ្នកដឹកអ្នកដំណើរ ពោលគឺបើអ្នកបើកបរមិនល្មើសល្បឿន នគរបាលក៏គ្មានហេតុផលអនុវត្តច្បាប់ ដោយការផាកពិន័យនោះដែរ ហើយសាមីខ្លួនក៏មានសុវត្ថិភាពក្នុងពេលធ្វើដំណើរ។

លោករដ្ឋមន្ត្រីក្រសួងមហាផ្ទៃ ក៏បានណែនាំដល់រដ្ឋបាលថ្នាក់ក្រោមជាតិឱ្យពិនិត្យសិក្សាឡើងវិញលើភូមិសាស្ត្រជាក់ស្ដែងនៃមូលដ្ឋានរបស់ខ្លួនដែលមានការប្រឈមចំពោះការបើកបរលើសល្បឿនកំណត់ និងរកឱ្យឃើញពីមូលហេតុនៃការកើតមានគ្រោះថ្នាក់ចរាចរណ៍ ដើម្បីដាក់ចេញនូវវិធីសាស្ត្រដោះស្រាយឱ្យបានសមស្របបំផុត។  

បន្ថែមពីលើរថយន្តបើកបរល្បឿនលឿន លោក ស សុខា បានសង្កត់ធ្ងន់ដល់រថយន្តដឹកកម្មករលើសចំនួនកំណត់ ការបើកបរវ៉ាជែង និងរថយន្តដឹកជញ្ជូនទំនិញលើសកំណត់ផងដែរ។ លោក បានជំរុញឱ្យអាជ្ញាធរពាក់ព័ន្ធ រួមទាំងនគរបាលចរាចរណ៍យកចិត្តទុកដាក់ការសម្រួលសុវត្ថិភាពចរាចរណ៍ដល់រថយន្តដឹកកម្មករ ពេលព្រឹកព្រលឹម និងបន្តអប់រំណែនាំដល់អ្នកផ្តល់សេវាដឹកជញ្ជូនកម្មករ ជាពិសេសអ្នកបើកបរ ឱ្យគោរពច្បាប់ គិតគូរលើសុវត្ថិភាព និងលក្ខណៈបច្ចេកទេសរថយន្ត ខណៈការវ៉ាជែង និងបើកបរលើសល្បឿន តែងតែជាមូលហេតុចម្បងនៃគ្រោះថ្នាក់។

សូមបញ្ជាក់ថា ក្នុងរយៈពេល៤ខែឆ្នាំ២០២៥នេះ សមត្ថកិច្ចបានចុះត្រួតពិនិត្យរកឃើញយានយន្តល្មើសច្បាប់ចរាចរណ៍ដោយធ្វើការពិន័យសរុបចំនួន២៥.០២៣គ្រឿង និងបានដកហូតផ្លាកលេខយានយន្តមិនប្រក្រតីជាង៧០គូ។ សមត្ថកិច្ចក៏បានត្រួតពិនិត្យជាតិអាល់កុលពេលយប់ រកឃើញអ្នកបើកបរក្រោមឥទិ្ធពលស្រវឹងចំនួន៤.៧១៦នាក់ អនុវត្តតាមនីតិវិធី។ រយៈពេលដដែលនេះ មានគ្រោះថ្នាក់ចរាចរណ៍កើតឡើងសរុប៧៣០លើក បើធៀបរយៈពេលដូចគ្នាឆ្នាំ២០២៤ គឺ ថយចុះ៣០៤លើក។ គិតពីខែមករា ដល់ខែមេសា ឆ្នាំ២០២៥ គ្រោះថ្នាក់ចរាចរណ៍បានឆក់យកជីវិតមនុស្សចំនួន៤៧៩ នាក់ និងរបួស១.០១១ នាក់ បើធៀបនឹងឆ្នាំ២០២៤ បានថយចុះ៤២៨នាក់៕

The post រដ្ឋមន្ត្រីក្រសួងមហាផ្ទៃ ថា បើមិនចង់អស់លុយ កុំបើកបរលើសល្បឿនកំណត់ appeared first on Kampuchea Thmey Daily.

លោកស សុខា រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក បានទាញសញ្ញាព្រមានពីហានិភ័យនៃការមិនគោរពច្បាប់របស់សិស្សានុសិស្ស ក្នុងពេលធ្វើដំណើរទៅសាលារៀនដោយមធ្យោបាយយានយន្តកង់ពីរ រួមទាំងម៉ូតូអគ្គិសនី ពោលគឺស្របពេលមេរៀនស្ដីពីសុវត្ថិភាពចរាចរណ៍ បានសម្រេចដាក់បញ្ជូលក្នុងកម្មវិធីសិក្សា ប៉ុន្តែសិស្សមួយចំនួនបែរជាមិនបានគោរពច្បាប់ចរាចរណ៍ទៅវិញ។

ទន្ទឹមនឹងការដើរផ្ទុយពីគោលការណ៍សុវត្ថិភាព និងគោលការណ៍ច្បាប់ លោកឧបនាយករដ្ឋមន្ត្រី ស សុខា បានចាត់ទុក ការបណ្ដែតបណ្ដោយ និងការមិនគោរពច្បាប់ចរាចរណ៍ក្នុងចំណោមសិស្សានុសិស្ស ជាផ្នែកមួយនៃការបណ្ដុះវប្បធម៌មិនល្អទៅថ្ងៃមុខ ដ្បិតសិស្សទៅទទួលការអប់រំទាំងបំពានច្បាប់។

ក្នុងន័យនេះ ថ្លែងចេញពីទិវាសប្ដាហ៍ជាតិសុវត្ថិភាពចរាចរណ៍ផ្លូវគោក ដែលប្រារព្ធឡើងនៅខេត្តព្រៃវែង នាព្រឹកថ្ងៃទី៩ ខែមិថុនានេះ លោក ស សុខា បានណែនាំជាចំហ និងបានបញ្ជាក់ពីការរង់ចាំមើលការអនុវត្តរបស់អាជ្ញាធរ និងកម្លាំងមានសមត្ថកិច្ច លើបញ្ហានេះ។ ប្រមុខក្រសួងមហាផ្ទៃ បានណែនាំឱ្យសិក្សាអនុវត្តការងារនេះឱ្យសកម្មជាមួយគណៈគ្រប់គ្រងគ្រឹះស្ថានសិក្សា ពិសេសនៅថ្នាក់អនុវិទ្យាល័យ និងវិទ្យាល័យ ដើម្បីធានាថា សិស្សដែលធ្វើដំណើរទៅទទួលការអប់រំ គឺពិតជាបានគោរពច្បាប់ចរាចរណ៍ ពាក់មួកសុវត្ថិភាព ដើម្បីការពារសុវត្ថិភាពពួកគេ និងជាការបង្ហាញអំពីគំរូនៃការចាប់ផ្ដើមគោរពច្បាប់ ចាប់ពីពេលពួកគេទទួលបានការអប់រំ។

បន្ថែមពីការគិតគូរអំពីសុវត្ថិភាព និងការអនុវត្តច្បាប់ក្នុងចំណោមសិស្សានុសិស្ស លោកឧបនាយករដ្ឋមន្ត្រី ក៏បានសង្កត់ធ្ងន់ដល់រថយន្តដឹកកម្មករលើសចំនួនកំណត់ រថយន្តបើកបរលើសល្បឿនកំណត់ រថយន្តបើកបរវ៉ាជែង និងរថយន្តដឹកជញ្ជូនទំនិញលើសកំណត់។ ក្នុងន័យនេះ លោកបានលើកទឹកចិត្តឱ្យអាជ្ញាធរពាក់ព័ន្ធ រួមទាំងនគរបាលចរាចរណ៍យកចិត្តទុកដាក់លើការសម្រួលសុវត្ថិភាពចរាចរណ៍ដល់រថយន្តដឹកកម្មករ កម្មការនីនាពេលព្រឹកព្រលឹម និងបន្តអប់រំណែនាំដល់អ្នកបើកបរឱ្យគោរពច្បាប់ គិតគូរលើសុវត្ថិភាព និងលក្ខណៈបច្ចេកទេសរថយន្ត ខណៈការវ៉ាជែង និងបើកបរលើសល្បឿន តែងតែជាមូលហេតុចម្បងនៃគ្រោះថ្នាក់។

គួរបញ្ជាក់ថា ក្នុងរយៈពេល៤ខែ ឆ្នាំ២០២៥នេះ សមត្ថកិច្ចបានចុះត្រួតពិនិត្យរកឃើញយានយន្តល្មើសច្បាប់ចរាចរណ៍ដោយធ្វើការពិន័យសរុបចំនួន២៥.០២៣គ្រឿង និងបានដកហូតផ្លាកលេខយានយន្តមិនប្រក្រតីជាង៧០គូ។ សមត្ថកិច្ចក៏បានត្រួតពិនិត្យជាតិអាល់កុលពេលយប់ រកឃើញអ្នកបើកបរក្រោមឥទិ្ធពលស្រវឹងចំនួន៤.៧១៦នាក់ អនុវត្តតាមនីតិវិធី។ ក្នុងរយៈពេលដដែលនេះ មានគ្រោះថ្នាក់ចរាចរណ៍កើតឡើងសរុប៧៣០លើក បើធៀបរយៈពេលដូចគ្នាឆ្នាំ២០២៤ ថយចុះ៣០៤លើក។ គិតពីខែមករា ដល់ខែមេសា ឆ្នាំ២០២៥ គ្រោះថ្នាក់ចរាចរណ៍ បានឆក់យកជីវិតមនុស្សចំនួន៤៧៩ នាក់ និងរបួស១.០១១នាក់ បើធៀបនឹងឆ្នាំ២០២៤ បានថយចុះ៤២៨នាក់៕

The post រដ្ឋមន្ត្រីមហាផ្ទៃឱ្យសមត្ថកិច្ចអនុវត្តវិធានការចំពោះសិស្សសាលាដែលមិនគោរពច្បាប់ចរាចរណ៍ appeared first on Kampuchea Thmey Daily.

យោងតាមប្រការ៤ នៃប្រកាសអន្តរក្រសួងស្ដីពីនីតិវិធីនៃការដក និងបំពេញពិន្ទុឡើងវិញសម្រាប់បណ្ណបើកបរ គ្រប់បណ្ណបើកបរ គឺត្រូវមានពិន្ទុសរុបចំនួន ១២ពិន្ទុ ហើយចំនួនពិន្ទុនេះ ត្រូវកាត់បន្ថយនៅពេលអ្នកបើកបរបានប្រព្រឹត្តបទល្មើសចរាចរណ៍ផ្លូវគោក ជាអាទិ៍ ករណីកាត់១ពិន្ទុ ទៅលើអ្នកមិនពាក់ខ្សែក្រវាត់ ឬមួកសុវត្ថិភាព ប្រើភ្លើងហ្វានៅពេលជួបនឹងយានមកពីទិសផ្ទុយ បើកបរជាន់តាមខ្សែគំនូសបង្អួតកណ្តាលទ្រូងផ្លូវ បើកបរលើសល្បឿនកំណត់ពី១ទៅ១៩គីឡូម៉ែត្រក្នុងមួយម៉ោង បើកបរនៅពេលយប់ដោយគ្មានភ្លើងគ្រប់គ្រាន់តាមប្រភេទយានយន្ត និងផ្ទុកមនុស្សលើសកំណត់។

ករណីកាត់២ពិន្ទុ សម្រាប់ទៅលើអ្នកបើកបរលើសល្បឿនចាប់ពី២០ទៅ២៩គីឡូម៉ែត្រក្នុងមួយម៉ោង បើកបរបង្កើនល្បឿននៅពេលគេកំពុងជែងខ្លួន បត់ឆ្វេង ឬបត់ស្តាំ មិនបានត្រឹមត្រូវ បត់ត្រឡប់ក្រោយនៅកន្លែងហាមឃាត់ មិនគោរពលក្ខខណ្ឌនៃបណ្ណបើកបរ បត់ឆ្វេង បត់ស្តាំ ឬឈប់មិនបានឱ្យសញ្ញាជាដំណឹង ជែង ឬចៀសមិនបានត្រឹមត្រូវ បើកបរដោយគ្មានទុកចន្លោះសុវត្ថិភាពគ្រប់គ្រាន់ដែលបង្កឱ្យមានគ្រោះថ្នាក់ បើកបរដោយធ្វេសប្រហែស ធ្វើឱ្យរំខានដល់អ្នកប្រើប្រាស់ផ្លូវដទៃទៀត មិនបានឱ្យសញ្ញាជាដំណឹងត្រឹមត្រូវនៅពេលចេញដំណើរ យានមានលក្ខណៈបច្ចេកទេសមិនត្រឹមត្រូវ ផ្ទុកទំនិញមិនបានត្រឹមត្រូវ ចតយាននៅលើគំនូសសម្រាប់ថ្មើរជើងឆ្លងកាត់ ឈប់ ឬចតនៅលើគំនូសតម្រឹមទ្រូងផ្លូវ ដាក់កុមារអាយុក្រោម ១០ឆ្នាំ ឱ្យអង្គុយនៅកៅអីផ្នែកខាងមុខនៃរថយន្ត មិនបានដាក់កុមារអាយុក្រោម ៥ឆ្នាំ ឱ្យអង្គុយក្នុងកៅអីសម្រាប់កុមារអង្គុយ ឬដេកក្នុងរថយន្ត និងគេចពីមន្ត្រីនគរបាលចរាចរណ៍ដែលធ្វើការត្រួតពិនិត្យ។

ករណីកាត់៣ពិន្ទុ ទៅលើអ្នកបើកបរណាដែលឈប់ ឬចតនៅកន្លែងដែលគ្រោះថ្នាក់ ជែងដោយគ្រោះថ្នាក់ បើកបរជែងគ្នានៅកន្លែងហាមឃាត់ ប្តូរទិសគ្មានឱ្យសញ្ញាជាដំណឹង បើកបរឆ្លងកាត់គំនូសបង្ហូតជាប់កណ្តាលទ្រូងផ្លូវ បើកបរលើសកល្បឿនកំណត់ចាប់ពី ៣០ ទៅ ៣៩ គីឡូម៉ែត្រក្នុងមួយម៉ោង បើកបរក្នុងពេលមានអត្រាជាតិស្រវឹងចាប់ពី ០,២៥ ទៅ ០,៣៩ មីលីក្រាមក្នុងមួយលីត្រខ្យល់ ឬចាប់ពី ០,៥០ ទៅ ០,៧៩ ក្រាមក្នុងមួយលីត្រឈាម បើកបរប្រណាំងគ្នាតាមផ្លូវដោយគ្មានច្បាប់អនុញ្ញាត កំហុសនៃការឈប់ ឬការមិនផ្តល់សិទ្ធិអាទិភាពនៅកន្លែងថ្មើរជើងឆ្លងកាត់ មិនគោរពភ្លើងសញ្ញាចរាចរណ៍ពណ៌ក្រហម មិនគោរពផ្លាកសញ្ញាឈប់ ឬសញ្ញាសិទ្ធិអាទិភាព មិនគោរពសញ្ញាបញ្ជាចរាចរណ៍របស់នគរបាលចរាចរណ៍។

ករណីកាត់៤ពិន្ទុ ទៅលើអ្នកបើកបរលើសល្បឿនកំណត់ចាប់ពី ៤០ ទៅ ៤៩គីឡូម៉ែត្រក្នុងមួយម៉ោង បើកបរមិនគោរពសិទ្ធិអាទិភាពនៅត្រង់ផ្លូវប្រសព្វ បើកបរទន្ទឹមគ្នា ធ្វើឱ្យស្ទះចរន្តចរាចរណ៍ មិនបានផ្តល់សិទ្ធិអាទិភាពឱ្យយានយន្តមានសិទ្ធិអាទិភាព ទំនិញធ្លាក់ពីលើយានពេលកំពុងបើកបរ បើកបរបញ្ច្រាសទិសចរាចរណ៍ បើកបរបង្ហោះ រេចុះឡើង ឆាប ឬកៀរ។

ករណីកាត់៦ពិន្ទុ ទៅលើអ្នកបើកបរលើសល្បឿនកំណត់ចាប់ពី ៥០ គីឡូម៉ែត្រក្នុងមួយម៉ោងឡើងទៅ បើកបរក្នុងពេលមានអត្រាជាតិស្រវឹងចាប់ពី ០,៤០ មីលីក្រាមក្នុងមួយលីត្រខ្យល់ ឬចាប់ពី ០,៨០ ក្រាមក្នុងមួយលីត្រឈាមឡើងទៅ ឬមានឥទ្ធិពល គ្រឿងញៀន រត់គេចខ្លួនពេលមានគ្រោះថ្នាក់ចរាចរណ៍ ប្រើប្រាស់ផ្លាកលេខ និងបណ្ណសម្គាល់យានយន្តក្លែងក្លាយ បើកបរល្មើសច្បាប់ស្តីពីចរាចរណ៍ផ្លូវគោក ហើយបង្កឱ្យមានរបួសដល់អ្នកដទៃដោយអចេតនា ហើយបណ្តាលឱ្យអ្នករងគ្រោះអសមត្ថភាពធ្វើការងារក្នុងរយៈពេលស្មើ ឬលើសពី ៨ថ្ងៃ គិតពីថ្ងៃកើតហេតុ ឬស្លាប់ កំហុសមិនរាងចាលនៃការប្រើប្រាស់បណ្ណបើកបរហួសសុពលភាព ឬមិនត្រឹមត្រូវតាមប្រភេទយាន បដិសេធមិនឱ្យធ្វើតេស្តជាតិអាល់កុល ឬសារធាតុញៀន និងផ្ទុកមនុស្សលើទំនិញ។ គួរបញ្ជាក់ថា ក្នុងករណីប្រព្រឹត្តបទល្មើសម្តង ការកាត់ពិន្ទុមិនត្រូវឱ្យលើសពី ៨ពិន្ទុឡើយ។

សូមបញ្ជាក់ថា ឆ្នាំ២០២៤ គ្រោះថ្នាក់ចរាចរណ៍កើតមានឡើង២.៨៤៤លើក បណ្ដាលឱ្យស្លាប់១.៥០៩នាក់ និងរបួស៣.៧៣០នាក់។ ជាមួយគ្នានោះដែរ ការអនុវត្តដកពិន្ទុបណ្ណបើកបរ និងបង់ប្រាក់ពិន័យអន្តរការណ៍ចំពោះអ្នកល្មើសច្បាប់ស្តីពីចរាចរណ៍ផ្លូវគោក បានដាក់ឱ្យដំណើរការជាផ្លូវការនៅថ្ងៃទី១ ខែមករា ឆ្នាំ២០២៣៕

The post ក្នុងឆ្នាំ២០២៤ សមត្ថកិច្ចបានដកពិន្ទុបណ្ណបើកបរជាង៦ម៉ឺនពិន្ទុ appeared first on Kampuchea Thmey Daily.

កាលពីថ្ងៃទី០៥ ខែកញ្ញា លោក ម៉ៃ សុគន្ធ បានបើករថយន្តទាំងខ្លួនស្រវឹង លុះមកដល់ទីតាំងដែលសមត្ថកិច្ចត្រួតពិនិត្យជាតិស្រវឹង ក៏ព្យាយាមបើកបំបុកបារ៉ាស រត់គេចខ្លួនពីគោលដៅនៅត្រង់ចំណុចម្ដុំផ្សារបឹងបៃតង ក្នុងសង្កាត់គោកឃ្លាង ខណ្ឌសែនសុខ រហូតមកដល់ផ្លូវសហព័ន្ធរុស្ស៊ី ម្ដុំមុខវត្តទឹកថ្លា ក៏បុករនាំងចែកទ្រូងផ្លូវចំនួន៣ផ្ទាំង និងប៉ះជាមួយរឺម៉ក កង់បីឥណ្ឌាចំនួន២គ្រឿង បណ្ដាលឱ្យមនុស្ស៣នាក់រងរបួស។

តាមអ្នកនាំពាក្យស្នងការដ្ឋាននគរបាលរាជធានីភ្នំពេញ បន្ទាប់ពីសមត្ថកិច្ច វាស់ជាតិអាល់កុលរួចរាល់ គឺបានរកឃើញថា លោក ម៉ៃ សុគន្ធ មានកម្រិតជាតិអាល់កុលក្នុងខ្លួន ០.៦០មីលីក្រាមក្នុងមួយលីត្រខ្យល់។ ព្រោះតែរត់គេចមិនព្រមឱ្យសមត្ថកិច្ចត្រួតពិនិត្យជាតិអាល់កុល បង្កការខូចខាតដល់ទ្រព្យសម្បត្តិសាធារណៈ និងបង្កការខូចខាតដល់ទ្រព្យសម្បត្តិឯកជន លោក ម៉ៃ សុគន្ធ ត្រូវបានសមត្ថកិច្ចបញ្ជូនទៅតុលាការ ។ យ៉ាងណា តំណាងអយ្យការបានអនុញ្ញាតឱ្យ លោក ម៉ៃ សុគន្ធ ត្រឡប់មកផ្ទះវិញ បន្ទាប់ពីបានសងសំណងជួនភាគីពាក់ព័ន្ធ។

តារាសម្ដែងឌុច លីដា បានបើកបរទាំងស្ថានភាពស្រវឹងខ្លាំង ចូលគោលដៅ​អនុវត្តន៍​ច្បាប់​ចរាចរណ៍​ផ្លូវ​គោក​ របស់អធិការដ្ឋានខណ្ឌ៧មករា​។ ហេតុការណ៍នេះ បានកើតឡើងនៅវេលា​ម៉ោង​១២រំលង​អាធ្រាត្រ​ ឈានចូលថ្ងៃទី​០៨​ ខែកញ្ញា​ ឆ្នាំ​២០២៤។ ភ្លាមៗតារាសម្ដែងរូបនេះ មិនព្រមសហការជាមួយសមត្ថកិច្ច នៅនឹងគោលដៅចរាចរណ៍ឡើយ  ហើយថែមទាំងប្រើប្រាស់ពាក្យសម្ដី និងកាយវិការមិនសមរម្យដាក់សមត្ថកិច្ចទៀត។

សមត្ថកិច្ច បាននាំខ្លួនតារាសម្ដែង ឌុច លីដា ទៅដល់អធិការខណ្ឌ ដោយបានវាស់ជាតិអាល់កុល រកឃើញថាមានកម្រិត ០.៩០មីលីក្រាមក្នុងមួយលីត្រខ្យល់ក្នុងខ្លួន។ សមត្ថកិច្ច បានឱ្យតារារូបនេះ បង់ផាកពិន័យចំនួន២លានរៀល។

ឈ្មោះ មុំ សាម៉េត ហៅ DJ HERO កាលពីម៉ោង១ រំលងអាធ្រាត  ថ្ងៃទី១០ ខែកញ្ញា បានបើកបររថយន្តម៉ាក FORD Raptor ពាក់ផ្លាកលេខ ភ្នំពេញ 2BW-5679  ទិសដៅពីកើតទៅលិច ឆ្លងកាត់គោលដៅអនុវត្ថរឹតបន្តឹងច្បាប់ចរាចរណ៍ផ្លូវគោក និងត្រួតពិនិត្យជាតិស្រវឹងត្រង់ចំណុចបឹងបៃតង សង្កាត់គោកឃ្លាង ខណ្ឌសែនសុខ ទើបសមត្ថកិច្ចនៅគោលដៅនោះឃាត់ហៅត្រួតពិនិត្យ ជាលទ្ធផលអ្នកបើកបរមានកម្រិតជាតិអាល់កុលខ្ពស់ ០,៧៩ mg/L ទើបសមត្ថកិច្ចធ្វើការផាកពិន័យតាមច្បាប់។

ដើមឡើយរឿងរ៉ាវមួយនេះ សមត្ថកិច្ចមិនបានទម្លាយឱ្យដឹងជាសាធារណៈឡើយ។ ប៉ុន្តែក្រោយ DJ HERO  បានបង្ហោះសារលើគណនីហ្វេសប៊ុកផ្ទាល់ខ្លួន ដោយប្រើប្រាស់ពាក្យសម្ដីអសុរសទៅលើសមត្ថកិច្ចខណ្ឌសែនសុខ ទើបក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញទម្លាយឱ្យដឹង៕

ដោយ៖ ង៉ិល ណារ៉ាត់  

The post មិនដល់១សប្ដាហ៍ផង សិល្បករ៣រូប ល្មើសច្បាប់បើកបរទាំងស្ថានភាពស្រវឹងខ្លាំង ផ្អើលអស់មហាជន appeared first on Kampuchea Thmey Daily.

របាយការណ៍ពីនាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ បាន​ឱ្យដឹងថា ការរឹតបន្ដឹងច្បាប់ស្ដីពីចរាចរណ៍ផ្លូវគោក នៅថ្ងៃទី២១ ខែវិច្ឆិកា ឆ្នាំ២០២៣ មានចំនួនគោលដៅសរុប ៤៩គោលដៅ មានយានយន្តចូលគោលដៅចំនួន ៤៤១គ្រឿង (រថយន្តតូច ៤៣គ្រឿង និងម៉ូតូ៣៩៨គ្រឿង ដោយក្នុងនោះ រកឃើញយានយន្តល្មើសសរុបចំនួន ៣៦៤គ្រឿង (រថយន្តតូច ២៩គ្រឿង និងម៉ូតូចំនួន ៣៣៥គ្រឿង) ត្រូវបានផាកពិន័យតាមអនុក្រឹត្យលេខ ៣៩.អនក្រ.បក នៅទូទាំងប្រទេស។

ជារួម លទ្ធផលរយៈពេល២១ថ្ងៃ គិតចាប់ពីថ្ងៃទី១ ដល់ថ្ងៃទី២១ ខែវិច្ឆិកា ឆ្នាំ២០២៣ មានយានយន្តចូលគោលដៅចំនួន ១២ ១៤២គ្រឿង រថយន្តធំ ២៣២គ្រឿង រថយន្តតូច ២ ១៤៨គ្រឿង និងម៉ូតូ ៩ ៧៦៣គ្រឿង។ នៅក្នុងនោះ នគរបាលបានរកឃើញយានយន្តល្មើសសរុបចំនួន ៩ ៣៤៣គ្រឿង (រថយន្តធំ ៧២គ្រឿង រថយន្តតូច ១ ១៦៤គ្រឿង និងម៉ូតូ ៨ ១០៧គ្រឿង) ត្រូវបានផាកពិន័យនៅទូទាំងប្រទេស។

តាមការវាយតម្លៃរបស់របាយការណ៍របស់នាយកដ្ឋាននគរបាលចរាចរណ៍ និងសណ្ដាប់ធ្នាប់សាធារណៈ ការអនុវត្តតាមអនុក្រឹត្យថ្មី ក្នុងការផាកពិន័យយានយន្តល្មើសបានដំណើរការទៅយ៉ាងល្អប្រសើរទទួលបានការគាំទ្រ ពិសេសអ្នកប្រើប្រាស់ផ្លូវទាំងអស់ បានចូលរួមគោរពច្ចរាចរណ៍យ៉ាងល្អប្រសើរ៕

The post ថ្ងៃទី២១នេះ យានយន្ត ៣៦៤គ្រឿង ត្រូវបានផាកពិន័យ ក្រោយល្មើសនឹងច្បាប់ចរាចរណ៍ appeared first on Kampuchea Thmey Daily.

បន្ទាប់ពីបានឃើញការចុះផ្សាយព័ត៌មានតាមបណ្តាញសង្គមទាក់ទងទៅនឹងករណីរថយន្តម៉ាក MAZDA ពណ៌ក្រហម ពាក់ផ្លាកលេខភ្នំពេញ 2BG-0265 បើកបរបង្កបាតុភាពតាមដងផ្លូវសាធារណៈភ្លាម សមត្ថកិច្ចបានធ្វើការស្រាវជ្រាវរហូតដល់ថ្ងៃទី២៦ ខែឧសភា ឆ្នាំ២០២៣ សមត្ថកិច្ចបានធ្វើការកោះហៅអ្នកបើកបរល្មើស ឈ្មោះ ទួន បញ្ញាឧត្តម ភេទប្រុស អាយុ ១៩ឆ្នាំ មុខរបរលក់រថយន្ត ឱ្យចូលខ្លួនមកបកស្រាយបំភ្លឺករណីខាងលើ នៅការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ។

យោងទៅតាម Facebook Nuon Duong Lakhena បានសរសេរផុសលើបណ្ដាញសង្គមហ្វេសប៊ុកថា “ល្ងាចមិញ វេលាម៉ោង ៦:១៥ នាទីល្ងាច ថ្ងៃទី២៤ ខែឧសភា ឆ្នាំ២០២៣ ខ្ញុំបានចេញពីកន្លែងធ្វើការ បើកបររថយន្តលើដងផ្លូវ២៧១ ពីត្បូង ទៅជើង មកដល់ស្តុប ផ្លូវបំបែក ចុះទៅផ្លូវទេពផន និងពេទ្យលោកសង្ឃ មានឧបទ្ទវហេតុដូច វីឌីអូ នេះកើតឡើង។ ដូច្នេះសូមសំណូមពរដល់សមត្ថកិច្ចចរាចរណ៍ មេត្តាហៅគាត់មកអប់រំផង ព្រោះជាផ្លូវសាធារណៈ។ ផ្លាកលេខរថយន្តៈ 2BG-0265″។

ក្រោយពីធ្វេីការសាកសួររួច អ្នកបើកបរល្មើសខាងលើបានសារភាពទទួលកំហុស​ថា ដោយសារមានការខឹងទេីបខ្លួនបេីកបរដូច្នេះ។ ដោយមានការសារភាពកំហុស និងធានាពីឪពុក សមត្ថកិច្ចបានធ្វេីការណែនាំអប់រំ​ ធ្វើកិច្ចសន្យាដោយឈប់ប្រព្រឹត្តអំពើខុសឆ្គងបែបនេះទៀត ព្រោះអាចបង្កគ្រោះថ្នាក់ដល់អ្នកដទៃដែលធ្វេីដំណេីរតាមដងផ្លូវ។

សូមចូលរួមគោរពច្បាប់ចរាចរណ៍ឱ្យបានគ្រប់ៗគ្នា ដេីម្បីកាត់បន្ថយការគ្រោះថ្នាក់ ដែលធ្វេីឱ្យរងរបួស ពិការ បាត់បង់អាយុជីវិត និងទ្រព្យសម្បត្តិផងដែរ៕

The post ថ្ងៃតែមួយនោះ ថៅកែឡានវ័យក្មេងរូបនេះ មិនមែនបង្កបាតុភាពតែមួយករណីទេ appeared first on Kampuchea Thmey Daily.

ការបញ្ឈរជើងមន្ត្រីអនុវត្តច្បាប់ខុសពីតួនាទីភារកិច្ចនោះ ធ្វើឡើងបន្ទាប់ពីមានអាខោនហ្វេសប៊ុកមួយមានឈ្មោះ​ គង្គារ​ លំអរ​មង្គល​ បានបង្ហោះរៀបរាប់ថា “ប្រយ័ត្ន​អ្នកជិះផ្លូវជាតិលេខ​ ៤​ ប៉ូ​លីស​កំពង់ស្ពឺ​ ផាកសាហាវណា​ស់​ដឹងយេីងប្រញាប់​ផាក​ ២០០ ដុល្លារឲ្យបា​ញ់​ចូ​ល​កុងហេីយ​ បន្លំមិនឲ្យវិក័​យទៀត​ហេីយ​ប៉ូលីស​ឈ្មោះ​ដូចក្នុ​ង​ A​BA (Khem Sothea​rith) បា​ន​យ​ក​ទូរស័ព្ទខ្ញុំលុបរូបទៀតចេញទៀ​ត​​ គ្រាន់តែច្ញុំថតប្រាប់អ្នកផ្ទះថាប៉ូ​លី​ស​ចាប់” ហើយករណីនេះមានអ្នកចែករំលេកខមិន និងស៊ែរជាច្រើនផងដែរ។

នៅព្រលប់ថ្ងៃទី១៦ ខែមករា ឆ្នាំ២០២៣នេះ ស្នងការ​ដ្ឋាន​នគរបាលខេត្ដ​កំពង់ស្ពឺ​បានធ្វើការបំភ្លឺថា សូមជម្រាបជូន​សាធារណៈ​ និងអ្នកនិយម​បណ្ដាញទំនាក់ទំនងស​ង្គម​ហ្វេសប៊ុក​ទាំងអស់មេត្ដាជ្រាប​ ៖ កាលពីថៃ្ង​ទី១៦​ មករា​ ២០២៣​នេះ​ មានគណនី​ ហ្វេសប៊ុក​ ឈ្មោះ​ គង្គារ​ លំអរ​មង្គល​ “​ ថាប្រយ័ត្ន​អ្នកជិះផ្លូវជាតិលេខ​៤​ ប៉ូ​លីស​កំពង់ស្ពឺ​ផាកសាហាវ​ណា​ស់​ដឹងយេីងប្រញាប់​ផាក ​200$​ អោយបា​ញ់​ចូ​ល​កុងហេីយ​ បណ្លំមិនអោយ​ វិក័​យទៀត​ហេីយ​ប៉ូលីស​ឈ្មោះ​ដូចក្នុ​ង​ A​BA (Khem Sothea​rith)បា​ន​យ​ក​ទូរស័ព្ទខ្ញុំលុបរូបទៀតចេញទៀ​ត​​គ្រាន់តែច្ញុំថតប្រាប់អ្នកផ្ទះថាប៉ូ​លី​ស​ចាប់”។

យោងតាម​ព័ត៌មាន​ខាងលេី​ ស្នងការ​ដ្ឋាន​នគរបាលខេត្ដ​កំពង់ស្ពឺ​បានឆែក​និងពិនិត្យ​ស្វែងរក​ឈ្មោះ​ K​hem S​othearith​ ដូចគណនេយ្យ​ AB​A​ ដែលអះអាង​ថា​ ជានគរបាល​ខេត្ដកំពង់ស្ពឺ​ ជាលទ្ធផល​គណ​នេ​យ្យ​ABA Kh​em S​othearith​ ពិតជា​របស់លោក​អ​នុសេនីយ៍​ឯក​ ខែម​ សុធារិទ្ធ​ អត្ដលេ​ខ​៧៥​៧៤៣​ តួនាទី​ នា​យ​ផ្នែក​ការិយា​ល័យ​ចរា​ចរ​ណ៍​ផ្លូវគោ​ក​នៃស្នងការដ្ឋាន​នគរបា​លខេត្តកំព​ង់​ស្ពឺ​ ។

ស្នងការនគរបាលខេត្តកំពង់ស្ពឺបានលើកឡើងថា កាល​ពី​ថ្ងៃទី​១៤​ ខែមករា​ ឆ្នាំ​២០២៣​ សមត្ថកិច្ច​នគរបាល​ចរាចរណ៍​ខេត្ដ​កំពង់ស្ពឺ​ បានបំពេញ​បេសកកម្ម​​រឹតប​ណ្ដឹង​ច្បាប់​ចរាចរណ៍​ផ្លូវគោក​ នៅចំណុច​ផ្លូវជាតិលេ​ខ​៤​ គីឡូម៉ែត្រ​ (៧៩-៨០​) និងបានឃាត់​រថយន្ដ​កូរ៉េ​ដឹកទំនិញ​សំពីងសំពោង​មួយគ្រឿង​ ស្លាក​លេខ​ភ្នំពេញ​ 2BP-46​6​2​ ក្នុងទិស​ដៅពីខាងកេីតទៅទិសខាង​លិច​ ឆ្ពោះ​ទៅ​ខេត្ដ​ព្រះសីហនុ​​។ សមត្ថកិច្ច​បានឃាត់ពិនិត្យរក​ឃេីញអ្នកបេីកបរ​ឈ្មោះ​ នី​ វ៉ាន់ហេង​ ភេទប្រុស​ អាយុ​២២ឆ្នាំ​ គ្មាន​ប័ណ្ណ​បើកបរ​ និ​ងដឹក​ទំ​និញ​សំ​ពីងសំពោង​ល្មេីស​ច្បាប់។

ក្នុងករណីនេះ សមត្ថកិច្ច​បានប្រាប់ថា​ បទល្មេីស​ខាង​លេី​គឺពិន័យ​ ១,២០០,០០០​រៀល​ និង​ពិន័យ​ ១​៥០,០០០​ រៀលប​ន្ថែ​ម​​ល្មេីសទំនិញសំពីងសំពោង។​ ពេលនោះ​អ្នករួ​មដំ​ណើរ​ និងជាម្ចាស់សំអាងការ​បា​ន​ប្រាប់ថា​ សុំសម្រួល​ដោយសុំជូនជាប្រាក់​ ២០០ដុល្លា​រ តែសុំលេខ​ ABA ដេី​ម្បី​ឱ្យអ្នកផ្ទះបា​ញ់លុយចូលព្រោះខ្លួនមិ​នមាន​ប្រាក់ជាប់ខ្លួន។ ក្រោយបាញ់លុយ​២​០០​ដុ​ល្លា​រួច​ក៏​បានបន្ដដំណេី​រទៅ​បា​ត់​។

បច្ចុប្បន្ន​ស្នងការដ្ឋាន​នគរបាល​ខេត្ត​កំពង់ស្ពឺ​ បានស្រាវជ្រាវ​និងចំណាត់ការ​លេីមន្រ្ដីចរាចរណ៍ទាំ​ង​ ១​០ ​នាក់​យកមកទុកបណ្ដោះអាស​ន្ននៅការរិ​យាល័យ​បុគ្គលិក​ អនុវត្ត​តាមវិន័យបទបញ្ជាកងកំលាំងនគ​របាលជា​តិ​ និងបន្ដធ្វើ​ការ​ស្រាវជ្រាវ​ដេីម្បី​ចំណាត់​ការ​នីតិវិធី​បន្ដ​។ ចំពោះ​ម្ចាស់​រថយន្ត​ខាងលេី​ស្នងការដ្ឋាន​នគរ​បា​ល​ខេត្ត​កំពង់ស្ពឺ​ និងស្រាវជ្រាវ​ទាក់ទង​ដេីម្បី​សុំធ្វេីកា​រជួប និងប្រគល់ថវិកាចំនួន២០០ដុល្លា​ជូនគាត់វិញ។

អាស្រ័យ​ហេតុនេះ​ សូមសាធារណៈជន​និងអ្នកនិ​យ​ម​បណ្ដាញទំនាក់ទំនងស​ង្គម​ហ្វេសប៊ុក​ មេត្ដា​ជ្រាប​និងចូលរួមសហការផ្ដល់ព័ត៌មាននានាពាក់ព័ន្ធ​ និងអំ​ពេីអសកម្មរបស់មន្រ្ដីនគរបាលដែលបានខុសឆ្គងនិ​ងវិជ្ជាជីវៈដេីម្បីរួមចំណែកស្ថាបនាកែលំម្អរចំណុចខ្វះខាតដោយបុគ្គលមួយចំនួនតូច៕

អត្ថបទ៖ ភួង រដ្ឋា

The post បញ្ឈរជើងមន្ត្រីចរាចរណ៍ខេត្តកំពង់ស្ពឺ ១០ នាក់ ក្រោយ​បែកធ្លាយ​ផាកពិន័យ​ មិនចេញ​វិក្កយបត្រ appeared first on Kampuchea Thmey Daily.